شكولينا

الجزء العاشر

هل تعلم انه عند الوصول إلى درجة الخشوع في الصلاة يتم فرز هرمون الإندروفين في الجسم والذي يعادل تناول 6حبات مورفين لعلاج الإكتئاب!
يكفينا قول رسول الله صلى الله عليه وسلم ...
"ارحنا بها يابلال"
الصلاة أولا💕💕💕
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 8:26 مساءا..
نزل من شقته..كان يبي يتمشى شويه في جنان الحوش بروحه..يبي يعيش لحظه هدوء وتأمل بش يريح اعصابه..
قعد يمشي حوالين الحوش وهو يفكر في هلبه حاجات...
بس أهمها الحدث اللي صاير اليومين الاخيرات...
وهو يمشي شاف اخته واقفه في التركينه وتتكلم بالتليفون..
ابتسم ع جنب ومشالها..
رنده:ايه حبيبي..خلاص الساعه عشرة..ربي مايحرمني منك يارب..ولا اني ياغالي..
••وهو جاي سمع كلامها الأخير عرف ان المكالمه خاصه..
لف ورجع....وهو يفكر وعقله الخطير شن جابله من افكار...
سفيان في نفسه..
"تو هادي اللي تكلم فيه هكي ومالهمش 4شهور متزوجين تبي تقنعني انها ماكانتش تعرفه قبل يتزوجها..ولاماكانتش تكلم فيه ايام الخطوبه! وربي لو نعرف انها كانت مقرنتنا ياويلها"
وكمل طريقه وهالأفكار العظيمه تصول في راسه وتجول..
لعند مابان عليها من الجهة التانيه..
رنده من الخوف نست انها متزوجه قالت لراجلها وهي خايفه:خوي جي هي باي باي باي...وسكرت..
وصل فيها سفيان..شدها من قصتها"جمتها" وقال:شن جو..
رنده ابتسمت بإرتباك؛تمام..
شدها من شعرها وقال:تمام..جو مليح..
شدت رنده شعرها وهي تتوجع وتضحك قالت:ايه..
طلق شعرها وخبطها ع ظهرها وهو يقول:كويس..
رنده عيونها قريب طلعوا وقلبها تقلع من قوة الضربه ومع هدا مازال تضحك وهي تقول:قتلتني..
حط ايديه في نصه وشبحلها برفعة حاجب من فوق لتحت:شن حاله محمد..
وجهها ولى احمر وهي تقول:الحمد لله..
سفيان؛محمد متخرج من ادارة اعمال ولا؟
رنده:ايه..
سفيان هز راسه وقال:امم وانتي لغات..
رنده بضحكه:خيرك سفيان..
قعد يشبحلها بنظرة شك بعدين ابتسم وقال:خيرني ماخيرني شي..امم..قولي شن جو امي..
خفت ابتسامه رنده وهي تقول:اهو ماشي حاله...
سفيان:نبي نعرف شن غير رايها بسرعه هكي وخلاها تتقبل الموضوع..
رنده:اللي صار صار بعد خشت بيها عمتك ربيعه لدار رتيل مانيش عارفه شن قالتلها بش خلتها تغير رايها..
سفيان؛اممم..ربيعه...هز راسه وقال..ان شاء الله خير..
شبحلها ع جنب وقال..باهي خشي داخل وقولي لزهور تركب تحددلي حوايجي..
رنده:ادير في العشي خل بعد مايطيب تركب..
سفيان:اني قلت تركب توا..خشي كلميها...
رنده تنهدت وقالت؛باهي..
ولفت ومشت للكوجينه وهو كمل تمشايه...
🍀🍀🍀🍀🍀🍀
"معناها بتعدي لطرابلس كان صار منه""
لينا بضحكه:اها..
الحازة سكتت وهي مضايقه..
لينا:خيرك يما..
الحازة بضيق:والله يابنتي موضوع الدكتور اللي يخدم معاك قاعد خير ع الاقل هنى قريب عليا وناس منا وفينا وكيفنا
لينا:شن قصدك يما؟
الحازة؛مانبيك تعيشي بعيد عني يابنتي اقل شي كان صار معاك شي ولا اضايقتي تجيني طول كيف خواتك لكن طرابلس وناس مانعرفوهم ولايعرفونا ولاطباعهم كيف طباعنا ولا هم كيفنا في شي..حكاية تخوف شوي..
لينا؛عندك حق تخافي حتى نا خايفه شوي بس يما عادي ياما منهن متزوجات بعيد عن هلهن كيف نساوين خوتي وان شاء الله كيف مانحنا نعاملوا فيهم يعاملوني عربي..
الحازة:مسرع ولوا عربك..
ضحكت لينا بخجل وقالت؛يعني في حال صار يما..
الحازة تنهدت وقالت؛لكن اسمعي راني بنشرط عليهم..
لينا بإستغراب:ليش يما انتي ماشرطي في  خواتي قتي اللي يجيبوه باهي..
الحازة:مش كيف بعضهم يابنتي بعدين خليني ندير اللي فيه مصلحتك بنتي..
لينا تنهدت بعدين هزت راسها وقالت:باهي يما ديري اللي يريحك..
الحازة؛ربي يجيب اللي فيها الخير يارب..
لينا بإبتسامه:آمين...
🏵🏵🏵🏵🏵🏵
ويعدي يوم الاربعاء....
ولينا تجهز لجية اهل عدنان...
دارت الحلو في الحوش..والموالح...
بس قعدت في حيرة من امرها وهي تفكر كيف تكون طلتها هل بسيطه وعاديه او العكس...
لهذا استشارت صاحباتها وخواتها..
••امل:اها البسي قفطان سمح ولودي ع روحك..
.........
مريم:ماتبالغيش واجد خليهم يشوفوك ع طبيعتك ويعرفوا انك سمحه في كل حالاتك..
..........
هناء؛كلام صاحبتك مريم صح بس ماتبالغيش وتطلعي هكي بلاشي ديري حاجات بسيطه..
..........
امال؛تو نجي ونختارلك شن تلبسي  ونديرلك شعرك...
••لينا بحيرة؛زادو حيروني اكثر...نخليها ع امال وخلاص..
وقعدت تخدم ع طلبيات الشكولاته ولسانها يلهج بذكر "الإستغفار"
🍀🍀🍀🍀🍀
يوم الخميس ...
بعد الظهر...
"ردوا بالكم من عمتي دواها ماكلتها راكم تغفلوا ع حاجه"
زهور:حاضر عمتي..
رتيل:امي امتى بتروحوا؟
وجيهه:مروحين في نفس اليوم ان شاء الله في الليل.
"مسافرين جوا"..
رتيل؛تمشوا وتجوا بالسلامه..
وجيهه:امين..هي بالسلامه توا..
ومشت وجيهه طلعت وكناينها وبنتها طلعوا وراها يسقدوا فيها..
ركبت وجيهه سيارة ولدها مروان اللي كان فيها شيبانها..
وتحرك مروان وطلع بالسيارة من الحوش..
رتيل:ان شاء الله تصير حاجه ومايصيرش منها هالخطبه السودا..
منى:قولي ان شاء الله تصير حاجة خير...
رتيل:ايه حقه يارب تصير حاجه خير ومايصيرش منها هالخطبه..
ومشت خشت داخل..
منى بقرف:لاتطاق الفرخه هادي..
زهور ضحكت بعدين قالت؛تعرفي منى اني فرحانه لموضوع عدنان..
منى:علاش..
زهور:كان صار منها وخداها كلهم بيلهوا فيها هي ويفوتونا واحتمال العذاب كله ينزلوا بيه عليها ويخلوها ماتقعمزش بكل بش يفددوها ويطيروها..
منى بضحكه:والله فكرت فيها هكي..واك يازهور انتي وحده مش ساهله بكل..
ضحكت زهور وهي تقول:هيا خشي خشي..
وخشوا الزوز وهما يضحكوا وكملوا هدرزتهم وهما يتخايلوا كيف حيتغير حالهم بعد توصل سلفتهم الجديده الغير مرغوب فيها..
هما جابوهم لولادهم وبرضاهم ومورينهم الويل...فشن حيديروا في لينا!!؟
🍀🍀🍀🍀🍀🍀
"بتجبديلها شعرها "
امال:لا يقعد كيف ماهو بس بنديرله تسريحه بسيطه وسمحه..
هناء:ايوه هكي خير خليها ع طبيعتها..
شدت امال خدود لينا وهي تقول:والله لما يهبلن فيك ياسمحه كيف ماهبل فيك ولدهم..نزلت ايديها وقالت..قداش خاطري نشوفه هالعدنان..
هناء؛والله حتى نا سمح واجد هو..
لينا بإبتسامه خجوله؛واجد..
امال :لما بيجوا بنرقا فوق نشوفه من روشن المخزن..
هناء:باهي اللي ذكرتيني بيه حتى نا بنعدي معاك..
ولينا تسمع فيهم شن يقولوا وهي تضحك...
🏵🏵🏵🏵
وتعدي الساعات...
ويحين وقت صلاة العصر...
وقرب موعد جية اهل عدنان..
وقلب لينا تزيد دقاته من التوتر والخوف...
بعد الصلاه...
لبست لينا الفستان اللي اختارته امال..وبعدين امال بدت اديرلها في شعرها..
وهدا كله ولينا مشغوله بالإستغفار...
••وعلى بعد مسافه بسيطه منها في نفس الحوش...
كانوا نساوين خوتها موجودات في الصاله وكل وحده فيهم بكامل اناقتها..
وطبعا  قارنات الروس ويحللوا في اللي يشوفوا فيه قدامهم...
نجمه: متأكده ان الجيه هذي مش جية تعارف بس..
ورده بضحكه ساخره:امالا جايين يخطبوا قصدك..مستحيل انتي لو شفتيه صاحب عبدالله هدا..تقول انجليزي حتى من عيونه زرق...
نجمه:مش عارفه اللي نشوفه توا قدامي يقول هكي انتي لاحظتي لينا كيف مختفيه .
ورده وهي تفكر في كلام نجمه:معقوله!...
في لحظه اذكرت لما شافه عبدالله واقف قدام المستشفى لما جو بيروحوا بلينا..
ارتسمت ع وجهها ملامح الدهشه وهي تقول:اااه..هدا علاش كان واقف قدام المستشفى يومها..
نجمه:من هو؟
ورده؛هو هدا صاحب عبدالله..مايطلع منها هاللينا ياما تحت السواهي دواهي ياكبدي..
نجمه:قصدك علاقه هو وياه!!
ورده :من غير كلام..ومش بعيد حتى طريقة تعارفه بعبد الله مش صدفه...
نجمه:من زمان نقول فيها لينا هذي مش كيف ماتبان طيبه وهاديه وفي حالها..من تحت لتحت..
ورده؛عليك حظ عندها الزفت..شوفي هي فشن طاحت وحني فشن طايحين..
نجمه:حظ القبايح ياحنه..
"يما..ناس قريب يوصلوا"
طلعت الحاجه الحازة وهي لابسه قفطان قنين وانيق..بش تطلع تستقبلهم..وين خطمت ع الصاله قالت لكناينها:هي صبن..
ناضوا وردة ونجمه ولحقوها..
اما هناء وامال خلوا لينا بروحها وركبوا فوق السطح واستقروا في دار الخزين ورا ستار الروشن..
شافوا النساوين خاشات..
وبعدهم عدنان والحاج وبوهم وخوتهم يرحبوا بيهم..
امال:الله يبارك تقول تركي..
هناء بضحكه:مايطلع منها لينا هدي..
امال وخرت وهي تقول:هي تعالي انزلي..
هناء:هي..
••لوطا..
الحازة وهي ترحب بضيوفها:مرحبا مرحبا..
ربيعه:رحب بيك..
ووجيهه جتها ورده سلمت عليها..
ركزت في شكلها وشكل سلفتها وقعدت تسأل في نفسها
"زعمه شن من يكونوا هادم"
اللي جو مع وجيهه تلاته من حمواتها وسلفه من سلفاتها..
وكلهم كانوا مركزين في ادق التفاصيل بالذات لون البشره..
كان عند وجيهه امل انه يكون سمار خفيف بس تحطم هالأمر وين شافت لون بشرتهم زي لون الشوكولا الخام بالزبط..
وغير هدا كله..
لاحظت ان اهل لينا ناس بسطاء وحياتهم جدا بسيطه..وحوشهم بسيط ..مافيشي اثات فاخر ولاتحف غاليه..
وزي نظرة بعض الناس لذوي البشرة السمراء وهدا راهو موجود وواقع ومش من وحي الخيال..بل هو حقيقه صادمه موجوده لعند وقتنا...
يقرفوا من ذوي البشرة السمراء ومن حياتهم..زي وجيهه توا..
وجيهه"ريحة البخور تقرف "...
الحازة:تفضلوا تفضلوا..
هنيه:يزيد فضلك..
قعمزوا كلهم..
ع خشة امال وهناء وهما يقولوا:السلام عليكم..
الحازة:هدين بناتي الكبار متزوجات الزوز..
وسلموا هناء وامال عليهم..
والزوز حسوا ان في وحده فيهم سلامها بارد وملامح وجهها جافه..
ربيعه ركزت ع نقش امال وهناء لاحظت انهم قنينات ويختلف عن الشكل المتعارف عليه عند ذوي البشرة السمراء...
بينما الاجواء كانت عند الرجاله قمة في الاريحيه والحاج شريف انسجم في الهدرزة مع الحاج عبدالودود وهالشي كان مفرح عدنان..بس خوفه الاكبر كان من امه لو دير موقف تحرج فيها لينا واهلها..
...............
امال:تحسيهن كلهن حبابات..ماعدا وحده من اول ماجت وهي قالبه وجهها وماريت سنونها بكل.
لينا بقلق:زعمه امه.؟
امال:مش عارفه بس سمحه واجد واجد وتبان اصغر من امي بوين..
هناء:نحس فيها امه فيها منه...
لينا قعدت ساكته وهي تفكر بقلق...
🏵🏵🏵
بعد شويه بدوا يضيفوا فيهم..
والحازة وبناتها وكناينها لاحظوا وجيهه الحاجه اللي يمدوهالها تاخد منها...بعدين تحطها عند رجليها لاتاكل ولاتشرب...
ربيعه:ايه عدنان ربي يحفظه اني والزوز اللي حداي ع يسار هنيه وفاطمه عماته...اللي ع يميني مرت عمه واللي حداها امه..وجيهه..
قلب الحازة انقبض..
وامال وهناء شبحوا لبعض..
وجيهه:نظام حوشكم نظام الحياش القديمه مانحسابش مازال في منهم الحياش هادم..
ربيعه شبحت لوجيهه...
هناء:ايه بانيه جدي وباتي ماباش يطلع منه..
وجيهه هزت راسها وهي ساكته..
ربيعه وهي تحاول ترقع الموقف:والله عنده الحق البركه كلها في الحياش هادي..عكس حياشنا توا كلها طاقه سلبيه..
الحازة:ايه حوشنا هدى يفتح النفس ع كل شي ومشروح...
فاطمه:ايه صح مريح..
وجيهه:المهم توا..معاش في وقت نبوا نخشوا في الموضوع طول..
قعدوا يشبحولها كيف تتكلم بكبر واضح.
وجيهه:ولدي جابنا هني قال بنتكم عجباته ويبيها وينها هي..
ربيعه"ااخ منك ياوجيهه اخ"..
الحازة ابتسمت بالسيف وقالت لأمال:صبي نادي اختك..
ناضت امال وهي مضايقه ومشت طلعت من حداهم..
............
فتحت باب دار اختها وهي تقول:تعالي لينا..
لينا حطت المصحف ع تركينه وناضت تشوف لروحها في المرايه وهي تقول..
لينا:الجو تمام امال..
امال ابتسمت مجامله وهي تقول:ايه تمام..هي اطلعي..
شبحتلها لينا وقالت:سمحه..
امال بإبتسامه:تهبلي...
ابتسمت لينا بعدين خدت نفس وطلعت واختها وراها...
كانت لينا كل ماتزيد تقرب خطوه للصاله قلبها يدق بقوة وتزيد تتوتر..
لين وصلت فيها وخشت عليهم وهي تقول السلام عليكم..
ربيعه تلقائيا ابتسمت وين شافتها وشبحت لخواتها اللي كانت باينه ع وجوههم ملامح الاعجاب..
والاستغراب اللي بدت ع وجه وجيهه وين شافت لينا.
سمراء صح بس جدا جميله وجمالها مغطي ع لونها..
طولها قدها..الفستان اللي لابساته كان مبين انها صاحبة قوام رشيق وقد ممشوق...وشعرها المجعد الملفوف والمرفوع كان يبان عليه انه طويل...والاغرب بالنسبه لوجيهه انه راد طلتها تألق..
كان للينا بريق وجاذبيه..كانت تلمع في عيون من يشوفها وينجذبلها لااراديا ..
🍁وممكن اكبر سبب فهالشي هو القبول اللي يطرحه الله في عباده القراب عليه..عباده اصحاب الإيمان القوي...والقلب الابيض...والنيه الصافيه..ينزل الله عليهم محبه منه ويخلي الناس تحبهم بدون ماتحس...🍁
••وصلت لينا في وجيهة..طبست تسلم عليها...
شمت عليها وجيهه ريحه حلوة استطلفتها..
لينا:كيف حالك صحتك..
ابتسمت وجيهه وهي تقول:الحمد لله...
مشت لينا قعمزت حدا خواتها...
والعيون عليها تتفحص فيها وتتمقل..
اما وجيهه كانت مستغربه في روحها ومش فاهمه شن صارلها فجاة بعد ماشافت لينا..
وجيهه بإبتسامه؛انتي اللي دايرتيها الشكلاطه ولا؟
لينا بإبتسامه:ايه..
هزت وجيهه راسها وقالت؛ماشاء الله بنتها مختلفه وتقعد في الفم..
لينا:صحتين وتسلمي..
وجيهه:ولدي قال تخدمي ممرضه..
لينا:ايه اني متخرجه من التمريض..
وجيهه:لكن بعد الزواج الخدمه ممكن معاش يصير منها..
قعدوا يشبحوا للينا وهي ترد..
لينا؛لو صار نصيب نحاول نقنعه لو ماباش نبطل ماعنديش مشكله بس خدمتي في الشكولاته مش حنخليها هدا شرطي الوحيد..
ربيعه:ع العموم هو طالب يقعمز معاك ويوضحلك بعض الأمور لو مافيش مانع..
الحازة:ع باتها وخوتها...
................
عبدالودود:حقك ياولدي حقك..
الشريف؛خل من توا يتفاهم هو وياها ع الامور المهمه ويعرف شروطها..
عبدالودود:حقه وحقها..
عدنان ابتسم بإرتياح..
اما خوتها الزوز ماكانش عاجبهم..
عبدالسلام مايبيهاش تقعمز معاه قبل مايصير شي رسمي.
اما عبدالله مايبي شي يصير من اصله..يبي لينا تقعد تخدم عليه هو وعيلته....
🍀🍀🍀🍀🍀
قامت الصفرة وقالت:هي تعالي منى..
ناضت منى ومشت ورا سلفتها لدار التقعميز..
وصلوا فيها وخشوا..
لما خشوا عفاف ورنده اللي كانوا يهدرزوا سكتوا..
جتهم زهور مدتلهم القهوة..
عفاف:جت في وقتها..
رنده:ماقالتش امي مروحين بالزبط؟
زهور وهي تمدلها في القهوة:لالا..
عفاف:ركبتوا قهوة للراجل اللي جي لسفيان..
زهور قعمزت وهي تقول:ايه..خدت فنجانها وقالت..ديما يحجم سفيان؟
رنده:وان شاء الله انتي ماتعرفيش ان راجلك يحجم فالعام مرتين!؟
عفاف:من لما كان يقرا في الثانوي سفيان محافظ ع الحجامه..
رنده رفعت حاجبها وقالت؛شوركم مافيش بيناتكم كان خير ومسا الخير..
زهور وهي تحاول تخفي احراجها:لانهدرزوا لكن الحجامه ماجتش في دوة قبل...
عفاف رشفت من فنجانها بعدين قالت:سامحيني فيها زهور..خطت فنجانها وقالت..انتي خايبه هلبه..
رنده؛لين فايت فيها..
زهور وهي في قمة الاحراج؛فاهمين غلط انتم هي في حاجات ماتجيش في الهدرزة بس..
عفاف:تس خليني من الموضوع هدا..اني نحكي بصفه عامه..انتي مش مركزة ان عندك راجل
البنات يجروا في جرته وواحد زيه يبي مراة حادقه وراده بالها وتعرف كيف تخليه مايشوفش غيرها..لكن مافهمتكش كيف غشيمه ماتعرفيش..
زهور بلعت ريقها وهي شاده دموعها بقوة قالت؛باهي انصحيني انتي كانك شايفتيني غشيمه افتحيلي عيوني..
ومنى تشرب في القهوة وهي تشوفلها..
عفاف كيف جت بتتكلم شافت لرتيل بعدين غيرت عيونها عنها وقالت:تس افف..تو نهدرزوا بعدين..
رنده بضحكه:شبحتي فيها شبحه تهدرزي ماتهدرزي ماهو صاير منها..
زهور ناضت بتطلع..
عفاف:قصدك حرجتي ولاكيف..
رنده:اطربقي...
زهور وقفت في الباب وشدت روحها بقوة والتفتت وقالت:ماعندي علاش نحرج ماشيه بنبدا في العشي..
وطلعت...
رنده:الله يسامحك يانوريه وخلاص..
عفاف:هي على نياتها تحسيها مع الوقت تعرف وتتعلم..
منى"انتي اللي على نياتك ياعفاف"
رنده شبحتلها وقالت؛نوضي عاوني سلفتك للا..
منى:نكمل قهوتي ونوض..
رنده:سقدي روحك...
رتيل؛شوفي رنوده القفطان هدا..ومدتلها التليفون..
خداته رنده وشافت الصورة وقالت:يهوووس..شوفي فوفو..
عفاف شافت الصورة وقالت:ليك من عند غادي...
رتيل:نتخايل فيها لابساته تطلعي صاروخ ارض جو..
رنده وهي مبتسمه بغرور:طبعا حبيبتي..
ناضت منى ومشت طلعت...
منى بهمس:قداد ياربي قداد..
وصلت في الكوجينه وخشت لقت زهور تقطع في الدجاج بعصبيه وهي تبكي..
منى بضيق:ماتعدليش عليهم زهور..
زهور وهي تبكي:عندهم حق يامنى عندهم حق..
منى تنهدت بضيق وقالت:حولي حولي خليني نكمل عليك..
زهور:لا تو نكمل بروحي..
منى"الحق فيا اني"..
ومشت للاوندينو بش تغسل فنجانها...
🍀🍀🍀🍀🍀
"عافيه يالينا"
لينا ضحكت بخجل وعيونها متواريات عنه حياءا..
عدنان بإبتسامه؛كلميني عادي مش غلط راهو مقابله شرعيه هادي..
رفعت عيونها وشبحتله وقالت بإبتسامه؛الحمد لله..كيف حالك انت..
عدنان؛لاااا..لازم نتفقوا من توا ماتغيريش لكنتك في الكلام معاي ولامع اي حد...كلميني باللكنه متاعكم..
لينا بإبتسامه:رديت عليك بأسلوبك انتي قتلي عافيه ونا قتلك كيف حالك..
عدنان ابتسم وهو يشوف لعيونها..
لينا ماقدرتش تتحمل عيونه ونظراتهم نزلت عيونها طول..
هو ابتسم وقال:ايه يالينا قولي عندك سؤال او شروط..
لينا شبحتله وقالت:سؤال وشرط وطلب..
عدنان ضيق عيونه بإبتسامه وقال:اللي هما؟
لينا :اول شي طلب..نبي نقعد نخدم اني مانحبش نقعد في الحوش واجد ونحب خدمتي..
عدنان؛ماعنديش مشكله..
ابتسمت يإرتياح وقالت:كويس..وشرطي نقعد نخدم ع الشكلاطه ونبيعها..
عدنان:الموضوع هدا مدايرله برنامج في راسي..
لينا؛برنامج شني؟
عدنان:في وقته تعرفيه..
لينا:يعني قلبت بالشرط..
عدنان؛اكيد..وتوا وقت السؤال..
تنهدت لينا وقالت؛ونبيك تجاوبع بصراحه..
عدنان:ان شاء الله..
لينا شبحتله شويه بعدين قالت؛هلك راضيين ع الموضوع..
عدنان عقد حواجبه وقال:ليش سألتي السؤال هدا؟
لينا؛في شي مش مريحني ونا عارفه اللي كيف وضعنا يعانوا من مشاكل نقصد اللي البنات اللي كيف لما يكون زوجها فارضها ع هله فرض
عدنان ابتسم  وقال؛كويس انك فتحتي الموضوع هدا..لينا نبي تحطي في عقلك حاجه وحده مهمه..لو صار نصيب وبإذن الله صاير لازم تعرفي ان مافي حد مهم في حياتك غير اني..الامر والنهي يجيك مني اني وبس..واجبك تخدميني وتخدم حوشك زي مااني واجب عليا نخدمك ونخدم حوشي..يعني اللي رضاها وقبوله ليك مهم اني وبس..في نفس الوقت العلاقه بينك وبين عيلتي نبيها تكون علاقة احترام متبادل..لو مااتفقتوش هما في حالهم وانتي في حالك..
لينا هزت راسها بإيجاب..
عدنان بإبتسامه:واني مش نخلي حد يوصل فيك ولايوجعك ولايضايقك..بس نبيك تحاولي تخشي في جو العيله وحاولي تكسبيهم مانلزمك بشي راهو نقولك حاولي بس..
ابتسمت لينا وقالت:ان شاء الله..
عدنان:المهم انك فهمتي عليا..
لينا هزت راسها بإيجاب وهي مبتسمه...
هو ابتسم وقال:كويس..
لينا قعدت تشبحله وهي مبتسمه..
وهويبادل فيها نفس النظرات..
تحشمت لينا ونزلت عيونها..
ضحك بعدين قال:عافيه يالينا..
لينا ضحكت بخجل..وهو قعد يتأمل في ضحكتها وع وجهه ابتسامه حب..وقلبه يدق بقوة وكل نبضة فيه مليانه مشاعر حلوة لقطعة الشوكولا المقعمزة قدامه...
🍀🍀🍀🍀🍀
في دار التقعميز..
اغاني قنوات الأطفال قالبتها قلبه..
صغار عفاف مقعمزين قدامه يتفرجوا...
وعفاف ورنده مقعمزين يهدرزوا ورنده لاهيه بتليفونها..
ع خشته هو وقف في الباب وقعد يتفرج ع بنت عفاف الصغيره كيف ترقص..
سفيان :حبي...قلبي..
شبحوله البنات وهما مبتسمات..
والبنيه منسجمه مع الاغنيه انسجام تام...
سفيان؛رنا ياشفشه..
عفاف:تنسى الدنيا ومافيها قدامهم..
خشلها وهويقول:ماتبيش تعدلي عليا يامعفنه..
وصل فيها وقعمز ع ركابه وشدها وهويقول:ماتبيش تعدلي عليا اها..وقعد يعض فيها وهو يقول...اها ماتبيش تعدلي ..الخلايق هادم اهم مني...قولي..وبدي يدغدغ فيها وهي تضحك..
وخواته يشبحوله وهما يضحكوا..
بعدين خداها ومشي قعمز حدا خواته وحطها ع حجره غمض عيونه بشده وفتحهم بعدين قال؛دخت..
عفاف:ماخديت شي..
سفيان:تس..وشبح لرنا اللي كانت تلعب بالبطمه متاع
الماليه متاعه قرصها من خدها..
ورنده تنادي بصوت عالي؛زهور..يازهور...
عفاف:مفروض شربت عصير بعد كملت..
سفيان:عادي مش مشكله..
ع خشة زهور شبحاته وقالت؛نعم..
رنده؛جيبي لراجلك حاجه حلوة وعصير مادابيك راوخ..
زهور بقلق:دخت سفيان..
سفيان؛تي عادي مش مشكله...
هي طول مشت تجيبله حاجه..
عفاف؛ضاعف الفترة الاخيره..
سفيان:احسن..تي حولي يابنت القردة قطعتيها..
عفاف ضحكت..
ع خشة زهور بسفرة فيها حكه راوخ وكيكه..
حطتها قدامه وقالت؛تبي حاجه تانيه..
سفيان:تس..
زهور مشت قعمزت مقابلاته..
هو خدي الكيكه وفتحها وقعد يوكل في رنا..
جوها البنات التانيات وهما يقولوا؛عطينا خالو..
هو ضحك وقسملهم منها وعطاهم وخلا الباقي لرنا اللي قعد يوكل فيها..
وزهور تشبحله وقلبها يوجع فيها...
تشبح في حنيته ع الصغار وتقول في نفسها لوجبت عيل اكيد حياتنا حتتغير....
وهالعيل ماباش يجي لتوا...وهي صبرها قرب ينفد...
عفاف؛شن جو الخدمه سفيان..
سفيان؛تمام...عندي سفرة بعد رمضان ان شاء الله..5يوم العيد..
زهور:وين؟
رنده:قصدك حتى هادي ماتعرفيهاش!!؟ياوكستي...
زهور انحرجت وقعدت ساكته..
سفيان تجاهل كلام رنده وقال؛المانيا بنقعد اسبوعين..
عفاف:حتى البعثه اللي طلعتلك قبل جاتك في المانيا..
تنهد سفيان وهز راسه بآيجاب..
رنده بضحكه:الله يسامحك يانوريه..
سفيان:الله لايسامحها..
ضحكت رنده وهي تفنص..
وعفاف وهي تشد في ضحكتها:نوضي زهور شوفي العشي..
زهور ناضت طول وطلعت ودموعها طاحوا..
خشت للكوجينه وهي تقول؛حسبي الله ونعم الوكيل..
منى؛ماخدتيش ع بصارتهم البايخه..
زهور:هادي مش بصارة اهانات ويتعمدوا يقولوها قدامه ماحد مكره سفيان فيا غيرهم هما بكلامهم التافه..
منى:لما طنشيهم كلهم براجلك ترتاحي..
زهور:مش قادرة يامنى مش قادره حاسه روحي بنموت..قسما بالله مرات نفكر نقتل روحي ونفتك من هالعيشة..
منى بحزن؛لاحول ولاقوة الابالله...
زهور ببكي؛لاناس باهيه لاراجل يقدر ولافي عندي مالي نقدر نشد ظهري بيهم..لو فكرت وحده تحرج يردوها ويقولولها احرجي في حوشك..مهما يندار فيك فوتي وعدي..
واني هدا علاش ساكته ومسكره فمي....ومصيبتي الكبيرة اني طحت في راجل نحبه حبه اعمى يا منى وهو مش شايفني مش حاسبني مخلوقه...
جتها منها خدتها من يدها وقالتلها:تعالي حبيبتي اطلعي برا..
طلعت هي وياه للجنان وزهور مازال تبكي..
مشت بيها وين مافي الطاوله وقعمزتها..
منى:اهدي حبيبتي اهدي واسمعيني..اسمعي كلامي بس يازهور..هما طنشيهم وتجاهليهم ومعاش تعدلي عليهم ووكلي امرهم لربي اللي يديروه يلقوه ان شاء الله..اما راجلك يازهور استكرديه معاش دوريه معاش ترعشي عليه المعامله هادي تخليه يزيد يتكبر عليك...اسمعي كلامي زهور تربحي..
زهور قعدت تمسح في دموعها وهي تهز فراسها بإيجاب..
منى:خل نمشي نجيبلك ميه..
ومشت من حداها للكوجينه..
وخلتها تفكر تنفد نصيحتها وتشوف شن يطلع معاها...
🏵🏵🏵🏵🏵🏵
بعد ساعه....
وبعد اذان صلاة العشاء تحديدا...
انفتح باب الحوش الخارجي وخشت سيارة مروان..
••ناضت رنده من ع الصلايه وهي تحول في ملايتها قالت:روحوا..
عفاف وهي تسبح بعد ماكملت صلاه هزت راسها...
حناهم زبيده:ارفعني الدار يارنده..
رنده:حاضر حناي..
••برا..
بعد مانزلت وجيهه من السيارة خداها عدنان من يدها وبعد عنهم بيها شويه..
بعدين وقف وضم امه وكب ع راسها...
وهي دموعها نزلوا...
بعد عدنان وهو يقول:شهاده من دينك شن رايك فيك..ماختشتش خاطرك..؟!
قامت عيونها وشبحتله..هو مسح دموعها وقال...حلوة ولا..
ابتسمت امها وهزت راسها بإيجاب ..
هو ضحك وضمها...
وبوه ومروان يشبحولهم وهما مبتسمين..
بس عيون سفيان اللي كان واقف في بالكونه شقته كانت تشوفلهم بنظرات عدم رضا...
وان امه تقبلت الموضوع بعض الشيء فهي ام في النهايه وحبها لولدها حيخليها تنجبر ترضى بش ماتخسراش..
اماهو مش حيتقبل شي شايفه غلط والثبات على المبدا عند سفيان زي الثبات ع المبدا عند خوه عدنان..
وممكن هادي وحده من هلبه طباع اكتسبهم الاخ الصغير من خوه الكبير اللي ساهم بشكل كبير في تربيته...
🍀🍀🍀🍀🍀🍀
"يعني ماتعرفيه من قبل"
الحازة بغضب:شن هالأسئله اللي تسأل فيهن لأختك!
عبدالله:يما بالله عليك اسكتي شويه..
لينا بثقه:اها نعرفه..كان من الجرحى اللي جو للمستشفى وهدي حدود معرفتي بيه..
عبدالله سكت شويه بعدين قال:تقدري تعيشي في طرابلس بعيد عن هللك وناسك؟
الحازة:اها تقدر وليش ماقدرت كيف ماقدرن مراتك ومرت خوك..
لينا:كيف ماقالت امي...
عبدالله هز راسه وقال بضيق:ربي يتمم ع خير..
ومشي من حداهم...
الحازة؛مال شنو المصرف متاعه بيسكر تو..
لينا تنهدت وقعدت ساكته..
الحازة شبحتلها وقالت:لكن الحق يابنتي نا ماتريحيتش واجد بالذات لأمه..
لينا بإبتسامه:مازلنا ماعرفناهم زين..وبعدين المهم ولدهم وهو والله راجل كل اللي طلبته منه قال عليه باهي..
الحازة:لكن مش فيسع فيسع العرس بعد العيد شن بنديروا فهالمده القصيرة..
لينا؛مانيش مكلفتكم فوق طاقتكم مانبيه عرس كبير ودوشه سادني ليله سهريه وليله حفله...وتمت..
الحازة ابتسمت وهي تقول:ربي يكمل ع خير ان شاء الله وتتهني وترتاحي يابنيتي..
ع جية وردة وهي تضحك ضحكة مزيفه؛والله يالينا طحتي واقفه توا خوي كلم عبدالله خوك وقاله عيله متسميه ومعروفه والشاب بالذات ماشاء الله عليه..
لينا:يعرفهم؟
ورده:ايه اول ماعطاه عبدالله الاسم عرفهم طول وطاح يشكر فيهم ويحط..
ابتسمت لينا..
والحازة قالت:الحمد لله..
وردة"الدنيا حظوظ شوف هي في شن طاحت واني في شن طحت...بخت اسود من لونهم"....
🍁البخوت السودا تطلع ع نوايا صحابها ياورده🍁
🍀🍀🍀🍀🍀🍀🍀
ولو بنتكلموا عن  الوجه القبيح للون الأسود...
فأكيد حنذكروا بنات وجيهه كأكبر مثال...
اللي كانوا مصدومات في قبول امهم للينا ..
برغم انه ماكانش قبول تام...قاعد فيها شي مش راضي عن الموضوع بس مضطرة تساير ولدها بش ماتخسراش..
اما عن عدنان فمعاش خوفه شي بعد ماكسب اهم الأطراف في صفه...
وقعد متلهف لليوم اللي حيجمعه بلينا في حوش واحد تحت سقف الحلال المبارك فيه..
••والاحداث اللي صارت هادي كلها فهالكم يوم...
اخر من يعلم بيها....
"نوريه توا كلمتني"
وجيهه:ايه..
رنده:وقالت جايه غدوة الصبح بش اضم معانا الكوجينه الخارجيه..
وجيهه:تي غير علاش بس قعدت في حوشها ارتاحت نهارين بعدين جت..
رنده:تعرفيها العاده هادي ماتغيبش عنها ..بس يما نوريه مازال ماتعرفش..
وجيهه:وكان عرفت ماعندها مادير كان فمها بوها يسكره قال معاش نبي حد يدوي فيه بكل..
رنده؛يا ودي ماظني في شي يسكت نوريه يام ..
وجيهه:كان تبي بوها يلزها تفتح فمها..
زبيده اللي كانت متكيه حداهم وهي فايقه:تهني روحها وتقعمز خلاص توا اللي صار صار...
تنهدت وجيهه وقالت :هي هادي ياعمتي...اللي صار صار...
🏵🏵🏵🏵
صباح اليوم التالي..
الجمعه...
واقفه تحددله في اللبسه العربيه في صمت تام..
ماتعاطتش معاه الا بكلمات محدوده..تطبيقا لنصيحة سلفاتها..
وهو اللي كان مقعمز ع السرير لاهي بتليفونه..
سفيان"الحمد لله هدوء تام اليوم ربي يدومه"
فجأة رن تليفونه...
هي شبحتله بطرف عينها..
لقاته يشوف للشاشه بإستغراب..
بعدين فتح الخط ورد..
سفيان:آلو...
"يامن إليك غرام قلبي ينتمي...
اني زرعت هواك حبا في دمي..
انت المحبة والمودة والهوى ..
انت الدوا لخاطري يابلسمي..."
وانقطع الخط...
هو حول التليفون من ع وذنه وقعد يشبحله..بعدين شبح لزهور غيرت عيونها طول اول ماشافلها...
رجع شاف للتليفون وطول حط الرقم في الحظر وهو يقول..
لاحول ولاقوة الابالله..
بعدين رجع يشوف لحسابه ع الانستقرام وتعليقات المتابعين ع اخر فيديو نزله...
زهور"زعمه من كلمه!؟"...
شبحتله تاني بعدين رجعت شافت للسوريه وقعدت تحدد فيها بغيظ...
فجأة سمعوا صوت سيارة تكلكس..
شبح سفيان جهة البالكونه..
بعدين نزل من السرير ومشي فتحها وطلع..
شبح لوطا شاف سيارة حسين راجل نوريه خاشه..
تنهد بملل بعدين ولى خش داخل..
........
"وجيهه هانم"
وجيهه بضحكه؛نويرة..
ضمت نوريه امها وهي تقول:كيف حالك يما..
وجيهه:الحمد لله...بعدت عنها وقالت..خل نطلع نسلم ع حسين..
نوريه؛البنات راقدات..
وجيهه:ايه..
مشت وجيهه...ونوريه توجهت للدار اللي فيها خواتها
نوريه:نوضوا...نوضوا..
فتحت الباب وفتحت الضي وقالت؛نوضوا اني جيت..
نور بنتها:حني جينا...
عفاف بنعس:سكري الضي..
نوريه؛نسكر عينك ياخميره هي فزوا تحركوا..
مشت لرنده حولت من عليها الغطا..
رنده بإنزعاج؛رديه يانوريه..
نوريه؛آلا...وخبطت بغطا رنده رتيل وهي تقول:نوضي..
رتيل؛تي علاش يانوريه الزفت..
نوريه:ماتبوش تنوضوا..باهي..
ومشت طلعت من الدار.
نور:بتجيبلكم ميه راهو هكي نوضت بابا الصبح..
خالاتها التلانه شبحولها بعدين انفجروا ضحك...
🏵وناضوا كلهم ..
ماعدا عدنان اللي قعد راقد...
وجيهه:بعد روح من الجامع خش رقد..
نوريه:امم..حتى بعد الغدي نو نخش الدار نهدرز عليه قلت نخلي الدوة وجها لوجه بش نقنعه..
وجيهه تنهدت وقالت:لاخلاص انسيه الموضوع هدا..
نوريه ضيقت عيونها بإستغراب وقالت:علاش..
وجيهه:خطبناله..
نوريه انستهت وهي تشبح لأمها...
وجيهه:امس بس تم كل شي..
نوريه:تبصري يام ولا؟..
وجيهه حركت راسها بالنفي..
نوريه بصدمه؛واني اخر من يعلم!؟
ع خشة رنده وهي تقول:وكان تقعدي مش عارفه خير..
مررت نظرها ع امها واختها  هي تقول:فهموني شن في من هي باهي!؟
رنده:وحده سبهاويه..
رفعت نوريه حواجبها وضحكت بعدم استيعاب وقالت:تبصروا...لالا انتم اكيد تبصروا....مستحيل...
.............
في الجنان...
واقفه هي وياه بعد مانوضتاه اجباري من النوم..
عدنان؛علاش مستحيل..!
نوريه:عدنان خير بلاك شن جاك معاش لقيت خلاص تموا البنات !!
عدنان:وشن قالولك بناخد راجل!
نوريه؛نفس الشي..
عدنان بحده:نوريه ماتغلطيش في الكلام ردي بالك..
نوريه ضحكت بسخريه وهي تقول:صحه لإيديها والله من قبل ماتوصل بتعادي امك وخواتك ع خاطرها..
عدنان؛نوريه ماعنديش نيه نخش في جدالات عقيمه...الموضوع صار منه وتم ماعندك في شن بتدوي معاي..
نوريه؛لا عندي البنت اللي بنكلمك عليها مافيهاش عيب واحد جمالها ولااخلاقها ولاعيلتها ولامستواها التعليمي قسما بالله لو تشوف وتتكلم معاها تنسيك اسمك وتخليك تقول لروحك وين كانت هادي وشن جيت بندير في روحي..
عدنان:والله!..
نوريه:سلم وخيي ارجع لعقلك واسمع كلام اختك شن بنودلك اني كان كل خير..
••فهاللحظه كانت زهور نازله من الدروج لما سمعت نقاشهم وقفت وقعدت تتنصت..
عدنان ابتسم بتهكم وقال:قصدك زي الخير اللي عايش فيه سفيان توا..
نوريه:علاش خيره سفيان!؟
عدنان؛تعرفي خيره سفيان اكثر بنادم تعيس هني سفيان تي قاعد يدعي عليك كان ماتعرفيش..
نوريه بصدمه؛يدعي عليا..
عدنان:ايه يدعي عليك..خليتي امي تجبره ياخد وحده هو مش مقتنع بيها اساسا ماكانش مقتنع بالزواج وانتي اللي ديما حاشرة روحك في حياة غيرك خليتي امي تخليه يتزوج ويضحي بطموحه ومستقبله..انتي ظلمتي حتى بنت الناس معاه..تبيني نولي زيه ونعيش عيشته وندعي عليك حتى اني..
نوريه قعدت تشبحله بصدمه ودموعها ينزلوا..
عدنان:الكلام ليك ولخواتك يانوريه الهوا بحياتكم وخلونا في حالنا ماتدخلوش فينا كيف ماحني مش مدخلين فيكم ولامرة فرضنا عليكم شي..كيف ماانتم عايشين حياتكم خلونا نعيشوا حياتنا..
ومشي وخلاها واقفه في مكانها مصدومه وموجوعه من الكلام اللي سمعاته بالذات عن سفيان.
بس مش حتكون موجوعه اكثر من زهور اللي كان وقع كلام عدنان عن خوه زي  الصاعقه...
ماتوقعنش ان سفيان مش طايقها لهالدرجه..
وزادت انكسرت اكثر واكثر....
🏵🏵🏵🏵🏵
وبعد النقاش المحتدم اللي صار بين عدنان ونوريه..
ساد هدوء غريب الأجواء..هدوء يخوف مايطمنش.
هدوء يكسر فيه مرة مرة دوشة الصغار ولعبهم...
واستمر لبعد اذان العصر..
بعد اذان العصر....
كانوا الولاد وبوهم برا الحوش...
والنساوين باديين بالحمله متاعهم ع الكوجينه الخارجيه..
الكوجينه يفتحوا فيها في الصيف بس واول مايبدا الشتي تتسكر..
كانوا عفاف ورنده يعرفوا في الكناين ع  الكوجينه وكل شي فيها...
الدولاب الماعين الافران الكهربائيه والغاز..
وقعدوا يشرحلوهم ع نظامهم في رمضان بتفصيل اكثر..
نوريه في الوقت كانت تشتغل وهي ساكته وكلام عدنان مازال قاعد يرن في وذنها وتفكر فيه.
وحتى زهور قاعد يدور في بالها نفس الكلام وكل ماتذكره مشاعر غضب تزيد تكبر داخلها...
🏵🏵🏵🏵🏵
في احدى المقاهي..
سفيان:هي نفسها التافهه اللي كانت تبعت في الاشعار ع الواتس..
ولما حذفته قعدت تبعت فيهم ع المنسجر ولما حذفته قعدت تجيني الرسايل ع الخاص متاع الفيس..وبعد سكرت صفحتي ودرت وحده جديد وامنتها خشت ع الاتصالات..
ابوبكر بضحكه:وبعد تلغي التليفون تبعتلك الرسايل مع ساعي بريد..
سفيان:بوبكر نحكي جد..
ابوبكر شد ضحكته وقال:باهي لما سمعت صوتها ماحسيتاش مألوف..
سفيان:تس..
ابوبكر:هي نفسها اللي بعتتلك مرة هديه في عيد الحب ولا..
هز سفيان راسه بإيجاب..
ابوبكر بضحكه:والله حاسدك ياراجل باهي متمني تجيني رساله بالغلط من وحده ان شاء الله فيها س ع بس راضي بيها..
سفيان:أبوبكر...
ابوبكر بضجكه:خلاص نحكوا جد لو تقدر تغير شفرتك غير واعرف لمن تعطي رقمك الجديد في حال اتصلت بيك حتى علي هو معناها الليي دير هكي تعرفك وقريبه عليك وتقدر تجيب رقمك بسهوله..
فرك سفيان جبهته وهو يفكر في كلام صاحبه..
ابوبكر:مافيش غير هكي.
حط سفيان ايديه ع الطاوله وشبكهم ببعض وهو يهز في راسه بإيجاب ويقول:تو نشوف...
🏵🏵🏵🏵🏵
الساعه 6:30مساءا...
خشت وجيهه الكوجينه الخارجيه تشوف شن صارفيها...
لقتهم وصلوا لاخر مرحله..
شبحت لنوريه..لقتها تشبح لزهور فشبحه تخوف..
شويه نوريه تكلمت..
نوريه:منى مشيتي المراجعه..
منى:غدوه ان شاء الله مراجعتي..
نوريه:امم..وانتي معاش عاينتي..
التفتت منى وشبحت لزهور ورنده وعفاف شبحولها..
زهور هي تكد في شباك الماعين:مشينا اخر مرة وقالولنا نفس الكلام..
نوريه؛معقوله كلهم نفس الدوة شي مايخشش العقل..
زهور:يروح سفيان اسأليه كان مش مصدقتيني..
نوريه:مانبي نسأل حد..انتي لحقي ع عمرك وديري حل راك خشيتي التلاتين وضعك مش طبيعي...
زهور وصلت حدها عندها خلاص :المسأله هادي شخصيه مفروض مايدخل فيها تقعد بس بيني ويين راجلي..
منى تفاجئت في ردها..
وحمواتها انصدموا..
وجيهه بحده:هيا شن قالتلك بش تردي عليها هكي تتكلم لمصلحتك..
نوريه بعصبيه:الحق فيا اني اللي خايفه ع حوشك من الخراب..والله خوي ماهو معبرك كان يبي الصغار ياخد عليك بدال الوحده زوز..
رنده:تحسابه..وبعدين هادي اخر مرة تكلمي فيها اختي نوريه بالأسلوب هدا فاهمه..
زهور:ماقلتش غلط..
وجيهه:لا قلتي غلط واسلوبك زي وجهك..
عفاف؛حبيبتي لازم تعرفي ان كل حد وليه قدره وحماتك زي عزوزتك واجب عليك تحترميها...
وجيهه:تشبحي فيا قدامك مراة كبيره ولتوا نقدر في حمواتي ومستحيل اناقشهم ولانكلمهم بأسلوب بايخ زي اسلوبك..
نوريه:خسارة ماشكرت فيها وتأملت خير..مقيوله الواحد يخش في جنازة ولايخش في جوازة..
زهور التفتلها وقالت ودموعها تنزل:مافيش داعي ليه كلامك هدا..
وجيهه:انتي اللي جبتيه لروحك..اسمعي راهو واصلتلي منك لهني..
واشرت ع مقدمة انفها وقالت..ماتخلنيش ندير تصرف مايعجب حد..
زهور شبحتلها وقالت:علاش شن درتلك شن هو اللي درته قوليلي من لما جيتكم ولامرة قمت عيوني نسمع في الكلام اللي زي السم ونبعله ونفوت ولامرة قصرت معاكم في شي...في شن غلطت فهميني..حتى توا بنتك هي اللي استفزتني ولا لأنها بنتك ماتبيش اطلعيها غالطه..
وجيهه بصدمه:ريتوا كيف تكلم فيا ريتوا..
رنده:لاحبيبتي اني تعديت حدودك بوين وربي غير يروح سفيان كان مخليتاش يقربعها عليك اني مانتسماش..
نوريه:هادي اخرتها تناقشي امي وترفعي صوتك عليها..
عفاف:الطيبه الزايده يام هي اللي واصلاتك هني..
وجيهه:صدقتي لكن في الجديد تو تشوفوا..
وكيف لفت بتمشي..وقفت في مكانها..
كلهم لاحظوها...
وجيهه:سفيان امتى جيت..
زهور خبطت ع وجهها وقالت بصوت مخنوق:حي عليا حي..
خواته قربوا من الباب وشافوله ومعاهم منى ماعدا نوريه..
لقوه حط التليفون ع وذنه وشويه وقال:ايوه سراج..
خبطت زهور بإيديها ع وجهها.
سفيان؛تعالى ارفع اختك..معاش تلزمني...
ونزل التليفون وسكر وهو يقول..اللي تعلي صوتها ع امي وخواتي ماتلزمنيش..
زهور حست روحها وصلت للنهايه..
حاولت ادير محاوله غبيه بش تنقد نفسها...
وطاحت ع الارض ع اساس اغمي عليها..
كلهم جوها يجروا ماعدا هو اللي مشي وخلاهم بدون مايعبرها لأنه كان متأكد انها تمثل ...
🏵🏵🏵
وخلال ساعه..
ركبت لمت دبشها وهي تبكي بقهر...
وروحت مع خوها اللي طول الطريق وهو يهزب فيها ماخلا كلمه مش كويسه ماقالهاش عليها وهي تبكي وبس..
وسمع الحاج الشريف باللي صار وطلب من سفيان يمشي يروح بيها لكن هو رفض رفض تام وهرب من النقاش مع بوه خوف من انه يغلط معاه في الكلام...
وهديكا الليله مرت بصعوبه...
••موضوع عدنان ماجاش من وراه خير بكل..
مروان:والله حتى اني قلت هكي في نفسي.
منى:حتى خواتك قالوها من قبل ماتجينا شرتعتنا..
مروان:لاحول ولاقوة الا بالله..يستر الله من الجاي وخلاص..
منى تنهدت وقالت:ايه والله ربي يستر...

....يتبع....