شكولينا

الجزء الرابع عشر"القسم الاول"

الصلاة أولا...💕💕💕💕
《في بعض من الحوارات حقيقيه وهي تعبر عن وجهة نظر اصحابها 》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫واقفات في الممر اللي فيه الكوجينه..
وهو واقف قدامهم..
حاط ايديه في نصه وهو يقول بغضب:حني يام معروفين عيلة محافظه وماعندناش اللبز والتلخبيط والدوة الفاضيه والناس تشهدلنا..الناس كلها تعرف من هي عيله الشريف بن عامر لافي من ري علينا عيب ولاحني نديروا العيب..واللي بيخش العيله..لازم يعيش كيف ماحني عايشين وينسى المكان اللي جي منه..
••وجيهه وزهور وعفاف يسمعوا فيه شني يقول..
عرفوا ان المقصوده لينا بس مش عارفين هي شن دارت..
وجيهه وهي تسمع في كلام سفيان مشت وقفت فم الكوجينه وقعدت تشوف في لينا..كيف مدرقه عيونها بإيديها وواضح من حركة جسمها انها تبكي..
ورتيل اللي كانت واقفه ورا امها تشبحلها..
وهو مازال متابع يقول؛فوتنا ومشينا الف حاجه لكن في حاجات مانعدوهاش بكل..اللي بيقعد بيناتنا يقعد بإحترامه ياإما يولي من وين ماجي..
لينا معاش تحملت...ناضت ومشت بسرعه طلعت من الكوجينه من الباب الخارجي...وهي حاطه يدها ع فمها.. كاتمه صوت عبراتها ماتبيش صوت بكاها يطلع..
وصلت في الدروج اللي يرفع لشقتها ركبت تجري وهي تبكي..
••وجيهه؛خيرها شن دارت!؟
سفيان؛بري انشديها..يام اني الحال هدا مايمشيش معاي ياتقدر وتحترم العيله اللي جابها النصيب ليها اللهم لا اعتراض...ياآما..اني نطلع وخليها تقعد تبرطع هي وراجلها..
ولف ومشي بعصبيه فتح باب الحوش وطلع..
وجيهه خبطت كفوفها ببعض وهي تقول؛شن دارت باهي نبي نفهم..
زهور:رتيل تعرفي؟
رتيل حركت راسها بالنفي..
"وجيهه...وجيهه"..
وجيهه:الشريف قاعد!..
ومشتله وين ماهو...
زهور:مازال ماسكرتش شهر وبدت تلبز..
رتيل:هي خشت عليا تجري حطت رنا حداي وطلعت تجري.
شويه وسمعت صوت سفيان ينادي في امي عرفت ان في شي صاير لكن شن هو مش عارفه..
عفاف بخوف:رنا!؟
......
"ايه رنا بنت عفاف شفت في يدها موس وهي لحقتها باش تاخده..لكن الموقف اللي صار بايخ هلبه وضايقني حتى اني"
وجيهه:هذا علاش ماطلعتش سكته...
الشريف؛ماقالت شي هي؟
وجيهه:مسكينه طلعت من الكوجينه وهي تبكي كلامه كان واعر هلبه ولدي..
الشريف بضيق:تس..عدنان أمني هلبه..قالي يابوي مانقدر نأمن حد عليها غيرك انت لأنك الوحيد اللي رحبت بيها..
وجيهه بحزن:ياناري وليدي..ناضت ومشت طلعت من حدا راجلها..
والشريف تأفف بضيق...بعدين مسح بيده ع وجهه وقال:أستغفر الله العظيم..
.........
"عفاف بري اركبي لشقة مروان حناك غادي خليك معاها شويه وانزلي بيها"..
عفاف:باهي شن اللي صار يام !!؟
تنهدت وجيهه وبدت تحكيلهم في اللي سمعاته من شيبانها..
🌺🌺🌺🌺
في الوقت اللي فيه لينا كانت وهي مقعمزة في وسط الحوش ع الكنبه وضامه ركابها ليها وغامه وجهها بيهم تبكي بحرقه..بالعبره...
كلام سفيان اللي كان زي السهوم المسمومه تنزل عليها نزول قاعد يتردد لمسامعها ومش قادره تسمع غيره...
لعند ماقطعه صوت رنة تليفونها ...
رفعت راسها وهي مازال تبكي...طلعاته من جيبها وشافت المتصل..
بلعت ريقها..
بعدين حطاته قدامها وقعدت تمسح في دموعها وهي تحاول تهدي بكي..
خدي نفس اكثر مرة وقعدت تزفر بعمق..ورددت...
يارب ياربي...خدي نفس للمرة الأخيره...
ولأن الاتصال فصل..هي خدت التليفون وعاودت ع المتصل...
وحطت التليفون ع وذنها..
هو طول فتح وقال...
"شكولينتي"
ابتسمت لينا وهي تقول:ياهلا..
"خيره صوتك"
لينا غمضت عيونها وقالت؛خيره؟!
"زي اللي باكيه!"
ضحكت وهي تقول:لالا انزكمت بس..
"معناها بديتوا تفتحوا في المكيف"
فتحت عيونها وقالت بضحكه:ايه..
"اني شن وصيتك لينا!"
ابتسمت بألم ودموعها نزلوا وقعدت ساكته..
"لينا...".
رجعت غمضت عيونها وقالت :انا اسفه واجد..خلاص وعد من اليوم مش راقده يالاه..
"وديري ليم مع الزنجيل وفي دواء تلقيه في التلاجه للزكمه تحديدا خوي منه"
لينا بضحكه:هالتلاجه هدي ناقصها كاصه وموظف يخدم عليها..
"مانبي شي ينقصك ولاتحتاجي لشي ومع هدا لو احتجتي قولي لبوي طول"..
حاولت تمنع ملامح البكاء من السيطره ع وجههت وهي تقول:حاضر..
"ايه شن جو اول حفيد لعيت الشريف"
لينا ابتسمت وقالت:والله ماريته لتو..
"علاش مامشتيش غادي؟"
لينا:لا كنت غادي..غير قبل يجيبوه روحت للشقه نكمل باقي الخدمه ع الشكولاته يبوها مني اخر الاسبوع..
"باهي ربي يعاونك..حبي"
لينا:نعم؟
"اخر الاسبوع هدا مش مروح"
حطت لينا يدها ع قلبها اللي انقبض وقالت؛ليش..
"خدمه حبي"
لينا:مهمه قصدك..
ضحك وقال..
"ايوه عارفه خدمتي انتي"
لينا قعدت ساكته وهي مضايقه ع الآخر..
"لينا..معاي؟"
تنهدت وقالت:ربي يحميك ويحفظك بحفظه..
"اسف قلبي..بس هادي طبيعة خدمتي وانتي تعرفيها كويس"
لينا :لاحبيبي ليش تتأسف!؟ نا عارفه ومتفهمه والله..ولايهمك عدنان ماتفكر في شي"
تنهد بعدين قال..
"تمام..المهم ردي بالك ع روحك واهتمي بصحتك وديري اللي قتلك عليه"
لينا:حاضر..
"ايه وماتنسيش تصوريلي ولد مروان وتبعتيلي الصور"
لينا بإبتسامه:من عيوني..
"يابختي  بيهم حبات القهوة عيونك هادم"
ضحكت لينا بخجل وهي ترشف..
"ماننحرم من الضحكه ولامن صاحبتها"
لينا بحب:ولا من اللي ضحكني يارب...نحبك دنيا دنيا واجد عرم بكل هلبه ..
وعدنان يسمع فيها وهو يضحك...
🏵بعد نهت المكالمه معاه وارتاحت نفسيتها...ناضت توضت وصلت ركعتين وقعمزت في مصلاها تستغفر لين آذن المغرب..
وبعد صلاته...بدت تخدم ع الشكولاته...
تحاول تلهي روحها بش تنسى اللي صار..وكل مايجيها صوت سفيان المرعب بكلامه...تعلي صوتها بالإستغفار وتتجاهله...
🏵🏵🏵🏵
"حي ع الجو اللي فاتني"
عفاف:جو شني يابنتي والله قاعده نرعش مع بعضي تخيلي لو رنا دارت في روحها حاجه شن يصير فيا اني بعدين..
"باهي الحمد لله ماصارلها شي..لكن مستحيلتها فالعبده ياريتني كنت حاضرة..."
عفاف:لا يارنده المراة دارت خير بارك الله فيك انقدتني من مصيبه كبيرة وجت ع راسها..
"ماهو هادي مشكلتك عفاف العباطه متاعك لازم تغلبك"
عفاف:باهي وكان يافالحه لما يروح عدنان تعاودله اللي صار شن يديروا خوتك في بعضهم بعدين!..
"الحق مافكرتش فيها هادي..لكن امي ماتخليهاش تتكلم تو تشوفي"
عفاف؛ان شاء الله..ماصدقنا تراضو..
"اسمعي فوفو بنسكر توا نكلمك وقت تاني"
عفاف:غير اصبري مش جايه تشوف ولد خوك..
"يوم اللمه تو نجي ونشوفه..هي سلام سلمي ع امي ورتوله..باي"..
عفاف:باهي....ونزلت التليفون..وشبحت لبنتها رنا وهي راقده ع سرير خالتها...تنهدت وقالت...الحمد لله..ربي سترني..
🏵وعند رنده اللي سكرت من اختها بعد ما سمعت صوت حمواتها راكبات الدور التاني لحوش بوهم...
لأن رنده فهاليوم قاعده في حوش شيابينها..
ركبوا لقوها مقعمزة وحاطه رجل ع رجل ولاهيه بتليفونها ..
وحده منهم قالت..
:راك تنوضي وتسيبي البيبي اللي مضطبتيه..
رنده رفعت حاجبها وقالت:وين نوض..
:تعاوني عزوزتك شويه من بكري وهي اضم في الكوجينه بروحها..
رنده:والله عمتي امك وتعرفيها اكثر مني ماتحبش من يقيم كاشيك معاها في كوجينتها..
:انتي كان اصريتي تعاوينها مش حتردك..لكن حضرتك ماصدقتي..
رنده سكتت ورجعت تشوف لتليفونها وهي تتجاهل فيهم..
:نكلموا فيك حني!؟
ع جية امهم وهي تقول:الحمد لله قاعده بصحتي وماني بعازة الكناين بش يخدموني..مش ليا الحركات هدي...
الله يعطيني صحيحتي...نضم حويشي برويحتي..
رنده:آمين يارب العالمين..
شبحتلها عزوزتها بطرف عينها بعدين مشت وهي تقول لبناتها:تعالوا نشربوا في البلاكونه...وانتي يابنت الشريف كان تبي تعالي...
البنات لحقوا امهم وهما يتهامسوا على رنده..
رنده؛ع اساس كنتي تحلمي الحلم ببنت الشريف تولي كنتك ياشلافطيه..وخرت شعرها للخلف ورجعت لهت بتليفونها ولامهتمه لأي شي غير روقان مزاجها...
🏵🏵🏵🏵
الساعه العاشرة ليلا..
في شقة مروان...
تحديدا دار النوم...
مروان؛اني بننزل نبات لوطا صار شي احتجتي شي اتصلي طول..
منى؛باهي..
باس  مروان راسها..بعدين قال:تصبحي ع خير..
ومشي بإتجاه الباب وهي ردت عليه...وانت من اهله..
طلع من الدار..
وهي طلعت بعده بلحظات ومشت للدار التانيه...
خشت لقت اختها تكسد ع الهاتف..
هند:النت عندكم اسرع من الصوت..
ضحكت منى وقالت:هدا جهاز النت متاع سلفي سفيان..
هند بفضول:قداش خاطري نشوفه هالسفيان ع قد ماتحكي عليه وعلى مرته..
منى بضحكه:هني جمالك وقعمزي...
هند ضحكت بعدين قالت؛ايه حقه..سلفتكم الجديده حاجه وااااو.
منى:ايه الحق صح سمرا لكن جميله..
هند:وجذابه تحسيها زي النجمات لما تتكلم وتضحك ومحلاها لما تبتسم..
منى :ايه صح عطيها دعوه حلوة بالمرة لكن وضعها في العيله يوجع احرف من وضعي اني وزهور..تعرفي اكتشفت ان حياة الاستعباد اللي حني فيها ارحم من حياة المنبوذين اللي عايشتها لينا..
هند:لكن حسيتهم متقبلينها..
منى:هي تحاول ادخل روحها..لكن صحة ليها ماتخليش حقها تعرف ترد ومش اي رد..تخليك ماتعرفيش شن تقولي..
هند؛مايطلع منها السبهاويه..
منى بضحكه:ريتي والله مافي ذقون وذليلات كان حني..
هند ضحكت بعدين قالت:جعانه..
منى:بري هوينا الكوجينه فيها كل شي ديري ماتبي..
🏵🏵🏵🏵
"ها شنو واتيه سفرة لينا"..
زهور وهي تحاول بقوة تكتم غيظها:ايه هي هادي..
القت وجيهه نظره عليها بعدين خدتها ومشت طلعت بيها من الكوجينه..
وزهور معاها بعيونها اللي كل نظراتهم اندهاش...وقالت:وهي اللي بترفعها!!...
🌺🌺🌺🌺
مشغوله بتغليف الشكولاته وتعليبها..
وبعد كملت دستها...وخلت زوز علب ع تركينه بترفعهم لسلفتها بش تقدمهم يوم اللمه..
وهي تشتغل سمعت جرس الحوش رن..
ضيقت عيونها بتوتر..بعدين مشت طلعت من الكوجينه متوجهه للباب..
وقفت وراه وقالت..من؟
"افتحي يالينا"
طول لينا فتحت الباب واتفاجئت وانحرجت لما شافت عزوزتها واقفه بسفرة ماكله في ايديها..
لينا بإحراج؛حي ياحشمتك ياع..اللاي..انتي بروحك مرقيتها..
وخدت منها الصفرة وقالت..تفضلي تفضلي.
خشت وجيهه..
ولينا سكرت الباب وهي تقول؛والله بنموت من الحشم سامحيني..
وجيهه بضحكه:مش جايبتهالك انتي هدا عشاي اني قلت خل نتسايروا فيه..
ضحكت لينا وقالت:اه كان هكي ريحتي ضميري..
وجيهه:هاللسان اللي عندك يبي التقديد..
ابتسمت لينا باسف وقالت:غير شن دار لساني..سمعت الاهانه اليوم وماقدرت نحركه بيش ندافع عن نفسي..
وجيهه:لأنك متربيه هدا علاش..كانك قليله ربايه راك رديتي على سلفك..
لينا:والكلام اللي قاله ياللاي شن تقولي عنه شهاده لله ياللاي وانسي انه ولدك تو..
وجيهه بإبتسامه:خل نخشوا نقعمزوا ونهدرزوا..
لينا:سامحيني وقفت هنى..تفضلي عمتي..قصدي اللاي..
ووجيهه وهي تضحك خشت داخل ولينا لحقها..
خشوا لوسط الحوش..لينا حطت السفره ع الطاوله وقالت:نجيبلك عصير ولامشروب..
وجيهه شدت يدها وقالت:قبل العصير والمشروب...قعمزي واسمعيني..
قعمزت لينا وشبحت لعزوزتها وعيونها تعبوا دموع..
تنهدت وقالت:عمك حكالي الموقف اللي صار...انتي بارك الله فيك قصدك خير..لكن جاتك بموقف بايخ..
لينا بضيق:حتى عمي خدي مني موقف!؟
وجيهه:لاهو ما خداش موقف لكن ضايقه اللي صار..
دموع لينا نزلوا وهي تقول:اقسم بالله ماركزت ولاانتبهت لحاجه..والله ولا سمعت صوت..عقلي كان مع رنا بس خفت ادير  في روحها مصيبه..
وجيهه حطت يدها ع ركبة لينا وقالت؛والله عارفه مش لازم تحلفي..لكن اللي نبي نوصلهولك..سلفك سفيان بسلامته عقليته صعبه هلبه عقلية الشيابين القدم الواعرين زي جده بو عمك الشريف الله يرحمه...سفيان نسخ طبع نسخ زي ماراجلك نسخ شكله..
ابتسمت لينا..
وجيهه:سفيان حتى من خواته هكي يشوف حاجه غلط كيف مايفهم عقله مايسكتش عنها بكل..يعني قبل مده هزب نوريه وخاصمها قولي علاش..
لينا؛علاش..
وجيهه:ع خاطر قصت شعرها..شعر نوريه الله يبارك هلبه وناعم وكان طويل لتحت ظهرها حرام ينقص..وهو محرم القص ع خواته كلهم لأن شعيرتهم الله يبارك مافيش زيها..ناضت نوريه عاد من دونهم قصاته دارلها عليها ليله وخاصمها..وهو هكي نظرته للمراة كيف بنقولك..تتعلم ايه..لكن ماتخدمش حوشها وراجلها اولى..ومايحبش نساوين العيله يبانوا ع تريس برانيه..نذكر زمان رنده طلعت للجنان وهي ماتندريش انه واقف ع واحد صاحبه برا..
عطاها طريحه هديكا ماحزيتها منه الا بعد قريب روحي طلعت...ضحكت وقالت..ولا من مده..جت هديه للحوش معاش نذكر شن هي..جت في هدا عيد الحب عطيهم كلب..
ضحكت لينا...
وجيهه تابعت تقول:وهو وين راها راسه والف سيف انها جت لرتيل مسكينه عييت وهي تقطع وتحلف وتقول والله ماليا اني في طول في عرضك وهو شي ليها هي يعني ليها هي وقولي لمن طلعت جايه في الأخير!!؟
لينا:لمن..
وجيهه بضحكه:ليه هو..
ضحكت لينا بإستغراب..
وجيهه:ولدي سفيان بسلامته ربي عاطيه فوق زينه شخصيه مخليه البنات عليه هكي هكي هكي...وقعدت تفرك صوابعها في بعض وهي تتكلم...بعدين حطتهم وقالت بحسرة..لكن بخته بالهون...
لينا:ليش يااللاي بالعكس زهور مراة ماشاء الله عليها واضح عليها..
وجيهه:خلينا منها توا واسمعني..سفيان زي خوك الكبير يعني خوك لو صار معاه نفس الموقف ردة فعله حتكون زي ردة فعل سفيان كان مش احرف..
لينا:يقعد هداك خوي وهدى سلفي الكلام اللي قاله كبير وماينقبل..
وجيهه؛ردي بالك تعاودي اللي صار لعدنان يابنتي والله بعدين تصير مصيبه ...
لينا:مانقدر ندير هكي..عدنان مايستاهلش التكدير ونا ع خاطره بنبلع اللي صار ونسكت..لكن ياريت ياللاي تفهموه ان كل شي ليه حدود الكناين بنات ناس مايتماداش معاهن واكيد مايرضاه لخواته..
وجيهه؛خلاص توا صار اللي صار ومعاش يصير مرة تانيه  وحتى انتي ردي بالك في الجديد..
لينا هزت راسها وقالت:إن شاء الله..
وجيهه ابتسمت وقالت؛هي نوضي جيبي مشروب..
ضحكت لينا وقالت؛باهي..
وناضت من حداها ومشت للكوجينه..
وجيهه"عيبك الوحيد جيتي سمرا"
🏵🏵🏵🏵🏵
"اما كندرة تبي نطلعلك"..
هو وعيونه من ورا النظارات ع اللاب توب:القهويه..
زهور بإبتسامه؛توقعتك تختارها هي طلعتها..
سفيان؛حتى اني قلت لروحي مستحيل تكون غبيه لهالدرجه ومش ملاحظه ان اللبسه ماتمشيش الا مع الكندرة القهويه..
زهور شبحتله بضيق..بعدين مشت قعمزت ع السرير وهي تشوفله..
شويه وقالت؛ايه حقه امك بكري شويه خدت العشي وركباته لمرت عدنان بش ترضيها..
شبحلها وهو مضيق عيونه وقال:من هي !؟
زهور بإرتباك:عمتي..
رخي عيونه ورجع شاف للاب توب وقال:امي حرة في اللي بديره..واللي ديره كل صح حتى كان مش عاجبني..وغصب عني لازم يعجبني...
زهور:ايه فاهمه عليك لكن..
سفيان بحده:زهور...وحده من الزوز ياارقدي يااطلعي من الدار تشبحي نخدم ومش فاضي للقطاف الزايد..
بعصبيه تمددت وعطاته بالظهر وتغطت..
سفيان"الصبر من عندك ياصبور"...
🏵🏵🏵🏵🏵
"زيدي كولي"..
لينا:لاخلاص الحمد لله..
وجيهه:باهي..نوضي اغسلي الماعين فيسع الساعه 12..
لينا ناضت بالسفرة وهي مضايقه ماتبيش تبات في حوش العيله لكن مجبورة..ماتقدرش تقول لعزوزتها باتي عندي ماتجيش من وجهة نظرها ساد المراة حسبتها في العشي وجاباته بروحها...
غسلت الماعين بعدين لبست عبايتها وشاحها..
وطلعت بالماعين مع عزوزتها وتوجهوا للدور الاول..
كان الحوش هادي واللي فيه كلهم راقدين وهما طول خشوا رقدوا...
☘وتاني يوم
مع الفجر...
لينا بعد ماصلت مشت لشقتها بش توتي حوايجها للخدمه..
وطبعا مش حيفوت الصبح من غير مايتصبح عليها حبيب قلبها..
اتصل بيها..هدرز عليها وغيرلها جوها وبالسيف نهت معاه المكالمه..كانت محتاجه لوجوده معاها هلبه..
لكنها استعانت بالله ع خوفها واحساسها المستمر بالوحشة..
وقعدت تلهج بالإستغفار مع كل نفس تتنفسه...
🏵🏵🏵🏵🏵
نازل هو وخوه من حياشهم وهما يهدرزوا..
سفيان بضحكه؛المشكله الصغار في العمر هدا مانفضلهمش .
مروان بإبتسامه؛تو لما ربي يعطيك تفضله من قبل مايجي..
ابتسم سفيان وقال:ان شاء الله..
وصلوا لوطا....
وكل واحد فيهم مشي لسيارته..
فاللحظه اللي خطمت فيها لينا من حداهم وهي متوجهه للباب طالعه للسواقه..
سفيان شبح لخوه..
مروان ابتسم ع جنب وركب السيارة..
هو غير عيونه عن خوه وركب سيارته..
خدي نظاراته الشمسيه لبسهم وهو يقول:خليها تاخد راحتها هاليومين بس..وبعدين تنطمر في حوشها غصب عن اللي يبي ومايبيش...
🏵🏵🏵🏵🏵
الساعه 10:00صباحا
"تي قتلك رفعتلها العشي بروحها"
منى:الموقف اللي صار مش شويه يازهور والمراة قاعده عروسه وراجلها مش معاها..
زهور؛وخيرنا مش كنا عرايس لما كانوا يحرثوا علينا ورجلتنا زي قاعدين زي مهناش..
منى:لكن مش متغربات يازهور..حني مرة مرة نحصلوا مشيه لحوش مالينا نوسعوا خاطرنا ونغيروا جونا لكن هي مسكينه اماليها تبي طيارة بش توصل فيهم..
زهور رفعت حاجبها وقالت؛-غيرتي رايك فيها فيسع..
منى:لأني عرفتها كويس يازهور اني راهو نعرف الناس من نظرة...
زهور بتهكم:باهي ياام نظرة انتي ماقلتليش شن بتلبسي في اللمه..
منى:مفاااجأة..حتشوفوها في وقتها..
زهور بضحكه؛باهي شن بديري كله؟
🏵🏵🏵🏵
"هو مافيش غير هكي هادي وحده من العيله"..
ابوبكر:كان وحده من العيله بديرلك صداع وبيجي من وراها مشاكل كبيرة..
سفيان:اني غير نعرفها من هي نعرف شغلي معاها..
ابوبكر:حاول تتجنب المشاكل بش ماتكبرش القصه وتخش فيها العايلات..
سفيان:اكيد...
سكتوا شويه بعدين قال ابوبكر:حقه قالوا بتستلم الإشراف ع المشاريع؟
سفيان :ايه..حان الوقت ياصاحبي لين باع فهالكليه..
ابوبكر بضحكه:غير رد بالك يجوك بنات..
سفيان رفع سبابته وقال:ابدا...اني اشترطت عليهم نستلم مشاريع طلاب بس..
ابوبكر ضحك بعدين قعد يدندن:كل البنات بتحبك...
سفيان:بوبكر..
ابوبكر قعد يضحك وهو يشبحله..
وسفيان يقلب في الوراق اللي قدامه وهو يحرك في راسه يمين ويسار...
🏵🏵🏵🏵🏵
الساعه 5:24عصرا..
"اني اساور بنت عمة عدنان ربيعه"
صافحتها لينا وهي تقول بإبتسامه:بالجوده..
اساور:بيك اجود...وينهم البوكسات..
لينا:لحظه بس..
ومشت خشت داخل..
واساور تقلب فعيونها فالشقه..
شويه جت ليا بالشكولاته..
اساور:اني ماذقتهاش بس خوي شكر فيها هلبه..
لينا بإبتسامه:جربي بروحك ونا نستنى نسمع حكمك..
اساور بضحكه:غدوة ان شاء الله تسمعيه لما نتلاقوا في اللمه..
لينا:ان شاء الله...
🌺نزلت اساور الشكولاته ع دفعات وخوها يساعد فيها...
وجيهه:سلموا ع امكم..
اساور:يوصل مرت خالو..ولبست نظاراتها ومشت بتطلع..
سمعت صوت سفيان وقفت والتفتت شبحت فوق.
لقاته واقف في البالكونه يتكلم بالتليفون..
ابتسمت بتنهيده بعدين لفت ومشت طلعت..
رفعت وجيهه عيونها  وهي تشوف لولدها ضحكت..بعدين مشت خشت داخل..
🏵🏵🏵🏵🏵
وجي يوم اللمه اللي بيديروها في صالة حوش العيله..
طبعا كل شي كان جاهز هما ماتعبوا في شي ولاطيبوا شي كل اللي عليهم يديروه انهم يجهزوا انفسهم...
عفاف جابت مزينه للحوش ليها هي وزهور..
امالينا فكانت تبي تمكيج بروحها..
ومنى اختها بتحطلها لمسات بسيطه لأن زي ماهو معروف في عاداتنا وتقاليدنا مش باهيه المبالغه في الزينه للنافس..
وطبعا هادي مجرد خرافات مفروض ماياخد بيها حد..
وماجي المغرب الا وصاله حوش الشريف تعبت بالنساوين والمربوعه بالرجاله...
سموا الولد في  نفس اليوم وطبعا اكيد بيكون الشريف..
وكذلك ذبحوله العقيقه..
🏵🏵🏵🏵
في الصاله...
مكالمه فيديو...
"ترا وروني وليدنا وروني"..
رنده:شوفيني عميمه شن رايك فيا حلو ونهبل ولا..
"الله يبارك الله يبارك...بوه بوه لامشي ولاجي.."
رنده بضحكه؛ايه طلعلنا في الشكل..
"الحمد لله ياربي"
ابتسمت منى بسخريه بعدين قالت؛نوريه..
"ترا نشوفها رنوده"
مدت رنده التيلفون لمنى..
خداته قالت؛كيف حالك يانوريه..
"هلا منمن حمد لله ع سلامتكم ومبروك ماجاكم"
منى:الله يبارك فيك..تسلمي..
"اشيه اشيه ترا ويني شن لابسه"..
منى قعدت تمرر في الهاتف ع القفطان..
"قداش حطيتي فيه هدا يادعوة غالي "..
رنده:حطت فيه دم قلبي وخيي ياناري تشبح فيا مصرف ليبيا المركزي..
منى تنهدت وقالت بإبتسامه جديه:بوي خداهولي..
"بوك!! سلم بوك ياحنه"
رنده بضحكه:سلم بوها سلمه خلاها معلمه..تعرفي منى كاني منك نزن ع مروان ليل مع نهار لين يخليني نخدم العبده مش خير منكم..
"اسكتي يافرخه وسكري فمك..
ورنده تضحك..ومنى تشبحلها بإبتسامة ازدراء...

.....يتبع.....
《اسفه الجزء قصير اليوم كنت مشغوله وكتبت مأخر》
#صلوا_على _النبي