شكولينا

الجزء الثامن والعشرين

لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
 🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
وآه من الابتلاءات لما تجي ورا بعضها..
وانت تحاول اطلع من نفسك من تأثير شده نزلت بيك افقداتك جزء منك...شخص خدي في حياتك حيز كبير ..
راح فجاة وخلا فراغ كبير...خلا لون الدنيا يبهت في عيونك..
حسيت من بعده ان الحياة بالنسبه ليك وقفت...وانك عايش بلا رغبه فيها....تستنى ساعة الآجل..
هدا اللي حساته لينا بفقدانها لاول حب في حياتها لإنسان كانت تتمنى يشاركها العمر كله مش بس كم شهر فيهم..
لما راح خدي معاها هلبه حاجات حلوة....حتى الحاجات اللي كانت عندها قبل لتعرفه راحو معاه لما راح...
واللي قعد مصبرها ومقويها من بعد رحمة الله وعونه الذكرى الحلوة اللي خلهالها...
ولما بدت تتعود ع عدم وجوده....تجيها صدمة فقد تانيه اكبر..
فقد والديها...وفقد الوالدين لو مهما انقال فيه مش حيوصل
ربع الحاله اللي يعيشها من فقدهم..
فقد واحد فيهم يخلي الدنيا اظلم في العيون مش بس يبهت لونها...
فكيف بفقدهم هما الزوز مرة وحده!!.
خصوصا ان لينا بسبب اللي صار معاها خدت من اهلها موقف  حستهم خذلوها خذلان كبير...لما تخلوا عنها وخلوها ترضى بواقع مر غير مقبول بالنسبه ليها...
وبعدت عنهم اكثر ماهي بعيده...
بعد ماجاها خبر فاجعة موتهم خشت لينا في حالة ندم الى جانب الصدمه..
وهي في الطيارة..مع صغارها وعزوزتها وشيبانها وراجلها..
كانت تشبح في الفراغ ودموعها ينزلوا بدون توقف..
وعزوزتها اللي مقعمزة جنبها كانت خايفه عليها تصير فيها حاجه...
بس مش اكثر من خوفه هو عليها..
لأول مرة سفيان يكتشف ان عنده قلب رهيف مايرقش بس للأطفال..
دموعها...صوت بكاها...ملامح وجهها اللي كلها الألم..
قلب سفيان مش قادر يتحملهم
وين يخطروا عليه يحس في قلبه يتقطع بالجزء من وجعه عليها..
طول ماهما في طيارة وهي مقعمزة وراه كان وكأنه مقعمزة ع نار...مكانه جنبها توا..مفروض مايكونش بعيد عنها..
في محنة زي هادي كان مش هو اللي مفروض يكون جنبها مالا منو ؟!
هو زوجها...اولى الناس بيها..
ياه...اول مرة سفيان يدرك معنى صفة الزوج...الشق...النص التاني..
🍁يعني هو مكمل لحد وحد مكمل عليه...
في كل الحالات لازم يكونوا مع بعض..
اللي فاقد حاجه التاني يعطيهاله..
اللي محتاج حاجه التاني يبذلهاله..
اللي فيهم فرحان يفرح التاني معاه.
والحزين منهم التاني يطبطب عليه ويضمه ويحتويه..
يأنس وحشته لما يحس انه وحيد..ويكون ليه رفيق دائم طول العمر..
هدا الزواج...هدا هو الحب اللي وصفه خالقه اجمل وصف..
ومن آياته ان خلق لكم من انفسكم ازواجا..
من انفسكم...يعني زوجك منك وفيك...وزوجتك منك وفيك...
لتسكنوا اليها..
السكينه والسكن...يعني انتوا الزوز لبعض سكينه...وانتم الزوز لبعض سكن...منزل....يعني الزوز تعيشوا مع بعض وفي بعض..
في اجمل واعمق من هكي معنى للإرتباط المقدس..
وجعل بينكم مودة ورحمه...
المودة اعظم من الحب..والرحمه هي اسمى شعور حطه ربي في الدنيا كلها..
يابال لو كان بين الازواج...يتراحموا بين بعض..يقدروا ويحنوا ع بعض وبعد سنين طويله بعد يبلغوا من الكبر عتيا يكونوا الرحمه بكل معانيها لبعض...
هدا الزواج....اللي هلبه منا مايعرف عنه شي والهلبه هادم متزوجين...!🍁
🍁🍁🍁
وصلوا لسبها..
وخوتها بلغوا زوجها يجيبها للمركز الطبي بش تشوفهم لأخر مرة..
ورفعها وين ماموجودين امها وبوها تشوفهم للمرة الأخيرة..
شكلها وهي خاشه ملهوفه ع شوفتهم لهفة اللي عنده امل واهم انه يطلع اللي عرفوه من حقيقه موجعه كذب..
او لهفة اللي يبي يشوف بعيونه بش يصدق ويتأكد...
اللي صار في المشفى وقتها..
شهدوا عليها الكادر الطبي كله اللي يعرف لينا واهلها عز المعرفه..
وع راسهم صديقاتها الممرضات..بريكه ومريم وامل..
كانوا يبكوا بحرقه وهما يسمعوا في عياطها وبكاها بعد ماخشت شافتهم...
كانت منهارة انهيار تام لما صدقت وتأكدت..
حاول خوها عبدالله وهو يضم فيها انها يهديها ولو شويه..
لكن لينا كانت وقتها في اسوأ واصعب حالاتها..
سفيان يشوفلها وقلبه تفتت من الألم لحالها...كان يبي يكون هو في مكان عبدالله...هدا اللي مفروض يكون..
بس الظروف كلها حالت دون ذلك...
طلعوا لينا من غادي وهي مش لاقيه جهد للبكي..
سكنت فجأة وسكتت ورجعت لحالة الصدمه..
لعند ماوصلت لحوش اهلها...ووين خاشتلها وتقابلت هي وخواتها انهارت مرة تانيه..
المشهد اللي جمعها بخواتها قطع قلب وجيهه من البكي..
كان مشهد مؤلم وموجع لأبعد حد...
يعني كيف بيكون حال اللي فقد والديه في مرة!؟
🍁🍁🍁
قبل الجنازة...كان عبدالسلام واصل هو ومرته وصغاره لسبها عن طريق الجو..
عبدالسلام لما جو بيروحوا مافكرش يحاول فيهم يقعدوا لين يروحوا مع بعض..شافهم مصرين ماباش يلح عليهم..
وهالشي خلاه يأنب نفسه بشده وسط جموع المشيعين للجنازة..
وهما يهدوا فيه ويقولوا...
" ساعتهم وحانت مابتقدر ترد عنهم الموت"..
ولكل آجل كتاب...
🍁🍁🍁🍁
مروا تلاته ايام ع العزاء..
روحوا بعدهم الشريف ووجيهه
لطرابلس...
وقعد سفيان..ماقدرش يخليها وحزنها مازال جديد...
حاول فهالأيام انه يجتمع بيها بش يكلمها ويواسيها بس للأسف الوضع ماكانش يسمح...
ومن ثلاته ايام يعدي اسبوع...
كان مجبر فيه سفيان يروح ع خاطر خدمته لأنهم خاشين امتحانات في الكليه ولازم بجي بش يعطي ماقعدله من المنهج..
وقبل مايطلع طلب يشوفها...
🍁سفيان:تبوا اي حاجه اي عبدالله اتصل طول مايحشمك شي..
عبدالله:تسلم بارك الله فيك ياسفيان...
ع طلعة لينا من الحوش.
هو وين شافها كيف ولت قلبه اعتصر ألم..
عبدالله :بالإذن...ومشي خش داخل..
وهي قدمت لسفيان لين وصلت فيه ووقفت قدامه..
كانت منزل عيونها لوطا والدمعه محبوسه فيهم وملامح الحزن اصبحت وكأنها جزء من تقاسيم وجهها..
هو بحزن:شن حالك لينا..
ردت بصوت مبحوح كله حزن..الحمد لله ع كل حال ..
تنهد وقال:مافيش كلام ينقال يقدر يهون عليك اللي انتي فيه..المصاب جلل ومافيش كلمة مواساة وحده تقدر تهونه..بس مع الأيام حيخف لأن المصيبه تبدا كبيرة بعدين تصغر...
يقول في كلام هو مش حاس بيه كان يبي يقول كلام تاني غيره..بس ماقدرش..لانه هكي..انسان مايعرفش يعبر عن مشاعره ومايقدرش من الاساس..
سكت وهو يشوفلها مادارتش اي ردة فعل ولو بملامح وجهها.د
عارف الكلام مش حيأثر فيها ولاحيوصلها..
لانه مجرد كلام...مجرد من كل شي ليه علاقه بالمشاعر..
المشاعر كلها قعدت مدفونه داخل..
سفيان:احمم..اني مروح توا كلها اسبوعين ومولي ان شاء الله..
لينا:لو عندك شي مهم ماتلزمش روحك بالجيه في وقت معين كمل شغلك وبعدين تعال..
هو قال:لا مافي شي مهم بعد اسبوعين هادم..اسبوعين وجاي ان شاء الله..
لينا هزت راسها وقعدت ساكته..
مسح حاجبه وقال:ماتبي شي..
لينا حركت راسها بالنفي..
قعد يشبحلها وحاس روحه كابت بركان من الكلام والمشاعر والاحاسيس كان يلقى يطلعهم كلهم فهاللحظه بس ...ماقدرش..
سفيان؛تمام...بيناتنا تليفون..
لينا هزت راسها بإيجاب..
سفيان:تمام تقدري تخشي..
لينا لفت ومشت بدون ماتشبحله...وهو قعد واقف يشوفلها وكل ماتبعد كل ماقلبه يزيد قوة في النبض وكأنه يبي يطلع من صدره ويمشيلها..
شويه طلع عبدالله مرة تانيه سلم وسقده..
وتوجه سفيان بسيارة اجره للمطار ...
وسافر لطرابلس....وخلا قلبه في سبها....
🏵🏵🏵🏵
بعد مرور اسبوع اخر..
في حوش الشريف..
بعد العصر....
مقعمزين في الجنان...
وجيهه وبناتها وحناهم تهزب فيهم..
زبيده:تمشي سلفتها مرتين..وحمواتها ولاوحده فيهم تمشي توقف ساعه...! والله مانحسابكم تطلعوا قليلات اصل هكي يابنات ولدي..
نوريه:اني راجلي مش فاضي وماباش يطلقني مع خوي..
عفاف:حتى اني ياحناي حالي من حالها..
زبيده ؛وانتي!؟
رنده:مانبيش ..
وجيهه فنصت فيها..
زبيده؛وتقولي فيها عادي..! والله ياكلبه ماتبي كان الكوي ع راسك المعبي سم هدا..
سكتت رنده وهي رافعه حاجبها ومش عاجبها طبعا كلام حناها..
وجيهه:بوكم طايرتله منكم هلبه وقال قوليلهم ترد بالها وحده تجي تكلمني..
نوريه:لابوي قداش ليه بايعنا..
زبيده مطت شواربها للأسفل بإزدراء وهي تشوف لنوريه..
شويه وسمعوا صوت الباب انفتح..
وجيهه:شكله سفيان..
ع طلعة رتيل ببنت رنده:هاك شدي بنتك ماخلتنيش نقرا كلمتين ع بعض..
خدت رنده بنتها وقالت:امتى تبدوا انتم؟!
بعد اسبوع..
نوريه:بالنجاح رتولتي.
رتيل؛تسلمي ياألبي..
ع جية سفيان...
عفاف:سويفه عاش من شافك..
وقف وهو رافع حاجبه وقال:مانبيش وحده تكلمني ولادورني شن مايصير معاكم..سفيان حولوه من حساباتكم...تمام..
قعدوا يشبحوله وهما مصدومات..
وهو بعد ماقال اللي عنده لف ومشي..
رنده؛حي يما!؟
زبيده:وشن تحسابيه بيدير غير هكي!؟ راهي مرته هادي كان مازال مش عارفين ولانسيتوا..
شبحوا البنات لامهم بعد ماكانوا يشبحوا لحناهم..
لقوها تشبح للحصيرة المقعمزين عليها بنظرات ضيق..
بعدين شبحوا لبعض ومزال مش مستوعبات اللي صار توا.
ورتيل تنهدت بملل ومشت خشت داخل..
🍀🍀🍀🍀🍀
في حوش المرحوم عبدالودود..
بعد مرور اسبوعين من العزي الزحمه بدت تخف..
وبدي اللي يعزي يجي من العشيه للعشيه ومرات في الليل..
وفهالعشيه..
كانوا في معارف ليهم جايين من بعيد..
مقعمزين في وسط الحوش والكناين معاهم..
والبنات في الكوجينه يجروا على ضيافتهم..
اما لينا كانت ترقد في صغارها في الدار..
وبعد مارقدوا..
طلعت ومشت بتقعمز مع الناس..
وهي ماشيه سمعت هدرزة مرت خوها نجمه اللي كانت تقول..
نجمه:سبحانه ربي لطف بينا لو كنا روحنا معاهم في نفس اليوم وراكم تعزوا فينا حتى نحنا...الحمد والشكر ليك ياربي..
كلامها مش مقبول ولامناسب..
ولينا ماقدرتش تتحمله لما سمعاته..
خشتلهم وهي معصبه قالت:تو هدى كلام ينقال يانجمه..!
نجمه شبحت لسلفتها بعدين شبحت للناس وقالت؛خيرني شن قلت!؟!
لينا؛لا ماقلتي شي...ماقلتن شي ولادرتن شي انتي وياها غير قلة الأصل من لما جيتنا لتو..
ورده:قلة اصل!
نجمه:شن الكلام اللي تقولي فيه هضا!؟ايه حازنه ع هلك فهمنا لكن مش هكي..
ع طلعة خواتها من الكوجينه.
لينا؛شن وجعتكن الصراحه!؟وجعتكن انها طلعت ومن
لينا اللي ديما ساكته عليكن وكافيتكن خيرها شرها..!
بالله عرق الحشم هدى مش فيكن بكل..
طول ايام العزي وانتن تلبسن وتميكجن وتميعدن وتضحكن تقول في فرح..حتى في كنسة دار ولاغسل ماعين عاونتن..
ومابت وحده فيكن تبات ليله..
لكن شن بنقول مش جديد عليكن الله يرحمهم لاعمرهم حصلوا منكم لااحترام ولاتقدير ولاروا منكن كان الكيه واختها..
هناء:لينا.
لينا:خلوها لينا بالله عليكم خلوها تحكي واطلع اللي في قلبها..بعد اللي ريته واللي عشته عرفت قديش نحنا طيبين واجد...وعرفت وفهمت اللي كنتن تحسن بيه انتن وامي..
وتوا كله تأكدت منه...
لكن تعرفن كيف..والله اللوم والعتب ماهو عليكن...ع التريس...خوتي اللي حاويين كيفكن..
ومشت طلعت من حداهم وهي في قمة الغضب..
وخلت كل الموجودين مش مصدقين ان هادي هي نفسها لينا الطيبه المسالمه...
لينا اللي راته ومر عليها علمها هلبه حاجات وفتح عيونها ع حاجات عمدا كانت مغمضتهم عنهم...
التجربه اللي عاشتها صقلت شخصيتها كويس..
🍁🍁🍁
بس طبعا اللي داراته هدا مش حيمر مرور  الكرام..
••عبدالسلام:شن هبلتي انتي خلاص معاد قعد فيك عقل شن العار اللي درتيه قدام الناس هدى..
عبدالله:ولاالكلام الكبير اللي حطيته كيف تقولي عن نساوين خوتك قدام الناس قليلات اصل..
لينا وهي تمرر في نظرها عليهم بحده؛ماكذبتش..
عبدالسلام؛احترمي واعرفي شن تقولي خيرلك..
لينا؛علاش شن بديرلي بتضربي قول!؟ ولابتلزني..مانستبعد عليكم شي انتم اللي مازال باتكم وامكم ماسكروا الشهر متوفيين وتحكوا عن بيعة البيت والورثه.
البنات شبحوا لخوتهم بإزدراء..
عبدلله؛وشن الغلط والعيب اللي حكينا فيه!؟توا ولابعدين هدى اللي بيصير البيت مسيره ينباع وكل حد بياخد حصته بما فيهم انتي..ولاماتبيها؟!
لينا وهي تشوفلهم بحده ودموعها ينزلوا؛لانبيها والله مانخليهالك...خسارة فيك..خسارة كل شي درته ع شانك انت بالذات ياعبدالله...ماكنت نحسابكم هكي ياخسارة طحتوا من عيني ياخوتي ومعاد ترقوا..طلعوا حق تريس نسوانكم..
عبدالسلام رفع يده وجاي بيضربها بقفاها وهو يقول؛-بتسكي ولانسكتك..
لينا؛ديرها بالله ديرها كان فيك شجاعه ديرها...تحساب ماوراي حد..والله وراي راجل كان يعلم ان في من يد ع مراته حتى لو كانوا خوتها يحرقهم حرق..مازلتوا ماتعرفوا سفيان انتم...
خواتها قعدوا يشبحولها..
شد عبدالله عبد السلام وقال؛خلاص كلمي قوليله الاسبوع الجاي يجي يروح بيك العزي تم وفي من بيجي يشوف البيت ...بنبيعوه خلاص..
البنات انصدموا..
اما لينا قالت بضحكه ودموعها ينزلوا:الحمد لله..الحمد لله اللي خدا باتي وامي وماخلاهم لاشكالكم..رحمهم وين خداهم حماهم من البهدله في اخر عمرهم...لكن الدنيا دور ياخوتي واللي يدير سيوره يلقى..
ولفت ومشت للدار وهي تذكر في كلام بوها عن خوتها لما جبرها توافق ع الزواج من سفيان..
واضح ان بوها وقتها شاف في سفيان اللي ماقدرش يشوفه في ولاده......الأمان...
خشت وسكرت الباب عليها وانهارت بالبكي..
🍀🍀
💎وهو في هالوقت كان واقف في بلاكونة داره..
حاط ع رقمها ويحاول يشجع نفسه ويتصل بيها..
طول الفترة اللي فاتت ماكلمهاش وكان يطمن عليها هي الصغار من امه اللي كانت تكلم فيها يوميا..
كانت عنده رهبه من الحديث الهادي معاها..كان يخاف يفضح مشاعره...برغم انه يبي يفصح عنها..
وخوفه هدا كله من الرفض...من ان يشوفه بعيونها ولو ماسمعاش منها..
قاعد مش قادر ينسى كيف رفضت حتى يمسك يدها وهي في حالة الصدمة الاولى...يعني فهداكا الوقت وهي في عز فاجعتها رفضت قربه...!
اللقطه هادي اثرت فيه هلبه....خلاته مش قادر يرقد الليل...
طبيعي اللي زيه هو...سفيان المتكبر اللي تعود باللي حواليه يدوروا ديما في فلكه...ويتمنوا منه نظرة رضا...
ولأنه حالته بدت تزيد تطور يوم عن يوم....معاش قدر يتحمل يقعد  كتوم لهالحد..
🏵🏵🏵🏵
في الجامعه..
تحديدا المكتبه..
مقعمز ابوبكر يسمع فيه وهو منسجم ومش مصدق في نفس الوقت...ان اللي يتكلم قدامه توا صديق العمر سفيان.
💎سفيان؛ماتسألنيش ولاتقول كيف وامتى ومسرع...لاني مش حنقدر نجاوبك مش حنعرف اصلا..اني بروحي لتوا مش مستوعب.
ابوبكر ابتسم وقال:انت لقيتها اللي تمينته..
سفيان قعد يشبحله وهو ساكت..
ابوبكر:مافيش مراة خلاتك في هالحالة قبل هكي...خاش في بعضك متوتر مش فاهم شي...انت لقيت في هادي اللي مالقيتاش في غيرها..
سفيان؛اولا خليك منتبه وانت تدوي عليها شن هادي متاعك هيا! وياريت ماتجيبهاش في كلامك من اصله..ادوي بشكل عام بس..
ابوبكر بضحكه:حاضر ياسيدي اسفين ماتواخدناش ..
سفيان؛ندوي مني جد ياابوبكر ماتخلنيش نندم اني حكيتلك..
ابتسم ابوبكر وقال؛اسف سامحني غير  قلت نضحك معاك شويه بس نخفف التوتر اللي انت فيها لكن الباين عليا زدته سامحني..
سفيان؛تمام مش مشكله صار خير صاحبي ونعرفك ونعرف نيتك كويس..لكن اني جيت حكيتلك نبيك تعطي حل تشور عليا بشي يخليني نعرف نتصرف..
ابوبكر؛تمام...المراة بشكل عام ياصاحبي وبالذات القويه تحب الاهتمام..كذب عليك راهو مافيش مراة ماتحبش ا الاهتمام...تقدر تملك المراة بالاهتمام والاحتواء والحنيه..
سفيان؛اهتمام واحتواء وحنيه... هادم كلهم مش هلبه ؟!
ابوبكر؛باهي خلاص خليك هكي متولع وايامك سود..
سفيان تنهد وقال:باهي يعني كيف الاهتمام هو..راك تقولي جو الورد وكلام الحب والهدايا وجو المراهقين..
ابوبكر بضحكه:برغم انه مش جو مراهقين والمراة تحب الحاجات هادي هلبه لكن مش شرط...اهتمامك بيها لما تكون محترم اهتماماتها ومقدر الحاجات اللي هي تجبها وتشوفها في شن خاطرها وشن تتمنى وتحققه..توقف معاها تسندها تحسسها بالأمان..ضحكها..
ابتسم بعقد حواجب..
ابوبكر؛ايه والله المراة تحب الراجل اللي يضحكها يضحكها بخفة دمه يضحكها لما يفرحها..ينسيها التعب والهم..
سفيان:لهالدرجة الموضوع صعب!؟
ابوبكر؛تو انت شن تبي بالزبط فهمني..
سفيان :احم..نبي..نبيها تتقبلني ..
ابوبكر وهو متفاجئ :تتقبلك!!مش حتى تحبك!؟ لا انت مشوارك طويل ريت اللي قتله ديره لما اضاعف جهدك بش اطبقه وتزيد عليه..
سفيان حط يده ع فمه وقعد يوزع نظره القدام..
ابوبكر:الحب يبي هلبه تنازلات..والمراة لو عطيتها قلبك تعطيك عمرها..
ابتسم وشبحله..
ابوبكر ضحك وقال:الحمد لله اللي حياني بش عشت هاليوم وهاللحظه بالذات...
سفيان بصوت مكتوم؛اشرب قهوتك صقعت..
ابوبكر:قهوة شني ياراجل عازمك ع.الغدي اليوم...
نزل سفيان يده وهو متعجب قال:كيف صار من وين زرقت الشمس اليوم..
ابوبكر بضحكه؛من جبهتك....هي نوض نوض عازمك ع مكان يدير ماكله الله يبارك...
ناض سفيان وهو يقول؛ولا ان قلبي مش مستريح لهالعزومه وحاس اني بندبس فيها في الاخير لكن مش مشكله يقولوا الحق الكذاب لقدام الباب..
ابوبكر:كذاب شني وباب شني وحساب شني...اني قتلك عازمه لكن ماقلتش ع حسابي..
سفيان بضحكه؛تافه اقسم بالله..برا قدامي برا..
ابوبكر قعد يضحك ومشي ..وهو مشي معاه والزوز قعدوا يتناقروا لين وصلوا لسياراتهم...
🏵🏵🏵🏵
الساعه12:00ليلا..
مقعمزين قدام التلفزيون..
هي تتفرج وهو لاهي بتليفونه..
رنده:شن رايك نمشوا لغنيمه الايام الجايه..
محمد؛مش فاضي..
رنده:ديما وانت مش فاضي..
محمد؛والله مانلعبش نجري ع الحوش اللي بتموتي بش تسكني فيه..
رنده؛باهي نقص صوتك..
محمد؛وانتي سكري فمك مرة ولاخشي ارقدي..
رنده ودموعها في عيونها:مش ملاحظ انك وليت معاش متحمل مني كلمه..
هو ناض ومشي وهو يقول:هي اقعدي فيها انتي والنكد متاعك..يابومه..
ومشي طلع من الشقه...وخلاها مصدومه..
ضمت شواربها لداخل بغضب وهزت راسها بالوعيد بعدين قالت..باهي يامحمد..تو تشوف صبرك عليا بس..
🏵🏵🏵🏵🏵
في داره..
يعلق في حوايجه اللي ماحصلش وقت يحددهم فيه كان توا...
رن تليفونه..
خلاه يرن وهو يعلق في لاهي باللي يدير فيه..
لين فصل..
بعد ماعلقهم..
رجع رن مرة تانيه.
هو رد طاولة الكوي لمكانها وحط المكوى في مكانه المخصص..
بعدين جي للتليفون وقبل ليوصل فيه كان فاصل..
خداه وقعمز ع السرير...
وشاف المكالمات من مني..
فتح عيونه ع وسعهم وقلبه بدي بقوة..
قعد يمسح في حاجبه اليسار اكثر من مرة وهو يشوف للرقم..
خدي نفس..وزفر...بعدين...حط ع زر الاتصال..
وحط التليفون ع وذنه وغمض عيونه..
نادى مرة اتنين تلاته اربعه لين فصل...
استغرب..عاود اتصل تاني..
ونادى كذلك لين فصل...زاد استغرب اكثر وعاود مرة تالته..
نادى مرة تنين تلاته بعدين انفتح الخط..
"السلام عليكم"
قلبه فر فران...
بلع ريقه ورد؛وعليكم السلام
"وعيتك من النوم؟"
سفيان؛لاكنت فايق..
"اها"...
وقعدوا ساكتين..
شويه هو قال:شن حالكم.
"الحمد لله..بنسألك"
هو قال بلهفه مخفيه:اسألي...
"تقدر تجي تروح بيا نهار التلات"
هو طار من الفرحه وقال في نفسه"ياخي حتى التلات مازال بعيد"..
هي لما طول وماردش قالت..
"كان ماتقدر مش مشكله عادي"
هو قال؛لا نقدر ..تو شفت الجدول عندي لقيت يوم الثلات فاضي مافيه شي..
"باهي..خلاص يوم الثلات"
هو قال:ان شاء الله...وحسها بتنهي المكالمه قال:شن حال بحر وياسمين..ماتعبوش من النو..
"هدى بيش نبي نروح "
عقد حواجبه وقال:قصدك مرضى ولا شنو.
"لاخايفه عليهم يتعبوا من الجو هنى"..
هوقال؛-معناها نجيكم غدوة ان شاء الله..
"غدوة!؟"
هو قال؛ايه غدوة صحة الصغار هادي مانقدرش نعطل عليهم..جهزي نفسك لغدوة ان شاء الله مع العصر نكون غادي..
هي قعدت ساكته..
سفيان:معاي!؟
لينا..
"ايه....خلاص بكرا بكرا...تصبح ع خير"..
وسكرت طول..
هوغمض عيونه بأسف..بعدين نزل التليفون وفتح عيونه قعد يشبحله..وقعد يفكر..
بعدين تمدد ع السرير وهو مازال يفكر لين غافله النوم ورقد...
🏵🏵🏵🏵
اليوم التالي...
واقفه في الكوجينه تشوف في القضيه اللي خداها راجلها وهي تقول..
وجيهه؛هدا كله لمرواحة بحوري وياسي..
الشريف بضحكه؛والله لولا اللي ظرف امهم ذبحت ع خاطرهم...
منى؛ربي يطول في عمرك ياعمي ولايحرمكم من بعض..
الشريف؛يبارك فيك يابنتي..وماتحطي في نفسك شي احفادي كلهم مكانتهم وحده عندي غير هادم وضعهم خاص وانتي عارفه ومتفهمه
منى بإبتسامه:فاهمه ياعمي وعارفاتك انت شنو مستحيل نفكر فيك بسوء ظن
الشريف:ربي يكملك بعقلك ويبارك فيك..
منى:تسلم ياعمي..
الشريف:هي ماتبوا شي تاني..
وجيهه:سلامتك بس..
الشريف هز راسه ومشي طلع..
وجيهه:هي ابدي هي..
منى:حاضر...
🍀🍀🍀🍀🍀
الساعه 5:46عصرا..
قدام الباب..
هناء ببكي؛مش معاد تجي تعالي لحياشنا اقعدي لامتى ماتبي المهم ماتقطعينا..
لينا هزت راسها بآيجاب وهي تبكي..
امال مسحت ع ظهرها ودموعها ينزلوا وهي ترشف وتقول:حافظي ع روحك وحياتك وراجلك..باين عليه راجل كويس يالينا..
لينا قعدت تبكي بصمت..
ضمتها امال وقالت؛خلاص قطعتيني..وقعدت تبكي..
"لينا"..
بعدت عنها امال وخشت داخل..
لينا حطت يدها ع فمها وشبحت للصغار لقتهم يبكوا.
نزلت يدها وقالت بإبتسامه من بين دموعها؛تعالولي باهي..قولوا لبابا قلنا لطرابلس نشوفوا خويله لينا..باهي.
الصغار هزوا روسهم وهما يبكوا..
وهي طبست عليهم وباستهم...بعدين قالت:بالسلامه..
ولفت ومشت بكروسة صغارها..
والصغار وهناء يشبحولها..
لين ادرقت من قدام عيونهم...
وصلت برا لقت سفيان واقف حدا سيارة تاكسي..
قدم وخدي الصغار..
وهي سلمت على خوها بالسيف قدام سفيان...وهو كذلك..
بعدين مشت لسفيان خدت منه الصغار وهو من ورا النظارات يشبحلها وبس..
مشي حط الكروسه في الكوفني..
وفتحلها الباب من الخلف وركبت..بعدين مشي ركب جنب السواق وهو يشوف لعبدالله:هي السلام عليكم..
عبدالله:وعليكم السلام..في امان الله توصلوا طيبين..
ركب سفيان وهو يقول..تسلم..
وتحركت بيهم سيارة الاجرة...
🍁طول الطريق لينا دمعتها مانشفت..
ولافي المطار..ولاوين ركبوا الطيارة...
كانت محتفظه بصمتها الا من بعض الكلمات اللي نعاملت بيهم مع سفيان...
وهو كان معاها بنظره وقلبه ومشاعره..
وخاطره يدير شي بش يمسح الدموع اللي دارو طريق ع خدودها...
🍁🍁🍁
وصلوا لطرابلس..
وطلعوا من المطار بسيارته..
وطول الطريق لينا سرحانه وادمع..
وهو عين فيها وعين ع الصغار اللي كانوا في كراسيهم المخصصه ليهم يلعبوا ويناغوا وهو بيموت عليهم..
وصلوا للحوش..
ولما خشوا لقوا حناهم وعمتهم في استقبالهم..
سفيان؛خليك ماتنزليش..
هي استغربت..
وهو نزل...نزل الصغار عطاهم لحناهم وعمتهم..
وجيهه؛خيرها مانزلتش..
سفيان؛نبي نخطفها ساعتين ونروح بيها..
ومشي للسيارة..
ورتيل تشبحله وهي مبتسمه بدهشه..
اما وجيهه تنهدت بتهكم وقالت؛شكلي بنبدا نطلعله في كشافيتات ومفاتيح حتى هو ..
رتيل فهمت قصد امها وقعدت تضحك..
🌺🌺🌺
اما هما في الطريق..
لينا؛وين بتعدي بيا؟
سفيان:لمكان قنين تو تحبيه..
لينا بضيق:لكن انا تعبانه ونبي نرقد..
سفيان؛لاحقه عليه النوم..
لينا تنهدت بضيق وقعدت ساكته..
وهو مرة مرة يشبحلها...
وقعدوا ساكتين لين وصلوا للمكان المقصود..
كان مطعم عائلي يطل ع البحر..
لينا لما شافت البحر وشمت ريحته ارتسمت ع وجهها ابتسامه خفيفه..
لاحظها سفيان وابتسم...
🌺🌺
مقعمزين مقابلين بعض..
هي تشبح للبحر وهو يشبحلها..
يبي يفتح معاها موضوع ومش عارف كيف..
تنهدت...ومسحت دموعها..
سفيان:شن تحسي توا..
لينا بحزن؛مش عارفه..حاجات واجده...
سفيان؛اكثر شعور فيهم؟!
لينا؛الوحشه..
سفيان:لكن انتي مش بروحك..
لينا؛عارفه ربي ديما معاي..بس حنقعد حاسه بالوحشة...
سفيان:اكيد ربي معانا جميعا ان شاء الله..بس قصدي انت مش بروحك...اني معاك..
شبحتله..
سفيان قعد ساكت معاش يعرف شن يقول...ولاقدر يرمش حتى..
هي غيرت عيونها عنه ورجعت شافت للبحر..
سفيان تنهد وقال؛عارف الفكره اللي واخديتها عني وعارف نظرتك ليا..ايه صح..اني ممكن يكون عندي بعض العيوب.
شبحتله بطرف عينها..
هو سكت شويه بعدين قال..انا عندي عيوب وهلبه.
ركزت عليه بنظرها كله.
هو توتر غير عيونه للبحر وقال بضحكه:وع فكره ماعنديش مشكله نعترف بشي هدا لأن الاعتراف بالخطا فضيله..مش اي حد يقدر يتكلم عن عيوبه ويعترف بيها..
لينا نزلت عيونها ورفعت حاجبها..
سفيان حس روحه قاعد يرفس وكمل يقول:المهم اني يعني مش انسان سيء زي ماانتي شايفه..
لينا رفعت عيونها فيه..
هو قعد يشبحلها وهو في قمة التوتر..
تنهد لااراديا..
لينا؛تسمحلي..
سفيان؛بشني!؟
لينا؛نقولك ع راي فيك..وياريت ماتزعلش..
سفيان بثقة مصطنعه؛لاعادي مش مشكله...
لينا:تمام...انت واحد متغطرس متكبر متخلف تفتقر للحكمه غالبا...وعقليتك تبي اعادة نظر..
قعد يشبحلها وهو مصدوم ..
لينا:هدى رأيي فيك اللي بنيتك انت بروحك..
سفيان وهو رافع حواجبه:باهي..رحم الله امريء اهدى اليا عيوبي...لكن اكيد في ايجابيات ولا...رفع حاجبه اليسار..
لينا؛لا..
هو قعد يحك في لحيته ومرر نظره حواليه يمينه...
كان مصدوم ع الاخر ومتحطم ومعصب في نفس الوقت..
بس مجبر يتحكم في اعصابه..
شبحلها وقال:لكن نقدر نطلع وحده من العيوب اللي قلتيهم فيا غلط..زي افتقار الحكمه لان االلي اني فيه توا يثبت العكس..يعني لو ماكنتش حكيم وعاقل راني قلبت الطاوله وطلعت..
لينا غيرت عيونها للبحر وشدت ضحكتها..
هو لاحظها ارتسمت ع وجهه ابتسامه؛اهو طلع عندي ايجابيات...ضحكتك..
لينا نزلت عيونها ومازال شادة ضحكتها..
هو قعد يشبحلها وخلاص..
شويه وقال؛ع فكرة اني دمي خفيف..
رفعت عيونها وشبحتله برفعة حواجب..
ضحك وقال:والله....
هي غيرت عيونها للبحر..
ابتسم وقال:نعترفلك بسر..
شبحتله..
سفيان؛سر مايعرفوشي عني الا 4بس...خوتي الولاد..وصحابي اقرب الاصدقاء...
هي تشبحله وتراجي فيه يكمل..
هو قام تليفونه حط الانستقرام..خش ع صفحته...ومدلها التليفون وقال:افتحي الفيديو..
هي بإستغراب خدت التليفون وفتحت الفيديو..
هو ضم يده اليمين بيده اليسار وحطهم تحت ذقنه وقعد يشوف في ردة فعلها..
هي ضحكت ضحكة خفيفه....بعدين عقدت حواجبها..
استغرب..
هي رفعت عيونها وقعدت تشبحله وهي متفاجئة ع الآخر
《 :ياحنه في واحد مشهور في الانستا اسمه"مستر نيوتن"
هدى استاد فيزياء ولارياضيات مانعرفش المهم ينزل في شرح قوانين فيزياء ورياضيات لكن بطريقة خفيفه وسمحه..
يتابعوا فيه واجد قريب ميتين الف..ومنهم ولد خويا عمورة يقرا في الثانوي كيف ماتعرفي امس جاني وقال عمتي شن سماها الشكولاطه اللي جبتيلنا منها متاع صاحبتك..
قتله شكولينا..مشي وراني صورة الباكو في هاتفه ع الصفحه متاعه..وتعالي شوفي شن كاتب تحتها..》
لينا اشرت عليه وقالت :انت نفسه...اول من دار دعايه للشكولينا !!؟
بإبتسامه رفع  حواجبه ونزلهم...
لينا قعدت تشبحله وهي مش مصدقه..
وهو يشوف لعيونها وراح في عالم الشوكولا متاعهم..
هي حست بأن نظراته فيها شي غريب..نزلت عيونها وقالت:سبحان الله !
سفيان:ايه...سبحانه...
هزت راسها وجت بتمدله تليفونه وصلاته رساله..
شافت جزء منها غصب عنها..
وطول مدتله التليفون..
هو خداها وحطه ع تركينه وقال:شن تبي تاخدي.
لينا:شي..نبي نروح نبي نرقد..
سفيان تنهد وقال...تمام براحتك..لكن مرة تانيه لامفر..
هي هزت راسها مسايرة..
وهو قال:هي نوضي..ناض..
وهي ناضت..ومشوا مع بعض طلعوا من المكان...

....يتبع....