كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
ماشيه بسرعه بس بدون ماتجري بش ماتلفتش الإنتباه..
وهو ماشي وراها...
شويه وسرع خطواته وسبقها ووقف قدامها..
محمد:اوقفي رنده ارجوك واسمعيني..
رنده وهي تشبح حواليها وهي بتموت من الخوف:شن بنسمع منك ياحقير ياواطي..شبحتله وقالت بحده..يامنحط..تعرف كان مامشيتش توا نعيط ونلم عليك الدنيا..
محمد:ماتبيش تشوفي بنتك!؟
نبض قلبها بقوة لما انجابت سيرة بنتها وقالت بعيون غارقه بالدموع:وينها..
محمد تنهد وقال:تعالي معاي..
عقدت حواجبها وقالت بإبتسامه متهكمه:وين نمشي معاك مش غبيه اني بش نعاود نفس الغلط مرتين..
وجت بتمشي وقف قدامها وقال:باهي انتي ارفعيني ارفعيني وين ماتبي لأي مكان يعجبك رنده..المهم تعطيني فرصه نحكي معاك..
شبحتله بكره وازدراء وقالت:مريض...
ودفاته بقوة ومشت تجري...
وهو تبعها بعيونه لين ادرقت من قدامهم..
ضم شواربه لداخل بغضب بعدين مشي..
🍁وهي قامت تليفونها...وجت بتتصل بسفيان وتقوله..
بس في أخر لحظه تراجعت وين فكرت في ردة فعل سفيان واللي مكان يديره وهو في حالة العصبيه..
نزلت التليفون وهي تقول بهمس:شن ندير ياربي..شن ندير...
وقعدت تمشي وتشبح بعيونها هني وهني خايفه يطلعلها مرة تانيه...
وهي مازال تفكر شن دير..
لعند ماجتها فكره...فكرة هلبه قبل ماتنفدها...
بعدين قررت واتصلت بمرت خوها...
رنده وهي تراجي في لينا ترد وادور بعيونها لين ردت:ايوه لينا............تمام......لينا بنطلب منك طلب..............كرت المحامي في شقتكم؟!........................تو نحكليك اول مانروح بس باللي عليه صوريه وابعتهولي نراجي............ماتخافيش حبيبتي الامور تمام بس بالله عليك بسرعه............تمام وسكرت..
وقعدت تمشي وهي خايفه وتشبح حواليها..وتفكر في اللي بديره..حاسه انه غلط...بس مافيش قدامها حل غيره....
بعد بضع دقائق وصلتها رساله ع الماسنجر..
كانت صورة للكرت متاع المحامي...
قعدت تشبحله وهي تفكر هلبه وبعد تردد طويل..
حفظت الرقم في عقلها واتصلت...
🍁🍁🍁🍁🍁
في مكتب انس..
انس:خليه يقول اللي بيقوله كله كلام فاضي مادوريشي كل شي لصالحك اختي وبإذن الله حتخلصي منه في الجلسه الجايه..
:يارب يارب..
فجأة رن تليفونه..
قامه وشاف المتصل رقم غريب..قال:عن اذنك..
:خود راحتك استاذ..
رد انس وهو يقول:ايوه السلام عليكم..
مافيش رد..
انس:الو..
جاه صوت يرجف خوفا وهو يقول
"استاذ انس"
عقد حواجبه لما حس انه يعرف الصوت قال:ايه من معاي؟!
بنفس نبرة الصوت جاه الرد..
"رنده..رنده بن عامر"
رفع حواجبه وقعد ساكت وهو متفاجئ بس نبرة صوتها اقلقاته..
"الو"
انس بلع ريقه وقال:ايوه معاك تفضلي اختي..
..............
رنده بدت تبكي لعده اسباب خوفها..واحساسها بأنها دارت شي غلط لما اتصلت بأنس..
هو لما سمع صوت بكاها ناض ومشي طلع من المكتب ونسي المراة الموجوده فيه..
طلع برا وقال..
انس بقلق:حاولي تهدي واحكي شن صاير معاك..
"اسفه اللي اتصلت بيك بس مجبرة والله ومضطرة ولولا اللي صار معاي مادرتها"
انس؛تمام تمام..اهدي..فاهم عليك وعارف ومريت بهالشي هلبه من قبل..
هي هدت بكي وقالت...
"استاذ اليوم محمد جاني للجامعه"
عقد حواجبه وقال:شن يبي
"قالي نبي نتكلم معاك ونبيك تسمعيني وقالي ماتبيش تشوفي بنتك...لما سألته وينها قالي تعالي معاي"
انس فنص وقال:راك تقولي مشيتي معاه!
"لالالا...هربت وخليته...جيت بنتصل بخوي بس خفت يدير حاجه تولي علينا مالقيتش قدامي غير اني نكلمك.."
انس تنفس براحه وقال:كويس كويس بكل اللي درتيه...هو اكيد حيعاود يجيك مرة تانيه..ردي بالك تأمنيله مهما دار..حتى لو استخدم البنت كوسيله..
هي قعدت ساكته..
انس:تسمعي فيا اختي رنده!؟
"ايه ايه...هو اصلا حتى الهيئة اللي جاني بيها زادت خوفتني مش باين منها شي الانص وجهه بس.."
انس:طبعا بش مايشهد عليه حد....
قعدت رنده ساكته بعدين هو قال..
انس:المهم انتي ديري زي ماقتلك وماتقعديش بروحك ديما خليك في تجمعات..
"ان شاء الله..اسفه جدا ع الازعاج والله لولا اني مجبورة ماكلمتك..مشكور جدا"..
وسكرت عليه...ومسحت رقمه والمكالمه وهي مضايقه..
بعدين مشت خشت داخل في مكان فيه تجمعات..
بعد ماخشت من بعيد هو كان واقف يشبحلها...
مشي توجه لسيارته وقعد مقعمز فيها ويراجي امتى تروح...
🍁في نفس الوقت..
انس بعد ماسكرت عليه تلقائيا ابتسم..
لكن فيسع مااستاقظ لنفسه بدل ملامح الابتسامه بالجديه وعقد حواجبه ومشي خش للمكتب..
شاف المراة اذكر انه خلاها في المكتب وقال..
انس:اسف جدا..مكالمه مهمه..
:مش مشكله..
🍁🍁🍁🍁🍁
الساعه 3:00بعد الظهر..
في الكوجينه الخارجيه..
لينا:عليك حقير ووقح!
رنده:هدا واحد مريض مش طبيعي..
لينا:والله حق مايدير اللي داره كان المريض..
رنده بضيق:بس حاسه روحي غلطت لما كلمت المحامي.
لينا:هو غلط ومش غلط..فالنهايه انتي انجبرتي..يعني تبي تعرفي كيف تتصرفي في حاله كيف هدي بالعقل وهو محاميك وانتي استشرتيه وهدا شي عادي نشوف فيه..
رنده؛هكي تقولي؟!
لينا:ايه..هكي نشوف...
رنده هزت راسها وقعدت ساكته..
لينا:بالنسبه ليا ماتخافي مش حيطلع مني اللي صار لسفيان..
رنده بإبتسامه:عارفه...تنهدت وقالت..يقولوا الشده تبين معدن البنادم..واني عرفت معدنك توا بس..وحده غيرك كان تشمتت فيا وحصلتها فرصه لكن انتي مادرتيش هكي بكل..
وسكتت وهي تذكر في اليوم اللي سمعت فيه لينا تحكي مع سفيان في الكوجينه نفسها كلام لينا يومها اثر في رنده هلبه..
لينا؛بصدق وبصراحه..كنت نكرهك واجد لكن ماقدرتش نشمت فيك..اللي صار معاك مانوده لعدوي..
رنده بضحكه؛كان كره متبادل ع فكره...
لينا بضحكه:عارفه ياحبيبتي عارفه هو انتي هتقوليلي.
ضحكت رنده بعدين قالت؛لكن توا بجديات باديه نحبك..
لينا بضحكه؛وانتي بديتي تعجبي فيا فيك حاجات سمحه كنتي دافنتيهن وماطلعي كان في الشين..
رنده.بضحكه:مطول لسانك..
لينا وهي تضحك: حتى خوك يقول فيها..وهو اها صح لساني طويل نعترف..
ضحكت رنده بعدين تنهدت وقالت:خايفه..
لينا خفت ابتسامتها وقالت:استعيني بالله..وقولي حسبي الله ونعم الوكيل واجد..حتى وانتي ساجده ادعي بيها ماتبطليش...
رنده هزت راسها وبلعت ريقها بعدين قالت:حسبي الله ونعم الوكيل..هي تعالي نطلعوا طولنا..
لينا:شويه خل نطلع السفر هادوم وجايه..
رنده:باهي..ومشت طلعت..
ولينا خدت كم سفرة وطلعت بيهم...
🍁🍁🍁🍁
وفي هداكا اليوم..
العشيه ..
كان الحوش في حالة هدوء...
سفيان رفع لينا والصغار للمحل اللي داوم فيه من بعد العصر لقبل المغرب ويتسكر بعد العشي مباشرة..
ومروان رفع ولاد اخته مع ولده للنادي اللي يلعب فيه مؤيد..
ونور قعدت مع امها اللي كانت مقعمزة لاهية في تليفونها وتقرا في شي واضح انه مهم...
كانت في متندى ع النت يتكلموا فيه عن مشاكل المراة بشكل عام وكيفية علاجها كان فيه استشارات نفسيه نوريه تقرا فيهم وتاخد منهم في اللي ينفع مع حالتها..
وحداها رنده مقعمزة تقرا في المحاضرات اللي خدتهم..
والزوز مقعمزين حوالين امهم اللي كانت ادير فالشاهي..
وفي الكوجينه منى تقص في السفنز..
ورتيل في دارها متمدده ع سريرها ومدايرة ماسك شوفان
فجأة...
خش الحاج الشريف عليهم في الدار وهو يقول:وجيهه في زوز نساوين جو..
شبحوله بإستغراب..
وجيهه؛نساوين!؟..
وناضت...
مشت طلعت وهو مشي وراها للمربوعه..
نوريه:مني زعمه!؟
رنده وهي خايفه مط شواربها للأسفل بعدم معرفه..
🏵رحبت وجيهه بالنساوين ودخلتهم..
لاحظت انهم انيقات وراقيات في اسلوبهم عجبوها...
في الصاله..
وجيهه:آنستونا..
:الله يآنسك..سامحونا جينا من غير موعد بس مرات زيارات من هالنوع تجي بالغمان..وضحكت..
ونوريه تشبحلهم وهي مبتسمه بإستغراب..
:اني ناديه..وهادي اختي نوال...من عيت ****** اختي راجلها يكون ****** اكيد سامعين بيه..
نوريه:ايه عرفته اشهر من النار ع علم..
نوال بإبتسامه:حتى انتم صيتكم الباهي سابق ماشاء الله..
وجيهه:تسلمي بارك الله فيك..
ع جية منى بسفرة فيها عصير وشكولاته من #شكولينا..
فرقت عليهم بعدين بعدين حطت المترد والسفره ع الطاوله وقعمزت..
ناديه:بنتك هادي؟
وجيهه:كنتي وزي بنتي..هادي بنتي الكبيرة..
نوال:ماشاء الله عليهم وعليك حتى انتي..
كلهم ابتسموا وقالوا باصوات متقطعه:تسلمي..بارك الله فيك..
ناديه وهي تاكل في الشكولاته:امم...قنينه الشكلاطه..مش من هني ولا؟
وجيهه بضحكه:لا من هني وايديات ليبيه دارتها..هدا شغل كنتي..
نوال شبحت لمنى وقالت:انتي؟
منى بضحكه:لالا..
وجيهه:لالا كنتي التانيه فتحت حتى محل وتوا ماشيه هي وراجلها ادير عليه دورة شن سماها محلها يابنات..
نوريه:شكولينا..
نوال:وين يجي؟!
منى:في ******* قدام ******
ناديه:اها عرفت وين..
نوريه:مش للشكلاطه بس هو حتى الحلويات اللي تندار بالشكلاطه مرت خوي هادي ادير فيهم..
نوال:ماشاء الله...ضحكت وقالت..حمستوني نفتح الموضوع اللي جايين ع خاطره..
وجيهه:تفضلي..
نوال حطت طاسة العصير وقالت:اللهم صل وسلم علي النبي..
كلهم بأصوات متقطعه:عليه الصلاة والسلام..
نوال:اني ياوخيتي..واختي معاي باعتنا خوي بش نخطبوله من هالحوش المبارك ان شاء الله..
كلهم اتفاجئوا..
ناديه:قال هي تقرا في المدرسه اول ثانوي..عاجباته هلبه..عجبوه اخلاقها وعيلتها وين سأل عنهم ..
نوال:خوي سنه اولى هندسه ومش لأنه خوي..لكن والله العظيم راجل بمعنى الكلمه نعتمدوا عليه في الحاجات الكبيره بري اسألوا عنه بين صحابه في مكان قرايته وين مايخدم مع خوته الجيران..ومش حتلقوا كان اللي يشكر...يخاف ربي مش متاع لعب ودوة زايده..
ناديه:عارفينه صغير وهي صغيره حتى هي...واكيد الزواج مش توا..هو بش يبي يعطي فيها كلمه وبعد ماتتخرج من الثانوي يكون هو قريب يتخرج وقتها يخطبها رسمي
وجيهه؛والله ياوخياتي الموضوع مرفوض لا اني ولابوها ولاخوتها نوافقوا عليه الكلام هدا متاع يعطوا فيها ماكلمه بناويتي كلهم ماعطيتهم الا بعد ماكملوا قرايتهم وهالشي ماشي عليها حتى هي..
نوال:ياوخيتي البنيه عاجباته هلبه والله ليه مكلمنا عليها اسبوع وحني نقنعوا فيه ونقولوله يصبر لين تتخرج من الثانوي ع الأقل لكن هو قال خايف البنت تريح منه..وضحكت..
وهما ضحكوا..
ناديه بإبتسامه:انتم زيدوا فكروا وردوا الشيرة ع بوها وخوتها وشوفوا شن يقولوا..
وجيهه:ولو اني عارفه من توا ردهم لكن ع خاطر جيتكم تو نكلمهم..
نوال بإبتسامه:يسلم خاطرك..باهي طلب اخير..معليشي اضبحولنا عليها نشوفوها شويه..
ناديه:ايه والله ياريت خاطري نشوفها...
شبحوا وجيهه ونوريه لبعض ومنى تشبحلهم وهي مبتسمه بعقده حواجب..
🌸🌸🌸
وهي في عز استرخائها..
وماسك الشوفان جف ع وجهها..وشرايح الخيار رمضوا ع عيونها..
انفتح باب دارها وخشت نوريه..ومعاها رنده..
نوريه:فرخه رتيل نوضي..
رتيل رفعت يدها واشرت بيها بمعني شن في..
جتها رنده حولت الخيارات من ع عيونها..
هي فتحتهم واشرت بيدها مرة تانيه..
بمعنى خيركم..
نوريه:نوضي قعمزي..
غمضت عيونها بإبستسلام وناضت قعمزت..
نوريه:تعرفي من في برا..
هي اشرت براسها وهي تشبح لاختها بملل بمعنى منو..
رنده؛نساوين جو يخطبوا..
اشرت روحها بعدين اشرت بيدها ..بمعنى واني شن دخلي..
نوريه:ماهو جايين يخطبوا اني..
رنده؛ولا اني!..
رتيل اشرت ع روحها وهي تتسأل بتهكم يعني اني..
نوريه:مال امي؟!
فنصت عيونها وهي تفكر معقوله يكون مبشر والهام ماقالتش تبيها تكون مفاجأة..
قعدت تسأل بيدها ونظرات عيونها كلها فضول..بمعنى مني..
نوريه؛هاه ريتيها كيف متلهفه معناها الموضوع فيه ان..
رنده:مايطلع منك يافرخه..واني نقول لاهيه في قرايتها ومش مدورة الدوه الفاضيه..
اشرتلهم بسباببتها وهي تحرك فيها نفيا بسرعه بمعنى لالا..
شحتها نوريه من الكعكه متاع شعرها وقالت:تكلمي يافرخه كسرتيلي رقبتي..
رتيل:اي...باهي باهي..بس والله مافي منه اللي في بالكم..
رنده:توا نوضي اغسلي وجهك والبسي حاجه واطلعيلهم..
رتيل:نطلع!؟؟لالالا مش طالعه..
نوريه زادت شحتها وقالت؛نوضي سقدوا روحك.النساوين يراجو..
رتيل:باهي باهي..باهي..وناضت..ومشت طلعت من حداهم..
نوريه بضحكه:امتى كبرت هادي!؟.
رنده ضحكت...
🌸وغسلت رتيل وجهها وحطت كريم مرطب.
بعدين مشت لدارها لبست لبسه قنينه ورفعت شعرها ذيل حصان ونزلت غرة "جمه،قصة" ع جبهتها..بعدين مشت طلعت..
وصلت في الصاله وخشت قالت؛السلام عليكم..
نوال وناديه انبهروا بيها لما شافوها كانت جدا جميله بس واضح صغيره..
سلمت عليهم بعدين مشت قعمزت حدا امها..
نوال:الله يبارك الله يبارك..
ناديه:قولي يارتيل عندك مانع لو عطوا فيك كلمه توا..
تفاجئوا وجيهه ونوريه ومنى..
اما ناديه فكان ليها مغزى من سؤالها..
رتيل بجديه؛ايه عندي مانع..الحق الحاجات هادي مش في عقلي توا ومش مفكر فيها بكل مازال بكري عليها بكري هلبه..توا نبي نقرا وبس..
ابتسمت ناديه وهزت راسها بإيجاب..
نخصت وجيهه رتيل بش تنوض..
ورتيل فنصت لين قريب عيونها طلعوا.بعدين ناضت وهي تقول:نستأذن..ومشت طلعت..
وعيون نوال وناديه معاها وهما يقولوا..
"الله يبارك...ربي يحفظها"
.................
"والله والله..واقسم بالله مانعرفه ياماما بكل"
وجيهه:مشيه على غيري مش عليا اني..قولي الحق خيرلك من وين تعرفي واحد يقرا في الهندسه سنه اولى!؟
رتيل:والله والله ياماما ما.....فنصت عيونها وقالت...سنه اولى هندسه!؟
نوريه:ايوه هي اعترفي طلعي اللي عندك..
رتيل وهي متفاجئه:ايه اذكرت هدا مرة بعتلي بنت اخته كلمتني وقالت نفس الكلام واتي قلت لا..وهو شوره فهمها ايه..
وجيهه:قداش ليها الدوة هادي؟!
رتيل:ليها وقت ماما...
نوريه:وين عرفك هو؟.
رتيل:والله مانعرف كان يجي في المرواح وبعدين معاش حي بكل بعد قتله لا نحسابه خلاص..
وجيهه قعدت تشبحلها شويه بعدين اشرتلها بسبابتها تهديدا وقالت:ياويلك لو نعرف انك كلمتيه ولافي بينك وبينه حاجه اني مانعرفش نتفاهم نمشي طول لسفيان..
رتيل بخوف:يادي سفيان..والله ياماما ماني مكلماته لاهو ولاغيره..اعتقوني كلهم اني بنت تبي تقرا وتبني مستقبلها ايوه..
وجيهه شبحتلها بربع عين بعدين مشت طلعت..
نوريه ناضت وقعمزت جنبها حاوطت كتفها بذراعها وقالت:-قولي قنين ولاشين..
ضحكت رنده..
رتيل:مانعرفش ماركزتش..
نوريه:فكينا من طروحك وقولي.
رتيل:ايه وبعدين نلقى الدوة كلها عند امي..
ريشتها وقالت:تكلمي ياقنتشه..
رتيل؛قتلك ماركزتش اصلا هو يدره الكبد ..
رنده:هدا علاش هي..
نوريه؛لا كان شين باهي اللي فتيه..
رتيل ضيقت عيونها وهي تشوف لنوريه عارفتها تختبر فيها..
رندة بضحكه:نوضي نويرة نوضي مش معدي عليها هادي...
نوريه ناضت وهي تضحك..
بعدين طلعوا من حداها..وسكروا الباب..
هي تنهدت وشاف للباب...بعدين ضيقت عيونها وناضت قعدت تتسحب لين وصلت في الباب..وهوب..
فتحاته..
لقتهم واقفات قدامه..
نوريه؛خيرك وليتي بيا هني تعالي لكوجينه..
وجبدت رنده من يدها وهي تضحك..ومشوا.
حركت رتيل راسها يمين ويسار وسكرت الباب..
🏵🏵🏵🏵
"رتيل!؟"
وجيهه؛ايه رتيل ياسيدي..
الشريف بضحكه؛ضحكتيني في عز همي..
ابتسمت وجيهه وقالت؛ان شاء الله ديما..
الشريف بإبتسامه؛تصدقي قاعده في عيوني وكأنها من عمر بنات عفاف ونوريه..
وجيهه؛ماحد يقعد صغير ياحاج..الصغير يكبر..
الشريف تنهد وقال:ويكبروا ويكبر همهم معاهم..
تنهدت وجيهه بضيق وقعدت ساكته..
الشريف:نخمم في رنده هلبه مش عارف كيف بيصير فيها وشن مازال بيدير فيها هدا الشيطان حاشا اسمه..
وجيهه:ربي ينصرها عليه ويفضحه هالكلب غير علاش سموه محمد بس..
الشريف:والله بوه راجل كويس ويخاف حتى هو كان ماشاء الله عليه..قداش كان يعز عليا..خسارة وخلاص..
وجيهه:المظاهر خداعه ياحاج..
الشريف هز راسه وقال:ربي يكفينا اياه بما شاء وكيفما شاء..
وجيهه:اللهم آمين...
الشريف:صوت الباب..
وجيهه:الولاد شكلهم روحوا..
🍁🍁🍁🍁
"ماقالش خوكم على شن ناوي؟!"
:قال مش حتاخد البنت..
الفاسي؛معناها قاعد ع ضلاله الأول..
سكت خو محمد..
الفاسي :مالا وصله وقوله قالك بوك دور وين تقعد..
:مش هكي يابوي ولدك هدا مفروض توقف معاه مش ضده..
الفاسي:نوقف معاه هالغلط..تبيني نفتري ع خلق الله ونطعن في اعراضهم!؟ بينفعني هو يوم غدوه كان وقفت معاه..بياخد نصيبي من العذاب!!؟
ولده قعد يشبحله وهو ساكت..
الفاسي:كله بوك يتبرا منك حتى التبري كان بتقعد مسكر راسك ع الحرام اللي بديره....
:ربي يهديك يابوي وخلاص..
الفاسي:توا اني اللي طلعت ضال يابهايم انت وياه.!؟.
:مش قصدي يابوي ماتفهمنيش غلط..
ع خشة محمد وامه عليهم..
ام محمد:خيركم..خيرك ياحاج..
محمد:صل ع النبي يابوي..
الفاسي:ع خاطر تعرف النبي ولاتعرف ربي..اسمع جاي خود شلااتيتك وبنتك واطلع من حوشي..
قعد محمد يشبح لبوه ويحاول يكتم غضبه..
الفاسي:اني قلت اطلع.
ام محمد بدموع:تي وين بيمشي ياحاج ولدك هدا راهو حرام عليك..
الفاسي:ع خاطر ماعنداش وين يمشي..ولا ماعنداش بيش!؟..اسمع توا نعرفك طالع والحوش هدا ماتوليلاش الا بعد مادير عقلك في راسك وتتقي لله في نفسك..
هز محمد راسه ومشي طلع...وامه طلعت وراه..
الفاسي قعمز وهو يقول بغضب:خزي زريعه فاسده..
وولده يشبحله واقف حداه ويشبحله بضيق...
🍁🍁🍁🍁
الساعه العاشرة ليلا...
في الدار اللي حدا المربوعه..
الشريف:قريب درت مشكله اليوم انت.
مؤيد:نسيت.
الشريف:تعرف لو خوالي يعرفوا ياخدوا امي وحني يعطونا لبوي ومعاش نشوفوها مرة تانيه زي ماصار لولد صفنا وليد امه وبوه اطلقوا ومعاش شاف بكل..وزي ميرال بنت خالتي رنده...تشبح في خالتي كيف تبكي ع خاطرها ولا هكي تولي امي تبكي علينا زيها..
مؤيد بخوف:لالا خلاص معاش بننسى..
الشريف:خليك زي نور اصغر منك ومحافظه ع السر زي ماقالت امي...
هز مؤيد راسه وقال:خلاص فهمنا معاش نعادوها...
..............
مروان:والله هكي قالها عرس بوي والشريف زعميته سكته وبعدين غير الموضوع...
قعدت نوريه نضحك وتضحك..وكانت تقاوم في دموعها خافت ينزلوا...
بس نزلوا غصب عنها وهي دارتهم دموع ضحك وقالت؛حتى انت يامروان....ااه ياربي لين جنابي وجعوني.....ااه..وقعدت تمسح فيهم وهي تقول...جو بوهم داره قدامهم بوهم يومها تو نقوله في الجديد معاش يبصر قدامهم..
مروان ابتسم وهو رافع حواجبه:اها..
نوريه رشفت وقالت:المهم توا تبي حاجه بنخش..
مروان:لا مانبي شي..تصبحي ع خير..
نوريه:قدامك كل خير..
لف ومشي طلع ونوريه سكرت وراه الباب..
بعدين غمضت عيونها بشده..خدت نفس عميق وزفرت..
فتحت عيونها ولفت ومشت للدار..
وصلت فيها وخشت...
شافت لامها واختها كيف راقدات..
مشت لكل وحده فيهم غطتها..
بعدين خشت فراشها خدت تليفونها من ع المسند..
شافت الشاشه لقت رساله واصلتها من رقم غريب..
ماقدرتش تمنع لهفتها...فتحتها..
وياريتها مافتحتها..
كان صورة...لحسين واكرام وهما طالعين والود باين في الصورة بقوة...وضحكه حسين شاقه وجهه..
نزلوا دموعها وهي تشبحلها...ابتسمت بتهكم..
بعدين حدفتها..وردت التليفون لمكانه وتمددت في فراشها وتغطت بالبطانيه..
وخداها التفكير بعيد عن النوم...ووسادها انبلت بدموعها..
بعد لحظات..
جاها النوم ورقدت...
🍁🍁🍁🍁
وفي من قعد سهران يتابع في اعماله...
هو كمحامي كل قضيه ياخدها اكيد تأثر فيه بشكل وبآخر..
بس ماصارتش قبل وقضيه سيطرت عليه سيطرة تامه
وقعد يفكر فيها كل وقت..
بالذات بعد الاتصال اللي جاه منها..
وخوفها ان يظن فيها ظن سوء..خوفها من ان الكلام اللي انقال يتصدق من ورا تصرف داراته هي مش قاصده من وراه اي شي سيء..
قداش صعب عن الانسان المظلوم البريء لما يفترى بيه ويعرف اللي حواليه هالافتراء..قداش صعب عليه محاولة اثبات العكس ليهم حتى لو كانوا مش مصدقين فيه شي..
يبدا ديما خايف من اي تصرف يديره...تصرف ممكن يخدم الإدعاءات الباطله في حقه..
بالذات المراة...
وهو فاهم وعارف هالشي كويس..وين يخطر عليه طليقها والكلام اللي قاله عليها يزيد يخاف عليها منه...واحد زيه متوقع منه كل شيء
تأفف..واستغفر بعدين خدي التليفون وحط ع رقمها
وقعد يشبحله...فجأة..
رن تليفونه..غمض عيونه بنفاد صبر..بعدين فتحهم وحطه ع الصامت وداره ع وجهه فوق الطاوله..
ورجع يشتغل وهو معصب..
🍁🍁🍁🍁
وجي تاني يوم..
ورفع سفيان رنده للكليه وهي كانت في قمة الخوف والقلق بس تحاول تظاهر بالعكس قدام خوها اللي كان بهدرزته عليها يحاول يغيرلها جوها للأحسن..
وهي بعد خشت للكليه نفذت نصائح أنس وحست روحها في امان اكثر وهي موجوده داخل الكليه في وسط التجمعات ومع مجموعة بنات...
وطبعا محمد جي اليوم اللي بعده وقعد يراقب فيها من بعيد لبعيد..
كان حاس بالغيرة تاكل فيه ماكله وين يشوف نظرات الاعجاب تلحق فيها ولا وين يوقف عليها حد يسألها ع وقت محاضرة او مكان قاعه او عن الاستاذ الفلاني او الاستاذة الفلانيه..
كان يلقى يقتلهم كلهم...
لين جي وقت نهاية الدوام..
قعدت مقعمزة مع مجموعة بنات تراجي في خوها..
:خوك اللي جابك الصبح..
رنده بإبتسامه:ايه خوي..
:صراحه فضيع ..
ضحكت رنده..
التانيه قالتلها؛متزوج؟
رنده؛ويموت في مرته..
:يابختها..
:ان شاء الله تكون احلا منه بس ماتقهرنيش وتقولي شينه..
رنده:ملكة جمال..
:اووخ..الحمد لله..
ضحكوا البنات..
وهي قعدت تمرر في نظرها قدامها لمحت واحد راكب سيارة سودا كان لابس طاقيه عاديه ونظرات سود ومغطي وجهه لحيه سودا...مش محمد..بس حاساته حد تعرفه..
••محمد:وين تشبح هادي!؟..
قعد يدور بعيونه وماقدرش يشوف اللي هي تشبحله..
ضم شورابه بغضب وقعد ياكل فيهم من داخل..
شويه شافها وقت..التفت وركز ع السيارة شاف سيارة سفيان خاشه..
وهي وصلت فيها وركبت...وتحرك طول..
وهو تحرك طول وطلع بعدهم...
طلعت سيارة سفيان وبعدها سيارة تانيه..وبعدها محمد..
مشت السيارة التانيه في طريق..
ومحمد مشي وراها..
وسفيان ورنده مشوا في طريق تاني..
سفيان؛ها شن جو..انسجمتي..
رنده:ايه اليوم خير من امس..
سفيان:كويس..
سكتوا شويه بعد سفيان قال..
سفيان:رنده بنسألك سؤال ونبيك تجاوبي بصدق..
رنده بقلق:شن هو؟
سفيان:نوريه شن صاير معاها؟
رنده بلعت ريقها وقالت؛شن بيصير معاها؟عادي زي قبل..
سفيان:يعني مثلا....هي وراجلها شن وضعهم في مشاكل بينهم ع موضوع الصغار..قايللها يبي يتزوج مثلا؟!
رنده وهي تحاول تخفي توترها:لالا شن يتزوج هادي مشكله وانحلت خلاص..
هز سفيان راسه وقال؛ تمام تمام...
ورنده تشبح القدام بتوتر
..............
"مايفوته شي سفيان يانوريه مش حيطول على مايعرف"
نوريه بضيق:يعرفوا بعدين لكن مش توا..
رنده:وشن الفرق كان عرفوا توا ولا بعدين..
نوريه:شن تقولي يارنده كان عرفوا مش حيخلوني نروح..
رنده:ايه هكي احسنلك والله تعيشي معززه مكرمه بصغارك وخليه هو تو تنفعه هديكا المزيته..
نوريه حركت راسها اعتراضا وقالت:اني مانفكرش هكي يارنده مانديرش هكي..
رنده:مالا شن ديري!؟
نوريه بإنزعاج:بالله يارنده مادرهلي كبدي بالكلام في الموضوع هدا..
ع خشت امهم عليهم وهي تقول:بيان اساور الخميس هدا..
الزوز اتفاجئوا..
وجيهه:ريتوا عمتكم خلت كل شي يمشي بالدرقه...الفضانيه داروها الاثنين اللي فات وقالت لخوتها مايقولوا شي ومن بينهم بوكم..ع اساس كانت عازماته ع الغدي هو وباقي خوتها..
نوريه:هادي عمتي ديما هكي حاجتها هي تندس وحاجه الغير تبي تعرفها اول واحد..
رنده:اساور لمحت تلميح نحساب الموضوع قاعد في بدايته طلعوا واصلين في البيان..
نوريه:وحتى العرس هكي مفاجأة..
وجيهه:بتمشوا..
نوريه:اول وحده..وضربت رنده ع ركبتها وقالت..حتى انتي لازم تمشي..ولاكلمه ولاحرف بتمشي يعني بتمشي..
ضحكت رنده وهزت راسها بإستسلام..
ووجيهه تشبح لنوريه وتضحك..
🏵🏵🏵🏵
"ماعندي ليه قفطان"
نوريه:بنطلعوا نشروا اليوم..حتى انتي وتي روحك..
منى :اني
نوريه:ايه اللي ناقصتها حاجه تطلع..اليوم اضربوا ع الجيوب المعبيه واجبدوا..القلب اللي تقلب
ومشت طلعت من حداهم
هما زوز شبحوا لبعض لا عرفوا يضحكوا ولايضايقوا ع خاطرها
🏵🏵🏵🏵🏵
وبعد العصر ركبوا كلهم سيارة سفيان واللي رفعهم مروان لان سفيان يكره طلعة السوق..
حطهم مروان في مول ومشي..
وهما بدوا جولتهم ع المحلات..
نوريه؛هدا ليا من عند غادي..
رنده:ايه ماشي مع جسمك بعد ضعفتي..
نوريه بضحكه:خلاص بناخده..
............
منى:واااو هدا يهبل خدي قلبي..
لينا:شوفي سعره..
منى بضحكه:بناخده والقلب واللي تقلب..
ضحكت لينا
.............
رتيل؛هدا تحفه...
نوريه:ايه ماشي معاك..
رنده:بس غالي..
نوريه:بلاغالي بلارخيص..
رنده بضحكه:لكن هدا بابا..
نوريه: وشن بابا مش راجل اجبدوا منه حتى هو مازال طرحة وجيهه والله لما نشريلها حاجه تخلع..
ضحكوا خواتها..
🏵وشروا كلهم وقعدت لينا...
نوريه:شن انتي تبيهم يفصلولك!؟
منى:اللي تعجبها تشوف سعرها تلقاها غاليه تقول مش حلو..
نوريه:ع جيب مني خايفه ع جيب سفيان!! لو تطلبي بؤبؤ عينه يعطيك من غير مايفكر..
ضحكوا كلهم..
نوريه:اللي في خاطرك خوديه وماتخافي ع حد كان روحك خير مايجيك يوم تقولي ياريتني...
لينا رفعت حواجبها وقالت:هداك عجبني بس نااار سعره..
كلهم شبحوله
رتيل:ليك من عند غادي..
منى:تخيلته عليك حتطلعي فيه تحفه..
نوريه:ولو انك حتطلعي احلى مني بقوام المكرونه سباقتي اللي عندك لكن مادامه غالي خوديه...القلب اللي تقلب..
ضحكوا..
ولينا خدت القفطان..
بعدين مشوا شروا الاحذيه وحطوا ع الغالي بس وخدوه...
بعد كملوا...
قعدوا يمشوا وهما شادين الكياس..
جي قدامهم مطعم ماكولات شاميه...
قعدوا يشبحوله وهما متسهفات..بعدين شبحوا لنوريه...
نوريه هزت راسها بالموافقه وقالت:شعارنا اليوم...
هما بضحكة فرح قالوا مع بعض:القلب اللي يقلب...
بعدين ضحكوا ومشوا خشوا للمطعم...
🏵🏵🏵🏵
واستمرت الاستعدادات للبيان وكأنهم هما العرايس مش أساور...
في الصاله...
نوريه:حلومه الزناتيه..ايديها في القص والصبغه يلتفوا بالحرير..
عفاف:والله متردده نقصه ونغير لونه..
نوريه:قصي واصبغي وديري كل شي خاطرك فيه وماتخافيش عيشوا لارواحكم غيروا لارواحكم خلوكم حلوات ليكم انتم وبس..والباقي يجي تحصيل حاصل..
عفاف ابتسمت بحماس وقالت:عندك حق..
نوريه:حتى انتي غيري شويه وفكري في نفسك مافي حد يستاهل تحرقي دمك ع خاطرك..هو خوي ونقولك والله مايستاهل..
منى بضحكه:من غير شي متحمسه اني...
نوريه:خلاص دورك بعد عفاف...
🏵وجت حلومه الزناتيه...وركبوها لشقة منى..
وبدت فيهم قص وصبغه..
ولينا ورنده متفرجات وخلاص..
نوريه:لينا..زيدي فكري..
حلومه:نقصهولك طروف ونديرلك فيه لقطه..
رنده:لاكويس كان طروف..
منى:ايه حلو منها تغيير في نفس الوقت يقعد شعرك ع طوله..
لينا ناضت وقالت؛نسأله الاول..
نوريه:بري ياجبانه ياخوافه كان نفع...
لينا قعدت تضحك..
رنده:طاعة الزوج واجبه ولازم تاخد اذنه.
نوريه:ريت هالمنكر اللي بديره ع قصة شعر..
رنده؛حتى ع قص الشعر يانوريه.
حلومه بضحكه؛رنده ولت شيخه..
رنده:ان شاء الله..
وهما يشبحولها ويضحكوا..
🌺لينا:طروف طروف مش كله يقعد ع طوله..
"تقصيه نقص راسها حلومه هادي"
لينا بضحكه:ياهمي قتلك شعري يقعد ع طوله بس بديرلي لقطه تو تغيرني وتعجبك..
"مانبي تغيري شي نبيك زي ماانتي هكي عاجبتيني'
لينا؛سافيوش سافيوش..غير اسمعني..
"لااا..لاااا..لااااااااا"
لينا غمضت عينها اليمين وهي تضحك ..
"معاش تزيدي تناقشيني".
لينا:حبيبي غير اسمعني ...
..............
حلومه:هاه شن صار.
لينا رفعت ايديها وهي مكورة قبضاتهم وقالت بضحكه:اقنعته..
ضحكوا بمفاجأة..
نوريه:اعترفي ياسبهاويه شن دايرة لخوي!؟
لينا بضحكه:مادرتله كان كل خير..
🌺وخدت لينا دورها بعدهم وتفننت فيها حلومه...
🌺🌺🌺🌺🌺🌺
"هاه ريته قاعد كيف ماهو"..
سفيان:امم...كويس..
لينا بضحكه:قتلها سفيان يهدد بالرمانه..قالت يديرها..
ضحك وقال؛قبل تجي للبنات واني ماكنتش نحبه الجو هدا قداش مشكله في مشكله درتها وين نسمع بيها فالحوش وهي صحيحة وجه وباردة مازال تجي..
لينا بضحكه:مامعقب خير مع حد انت..
سفيان:شكرا جزيلا..
لينا :من غير زعل صامت.. نبصر..
شحها من شعرها وقال:عارف..
وهي قعدت ترفع في شعرها وتضحك
شويه وشبحتله لقاته يتأمل فيها.
لينا؛سفيان..
سفيان؛روحي.
لينا ابتسمت بعدين قالت؛خايفه..
عقد حواجبه وقال:من شني؟!
لينا:نخاف من بعدين..نخاف يجيني يوم نقعد نذكر فيك وين ترد عليا لما ناديك ونقول وين راحن هديك الايام..
سفيان:علاش بنموت ولاشني!؟
لينا؛معاش ترعش عظامي بالكلمه هدي بالله عليك..انا نقصد شي تاني..
سفيان بإبتسامه:شن هو؟
لينا؛نقصد لو جا يوم وحبك ليا نقص وراح..ونعيش انا وياك حياة بارده..اني فيها ندير في واجبي اتجاهك ونأدي في حقك عليا..وانت نفس شي..بدون لامشاعر ولاحب...
ومرات انت تحب غيري وتحطني ع الرف...نبدا بلاقيمه في حياتك..
سفيان:سلمك فتراشه..
لينا بضحكه انزعاج؛نحكي جد راني..
سفيان:وتحكي جد فوقها.!!دقيقه دقيقه..بداية الوحم هادي صح..
لينا قعدت تشبحله بإمتعاض لأنه يتسهوك عليها..
هو قرصها انفها وقال بضحكه:ياختشه..اللي بيني وبينك حب حقاني تعرفي علاش قلت عليه حقاني..لأن بدي بدايه صحيحه..بداية علاقتنا ببعض كنا مكشوفين ع بعض تماما..عرفتي فيا عيوبي قبل ميزاتي..واني نفس الشي..
كرهناهم بعدين تقلبناهم وحبيناهم يخي..
علاقتنا هكي عكس اي علاقه تقليديه..
اعجاب ...ميل ..وبعدين حب
لا حني..
كره...نفور...تقارب...اعجاب...حب....وحيستمر الحب لاخر العمر ان شاء الله للسبب اللي قتلك عليه قبل ..
ولسبب تاني..اني سفيان عمري ماحبيت فولا مرحلة من مراحل حياتي..وامتى ربك كتبلي هالشي..
في عمر يقولوا عليه عمر النضوج والرشد للراجل ويسموا فيه سن نبوة..اواخر التلاتين وبداية الاربعين..الحب للراجل في سن هدا يكون حب العقل والقلب مع بعض..حب يرسخ هني...وحط يده ع صدغ راسه..بعد حطها ع قلبه وقال..وهني..مايتحولش بكل...وع فكرة المراة تقدر تنسى لكن الراجل لاكان حب بجديات معاش ينسى لين يموت..
لينا؛حلو واجد كلامك..يعني الزبده انت حتحبني لاخر نفس..
سفيان بضحكه؛مانقدرش نقول هكي صراحه نولي كذاب..
لينا قعدت تشبحله بصدمه..وهو يضحك عليها بعدين قال..ياهبله اني نبي نحبك لبعد اخر نفس...دنيا وآخره..
فيسع تبدلت ملامح وجهها لإبتسامه غرور وخجل..
سفيان بضحكه؛شفشه...
🏵🏵🏵🏵🏵
وجي يوم الخميس يوم البيان..
وجت اخت حلومه...سومه ...اللي بتميكجهم..
نوريه:ماشاء الله سومه ماتتخيرش عن اختها في المكياج..
لينا:اها في عرس سلفك جت مكيجت الصدارات مكياجها عجبني واجد..
سومه؛ان شاء الله اليوم نديرولك حاجه حلوة..
لينا بإبتسامه:لاانا اليوم بتمكيجني وحده تانيه عاطيتها وعد من زمان..
رنده؛مرام؟
لينا:ايه..
سومه:مالا خلاص عطيني وعد لو جي يوم بتصدري اني نمكيجك..
لينا بضحكه:خلاص وعد..
ع جية نور..
نور:مرت خالو..جت مرام..
لينا مشت طلعتلها...
خشت مرام مع لينا وسلمت ع الكل وهدرزت شويه..
بعدين لينا خدت صغارها ومشت مع مرام لحوشها...
غدت صغارها وحطتهم في الحباس يلعبوا...
صلت العصر هي ومرام وبعدين بدت فيها...
وطول الوقت مرام تهدرز ع لينا وكانت هدرزتها لذيذة استمعت معاها لينا هلبه...
بعد كملت مكياج لينا..بدت لروحها..
ولينا دارت لصغارها رضعه ورقدتهم..
بعدين لبست...ولبست بعدها مرام..
وبدت اديرلها في شعرها..جبداته بالأستشوار وبعدين مشت عليه باللاسترا..ودارتله زيت خاص بالتصفيف..خلاته ناعم وينساب للوطا...
وخلاته مفرود ع طوله بس دارتله لقطة حلوة...
مرام بإبتسامه؛تبارك الله في ماخلق...صنع وأبدع...
لينا بإبتسامه خجل؛تسلمي حبيبتي
مرام:وينك ياولد عمي وين..
لينا ضحكت..
مرام بضحكه؛خل نلبس عبايتي وننزل اكيد ع جية..
لينا:ايه..خلاص اصلا هداكا هو وقت..
لبست مرام عبايتها وقبل لتطلع..
لينا؛تسلم ايديك يامرام بجد شغلك يجنن..
مرام:انتي اللي تجنني..
لينا ابتسمت وقالت:عندي ليك هديه تو توصلك بكرا ان شاء الله..
مرام:علاش حبيبتي والله مانبي منك حاجه غير انك تكوني راضيه ع شغلي..
لينا:تمام الرضا..والهديه مني ليك بدون سبب..
مرام بضحكه:ان شاء الله تكون #شكولينا بس..
ضحكت لينا..
مرام؛تسلمي ياذوق..يللا اني ماشيه نتلاقوا بعدين..
لينا :ان شاء الله..
🏵ومشت مرام طلعت...
ولينا قعدت مقعمزة تقرا في الاذكار وتراجي سفيان امتى يخش..
شويه وسمعت باب الشقه انفتح..
ناضت ومشت طلعتله..
هو خش وفيده شكاير فيهم حاجات الفطور وقعد ينادي :لينا..
لينا؛وينك عطلت؟
حطت الشكاير ع الطاوله وقال:كنا نديروا في جرد لواحد من الحل...والتفت بيشوفلها ويكمل كلامه...بس اللي شافه نساه كل شي...
قعد واقف مبهور فيها..وهي تشوفله بإبتسامه وتراقب في ردة فعله..
قعد واقف يشبحلها وخلاص..
وهي تعقدت قالت:سفيان...
سفيان من اعماق قلبه قال:روحي...
ابتسمت بخجل..
تنهد بعدين قال:من هذه..؟
وقعد يقدملها وهو يقول...
شمس الضحى ام نجمة ام بدل ليل قد تلالأ واكتمل؟
ام وردة نشوى تبسم ثغرها منها توضأ كل عطر واغتسل..
وقف قدامها وقال..
ماعدت اعلم اي وصف انتقي..
يصف المليحة من بساتين الجمل...
تنهدت لينا بإبتسامه...
وهو قرب منها وقبل جبينها...بعدين حط يده ع راسها وبدي يرقي فيها..وهي مغمضه عيونها ومبتسمه بحب وقلبها يدق بقوة...
🏵🏵🏵🏵
وفي الشقه اللي مقابلتهم...
مروان مقعمز يلعب مع ولده...
ويراجي في منى امتى تطلع..
شويه وطلعت وهي تقول:هيا..
شبحلها...سهم فيها..
وهي تلبس في عبايتها..
بعد كملت مشت للباب وهو قام ولده ومشي وراها
لبست في رجليها وهو يشوفلها بعدين قال..
مروان:ضروري الليله نتكلموا ونحط حد لهالمهزله..
هي تجاهلاته..
نزلت خمارها وفتحت باب الشقه..
ووسعت..
هو ضبط اعصابه وطلع بولده...وهي طلعت وراه وسكرت الباب.
🏵🏵🏵
وانقسموا العيله في سيارتين..
سيارة الشريف فيها مرته ورنده ولينا ونوريه ومعاها نور..
وعند مروان اللي خدي سيارة سفيان..
مع مرته وولده ركبوا رتيل وعفاف وبناويتها...
وولاده نوريه قعدوا مع خالهم سفيان اللي قعد مع الصغار...
انطلقوا السيارتين لحوش ربيعه...
كان في حوش ربيعه صاله كبيره تشبه قاعات الافراح الصغيره...دايرة فيها البيان..وجايبين شركه منسقه كل شي...
كانت شبه معبيه لما جت وجيهه وبناتها وكناينها..
كانوا كلهم ملفتات للأنتباه بالذات لينا بطلتها خطفت الاضواء..بس بعدين التركيز انتقل لرنده بعد اللي صار فيها كلهم يشبحوا فيها كيف راحت..
لابسه قفطان بسيط مش مبهج..ورافعه شعرها ذيل حصان..والزينه كانت بسيطه زي رتيل في طلتها..طلة بنت..مش مدام..
والكل بدوا يتهامسوا عليها وهي كانت حاسة وملاحظه بس تتجاهل ع قد ماتقدر...
🏵🏵🏵🏵🏵
وبدت حفلة البيان..
وخشت اساور كانت طالعه حلوة بالمرة...وتبان فرحانه مش مدرقه فرحتها...
وبعد خشتها بدت الاجواء تنشط ...
والكل مستمتع بالذات نوريه ومنى ...
ومنى تهيج..
ومروان واصلاته منها حده..
مشي حط ولده في حوش خواله..
بعدين قعد يدور بالسيارة في الشوارع وهو يفكر في وضعه مع مرته...
لعند مااهتدي لفكرة مجنونه شاف فيها الحل الوحيد..
••واقف بالسيارة قدام حيط وهو يشبحله..
تنهد وقال:خبطه خفيفه مادير شي تقربع واجهة السيارة من القدام وخلاص...خدي نفس بعدين زفر..وقال...تو نشوفوا يامنى لامتى بتقعدي واخده موقف
وشغل السيارة وتحرك ناحية الحيط وخبطها
فيه....
#سبحان_الله_وبحمده
يتبع.....
