"نعتذر امس كانت عندي مناسبه"
لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"نبيك في موضوع.."
لينا بقلق قالت:ان شاء الله خير..
سفيان:تعالي قعمزي..
هي مشت قعمزت..
وهو مشي قعمز مقابلها..
لينا قعدت تشبحله وتراجي فيه يتكلم..
سفيان:احمم..الموضوع اللي نبي نكلمك فيه فكرت فيه كويس وبصراحه مالقيتش مفر من اني نفذه خلاص...العمر يجري..
هي بلعت ريقها بخوف..
سفيان خدي نفس وقال:نبي نتزوج..
حست بشي غم ع قلبها...حست روحها توجعت..تألمت..
في شي وجعها بقوة لما سمعاته شن قال..
وهو يدوي بدون مايشبحلها وكان متواصل في الكلام...
سفيان:زي ماقتلك العمر يجري واني نبي ندير صغار نبي نربيهم واني صحيح وبقوتي واظني هدا حقي وانتي مش حتعارضي زي ماقلتي قبل..كلمي امي وقوليلها دورلي من توا تبي الموضوع يتم بسرعه..
نهي كلامه وناض من حداها بسرعه وتوجه للدار..
وهي تبعاته بعيونها المعبيات دموع ومازالت حاسه بألم وكل ماله يزيد..
حست روحها زي اللي كان متأمل في شي وخاب امله..
هي ع بالها انه يحبها..ولأن يحبها حيصبر ويستناها لين طيب جروحها وتبدا متهيئة ومستعده تكون زوجته وشريكة حيانه..
بس ظنها فيه كان مش محله..
وقالت في نفسها ان المشاعر اللي حسهم اتجاهها سفيان مشاعر اعجاب مش حب..
لأن اللي يحب مايديرش هكي..
غمضت عيونها وخدت نفس وهي تحاول تهدي روحها من داخل..
بعدين فتحتهم وشافت للمصحف..
بحركه تلقائيه ضماته لصدرها اللي كان ضايق...
تنهدت..بعدين ناضت ومشت للدار...حطت المصحف في مكانه..
ومشت طلعت من الدار ومنها من الشقه..
💎هو سمع باب الشقه تسكر..
نار اللي في قلبه زادت قويت.....مافهمش شن المقصود من صمتها وعدم ابدائها لأي ردت فعل..
لاقالت لا..ولاقالت ايه..ولاناقشاته...
وطاح في دوامه حيرة جديده..وقعد يراجي ع نار في رد فعلها اللي حتما حيبان..
🌺🌺🌺🌺
هي نزلت لوطا وعقلها مش معاها..
كانت تفكر في كلامه...وطلبه"نبي نتزوج" قاعد يرن في وذانها...
حتى انها كانت تسمع في تلقيح رنده..اللي تحكي فيه عن سلفة نوريه الجديده وكيف انها كانت تبيها لعدنان...
تسمع لينا ومش مهتمه...اللي هي فيه كان مخليها مش مهتمه لأي حد غير سفيان...
تغدوا غداهم...وغسلوا الماعين..
وخش عليهم آذان العصر..
طلع سفيان من الحوش مع الآذان..
وهي بعد الصلاة خدت عزوزتها ع تركينه
وجيهه:ان شاء الله خير!
لينا وهي تحاول تبان عاديه ولامباليه:خير يااللاي بإذن الله خير..اللاي سفيان يبي يتزوج
عقدت وجيهه حواجبها وهي متفاجئة
لينا:قالي يبي يدير العويله والعمر يجري وطبعا هدى حقه..قال يبيك دوريله يبي الموضوع يتم بسرعه
قعدت وجيهه تشبح للينا وهي تحاول تستوعب بعدين قالت:مافيش مانع كان هو يبي وانتي؟
غرقوا عيونها بالدموع اللي كانت تشد فيهم بقوة وقالت:لاابدا..انا قلتها من الأول ماعندي مشكله..
وجيهه هزت راسها وقالت:باهي..لكن اني نبيك انتي تختاريله
هي زادت حست بالألم بس حاولت تخفيه وهي تجاوب ببرود مصطنع.:عندي وحده في بالي..نكلمه عنها ونشوفله كان قال عليها باهي كانا بها..كان قال عليها لا الموضوع كله يولي عندك انتي..
وجيهه:امم..باهي..
ابتسمت لينا وقالت؛شوفي حتى البنات مرات في فبالهن حد..
وجيهه؛اكيد حنرد عليهم الشيرة..
لينا:على خير ان شاء الله..
وجيهه :باهي شن قررتي بتمشي غدوة للمة بنت نفيسه؟.
لينا هزت راسها بإيجاب وقالت؛إن شاء الله..
هزت وجيهه راسها ومشت من حداها..
لما طلعت وجيهه دموع لينا طاحوا...هي مسحتهم طول..
وحطت قناع البرود ومشت بدير القهوة..
🏵🏵🏵🏵🏵
في الكوجينه..
تتعاون هي وسلفتها العروسه ع الماعين..
مها بتردد؛ابله نوريه..
نوريه؛نعم..
مها:ابله نوريه..نعترفلك اعتراف.
نوريه بآستغراب:اعترفي..
مها:والله مانعرف ندير السفنز ولاعمري درته وقلت لعمتي نعرف لاني تحشمت وخفت..
ضحكت نوريه وقالت؛زبطاتك..مادوريش تو اني نساعدك..
مها:جديات!!؟
نوريه بضحكه:ايه جديات..غير خل نكملوا فيسع بش نعجنوا العجينه..
مها بإبتسامه؛باهي..
ونوريه قعدت تنشف فب الماعين وهي مبتسمه..
🏵🏵🏵🏵🏵
"الله!؟"
وجيهه:توا كلمتني وقالت قولي لخواته يدوروله..
رنده بضحكه؛الله...قداش ليا نراجي نسمع هالخبر اللي يرد الروح..عندي ليه وحده يام الله يبارك عليها لو تسمعي انتي عنها تفرحي بيها..
وجيهه:من هي هادي..
رنده:حور بنت عمتي عيشه..
وجيهه:لاحور لاصنور..
رنده بإستغراب:قصدك في فبالك وحده تانيه..
وجيهه:لاتانيه لاتالته..اني ولادي ماياخدوش ع نساوينهم ياخد وحده يكمل معاها عمرها..ماتلايمش هو وياها يطلق وياخد مرة اخرى..غير هكي..
رنده:الكلام هدا ينطبق ع مروان يام مش سفيان وانتي تعرفي من الاول كيف تزوج..
وجيهه:وعارفاته يحب مرته ويبيها..
رنده:يحبها يقول نبي نتزوج عليها؟!
وجيهه؛هو بلعاني دار هكي..
رندع:وعلاش !؟
وجيهه قعدت ساكته..
رنده:باهي...وهي جاياتك بروحها فتحت معاك الموضوع..
وجيهه:تتكلم معاي والدموع في عيونها..
رنده بإنزعاج؛المهم يام فتح الموضوع وقال نبي نتزوج خلاص..
وجيهه:واني كلمتي وقلتها على لينا والله ماهو واخد..
رنده بتذمر:وواك يام وواك..
وجيهه ماردتش عليها وكانت تفكر في مقصد ولدها من طلبه...وعلاش قال للينا هي لتوصله لأمه في الوقت اللي كان يقدر فيه يكلمها منه ليها طول....
☘وعدت باقي ساعات اليوم..
وسفيان برا ماروحش..ولينا حاطه عنده عقله..
كانت طول الوقت مش ع بعضها وتسرح هلبه وعزوزتها وسلفتها اكثر من ركز عليها..
🏵🏵🏵
الساعه 10:20ليلا..
كانوا منى ولينا راكبين بصغارهم لشققاهم..
منى:كان تبي نساعدك في المكياج كلميني..
لينا:لالا صحيتي..انا اصلا مش حندير مكياج واجد لمسات بسيطه وخلاص.
منى:تمام...هي تصبحي ع خير..
لينا:قدامك كل خير..
وفتحوا الزوز بيبان شققاهم وخشوا..
لينا بعد سكرت الباب توجهت للدار..
خشتلها ومشت لسرير الصغار..
قكت الحملات ونزلتهم لسرير ..
ناضوا شويه قعدت ترقد فيهم..بعدين مشت سكرت باب الدار..
ودارت روتينها المعتاد..وين جيت قعمزت ع سريرها حست روحها خاطرها تقرا القرآن..
فتحت ع التطبيق متاعه ع الهاتف..
وقعدت تقرا في القرآن...ودموعها ينزلوا..
حست بأنها قعدت اطلع في كل اللي كانت ادس فيه وهي تقرا....وكان كلام الله وكأنه قاعد يمسح في الألم ويهون عليها..
ولحظات وحست ان النعاس غشاها..
حطت التليفون ع تركينه ورقدت ع جنبها الايمن..وبدت تقرا في الأذكار والنوم خداها قبل لتكملهم..
💎اما هو بعد روح..
كان متوقع اول مايخش يلقاها تراجي فيه بش تكلمه في الموضوع..
واللي توقعه ماصارش منه..
لكن قعد يحاول يدير شي بش يحسسه بوجوده ويخليها تطلع من دارها وتكلمه..
ع قد قربع في الكوجينه وفي الصاله..
لاحياة لمن تنادي..وبعد فقد الأمل مشي لداره..
وحاول يرقد لكن النوم جفاها زي ماجافياته هي ...
🏵🏵🏵
وتعدي هالليله..
ويجي اليوم اللي بعده..
هو فهاليوم كان حاسس بخوف من مواجهتها بعد مادام صمتها...
كان متوقع انها وافقت لامحاله...وهو مايببش يواجهها وتصدمه..لأنه عارف روحه مش حيتحمل..
لهذا دار قهوته ونزل طول...
اما هي فكانت تفسر في هروبه هذا على انه ابتعاد عنها وانشغال بحياة جديده حيبداها عن قريب..
وهالتفسير خلاها ع صبح ربي تبكي بألم...
دارت كل شي وهي تبكي..ولما تشوف في صغارها يلعبوا معاها ولايكلموا فيها..كان تضحكلهم وتساير فيهم من بين دموعها..
بعدين هدت بكي..ومشت توضت...لأن الوضوء في حالة الحزن والغضب يهدوا الإنسان شويه..
وبعد مالبست نزلت بصغارها لوطا..
ولقاته يستنى فيها في السيارة..
ومشت ركبت معاه...والزوز في حالة من الصمت المطبق..
لين وصلها للمستشفى..
بعد ماحطها هي خدت نفس وقالت..لاحول ولاقوة الابالله..
ومسحت دموعها قبل تنزل وخشت للمستشفى..
اما هو...
طول الطريق كان حس روحه خاطره يعطيها كف يخليها تعيط..المهم تحس..المهم يسمع صوتها...المهم يشوف ان اللي قاله اثر فيها..مش معقوله تكون بارده لهالدرجه..
مش معقوله يكون عندها بقيمة الصفر ع الشمال!..
🏵🏵🏵🏵
"خودها كلمه من صاحبه انت عدد واحد صحيح لايقبل القسمه على اتنين عندها غير هي تكابر"
سفيان:وشن اللي يخليك واثق لهالدرجه؟!
ابوبكر:سكوتها هدا..لو كنت فعلا ماتهمهاش كانت تكلمت معاك في الموضوع عادي..مش تسكت هكي.. وهدا دليل علي ان الموضوع كان صعب عليها مش عادي بكل.
سفيان وهو يفكر في كلامه:هكي تقول؟
ابوبكر بإبتسامه:غدوة تشوف بعينك وتقول ابوبكر قالي..
تنهد سفيان وقال:إن شاء الله...
🌺🌺🌺🌺🌺
"صباح الخير هند"
هند:اهلا صباح الورد..
لينا سلمت عينات لهند وقالت:كل واحد مكتوب عليه شن..
هند خدت منها العينات وقال:هي لحظه بس..ومشت بيهم وهي تنادي في زميله ليها..
ع خشة ياسين قال:السلام عليكم.
لينا ردت: وعليكم السلام..
ياسين:هند ياهند..
شويه وجت هند وهي مبتسمه بخجل:تفضل دكتور..
ياسين بإبتسامه:نبي نتيجة العينه هدي تطلع بسرعه..
خدت منه هند العينه وقال:حاضر...شبحت للينا وقالت..ولي بعد نص ساعه لنوش..
لينا وهي تشوفلهم قالت:تمام..
بعدين مشت وهي مبتسمه..
ياسين:نحس بيناتكم معرفه من قبل.
هند بإبتسامه؛لينا سلفة اختي..
ياسين:معناها اختك زوجة الدكتور مروان..
هند بضحكه:ايه.
ياسين:خشتك هنى واسطات يعني.
هند بضحكه:ايه...تقدر تقول هكي..بس اني من الناس اللي يستحقوا الواسطه.
ياسين ابتسم وقال:فعلا..
هي ابتسمت بخجل وقالت:خل نمشي نرفع العينه..
ومشت طول..
وهو يتبع فيها بعيونه وع وجهه ابتسامه حلوة..
🏵🏵🏵🏵🏵
"انتي بتقعدي دابك وداب عزوزتك..عمتي..ماليكش علاقه بحد تاني غيرها..الحموات لما يجوا هما يحبوا يخدموا انهم وفي حوش بوهم وطبعا انتي ساعديهم...ومادابيك وين يجو مايعقبوش عليك في شي باهي.."
مها:تمام..
نوريه:وفي حاجه حطيها في عقلك من توا يامها نعطيك عيوني لو مشيتي بيها..
مها:شن هي؟
نوريه؛اني هني بالنسبه للعيله كنتهم مش بنتهم ليا قدري واحترامي..واظني لاحظتي الشي هدا من البدايه..نبيك تحطي الحاجه هادي ديما بين عيونك يامها فاهمه عليا..
مها بإبتسامه:فاهمه كويس واصلا ماما قالتلي رضا عزوزتي بعدين سلفتك نوريه بعدين حمواتك..
نوريه بضحكه:والله امك هادي تعز عليا هلبه وقداش كان خاطري يكون بينا نسبة لكن ربي يبي شي تاني...المهم توا..وين نسافر لمصر انتي اللي حتقعدي يامها حاولي ع قد ماتقدري تكسب قلب عمتي..
مها:نحاول وان شاء الله ربي يساعدني..
نوريه:إن شاء الله..
مها:صغارك بتخليهم هني؟!
نوريه:لالا صغاري بيقعدوا في حوش بوي عندي مرت خوي يحبوها هلبه وين نمشي هني ولاهني نخلي فيهم عندها..وهدا النظام ماشي حتى هني راهو..
مها هزت راسها بإيجاب وهي حاسه بخوف من داخل المسؤوليه حتكون صعبه عليها ونظامهم صعب بالنسبه لبنت عاشت مدللة في حوش اهلها..بس حتحاول ادير اللي تقدر عليه..
🌺🌺🌺🌺🌺
وجي وقت نهاية دوام لينا..
وهو جاها روح بيها...
ومازال ملتزمين الصمت هما الزوز..
هي مجرد ماتولي معاه ينتابها شعور بالبكاء بس كانت تمنع فيه بقوة..
وهو ع ظاهره البارد..في وسط صدره كانت تصمم حمم من النار في قلبه...صمتها يحرق الدم....ومخليه من القلق اللي هو فيه يحس بغضب شديد..
لعند ماوصلوا للحوش...
حطها كالعاده ومشي..
وهي طول مشت ركبت لشقتها ودموعها تنزل...
🏵🏵🏵🏵
رتيل وهي تجبد في شعر رنده:قصيه شويه يارنده..
رنده:ابدااا..وبعدين اني مانبيش علاقتي بسفيان تفسد لين ندير مافي راسي.
رتيل طفت الإستشوار وقالت:قصدك تبي تخطبيله رسمي!
رنده:مال شنو..والله لما نختارهاله وحده تخلي العبده تموت بقهرتها..
ولعت رتيل الاستشوار وكملت جبد..
رنده:ااي ياقرده بالشويه..
ورتيل تشبحلها بملامح امتعاض...
••فهالوقت
نزلت لينا وخدت صغارها وركبت بيهم فوق...
وعزوزتها مابتش تكلمها بكل حاسه انها مش مزبوطه وعارفه السبب..
🌺وهي بعد ركبت فوق..
وكلت صغارها وحاولت ترقدهم..ورقدوا..
بعدين بدت توتي في اللي بتلبسه للمه..
كام قفطان بسيط وحلو..ولونه مش ملفت هلبه...
بعد ماطلعاته...طلعت من الدار..وعيونها ع الطريق اللي ترفع لداره..
كانت عندها رغبه شديده تخشلها..
وهالرغبه خلت رجليها يرفعوها للدار...
وقفت قدامها...خدت نفس عميق بعدين خشتلها..
كانت مرتبه هلبه...تعبر عنه...هو انسان مرتب هلبه ومش فوضوي...
اكثر شي لفت انتباهها فيها الوانها الأبيض والأسود..
ولاحظت انه يحب يلبس هاللونين هلبه..
شبحت للمكتب متاعه...قربت منه وقعمزت وراه...
وقعدت تشوف للكتب والاوراق اللي كانوا مرتبات بدقه..
خدت ورقه وقعدت تشوفلها..
كان كاتب فيها شي متعلق بالماده اللي يدرس فيها..
بالأنجليزي والعربي وكان راسم فيها..
خطه كان حلو هلبه..وهي قعدت تشبحله وابتسامه حلوة مرسومه ع وجهها...
غيرت عيونها عنها وشبحت للدرج..
حطت يدها عليه وبعد تردد..فتحاته..
لقاته معبي وراق فاضيه واقلام حبر شكلها مميز ضحكت..
بعدين سكراته..
وغيرت عيونها للزيانه..
ناضت ومشتلها...
لقت عليها..مشط..وعطر...وكريمه...
خدت العطر فتحاته وقعدت تشم فيه وهي مبتسمه..
واذكرت كيف يعارك فيها ع الخمره..
قالت بضحكه:تبي من يمنع عليك العطر حتى انت..
سكراته ورداته لمكانه...
بعدين فتحت الدرج متاعها...
لقت فيها مجموعة ساعات...بس الملفت كانش الساعات..
بل شيشة الخمره متاعها اللي لقتها مدسوسه فيها..
تفاجئت هلبه..وقلبها قعد يدق بسرعه..
وزياده علي هكي استغربت...
باهي مدام يحبها هكي علاش يبي يتزوج غيرها!؟
تنهدت وسكرت الدرج....
"شن ريحتي طريق دارك"..
انتفضت من الخلعه وشبحتله..بعدين حطت يدها ع قلبها وغمضت عيونها بشده..
هو جاها ووقف قدامها وحط ايديه في جيوبه وقال:شن ديري هني؟!
هي فتحت عيونها وشبحتله وقالت؛مش عديت للجامعه؟!
سفيان؛تس..ماعنديش..مشت خديت حاجه ووليت لقيتك في داري..ورفع حاجبه.
لينا بش تنفد نفسها من الموقف قال:كنت نرجى فيك بش نحكي معاك في هداك الموضوع..
دق قلبه بقوة من الخوف وقال:موضوع شني؟!
لينا:الموضوع اللي تكلمنا فيه امس..
ابتسم بعدين قال:ايه..شن تبي تقولي فيه..
لينا: امم...فتحت الموضوع مع امك وقالت مافيش مانع كان هو يبي..
رفع حاجبه وقال:وانتي ؟!
ابتسمت وقالت:في ليك في بالي وحده نعرف من زمان انها تبيك واكثر وحده تصلح بيك والأهم انها تحبك بصدق.
عيونه اللي كانت نظرتهم حاده غرقوا بالدموع وهو يقول متسائل بتهكم:تحبني بصدق!؟
لينا وهي قاعده تتقن في دورها البارد:امم وهي الأنسبلك..
رفع حواجبه وقال:الأنسبلي!...ابتسم بجديه وهز راسه وقال...انسي..
هي بإستغراب:ننسى شني؟!
هو بشي من العصبيه:انسي الموضوع كله..
رفعت حواجبها وقالت:كيف!؟مش انت قلت تبي تتزوج؟!
رد بشي من الانفعال:اني قلت...قلل قولي..باهي..
هي:خيرك شن قلبك هكي فجأة..!؟
هو شبحلها بنظرات حاده بعدين مشي وخلاها مستغربه..
شويه ورجع وقاللها:ان شاء الله واني طالع توا تنقلب بيا السيارة وترتاحي مني..قولي آمين..
ولف ومشي طلع من حداها..
وخلاها في حالة صدمه مش فاهمه شي من اللي صار توا..
مش هو قال يبي يتزوج ع خاطر الصغار..مش هو طلب منها تكلم امه تشوفله..وبينلها انه مستعجل..
باهي شن اللي قلبه هكي توا..
علاش دار هدا كله من البدايه...لشن يبي يوصل!!؟..
لينا:الفيزياء اسهل منه الراجل هدى..معاد فهمت منه شي..
ومشت طلعت من داره لدارها..
خدت تليفونها من ع الكامدينو..
ودارت اتصال..
نادى مرتين بعدين انفتح الخط...
لينا؛السلام عليكم خالتي بريكه...
🏵🏵🏵🏵
في الطريق..
"ايوه نيوتن"
سفيان؛ذكرني غدوة اني قاطع علاقتي بيك كان جيت كلمتك ماتردش عليا..
وسكر...
عند ابوبكر..
قعد مخلي التليفون ع وذنه شويه..بعدين نزله وهو يضحك وقال:ديما وين نجي نكحلها نعميها...الحمد لله اللي ماعنداش توا..
🌺🌺🌺🌺
"خيره استيعابك انعدم ولاكيف..واضحه الراجل يبي يطلع اللي هناك"
لينا:كيف!؟
"يبيك تغيري عليه ياغبيه كان غرتي حيبان عليك خلاص"
لينا قعدت ساكته وهي متفاجئة..
"باهي انتي غرتي ولالا"
لينا:احمم..لاعادي..
"عادي في عينك ياكذابه..كان عادي راهو مااتصلتي بيا وحكيتي اللي صار معاك تبي تسمع من حد تاني غير صوت عقلك"..
سكتت لينا وهي مبتسمه بخجل..
"ماني عارفه ليش هالمكابرة هدي"
لينا:لا مش مكابرة..بس مازال شوي..نبي نتأكد من نفسي ومنه هو..
"من نفسك وفاهمتها..بس من هو في شنو؟!"
لينا:نبي نحس معاه بالامان ياخالتي بريكه راني لعند توا مازلت نخاف منه..ومازلت مش عارفاته كويس ومازلت مش مستوعباته زين.. عصبيته ردات فعله..طريقة تفكيره..مازلت مش مستوعباته من هالنواحي..
"باهي ياحنه خوفي روحك في الإستيعاب وياسرك دلع بنوت صامت"
لينا قعدت تضحك...
🌺بعد مانهت مكالمتها مع بريكه..
ناضت دارت لروحها ماتاكل ع الخفيف..
بعدين ناضوا صغارها لهت بيهم...لعند مااذن العصر..
بعد الصلاة بدت توتي فيهم لأنهم بيمشوا معاها للمه..
وبعد كملتلهم وحطتهم في حباسهم يلعبوا...
بدت توتي في روحها هي..
••ولوطا
العيله كانوا يوتوا في ارواحهم حتى هما..
ورنده وهي تمكيج كان تليفونها المحطوط ع الصامت يستقبل في اتصال في راجلها اللي مابطلش اتصالات بيها من امس لليوم وهي ماتبيش ترد عليه...
قبل المغرب بنص ساعه كانوا كلهم واتيين..
مروان وهو حاط تليفونه ع وذنه:تي وينه سفيان هدا....هاه سفيان ايوه...وينك ياراجل..............تمام حني طالعين توا وانتم الحقوا............تمام....وسكر وقال لمرته...كلميها قوليلها شويه وجاي..
منى؛باهي..
وجيهه:تو شن بيقولوا وين يشوفونا خاشين برواحنا وهي بروحها..
منى:ايوه لينا..
مروان:يقولوا اللي يقولوه يام..
وشغل السيارة..وتحرك طول...
••فوق..
لينا:باهي منى...صحيتي....سلام..
نزلت تليفونها وقعدت مقعمزة ع السرير تشبح لصغارها..
بعدين ناضت ومشت تلعب معاهم...
ع جيته هو...
جي حدا الدار وقال:هيا..
هي وقفت ع حيلها وقالت:لحظه بس..
ومشت بتجيب عبايتها..
وهو واقف في الباب شاف طلتها...قعد يتفرج عليها وهي تلبس في عبايتها..
هي بعد كملت قالت:ترا تعال طلعهم معاي..
خدي نفس...ومشي خش خدي بحر..
وهي خدت ياسمين..
شبحلها وقال:ايه وان شاء الله بتطلعي هكي من غير خمار.
لينا:وشن فيها شن دايره انا مادايره شي..واهو الكاب نازل شويه..
سفيان بالتشديد ع الكلام:اني..قلت..خمااار..
لينا قعدت تشبحله وهي ساكته..
سفيان؛والله من غيره مانك قاصتها خطوه برا الشقه..
هي ضحكت وطلعت طرف الخمار اللي لاصق في الكاب وقالت:اهوا يانيرفو افندي...مش حنطلع من غير ووجهي هكي..
ومشت طلعت من حداها..
هو في عز عصبيه غلبت ملامح وجهه ابتسامه...حرك راسه يمين ويسار..وشبح لبحر لقاه يشبحله قالت بصوت منخفض:امك تبي طريحه..
بحر شدله خشمه..
سفيان:ااه يامعفن..ياوي نبصر خلاص..وحوله يده..
"هيا عاد وينكم".
سفيان:جايين..
ومشي طلع هو وبحر يتناقروا..
وهما نازلين في الدروج...
سفيان؛بالشويه عليك..
لينا تنزل وهو شاد فيها يساعد فيها تنزل وهي تحت الخمار ابتسامه مزينه وجهها..
لين وصلوا للسيارة..
حط الصغار في كراسيهم..
بعدين ركبوا هما الزوز مع بعض وسكروا البيبان مع بعض..
🌺🌺🌺
في الطريق..
لينا:ايه ماقتليش عجبك اختياري ولانشوفلك وحده اخرى..
هو قعد ساكت وعيونه في الطريق..
لينا ؛نعرف متدربه في المستشفى اللي عندنا سمحه واجد شقرا وحتى من عيونها صفر..
سفيان حسها تتسهوك ومشي معاها في اللي دير فيه:لالا اني اخترت بروحي ومشي الحال..
لينا؛منو نعرفها!؟
سفيان:تس..معيده معاي في الكليه..ليها سنين مسكينه تجري في جرتي..تجيبلي في الفطور ...كان قعدنا في الدوام لبعد الظهر لازم تحسبني معاها كان خدت حاجه..ويوميا لازم تفوت ع المكتب تشوفني ودير في الف حجه وحجه بش نحكي معاها...تصدقي حتى منين راسي مصدع..
لينا وهي تحاول تشد ضحكتها لانهت فاهمه عليه؛اديرلك في مساج..
سفيان بضحكه:لا مش لهالدرجه..ولو اني متاكد انها لولا العيب والحرام راهو دارتها..لكن كانت تجيبلي في البنادول..ومرات تجيبلي في طاسة فليه مغليه..في واحد بعقله يحصل الاهتمام هدا كله ويفوته.
لينا:اهم شي تكون سمحه..
سفيان؛فوق ماتتصوري..تو نرفعك غدوة للكليه تشوفيها وتفتحي معاها الموضوع..ايه..اسمها مودة..
لينا؛حتى اسمها سمح...شوقتني نتعرف عليها..حاسه ان حنولوا ضراير متفاهمات..
سفيان شبحلها ع جنب بعدين شبح لبحر من المرايه وقال:تبيها والله تبيها..
لينا:شن تبي!؟
سفيان:طريحه..
لينا؛من هي!؟
سفيان؛وحده دير في روحها عبيطه وهي مش عبيطه..
ودير في روحها غبيه..وهي مش غبيه..وفاهمه كل شي..غير تبي تزيد تحرقلي اعصابي وعارف روحي عارف..كان رقتهملي مزبوط نديرها وناخد عليها..
لينا:من هي العبيطه الغبيه هدي...قولي من هي وانا تو نفهمها مادورش..
عض ع شاربه وهو شاد ضحكته..
وهي شاده ضحكتها...
سفيان:خليني نركز في الطريق واسكتي معاش تتكلمي بكل..
لينا وهي شاده ضحكتها:باهي..
سكتوا شويه بعدين هي غنت..
انتي صليتي وبوك دعي...اللي حصلتي زوجي اني..
سفيان بضحكه:قلت اسكتي اني..
لينا؛خيرك! نسخن لعرسك تو تشوف كيف نقيمه..
سفيان قعد يضحك وهو يقول....استسلم ياإلهي.....
ولينا تضحك...
قعدوا يضحكوا بعدين هو هدى ضحك وقال..باهي خل نقولك ع وحده نبيك تخطبهالي انتي بروحك مامعاك حد..
لينا سكتت وقلبها بدي يدق بقوة..
سفيان تنهد وقال:تخدم في نفس المستشفى اللي تخدمي فيها...شوكلينا هكي تهبل...عيونها كبار واسعات يدوخوا..طويله...وقدها الله يبارك...شخصيه...قويه..ولسانها طويل...لكن وين تدوي تتمني ماتسكتش بكل..لكنتها البدويه اسلوبها صوتها..يسحروا...ممرضه هي مش دكتورة ع فكره..ومش حتلقي احلا منها في المستشفى لابيضا لاشقرا لاحنطيه..لاقمحيه..هدا علاش نبيها تبطل خدمه غادي..هادي اهم حاجه نبيها تحطها في دماغها كان قالت باهي...وقوليلها تاخد وقتها في التفكير ماتردش طول...اني قاعد نراجي ماوراي شي قدامي العمر كله وان شاء الله يكون طويل ياربي بش نكمله معاها...
وفجاة وقف بالسيارة وقال:هي انزلي..
هي كانت غايبه عن الواقع وهي تسمع فيه شن يقول...اول مرة تسمع كلام في وصفها بهالطريقه..كان حلو هلبه..
ولما وقف السيارة استاقظت..
فتحت الباب ونزلت بدون ماتنطق بحرف..
سفيان بعد مانزل:خشي ونادي رتيل تطلع معاك بش دخليهم..
لينا مشت خشت وهي مش عارفه الحوش كويس..
لكن قعدت تمشي وخلاص لين لقت روحها فم الباب الدخلاني..
تلقتها مرام...
هي قامت خمارها..
مرام بضحكه:اهلا بالشكولاته الفاتنه.
ضحكت لينا بخجل..
سلموا ع بعض..بعدين مرام:قالت..هي تفضلي..تعالي معاي..
لينا:يزيد فضلك..سفيان برا ومعاه بحر وياسمين..
مرام:تمام تو نكلم خوتي يطلعوله ويجيبوا منه الصغار..
لينا:تمام تو نبعت معاك رتيل..
مرام:اوكي..من هني لينا فوق..
مشي للدروج وركبوا هما الزوز......
....يتبع.....
