لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
خل نحكيلكم حاجه حلوة صارت معاي اليوم ع الماشي..
امي مش فالحوش..واني كنت مضغوطه هلبه بين الحوش شن يبي من ضم..وبين بابا وخوتي شن يبوا من فطور وماإلى ذلك..وقعدت ندور بين هني وغادي ومرة مرة نشوف تعليقاتكم 😁..وخش عليا وقت الغدي وكانوا يبوا اكثر من حاجه..بش لحقت خشيت المطبخ بعد صلاة الظهر وقلت امتى بنكمل لازم 3يكونوا متغديين..واني تعبانه ويد وحده..
مالقيتش قدامي غير اني نردد الحوقله..واني نشتغل.
لاحول ولاقوة الابالله..ومرات الشيطان يخلي فيا نسرح في ترتيب احداث الروايه نتعوذ منه ونرجع نحوقل واني نجري بين هادي وهديكا..والحمد الله الساعه 3ونص كنت مكمله غسل ماعين وضامه الكوجينه..الاعجب من هكي اني حاسه روحي مازال ناشطه يعني قبل كنت نطلع من الكوجينه واني مدقدقه وتعبانه...توا سبحانك ياربي ماشاء الله تقول فيا قوة عجيبه...والله الحوقله كنز في ابسط الامور هكي دير مابالكم باأكبرها...❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
مقعمزة في الصاله بين المدعوات للمه..
والعيون عليها كنت الوحيده المميزة بيناتهم..
قطعة شوكلاته في وسط حلوى الصوف البيضا..
جمالها كان ملفت هلبه للعين...بالذات عيونها..
والاكثر لفت للإنتباه...صغارها اللي كانوا مختلفين عنها..
بيض والعيون ملونه جزء من الكل الموجود في الصاله..
وامهم بروحها..
منى:عندك علم اول مرة نجيه حوش عمهم هدا..
لينا:اها.
منى:نذكر لما كنت عروسه عزموني اغلب اقاربهم لكن هادم لا..
لينا بضحكه:باهي في من عبرك وعزمك انا ماحد دورني..
منى سكتت لما حست روحها رفست بدون قصد.
لينا لاحظتها وقالت:مش مهم..عارفتهم كلهم ماكانوا متقبلين وجودي بيناتهم..
منى:خلاص هداكا قبل اللي فات مات...
ابتسمت لينا..
شويه وشافوا حور وامها خاشات..
لينا حست بضيق شديد لما شافتهم..وزادت اضايقت وين شافت رنده ناضت تسلم عليها..
حطت يدها ع صدرها وتنهدت بعدين قالت؛نبي نصلي المغرب مايستنى..
منى قعدت تشبحلها وحستها مش ع بعضها..
لينا؛مرام..
شبحتلها مرام ومشتلها..
مرام؛نعم لينا..
لينا:بالله نبي نصلي ..
مرام؛باهي نوضي معاي..
ناضت لينا وشبحت لرتيل وقالت:رتوله..
شبحتلها رتيل..
اشرتلها لينا ع الصغار..
ناضتلهم رتيل.
ولينا مشت مع مرام...
•••••••
"جديات!"
رنده:والله زي مانحكيلك امس فتحت الموضوع مع امي..مش قتلك ياحور..
حور قعدت ساكته وهي تفكر..
رنده؛اني مصرة عليك لأنك اكثر وحده تطلع ع خوي وتمشي معاه..
حور تنهدت وقالت:لازم نسمع من صاحبة الشأن انها راضيه نبي نشوفها ونسمعها بروحي..
رنده ابتسمت بمكر وقالت:هادي بس..محلوله..
وعيون منى عليهم وهما يهدرزوا..
ع خشة عفاف ونوريه وصلوا مع بعض...
ومنى دارت روحها ماتشبحش..
🌺🌺🌺🌺
فهالوقت..
لينا خدت ملاية الصلاه من مرام وبدت تصلي...
بعد ماادت صلاتها...ناضت وهي تحول في الملايه..
بعد ماحولتها وشافت قدامها..
بطنها مغصتها..توترت وخافت..بس حاول تبين العكس..
قعدت تساوي في شعرها وهي تشوفلهم.ببرود..
رنده؛ترا قعمزي عندك.معاك كلمتين..
لينا قعمزت وحطت رجل ع رجل..وشبحتلها برفعة حاجب..
رنده في نفسها"خدت حركات سفيان هاالعبده"
قعمزت رنده ومعاها حور..
رنده:امم..زي ماسمعت خوي قال يبي يخطب..وانتي قلتي بدوريله وقلتي نساعدوك..واني بصراحه ليا وقت حاطه عيني ع حور لخوي سفيان وحور ماتبيش توافق قبل لتسمع منك انك راضيه..
حور:انتي اكيد ماعندكش مشكله في الموضوع وراضيه تمام.الرضا؟
لينا.ضحكت بتهكم بعدين قالت؛وشن تشوفي مهبوله بش نسلم في راجلي لغيري!؟
انصدمت رنده..وحور قعدت تشبح لرنده وهي مضايقه..
لينا:سفيان ماكان قاصد اللي قاله..يعني تقدروا الموضوع كله كان كيف المقلب..
رنده؛شن نخترفي انتي؟
لينا:مانخترفش وندوي من جد جدي..وراجلي مانسلم لمراة اخرى لو شنو يصير..واللي تفكر تقرب منه ورب العزة نوريها اللي عمرها ماراته من ضيم ونهار اسود...
الزوز قعدوا.يشبحولها وهما مصدومات..
لينا؛ان.شاء الله غير تكوني فهمتي انتي بالذات...وشبحت لرنده وهي تقول في كلامها الأخير..
بعدين ناضت وخلت الملايه ع الكنبه..
لينا وهي ماشيه بعصبيه قالت بهمس:كأني بالغت!....حركت راسها بالنفي وقالت..تس مابالغت هدى الحق..
وصلت في الصاله...خدت نفس.. ورسمت ع وجهها ملامح الإرتياح...وخشت..
ولت قعمزت في مكانها ولقت منى لاهيه بالهدرزة مع مراة في موضوع مهم..
منى:والله ماياكل كان بالسيف والمحايله..
:حتى اني بنتي هكي لين رفعتها للمراة اللي قتلك عليها حجمتها وسبحانك ياربي من بعدها وهي تاكل في ماكله خير من ماكلة الكبار..
منى:مقوى قلبك كيف تحملتي..
:وجع ساعه ولا الف ساعه ياوخيتي اهو كله ولى عليها بالفايده..
لينا شبحت لصغارها وقالت:انا عويلتي بعد وفاة باتهم جتني حالة نفسيه وحليبي انقطع وتعودوا ع الحليب الصناعي نحس فيه ولى عليهم..
:هي الحجامه كويسه وتنفع لكل شي..ارفعيهم لحد ثقه يحجموا عنده..
منى:سفيان يحب يحجم لينا اكيد يعرف حد ثقة يديرها للصغار..
لينا:اها تو نقوله عليها..
منى قربت من لينا وقالت:سلمتي ع نوريه وعفاف؟
لينا:جيت بنسلم ع عفاف لكن وين ريت هديك حداها فتتها..
منى:حتى اني درت الحوله..
وبعدت منى عن لينا..ونوريه مركزة معاهم..
ع خشة رنده ومعاها حور..
كان باين ع حور انها مضايقه بس رنده معصبه..
مشت طول وقعمزت حدا نوريه..
نوريه شبحتلها وقالت:خيرك؟
رنده:تو بعدين نحكيلك..
نوريه هزت راسها ورجعت شافت لمنى ولينا..
ووجيهه تراقب في اللي قاعد يصير قدامها..
🏵🏵🏵🏵
وفاتت الساعات..
وروحوا من اللمه...
وطول الطريق ولينا تهدرز لسفيان ع المواضيع اللي انفتحت فيها واهمهم الحجامه..
سفيان؛الموضوع مش مريح صراحه..هي تعب الكبار يابال الصغار.
لينا؛زمان كانت في عندنا وحده ادير فيها للعويله واختي امال رفعتلها بناتها واهن ماصارلهن شي كبرن وخشن مدرسه.
سفيان؛نزيد نستفسر ونرد عليك..
تنهدت وهزت راسها بإيجاب..
سكتوا شويه بعدين هو قال..
سفيان؛ايه الليله بنديرلك امسيه شعريه تحت ضي القمر..
لينا بضحكه؛تحت ضي القمر!
سفيان وهو يهز في راسه بآيجاب:إهمم..تحت المظله تحديدا...رقدي الخرابيش هادم...وبعدين انزلي..مدايرلك مفاجأة..
لينا بضحكه:اشييه شن الدلع هدى كله..
سفيان بإبتسامه وهو رافع حاجبه قال:هادي اسمها مرحلة الاقناع..وبالعاميه العسل في الرواني..تو مش اني خطبتك وعاطيك فرصه تفكري..
لينا بإبتسامه خجوله:اممم.
سفيان:تمام..واني هني لازم نحاول نقنعك بيا..فلازم نضحك عليك بكم كلمه وجو رومانسي وانتي مش حتقدري تقاومي بعد اطبي ع وجههك..وناخدك...نخشوا في مرحله الحقيقه المرة..
لينا قعدت تضحك بعدين :انا حقيقتك المرة شفتها قبل مرحلة العسل في الرواني....
سفيان رفع حاجبه وهو يفكر وقال:ايه والله صح..قصدك حني باديين بالعكس!؟
لينا بضحكه:اها..
سفيان:ع هكي شكله اللي بيدوم العسل..صدقيني..ليش نطولوا فيها وهي قصيره خير البر عاجله..
لينا؛مستعجل في الضحك عليا...تحسابني ساهله..لاعزيزي..في حاجات اهم واجد بواجد من العسل..انت لازم تخليني معاد نخاف منك..لازم تزرع في نفسي الأمان تجاهك ...والحاجه هدي تبي واجد..
سفيان قعد ساكت وهو يفكر في كلامها..
لينا؛الامان اهم حاجه تنعطي للمراة..اهم بواجد من الحب..
قعد ساكت وماباش يعلق ع كلامها..
وهي حست ان كلامها وجعه..بس مع هذا شايفه ان معاها الحق.....
🍁وفعلا...انك تكوني مع راجل مأمنتيله من كل النواحي حتحبيه مع الوقت..الامان يجيب الحب..لكن الحب مايجيبش الامان..كم من قصص كانت نهايتها الغدر والخيانه..
وراهو الغدر والخيانه انواع....ماينحصروش في نوع واحد...
حتى الانسان اللي تغيره المواقف والاحداث وتقلبه ع اللي يحبه يعتبر خاين وغدار..خان ثقة الطرف التاني فيه وغدر بيه...🍁
وهدا اللي كانت خايفه منه لينا..خصوصا ان المعروف عن سفيان انه يتأثر برأي اهله هلبه ومايقدمش عليهم في شي..
ماتعرفش شن يصير القدام خصوصا ان خواته مش ناويين على خير ...
وساد الصمت عليهم طول الطريق..
لين وصلوا في الحوش هما ومروان مع بعض..
وهما نازلين..
مروان:وينه تليفونك رنده؟
رنده:في الحوش..
مروان:قصدك مارفعتيشي معاك..
رنده :نسيته..
وسفيان مركز معاهم وهو ينزل في الصغار..
مروان:راجلك بكري كلمني قالي نتصل بيها ماتردش انشغل عليكم بري شوفيه..
هزت راسها وخشت داخل بدون ماتتكلم..
وسفيان معاها بعيونه وقلبه حاسه ان في شي..
ركب الصغار مع لينا...بعدين نزل لوطا ..
•••في الصاله..
وجيهه:لاعادي زي قبل نحس فيها..
سفيان:متأكده يام..مش زي ماصار مع عفاف..
وجيهه:رنده ماتعرفش ادس اللي هناك اطلعه..
سفيان سكت شويه بعدين قال:إن شاء الله خير..
وجيهه:المهم توا..غدوة وخيتك نوريه مسافره وبتجيب صغويرتها هني للينا زي قبل...واليوم صار موقف ماعجبنيش من مرتك ومعاها مرت خوك لنوريه..
عقد حواجبه وقال:موقف شنو؟
وجيهه:الزوز مابوش يسلموا عليها..
مسح حاجبه وقال:شوفي يام مرت خوي ماليش علاقه بيها..لكن مرتي الموقف اللي دارتهولها مش ساهل باهي اللي مازال تشبح في وجهها هي..شن مازال بعد يموتوا بوها وامها حتى بإتصال ماتعزيهاش..ولاقالت نركب نعزيها بعد روحت...حطس بناتك مكانها من غير سو عليك انتي وبوي وشوفي شن تحسي..
تنهدت وجيهه وقالت؛عندك حق..لكن اني الوضع مش عاجبني نبي ندير صلح بينهم وبين اختك ومواقف زي هادي معاش تتعاود مرة تانيه..
سفيان:والله شوفي نوريه تتنازل ممكن تتنازل لينا غير هكي مش حنرضى..
وجيهه تنهدت بتهكم وقالت:معاش نرضوا فيها شي هللينا هادي..
ارتسمت ع وجهه ملامح الملل وهو يقول:تصبحي ع خير..
ولف ومشي..
وجيهه:هدا يبي شنطة عدة بحالها...!
🌺🌺🌺🌺🌺
بعد مالينا رقدت صغارها..
جت بتبدل حوايجها...وين مشت فتحت الدولاب اطلع منه حوايج...
انصدمت باللي شافاته قدامه...
لقت حاجات هي كانت ناويه تشريهم وغدوة بعد تروح من الدوام..
كل شي تحتاجه وبزايد..
حطت يدها ع فمها وهي مش مصدقه ومنحرجه ع الآخر..
بس بعدين بدت ترتسم ع وجهها ابتسامه وتكبر شويه شويه..
وشافت من هالحركه كبيره هلبه..
زادت كبراته في عينها...
لأنه قاعد يدور ورا كل شي يخصها بدافع الحب..وحسسها ان هي مسؤوليته هو....ومن الاول كان هالشعور واصلها في كل تصرفاته معاها بس كانت تتجاهل فيه..
بعد ماطلعت من الحاله اللي كانت فيها...طلعت حوايجها وبدلت..
بعدين مشت خشت للحمام..توضت وطلعت صلت...
وقرت وردها من القرآن...
بعد ماكملت...جتها رساله ع التليفون..
ناضت خدت تليفونها وشافتها..
(الساعه 12ونص انزلي)
ابتسمت وردت عليه..
(تمام)
🌺ومع 12:30..نامت العيون والهدوء عم الارجاء وسكون الليل كان طاغي..
هي نزلت وهي يدها جهاز موصل بجهاز تاني في دار الصغار..يخليها تسمع اصواتهم لو فاقوا..
وبعد نزلت..
مشت بهدوء بإتجاه المظله...
لقاته مطبس حدا شجرة من الشجر يبان وكأنه يحفر..
قربت منه وقالت؛شن ندير فهالليل..
سفيان وهو يضرب ع التراب قال:نزرع..
لينا؛تزرع في شنو.
وقف ع حيله وشبحلها وقال:نزرع في الأمان..
ضحكت وقالت:تي غير قول ياصامت في شن تزرع..
سفيان؛عطر..المكان هدا الوحيد اللي مافيشي عطر..
لينا:شكلك انت اللي معبيها عطر..
سفيان:امم..نحبه..عندي معاه هلبه ذكريات واني وصغير مع جدي الله يرحمه وحناي..
لينا:الله يرحمه..
سفيان:بري قعمزي شويه وجاي..
لينا بإبتسامه:باهي..ومشت قعمزت..
وهو مشي خش للكوجينه..
هي مدت نظرها للقمر وقالت...اعوذ بالله من شر غاسق اذا وقب..
ماحستش بيه الا وهو حاط حاجه قدامها
.لينا بضحكه فرح؛جيلاطي..
هو قعمز وقال:خاطر عليا معاش نجيبه بكل.
لينا:ليش..
هو رفع حاجبه وقال:من فرحتك بيه..
ضحكت لينا وفتحت الحافظه وبدت تاكل..
وهو حط يده تحت ذقنه وقعد يتفرج عليها..
رفعت عيونها وشبحتله وقالت:امم..كنت عايش مع جدك وجداك وانت صغير..
سفيان ابتسم ورفع حواحبه ونزلهم.
لينا؛:وقديش قعدت معاهم..
حول يده من تحت ذقنه وحطها ع الطاوله وقال؛سنتين مش اكثر..من عمر 7سنين للعشره..وكانوا احلا سنتين في حياتي..
لينا:واضح من جداي زبيده انها متعلقه بيك..
سفيان:حتى اني تعلقت بيهم..بعدي ماوليت لحوشنا قعدت اخر الاسبوع نمشي نبات عندهم..
لينا:العيشة مع الجد والجده حلوة..
سفيان:مجربتيها .
لينا؛ريت بيت هلي..هدى كان لجدي وكنا عايشين مع بعضنا..نكذب عليك ولو نقولك ليا معاهم ذكريات كنت صغيره واجد..مانذكرش الا اشكالهم وبالسيف..
سفيان بإبتسامه:وكيف عرفتي ان العيشه معاهم حلوة..
لينا بإبتسامه:من كلام خوتي..ورجعت تاكل في الجيلاطي..
سفيان قعد مركز معاها لاحظ انها مش لابسه خاتم الزواج..ضيق عيونه وقال: ناسيه خاتمك..
شبحتله وقالت:لا مانسيته قصدا مالبسته..
سفيان :وليش..
لينا:لان لتوا ماصار بينا شي رسمي بعد يصير شي نلبسه في اليمين.
سفيان؛قصدي هي فيها يمين..
لينا:مال شنو لازم منها...
سفيان:جبته لروحي والله ..
لينا قعدت تضحك..
سفيان:ع العموم توا خلينا في مرحلة العسل في الرواني..
لينا:اها الأمسيه الشعريه..
سفيان:امم..
لينا ابتسمت وقالت؛نسمع..
سفيان وهو يشبحلها كيف تاكل وتركيزه كله مع الجيلاطي..
تنهد وقال...
وكتمت اوجاعي فنمت لعلني
اصحو على يرء يزيل عنائيا.
وقفت ماكله وقعدت تشبحله..وهو مكمل يقول..
فوجدته موتا بموت زادني.
تعبا على تعب وفيه عذابيا..
ولكم وددت البوح لكن راعني
ان يشمتوا او يفرحوا لبكائيا
ابتسم وقال:عشت ليالي وهدا حالي قداش كتمت ودسيت وعشت عذاب مابعده عذاب..
لينا نزلت عيونها ورجعت تاكل وقلبها يدق بقوة..
هو ابتسم وقال..
لما وجدتك صار الحلم ملك يدي
وصرت امشي عزيزا فوق آهاتي..
شبحتله..
كأن امي دعت لي فأستجيب لها..
اني بغيرك لاألقى مسراتي..
ابتسمت..
هو ضحك..
هي ابتسمت بخجل..
سفيان:ابتسامة الحشم متاعك هيا احلا ابتسامه ليك..برغم ان ابتساماتك كلها حلوة..
هي مازالت ع وجهها نفس الابتسامه..
هو ربع ايديه وقال..
لله در المليح اذا ابتسم
تهادت جروح قلبي وألتم..
لينا:ياربي منك..باهي خلاص عطيني بريك..
سفيان بضحكه:خودي بريك ياستي..بش تعرفي ان حنين وماتهونيش عليا..راهو قاعد نزرع في الأمان توا..
ضحكت لينا..
وهو ضحك معاها..
بعدين قالت؛سفيان..
سفيان؛ياريت معاش حد يقول اسمي بعدك..
غيرت عيونها عنه وابتسامه الحياء مسيطره ع ملامحها.
سفيان بإبتسامه:قولي..
لينا تنهدت بعدين قالت؛في حاجات مركزه عليك مقصر فيهن..والحاجات هدين مفروض ماتقصر فيهن بكل..
سفيان:اللي هما..
لينا؛نحسك ماتقراش قرآن واجد..
سفيان هز راسه بإيجاب بعدين قال:بحكم الاشغال..
لينا؛وهاك تلقى وقت لقراية الكتب..
سفيان قعد يشبحلها وهو ساكت مش عارف شن يرد..
لينا؛انت ماشاء الله عليك ملتزم بصلاتك وع وقتها وفالجامع..بس مقصر في الاذكار والقرآن وهدين اكثر شي تحتاجه في حياتك..كل اللي انت منشغل بيه عنهم دابهم داب الدنيا..بس هن معاك دنيا وآخره..وانا كان صار بيني وبينك نصيب مانبيكش تكون معايا داب الدنيا وبس..
ارتسمت ع وجهه ابتسامة حلوة..
لينا:انت دعيت وقال ان شاء الله يكون عمرك طويل بيش تكمله معايا..اني وقتها دعيت نقعد انا وياك للأبد..
عيونه.تعبوا دموع وهو يشوفلها بإبتسامه..
لينا:طبعا ف حالة صار نصيب..
ضحك وقال؛لازم تكسريها بيا يعني.
قعدت تضحك..
سفيان بضحكه؛حسبي الله في شيطانك وخلاص..
وهي قاعدة تضحك..
بعدين هو هدى ضحك وقال..
فلم ارى بدرا ضاحكا قبل وجهها..
ولم تر قبلي ميتا يتكلم..
لينا بإبتسامه؛البدر ابيض منور..
سفيان؛القمر اصله مظلم...
لينا؛مايكونش سمح لما يظلم..معاد يبان اصلا..
سفيان؛وانتي تقارني في روحك بيه ولابأي حد..تعرفي انتي شني في عيوني..
كل النساء امام حسنك صورة
وجمالك..الأصل..الاصيل...الأصدق..
غمضت عيونها وهي مبتسمه بعدين فتحتهم وغيرتهم عنه.
وهو يشبحلها بإبتسامه..
لينا:تعرف..شبحتله وكملت تقول..ماعرفتش كيفك في حياتي..انسان فيك المتناقضات كلهن فيك الشي وضده..
قاسي وحنون..
شرير وطيب..
جاف ولطيف..
عصبي وهادي..
بارد..وحساس..
وكأن كل شي في الدنيا من صفات اجتمعت فيك..وكأنك شي من كل شي..
سفيان؛الله الله الله...اني هدا كله!؟
لينا بضحكه:نحكي جد..
ابتسم وقالت؛ايه اني فيا المتناقضات كلها..بس معاك انتي اني ديما بحاله وحده وبس حتى لو كنت قاسي وعصبي وشرير ع قولتك..اني ديما..
بسعة احد عشر كوكبا معا..
بعوامل ضخمة وليال طويله...كسماء سابعه تحتضن سبع سماوات......احبك....جدا...
لينا حطت قبضة يدها ع فمها وهي تشوفله ودموعها معبيات عيونها..
وهو يشوف لعيونها وعيونه غارقات بالدموع وابتسامه حب ع وجهه قال بنبرة حلوة؛مافيش وحده سمعت مني هالكلمه غير..انتي اول واخر من حيسمعها من سفيان بن عامر..
نزلوا دموع..وقعدت تمسح فيهم..بعدين قالت:نعسني النوم..
ضحك بعدين قال:تمام..نوضي..
ناضت وهي مضبطه حوض الجيلاطي..
سفيان:هاتيه جاي هدا هاتيه..
بعدت عنه وقالت:لا ومشت هربت تجري..
وهو يضحك عليها..بعدين تنهد ومشي لحقها..
ركبوا لشقتهم وهما يتناقروا لعند ماخشولها..
بعدين كل حد مشي لداره..وعقله مع تاني ومايفكر الا فيه..لين خداهم النوم ...
🌺🌺🌺🌺
تاني يوم..
واقف ع المرايه وهو يمشط في شعره..بعد كمل جي بيحط من العطر انتبه انه مش موجود..
فتحت الدرج متاعه ودور مالقي شي..
سكره وهو يفكر..بعدين ضيق عيونه ومشي طلع من الدار..
تقابل هو وياها وهي بتخش لدارها..
سفيان وهو مضيق عيونه؛شكولينا..
وقفت وشبحتله..
سفيان:واخده حاجه من داري!؟
هي ضيقت عيونها وقالت:انت واخد حاجه من داري..
توسعوا عيونه ورفع حواجبه بعدين قال:لا..
لينا:حتى انا..لا..
هو هربا لف ومشي لدراه وهي دارت نفس الشي..
وخشت لدارها وهي تضحك عليه..
🏵🏵🏵🏵
"غريبه رتيل نايضه بكري"
رتيل بقلق:مارقدتش بكل ياحنينه
زبيده:وليش ياكبدي..
وجيهه:اليوم نتجيتها يااللاي..
زبيده:بالنجاح ان شاء الله بنيتي بالنجاح.
رتيل:آمين يارب..
ع خشة لينا بالصغار:صباح الخيرات.
ردوا عليها بأصوات متقطعه:صباح الخيرات..صباح الخير..
وجيهه:جيبيهم جيبيهم...مادخليش بيك راهو غير يكبروا شويه وتحوليلهم الشمال بيقعدوا عندي ليل نهار..
لينا بضحكه:واجد عليك ياللاي..ع اقل انا واحد وانتي واحد..
وجيهه:لا نبيهم الزوز مع بعض..مادخلكش انتي..
ضحكت لينا.
رتيل:ليون بنموت من الخوف..
لينا؛بإذن الله ناجحه حبيبتي بالله لما تعرفيها بشريني..
رتيل:ان شاء الله..
لينا مشت الصغار لعزوزتها..
اللي قعدوا يدسوا في ارواحهم في حضن جداهم وهي تضبط فيهم وتضحك..
وامهم مشت طلعت وهي مبتسمه بحب..
🌺🌺🌺🌺
في الطريق..
كانوا ساكتين لعند ماهو قال..
سفيان:لينا طلعي العطر مش متعود نطلع من غير مانحط منه.
لينا:عطر شني!؟
لينا:نعم.
سفيان؛جيبي جاي ..
لينا:شن بنجيب..
سفيان تنهد وقال؛قصدك انتي وحده بوحده..تمام..لكن لازم تعرفي ان اني منعتك اديريها لأن شرعا حرام وعرفا عيب..واني كراجل لايمكن نرضالك تحطي عطر وتطلعي بيه..
لينا:اولا مانحطش في عطر..وهي نخفف فيها وين نجي نحطها..وتوا بديت لما نطلع مانحطش فيها بكل..تانيا واللي الاهم انا لو بندسها عنك بندسها لأن تأثيرها ع البنات كيف تأثيرها عليكم..
هو ابتسم برفعة حاجب وقال:اها..لا مدام هكي باهي..
لينا:بس طبعا هدى مايثبش اني انا اللي خديتها..
سفيان:تمام..وحط يده ع درج السيارة وفتحه وهو يقول:بيت السبع مايخلى من العظام..
وقعد يدور في وهو يشوف للدرج وللطريق ومالقي شي.
شبحلها..
لقاها تشبح للطريق وهي عاقده حواجبها بإبتسامه..
سكر الدرج وشد الدومان بإيديه الزوز وهو يضحك بعدين قال؛ع فكرة ماليكش حق ديري هكي..لان حني لتوا ماصارش شي رسمي تقدري تتحكمي فالحاجات هادي بعد مش قبل..اني توا طير حر ندير مانبي ماليكش الحق تفرضي عليا شي.
لينا؛ع هكي انا كان ريت منك شي مايعجبني بنصرف النظر ع الموضوع كله مرة وحده مافيش نصيب مهم عندي الراجل اللي نرتبط بيه يكون ماشي صح..
سفيان:اما انتي....اللي يغلبك يجي يحاسبني.
ضحكت...
وصلها للمستشفى..
لينا:ماتنسى اشرب بس من ميه الرقيه كملها الشيشه..
سفيان يإبتسامه:حاضر.. واقرا الصفحات اللي اتفقنا عليهم نبي نختموا مع بعضنا تمام..
سفيان بإبتسامه:تمام..
لينا:رد بالك ع روحك..
سفيان؛وكان نعرف راني خشيت كلية الطب بش نرد بالي ع روحي..
فهمت قصده..ابتسمت بخجل ونزلت طول من السيارة..
سكرت الباب ومشت وهي حاسه بشعور سعاده رهيب ومشاعر تانيه حلوة .
وقعد واقف راجاها لين خشت بعدين تحرك للجامعه..
💎لما وصل غادي ..
خش لمكتبه وقال بإبتسامه:صباح الخير..
ابوبكر عيونه في اللاب توب ماباش يرد...
قعمز سفيان ورا مكتبه:في تطورات صايره..
وابوبكر لاحياة لمن تنادي..
سفيان استغرب فيه وقال:هيي نكلم فيك..
شبحله ابوبكر ع حنب بعدين قال؛ان كنت ناسي افكرك انت قطعت علاقتك بيا..
سفيان كمكم ورقه وخدها عليه..
ضحك ابوبكر وتلقاها بعدين شافها وقالت:حيي عليك ورقة امتحان..
سفيان فنص وقال؛جيبها جاي..
كمكم ابوبكر وحدفهاله وسفيان قال:تي لا الله ياخد شيطانك..
قعد يضحك ابوبكر..
سفيان وهو يفرد في الورقه:ياريت تنسى اني موجود هني.
ابوبكر بضحكه:حاضر..
🌺🌺🌺🌺🌺
الساعه 12:30..
خشت لينا لحجرة الدكتور لقت ياسين موجود فيها د..
اماني:اهي جت..
لينا استغربت وقالت؛خير..
ياسين:كل الخير يااخت لينا.
اماني: يبيك تخشي واسطه في عمل خير..
لينا؛انا!؟ وعمل شنو هدى!!؟..
ياسين:موضوع زواج..
لينا زادت استغربت..
اماني :وحده تخدم هني جديده في معمل تحاليل قال بيناتكم صلة...
لينا:هند..
ابتسم وقال:ايه هي..مابيتش نحكي معاها في الموضوع مباشرة..نبي منك تفتحيه معاها او مع اختك وتفهميهم اني ناوي الحلال بس نبي نعرف قبل يرضوا يعطوا لواحد اسمر البشرة..
لينا ابتسمت وقالت:عندك حق تسأل ع الحاجه هدي قبل ادير اي خطوة رسميه..عموما انا تو نفتح معاهم الموضوع والرد حيوصلك عن طريق الدكتورة اماني..
ياسين بإبتسامه:تمام....مافيش مشكله..
#صلوا_على النبي
....يتبع.....
