شكولينا

الجزء الثالث والخمسين

كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"ولد"..
لينا بضحكه:ايه..
سفيان قعد يشبح للحذاء وهو مبتسم بدهشه وكان صدره يعلى ويهبط من سرعة النفس..
بدي يكبر داخله شعوره اتجاه العيل بالذات بعد عرف جنسه..
ماكانش مهم عنده بنت او ولد..
بس لما تحدد جنسه بدت معالمه تتوضح ويزيد يتعرف ع عيله أكثر...
وجيهه وعيونه مليانه دموع؛الله يبارك الله يبارك تشوفوه ع خير ياربي..
عفاف:ربي يفرحك بشوفته وخيي ع خير..
نوريه:مبارك عليك سفيان تشوفه ع خير ان شاء الله..
رنده:مبارك عليكم الزوز..
رتيل:مبارك لينا..
شبحولها..
لينا:الله يبارك فيكم كلكم..
هو قام راسه ومرر نظره عليهم والدموع محبوسات في عيونه ضحك وقال:الله يبارك فيكم..ضحك تاني وقال..تلخبطت مش عارف كيف..وقعد يضحك تاني.
وهما يشبحوله بإبتسامه حب وفرح..
نور:بتجيبي وليد مرت خالو..
لينا:ان شاء الله..
رفيده؛شن بتسميه ؟
وجيهه:مرات بوه بيسميه..
سفيان حرك راسه بالنفي قال:اتفقنا كان بنت اني نسميها كان ولد هي تسميه..
عفاف:فكرتي في الاسم؟
لينا تنهدت بإبتسامه وقالت:ايه من وقت..
سفيان قعد يشبحلها..
وجيهه؛شن بتسميه؟
لينا شبحت لسفيان وقالت بإبتسامه...
"سيف الدين"
هو ارتسمت ع وجهه ابتسامه جانبيه حلوة..
نوريه:سيف الدين سفيان..
رنده:سيف سفيان...اها هدا علاش الاسم قريب من اسم سفيان...
لينا ابتسمت بخجل وهي منزله عيونها..
وهما يشبحوا لسفيان..
هو تنحنح بعدين قال:تمام..مشكورين كلكم حبيت الجو اللي درتوه..شكرا..وتوا نستاذنكم جماعه يستنوا..
وجيهه:باهي برا ولدي مربوحه..
سفيان:تمام..سلام..شبح للينا ومشي طلع بالبوكس..
ولينا مشت وراه...
وجيهه:بري رتيل نادي منى..
رتيل:باهي...ومشت طلعت من حداهم.
ونوريه حطت في فمها قطعه حلو وقعدت تاكل فيها بغيظ...
🌺🌺🌺🌺
لينا:هاه شن رايك..يارب نكون فرحتك كيف ماانت فرحتني قبل..
سفيان قعد يشوفلها بنظرة هويام واضحه اربكتها..
لينا:سفيان...
سفيان تنهد وقال:انت بروحك فرحة..يعني انتي  بإختصار..فرحة عمري..
تعبوا عيون لينا بالدموع وهي تشوفله بنفس النظرات..بعدين قالت...نحبك دنيا...
ابتسم وهو يشوفلها بنظرة عيون لامعه وقال:ماتبي شي...
لينا بإبتسامه؛عسله وزلابيه...
سفيان؛من ...وغمض عيونه وفتحهم...بمعنى من عيوني...ومشي طلع من حداها..
وهي لفت وخشت داخل وهي مبتسمه بفرح....
🍁وبعد طلع سفيان انضمتلهم منى اللي كانت تتجنب تشبح لنوريه ع قد ماتقدر ونوريه مستكردتها..
وفي هديكا الليله الشريف كان في حوش اخته يهدرز ع امه..
ومروان في المستشفى عنده مناوبه..
وكل واحد خلوله حصته من كل شي...
🍁🍁🍁🍁
"من الاول عارف انك مناديني ع خاطر هكي..سامحني ياحاج مش حنولي في شي"
الفاسي:ياولدي اتقي الله راك في شهر مبارك..صيامك ربي مايقبله اللي مايخليش قول الزور مش لازم يقطع ماكلته وشرابه مش حتحصل من صيامك كان الجوع والعطش..
محمد وهو يشبح القدام قعد ساكت.
كلام بوه ماأثرش فيه نهائيا واصراره ع الانتقام من رنده واذلال عيلة الشريف زاد مانقصش..
الفاسي:تبي تخسر اخرتك انت..تبيعه ع خاطر وحده ماتشريك وكانك بلاش ماتبيك..
شبح لبوه بنظرة حاده معبيه دموع..
الفاسي:حتى كانت كسبت القضيه هدي انت خاسر..خسر رجولتك واخرتك والله مافي واحد خاسر غيرك..
محمد؛ اللي قلت عليه اني خاسره خاسره..لكن اللي قاعد في ايديا مش حنخسره لو شني يصير وتو تشوف كيف نذلهم زي ماذلونا مش حنتنازل بكل ولانسامح لين نبرد قلبي فيهم كلهم ابداهم ببوها الكلب لعندها هي الحقيرة هادي..
الفاسي:انت مسكر راسك ع اللي فيه...هز راسه وقال..مال اني ماعاد نبي نشوفك لافي خير ولافي شر ...توكل...
ابتسم محمد بتهكم..وناض مشي خش داخل..
سلم ع امه وخدي بنته وطلع بيها من الحوش....
أم محمد:شن صار يافاسي..
الفاسي:ولدك هدى ماعاد نبي من يجيب سيرته قدامي بكل اللي مازال بيدويلي عليه يلحقه...
ام محمد دموعها عبوا عيونها وطلعت من حدا راجلها وهي تبكي..
اما الفاسي فقعد بكل الم يردد..
إنا لله وإنا إليه راجعون..حسبي الله ونعم الوكيل..
🍁🍁🍁🍁
وعدت الساعات...
وكانت اصعب ساعات تعدي ع رنده اللي مابطلتش تفكير في جلسة غدوة واللي بيصير فيها...
قبل الفجر صلت القيام وقعدت تدعي في كل سجده من قلبها ربي يجعل النصر حليفها ومايمكنش عدوها منها...
وكان لسانها بين الحين والاخر يتردد دعاء..
(اللهم أعني ولاتعن علي..وانصرني ولاتنصر علي..وامكر لي ولاتمكر علي)
ومش هي بروحها اللي كانت واخد القضيه تفكيرها..
حتى عيلتها كانوا في حالة من القلق والترقب...
بالذات بوها..وسفيان...
وطلع نهار اليوم التاني...
بالزور خداها النوم ورقدت..وهما خلوها راقده براحتها مافي حد فكر ينوضها عارفينها ماقدرتش ترقد لحظه من التخميم...
🍁🍁🍁🍁
الساعه 12:00قبل الظهر..
في المحكمه...
اللي كانت معبيه بالناس اللي عندها قضايا من نفس النوع اوحولها..
كان سفيان مقعمز مع انس يستنوا في دورهم...
سفيان؛وينهم لتوا؟
انس:حيجوا..
سفيان؛مرات يديرها بلعاني ومايجيش حتى في هادي..
انس حرك راسه بالنفي وقال:مايقدرش..
شويه وبدوا ينادوا...
"رنده الشريف بن عامر" "محمد الفاسي*****"
ع جية رفعه ومعاها محمد...
ناضوا انس طول...
رفعه ومحمد كملوا طول للقاعه..
انس:خليك هني لين ينادوا عليك..
سفيان هز راسه وهو ساكت..
وانس مشي للقاعه...
في القاعه..
كان موجود القاضي..والكاتبه بحداه...
وقدامهم زوز طاولات..
وحده وراها رفعه اللي كان واقف وراها محمد..
ووحده وراها انس...اللي كان محمد يشبحله بطرف عينه بنظرة كره..
القاضي؛انس محمود الهمالي الحاضر عن رنده الشريف بن عامر..نسمع فيك..
انس:سيدي القاضي..موكلتي رافعه قضية اطالب بيها بحضانة بنتها والنفقه وحقوقها بعد الطلاق..طليقها محمد الفاسي طلقها دون علمها ولااتفاق مسبق بينهم وخدي منها البنت كذلك بدون علمها وطلع بيها من البلاد في تاريخ...وذكر التاريخ اللي طلع فيه محمد من البلاد بعدين قال...والطلاق كان بعد ماخدي البنت وطلع بيها من البلاد..
القاضي:كيف خدي البنت بدون علمها وطلقها بدون علمها؟
انس:صارت خلافات بين موكلتي وطليقها قبل الطلاق وكانت فعلا ناويه ع الطلاق بس محمد الفاسي رفض وحاول يردها بكل طرق لعند ماتراجعت هي عن الطلاق واتفقوا ع الصلح وانهم بعد الصلح حيطلعوا من البلاد بسبب فرصة العمل اللي جت لمحمد الفاسي في الخارج ...خداها من حوش اهلها يوم السبت بتاريخ** * ****  وقعدوا في فندق *****ع ان يتم السفر تاني يوم الاحد بتاريخ ** * **** لدولة الكويت..لكن اللي صار ان محمد الفاسي استغل وجود موكلتي في دورة المياه في غرفة الفندق وخدي البنت وطلع بيها من الفندق وخدي معاه جواز السفر والهويه والهاتف اللي يعودوا لموكلتي رنده بين عامر وكذلك شنطة ملابسها..
القاضي:تمام لعند هني..شبح لرفعه وقال...رفعه الحشاني محامية محمد الفاسي شن ردك عن اللي قاله زميلك..
رفعة تنهدت وقالت؛اللي صار عكس هكي..بعد الخلاف اللي صار بين موكلي وطليقته فعلا حاول يردها اكثر من مره وهي رفضت رفض قاطع وموكلي مالقاش قدامه غير انه ينفصل عنها..جاته فرصة عمل في الخارج فعلا قرر انه يسافر ووكل خوه في موضوع الطلاق..في اليوم اللي بيسافر فيه موكلي جاه اتصال من شخص مجهول يخبره عن وجود زوجته انذاك مع راجل في الفندق والبنت معاهم وهو طبعا كأي راجل كلام زي هدا صعب جدا يتحمله مشي من فوره للفندق ولما سأل عليها الاستعلامات قالوله مافي حد بهالأسم في الفندق ولما وراهم صورتها عرفوها وقالوا انه خشت مع واحد ومعاها طفله صغيره للفندق بعقد زواج مزور...والحجز كان بإسم واحد يدعى سامي الطرابلسي..خدي رقم الغرفه وتوجهلهم وللأسف شافهم بعيونه وموكلي وهو في هديكا الحاله ضبط نفسه بقوة وكل اللي داره انه خدي بنته وطلع بيها من الفندق...
القاضي:شفته انت الراجل اللي كانت معاه..
محمد:ايه اول ماشافني هرب كنت حنلحقه بس شفته ان مافي شي يستاهل نضيع نفسي ومستقبلي ع خاطره....
القاضي هز راسه وشبح لانس وقال:شن ردك عن اللي سمعته من دفاع الطرف التاني..
انس بثقه: سيدي القاضي كل ماقاله دفاع الطرف التاني لايستند ع دليل قاطع يثبت ادعائاته....بينما حني عندنا الادله بالصورة وبالصوت ايضا..عندنا مايثبت ان طليق موكلتي قد اقدم ع فعل الخيانه وهو متزوج وماكانتش مجرد خيانه عاديه..أيضا عندنا مايثبت ان موكلتي تعرضت منه للتعنيف والاعتداء الجسدي...والتقارير موجوده قدام حضرتك..توا نبي من دفاع الطرف التاني يعطينا لو عنده مايثبت صحة ادعائه وليقارع الحجه بالحجه...
وشبح لمحامي محمد وهو مبتسم بتحدي..
رفعه قعدت تشبح للقاضي وبس..
ومحمد يشبح لأنس بحقد..
القاضي:الادله اللي قلت عنها موجوده معاك..
انس:في الملف اللي امامك سيدي..
القاضي شبح للملف خداه وفتحه وقعد يشوف شن فيه..
والكاتبه اللي تكتب كانت تمرر في نظرها ع محمد ومحاميتك وانس..ولاحظت نظرات محمد لأنس..
القاضي سكر الملف وقال لرفعه:الموجود هني يطرح اسئلة كثيرة..
رفعه:اني نجاوبك عنها حضرة القاضي..اول شي الخيانه شن هي الادله الموجوده..محادثات...تسجيلات صوتيه صور؟!..
لو كانت محادثات وارد جدا ان طليقته تكون مخترقه حسابها وهي اللي دارت المحادثاث هادي وهالشي يصير وصار فعلا قبل..
الصور مافي يدل على انها صور ليه في فترة زواجه وهو قال انه عاش علاقه سابقا قبل الزواج مع وحده من قريباته اعتقد هدا شي مايتحاسبش عليه نهائيا ..
اما عن التقرير وان كان صحيح ميه في الميه شن اللي يأكد ان موكلي هو اللي عنف واعتدي..خصوصا ان تقرير زي هدا ع حسب ماعرفت دارته طليقة موكلي وهي في بيت اهلها يعني وارد جدا يكون غيره اللي دار هكي يمكن الراجل اللي خانت زوجها معاه..
القاضي شبح لأنس وهو حاط يده تحت ذقنه..
ومحمد يشوفله ع جنب وهو مبتسم بتهكم..
ورفعه تشبحله بنظرات متحديه..
انس شبحلهم بطرف عينه بعدين وجه نظره للقاضي وقال:في امرين محيرين جدا...اولهم مدام زي ماقال محمد  الفاسي انه لما شاف الراجل اللي كان مع موكلتي هرب فورا..مالا مني اللي خدي شنطة حوايجها وهويتها وجواز سفرها وهاتفها..وشن مصلحته من الفعل هدا...
تاني شي..كاميرا الفندق ماسجلتش دخول محمد الفاسي للفندق لكن سجلت ساعة خروجه بالبنت في تمام الساعه العاشره وخمسه وعشرين دقيقه..وموعد رحلته كان في تمام الساعه العاشرة وخمس واربعين دقيقه..والمسافه بين الفندق والمطار 15دقيقه زياده عليهم 5دقايق يخش فيهم هو للمطار ويتحرك للطيارة ويركبها...السؤال هني امتى لحق يرتب لبنته امورها في خمسة دقايق وحني نعرفوا وهو يعرف انه كان حيسافر بروحه لولا الاتصال اللي جاه من مجهول.!؟.
رفعه التفتت وشبحت لمحمد..
ومحمد كان يشبح لأنس بحقد..
انس؛بالمناسبه سيدي القاضي في عندي شاهد يثبت فقدان موكلتي للحاجات اللي انسرقوا منها..خوها اللي خداها من الفندق بعد مااستنجدت بيه..وملاحظه مهمه وحده هاربه مع واحد اخر ممكم تستنجد بيه خوها..
محمد شد ع قبضة يده بقوة..
ورفعه قعدت تبلع في ريقها وهي تشوف للقاضي..
القاضي شبح لمحمد وقال؛نادوا ع الشاهد...اسمه..
انس:سفيان الشريف بن عامر..
القاضي:نادوا ع سفيان الشريف بن عامر..
ونادوا ع سفيان..اللي بعد ثواني خش للقاعه..
محمد ورفعة شبحوله..
بعد انس واشر لسفيان يوقف في مكانه..
مشي سفيان وقف في مكان انس..
القاضي:قول اقسم بالله العظيم ان اقول الحق..
سفيان؛اقسم بالله العظيم ان أقول الحق...
القاضي:اتصلت بيك اختك في نفس اليوم اللي سافر فيه محمد الفاسي..
سفيان؛زي ماعرفنا بعدين ايه..يوم الاحد بتاريخ** * ****
القاضي؛لما مشيت غادي شن لقيت؟
سفيان تنهد وقال؛اختي كانت منهارة تماما وفي حالة صدمه..شنطة ملابسها مش موجوده بس شنطة يدها قاعده كان فيها جواز السفر والهويه والهاتف التلاته لما فتشت شنتطها مالقتهمش واني كلمتني من هاتف الفندق..
هز القاضي راسه وقال؛تقدر تتفضل..
سفيان هز راسه ولف ومشي طلع وهو مضايق هلبه..
رجع انس لمكانه وقال:اللي دار هدا كله لو دورنا ع الفايده اللي بيجنيها حنعرفوه هويته طول..طليق موكلتي بس يحرمها من حقها في حضانة البنت..
شبح القاضي لرفعه وقال:في عندك شي تبي اضيفيه..
رفعه:زي ماقال موكلي الاثبات محتاج لدليل وع كلامه مافيش اي دليل او اثبات..
محمد؛عندي تعليق ع موضوع سفر بنتي معاي..
القاضي؛تفضل..
محمد؛الحكايه مش صعبه نهائي لما يكون عندي معارف يمشولي الاجراءات بسرعه..واني في الطريق كلمت واحد في ادارة المطار صديق ليا لأن الوضع مستعجل هو تصرف وسهل عليا كل شي..ماقعدش الا الختم ع جوازها فقط...
انس مرر نظره ع القاعه وهو يحاول يتمالك اعصابه...
هو قابل في حياته رجاله بحقارة طليق رنده وممكن اسوء بس لان الموضوع هدا كان عنده حساس شويه بعد مابدي يحسه يخصه شخصيا لحظتها كانت عنده رغبه يعطيها طريحه يقتله فيها...
رفعه كملت تقول:سيدي موكلي يطالب بجلسه سريه بينه وبين طليقته..
انس قعد يشبح لمحمد بحده...
القاضي شبح لأنس وقال:لو وافقت موكلتك حتكون الجلسه الجايه جلسه سريه..وفي حالة عدم موافقتها لعدم وضوح بعد الامور تتأجل الجلسه لتاريخ 22من شهر مايو القادم...
خدي شنطته ومشي طلع ورفعة ومحمد طلعوا بعده...
كانوا ماشيين وهما ساكتين لين فاتوا من حداهم...
وانس لما وصل في سفيان وقف وقال..
سفيان:شن صار..
انس:لما انحشر في الزاويه طالب بجلسة سريه..
سفيان؛شن يبي من وراها؟
انس:مماطله وخلاص..حني فهالفتره محتاجين ثبتوا بدليل قاطع كذب ادعائاته..
سفيان:في فبالك شي..
انس:ايه خل نزيد نسأل ونشوف بعدين نبلغك..
سفيان؛تمام..
انس؛تفضل..
تنهد سفيان ومشي وانس مشي معاه...
لما طلعوا برا لقوا محمد واقف ع سيارته يتكلم بالتليفون..
وين جو عيونه في عيون سفيان..
ضحك محمد بتهكم..
سفيان غير عيونه وقال وهو يحاول يتحكم في اعصابه:اللهم اني صايم..
انس؛فوته مادوراش..
مشي انس لسيارته وسفيان لسيارته لما وصلوا لسيارتهم سمعوا صوت ضحكة محمد الساخره وبعدين قال بصوت مسموع:الحمد لله الذي عافانا...
انس شبح لسفيان..
وسفيان قعد يشبح لمحمد يراجي في محمد يشوفله..
ركب محمد للسيارة وشبح لسفيان...
سفيان ابتسم باستفزاز وثني سبابته وحطها انفه..
بمعنى "كسرتلك خشمك.." يذكر فيه باليوم اللي ضربه فيه ومحمد ماقدرش يرد.
ركب سفيان السيارة وهو يضحك يإستفزاز
وانس ضحك نص ضحكه وركب للسيارة..
تحرك سفيان الاول ولحقه انس..
وخلوا محمد يشبح لمكان سيارة سفيان وهو يقول؛من يضحك اخيرا يضحك كثيرا ياسفيان.....واطلق لفظ نابي..بعدين شغل السيارة وتحرك..
🍁🍁🍁🍁
ناضت من النوم مفزوعه..
شافت ساعه نقالها لقت وقت صلاة الظهر فات..
نزلت من سريرها ومشت طلعت للحمام..
توضت بعدين طلعت للدار وصلت...وبعدها طلعت للكوجينه الخارجيه..
خشتلها لقتهم كيف باديين يطيبوا...
رنده:مااتصلش سفيان..
لينا؛لالا..
رنده تنهدت وقعدت ساكته..
رتيل:اليوم بنديروا فاصوليا بالكرشه ومبطن وبوريك جبده وصفيحه ودجاج في الكوشه وسويرسرول..والحلو كيكة  شكلاطه البندق وبلح الشام وكيكة مصقعه..
رنده:خلوا الحلو عليا اليوم..
لينا:تمام...
ومشت رنده طلعت من حداهم وولت للكوجينه الدخلانيه بش ادير الحلو..
لينا؛غير امتى يروح سفيان..
رتيل:حتى اني متوترة اكثر منها..
لينا؛ان شاء الله خير..
رتيل ومنى قالوا:ان شاء الله..
🍁🍁🍁🍁
الساعه 4:00قبل العصر..
طلعت من الكوجينه بش تمشي تقرا قرآن بعد ماكملت حوستها..
ع خشة راجلها وبناتهم مروح بيهم من المدرسه..
عفاف:جيتوا ماما..
جوها البنات وهما يقولوا..
جيعانين ماما..
عفاف:باهي بروا بدلوا حوايجكم قبل..
الزوز قالوا:حاضر..ومشوا يجروا لدارهم..
عبدالصمد:خيرها خليقتك هكي رايحه صفرا تقول طالعه من قبر..
عفاف:تاعبه شويه..
عبدالصمد:هدا وحني في رابع يوم هكي صار فيك ماتوصلي للنص الا وانتي ميته...شكلك خلاص انتي كبرتي بكري..
عفاف ابتسمت بتهكم ومشت من حداه ..
عبدالصمد:كان تخليني نجيبلك وحده تعاونك مش خير..
عفاف خشت الدار وسكرت عليها..
هو ابتسم بتهكم ومشي للمربوعه...
🍁🍁🍁🍁
وفي مربوعه حوش بوها...
سفيان؛انس قال المحاميه متاعه قالت كلام في المرافعه هو كان متوقعه مافاجئاته بشي..
مروان:حكي القصه اللي هو مألفها..
سفيان:طبعا..وقال يبي جلسه سريه يكون فيها هو ورنده بس..
الشريف:المنحط..
مروان؛يبي يشكك القاضي فيها لأنه اللي يكذب يتصدق اكثر من الصادق..
سفيان؛الموضوع هدا واقف ع رنده واقفت يصير منها ماوافقتش مايصيرش..
الشريف:لو رفضت بيقولوا هربت من المواجهه وهكي القاضي يشك فيها..
سفيان:هدا اللي قاله انس بالزبط..
مروان؛شيطان رجيم...
سفيان قعد ساكت وهو يفكر...
الشريف؛جيبوا رنده هني واحكولها اللي صار ونشوفوا شن تقول...
هز سفيان راسه وقام تليفونه واتصل بيها..
🍁هي كانت تراجي ع نار في الكوجينه...
لما اتصل بيها خوها..ردت عليه...وبعدين مشت طلعت من الكوجينه متوجهه للمربوعه وقلبها يدق بقوة من الخوف والتوتر..
••••••••
رنده بنظرة تحدي وعيونها مليانات دموع؛عادي مافيش مشكله نحضر الجلسه السريه ماعندي شي نخاف منه..هو اللي مفروض يخاف..
بوها قعد يشبحلها بألم..
وسفيان قال:خلاص تو نبلغ المحامي..
رنده هزت راسها وفي داخلها شعور تحدي قوي كانت روحها تقدر تغلبه لان محمد مايقدرش عليها وين تناقشه لهدا يلجأ للعنف من عجزه..
وحست ان الجلسه اكبر فرصه ليها بش تنتقم من محمد وتكسب قضيتها قدامه....
بس مروان ماكانش متريح وحاس ان الجلسه هادي حضر اختها ومش حتنفعها في شي...
☘☘☘☘☘
وتمر ايام الشهر الكريم..
والحال كما هو عليه لاجديد يذكر غير عرس اساور اللي تحدد  موعده...الأسبوع اللي بعد العيد مباشرة...
ومع حوسة رمضان بدوا يوتوله من توا...
والتفكير اكثر شي في اللبس عند النساوين..
بالذات لينا..هدا اول عرس في العيله تحضره تبي تطلع فيه طلعة صح زي مانقولوا..
••لينا:انا مانبيش نكلف عليك بس خاطري في العرس هدى نديره كل شي نبيه حاسه روحي عروس ولازم نطلع طلعة عروس في العرس هدي..
سفيان وهو حاط يده تحت خده ويتأمل فيها كيف تتكلم قال:انتي عروس اصلا مش حاسه روحك عروس..اللي في خاطرك بري خوديه وماتفكري في شي..
لينا بإبتسامه:كل شي كل شي..
سفيان:كل شي..
لينا ضحكت بعدين قالت؛تعرف توقعتك تستسخفني وتقول تفكيري تافه..
سفيان نزل يده وقال:تعرفي حتى انتي تبي تتخلصي من عيب اطلاق الاحكام المسبقه..راك حبي راك..اني مانفكرش فيك باي شكل يهينك نهائي ولو مرة سمعتي مني كلمه هكي ولاهكي وقت ينوض عليا البوري ماتاخديش عليها بكل..
لينا حطت مرفقها ع الطاوله وميلت راسها وحطت يدها تحت خدها وقالت:تصدق كل عيب فيك بديت نشوف حاجه سمحه ضايقني مرات وتزعلني مرات بس نحبها وليت مش قادره نكره فيك شي..
سفيان قعد يشبحلها بنظرات حب وهو ساكت..
وهي تشوفله بنفس النظرات..
سفيان:ماتسكتيش..
لينا ضحكت وقالت:تم الكلام..
سفيان بضحكه؛باهي ادويلي ع الخدمه متاعك شن صار من جديد..
لينا نزلت يدها وبدت تحكي بيها بحماس:اسكت هلت عليا طلبيات بشكل  منهن للعيد ومنهن للأفراح..ايه حقه وبعد ماانت نزلت التورته في الانستا وقلت انها مني بدن يطلبن في الكيكات...
سفيان بضحكه؛ماهو كتبت تحتها من شكولينا..
لينا:حي عليك كذب في عز رمضان..
سفيان بضحكه:كذب شني ياشكولينا  انتي ماهو انتي درتيها..
لينا قعدت تضحك..
سفيان؛فكري فيه جو الكيكات هدا اللي درتيها مش عاديه..
لينا بإبتسامه:هديك حاله خاصه جدا درتها من قلبي لشخص خاص جدا...يعني مش حنديرها لغيره كيف مادرتها له..
سفيان رفع حاجبه وقال؛موليه تحبيني هلبه..
لينا بضحكه:قول موليه نعبر عن مشاعري هلبه..
سفيان؛الله! تهبل كيف قلتيها..ترا عاوديها..هلبه..
لينا قعدت تضحك..
قرصها من انفها وقال:هيا قوليها..
لينا بضحكه؛هلبه..
تنهد وقال؛سبحان من عطاك نبرة هالصوت والطريقه في الكلام..
لينا ابتسمت بخجل..
"ماما"
لينا:تعالوا ياماما تعالوا في الصاله..
شويه وبانوا عليهم ياسمين وبحر
وهما كيف نايضين من النوم..
لينا:تعالوا ياقلبي تعالوا..
هما فاتوها ومشوا لعمهم حضنوا رجليه..
سفيان؛ااه ياني ياقلبي منكم ومن امكم..رفعهم وضمهم لصدره وهما حطوا روسهم ع صدره وغمضوا عيونه..
سفيان قعد يمسح عليهم ويغني..
نني نني جاك النوم..امك وقمره وانت نجوم...
هي حطت يدها ع ظهر الكنبه وحطت راسها عليه وقعدت تتأمل فيهم بحب وعيونها كانوا بيموتوا ع سفيان...
وهو منسجم مع اللي يغني فيه ويمسح ع ظهورهم بحنان...
🍁🍁🍁🍁🍁
"مفروض مشيت لدكتورتي ياحسين"
حسين؛معليشي حبي سايريني مانبيش ندير مشوارين..
نوريه تنهدت وقالت؛باهي ع خاطرك بنعديها بس هاه اخر مرة..
حسين بإبتسامه؛حاضر ياقلبي..
ومشي طلع بيها من الحوش وين جو بيركبوا السيارة لقوا اكرام مقعمزه من القدام..
نوريه شبحت لحسين..
وحسين فتح الباب وقال:اكرام مش هدا مكانك..
اكرام قعدت تشبح لنوريه..ونوريه مغيره عيونها عنها..
رفعت حاجبها ونزلت ومشت وقفت في الباب الخلفي..
ركبت نوريه وسكر حسين الباب..
بعدين شبح لإكرام..فهم علاش واقفه..
مشي فتحلها الباب..
اكرام؛بالله ساعدني حسونه ظهري واجعني..
حسين:باهي شدي فيا...شدت فيه وركبها بعدين سكر الباب...
اكرام قعدت غيرت مكانها وجت ورا حسين مباشرة بش تقابله ع المرايه..
وهو ركب...شغل السيارة وتحرك طلع من الحوش..
وخوه اللي كان واقف في روشن المربوعه ويشبحله قعد يضحك وهو يقول..كان الله في عونك ياحسين..
🍁🍁🍁🍁
في الطريق..
اكرام؛حناي كان الحلم اللي تشوفه رؤيه تتحقق زي فلق الصبح كيف مايقولوا..قالتلي انتي يااكرام بتجبيهم تلاته ولاد ورا بعض الله يبارك..
حسين:مش مهم ولد ولابنت المهم يكون حاله باهي..
اكرام؛اكيد حسونتي..بس اني نتمنى يجيتي وليد بش ينسخك نسخ ونحبه زي بوه..
حسين حرك عيونه لنوريه لقاها تشبح للطريق ومحتفظه بصمتها...
رجع شاف القدام وقعد ساكت..
واكرام مابطلتش هدرزة ومرة مرة كانت ضحك في حسين..
ونوريه كان تلقى تفتح باب السيارة وتنزل مش مستوعبه نفسها كيف قعدت متحملتها وساكته...
واخيرا...وصلوا للعياده....
ومشوا الزوز خشوا وحسين معاهم...
الدكتورة شافت لإكرام الأولى...
الدكتورة بإبتسامه؛بنوته..
اكرام بصدمه:كيف بنوته..غير زيدي شوفي تربحي..
نوريه.قعدت تشبحلها..
وحسين قال:خلاص بنت بنت الحمد لله خير ونعمه من ربك..
اكرام؛غير زيدي تأكدي دكتورة..
الدكتورة؛تمام...وقعدت تحاول الدكتورة بعدين قالت..بنوته حبيبتي اكيد حتطلع زي العسل زيك بالزبط ولا شن رايك استاذ..
حسين بإبتسامه:ان شاء الله تجي في جمال امها بش يبدوا عندي منها تنين..
نوريه ربعت ايديها وبلعت ريقها وقعدت تمرر في نظرها ع الحجرة وهي تتحمل بروحه في قوة صهد نار قلبها..
ابتسمت اكرام وقالت:الحمد لله...
شويه ونزلت وجي دور نوريه...
وحسين كان ملهوف يعرف اكثر منها..
الدكتورة بإبتسامه؛وليد..
انصدمت اكرام..
ونوريه وحسين فرحوا ع الآخر..
بعدين قالت نوريه:نبي نسمع النبض متاعه..
الدكتورة:حاضر...وشغلت الدكتورة الصوت..
وبدوا يسمعوا في نبضاته..
اذكر حسين فترة حمل نوريه بالشريف قداش كانوا فرحانين هو وياها..ولما سمعوا نبضه لأول مرة دمعت عيونهم..
وتوا وهما يشبحوا لبعض عيونهم دمعت..
الدكتورة:لهالدرجه تأثرتوا ع حسب علمي عندك غيره..
نوريه مسحت دموعها وقالت:ايه..
حسين مسح دموعه بيد وحده وقالت:طبيعي نتأثروا اللحظه هادي مؤثرة..
الدكتورة:فعلا..
واكرام تشوفلهم هما الزوز بنظرات غيظ غارقات بالدموع...
🍁ماقدرش حسين يدرق فرحته بالولد من نوريه ...
وهما مروحين في الطريق ماخلا ماجاب معاه...وشري لكل وحده فيهم شنطة من ماركات مختلفه بس بنفس السعر...
لكن ماقدرش يهدي نار الغيره الوالعه في قلب اكرام..
بالذات وين شافت ردة فعل عزوزتها..
رمضانه؛مبارك مبارك ع وليدي ربي يكثر ولادك ياربي..
حسين بضحكه:ويجعلهم من الصالحين..
رمضانه؛آمين وليدي امين..
رمضانه؛وان شاء الله ياكرومه بنتك تجي زي نوارة بنية نوريه..
اكرام؛ان شاء الله خير من احفادك كلهم..
حسين شبح لإكرام..
ورمضانه ونوريه تجاهلوا ماقالت..
نوريه؛خل نوض نوتي الحاجات بش نتسحروا هداكا هو..
ناضت ومشت طلعت من حداهم..
واكرام قالت:خل نمشي نبدل...ومشت لدارها..
حسين تنهد ومشي قعمز حدا امه..
رمضانه؛ربي يكثر عزوتك ويعطي خوك..
حسين:اللهم آمين..
في الكوجينه..
مها بضحكه؛مبارك عليك تشوفيه ع خير وعقبالي يارب...
نوريه بإبتسامه؛آمين زي هاليوم نشوف وليدك بين ايديك..
مها وعيونها معبيات دموع:يارب....
☘☘☘☘☘
وعدت باقي ايام الشهر الكريم...
وباقي لياليه انقسمت بين عبادة وطلعات للسوق..
البنات كانوا يجوا من حياشهم بش يطلعوا للسوق مع خواتهم والكناين والاجواء كانت حلوة...بإستثناء استكراد نوريه لمنى اللي هدا وين لاحظوه وخواتها وسألوها عنه...
••نوريه:شن بنقوللكم..تنهدت وقالت..ريتوا ليله دخول خوها..
عفاف ورنده:ايه..
نوريه:ريتي ياعفاف هديكا الشلافطيه اللي درهتلك كبدك..
عفاف:ايه!
نوريه:هادي ضرتي..
انصدموا عفاف ورنده..
عفاف:ضرتك قريبة منى وهي تعرف ليها وقت وساكته؟!..
نوريه:اممم..
رنده:شن قصدها بيها الحركه هادي! قصدك منين تحكيلنا ع قريبتها اللي خدت متزوج كانت تقصدها هي..!؟
عفاف؛تعرف من وقتها وتحكي وفي خاطرها تضحك علينا..
نوريه:فرصة وحصلتها بش تتشمت..
عفاف:مااحقرها..
نوريه:كان مش خواته جابوها راني قلت هي مدبرتها..
عفاف:توقعي كل شي..
رنده:لالا منى ماعندهاش الجرأة بش دير حاجة زي هادي..
نوريه:حتى اني نقول هكي..المهم خلونا منهم توا وفكروا في يوم غدوة حنهلكوا رسمي العزومه المرة هادي فيها نساوين..
عفاف؛حقه غدوة المحامي جاي مع امه؟
رنده قلبها بدي يدق بقوة بس حاولت ادير روحها عاديه:ايه قال سفيان عزمتهم..
نوريه بضحكه:خاطري نشوفه هالمحامي من لما حكتلي عليه رتيل..
عفاف بضحكه:حتى اني..
ورنده تسمع فيهم شن يقولوا وتحاول تتجاهل اللي تحس بيه..
🍁🍁🍁🍁🍁
وفهالوقت..
انس في داره راقد ع السرير في نص بنته وولده اللي كانوا شادينه ورايحين في النوم..
وهو لاهي في تليفونه...خاش ع الفيس..
يدور في حساب رنده بعد مالقاها معلقه لخوها سفيان ع منشور نزله يوم ذكرى ميلاده...
كان قاعد هو نفسه حسابها زمرد بس امناته كويس..
ليه فترة وهو كل يوم يخش يشوف شن منزله جديد..ويشوف في ستورياتها بإستمرار...
كل مناشيرها كانت دينيه..وفي منه فيه حكم وقصص حلوة..
وفي منها هي تعبر فيه عن شي فداخلها..اما ستورياتها كانت تنزل فيهم تنسيقاتها للفطور في ومرات السحور او الحلو اللي دير فيه..ومرات تصور في طلعاتهم وتنزل...
شاف اخر ستوري كانت مصورة فيه المكان اللي فيه وكاتبه عليه..
"معاكم بس كل شي حلو...عائلتي"
ابتسم وهو يذكر في اليوم اللي شافها فيه في السوق بين عيونه عيونها مش قادر يحولهم من عقله....
حط تليفونه ع تركينه وشبح لصغاره زاد ضمهم ليه وغمض عيونه ورقد...

#اذكروا_الله_صلوا_على_النبي
......يتبع.......