صارت تلخبيط هلبه حذفته ورجعت نزلته كله من التغطيه..
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
وصلت فيها ومدت يدها وصافحتها...
رنده بنبرة مريبه:كيف حالك ياحور..عاش من شافك..
حور وهي تحاول تخلي روحها عاديه:تعيشي وتشوفي..الحمد لله..انتي شن دايرة..
رنده بإبتسامه مريبه:الحمد لله في خيار الخير..
حور وهي تشوفلها بنظرات فيها شي من الخوف وع وجهها ملامح ابتسامه مرتبكه؛دوم ان شاء الله..
وطلقت حور رنده هربا منها وهي تقول:عاتكه..
ومشت بتسلم ع اللي نادتها ورنده معاها بعيونها واساور وهي تسلم كانت بنظرها مركزة معاهم...
وبعد السلام...
حور حاولت تكون متباعده عليها وقاعده في وسط الناس وماتعطيهاش فرصة تستفرد بيها لأنها تعرف من محمد انه خبرها...
كيف؟!
محمد يهدد في حور ديما انه يفضحها لو ماعطتاش معلومات عن رنده..وهي كانت تتهرب منه هلبه وهو عرفها تتهرب فضحها قدام رنده وخبرها في رساله هاتفيه.
"صاحبتك عرفت قداش انتي صديقه مخلصه وتحبيها الخير"
وطبعا مهما حاولت حور تهرب من رنده مش حتقدر...
••الساعه 11:00ليلا
طلعت من الحمام ومشت بطريقها بتطلع من الحوش للخيمه...
بس رنده اللي طلعت في وجهها وفجعتها وقفتها فب نص الطريق..
رنده:قبل ماتفارقيش فيا بكل وين نتلاقوا في مناسبه خيرك توا هاربه!؟
بلعت حور ريقها وقالت؛علاش بنهرب..انتي اللي حسيتك تتجنبي فيا..
رنده رفعت حواجبها وقالت:اني!؟
حور قعدت تشبحلها بريبه وهي ساكته..
رنده:شن اخبار محمد ..
حور عقدت حواجبها وقالت:محمد مني؟!
رنده:محمد راجلي..اه قصدي طليقي..خود معاه راحتك توا مايربطني بيه شي كان بنتي اللي حناخدها منه بإذن الله..
حور وهي تظاهر انها مش فاهمه شي:شن تقولي رنده بديتي تخترفي!!!؟
رنده:اطلعي منه الجو اللي ديري فيه اني عرفت كل شي..بس..نبي نعرف علاش درتي هكي شن في بيني وبينك..
حور قعدت تشبحلها وهي ساكته..
رنده:خيرك تبكشتي فجأة ولا لسانك كلاه القط زي مايقولوا..
رفعت حور حاجبها وقالت:راجلك هو اللي قعد يجري في جرتي ع الماسنجر وبعدين حتى رقمي جابه وقعد يكلم فيا في كل وقت..
رنده وهي تسمع فيها شن تقول حست بضيق في صدرها وقلبها وجعها..وجعتها روحها هلبه هلبه...
حاولت تشد دموعها وهي تقول:وانتي ماصدقتي!
حور قعدت ساكته..
رنده بتهكم:كان يكلم فيك انتي ووحده تانيه ع فكره..
حور:وهدا اللي خلاني فضحته..عرفت انه يكلم في غيري هو كان يقول انه مش مرتاح معاك وعايش معاك في جحيم ونادم اللي خداك وبعدين بدي يتهرب ولما واجهته بكلامه قال مانبدلش ظفر رنده بمية مراة...حرقني هلبه واني حرقته بيك لما فضحته قدامه وبعتلك صوره ومحادثاته مع بنت خاله..
رنده بإبتسامه متهكمه:كنتي عابيه انه بياخدك يعني وين عقلك انتي!!!؟
حور غيرت عيونها وهي تهز مع بعضها من الغضب وعيونها معبيات دموع..
رنده:انتي وحده حسوده من يومك حسدتيني عليه..وياريته غير يستاهل...وانتي تستاهلي ماجاك مني..وربي لولا الخوف من ربي كنت فضحتك في العيله كلها لكن لاانتي ولاهو تستاهلوا نخسر معية ربي...
حور بوقاحه:اني درت فيك معروف يارنده لولاي اني راك لتوا عايشه معاه وهو كل يوم مع وحده يصبح فيك بطريحه ويمسي فيك بطريحه...
رنده:صح معروف معاي كبير عمري ماننساه ونحمد ربي ديما اللي حط في طريقي وحده زيك بش خلصني من محمد..واشرت عليها بصبعها من فوق لتحت وقالت..وامثاله...
وختمت مواجتها لحور بنظرة احتقار لين تموت حور مش حتنساها..بعدين مشت وخلتها بذوب من الخجل منها نفسها ع اللي داراته والموقف البايخ اللي حطت نفسها فيه...
🍁🍁🍁🍁🍁
فهالوقت..
كانت لينا مروحه لحوشها....
باقي الليل سهراته جنب بنتها ياسمين اللي شدت في امها مابتش تطلقها بسبب زحمة العرس ودوشته البنت ماكانتش متعوده ع زحمه زي هادي تعبت نفسيتها..
سفيان وهو واقف في الباب:غدوة خليهم معاي..
لينا وهي حاضنه بنتها:مش لازم تو تتعود..
سفيان:اني قلت خليهم معاي مش اقتراح..امر..حيقعدوا معاي..
لينا تنهدت وقعدت ساكته..
سفيان:شن في غدوة هو؟
لينا:كسوة..ايه بنعدي للمزين اللي تخدم فيه سومه اخت حلومه...
سفيان:تمام تو نرفعك..
لينا قعدت ساكته..
سفيان:لينا..
لينا:نعم..
سفيان؛مازال قلبك اسود..
لينا شبحتله..
سفيان:خلينا نقعمزوا نحكوا ونتفاهموا زي الناس الكبار..
غيرت عيونها عنه وشبحت لبنته ومابتش ترد..
هو تأفف...
بعدين مشي من حداها..
وهي بعد مشي تمددت ع السرير ومعاها بنتها وغمضت عيونها بترقد...
🍁🍁🍁🍁
تاني يوم....
كسوة أساور جتجيها العشيه...لأن اهل زوجها عايشين في منطقه ترهونه وبيجوها من غادي..
لهدا في وقت مبكر...النساوين كلهم انشغلوا بتجهيز انفسهم..
اللي بتصدر واللي تبي تطلع طلعه مميزة..
منهم في المزين ومنهم في الحوش..
وجيهه وبناتها وكنتها روحوا بش يوتوا رواحهم في
حوشهم براحتهم..
نوريه بس كانت في المركز اللي تخدم فيه مرام بتصدر غادي..
••••••
الساعه 4:30قبل العصر..
روحت لينا من المزين وخشت للحوش طول..
سفيان:بالشويه عليك..
لينا حولت كندرتها وكملت القدام بروحها..
سفيان نادى:امي...
شويه وجت وجيهه..
وجيهه:روحتي..
سفيان؛عينك عليها يام....
وجيهه:باهي باهي..وخدت لينا وقالت..هي تعالي..
وخشت هي وعزوزتها داخل..
في الصاله كانوا منى ورتيل واتيات ومقعمزات يستنوا..
وهي خشت عليهم..
رتيل بضحكه:متلهفه نشوف العبروق...بكري سفيان قالي شن هو اللي بتلبسه لينا قتله العبروق..
وجيهه:مش عارف شن بتلبسي!؟
لينا بإحراج:لا ما قلتش..
منى :اكيد دايرتها مفاجأة...
رتيل:باهي هيا حولي الكاب...
لينا ضحكت بعدين حولت الكاب متاعها..
كانت آية من الجمال وهي لابسة العبروق اللي كان خايل عليها وهي خايله عليه...
وهما لما شافوها انذهلوا..
وجيهه بإعجاب:الله يبارك الله يبارك..
رتيل:تهبلي تهبلي..
منى:ماشاء الله تبارك الرحمن..
ابتسمت لينا بخجل..
وجيهه:شافك راجلك..
لينا:لالا طلعتله مغمومه..
وجيهه:خل يشوفك توا خير من بعدين..بري نور بنتي لخالك سفيان قوله قتلك حناي تعالى..
نور؛باهي..ومشت تجري..
وجيهه:هي انتم بروا ..
منى ورتيل طلعوا بسرعه وهما يضحكوا..
ع جية نور:اهوا..
"امي"
وجيهه:تعال وليدي تعالى..
لينا قلبها بدي يدق بقوة وزادت توترت.
هو خش عليهم جو عيونه عليها غيرهم وشبح لأمه وهو شاد ابتسامته:نعم يام..
وجيهه:مرتك تبيك مش اني قالت نبيه يشوفني بالعبروق..
لينا فنصت عيونها بصدمه في وجيهه.
وجيهه:هي تعالي نور سلم بنتي خل نلبسك قبل لامك تجي..
وخدت نور ومشت بيها وخلتهم بروحهم..
لينا شبحتله بطرف عيونها وهي متحشمه وقلبها بيفر..
وهو قدملها وقال:هدا العبروق..
لينا:اممم...
هوقعد يمرر في نظرها عليها ويقول:ماشاء الله...الله يبارك..الله يبارك..
وهي نزلت عيونها وابتسمت بخجل..
وهو تنهد من قلبه وقال..
لباس العبروق سماحة ذوق..
حدايد والمخنوق اتوق..
وبوثومة ورشقة وعروق..
وختم فليد وعقد حوافر ويش يزيد..
ايسلم لباس العبروق..
وهي بعد كمل قعدت تضحك بخجل ..
وهو هايم فيها...
ع خشة نوريه جايبها مروان..حتى هي كانت متغطيه بكابها قالت:السلام عليكم..
التفت سفيان شافها قال:وعليكم السلام..
تحشم ومشي طول انسحب وطلع من حداهم..
نوريه قامت خمار كابها وشبحت للينا وقالت بإعجاب:الله يبارك عليك ياشكولينا ..
ضحكت لينا وقالت:مالا شن نقولوا عليك انتي الله يبارك..
نوريه:لا اني عارفه روحي مش لازم تقولي..
ع جية رنده وهي تمرر في نظرها عليهم:جيتوا...الله يبارك الله يبارك...تهبل لبستكم لينا..
لينا ابتسمت..
ونوريه:واني..
رنده بضحكه:انتي من يومك عسل ياعسلتي..
نوريه:عارفه..
ضحكوا..
بعدين سمعوا صوت مروان يقول:هيا وراي خدمه ياهوو..
نوريه:هيا هي...
ورنده خشت داخل بش تستعجلهم....
🏵🏵🏵
طلعوا كلهم للسيارات وركبوا..
ووجيهه قعدت واقفه حدا السيارة مع سفيان تكلم فيه..
كلكسلهم مروان..
شبحله سفيان هز راسه بعدين مشت وجيهه لسيارة مروان وسفيان مشي ركب سيارته..
شبح للينا وهي متغطيه ابتسم..بعدين شغل السيارة وتحرك...
🏵🏵🏵🏵
وصلوا للصاله..
وخشوا وخدو مكاناتهم....
كانت العيون كلها ع لينا المتميزة دائما وهالمرة لبستها خلتها محط الانظار والأعجاب بزياده...
كانت فيها تفرق عن كل الموجودات...
وفي من نساوين ماقدروش يحولوا عيونهم من عليها انبهارها بجمال طلتها وقوة جاذبيتها...
والعروسه كانت داخل في دار العروسه ومعاها رنده يهدرزوا..
رنده:الواطي المنحط كان ياخد في تليفوني من وراي واضحه..
اساور:عليك واطي كنت معاه يارنده والله ربي يحبك اللي خلصك منه..
رنده وعيونها مليانات دموع:ايه..الحمدلله...ربي ينصرني عليه ويردلي بنتي..
اساور:آمين..
شويه انفتح الباب وخشت وحده من بنات خالات اساور وهي تقول..
:ناسك وصلوا يااساور..
اساور زفرت بتوتر وقالت:وااك..
رنده بضحكه؛خلي التوتر لغدوة..
اساور:وواك رنده اسكتي..
قعدوا يضحكوا عليها...
🏵وكالعاده دار الزمزامات شوط حلو ع الكسوة....
بعدين طلعوا عروسه وهي متغطيه بالحولي وقعدوا يدرجوا فيها ويدوروا بيها..
وكانت تدرجيتها خيال...
بعدين ادرجت مرة تانيه مع امها....
وفي المرة الثالثه...
ربيعه:ترا بنتي لينا نوضي بندرجوك مع اساور..
لينا قعدت تشبحلها وهي متفاجئة..
وجيهه بإبتسامه:هي نوضي سلم بنتي..
لينا ابتسمت وهي مازال مندهشه..
وحمواتها وسلفتها يشبحولها..
ومشت مع ربيعه والعيون عليها وجت لأساور...
شدتها ..وبدوا الزمزامات يدرجوا فيهم الزوز..
لينا كانت حاسه بشعور حلو للمرة..
حست انها عروسه حاضرة عرس بجديات مش مجرد احساس...لا..بل عروسه فعلا...
تسمع في كلام التدريجه وهي فرحانه كان كلام حلو خلا الدموع تغرق عيونها وهي مبتسمه ابتسامه غاية في الجاذبيه والانظار ماتحولتش من عليها...
ورتيل تصور فيها بكاميرا خاصه....
نوريه؛سبحان من قسمها لسفيان..
عفاف:ايه والله لتوا مرات لتوا نحس فيه حلم كيف كان واخد زهور وكيف طلقها..كيف هي كانت مرت عدنان الله يرحمه كيف توفى كيف ردها سفيان..ماتوقعتش بكل انهم حيكملوا مع بعض..
رنده:وحبوا بعض..جوهم مع بعض يهبل..والله تقول مخلوقين لبعض..
نوريه:مش تقول..هما فعلا مخلوقين لبعض..
ومنى تسمعلهم وتشبح لوجيهه اللي كانت تشوف للينا وعيونها معبيات دموع...
بعدين تنهدت وقالت؛قسمة ونصيب...
شبحولها بناتها...بعدين نوريه شبحت للينا وعيونها غرقوا بالدموع...
🌺وتمت التدريجه...
وولت لينا قعمزت في مكانها..
لينا:فاجئتني واجد..
وجيهه:قالتلي عليها من امس..
لينا:ليش ماقتيلي يااللاي..
وجيهه:مفاجأة مش انتم بس اللي ديروا في المفاجآت..
ضحكوا اللي حداها..
🏵وتمت اجواء حفلة الكسوة ع خير...
وروحوا كلهم ع حوش ربيعه بش يكملوا باقي السهريه غادي..
لينا اول ماروحت صلت صلاتها..
بعدين مشت غيرت حوايجها ولبست فستان لونه ارزق ملكي..ورفعت شعرها ونزلت خصلات بسيطه..
وخفف المكياج وطلعت قمة في الجمال كعادتها..
وحمواتها كذلك غيروا وع راسهم نوريه...
اللي بعد ماغيرت ولادت ع روحها..
خشت لوحده من الديار في حوش عمتها وسكرت عليها...
••نوريه:والله العظيم مالهيت وامس رقدت بكري..
"مش فاضيه تبعتي حتى رساله!؟"
نوريه:تعرف العراس وسريبهم ياحسين..
"قداش عرس في عرس حضرتيه حتى في عراس خواتك وين نتصل تردي طول"
نوريه تنهدت وقالت:قبل لما كنت نخليك فيك بروحك ماعندك من يقيمك كنت نكلم فيك بش نطمن عليك بس توا خلاص..
"نوريه بالله عليك..ارجوك فوتيه الجو هدا والكلام هو معاش تعاوديه"
نوريه بإبتسامه:حاضر..
قعد ساكت...
نوريه:سونه ياسنسن..
سمعت صوت ضحكته الخفيفه..
نوريه بإبتسامه:ها شن تغديت اليوم..
"مكرونه هيا..اللي ديري فيه انتي في الطاجين"
نوريه بضحكه:بيشاميل..
"ايوه هي هادي..جيت قنينه"
نوريه:باهي صحتين بالسلامه...وسكرت عليه وهي منغاضه..
عاود اتصل بيها..قعدت تشبح للشاشه وهي متكنطيه
بعدين فتحت الخط وردت..
نوريه؛برا هدرز عليها تراجي فيك..
"ايه شويه وماشيلها خل نهدرز عليك انتي قبل..
نوريه؛والله نسكر التليفون بكل.."
"اديريها نوريك اقسم بالله نجيك وين ماإنتي نروح بيك.."
نوريه:باهي قول اللي عندك شن تبي تهدرز...
"شن لبستي اليوم"
نوريه:صدرت..
"حي عليك وماقلتيش..تعرفيني نحب نشوفك بالعربي ولا؟!"
نوريه:مانحسابش يهمك تشوفني بيه توا..
تنهد وقعد ساكت..
نوريه؛باهي ترا سكر خل نكلمك فيديو..
بصوت باين فيه الزعل
"Ok"..
سكرت وهي تضحك..بعدين مشت قعمزت ع فراش الجلسه...
واتصلت بيه فيديو...
فتح طول وشافها...حط يده ع جبهته وقعد يشوفلها بإبتسامه..
ونوريه تضحك..
حول يده وقال:امتى قصتيه هكي؟
نوريه:اليوم..شن رايك في القفطان؟
حسين:شن رايي في القفطان!!؟ نحس فيه ماولاش حلو الا لما لبستيه..
ابتسمت نوريه بغرور وقالت:حاجه اكيده..
حسين قعد يضحك وهو يشوفلها..
فجأة حد دق عليها الباب..
نوريه شبحت للباب وقالت؛خلاص بنسكر حسين توا نكلمك بعدين حبيبي..سلام.
حسين هز راسه وقال:سلام..
سكرت نوريه وناضت فتحت الباب لقت وحده من عماتها بتخش للدار تاخد منها حاجه..
هي خشت ونوريه طلعت...
🌺🌺🌺🌺🌺
الساعه 11:30ليلا...
"ياروحي ياماما توحشتكم موت"..
سفيان:حتى هما توحشوك موت..
لينا دارت روحها تجاهلت كلامه....
ومشت طلعت من الدار...لكن هو مالحقهاش مشي خدي كرسي الزيانه وقعمز حدا الصغار يتفرج عليهم وهما راقدين..
اما هي خشت لدار النوم واستغربت فيه كيف مالحقهاش..
وين وقفت ع الزيانه بتحول ذهبها..
تفاجئت لما شافت عليها بوكس هديه...
بفضول واستغراب...خداته وبدت تحول في الغلاف بعد ماحولاته بانوا عليها ملابس طفل صغير...
ابتسمت وفتحاته وقعدت اطلع بالحاجه كانوا حلوات بالمرة...وهي تشوفلهم وتضحك..
"شفتهم عجبوني خديتهم..."
لينا ردت الحاجات للبوكس وقالت:حلوات..
قدملها وقال:هدا هو المهم يعجبوك..
لينا غطت البوكس وولت تحول في ذهبها وهي ساكته..
هو جي وراها وحول العقد متاعها وقال:اليوم كلمني صديق ليا قال يبي من الشكلاطه متاعك لفرح خواته وقال راعيني..
لينا وهي تحط في ذهبها ع الزيانه :ماقالش كم يبي..
سفيان وهو يشبحلها من المرايه قال:200 طرف..
لينا هزت راسها ومشت للدولاب فتحاته وطلعت منه حوايجها..
وهو يشبحلها...
خدتهم ومشت طلعت بيهم للحمام...
هو ابستم برفعة حاجب وقال:غدوة ماعندك وين تهربي...
🏵🏵🏵🏵🏵🏵
لمت شعرها وهي تقول..
نوريه؛غدوة اخر امتحان..
رنده؛ايه..
بنت عمهم؛قداش سنة بتقري رنده؟..
رنده:سنتين والثالثه الرساله..
:بالتوفيق..
شويه رن تليفون نوريه..
عقدت حواجبها وشافت المتصل.
بعدين رفعت وشاحها ع شعرها وناضت طلعت من الدار ومشت للدار التانيه خشتلها وردت..
نوريه:ايوه..
"عندك 5دقايق البسي فيهم عبايتك ووشاحك واطلعي.."
نوريه بصدمه:كيف!!..
" اللي سمعتيه هيا سقدي روحك.."
وسكر عليها..
هي قعدت تضحك..
بعدين مشت طلعت من الدار....
•••••••
نوريه:بالله عليك خليك حداها باهي..
رنده بضحكه؛باهي بري اطلعي الراجل يراجي..
نوريه بضحكه؛هي هاني طالعه..
مشت طلعت نوريه ورنده بعد سقدتها ولت خشت داخل..
برا...
وصلت نوريه في السيارة لقت الباب مفتوح..
ركبت طول .
نوريه:خيرك شن جاك ع الليل..
حسين: انتي هبلتيني..
نوريه قعدت تضحك..
هو ابتسم بعدين تحرك بالسيارة...
🏵ومشي لأكثر شط بحر تحبه نوريه..
فاجئها لما طلع جايب حصيره وتسالي يفوتوا بيهم الوقت..
وقعمزوا ع الشط وقعدوا يهدرزوا ويسترجعوا في ذكريات زمان...
هدا كله...
واكرام تراجي فيه وتتصل بيه مايردش...
وقعدت تستنى لين خداها النوم....
وهي رقدت من هني...وحسين خش بنوريه لحوشهم من هني...
🍁🍁🍁🍁
تاني يوم الصبح...
لبست اكرام حجابها وطلعت للجنان تتمشى فيه كعادتها من لما بدي الجو يدفى..
وهي فايته من جنب السور سمعت صوت نوريه..
"حسين القهوة واتيه"
وقفت في مكانها مصدومه..
معناها حسين الليل كله معاها وهي اللي تحسابه بات في مكان خدمته لأنه مشغول..
"اهو جيت...الله ع الريحه فيها سر قهوتك يامراة انتي"
"النفس النفس".. وضحكت
ماقدرتش تتحمل اكثر من هكي مشت طول بعصبيه وبتموت من غيظها..وخشت من جنان الكوجينه وخبطت الباب بقوة...
🌺🌺🌺🌺🌺
الساعه 10:45صباحا..
مقعمزة ع واحد من الكراسي في كليتها تراجع قبل لتخش امتحانها الأخير..
وهي تتصفح في الشيت..
فجأة شافت وجه حلو بريء يبتسملها في ابتسامه غاية في الجمال..
فطومه:خويله رنده..
رنده بضحكه:فطومه..وقربت باستها من خدودها وخدتها قعمزتها جنبها..
وقعدت ادور بعيونها لين شافاته واقف بعيد عليهم شويه وداير روحه لاهي بتليفونه..
ضحكت ضحكه خفيفه بعدين شبحت لفطومه وقالت:شن جو تومي..
فطومه:تومي!؟
رنده بضحكه:ايه بندلعك تومي شن رايك فيه حلو؟
فطومه:ايه حلو ..
رنده؛ياوخيتي نجيها..وقرصتها قرصة خفيفه من خدها بعدين شبحت للساعه وقالت:هي توا بري لبابا لين نخش ندير امتحاني ونطلعلك باهي..
فطومه:باهي..
ناضت رنده ونزلتها..وقعدت تمشي معاها وفي نص الطريق طلقتها خلتها تكمل لبوها..
لين وصلتله هو شبح لرنده من ورا النظارات ابتسم..
ورنده نزلت عيونها طول ومشت...
فطومه:بابا مانروحوش..خويله رنده قالت ولا..نطلعلك..
ضحك وطبس قامها في حضنه وقال:مادا بيا..
فطومه:شني؟!
انس بضحكه هز راسه ومش بيها وهو يقول:حاضر يابابا حاضر...
🏵وخلال ساعه..
دارت رنده امتحانها بعدين مع زميلاتها وهي تراجع وادور بعيونها هني وهني..
لين شافاته مقعمز ببنته في حجره ويشرب فيها العصير وهي تاكل في البريوش..
ابتسمت..
:رنده هادي كيف حليتيها ؟
شبحتلهم وقالت:شن هي؟!
:شكلك ماكنتيش معانا بكل..
رنده بضحكه احراج:سامحوني سرحت شويه..
وكملت مراجعه مع زميلاتها...بعدين تفرقوا وكل وحده مشت في حالها..
ورنده مشت قعمزت ع نفس الكرسي..
شويه وجتها فاطمه تجري...
خدتها رنده وقعمزتها جنبها وقالت:شن جو تومي..
فطومه :مليح..
رنده ضحكت وقالت:مليح زيك يامليحه..وفتحت شنطتها وطلعت منها تلاته طروف شكولاته #شكولينا وقالت..وحده ليك ووحده لفواز ووحده لبابا..
خدتهم فطومه وقالت:باهي..
رنده:توا بنمشي نروح باهي..
فطومه؛لالا ماتروحيش خويله اقعدي معاي..
رنده؛ياريت ياخويله نقدر تقعد..
فطومه سكت وهي زعلانه..
باستها رنده وقالت:تو نتلاقوا مرة تانيه سموحه باهي..
فطومه بزعل:باهي..
رنده:لالا ماتقعديش زعلانه اضحكي تومي..
فطومه هزت كتافها بعدم رضا..
رنده:بتقعدي زعلانه..
هزت راسها يإيجاب..
رنده بدت ادغدغ فيها وهي بدت تضحك..
رنده بضحكه:مافيش زعل..مافيش..مافيش زعل مافيش..
وفاطمه تضحك..
سيبتها رنده وقالت:نتلاقوا مرة تانيه سموحه باهي..
فطومه:باهي..
رنده:هي بري لبابا سموحتي..
فطومه قعدت تشبحلها..
ابتسمت رنده..
ودخلت يدها تحت الشاربه بعدين طلعت وفي يدها توكه صغيره زي المساكه لونها فضي ع هيئة نجمه..
وحطتها ع شعر فطومه...
وفاطمه فرحانه بيها هلبه..
باست رنده راسها وعيونها غرقوا بالدموع بعدين قالت:بري لبابا..
فطومه؛باهي..
نزلتها رنده من الكرسي...
فطومه اشرت بيدها:باي..
رنده ردتلها التحيه:باي..
مشت فاطمه تجري لبوها ورنده مشت بطريقها لبوابة الجامعه..سفيان ع جيه..
وانس معاها بعيونه وع وجهه ابتسامه حلوه..
فاطمه:بابا خود وحده..قالت وحده ليك ووحده لفيزو ووحده لبابا..
ضحك انس وخدي طرف الشكولاته ورفع بنته في حضنه ومشي بيها للسيارة...
🏵طول الطريق وهو يسأل في بنته شن قالت رنده وشن قلتي لرنده والبنت تجاوب فيه وهو يعاود ويسأل فيها مرة تانيه..
فاطمه اشرت ع راسها:بابا شوف هادي توكه عطتهالي..
هو وقف بالسيارة قدام حوش اهل رولا..
وحط يده ع شعر بنته وقال:هادي هاتيها ندسهالك في دارك باهي؟..
فاطمه:باهي..
وسحب التوكه من شعرها وحطها في جيب التيشرت متاعه جهة القلب اللي من غير شي قاعد يرقص ع انغام مشاعره العذبه...
نزل من السيارة ونزل معاه بنته..
ورن جرس الحوش..
انفتح طول..وكأنها كانت واقفه في الباب تراجي..
انس بدون مايشوفلها؛خشي بابا..
مشت البنت خشت وهو جي بيلف بيمشي..
رولا؛راجي شويه انس..
هو رفع حاجبه وقف وقال:شن تبي..
رولا؛مش في الشارع خش شويه بس..
انس؛شن انتم مش خايفين ع سمعتكم ولاكيف..خوك قاعد!؟
رولا:لوسمحت خش الموضوع يخص الصغار..
انس مالقاش مناص من انه يلبي طلبها مدام الموضوع يخص الصغار..
خش داخل وهو يقول:هاتي اللي عندك بسرعه..
رولا:انس انت تبي تتزوج؟
ضحك بتهكم وقال:وهدا في شن يخص الصغار!؟
رولا:هدا اللي يخص الصغار..انت لو جيت بتتزوج الصغار مش حنخليهم لمرت بو بكل..
انس ضحك بتهكم تاني وقال:اني اصلا مخليهملك وحق الحضانه فيهم واخديته..وانتي تعرفي لو فكرتي تحرميني منهم شن نقدر نديرلك...وفي النهايه موضوع زي هدا مايعنيكش..وهادي اخر مرة اخر مرة..يصير فيها بيني وبينك كلام..
ومشي فتح وطلع..
وهي واقفه تشبح للباب بصدمه وعيونها معبيات دموع بعدين قالت بحقد:والله ماصايرلك لامنها ولامن غيرها ياأنس وتو تشوف..
ومشت للباب سكراته بقوة وخشت داخل...
وين وصلت في وسط الحوش لقت بنتها تقول لخوها:هاك هادي من خويله رنده..
هي سمعت اسمعها فقدت اعصابها بالمرة ومشتلهم بسرعه جبدت من ولدها طرف الشكولاته لوحاته تحت رجليها وقعدت تعفس فيه بغل..
والصغار يشبحولها وهما مفجوعين..
الولد عيونه تعبوا دموع والبنت قعدت تبكي..
هي بعد ماسحنت طرف الشكولاته حولت الشبشب اللي في رجليها وخشت داخل..
ع جية امها شافت منظر الشكولاته المسحونه..
بعدين شبحت للبنت اللي كانت تبكي جتها وهي تقول:خلاص ماما خلاص..
وصلت فيها وضمتهم هي وخوها وهي تقول:ربي يهديها ويفرج عليكم...
🌺🌺🌺🌺
الساعه 2:30بعد الظهر..
علقت مرام قفطان لينا الكبير وهي تقول:يجنن قفطانك ولونه روعه..
لينا:خديته الأيام اللي فاتن من بوتيك سواريه.
مرام:يجنن البوتيك هداكا وبضاعته كلها من برا وغاليه..
لينا بضحكه:جي خاطري فيه خديته الواحد مدام عنده خل ياخد ربي يحب يشوف اثر نعمته ع عباده.
مرام:صدقتي..صبايا وحده فيكم تجيني..
:حاضر..
مرام:لينا انتي ماتبيش لاتنقي ولا تركبي رموش..
لينا:ايه..
مرام:تمام..معناها اكثر شغلي حيكون ع العين..شبحت للبنت وقالت...ابدي بوجه المدام...دير برنامج الملكه...وبعدين شعر المدام نبيه يكون مفرد فرد تام..حني هني لينا نستعملوا في الحاجات الطببعيه سواء كانت كريمات ولازيوت..
لينا:كويس بكل..
مرام:هي ابديلها..
:حاضر..
🍁🍁🍁🍁
"بتلبس تلاته فيلوات"
رنده:عاد جت وحيده العيله بدير كل شي خاطرها فيه..
بنت عمها؛يابختها والله كل اللي خاطرها فيه داراته...
رنده:الله يبارك..ان شاء الله حتى انتي ديري ماخاطرك..
:امين..ويعوضك خير يارب..
ابتسمت رنده مجامله وقالت :امين..
وكانت من داخل حاسه بشعور مضايقها..
طول ماهي موجوده في العرس كلمة ربي يعوضك خير تسمع فيها زي ماتسمع في اسمها..
تنقال بنبرة شفقه واضحه..وفي من يتقصد يقولها بنبرة شماته..
شويه جتها المزينه قالت:بناتي؟!
:ايه..
المزينه؛وحضرتك..
كيف جت رنده بتجاوب سبقتها بنت عمها وقالت:ايه بناتي حتى هي..
شبحتلها رنده..
وهي شبحت القدام للمرايه وقعدت تقول للمزينه شن تبي..
تنهدت رنده بحسرة وشبحت للمرايه وقعدت تذكر في ايام راحت وعز ايام راحت كانت فيهم رنده في عز قوتها وغرورها..
كانت ديما محسوده والكل يتمنى يكون مكانها..
وتوا اهل شفقه والمتشمت فيها اكثر من اللي واجعه الحال..
بس في صوت في داخلها كان يردد في آية..
"من كان يريد العزة فلله العزة جميعا"
وقعد هالصوت يردد في هالآيه..من كثر قرايتها للقرآن والختمات اللي ختمتهم فهالفترة ترسخت هلبه آيات في عقلها..استدعاهم وقت صار موقف احتاجهم...
وكله بأمر الله...
هي فهديكا اللحظه هدت نفسيتها ع الأخر..وحست بقلبها جمرة وطاحت في ميه..
جي بين عيونها انس..ابتسمت...
واستاقظت من سرحانها ع صوت وحده وهي تقول:افتحي شعرك حبيبتي..
رنده فكت شعرها....
المزينه:الله يبارك...
رنده بإبتسامه؛تسلمي..
وفي نفس المزين كانوا موجودات عفاف ونوريه ورتيل عفاف ونوريه بدولهم بشعرهم...ورتيل مقعمزة تراجي..
🌺🌺🌺🌺
الساعه 7:30مساءا..
في الطريق رافعها من المزين للصاله...
هي مستغربه في سكوته ماتكلمش بكل...
لين وصلوا للصاله..
خش بيها داخل ونزلها وقعد يمشي فيها للباب قفطانها كان كبير..
شويه وتلقوها عمته ربيعه وامه ورتيل..
هو وخر وولى لسيارته..
سكرت رتيل الباب وخدوا لينا....
لينا رفعت شويه من كابها وقالت:وين ماشيات بيا..
ربيعه بضحكه؛لدار الغوله..
ضحكوا رتيل ووجيهه..
لينا بضحكه؛غير شن في من الصبح حاسه في حاجه..
ربيعه:ووك مكثر دوتك شويه وتعرفي..
وصلوا لدار العروسه..
فتحت رتيل الباب ودخلوها داخل....
لقت اساور مقعمزة تستني..
اساور: واخيرا..
لينا؛الله يبارك عليك اساور طالعه قمر..
اساور بإبتسامه:تسلمي حبيبي..
ربيعه:هي حولي هدا..
وحولولها الكاب...
رتيل؛ياإلهى!!
ربيعه :ماشاء الله ماشاء الله ماشاء الله..
وجيهه:حصنت بأسماء الله الحسنى..
اساور:لاااا ياربي علاش...خلاص غيرت راي..
ربيعه:غيرتي عينك نراجي غير في رايك اني..
ضحكت اساور..
لينا بضحكه تعجب:ياجماعة الخير فهموني راني زي الأطرش في الزفه فعلا..
ضحكوا...
ربيعه:ياحنه..اني نعز سفيان وليد خوي هلبه ونعزك و
وربي عالم..وقلت في نفسي انتي تعرفي كيف هالزوز تزوجوا وكيف كانت ظروفهم..قلت يابنت ديرلهم حاجه حلوة يتفكروك بيها....امس خليتي درجي بنتي...واليوم نبيك تخشي ع زفه بعد ماهي تخش..انت العروس الجديده الوحيده في العيله ومافي حد حيستغرب اللي درته...
لينا تعبوا عيونها دموع وهي مبتسمه بإمتنان..
اساور:حي بتبكي لاااا تربحي..ولانقولك ابكي ابكي خل يخرب مكياجك ونقعد احلى منك..
ضحكوا ولينا معاهم..
وجيهه بإبتسامه:هي خلاص معاش في وقت...
ربيعه؛ايه..بري رتيل نادي المصورة..وهيا ياوجيهه..
وجيهه:هيا..
وطلعوا التلاته مع بعض وسكروا الباب..
لينا:اتفاجئت واجد قاعده مش مستوعبه..
اساور بضحكه؛اني سمعتك تحكي ع شن بتلبسي وقلت لأمي ع الفكره وهي عجبتها وقالت فكرتي كالعاده..
لينا قعدت تضحك..
اساور:ردي بالك تقوليها لحد فكيني منها..
لينا بضحكه؛ماتخافيش..بس بجد مش عارفه شن نقولك..
اساور:ماتقولي شي ادعي ربي بش نطلع في عيون الناس احلى منك..
قعدت تضحك لينا..
اساور:ريتي ماتبيش تدعي..ادعي خيرلك..
لينا بضحكه:ان شاء الله نطلعوا سمحات الزوز في عيون الناس كلهم..
دق باب الدار..وانفتح..
خشت المصورة وقالت:السلام عليكم..شن جو حبيبتي سوسو..الله يبارك عليك زي الغزاله..
بعدين شبحت للينا وقالت:ماشاء الله..هادي العروسه اللي قلتي عليها..قمر..
لينا بإبتسامه:تسلمي..
اساور:اما احلى اني ولاهي..
المصورة بضحكه:الزوز..والله الزوز..
اساور بضحكه؛ربي استجاب لدعائك طول ماشاء الله..
لينا بإبتسامه:الحمد لله..
المصورة:هيا سوسو حبيبتي..ترا اوقفي معاي..
🌸🌸🌸🌸🌸
وبدت زفة اساور اللي كانت حلوة بالمرة وكل من فالقاعه عجبتهم..
وعجبتهم اساور بالفيلو متاعها كان منفوخ وكبير....
بعد ماقعمزت العروسه ع الكوشه ..
خدتلها المصورة كم صورة.....
وشويه وجي دور خشه لينا اللي كانوا دايرلها كرسي كبير جنب كوشة اساور....
اغلب الحضور تفاجئوا وين شغلوا زفة "ادخلي عمري"
وقعدت عيونهم ع المدخل...خفتت الاضاءة..
وخشت لينا تدرج...
والعيون بين المتفاجئ والمذهول...
كانت بفستان زهري اللون طالعه فيه غايه في الجمال...
بتسريحة شعرها وزينتها...وطلتها اللي تسرق الانظار..
ولون بشرتها الساحر المميز المختلف عن كل الموجودات..
اللون الاسمر اللي ياما تغنوا بيه الشعراء في وصفهم ليه..
لينا سمراء الجنوب اللي قدرت ببياض قلبها تخطف القلوب...
بسمار لونها جذبت الأنظار وبهرتها على الدوام..
وفوق هالنعم هادي كلها نعمة القبول اللي تخليها غصب عن اي قلب مغرور تخشه وتملكه..
وصلت لينا لكرسها وقعمزت وساعدوها رتيل والمصورة ..
وبدت تاخدلها في اللقطات...
والعيون مانزلتش من عليها..
وجيهه:باهي اللي محافظه ع أذكارها..
نوريه:الله يبارك عليها...من يومها طلتها تقتل مش تقولولها نوريه هكي قالت...
ضحكوا....
ورنده تشبح لأساور ولينا وهي مبتسمه وعيونها مليانات دموع حسرة...
🏵وبدت اجواء الحفله...وكانت جدا جميله...
في نصها ناضت اساور غيرت الفيلو متاعها ولبست فيلو قصير....
بش تاخدي راحتها وهي تهيج..
ناضت معاها لينا وقعدوا يهيجوا الزوز وبنات العيله حواليهم...
بعدين قعمزوا...
وحطولهم العشي..
واساور خشت تغير بش تلبس الفيلو الثالث...
وبعد العشي..
خشت اساور للمرة الثالثه وكان موديل الفيلو الثالث ضابط..وفيه طرف من الخلف..
خدت بيه مجموعه من الصور مع العيله..
بعدين جوها ناسها بيروحوا بيها..
خشوا شويه قعمزوا...وضيفوهم....
بعدين طول طلعوا بأساور...
وبعد طلعت بأساور صارت في ربيعه حاله بنتها الوحيده ع 5اولاد اليوم خلت الحوش اللي كبرت فيه وتربت فيه ومشت لغيره وتقعد قلوب عيلتها مشغوله عليها وتدعي ربي يهنيها وتطلع من اهلها وتمشي لأهلها..
🏵🏵🏵🏵
وبعد ماروحوا المعازيم..
روحوا حتى اهل العرس...
واللي هدا توكل لحوشه...
اما سفيان ولينا..
لينا:الطريق طولت ولا؟!
سفيان ولا كلمه..
لينا:نسأل فيك..
لارد..
لينا:سفيان..
سفيان:روحي..
لينا:وين ماشي بيا!!؟
سفيان:لبلاد اليميم..
لينا بضحكه؛مقدمك..
سفيان قعد يضحك..
لينا:غير وين ماشي قول..
سفيان؛هي شويه وتعرفي..
شويه درست السيارة..
وهو قعد يغطي فيها كويس..
بعدين مشي نزلها ونزل معاه شنطه صغيره..
وخشوا لمكان لينا سمعت فيه صوت زحمه...بعدين طول مشت مكان دخلها فيه..
وبدي يركب بيها...اصنصير..المصعد..
لين وصل للدور المطلوب...
طلعوا منه وقعد يمشي فيها لين وصلوا لمكان وقفها فيه..
سفيان؛عرفتي حني وين..
لينا؛في الفندق هداكا صح..
سفيان بضحكه:صح..
وفتح الباب ودخلها...
قامت شويه من كابها وقعدت تمشي لين وقفت في وسط الغرفه..
وهو بعد ماسكر الباب جاها وقال...
سفيان:حولي اللي مغطيك هدا.
لينا ابتسمت وحولاته...
ارتسمت ع وجهه ملامح الإنبهار وهويشبحلها..
وهي قعدت تشبحله بنظرات خجوله..
هو تنهد بعدين قال:مش عارف شن نقول..مافي شي نقدر نقوله...الصمت في حضرة الجمال جمال...
لينا ابتسمت بخجل..
سفيان:قبل كل شي لازم نحكوا لينا
لينا؛ع الموضوع نفسه مانبيش نحكي مانبيش نعكر مزاجي بيه..بس انا متأكده وواثقه انك تعلمت واجد من غلطك الأيام اللي فاتن..الكذب يهد بيوت ويقتل الحب..
سفيان هز راسه وقال:عندك حق...كل اللي يهمني توا ان قلبك يكون صافي من ناحيتي..
لينا؛حتى لو زعل منك يقعد ديما صافي من ناحيتك ويحبك..
سفيان قدملها شد ايديها وقال؛واني والله نموت فيه..
لينا ابتسمت وقالت:كنت تعرف ولا؟
سفيان بإبتسامه؛ايه قالتلي امي..عجبتني الفكره واني كملت عليها....
مررت نظرها عليه وقالت:ديما العربي خايل عليك..ديما تطلع فيه سمح بزياده..
سفيان:ياويح قلبي..
ضحكت لينا..
سفيان ابتسم وقال:سبحانه كان نعرف شن الباهيه اللي قبلها مني وكفائني بيك عليها....
لينا ابتسمت وقالت:ساد برك بأمك وباتك تحسابه شويه..
سفيان؛باهي وانتي..اني عندك مكافأة...ولاإبتلاء..
لينا:الزوز مع بعضهن في الاول ابتلاء..وتوا مكافأة..
سفيان؛نحبك دنيا..
لينا:نحبك هلبه..
سفيان ابتسم بحب بعدين عقد حواجبه وقال:زعمه ولدي يسمع فينا؟
لينا بضحكه:مرات..ليش؟
سفيان:لاماهو حكايه عريس وعروسه وهو موجود مش راكبه مرات يفهم غلط..
لينا قعدت تضحك لين طاحت بجبهتها ع كتفه..
وسفيان يضحك وقلبه يرفرف من السعاده....
🌺🌺🌺🌺🌺
وعدت هديكا ليله بجمالها ع هلبه قلوب...
حتى نوريه وحسين اللي راجي اكرام لين رقدت وكمل ليلته وهو يهدرز ع نوريه للفجر...
عكسهم..
عفاف اللي كانت تقلب في صور تليفونها اللي فيهم صور ليها ليها وعبدالصمد يوم زفتهم مصورتها من الألبوم متاع الصور..
كانت تتمعن في ملامح السعاده اللي كانت ع وجوههم وهي توا مش قادرة تصدق انهم كانوا يحبوا بعض يوم من الأيام...
واختها رنده..
اللي اذكرت تفاصيل عرسها بالكامل..
اذكرت كيف جاها محمد للحوش يوم قراية الفاتحه وصور معاها وهي لابسه بودري..
تذكر في هدرزته وبصارته وكلامه الحلو...
تذكر يوم زفتها كيف لما خش وطلعها تصرفاته الرومانسيه وكلامه ليها...
حاسه ان هدا كله كان خيال ومافيش منه شي صار ع ارض الواقع...
لهدا ماعطتش نفسها المجال تفكر في انس....
لأن البدايات ديما حلوة...بس النهايات مجهوله وان كانت غالبا بشعه....
🍁🍁🍁🍁🍁
تاني يوم..
كان الجمعه...
بعد الغدي...
روحوا عفاف ونوريه...ورجع نظام الحياه هو الأول عند الجميع..
بس بعد فضت الدنيا ع رنده بدت غارقه في تفكيرها بيوم الجلسه السريه السبت..
كانت مواجهه مختلفه..
حيسمع اسرارهم ناس غريبه عنهم..
وغير هكي تفكر...شن حيقول محمد شن حيطلع منه من كلام..
قعدت تتخيل في الجلسه وتتخيل فيه شن يقول وهي بدت تجهز في الردود..
في الجلسه اللي انعقدت في خيالها هي المنتصره لامحاله..
وقعدت اليوم كله هي تتنقل بين ذكرين..
الصلاة ع البني بالصيغه الإبراهيميه...وحسبي الله ونعم الوكيل..
وتمر الساعات...
ويليل الليل....
••"رنده"
رنده من دار التقعميز:ايوه..
رتيل:تليفونك يرن..
ناضت رنده ومشت لدارها هي واختها..
خشت وسكرت الباب..
خدت تليفونها من الشحن...شافت المتصل لقاته رقم غريب..
مابتش ترد لين فصل..عاود تاني..
هي طردت التردد..وفتحت الخط وحطت التليفون ع وذنها.
جاه صوت انثوي يقول..
"ايوه..معاي رنده بن عامر"
رنده بإستغراب:ايه تفضلي..
"انتي موكلة المحامي انس الهمالي"
رنده:ايه..
"كويس..معاك طليقته واللي بإذن الله حترجعله عن قريب..نبي نقولك اتقي الله وخلي الراجل في حاله وبلاش جو كيد الاناثي اللي ديري فيه بعد اطلقتي تبي تتكبشي في رقبة راجل تاني فيسع...بري حبيبتي دوري ع غيره هو مازال يبيني وفي بيني وبينه وصغار نبوا نربوهم وحني مع بعض..
خلي الراجل في حاله خليه لمرته وصغاره الرجاله هلبه غيره انتي كان دوري تو تلقي وكان مالقتيش اني مستعده نساعدك المهم اخطينا وفكينا من شرك...اهو اني اليوم اتصلت بيك بس ومرة تانيه والله لما نفضح بيك....".وسكرت عليها..
ورنده جامده في مكانها من الصدمه مش قادرة تتحرك..
رتيل بقلق:رنده...رنده.....رنده خيرك..
شبحت رنده لرتيل ودموعها بدوا يطيحوا وحده ورا الثانيه..
رتيل بخوف:خيرك..من كلمك!؟
رنده بصدمه؛طليقة انس المحامي..ماخلت ماقاللتي يارتيل ماخلت ماحطت .
رتيل بصدمه؛خير عمها الحقيره!!!؟
رنده قعمزت ع السرير وحطت يدها ع فم كبدها وكأن في غادي نار تلهب..
وبدت معاناتها مع اعصاب المعده من غير شي القلق قاتلها بسبب الجلسه والمكالمه كملت عليها..
اللي صار لرنده لحظها زعزعه لثقتها بنفسها وايمانها...حست الدنيا انسودت في عيونها...حست انها خلاص انتهت..
والقضيه حتخسرها لامحاله..
ويامصعب هديكا الليله عليها عدت بصعوبه..
وجي اليوم اللي بعده..
كانت تحاول تبان عاديه قدام ماليها بالذات امها وبوها..
بس ملامح وجهها خلتهم يفهموا العكس...
وجي وقت المحكمه...
كانت متفقه تمشي مع اختها نوريه...
حسين حط نوريه في حوش اماليها....
وسفيان خداهم الزوز وتوجه للمحكمه...
حطهم ومشي بش مايتلاقاش مع محمد ويستفزه ويتهور ويدير حاجه ضيعهم...
🍁خشوا الزوز للمحكمه وقعمزوا يستنوا..
كان المكان زحمه...
والقاضي مازال ماجاش...
في الجهه اللي بيجي منها القاضي مع الكاتبه متاعه..
كان يهدرز هو زميل ليه..
القاضي:في قضايا الطلاق بالذات لو رفعتها مراة لازم تكون شديد معاها في الأسئله ودقيق لأن المراة بطبعها تبالغ في الشكوى وتحب طلع روحها مظلومه بزياده...
:مزبوط...معروفات النساوين في الحاجات هادي..
القاضي:اني نحاول نكون عادل قدر الامكان وديما حاط الفكره هادي في عقلي قدر الامكان..الراجل ديما اصدق من المراة وهدا طبعا مش تحيزا هادي الحقيقه..
والكاتبه تسمع في الكلام وهي مضايقه وساكته..
🍁🍁🍁🍁
"اني عشت معاه سنين وجبت منه صغار كان يعامل فيا عادي زيه زي هالرجاله..لين في مرة مشيت لحوش ماليا وحضرت مناسبه غادي بعلمه وقتله يجي يروح بيا دارلي عركه وقال دوري من يروح بيك..بلعتها وكلمت بوي يجيني وقتله راهو مشغول مايقدرش يجيني..وبوي مروح بيا في نص الطريق اتصل بيا مارديتش ع خاطر بوي معاي..
المهم حطني بوي وروح..وهو لما شافني روحت دارلي العار وقال كيف تركبي مع غيري من غير علمي..واني اصلا جيت بنروح بيك ومن هالكلام..وكلمه مني وكلمه منك في عز الليل روح بيا لحوش ماليا بصغاري وطلقني...وبعد الطلاق معاش دور صغاره بكل..رفعت عليه قضية نفقه وحقوق ليا تلاته سنين ماشيه وجايه ع المحكمه علي خاطرها..تعرفي شن قال للقاضي عن سبب الطلاق"
رنده:شني؟
المراة:قال مشيت للمناسبه من وراه وهو مش عارفه كان مشيت مناسبه حق ولاكذب..وروحت مع واحد تاني مش بوي...
نوريه:عطيه مايزرفه..
المراة؛وشوق ماقال وحط وطعن في شرفي هدا كله بش ماناخدش حقي ولاالنفقه..
رنده؛انا لله وانا اليه راجعون..
"جي القاضي"..
هدا واحد من موظفين المحكمه بلغ الحاضرين عن جية القاضي..
وشويه وبدوا يخشوا بالدور..
ورنده تسمع وتشوف..
اللي طلعوا وهما يتوعدوا في بعض..
ووحده طلعت تبكي وراجلها طلع وهو مبتسم وشافاته بعيون كيف غمز للمحامي متاعه وطلعوا وع وجوههم ابتسامات نصر..وهي تبكي ومتفركسه تمسح في دموعها من تحت الخمار ومش قادره تتكلم..
وزوز صغار هلبه في السن انصدموا فيهم لما شافوهم خاشين..
ولما طلعوا الزوز ماتكلموش بس ملامح وجوههم متجهمه هو طلع معاه بوه وهي امها وبوها طلعوا بيها..
رنده قعدت بعيونها معاهم لين طلعوا .
وخش محمد...طول شبحت القدام وقلبها بدي يدق بقوة من الخوف..
نوريه:خليك عاديه طز فيه..
المراة:هدا طليقها..
نوريه:ايه..
ومحمد قعمز وقعد يشبح جهة رنده....
شويه ونادوا..
(رنده الشريف بن عامر...محمد الفاسي****)
نوريه:توكلي ع الله..
ناضت رنده وهي تقول:حسبي الله ونعم الوكيل..
ومشت للقاعه..
خشت ومحمد خشوا بعدها...
وسكروا وراهم الباب....
#سبحوا_ربكم
....يتبع....
