عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
نازلين من الدروج وكل واحد فيهم واخد حد من توام في حضنه..
لينا:يوصلوا12ان شاء الله..
سفيان:ياريت نعرف قبلها والله ماخليتهم يجوا بر..
لينا بإبتسامه؛حتى لو مش حيرضوا يجوا ع حسابك..
سفيان هز راسه وقال:ممكن..لكن في المرواح حنحطهم في الأمر الواقع بدل مايطلعوا بعد الغدي يقعدوا معاك لبعد المغرب بعدين يروحوا جو..
لينا بإبتسامه:تسلملي..لكن نبي نخليهم ع راحتهم من غير مانحرجهم..
وصلوا لوطا وقال:والله اني اللي محرج منهم ليك وقت عليهم ..
لينا؛مش مشكله تعوضني ان شاء الله..
سفيان ابتسم وقال:ان شاء الله..
لما جت بتخش وقفها لما حط يده ع ذراعها..
لينا:شني..
سفيان:لاشي غير نحبك بس .
ضحكت ومشت خشت وهو خش وراها وع وجهه ابتسامه..
هي وصلت للصاله لقتهم كلهم مقعمزين قالت:السلام عليكم صباح الخير..
كلهم ردوا باصوات متقطعه:وعليكم السلام..صباح الخير..
التفتت وقالت:خش تعالى..
ومشت خشت عطت بنتها لعزوزتها..
ومشت طلعت طول لأن مروان موجود..
وهو خش بعدها وفي يده بحر وقال؛صباح الخير..
🌺خشت لينا للكوجينه لقت منى تمسح فالرخامه..
لينا:صباح الخير..
منى:صباح النور..شن جو..
لينا بإبتسامه:الحمد لله..انتي شن جوك..
منى شبحت للباب بعدين شبحت للينا وقالت؛جو الكوجينه الحايسه ع صبح ربي..تصدقي دايرين سفنز وبريوش ماخلوليش منه كان حوسته..والله يالينا مقعمزات يفطروا والكوجينه تضرب تقلب..وخاطري جي في البريوش والسفنز ماقدرت نقوللهم نبي شويه..
لينا؛لاحول ولاقوة الا بالله..
شويه وخشت عفاف وهي مبتسمه:شن جو لينا..
لينا شبحتلها وقالت:تمام الحمد لله.
عفاف:لاهو واضح هلبه سفيان وجهه منور وحتى من عويناته يضحكوا حسيته فرحان هلبه..
لينا تحشمت وانحرجت ماعرفتش شن تقول..
ومنى تشوفلها بإبتسامه..
ع خشة نوريه وفي يدها سبات قالت:وجه خوي ناير وجه عريس..
لينا بتتبخر من الخجل..
نوريه:عمري ماريته هكي الفرحه تتنطر من عيونه الله يبارك..
لينا مانطقتش بكلمه...
حطت نوريه السبات ع الطاوله وقالت:حصتك دستهالك امي..
لينا شبحت لمنى..
لقتها لفت للرخامه وقعدت تمسح فيها...
نوريه؛امتى بيجوا خواتك؟
لينا:12يكونوا هني إن شاء الله..
عفاف:وانتي منى ماليك امتى بيجوا توقعتهم يكونوا هني من امس..
منى التفتت وقالت:اليوم جايين امس كانوا في حوش عمتي راجلها دايرة عملية قسطرة..
عفاف:امم..حمد لله ع سلامته..
منى:الله يسلمك..
مشت نوريه طلعت..
وعفاف قالت؛معناها الغدي عليك اليوم لينا..
لينا:ان شاء الله..
عفاف؛كان ديرلنا كسكسي بالبصله خاطري فيه..
لينا؛باهي..
عفاف ابتسمت وقالت؛ربي يعاونكم...ومشت طلعت..
لينا مشت خدت السبات وعطاته لمنى؛خودي منى..
منى بضيق؛لالا صحيتي مانبيش.
لينا:والله ماناكل منه كان ماكليتي..
منى:ماتضغطيش عليا لينا مش حناكل..
تنهدت لينا ومشت بالسبات لحافظة الخبزة وحطاته فيها وغطاته بمفرش صغير..وسكرت الحافظه..
منى شبحتلها وابتسمت بعدين قالت:في تطورات..
ابتسمت لينا بخجل ومنى قعدت تضحك وهي تقول؛مبارك..
لينا بإبتسامه خجوله:الله يبارك فيك..
🏵🏵🏵🏵🏵
ومرت الساعات..
لين جت الساعه 12...
ولينا في الكوجينه هي ومنى يوتوا في الغدي..
دارو جنب الكسكسي مبطن وبوريك جبده وفلفل محشي..
ومافيش وحده من الحموات قالت نحرك معاهم حاجه..
لينا:بالله قعمزي منى اني تو نكمل..
منى بتعب؛لاخلاص معاش قعد شي تو نكمل..
لينا:يابنتي قعمزي مافيش شي اهم من صحتك..
منى:لالا...تو نكمل ارجوك خليني..
لينا بقلق :ربي يهديك يامنى..
منى بلعت ريقها وكملت لفان البوريك..
لينا حستها حطيح من طولها..
مشتلها خدتها وهي تقول:تعالي قعمزي تعالي..
منى بتعب:فكيني من لسناتهم يالينا..
لينا قعمزتها ع الكرسي..ومشت صبت عصير وجابتهولها..
لينا:الزم ماعليك صحتك..هاك اشربي..
خدت منى منها الطاسه وقعدت تشرب..
ع خشة وجيهه:خيرها؟!
لينا:من بدري وهي تحوس وريحة التطييب ماخلت شي في بطنها..كان تعدي ترقد وترتاخ..
منى:لالا تو نولي كويسه بعد ماشربت العصير..
لينا؛مش حتولي كويسه لين تعدي تتكي كان قعدتي مصبيه في الكوجينه اكثر من هكي حيغمى عليك..
وجيهه:لالالا..نوضي نوضي خشي داخل مش ناقصنا رعاش..
منى تنهدت وناضت....
ومشت طلعت من الكوجينه..
وجيهه بعد ماكانت تشبحلها قالت للينا؛خلاص كملتوا..
لينا:الكسكي مازاله شوي والموالح قعد منهن البوريك..
وجيهه:باهي..ماكلموكش خواتك...
لينا؛توا كيف خشوا لطرابلس يوصلوا هنى مع 12ونص..
وجيهه:باهي حمد لله ع سلامتهم..
لينا:الله يسلمك..
ومشت وجيهه طلعت ولينا مشت للبوريك تكمل فيه..
بعد كملت حطاته في الكوشة..
شويه وسمعت..
"لينا"
ابتسمت وقلبها دق بقوة ومشت طلعت للجنان...
لقاته لابس عربي ونظاراته فوق راسه عقد حواجبه وقال؛وينها الماليه متاعك صقع..
لينا:داخل..
سفيان؛تحركي البسيها لينا بإبتسامه:حاضر..ومشت خشت داخل
شويه وطلعت
سفيان:مايصيرش طيب مرة تانيه لو عاودتيها..صقع موت هدا ردي بالك
لينا بإبتسامه؛ياودي حاضر تحت امرك..
ابتسم وهو عاقد حواجبه وقال:كلموك خواتك..
لينا:اها..قالوا خشوا لطرابلس ويوصلوا هنى مع 12ونص..
هز راسه وقال:تمام..
جاته وقعدت تساوي في ياقة السوريه..بعدين مسحت بإيديها ع كتافه وقال...اعوذ بكلمات الله التامه من كل شيطان وهامه ومن كل عين لامه..ربي يحميك ويحفظك وين ماتعدي..
سفيان؛ويحفظك يارب ومايوريني فيك شر..
لينا ربعت ايديها وقعدت تشبحله وهي مبتسمه..
سفيان نزل نظاراته وقال:لما يوصلوا كلميني..
لينا؛حاضر..
سفيان:هي خشي..
ابتسمت ومشت خشت..
وهو تنهد بإبتسامه بعدين لف ومشي..
🏵🏵🏵🏵
الساعه 12:45ظهرا..
"مرحبتين مرحبتين آنستونا.."
امال وهي تسلم ع وجيهه:الله يأنسك ياخالتي وجيهه..
وهناء تسلم على عفاف..
لينا:هدي حماتي عفاف..
وقعدت لينا تعرف في خواتها بحمواتها والعكس..
وبعد استقبلوهم دخلوهم لدار التقعميز..
ولينا قعدت ادخلت في الحاجات اللي خشوا بيهم خواتها..
ماخلوا ماجابوا معاهم...
والرجاله استقبلوهم مروان وسفيان والحاج الشريف ومشوا هما وياهم للجامع....
بعد الصلاة روحوا الرجاله وحطولهم الغدي..
وحموات لينا هما اللي جهزوه...وخلوا لينا تهدرز ع خواتها..
ومنى معاهم وجيهه ماخلتهاش تتحرك...
بعد الغدي...
راكبة لينا هي وخواتها لشقتها..
امال:هدي شقة سلفتك..
لينا:ايه..وفتحت باب شقتها وقالت:هي تفضلوا خشوا..
سموا بالله الزوز وخشوا وقعدوا يتفرجوا عليها..
لينا:هدي مربوعه صغيره برغم انها غير مستعمله لكن اهو مرات نلقوها..واللي مقابلها حمامها..
شافوا المربوعه والحمام..
امال:ماشاء الله كل شي راقي..
لينا ابتسمت وقالت؛تعالوا..
مشوا مع بعض..
لينا:هدي الصاله مقسومه ع زوز جزء مفتوح وجزء مسكر..
والجزء المفتوح مقابله المطبخ..
وقعدوا خواتها يتفرجوا ويبركوا...
بعدين قالت:وهدي دار العويله..
خشوا شافوها ولقي فيها سرير كبير..شبحوا لبعضهم..
ولينا لاحظتهم..
هناء:تو مش قلتي حالك باهي انتي وياه؟!
لينا بضحكه؛اها والله باهي..بس هدى قبل..
ضحكوا خواتها وامال قالت:حولوه مالا..
لينا:لاخليه مرات نتعارك نا وياه ونجي نحرج هنى..
ضحكوا..
هناء:ربي مايجيب عرايك ويعقد عسلكم..
طلعوا من الدار ولينا قالت:وهديك دار النوم بحمامها..
امال:لا ماشاء الله شقة سمحه..
هناء:في بالكونات..
لينا:اها وحده في دار النوم ووحده في الصاله..
امال:يابختك عندك بالكونه في الدار..
لينا بضحكه؛مالا سفيان بيخلني نطلع للبالكونه..
ضحكوا خواتها.
هناء:ايه شعبان قال يبي يسلم عليك ويطمن ع حالك..
لينا؛سلميلي عليه وقوليله حالي باهي..راجلي كيف الجمري حتى من بعيد مش حيخليني نكلمه..
امال:وهدى الصح..
هناء؛ع هكي حتى الخدمه مافيش..
لينا؛اها ليا وقت مسيبتها بس خدمة الشكولاته ناويه بنفتحلها محل ان شاء الله..
هناء وامال:ماشاء الله..
امال:ربي يفتح عليك...
هناء:وان شاء الله ديما مهنيه ياربي..
لينا:آمين..واياكن يارب..
امال:هي خلاص نحنا لازم نسقدوا تو..
لينا؛والله ماشبعت منكم متوحشتكم دنيا..
هناء:ونحنا اكثر والله..لكن مافيها كيف عارفه الطريق والوضع..
لينا:ياريت لو تقعدن للمغرب وسفيان يحجزلكم تروحوا جو..
هناء:ماجبنا معانا جوازتنا بنتي..
شويه رن تليفون امال: خلاص لينو حبيبتي االمرة الجايه تعالي اقعدي يالانا اسبوع..
لينا ودموعها في عيونها:ان شاء الله..ارجن شويه..
ومشت خشت لدار الصغار...
بعدين طلعت بزوز اكياس هدايا..
لينا:حاجات للعويله..
امال:غير ليش مكلفات ع رواحكن..
لينا؛مافي شي يستاهلهم حبايبي والله توحشتهم واجد ياريتكم جبتوهم..
امال؛مرة تانيه ان شاء الله..
هناء:جعني مانفقدك...
لينا؛تسلمولي يارب..
امال:ربي يسعدك ويهنيك ياربي ويطمنا دوم عليك..
لينا:تسلمن ياربي ومايحرمني منكن..
🌺وسقدت لينا خواتها اللي مالحقتش تشبع منهم..
وبعد روحوا..
قعدت تبكي بقوة..
خطروا عليها بوها وامها...خواتها من ريحتهم لما جوها حستهم هما جو ولما روحوا حست بفقد بوها وامها اكثر من قبل..
ع قد مادارو فيها عزوزتها وحمواتها ماقدروش يسكتوها..
من البكي لين داخت...
•••••
فتحت عيونها شافت عند راسها يشوفلها بقلق
سفيان:لينا..شن تحسي توا..
نزلت من عينها دمعه وقالت:شي..
وجيهه:الله يسامحك يابنتي رعشتينا..
لينا ودموعها ينزلوا:سامحوني..
سفيان:ترا خليني معاها يام شويه وردي الباب..
وجيهه:باهي..
ومشت وجيهه طلعت وردت الباب..
هو شبحلها وقعد يمسح في دموعها وقال؛ شكولينا حبيبي خيرك؟.
لينا:خطروا عليا باتي وامي تصدق لعند تو ا مش مصدقه انهم راحو..قلبي متقطع ياسفيان حارة واجد واجد باتي وامي في مرة....
سفيان بحزن:عارفها حارة حبيبتي..وهلبه مش شويه بس هدا مقدر ومكتوب..وابتلاء عظيم من ربك يبي صبر عظيم...
لينا شدت يده وقالت؛نحساب روحي صابرة طلعت مازلت مش مستوعبه..
سفيان:لا انتي صابرة بس بين وقت ووقت اكيد حتتفكريهم ويتجدد حزنك...لينا راهو في آخره وجنه
بإذن الله حيجمعك بيهم غادي ومافيش فراق بكل من بعدها..
اهم شي ادعيلهم ديما وتصدقي عنهم كله يوصلهم يالينا ويفرحهم في قبورهم..
لينا رشفت وهزت راسها بإيجاب..
سفيان؛هي نوضي حبيبي نوضي توضي وصلي العصر..بعدين قعمزي استغفري ليك وليهم وماتنسيش اخر ساعه من يوم الجمعه ادعيلهم..وادعي لكل حد تحبيه وتكسبي فيا اجر لو زرقتيني معاهم..
لينا بضحكه من بين دموعها:محتال اطيح فيا فالدوة..
سفيان بضحكه شدها من خشمها بقوة وقال:واانتي وحده مسمومه..
وطلقها..
شدت خشمها وقالت؛معاش حسيت بيه..
سفيان ضحك بعدين قال؛هاه شكولينتي توا تمام..
هزت راسها وقالت:الحمد لله..
هو طبس باس جبينها بعدين قال؛هي نوضي بحر وياسمين خافوا لما شافوك تبكي.
لينا ناضت وقعمزت وهي تقول:ياروحي..
ناض وقف ع حيله وقال:طالع توا ماتبي نجيبلك معاي شي..
لينا :بابونج وشيشة مية زهر..
سفيان:حاضر..من عيوني الخضر.
صحكت لينا وهي تمسح في دموعها..
سفيان:ايه حقه..
شبحتله..
سفيان؛لاشي غير نحبك بس..
غمضت عيونها وهي تضحك وهو ابتسم براحه ومشي طلع..
شويه وهي ناضت..طلعت للحمام توضت للعصر..
وبعد صلاته مشت قعمزت حداصغارها وقعدت تلعب معاهم..ومرة مرة تهدرز مع اللي حواليها..لين قربت ساعة الدعاء المستجاب..
خدت تركينه في الحوش وقعدت تدعي للكل حتى رنده..
بس كان النصيب الأكبر في دعائها..لوالديها وراجلها...واب صغارها...
🏵🏵🏵🏵🏵
الساعه 10:37ليلا..
لينا خدت بحر ولفاته بالبطانيه وقاماته..
ورنده مقعمزة تشبحلها بعدين قالت؛ردي بالك ع خوي حطيه في عيونك..مادرتش اللي درته الا ع خاطره خوي يستاهل يعيش متهني..
لينا شبحتلها وقالت بإبتسامه:ماتوصي حريص...هي تصبحي ع خير ومشت..
ورنده اتكت ع الفراش وهي تقول:وانتي من اهله..
🌺وركبوا سفيان ولينا بالصغار لشقتهم..
وفي الشقه اللي مقابلتهم كان مروان يمشي ويجي بالشريف بش يرقده..ومخلي امه راقده بش ترتاح من تعبها..
بعد رقده..
حطه في مكانه وغطاه كويس وجي لمنى قعد يتحسس في جبينها وجهها بش يتأكد انها كويسه ...
بعدين تمدد حداها ورقد...
🍁🍁🍁🍁
وعدت وحده من الليالي الشتويه الهاديه..
في ظاهرها...لكن في دواخل هلبه ناس عواصف قايمه..
من الخوف..والقلق..والانتظار...
وطل يوم جديد...يحمل في طياته الكثير من المفاجآت الصادمه..
🌺في شقة سفيان..
سفيان؛مرات نعطل اليوم..
لينا:امتى تروح يعني؟.
سفيان؛بعد المغرب...نبيك بس تدعيلي حبيبي.
لينا بإبتسامه:من غير ماتوصي ربي يسهل عليك كل عسير..قريت اذكارك؟
سفيان:واني طالع توا..
لينا:راك تنساهن..
سفيان هز راسه ومشي فتح الباب وطلع..
لينا تنهدت وقالت:ربي يحفظك بحفظه..
بعدين مشت خدت صغارها ونزلت بيهم لحوش جدودهم...
ع قرب 11روحت نوريه..
وبعدها عفاف..
في الطريق..
عبدالصمد؛قصدك خوك سفيان هو اللي ماسك كل شي توا..
عفاف:ايه..
هز راسه وقعد ساكت...
لين وصلوا للحوش...
حطهم ومشي بطريقه لمحلات الحاج الشريف...
لما وصل غادي سأل عن سفيان...
قالوله انه موجود في محل البناء..
مشاله غادي...
••••••
"السلام عليكم"
سفيان وهو يشوف للحسابات...شبح للباب شافه..بعدين رجع رد عيونه للحسابات وقال:وعليكم السلام.
قدمله وجي قعمز مقابله وقال:وليت مكان الحاج..
سفيان؛شن تشوف انت..
شبحله شوبه بعدين ابتسم وقال:وما تنفعش لغيرك..
سفيان ماعلقش قعد لاهي بالحسابات وبس...
عبدالصمد:بالله بننشدك عن وضع عديلي محمد في الكويت ماشيه اموره؟
سفيان تنهد وقال؛ايه ماشيه..
ابتسم عبدالصمد ع جنب وقال:تمام...
سفيان:لو ماعندكش شي مهم جاي ع خاطره ياريت تتفضل عندي ماندير..
عبد الصمد؛لاجايك بنعطيك امانه..
قام سفيان عيونه وشبحله..
حط عبد الصمد الظرف ع الطاوله وابتسم لسفيان ابتسامه مستفزة..بعدين ناض ومشي طلع..
سفيان قعد معاه بعيونه لين طلع..بعدها شبح للظرف شويه..وخداه..
🍁🍁🍁🍁
في الحوش..
رنده كانت متكيه في دار التقعميز وسرحانه..
حداها امها مقعمزة تتفرج ع الصغار وهما يلعبوا..
وزبيده حداهم تسمع في راديوها...
وباب الدار مسكر ع الصغار بش مايطلعوش..
في دار رتيل.
كانت مقعمزة تقرا البومين اللي فاتوا ماحصلتش فرصه بسبب الزحمه وتوا غارقه في كتبها.
وفي الكوجينه..
كاالعاده منى ولينا يتعاونوا ع الغدي..
لينا:مرة مرة تخطر عليا لولا هالظروف رانا باديين نخدموا تو وهي معانا..
منى:ربي يفرج ويسهلها..
لينا:آمين..
شويه وسمعوا باب الحوش انفتح..
منى:هدا مروان روح بعمي..
لينا:وين عدى عمي ؟
منى:بادي يرفع فيه يتمشي قالوا احسن شي للي فحالته..
لينا:هو المشي بشكل عام مفيد حتى للصحيح..
منى:ايه..
"وجيهه"..
شبحوا الزوز للباب..شويه وفاتت وجيهه..
رجعوا لهوا باللي يديروا فيه..
ووجيهه خاشه هي وراجلها ومتوجهين لدارهم...
وفي هاللحظات كان الهدوء مسيطر ع الوضع لمدة عشرة دقايق..
لعند ماجت وجيهه بتخش للكوجينه..
سمعت صوت حاجه انحدفت وتكسرت..
انخلعت هي وكناينها..
منى:هدا شني...
شويه صوت دوشه ودوة...
وجيهه مشت بإتجاه الباب..
ورنده طلعت تجري من الدار بإتجاه الكوجينه وقفت فالباب وسألت بخوف:شن في؟!
لينا بقلق:مش عارفين..
•••برا....
طلعت وجيهه لحقت محبس غرس طايح متكسر وسفيان ومروان يتناقشوا بصوت عالي وفي يد سفيان حاجه يتكلم بيها...
مروان؛شفت الكلاب انت مع من بعتوه..
سفيان قعد يشبح في الفراغ وهو عاقد حواجبه بغضب ويفكر بعدين هز راسه ولف ومشي بيطلع..
مروان:وين ماشي؟! سفيان !...ومشي طلع وراه..
ووجيهه اللي واقفه تشبحلهم..مافهمت شي..
وخافت تسأل خافت اجابتهم تصدمها وهي معاش متحمله..
برغم انها عارف حتعرف توا ولابعدين..
لفت وخشت سكرت الباب وهي خايفه...
جتها رنده اللي كانت خايفه اكثر من امها وقالت:شن في يام؟
وجيهه حركت راسها يمين ويسار بعدم معرفه وهي تشبح في الفراغ وقالت:مش عارفه...
🍁🍁🍁🍁
طالعه من الكوجينه بسفره فيها طاسة يانسون..
متوجهه بيها للمربوعه وين مافي شيبانها اللي كان يعاني معدته شويه...
وين خشت سمعاته يهدرز هو وولاده..
:اني نبي نكلمه اني..عطيني رقمه جاي..
:تو اني يابوي وضحتلك كل شي بتتصل بيها انت علاش؟
:اللي قلته مش خاشلي راسي..ليش هارب قولي!؟
:قلنالك مش هارب يابوي عنده خدمه برا..
حرك راسه بعدم اقتناع وقال:ولدي ونعرفه....كانهي مراة مش كويسه راهو بان عليها كانهي مش كويسه مايصير فيه ماصار ع خاطرها منين سيباته..العمل متاعه هو اسود مش هي..هو اللي دار العار مع بنت جبريل..
ام محمد اضايقت وين جت سيرة بنت خوها..
:قصدك تقول انه متبلي عليها!؟
:لا يابوي معليشي مش لهالدرجه في النهايه هي ام بنته..
:اني قلت نبي نكلمه اني اللي نعرفه صدقه من كذبه ولدي هدا..عطيني رقمه وماترقيلي الضغط..
شبحوا لبعضهم بقلة حيله..بعدين واحد منهم قال:حاضر...وجاي بيعطيه الرقم..
فجأة..
سمعوا صوت الباب الخارجي يدق بقوة..
ام محمد:يالطيف! هدى من اللي يطق هكي..!!؟
واحد من الاولاد ناض وطلع من المربوعه باش يمشي يفتح..
ام محمد:ان شاء الله مومن..
وبو محمد كان يحاول يسمع شي وهو مترقب..
شويه ناض التاني طلع يشوف شن في..
لقي خوه واقف ع سفيان ومروان..
مشالهم..
:شن في ليش جايين!؟
سفيان وهو يحاول يتمالك اعصابه:عندنا معاكم كلام مايجيش هني..
:باهي..خشوا..
خش سفيان ووراه مروان..
وهما وراهم...
واحد منهم سبق وخش للمربوعه وقال لأمه تطلع بالسفره..
وهي طول خدتها وطلعت..
:هي خشوا..
خشوا الزوز وهما يقولوا:السلام عليكم..
رد عليهم بو محمد وهو يشبحلهم بقلق وحواجبه معقودات:وعليكم السلام..تفضلوا قعمزوا...
قعمزوا سفيان ومروان وخوت محمد..
سفيان:شن حالك ياحاج الفاسي..
:الحمد لله..شن حالكم انتم وحال سيدكم وهلكم...
سفيان:من ربي بخير..بس من العبد شر في شر..رفع الظرف وقال...شن مقصود منها الحركه هادي ياحاج!؟
واحد من خوت محمد شبح للتاني ولقاه يشبح للظرف اللي في يد سفيان..
الحاج الفاسي وهو مستغرب؛حركة شنو مافهمت!؟
نزل سفيان يده وقال:ورقة الطلاق علاش بعتوها مع نسيبنا عبدالصمد..
الفاسي شبح لولاده وهو متفاجئ وقال:كيف!؟
مروان؛يعني ولدكم لهالدرجه جبان مايقدرش يتفاهم مع الرجاله وجه لوجه!؟
الفاسي وهو يشوف لولده؛تكلم يااحمد االلي يقولوا فيه حق!؟
:ايه..الحق يابوي بعد اللي صار لانبي نشوفهم ولانعرفهم ومحمد قالي اعطيها لنسيبهم القماطي يوصلها..
ابتسم سفيان بتهكم..
مروان:اما محمد هدا اثبتلي انه مش راجل..
:ترا احترم نفسك واعرف كيف تدوي راك في حوشنا!
مروان:والله لقاعد محترم نفسي هلبه...
سفيان:شويه يامروان...شبح للفاسي وقال..قبل بنجي ومتعشم فيك انت خير ياحاج تخلي ولدك يرد البنت لأمها وطلاق اختي اني نبيه اكثر منها هي..لكن بعد اللي صار اني مضطر نلجأ للقانون وهو من بعد الله حياخد حق اختي من ولدكم اللي في يوم من الأيام قلت عليه راجل وولد اصل..وطلع.....سكت بعدين قال...ولابلاش اني في حوشكم توا..
وناض وهو يقول:هيا مروان..
الفاسي:انت كل مرة تجي تحط كلامك وتمشي..مايجي منه اسلوبك هدا.....
سفيان شبحله وقال؛صدقني ياحاج لو كنت نعرف ان الكلام ينفع راني قعمزت تكلمت معاك للصبح..
مروان؛ماتواخدنيش يعني لكن انت حتى باللي داروه ولادك. ماعندكش علم على شنو بنتفاهموا معاك
ناض واحد من خوت محمد وقال:كترتوا ع ماصوكم... شكالكم مايستاهلوا القدر الأحترام هوينا طريق الباب..
والتاني قال؛بدال ماجايين تستعرضوا عضلاتكم هني بروا دوروا ورااختكم وشوفوها شن دير من وراكم وبعدين تعالوا تكلموا مع التريس ع الرجوله..
الفاسي؛عصام!..
مروان قعديشبحله بنظرة كلها غضب وصدمه..
اما سفيان مااكتفاش بالنظر..
في لحظه زي هادي يغيبوا العقل والحكمه عن الراجل ويخلوه يتصرف بدون وعي
اندفع طول بإتجاه خو محمد ضربه بقبضة يده ع وجهه..
مروان؛لا سفيان!
ناضله خو محمد بيردله الضربه شد سفيان يده ونطحه براسه خلاه يجي مقعمز
وخوه جي بيضرب سفيان ع غفله
لكن مروان دفه عن خوه جي طايح وهويقول:خلاص ياسفيان..
الفاسي وهو يهوش بعكوزه:اطلعوا اطلعوا...ولا والله نجيب الشرطه تلكم تل..
واحد من ولاده جي بينوضلهم بوه وقفه بعكوزه...
سفيان قعد يشبح للي قال كلام غلط عن اخته بنظرات كلها غضب بعدين هز راسه وقال:هيا مروان..
ولف ومشي طلع..
ومروان وهو ماشي وراه خدي الظرف اللي كان ملوح ومشي طلع...
وخوت محمد معاهم بعيونهم اللي كانت تقدح شر..
الفاسي:الله لايربحك يامحمد ع اللي درته فيا عقاب عمري..اتصل بيه توا خوك الكلب هدا حاشى اسمه..
مسح خشمه اللي كان ينزف وقال:باهي..
ع خشة ام محمد كانت تسمع في الدوشه ووين شافت حالة ولادها خبطت بيدها ع صدرها وشهقت بصدمه
🍁🍁🍁🍁
وفي الحوش..
كانوا في حالة من الخوف والقلق..
بالذات رنده كانت حتموت من خوفه..
برغم انها مش دايرة اي شي يجرمها قدام اي حد..
بس اللي داره فيها محمد خلاها تحس انها حتكون مجرمه في عيون الكل لو طلع للعلن..
ولينا اللي كانت تعرف سرها هي وسفيان بس خافت من ردود أفعال اللي مايعرفوش خفايا المشكله...
واولهم مروان...
طول الطريق وهو يسأل في سفيان...
وسفيان يقوله نوصلوا للحوش ونحكيلك كل شي..
واول ماوصلوا خداه وركبوا هو وياه لشقته...
وهما داخل عرفوا بجيتهم وزادوا خافوا من الحركه اللي داروها وتأكدوا ان الموضوع كبير هلبه...
🍁🍁🍁
فتحت عليه باب الدار بهدوء لقاته قاعد راقد..
كانت خايفه عليه هلبه ينوض ويحس بشي من اللي صار..
ولت سكرت الباب بهدوء..
ومشت وهي تخمم في اللي صار بين ولادها..
🍁فهالوقت..
نزل مروان يجري ووراه سفيان وهو يقول:مروان..مروان اوقف مروان..
ومروان مايسمعش الا في صوت غضبه..
خش للحوش وقال:رنده..
سفيان:تمد عليها يدك نكسرها...
مروان مازال مايسمع في شي وينادي بعصبيه؛رنده..
لين وصل في الدار..
لقي امه واقفه قدامها وتقول:شن في جاي بشرك شن تبي في اختك!؟
مروان:حول من قدامي يام حولي..
وجيهه برجاء وخوف؛وطي صوتك بوك يسمعك..
سفيان شده من ذراعه وقال:مروان تعالى..
فك مروان ذراعه وقال:عاجبك ياحيوانه اللي درتيه فينا عاجبك..شفتي وين وصلتي روحك يا كلبه ووصلتينا سكرتي راسك ونزلتي روسنا..
سفيان؛مروان!
وجيهه بصدمه وعدم فهم:شن تقول انت!؟
مروان:بري اسألي بنتك تو تقولك..تو تحكيلك كيف خلت كلب مايسوا يوصل فيها وفينا ويطيح روسنا لوطا..
سفيان جبده ومروان يمشي معاه وهو ملتفت ويقول بصوت عالي:ان شاء الله ربي ياخدك ياكلبه ان شاء الله ربي ياخدك وياخد عارك معاك..
سفيان دفه قدامه وهو يقول بغضب:ضم فمك ياكلب اسكت.
وطلعه من الحوش وطلع وسكر الباب..
قعدت وجيهه تسمع فيهم يدووا برا وبعدين مروان سكت وسمعت صوتهم وهما راكبين السيارة بعدين سمعت صوت الباب كيف انفتح وتسكر...
بعدين مشت وخشت لبنتها في الدار وسكرتها..
••في الكوجينه..
منى مسحت بيدها ع وجهها وقالت:لاحول ولاقوة الا بالله..
ولينا تنهدت بخوف وقعمزت ع الكرسي..
شويه وخشوا عليهم بنتها وولدها..
جوها وشدوا في رجليها وهي رفعتهم لحضنها..
منى:خل نشوف الشريف راقد في دار رتيل..
ومشت طلعت من الكوجينه
وهي ماشيه لدار رتيل..
سمعت صوت رنده وهي تتكلم بإنفعال جاي من دار التقعميز..
"الحقير النذل كيف يتكلم ع اخته الواطي..اللي يسمعه يقول يصلوا ع طرفه يحسابني مانعرفش بعلاقته ايام مجمع العيادات وشن كان يدير معاهم في مكتبه"
ردت عليها امها وهي تقول
"شن الكلام اللي نقولي فيه هدا سكري فمك سكريه"
منى حست روحها فشلت مع بعضها...
وبدت برودة عجيبه تسلل لأطرافها..اشبه ببرودة الموت..
اللي سمعاته شبه قتلها...
وخرت عن دار رتيل وقعدت تمشي بخطوات ثقيله بإتجاه الكوجينه..
وقفت قدامها وشبحت للينا حست وكأن الدنيا تلف بيها..
لينا شبحتلها وقالت؛خيرك منى؟!
منى رمشت عيونها بسرعه وبلعت ريقها بعدين قالت:الشريف..
اشرت بسبابتها اتجاه دار رتيل وقالت؛راقد غادي ردي بالك منه..
لينا: باهي لكن انتي وين بتعدي؟!
منى وهي تحاول تتماسك:بنركب....بنركب لشقتي نرتاح شويه...
لينا شبحتلها شويه بعدين قالت:باهي عدي تريحي..
هزت منى راسها ومشت..
ولينا قعدت معاها بعيونها لين ادرقت من قدامهم بعدين شبحت لولدها وهو يقوللها "ماما"
لينا باست راسه وهي تقول:نعم ياماما نعم...
شويه وخشت عليها رنده وهي تقول وتبكي:الحقير الحقير مايعرفش اخته الحقير...
جت لشيشة الميه متاع لينا شدتها وهي ترعش وقعدت تشرب منها..
ونص الميه يتبزع عليها..
خشت عليها رتيل وهي تشوفلها بخوف ودموعها ينزلوا..
ولينا مركزة عليها كيف وجهها ولى لونه اصفر..
حطت الشيشه ع الطاوله وقالت:ماما مشت لبابا..
رتيل؛ايه ياربي مايصيرله شي..
رندة جت بتطلع بس فجأة وقفت في مكانها وطاحت من طولها...
🍁🍁🍁🍁🍁
درس السيارة قدام المستشفى وقال..
سفيان؛انزل انزل..
مروان فتح الباب ونزل وسكره بقوة ومشي بإتجاه المستشفى وهو في قمة الغضب..
خش داخله وتوجه لحجرته طول..
وين قرب يوصل فيها قال للممرضه:مادخلولي حد..
وخش وسكر الباب بقوة..
الممرضه استغربت فيه مش متعودين بيه هكي..
مشت وهي تقول:يالطيف!خيره هدا!؟
••••••
فهالوقت..
سفيان كان يسوق في السياره وهو يفور ويغلي من الغضب وين يذكر في كلام محمد يخبط بقوة ع الدومان ويغز ع سنونه من الغيظ الشديد..
فجأة رن تليفونه...
قعد يسمع فيه يرن بدون مايرد..لين فصل بعدين رجع يرن من جديد...
وقف السيارة ع تركينه...
وطلعه من جيب البالطو وشاف المتصل رد طول وقال..
سفيان:هاه لينا.............خير بلاها!!؟.............لاإله إلا الله...لاإله إلا الله...جاي جاي..وسكر طول...لوح التليفون جنبه وقال...إنا لله وإنا إليه راجعون..انا لله وإنا إليه راجعون...وتحرك طول...
وصل للحوش..
خش داخل لقي رنده راقده في الصاله وهما ملبسينها وشاح وبالطو..
سفيان بفجعه:خيرها..
لينا؛هبوط ضغط ارفعها بسرعه.
سفيان رفع اخته..
ومشي بيطلع بيها وهو يقول؛بوي فاق باللي صار!؟
لينا:لا اللاي تحاول تلهيه...
سفيان؛ربي يكون في عونها امي هادي..
لينا شبحتله بحزن..
وطلعوا من الحوش للسيارة..
ركب سفيان رنده من الخلف..ومعاها لينا بعدين ركب سفيان وطلع طول....
🍁وداخل..
الشريف:عيونكم ع الصغار مرة تانيه ياوجيهه معاش تغفلوا عنهم..
هي هزت راسها وشاده دموعها بقوة وقالت:حاضر..حاضر...
🍁والصغار حدا عمتهم والجده زبيده....
زبيده؛رفعوها..
رتيل وهي ترشف؛ايه توا..
زبيده تنهدت بحزن وقالت؛مش عارفه شن اللي قاعد يصير فينا هدا...ان شاء الله غير مش غضب بس..ان شاء الله غير مش غضب...
ورتيل قعدت تشوف للصغار كيف يلعبوا وهي تمسح في دموعها...
شويه ودق باب الحوش البراني بقوة..
رتيل:الباب!؟
ع جية امها وهي تقول:رفعوها..
رتيل؛ايه...
زبيده:الشريف استاقظ لحاجه؟
وجيهه:لالا...
رتيل:صوت الباب ولا؟
وجيهه حاولت تسمع كان الباب يدق بقوة:ايه يالطيف ياربي شن هاليوم الاحرف هدا....استغفر الله العظيم..
ومشت بسرعه طلعت تشوف مني ...
🍁🍁🍁🍁
في إحدى العيادات..
لينا وسفيان يراجو في الدكتورة تطلع من الغرفه اللي فيها رنده...
لينا مقعمزة وهو واقف حداها متكي ع الحيط و حاط بالطوه ع يده...رن تليفونه..
شبحتله..
هو شاف للتليفون مشي بيرد مد بالطوه للينا خداته وهو بعد شويه..
ورد ع الإتصال..
سفيان؛السلام عليكم حاج خليفه..كيف الحال..
"الحمد لله ياولدي..غير بنقولك ياسفيان في سيارة شرطه واقفه قدام حوشكم"
سفيان بصدمه:كيف!؟
"اني طلعت كلمتهم قالوا يدوروا فيك"..
سفيان سكت وهو يفكر..بعدين التفت شبح للينا لقاها تشوفله بقلق...
سفيان بلع ريقه وقال:جاي توا...جاي.. وسكر...
ومشي للينا وقال:واصل مشوار ضروري وجاي...
وجي بيمشي..
لينا وقفت وشدت يده وقالت:مافي شي يخوف ولا؟
ابتسم بالغصب وشد يدها وقال:تس..طبطب ع يدها بيده التانيه..بعدين طلقها ومشي..وهي واقفه تشبحله بقلق لين ادرق من قدام عيونها....
بعدين حركت عيونها لإيديها شافت البالطو وقالت:حيي طلع هكي فهالصقع!..
شويه سمعت صوت الباب انفتح التفتت..
الدكتورة طالعه وفيدها ورقة تحاليل قالت:متزوجه هي ولا؟
لينا هزت راسها بإيجاب..
الدكتورة:اللي كان معاك راجلها؟
لينا:لا خوها..
الدكتورة قعدت ساكته شويه بعدين قالت:راجلها وينه..
لينا:في ظروف صايرة منعت وجوده..
الدكتورة تنهدت وقالت:لاحظت اثار ضرب قديمه عليها بس واضحه انها ضرب واللي يضرب شكله يضرب بوحشيه..
لينا قعدت ساكته وهي مضايقه...
الدكتورة هزت راسها وقالت:واحد زيه لو قدرت تنفذ بجلدها منها ربي يحبها..بس الباين الشي هدا حيولي صعب عليها توا..
لينا شبحتلها بإستغراب..
الدكتورة....
"للأسف التحاليل بينت انها حامل"
....يتبع....
