شكولينا

الجزء الأربعون

عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
مازال صوتك في ثنايا مسمعي..
والشوق في صدري يفتت اضلعي..
والله إن الشوق فاق تحملي..
ياشوق رفقا بالفؤاد ألا تعي!
يامنيتي ان مر اسمك عابرا..
يزداد من فرط الحنين توجعي..
حاولت ان اخفي هواك وكلما
اخفيته في القلب فاضت ادمعي..
بالبين قد قضت الليالي بيننا..
لكن روحك لم تغب دوما معي...
🌺وهدا حال #شكولينا من لما سافر سفيان...
مش قادره تبطل تفكير فيه للحظه..
ومن عقلها ماتحولش اخر كلام قاله ليها قبل يسافر..
كل يوم كانت تجيها منه رساله..او مرسول شفهي عن طريق اي حد هو يتواصل معاه..
بس ماجاها منه شي..
وهي هكي كل مالها تزيد تخاف..ويزيد حزنها لأنها تتأكد ان كلامها ليها اخر مرة كان جدي مش مجرد تهويش..
او كلام قاله وخلاص...
وهي عايشه هالحاله في وسط مشبع بالكآبه..
حال رنده كان صعب جدا في الليل بالذات تقيمه بكي ع بنتها ..
وبالسيف بش تسكت مع امها..
امها اللي صحتها ولت تتراجع..وصغارها خايفين يجيها واحد من الامراض المزمنه وتقعد تعاني فيه..
🍁فهالفترة..
اخ محمد كمله موضوع الطلاق واتصل بخوه بش بيقوله انه مش حيمشيلهم هو ويبلغهم مايبيش يحتك بيهم ولايشوفهم..
ومحمد مافكرش هلبه على ماوصل للشخص المناسب اللي يوصل ورقة طلاق رنده لأهلها..
🍁🍁🍁🍁🍁
وتت الغدي اللي كانت مدايرته مشكل ومنوع..
بعدين مشت تجري تجهز في نفسها لمرواحته من العمل..
بعد كملت ساوت حتى بنتها بش مايعلق عليها ويعارك ويقول مهمله..
هدا حال عفاف من بعد اللي صار مع اختها رنده..
رجعت للي كانت عليه قبل ادور في رضاه وتحاول تمسح اللي صار...
روح للحوش...
خش وقعد يدور فيهت لين شافها طالعه من الكوجينه بسفرة الغدي..
عفاف؛روحت عبدو..
عبدالصمد:معطله اليوم قبل نخش نلقاها قدامي..
عفاف بضحكه؛ايه اليوم عطلت شويه..
هو شبحلها شويه بعدين غير عيونه عنها لبنته..
عبدالصمد؛بابا...وخداها وضمها ورفعها فوق ومشي بيغسل ايه..
وهي قعمزت تستنى..
شويه وجي هو وبنته..
نزلها وعطاها لأمها وقعمز يتغدا..
وطاح في السفرة بإيديه ورجليه..وبعد كمل ..
كعادتها تراجي تسمع منه كلمه حلوة او كلمة شكر..
لكن كل اللي تسمع فيه ومفروض تتعود عليه..
صوته وهو يتقرع..."تشجؤ"..
وينوض من حداها ويقول..ديرلنا شاهي..
وهي طبعا لازم تلبي طلباته خير مايصير فيها زي اختها..
بعد ماغسلت الماعين صبتله الشاهي ومشتله بيه.للدار..
هو كان متكي.يتفرج ع التلفزيون..
حطت حداه طاسة الشاهي قالت:وانت مروح بالبنات للمدرسه ترفعني لحوش اماليا؟
عبدالصمد:شن رايك تقعدي غادي بكل؟
عفاف بخوف:مش بايته راهو تعالى بعد صلاة العشي روح بيا..
عبدالصمد:تس..مافيش مشي لحوش اماليك لين يروح بوك..ايه حقه امتى يروح هو؟
عفاف بضيق:اخر الأسبوع الجاي..
عبدالصمد ابتسم ع جنب وقال :خلاص..نرفعك غادي تقعدي للسبت..
تنهدت وقعدت ساكته..
عبدالصمد؛ماتقلبيش خليقتك في وجههي بتقلبيها اطلعي من بحداي..
عفاف بتهكم؛مش قالبتها..وهاه..ابتسمت ابتسامه عريضه..
عبدالصمد:غير جيت نخاف من ربي بس..
غيرت وجهها عنه وقعدت تشبح للتلفزيون..
هو شبحلها شويه بعدين قال:شن دايرة اختك في الكويت؟
عقدت حواجبها وقالت:مش عارفه ليها وقت مااتصلتش..
هو شد ضحكته الساخره وقعد يشرب من الشاهي..
وهي قعدت تفكر في سؤاله حست في من وراه حاجه...وخافت لو قصة اختها طلعت...
🍁🍁🍁🍁
"مرات سؤال عادي ياعفاف يقصقص وخلاص"
عفاف:مش عارفه يانوريه سأله بطريقه غريبه..
"انتي موسوسه وخلاص..اسمعي خليه عاديه ماتخليشي يشك في شي راجلك بالذات شمايتي وبيحصلها فيك وفينا فرصه"
عفاف؛تمام...بتمشي لحوش بوي؟
"لالا اخت عزوزتي اليوم جايه وبتبات مانقدرش نمشي ونخليها.."
عفاف:وبتقعد امي بروحها؟
"معاها لينا الحق مش مخممه في شي بوجودها"
عفاف:صدقتي لينا تهني..تنهدت بعدين قالت..خلاص مانعطلش عليك بري شوفي شن وراك..
"باهي..هي بالسلامه توا"..
عفاف:بالسلامه...
🌺🌺🌺🌺
في دار التقعيز..
مقعمزة ادير لبنتها في شعرها..
لينا:شويه ماما خليك.......ايوه...خلاص..ترا نشوف..
شبحتلها بنتها..
لينا بإبتسامه:يانجي حبيبتي ياربي..
بعدين قامت عيونها لقت رنده متكيه وتشوف لياسمين ودموعها ينزلوا..
قلبها وجعها هلبه..
لينا:هي عدي لعميمه رنده وريها شعرك..
ياسمين قعدت تمرد لين وصلت في عمتها..
ابتسمت رنده من بين دموعها وقالت بنبرة باكيه:محلاها الله يبارك ع ياسي..
وضمتها وقعدت تبوس فيها ودموعها ينزلوا..
ولينا شاده دموعها بقوة ماتبش تنزلهم قدامها..
ع خشة وجيهه وهي تقول:اهيا ولدي..
قلب لينا دق بقوة عرفتها تكلم في سفيان بس من هي اللي يبي يكلمها...
زعمه هي شوقه غلبه ماقدرش يتحمل يغيب 5ايام ومايسمعش صوتها؟
وبسرعه جتها الإجابه..
وجيهه:هاك رنده سفيان..
خدت رنده التليفون وردت ع خوها..
رنده:ايوه سفيان....الحمد لله الحمد لله
شن حالك انت وبوي..شن دايرين مع الصقع اللي غادي..........................ردوا بالكم ع رواحكم واهتم بروحك عارفاتك بتلهى ببوي وتنسى روحك وانت مرضك بايخ...........ضحكت من بين دموعها وقالت...مش قصدي آسفه.................ايه ناكل......والله ناكل........حاضر بابا مش معاك؟.........اه نوم العوافي المهم حاله باهي...........الحمد لله.........لاكويسين اهو حداي ياسمينه وبحر يلعب في مع رتيل بالدراجه........لا الحمد لله مامرضوش بكل...امي راده بالها عليهم في عيونها راده بالها من لبسهم وماكلتهم...
لينا غمضت عيونها نزلتهم لوطا وابتسمت بتهكم.
رنده؛تمام وخيي............ سلم ع بابا....بالسلامه.....مدت تليفون لامها وقالت..يبيك...
خداته وجيهه وطلعت...
ولينا تنهدت بضيق..
رنده:مانشدش عليك بكل..
شبحتلها وقالت؛المهم نشد ع العويله..
رنده غيرت عيونها عنها وشبحت لياسمينه وقعدت تلعب معاها..
ع خشت وجيهه:نشد كان جانا حد ولالا؟
رنده؛في شي جديد؟
وجيهه؛لالا يسأل بس..
تنهدت رنده وقعدت ساكته..
وجيهه:اللاي...اللاي..
زبيده:اممم..
وجيهه؛نوضي بش ديري عليك المي المغرب قريب يأذن..
زبيده تنهدت وناضت قعمزت بمساعدة كنتها..
رنده:صارت هديكا تلبيسة اختها اليوم..
لينا شبحتلها..
وجيهه:ايه..ع اساس امس جتني تاخد في اذني عارفتني مش حنقوللها لا..
رنده:ماهو كان تفهم في ظروف زي هادي اعتذرت من ماليها وقالت مانقدرش نخش مناسبه واهلي هادو ظروفهم..
وجيهه:الام الام امها مفروض هي اللي قالت لبنتها مش حلوة تخشي مناسبة وعيال راجلك يمروا فهالظروف..
زبيده؛وشن حني عندنا حالة وفاة لاقدر الله!..ماعندها ليش تغيب عن مناسبة وخيتها..
رنده:شن ياحناي نسيتي عفاف لما سلفها جت طلقه في رجله مامشمتش معانا لما رفعنا بيان مروان برغم ان سلفها وقتها ليه شهر طالع من المستشفى وحاله باهي لكن امي قالتلها مايجيش تخشي مناسبه وسلفك هكي صاير فيه..
وجيهه؛نوريه اختك لما مرض شيبانها الله يرحمها وقتها مرضته مش زي مرضة بوك فيسع صح منها ماقدرتش تجي تحضر فضانية عفاف..من غير مانقوللها قالت عمي مالاش هلبه طالع من مرضة والناس تمشي وتجي مانقدرش نسيب عزوزتي وحمواتي..
رنده؛ياريت هالحظ اللي عند الناس فينا لقينا زيه..
وجيهه وهي تصب ع عزوزتها:الله غالب..
ولينا تسمع وحاسه كبدها دارهه من الكلام اللي تسمع فيه..
بس لاحظت انهم حطوا منى في راسهم وخافوا عليها يصير فيها زي ماصار لزهور..
🏵🏵🏵🏵
ومنى فهالوقت..
في حوش ماليها...
واقفه مع اختها اللي كانت جاية من المزين ومعاهم خواتها وامها..
امها؛هدا كله صار ودستيه؟
منى؛خفت يام مروان قالي ماتقوليش وانتم ردوا اطلعوا حاجه بالله عليكم..
هند:لالا ماتخافيش مانقولوا لحد..لكن سبحان الله قداش كنت حاسدتها رنده ع راجلها وقصتها معاه ونقول ياريت نحصل واحد يدير ع خاطري مادار ع خاطرها راجل..
:كله طلع وهم في النهايه..
؛نصيبك ان شاء الله حيكون خير ماتمنيتي..
امهم:لا ياسين شاب ماشاء الله عليه ولد عيله ومحترم هلبه..
ابتسمت هند..
منى بإبتسامه؛ربي يتمم ع خير ويهنيكم..
كلهم قالوا باصوات متقطعه:آمين...
🏵🏵🏵🏵
وفي نفس الليله..
كانت حفلة زهور اللي دارتها في الصاله..
طلعت غايه في الجمال وجتها حفله حلوة هلبه..
برغم تعليقات الناس عليها كيف مطلقة ودارت عرس كبير وياريتها واخده عزري...ارمل وعنده صغار..!
لكن زهور في هديكا الليله رمت الماضي كلها ورا ظهرها بعد مافشت غلها فيه...وتوا مستعده تبدا حياة جديده..
وماكانش في حد هديكا الليله اسعد من نساوين خوتها...
🌺🌺🌺🌺
وفي مكان تاني..
مقعمزة في داره ورا مكتبه..
تقرا في الروايه اللي عطهالها من فترة..
وبعد سفره بدت تقرا فيها..
جذبتها القصه..وحستها قريبه من قصتها هي وياه..
ولاحظت الشبه بين شخصيات البطل والبطل وبينهم...
الاجمل من الروايه كلها..
ابيات الشعر اللي كان يكتب فيهم سفيان ع الهوامش..
زي تعليق ع مقطع فيه البطل حس بالشوق للبطله مجرد ماغير عيونه عنها وهو يشوف لشي تاني مجبر يشوفله..
كتب سفيان..
مايرجع الطرف عنها حين أبصرها
حتى يعود الطرف اليها مشتاقا...
ابتسمت بحب وعيونها غرقوا بالدموع وهي تتخيل فيه يقوله...
بعدين سرحت بتفكيرها في حديث دار بينها وبينه قبل...
🔺️في وقت سابق...
لينا:مش هدي الهديه اللي وصلاتك يوم ذكرى ميلاد نور..
سفيان هز راسه بإيجاب..
لينا؛وليش مخليها عندك؟!
سفيان؛ماعرفتش كيف نتصرف فيها..
لينا:تقدر تبيعها تصدقها ادير بيها اي شي مش تخليها عندك..
سفيان؛الحق نسيت موضوعها بكل من يوم جت..
لينا ابتسمت بشك وهي تقول:قول الحق الحاجات تبي تحب تحفظ بيهن بش يذكرن بقداش عندك معجبات وانك مرغوب واجد..
ضحك وقال:والله ولامرة فكرت بالطريقه هادي..مش شايف روحي ناقص بش نفكر هكي..
لينا؛ناقص!؟
سفيان:ايه اللي يفكر هكي حتما عنده احساس بالنقص....وتانيا عندك مشكلة حتى فرجولته..
لينا:تو تبي تقنعني انه مايعجب فيك كثرة المعجبات والاهتمام  اللي يجيك من الجنس اللطيف
سفيان؛نهائيا..نضايق منه نحط في روحي مكان بوها ولاخوها اللي تشبح للرجاله وتلاحق فيهم وتبعتلهم في الهدايا والرسايل..لو نعرف وحده من خواتي دير هكي ندفنها..
لينا ابتسمت وقالت:مش عارفه ماأقتنعت...يعني معقوله في راجل في الدنيا مايحب الاهتمام؟
سفيان؛في اللي مكتفي ومتشبع من الاهتمام ومش محتاجه..
يعني اني جيت في عيلة اشبعتني اهتمام..
امي..حناي...خواتي..
يعني متلا نوريه اختي هادي كانت حاطتنا ع كفوف الراحات بكل معنى الكلمه..مجرد مانروحوا من القرايه..حوايجنا واتيات غدانا واتي..وقتي حوايجنا ينغسلوا..اللي بنلبسوه اليوم تاني محدد من الليل..مش هكي بس..لازم تقعمز تهدرز علينا تغير جونا وخواتها تبعوها...يعني احني ادللنا هلبه....
فبالنسبة ليا ماكنتش محتاج لاهتمام من اي نوع لإني كنت مكتفي ع الآخر..
لينا بإبتسامه وهي منسجمه:يعني محتاج وجود مراة اقربلك من هديم كلهم انت بالنسبه ليها كتاب مفتوح كل شي فيه مكشوف..يعني شقك التاني..
ابتسم وقال؛بصراحة ماكنتش نفكر في الموضوع هدا بعاطفيه هكي..يعني كنت محتاج ندير عيله وصغار كنت نبي نشبع غريزة الأبوة..والزواج عندي..زي أي مشروع في الحياة..الحب ماكانش مهم عندي ماكنتش ندور فيه بكل..
لعند ماتزوجت..واهو بنحكيلك عن تجربتي مع زهور..
تنهد وقال...زهور كانت مراة عاديه..عايش معاها حياة رتيبه روتينيه عاديه..في الاول بكل ماكانش مهم عندي يعني عادي نعيش حياة تشبه لحياة هلبه ازواج..راجل متزوج مراة تقوم بواجباته ويدير منها صغار يربيهم وخلاص..بس بعد الزواج الحياة هادي ولت زي الحبل اللي خانقني بالذات واني خديت قرار الزواج تحت الضغط وماكنتش نبيه وقتها..قعدت نسأل نفسي معقوله بنكمل حياتي مع مراة..مافيش بيني وبينها قواسم مشتركه..مراة مش قادرة نقبلها ولانحس اتجاهها بأي شي!!؟كيف بنكملها الحياة هادي!؟...صدقا وقدام ربي المراة دارت اللي عليها وزياده..بس اني ماقدرتش..ماتحرك في شي ناحيتها..ماحركت فيا شي...
لينا؛انت ظلمتها..
سفيان؛ايه ظلمتها لما خديتها من الأساس..فكرة انك تعيشي مع انسان مش قادرة تتقبليه..راهو...شن بنقولك..الحياة اللي هكي جحيم حقيقي..
لينا بأسف:للآن واجعتني..وكرهتك اكثر ع اللي درته فيها.
سفيان؛لسانك مايعرفش يدير فلتر بكل..
لينا بضحكه؛نحكيلك في شي قديم..
ابتسم برفعة حاجب وقال؛باهي والجديد شني؟!..
ابتسمت وقالت؛خلينا في المهم توا..يعني انت بعدين ولن في عندك مواصفات للمراة اللي تبي تكمل معاها حياتك.
تنهد بإبتسامه بعدين قال؛ايه بعد تزوجت زهور..اكتشفت اني نفضل المراة القويه...اللي تقدر تهزني من داخل وتحرك فيا المياه الراكده..وتقلبني قلب..ماكانش في مواصفات محدده بعينها..كنت نبي مراة تأثر فيا..وكنت نحساب روحي حنكمل عمري ومش حنلقاه..لكن سبحانه المقدر عجيب التدبير مقسم الأرزاق....حطها في قدري...خلاها بنظرة وحده من عيونها ادير فيا اللي ماقدروش يديروه غيرها هلبه ع قد ماحاولوا..
ابتسمت بخجل..
سفيان بإبتسامه:العجيب ان جابلي وحده نقيضه لمبادئي وطريقة تفكيري..وحده لو قالولي زمان انها حتكون نصيبك كنت نقوللهم مستحيل لايمكن..رفع يده لمستوى وجهه  وهو فاردها وقال..ااخ..تخيلي كنت غبي لهالدرجه..!
ضحكت..
نزل يده وهو يشوفلها بإبتسامه...بعدين قال..
كل مانشوفك نذكر بيت شعر يوصف حالتي حرفيا..
خفت ضحكتها وهي تشوفله..
سفيان...
لاالسيف يفعل بي ماانتي فاعلة
ولالقاء عدوي مثل لقياكي..
لوبات سهم من الأعداء في كبدي..
مانال مني مانالته عيناكي..
🌺ابتسمت ابتسامه حلوة وهي تشوفله..
وهو قعد يتأمل في ابتسامتها...
هي ارتبكت من نظراته ناضت وهي تقول:خلاص نعسني وبكرا في خدمه بدري..هي تصبح ع خير..
ابتسم وهو يشوفلها وقال؛وانتي من اهله...
🔺️الوقت الحاضر..
ضحكت ومسحت دموعها..
بعدين سكرت الروايه...وحطتها في درج مكتبه..
مررت نظرها ع الدار بعدين سرحت وهي تشوف لعطره اللي ع الزيانه وقالت...
الشوق نحوك سر لست احكيه
إلا إلى الليل إن الليل يخفيه..
من اجل قلبك اخشى ان أعذبه..
عاتبت قلبي حتى كدت ابكيه...
الابيات هادي لقتهم مكتوبات ع هوامش صفحات الروايه ومن كثر ماأثروا فيها حفظتهم..
💎نفسهم الأبيات اللي جي بيكتبهم وينزلهم ع حسابه في الأنستا"مستر نيوتن" هي تابع فيه..
بس في اخر لحظه تراجع ومنع نفسه..حيكون زي ماتعود ورا كلامه ومش حيرجع فيه بكل مهما دار فيه قلبه..
نزلت تليفونه ومرر نظره قدامه ع برلين...اللي كان يهواها..
تو معاش فيها زي قبل ومعاش يحس اتجاهها الشعور اللي يحسه قبل..
بعد حبها...اختصر الحب كله فيها هي ...
اي مكان في عيونه يحلى لأنها فيه ولو كان صحراء جرداء...
وهدا حال المحبين...
تنهد بحزن بعدين بدي يقول..
ناديت قلبي بحزن ثم قلت له...
يامن يبالي حبيبا....لايباليه...
بعدين ناض ومشي خش داخل وسكر باب الفيرندا متاع غرفة الفندق...
🍁🍁🍁🍁🍁
تاني يوم..
الساعه.11:00صباحا..
في الشقه وهي ترتب في دولاب سفيان..
وتتكلم بالتليفون..
لينا:تعالوا ع مرواح عمي وسفيان من السفر احسن..
"حتى انا قلت لأمال هكي..
باهي مخاويك معاد جو من بعد هديك المرة؟
لينا:بالله معاد اذكريني بيهم..يجوا لعند هنا ومايقولوا نسلموا ع اختنا!؟تعرفي حتى العويله كان مش طلعهم سفيان ماعبروهم..
"الخوت يعزوا خواتهم قدام الناس الا بختنا نحنا".
لينا:ياريتك تجي وتشوفي سفيان ومروان سلفي كيف مصبيين ورا خواتهن حتى ع الغلط...ونحنا ع الحق مالقيناهم
"الله غالب هدى بختنا..بس تعالي هنا ياهو...قتي اسم سفيان في المكالمات هدي قريب 50مرة"
لينا ابتسمت بخجل...
"هدى كله حب يابنت ولاشن اعترفي وليتي تحبيه ولا"
لينا:خيرك قصقاصه ياإنتي..
"مادامك قتيها بجعونه هكي معناها غارقه لدبابيك"
لينا بضحكه:ماعندي دبابيب ياإنتي..
"عليك صماته عندك كان بدي تصمتي..خل نحكوا جد حبتيه لونا".
لينا وهي مبتسمه بخجل:اهمم..
"الحمد لله ياربي..تصدقي يالونا انا وامال عقولنا ديما عندك ديما مشغولات عليك نقولوا كان ماقدرت تحبه كيف بتعيش هي وياه"
لينا؛باهي ليش مافكرتوا فيه هو مرات مايحبني..
"لاياحنه يحبك ويحبك واجد..في الوفاة لاحظنا هالشي كويس وخفنا نقولولك تاكلينا"
لينا ابتسمت بحب وقعدت ساكته..
"ياحنه ربي يهنيكم ويعقد عسلكم ويخليكم ماتقدروا تتنفسوا من غير بعض".
قعدت تضحك لينا...
شويه وسكرت من اختها..وكملت ترتيب دولابه..
وحطتله ماليه صوف وشال صوف وبالطو اسود..وطاقيه صوف هي شرتهم....
بعدين سكرت الدولاب..ابتسمت بتنهيده وهي متحمسه..
لأنها واخيرا حتبدا تقدم اتجاهه خطوه...
وكانت واثقه انها حتقدر ترده ليها لأنها عارفه مدى حبه ليها..
🍁بعد مانزلت من الشقه دارت طلة ع صغارها ومشت خشت للكوجينه بش يبدوا الغدي..
لقت منى متكيه بظهرها ع الرخامه وهي سرحانه..
لينا:منى..
قامت عيونها وشبتحلها..
لينا:وين سافرتي..
منى:قاعده..
لينا؛باهي احكيلي عن تلبيسه منى وهل ولد سيدي شن دارو معاهم..
ابتسمت منى وقالت:لا ماشاء الله والله رفعوا روسنا قدام ناسنا..
لينا بإبتسامه؛ايه وشن جابوا..
منى؛جابوا تعليقة ذهب وساعه وقفطان..وعبايه وزوز كنادر للقفطان والعبايه...وسبات عطور ومكياج وسبات لوشنات وكريمات والجو هدا....وبكلاوة...
ع خشة رنده وفي يدها طاسة مية وهي رافعه حاجبها وحطت الطاسه بقوة ع الطاوله بعدين مشت طلعت..
قعدوا معاها بعيونهم لين ادرقت..
بعدين شبحوا لبعض..
منى؛حسيتهم قالبين عليا حتى اللاي ترد عليا بالسيف لما نكلمها وماتبيش تشبح لوجهي..
لينا وهي تحاول ادير روحها عاديه:لاهي هكي الفترة الاخيره اللي صاير مش شويه يامنى توقعي منهم اي تصرف من غير سبب..
منى هزت راسها وقالت؛معناها خل نبدوا بالغدي يكون احسن..
لينا؛ع قولتك...
🍁🍁🍁
وقعدوا ايام قالبين ع منى ومنى بدت تلاحظ في فرق المعامله اللي ولى واضح بينها وبين لينا..
من داخلها اضايقت.....بس مابتش تبين شي....
ومع مرور ايام هالاسبوع..
رنده بدت تتعود ع وضعها..ومرة مرة تخطر عليها بنتها وتقعد تبكي....
وكل مرة في اللي صار فيها تزداد حقد وحقدها مش لاقيه في من تحطه غير في نساوين خوتها..
وهما صابرات ومتحملات..
مايقدروا يقولوا شي....
مراعيين وضعها وحالتها النفسيه.....
🌺🌺🌺🌺🌺
يوم الإربعاء..
الساعه 11:00ليلا..
كانت مقعمزة ورا مكتبه وتقرا في في نهاية الروايه اللي كانت حزينه ومات فيها البطل في النهايه بدون مايحظى بالبطله ويتزوجها...وهي كانت ناويه تعترفله بحبها وترد بالموافقه ع طلب الزواج...بس الموت سبقها...
لينا كانت بتموت بالبكي وهي تقرا وتتخيل في البطل سفيان..
وين وصلت في اخر صفحة ليها...
لقاته كاتب في النهايه..
متأكد انها اثرت فيك انك تبكي توا..
آسف...بس متأكد انه رسالتي وصلاتك..
ردي بالك تجيبهالي بعد ماكملتيها..
اني نبيها هي تجيبك ليا....
ارجوك..حاولي تخليها تجيبك مش انتي تجيبيها...
نحبك...
مسحت دموعها ورجعت تقرا في الكلام مرة تانيه ودموعها يرجعوا ينزلوا..
بعدين سكرتها وقعدت تشبح للفراغ وهي تذكر في كلامه..
《 يعلم الله اني حاولت معاك وياما تاملت وكله كان ع الفاضي..حسيت روحي هنت نفسي وذليتها هلبه واني اللي عمري ماانذليت لحد غير ربي..بس لعند هني وخلاص....》
مسحت دموعها و ناضت ومشت طلعت من الدار ومنها من الشقه..
ليلتها مارقدتش غمضه وهي تراجي امتى يجي يوم الخميس وتشوفه...
وجي يوم الخميس..
وبدت تعد في الساعات وهي تراجي في الساعه 12 بفارغ الصبر...
🍁وجت الساعه 12..ومشي مروان بيجيب بوه وخوه من المطار..
فهالوقت قدام مدرسة رتيل...
طلعت وهي تراجي في الباص ومعاها الهام..
رتيل:بابا وخويا اليوم مروحين والحوش بيزحم مش حنلحق نقرا كلمه..
الهام:عادي قدامك الجمعه والسبت...ياريتك تشوفي مبشر وهو يقرا لإمتحان المفاضله حابس روحه في داره لينا اسبوع ماريناه..
رتيل:ربي مايضيعله تعب.
ابتسمت اخته وقالت:آمين..
رتيل:فكيني من شبحاتك هادم..
ضحكت الهام..
شويه جت سيارة عاليه..
صاحبها نزل مرشها وشبح لرتيل..
رتيل:هالحيوان ياربي يموت
نزل من السيارة وقعد يشبحلها..
لين جي باصها..
مشوله بسرعه هي وصاحبتها..
وهو ركب السيارة ولحقهم طول..
الهام:تعرفي هدا ولد مني؟!
رتيل:لاومانبيش نعرف..
الهام:غير وين طاح فيك وطحتي فيه..
رتيل:وين نندري ع جده اني من حظي المتعوس...
الهام قعدت ساكته...بعدين شبحت جنبها لقاته جنبهم السيارة ويشبح لرتيل..
الهام:حدانا ويشبحلك..
رتيل:معاش تشبحيله..
وقعد وراهم لين وصلها للحوش..
بعدين مشي..
خشت للحوش وهي خايفه..
وين وصلت داخل حولت كندرتها وقالت؛مامتي..
قابلتها لينا وهي ترش في المعطر...قالت؛روحتي..
رتيل:مازال ماروحوش؟
لينا؛على جيه..
رتيل؛تمام خل نخش نبدل حوايجي..
مشت لدارها...ولينا قعدت ترش المعطر في الممر..
بعدين مشت وقفت ع مراية المدخل تشوف في شكلها ابتسمت..ومشت خشت داخل..
وشويه..
وخشت سيارة مروان للحوش..دار كلاكس..
طلعت امه ومعاها رتيل..
استقبلوا الشريف اللي كان باين انه خير من قبل..
وسفيان يشبحلهم كيف يسلموا عليه بحرارة وهو مبتسم..
جو بيخشوا ونسوه..
سفيان:كنت مسافر معاه راهو!
وجيهه:سامحني ولدي والله سهو..ومشتله تسلم..
سفيان:الله غالب عليا ماعندي من يستناني  ويستقبلني.
امه وهي تسلم عليه قالت عند وذنه:من البارح وهي تراجي مسكينه..
قلبه بدي يدق بقوة وقال:من هي!؟
بعدت وجيهه وقالت بنفاد صبر:امي..
بعدين مشت وخلاته..وهو يحاول يتجاهل اللي سمعه منها.
جاته رتيل سلمت عليه..بعدين خشوا كلهم داخل..
🌺في الكوجينه..
كانت واقفه ع نار تراجي امتى تطلع بش تشوفه وتسلم عليه.
منى بضحكه:شكلك مستاحشة هلبه..
لينا ابتسمت بخجل وقالت؛قصدك واضح لهالدرجه!؟
منى:فوق ماتتصوري..
نزلت عيونها من الخجل..
منى:شكلنا طحنا وماحدش سمى علينا..
لينا بضحكه خجوله؛باهي خلاص..
ومنى قعدت تضحك..
🏵وفي الصاله الجد لاهي بأحفاده وكالعاده واخدين عقله صغار عدنان وللأسف هالشي مخليه يدير الفرق بينهم وبين ولد عمهم اللي كان واقف يشبحلهم..
بوه كان مركز ومضايق هلبه..
اما عمه قال:شريف تعالى..
مشي الشريف يجري لعمه..
ضمه سفيان وقال:شن جو.
الشريف بنبرة طفوليه:باهي..
مسح سفيان ع شعره وقال:كبرت الغفه..
شريف:خوفه...
قعد يضحك سفيان..
الشريف الجد:غير اسمعه شن يقولوا..
وجيهه:من هو هدا بحوري وياسو..
بحر وياسمين:دادو.
ضحك سفيان وقال؛الله يبارك ..
الشريف الصغير:شدو...
جده ماركزش معاه..
سفيان؛يكلم فيك سميك يابوي.
شبحله جده.وقال؛نعم.
اشر عليه حفيده وقال:نبي..
مروان:يبيك تضبطه من لما جيت وانت مش شايفه بكل..
كلهم.شبحوا لمروان ماعدا بوه اللي قال لحفيده؛هي تعالى جدو..
جاه الشريف وضمه لحضنه..
الشريف :وين رنده وكنايني..
مروان ناض وانسحب من حداهم..
وجيهه ناضت بتانديهم..
وجيهه:اطلعي لبوك يارنده..
بعدين خشت للكوجينه واشرت بيدها لكناينها وقالت:اطلعوا..
ومشت..وهما الزوز لحقوها..
ولينا بدت تتنفس بسرعه من التوتر والشوق..
وصلوا الزوز في الصاله..
لقوا شيبانهم يسلم ع بنته..
ولينا شبحت لسفيان لقاته لاهي بالصغار..
منى:بري سلمي..
لينا خدت نفس ومشت بتسلم عليه..
ع حية رنده لخوها..
هو قعد يسلم ع اخته..
لينا اضايقت من اللقطه اللي صارت بس مشت سلمت ع شيبانيها..
رنده قعمزت مقابله خوها وقالت؛شن جو رحلتكم..
ع جية لينا بتسلم عليه مدت يدها وقالت:الحمد لله ع السلامه..
هويدوب صافحها بدون مايشبحلها ولايرد عليها وقعد يهدرز مع اخته..
هي كانت حاسه بشعور بايخ..
مش هدا اللي تخيلاته وماتوقعتش يصير هكي..
ماقدرتش تقعد مقعمزة معاهم انسحبت ومشت للكوجينه
وهو بعيونه معاها..
رنده:صقع هلبه غادي..
ابتسم مجامله وقال:اكيد.
🌺وهي فالكوجينه قعمزت ع الكرسي وهي تاخد.في انفاسها وتحاول تكون ثابته بش تمنع دموعها تنزل...
🍁🍁🍁🍁
وساعه تانيه..
وكانوا البنات واصلات برجالتهم وصغارهم...
تغدوا الرجاله بعدين روحوا وقعدوا البنات...
🍁فالصاله..
سفيان؛بتقولوا رنده روحت تقعد يومين بش تشوف بوها بنتك وين خليتها في حوش جدودها تمام..
رنده بضيق:باهي..
سفيان؛اني السبت العشيه ان شاء الله ماشي لحوش اهله نتفاهم معاهم المرة هادي...
رنده؛نبي نمشي معاك..
نوريه؛وين تمشي؟!
رنده؛بوه راجل حقاني ويعزني هو مايقدرش يغضب بوه مايقدر يأثر عليه حد الا بوه..
سفيان قال؛خل نفكر فيها قبل..
رنده هزت راسها وقالت؛زي ماتبي..
سفيان:ماشي المربوعه..
وناض ومشي من حداهم..
نوريه:هي نوضي البسي لبسه قنينه وديري حاجه ع وجهه..
رنده هزت راسها وناضت مشت لدار اختها..
نوريه:هي بسرعه بخروا الحوش العصر بيذن..
شويه وطلعت منى بالبخاره وقعدت تبخر...
نوريه طول ناضت ومشت خشت داخل..
منى"إن شاء الله معاد تطلعي.."
وبعد العصر تعبا الحوش بالعيله ...
وهالمرة لينا حاسه روحها مش طايقه شبح اساور بكل..
واساور فرحت وين شافت رنده ولصقت فيها معاش بت تخليها...
في الصاله..
رفيده جت لرنده وقالت؛خالو سفيان يبي مفتاح الشقه..
رنده:نوضي اساور مديهوله تلقيه تحت الشتنرو هداكا..
اساور ناضت وهي بطير من الفرحه..
خدت المفتاح ومشت بتطلعله..
ع طلعة لينا من الكوجينه بسفرة ضيافه..
شافت اساور لما فتحت الستار الفاصل.
بان عليها واقف يشوف في تليفونه..
بعدين ادرق بالستار لما نزلاته اساور..
شدت ع ايدين السفرة بقوة ومشت خشت للصاله..
ورنده تشبحلها...حستها شادة دموعها بالسيف..
لما كملت تفريق..
خشت اساور في يدها باكو شكولاته..
رفعاته وقالت..Guylian ياصبايا..
كلهم:اوووو..
ربيعه:شني هادي.
؛هدا نوع من ارقى انواع الشكلاطه واغلاها ياعمتي..
هنيه؛وين طحتي فيها..
اساور بضحكه:جابهالي ولد خالي هديه..
ربيعه:من ولد خالك هدا؟
اساور:سفيان ماما في حد كان مسافر غيره من ولاد خوالي..
وحده من بنات خالها قالت:خوي كان المرج..
ضحكزوا البنات..
بعدين اساور قالت:طبعا هو جابهالي اني بس اني حنفرق عليكم..
وفتحتها وبدت تفرق..
ولينا تشبح لباكو للشكلاطه واذكرت اول مرة شافاته فيها..
كان اول شي دارهولها سفيان وخلاها تكرهه..
قعدت بعيونها معاها لين وصلت فيها اساور وقالت:تفضلي..
خدت منها لينا بالسيف..
اساور بضحكه:قوليلي الفال للفرح..
لينا ابتسمت بمكابرة وقالت:الفال للفرح...
ابتسمت.اساور ومشت تكمل تفريق..
ولينا مشت للكوجينه والعيون عليها..
اول ماوصلت فيها خشت داخل لوحت الشكولاته في سطل القمامه وهي تتفكر في كلامه...
《 حتقعدي عايشه هني معززة مكرمه بصغارك كملي حياتك معاهم كيف ماتحبي..واني لما نروح حنشوف حياتي حتى اني》
نزلوا دموعها مسحتهم طول وهي في قمة الغضب والغيره..
💎اما هو..
ركب للشقة وخشلها..
وتوجه طول لداره..
لما خش وفتح الضي...فاحت عليه ريحة الياسمين...
وقعدت يدور بعيونه في دار كانت فيها لمسه حلوة هلبه..
فيها شي متغير عليه رغم انها قاعده زي ماهي.
شاف للسرير لقي ورغانه متغير..
ابتسم بإستغراب..
بعدين مشي للدولاب وفتحه بش يطلع الحوايج..
جو عيونه ع حاجات جديده مش ليه...
قعدت مركز عليه عليهم هلبه...وزاد استغرب..
معقوله تكون هي!؟!
ماهو الريحة هكي تقول...هي مافيش غيرها..
غير عيونه عن الدولاب وشبح لباقي الدار..
جو ع طاوله المكتب حسها مترتبه بطريقه مختلفه..
مشالها...وشاف ورقه.بيضا مفتوحه في الوسط..
وفي نصها كلام مكتوب..
ياصاحبي وهواك يجذبني
حتى لأحسب بيننا رحما
ماضرنا والود ملتئم
أن لايكون الشمل ملتئما...
 #شكولينا
ارتسمت ع وجهه ابتسامه دهشة كل مالها تزيد تكبر..
قام الورقه وطلع نظاراته الطبيه من جيبه ماليه ولبسهم..
ورجع قري الكلام مرة تانيه...
عقد حواجبه وهو مبتسم لما اذكر ان الابيات هادي هو كتبها ع هوامش الصفحات متاع الروايه...
رفع عيونه وهو يفكر بعدين قال:هدا وين قرتها؟!
ضحك..بعدين رجع يقرا فيها تاني...وقلبه يرقص من الفرح...
سفيان؛ياريتني هجيت من زمان...!
🌺🌺🌺🌺
ولوطا هي تسحن عليه ولو يجي قدامها توا تعطيه كف من كثر مامغلوله منه...
بعد صلاة المغرب...
روح من الجامع وتوجه طول جهة الكوجينه الخارجيه..
وقف قريب عليها ونادى..
"نوريه"...
ماطلعله حد..
"عفاف"
ماطلعله حد..
"رنده"
نفس الشي..
سكت شويه...وقعد واقف وهو شاد ابتسامته..
شويه وطلعت هي وقالت بملامح حاده وجديه:نعم..
سفيان ببرود؛ماناديتكش!
لينا:خواتك مشغولات..تبي ناديلك اساور
سفيان:مافيش باس ناديها..
لينا مررت نظرها عليه مبدل حوايجه معناها ركب للشقه..
وهو ركز عليها..
شبحتله شويه بعدين قالت؛واضح انك حاسم امرك خلاص..عموما هدى حقك وربي يهنيك..
وجت بتخش قال:ببساطه هكي؟!
لينا ودموعها في عيونها:مش انت هكي تبي..
سفيان:انتي اللي تبي هكي...
قعدت تشبحله وهي ساكته..
سفيان؛بري ناديها اساور مش هادي اللي قلتي مرة انها اصلحلي وقعدتي توجهي فيها بش تقربيها مني وتخليني ناخدها..اني قاعد ندير في اللي انتي تبيه واخترت وحده انتي اخترتيها قبلي..وببساطه في المرتين تتنازلي عن زوجك ليها..
نزلوا منها دموعها وهي تقول:انت تخليت؟!
سفيان :اطلاقا..
لينا:باهي ليش ادير هكي..
قعد ساكت..
"لينا كانت هني"
لينا وهي تستعجل فيه:امشي برا..برا..
سفيان:لا..
لينا:والله لو طلعت وكلمتها نمسحك من حياتي مسح..
سفيان بإستفزاز:قصدك اني موجود بش تمسحيني ولاتخليني..
لينا؛بلاش..استفزاز..
"لينا انتي برا"
لينا دموعها نزلوا وهي تقول؛كان طلعت بنضربها ماتخلنيش ندير شي نندم عليه..
سفيان ضحك..
لينا:قتلك عدي.
سفيان؛تمام ماشي لكن بعدين لينا هدرزة طويله في الشقة عن الروايه..
لينا وهي شادة ابتسامتها:باهي عدي..
ضحك ومشي خطوة للخلف بعدين لف بيمشي...
ع طلعة اساور:انتي هني..
لينا خدتها من ذراعها وقالت:ورانا عشي هي تعالي..
وجبدتها وخشت داخل وسكرت الباب...

#سبحان_الله_وبحمده

...يتبع....