لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
في جنان حوش الحاج الشريف..
نوريه:بالله قولوا لسفيان يرفع الولاد ويجيبهم للجامع اللي حدانا..
الشريف:بإذن الله..حتى اني نرفعهم في طريقي واني ماشي..
نوريه:يطول في عمرك وبيي.
وجيهه:ماتخافيش بنتي ولاتخممي مش اول مرة تخلي الصغار وتسافري..
تنهدت نوريه وهزت راسها بإيجاب..
"هيا نوريه"..
رنده:هي بالسلامه حبيبي..
وسلموا ع بعض بالأحضان..
نوريه:بالسلامه..
بعدت عنها رنده وهي تقول:توصلوا سالمين..
نوريه:آمين..
مشت لأمها سلمت عليها وبعدين بوها..
نوريه:هي بالسلامه..
ولفت ومشت بتطلع وبوها وراها..
رنده لفت ومشت بتخش وهي تقول:ان شاء الله ماتستاقظش...
ووجيهه قعدت واقفه تراجي في راجلها يخش..
شويه وخش الشريف وسكر الباب وجي لوجيهه وهو يقول:تمشي وتجي سالمه بإذن الله..
وجيهه:ويعطيها ربي ماتتمنى..
الشريف:آن شاء الله..هي توا اني مولي للسوق ماتبو شي..
وجيهه:سلامتك بس..
الشريف هز راسه ومشي طلع من الحوش..
ووجيهه قعدت ترتبت في الكراسي والطاوله..سمعت صوت سيارة راجلها تحركت..
بعدين مشت بتخش..
وين وصلت في الباب سمعت صوت سيارة درست قدام الباب..
قعدت تشبح للباب..
شويه سمعت صوت باب سيارة تسكر..وسمعت صوت خطوات لين شافت رجلين من تحت الباب..وسمعت باب الحوش دق..
عقدت حواجبها وقالت؛مني؟!
"اني محمد ياعمتي"..
مشت بإتجاه الباب..وصلت فيه وفتحت الباب وهي تقول:مرحبتين ولدي..تفضل..
خش محمد وهو يقول:يزيد فضلك عمتي شن حالك وحال عمي والحاجه زبيده..
وجيهه:الحمد لله في خيار الخير..شن حال بوك وامك والعويله..
محمد:الحمدلله..
وجيهه:خش ولدي خش..وسكرت الباب..
ومحمد مشي خش داخل ووجيهه معاه..
دخلاته للمربوعه...بعدين خشت لبنتها داخل..
كانت في الصاله..
مع الحاجه زبيده..ورتيل وصغار نوريه وصغار لينا وولد مروان وبنتها..
خشت عليهم وجيهه وقالت؛رنده راجلك جي..
رنده شبحت لامها بنظرات وحدة مفزوعه..
وجيهه؛سمعتيني قتلك راجلك جي..
رنده عقدت حواجبها بغضب وناضت خشت داخل..
كلهم استغربوا فيها..وامها لحقتها طول...
في دار رتيل..
خشت رنده وجت.بتسكر الباب امها دفت الباب وخشت وراها تقول:شن في!؟
رنده ودموعها ينزلوا:توا تتصلي بواحد من خوتي يجي توا..
وجيهه؛خيرك ياغبارتي السودا!؟
رنده بعصبيه:كلمي واحد من خوتي يام قبل توا توا..
وجيهه وهي خايفه:باهي باهي..ومشت طلعت من حداها وهي تقول...يارب سترك وعفوك ياربي..
•••••••
فهالوقت...
كان سفيان مقعمز في المكتب بروحه وهو يقرا في القرآن من تطبيق على الهاتف...
شويه جاه اتصال..وكان من امه رد عليه طول.
سفيان:ايوه يام..
"وليدي كان ماعندك شي تعالى للحوش"
سفيان بقلق:علاش الصغار فيهم حاجه؟!.
"لالا مش الصغار...طلع عندك حق رنده صاير معاها شي"
سفيان بشي من الانفعال:مش قتلك يام....خيرها؟!
"مابتش تتكلم..توا راجلها جي وهي قالتلي توا اتصلي بواحد من خوتي يجي"
سفيان هز راسه وقال:تمام تمام....عن اذنك يام..وسكر عليها واتصل بلينا...
••••••
لينا وهي واقفه مع الدكتورة تسمع وحده من الحالات..
رن تليفونها..طلعاته من جيب البالطو..شافت المتصل استغربت ماتعودتش يتصل بيها وقت الدوام..
لينا؛عن اذنك دكتورة.
اماني:تفضلي..
مشت لينا طلعت من الحجره وردت..
لينا:السلام عليكم..
"وعليكم السلام لينا..جايك توا"
لينا:علاش صايره حاجه..!؟
"تو لما نوصل تقولك"
لينا بخوف:عويلتي صاير فيهم شي؟!
"لالا مش الصغار شي تاني ربع ساعه ونكون عندك"
لينا؛نرجى فيك..سكرت لينا وخشت للدكتورة..
🏵🏵🏵🏵🏵
"غير كان تقوليلي شن صاير بس"
رنده ودموعها ينزلوا:مش متكلمه لين يجوا خوتي..
وجيهه:لاإله الاالله..!يابنت خلتيني نرعش مع بعضي..
رنده؛يام شن تبيني نقولك انه كلب ومسخ ومايسوى وعيلته عيلة حقيره..
وجيهه بصدمه:كيف..!؟
رنده:لما يجوا خوتي تو نحكي كل شي..
وجيه خبطت ع فخادها وقالت بصدمه...لاحول ولاقوة الابالله..!
••في الكوجينه..
منى:والله مانعرف حاجه يامروان..اللي نعرفه قتلك عليه..
"زبطتها اني من امس لما قلتلها راجلك يتصل وقال ماتردش وجهها انقلب"
منى:إن شاء الله خير وخلاص..
🏵🏵🏵🏵
درس السيارة قدام المستشفى..
وهي جاته بسرعه وركبت..
لينا:السلام عليكم..
سفيان بضيق:وعليكم السلام..وتحرك طول..
لينا؛إن شاء الله خير..والله من كلمتني وعقلي مشغول..
سفيان؛مش باينه خير يالينا..نرقعوا من تركينه تنشرك من تركينه تانيه..
لينا:رنده؟
هز سفيان راسه بإيجاب..
لينا شبحت القدام وقالت بأسف:لاحول ولاقوة الابالله..
ومن بعدها قعدوا طول الطريق ساكتين..
وكل حد فيهم يخمم..
لين وصلوا للحوش..
درس سفيان وقال:بري جيهة الكوجينه طول.
لينا:حاضر..
نزلت من السيارة ومشت طول..
وهو نزل...
غ خشة مروان بروحه من غير سيارته..
مروان؛ان شاء الله خير!..
اشرله سفيان يخشوا داخل..
مشي ومروان لحقه...
••سفيان:خش لمحمد واني ماشي نشوفها..
مروان هز راسه وخش للمربوعه..
وسفيان خش للحوش..
بعد ماوصل للصاله قابلاته امه..
وجيهه:تعالى..
ومشي هو وياها بإتجاه دار رتيل..
خطموا من قدام الكوجينه وشافوهم منى ولينا..
منى:شكله اللي صاير شي كبير بش نادت خوتها..
لينا بقلق:ربي يستر...
••في دار رتيل..
رنده ببكي:من الاخير اني نبي الطلاق..
سفيان وامها انصدموا..
سفيان:علاش شن اللي صاير لهدا كله!؟
رنده قامت تليفونها وقالت؛سامحني خوي بس لازم تشوف وتعرف..
سفيان شبح لأمه وامه شبحتله بعدين شبحولها الزوز..
مدت رنده التليفون لخوها..
خداه وشاف شن فيه ارتسمت ع وجهه ملامح عدم الاستيعاب..
رنده:فوت الصور وشوف عقاب الخير..
قعدت سفيان يمرر في الصور وهو مش مصدق ان هدا محمد اللي يعزه ويحترمه..
رنده:اقرا المحادثات..
سفيان قعد يقرا وارتسمت ع وجهه ملامح القرف..بعدين نزل التليفون ومشي فتح الباب وطلع..
وجيهه:صور شني هادم.!
رنده وهي مغيره عيونها عن امها استحياءا؛الكلب داير علاقه هو ووحده مسخه تقربله..
وجيهه؛نهاره احرش!!
••••••
فهالوقت..
وصل سفيان في المربوعه وخش...
ناضله محمد بيسلم عليه..
وسفيان بغضب قال:خليك في مكان..
محمد استغرب بعدين شبح لمروان..
ومروان.يشبح لسفيان ويبي يعرف شن في..
سفيان مشاله ومدله التليفون وهو يشوف لمحمد بإزدراء..
خدي مروان التليفون..
سفيان:فوت الصور..
ومروان يتفرج وهو مصدوم..
ومحمد يشوفلهم ووجهه انخطف لونه ومن الخوف قعد يبلع في ريقه..
قام عيونه مروان وشبحله بنظرات كلها غضب.
محمد وهو يمرر في نظره عليهم:شن في ياجماعه!!؟
سفيان :ترا هات مروان..
مروان مدله الهاتف خداه وهو يقول:تعرفه تليفون من هدا!؟
قعد يشبح محمد للتليفون وقال:تليفون رنده..
مدله التليفون وقاله:تفضل شوف شن جاه عليه..
خداه محمد وشاف شن فيه...قريب انشل من الصدمه..
سفيان:خسارة ماكنت نحسابك راجل..
ع خشة رنده وهي تقول بإنفعال:مش هكي وبس..كان يضرب فيا حتى الضرب..
خوتها انصدموا..
وهو يشوفلها ويرعش ودموعه في عيونه..
رنده بدموع:ضرب موت...قامت كمها وورتهم ذراعها وقالت...هاه شوفوا..
خوتها زادو انصدموا لما شافوا العلامه ع ذراعها..
رنده؛ع كم مره نحساب روحي بنموت..ولفت رقبتها ورتهم علامه تانيه هي تقول..شوفوا شوفوا..قداش صبرت وتحملت..كان وين يضربني ياخد مني تليفوني ويحبسني في الشقه باليومين بالثلاته... هدا غير ماليه ومعاملتهم الحقيره..
محمد بعصبيه:كذابه..
سفيان بإنفعال:ضم فمك..وانتي اطلعي..تحركي اطلعي وسكري الباب..
رنده مشت طلعت وسكرت الباب..
محمد؛كذب مافيش منه كلامها كذابه..
سفيان؛ومازال ليك عين تدوي انت..وقدمله بيضربه.
جي بيناتهم مروان:لاسفيان..لا..
سفيان يشبح لمحمد بحقد وغضب قاله:امشي اطلع برا..اطلع ياواطي اطلع..
محمد ناض بيطلع وهو يقول:نتواجهوا..
التفتله مروان جبد منه تليفون وقال:برا ادردح..
محمد شبحله بحقد بعدين مشي وهو يقول:نتواجهوا..نتواجهو...
ومشي طلع من المربوعه..
سفيان؛وسخ واطي...
مروان بتهكم:اللي تحسابه موسى يطلع فرعون..
••وداخل رنده في دار التقعميز كانت تبكي بعبرتها وامها واختها قلوبهم متقطعه عليها..
بينما في الصالة..
كانوا لينا ومنى حدا الصغار..
لينا؛استغفر الله حتى الظهر فاتني وماصليته والله خايفه نعدي للحمام ..
منى:اركبي لشقتك..
لينا؛سفيان يبيني نقعد هنى..
تنهدت منى وسكتت..
"منى"..
حولت منى ولدها من حجرها وهو لاهي بتليفونه وناضتله بسرعه..
ولينا معاها بعيونها وهي متوترة..
شويه وخش سفيان ماشي للدار..وهي تشوفله..
لين ادرق من قدام عيونها وسمعت باب الدار انفتح وتسكر..
لينا تنهدت وقالت:لطفك يارب..
ع جية منى قالت؛هي نوضي نطيبوا الغدي كلمهم توا عمي وقال جايب معاه جماعه ع الغدي..
لينا؛خل نحط بحر وياسمينه في الحباس ونجيك..
منى هزت راسها ومشت للكوجينه..
ولينا حطت الصغار في حباسهم..
بعدين مشت تجري للحمام..يدوب لحقت توضت وطلعت صلت الظهر في الصاله بعدين مشت للكوجينه..
وهدا كله وسفيان داخل يسمع من رنده اللي صار معاها بالتفصيل..
سفيان وهو معصب:اللوم الكبير عليك انتي اللي قاعده ساكته..سكوتك خلاه يتمادى..
وجيهه؛كيف تسكتي عليه مش عارفه!؟ كان لاقدر الله ضربك قتلك ولادارلك عاهة..
رنده ببكي:مانبي حد يتشمت فيا يام ويقولوا اطلقت من اول سنه..
سفيان:كان صارت فيك حاجه في شن ينفعك الكلام هدا..
قعدت تبكي بصمت..
سفيان تنهد وقال:لاحول ولاقوة الا بالله..المهم انتي توا خلاص تبي الطلاق..
رنده؛ومانبيش غيره..
سفيان؛وهدا الصح..ماتخممي في حد ولادوري كلام حد قاعده في حوش بوك معززة مكرمه وحني معاك..
رنده؛ربي مايحرمني منكم..بس بالله عليكم ماتقولوا شي لنساوينكم مانبي حد يعرف الا بعد مانطلق رسمي..
سفيان هز راسه بإيجاب وفتح الباب وطلع..
رنده بعد ماطلع خوها انهارت بالبكي..
وامها جتها ضمتها وهي تقول:الله لايربحه الله يسامحه...خلاص بنتي خلاص..
ورتيل وهي مرقده ميرال بنت رنده في.حضنها كانت تشبح لأختها بحزن..
واللي صار كله نساها النتيجه ومايجي منها..
🏵🏵🏵🏵🏵
بعد ماجي الحاج الشريف بضيوفه واكرمهم كعادته..
ماحد لمحله حتى تلميح ع اللي صار...لبعد ماروحوا الضيوف..
قعمزوا سفيان ومروان وحكوله..
الشريف وهو مصدوم:محمد يطلع منه هدا كله!؟
سفيان:سبحان الله كيف المظاهر خداعه..
الشريف اللي اضايق هلبه من اللي سمعه..حط يده ع راسه وقعد يغمض في عيونه ويفتح فيهم..
مروان وسفيان بخوف:بوي!
الشريف:شكله الضغط رقي.
مروان؛جهاز القياس في الشقه..شويه نجيبه وجاي..
سفيان:لا خليك لينا مخليه واحد هني..
ومشي طلع من المربوعه..
وصل في الممر ونادى..
"لينا"
شويه وجاته وهي تقول:نعم..
سفيان :ترا جيبي جهاز قياس الضغط بسرعه..
لينا:حاضر..
ومشت بسرعه..وهو قعد واقف يستني..
لين جاته لينا بيه خداه منها ومشي وهي لحقاته..
خشوا الزوز للمربوعه..
سفيان؛هاك..
خدي منه مروان الجهاز وبدي يلبس فيه لبوه..
ولينا تشبح لعمها بقلق..
مروان بدي يقيس لبوه في الضغط شويه وقال:راقي..
لينا:واخد دواك عمي؟!
شبحولها راجلها وسلفها..
الشريف هز راسه بإيجاب.
لينا:باهي راجي شوي نجيبلك كركديه يعدل الضغط..
ومشت طلعت بسرعه...
سفيان قعد معاها بعيونه لين.طلعت..بعدين شبح لبوه وقال؛اهدا بوي حاول تهدا...هي مش اول ولاأخر وحده يصير معاها هكي..واهو الحمد لله اللي عرفنا شن صاير قبل فوات الأوان..
مروان؛في النهايه كله يفوت يابوي المهم صحتك...
ع خشة لينا بالطاسه جت لعمها ومدتهاله وقالت:جداي زبيده يوميا تشرب منه هو اللي معدل ضغطها..سمي بالله واشرب..
خدي منها الشريف الطاسه وبدي يشرب..
ولينا قالت لراجلها :خليه يشربها كلها...
هز سفيان راسه بإيجاب..وهي قالت؛لاباس عليك عمي..
ومشت طلعت..
الشريف:لايوريك باس بنتي..وقعد يشرب في الكركديه..
وولاده يشبحوله وهما مضايقين وكلهم خوف عليه...
🏵🏵🏵🏵
الساعه 5:30عصرا..
كانت لينا ترقد في صغارها في الصاله..
خشت عليها رتيل وقاالت:لينا..
لينا:نعم..
رتيل قعمزت حداها وقالت:نجحت..
لينا بإبتسامه فرح:مبارك...وسلمت عليها بالخد..
ورتيل مبتسمه وهي تقول:الله يبارك فيك..
لينا بعدت وقالت:شن تقديرك؟!
رتيل:89% ممتاز..
لينا:ماشاء الله ماشاء الله الله يبارك..
ضحكت رتيل وقالت:كلمة سفيان..
لينا ضحكت بخجل وقالت:من عاشر قوما...المهم توا قوليلي خبرتيهم..
رتيل بضيق:تس..حسيتها بايخه وبعدين من بيلهى بيا بش يفرحلي..
تنهدت لينا وابتسمت بأسف وقعدت ساكته وهي تشوف لرتيل كيف مضايقه ودموعها في عيونها..
لينا؛خل يعدوا هالأيام ع خير وبإذن الله نديرولك حفله تستاهلك..
ابتسمت رتيل وقالت:ان شاء الله..
🏵🏵🏵🏵🏵
"عطيه مايرفعه الحقير!"
وجيهه؛ايه والله...تو انتم.ماكنتوا تعرفوا شي اختكم ماحكت شي!!؟
"لا والله يام ماحكتلنا حاجه..اني قاعده مصدومه لتوا ومش مصدقه.."
وجيهه بضيق:لاحول ولاقوة الابالله..باهي المهم توا بنتي ردي بالك تطلع منك لحد حاجه..
"لالا يام لمن بنقول يعني مافي حد حيسمع مني شي"
وجيهه:ايوه حني توا بنسكتوا ع اللي صار..لين نشوفوا بعدين شن يصير..
"ان شاء الله خير يارب"
وجيهه بحزن:ان شاء الله...
🏵🏵🏵🏵
الساعه 7:00مساءا..
في الجنان من جهة الكوجينه..
الشريف الصغير يلعبوا معاه ولاد نوريه بالكورة..
وصغار لينا يجروا بجراياتهم..
ولينا مقعمزة ع حصيرة وحداها رتيل وقدامها نور اديرلها في شعرها..
نور:حقه شعرك طويل هلبه..ماشفتاش كله شعرك..
لينا.بضحكه:ايه طويل تو نوريهلك بعدين لما نخشوا..
نور:ردي بالك تقصيه بش خالو مايعارككش..
ضحكوا لينا ورتيل..
شويه وجاها الشريف ولد نوريه وقال؛مرت خالي كلمتي خالي؟
لينا:اييه..والله نسيت..
رتيل:اهو جي بروحه..
شبحتله لينا لقاته جاي وهو يشبح للصغار..
بعدين وصل فيهم وقال؛في حد مقعمز حداكم؟
رتيل:منى راقده داخل..
تنهد سفيان وحول من رجليه وقعمز حداهم ولينا مركزه ع ملامح الضيق اللي ع وجهه..
لينا؛رتوله نجحت ممتاز..
ابتسم وشبح لرتيل..حط يده ع راسها وقال:مبارك..
رتيل بإبتسامه:الله يبارك فيك..
الشريف:مرت خالي..
شبحوله..
بعدين لينا شبحت لسفيان وقال؛الشريف ومؤيد يقرا في الجامع اللي قريب من هنى والحلقه تبدا بعد صلاة المغرب وانت ماشي ارفعهم في طريقك..
سفيان؛وخيرك ماجيتش قتلي طول!؟
الشريف:قلت بالك تقول لا نعرف ماعندكش خلوق دخلت عامل مؤثر..
ضحكوا رتيل ولينا بصدمه..
سفيان بضحكه دهشه؛عامل شني ياسفتول؟!..
الشريف وهو مبتسم :تي غير هيا شن قلت؟..
سفيان:مافيش قعمز انت وياه..
الشريف:مرت خالي..
لينا:سفيان..
سفيان:باهي بروا وتوا ارواحكم..
الشريف؛منورة بالهلبه مرت خالي..
قعدزوا يضحكوا..
وسفيان يفنص فيه وهو شاد ضحكته..
الشريف هرب منه وهو يقول:تعالى مؤيد ..ومشي خش داخل..وخوه وراه..
سفيان:مش عارف اني الاجيال هادي كيف تركيبتها!؟
ورتيل شاده ضحكتها..
سفيان.شبحلها وقال:شن قاعده اديري هني..هي نوضي خودي الصغار وخشوا داخل..
رتيل بلعت ضحكتها وقالت:حاضر...هيا نور هيا شيرو..
ناضت نور مشت مع خالتها..ومعاهم.الشريف اللي كان يسمع في كلام رتيل..
رتيل:بنخليهم هادم..
سفيان:خليهم..
رتيل مشت وخشت بنور والشريف..
ولينا بعد ماكانت تشبحلها شبحت لسفيان وقالت:وجعتني فرحتها ناقصه..
سفيان تنهد وقال:والله ماني عارف شن قاعد يصير مع خواتي حتى نوريه نحس فيها مش تمام..
لينا؛المشاكل في كل مكان ياسفيان هالبيوت المسكره ياما داسه..
سفيان:ايه مزبوط..بس اللي حاز في نفسي المكانه اللي كنت عاطيها لهالكلب حاشا اسمه...مش عارف كيف انخدعت فيه.
لينا:برغم اني مش عارفه شن صاير ولانبي نعرف...بس فعلا المظاهر خداعه..تخليك تحكم ع اشخاص غلط..يكون شخص سيء وظاهر اصلح الصالحين..وواحد ظاهره سيء بش من داخل مافيش انظف من قلبه..
ابتسم وهو يشوفلها.
لينا بإبتسامه متسائله:خيرك!؟
سفيان:تقصديني بكلامك الاخير ولا..حتى لو ماكنتيش تقصديني اكذبي وقولي ايه..اجبري بخاطرك جبر الله خاطرك.
ضحكت لينا وقال:من غير كذب..اها نقصدك..
سفيان ضحك بعدين تنهد وقال:نضحك بالسيف..حاسه في شي غام عليا هني كاتم ع صدري..وحط يده ع صدره..
لينا شبحتله شويه بعدين قربت منه شويه...
حولت يده وحطت يدها...وبدت تقرا في سورة الفاتحه..
هو قعد يشبحلها ويسمع في صوتها وهي تقرا...
وتلقائيا صدره انشرح والغمه راحت...
🍁وهادي وحده من اجمل التقاربات اللي تصير بين الزوجين...في حالة المرض او التعب النفسي..يرقي واحد منهم التاني وفي السنه النبويه هالشي موجوده...
وياه ع قوة التقارب والموده اللي يزيدوا يكبروا في الحاله هادي🍁
حولت يدها وشبحتله وقالت:هاه شنو؟
هو قعد يشبح لعيونها بإبتسامه..بعدين حط يده ورا راسها وقربه ليه وطبع عليه قبله...حب وود واحترام وامتنان كبير..ليها ولكل شي حلو قاعد يصير معاها بسبها..
هي كانت مصدومه في الحركه..وحست بمشاعرها كلها تحركت مع بعض..
توتر...خوف...دهشه...وشعور تاني حلو هلبه..
ع طلعة ولاد نوريه..
االشريف :هيا ياخال..
لينا من الاحراج ناضت بسرعه ومشت لصغارها وهي تقول:هيا ماماتي مغاريب هيا نخشوا..
سفيان قعد يضحك وهو يشبح لحالتها بعدين شبح لصغار اخته لقاهم يشبحولها بنظرات غريبه وابتسامات مريبه..
بدل ضحكته بملامح الجديه وقال:تحرك للسيارة انت وياه..
هما مشوا يجروا ويضحكوا..
وهو ناض ومشي وراهم..
ولينا وهي خاشه بالصغار داخل..شبحتله بإبتسامه بعدين خشت..
🏵🏵🏵🏵
ومرت باقي ساعات اليوم..
ورنده اللي كانت كاتمته طول هالأيام طلع..
شادتها بكي وخلاص..وفجأه معاش ولت طايقه بنتها وين تجيها تبكي تلز فيها وتقول طلعوها من حداي..
والبنيه تقعد تبكي بقوة وتعبت معاها حناها ع ماقدرت ترقدها..
والجده زبيده كانت مع ولدها اللي كان تعبان من اللي صاير مابتش تخليه..ع كبر سنها وحاجتها للنوم لكن قعدت ساهره حدا ولدها...
🏵وفي شقق الولاد..
مروان:تطلع منك حاجه يامنى تشوفي شي عمرك ماشفتيه..
منى:يالطيف لمن بنقول يعني!؟
مروان رفع حاجبه وقال:لماليك.
منى بإمتعاض:تريح مانيش مقايله لحد حتى لروحي..
مروان:ايوه..هدا اللي نبيه..
🌺🌺🌺🌺
اما في شقة سفيان..
فلأنه كان تاعب من اللي صار اليوم رقد بكري..
وقعدت لينا ساهره تقرا في سورة البقرة في الصاله لين كملتها..
وبدون ماتحس ع روحها في الصاله ع الكنبه..
وهالنومه...شافت فيها منام...
وكأنها راكبه حصان وفرحانه بيه...
بس كانت في افعى تزحف بإتجاه هالحصان بسرعه..
وقبل ماتوصل فيه..
هي فاقت من النوم مفزوعه..
حطت يدهاع صدرها وقعدت تتعوذ من الشيطان..
وصدرها كان مغموم..
ناضت من مكانها ومشت لداره..
بنيت راسه وقعدت تشبحله كيف راقد..
قلبها كان يرف من الخوف...تفسير الحلم كان واضح هلبه يخصه هو..
مشت وخلاته وهي تخمم..والنوم جفاها..
قررت تتوضا وتصلي القيام في وقت ابكر من اللي تعودت عليه..
وكانت في كل سجده تدعي لسفيان قلبها...
"اللهم اني استودعك سفيان وين مايكون ياربي...ياربي ادفع بقوتك وحولك كل شي يضره وكل شر يمسه وكل من فيه شر وناويله على شر ياربي...لاحول ولاقوة الا بك ياعلي ياعظيم"..
🌺وبعد ماكملت الصلاة...
قعدت تستغفر...لين غلبها النوم مرة ورقدت ع الصلايه من غير ماتحس..
وفي هالغفوة...شافت منام..
كانت تسمع فيه حد يقرا..
[وإذ قال لهم موسى ان الله يأمركم ان تذبحوا بقرة..]
لعند اخر آيه في قصة بقرة بني إسرائيل..
خش ع هالصوت صوته هو...
"لينا...لينا..."
فتحت عيونها..
سفيان:لينا خيرك راقده هني!؟..
ناضت قعمزت وهي تشبحله..
سفيان:بحر ناض ونوض اخته شكله يبي يرضع..
لينا شبحت يسارها جهة الدار..
بعدين ناضت...ومشتلهم..
وهو تنهد ومشي للحمام..
بعد مادراتلهم مراضعهم ورضعتهم ورقدوا..
طلعت من دارها وتوجهت لداره...وقفت قدامها..
لقاته مقعمز ورا طاوله المكتب فاتح المصحف ويقرا..
بهدوء وبدون مايحس عليها خشت وقعمزت ع سريره..
وقعدت تسمع فيه وهو يقرا...
وتشبحله وتفكر في الحلم...
شوية وآذن الفجر..هو سكر المصحف وحطه ع الطاوله..
وناض بيبدل..اتفاجى لما شافها.
لينا ابتسمت وقال:باهي اللي ماشي ع الوعد.
سفيان ابتسم وقال:وعد هدا مش لعب..
وقفت وقالت:باهي عندي ليك رجاء كان ليا حق في نفسك مكانه...اقرا سورة البقرة مع الختم..ان شاء الله حتى صفحتين في اليوم..واذكارك ماتغفلش عنهم..
سفيان بإبتسامة استغراب:تمام بس ليش انتي محرصه لهالدرجه..
لينا رفعت كتافها ونزلتهم وقالت بإبتسامه:خايفه عليك هي هدي...ومشت وطلعت من حداه..
وهو غمض عيونه وضحك بعدين تنهد وفتحهم وقال:هي هدي صار.!... رفع عيونه فوق وقال...رحماك ربي بقلب عبدك..
بعدين نزل عيونه وهو يتنهد ومشي للدولاب بيطلع حوايجه..
🏵🏵🏵🏵🏵
الساعه 12:40قبل الظهر..
"قالتلي عليها اختي مفيده قبل"
:ايه نعرفها هادي وحده خدمتها مضمونه ميه ميه..انتي لمن تبيها تخدملك..
زهور:طليقي.
:بس انتي توا بتتزوجي سيد سيده ليش مازال ادوري فيه!؟
زهوربحقد:قلبي مغلول منه ياصباح كبدي عليه دم..
:باهي انتي شن تبي ديريله بالزبط
زهور:نبيه يضيع عقله..يولي مهبول يدور في الشوارع نبيه يموت ابشع موته..
:ووك ما مغلوله منه..
زهور؛ع اللي داره فيا يستاهل اكثر من هكي..
:باهي المهم عندك حاجه من اثره..
؛ايه طاقيه كان يحب يلبسها هلبه زمان وقاعده زي ماهي لاغسلتها ولادرتلها شي..
:كويس بكل..معناها اسبوع الجاي ناخدلك موعد ونمشولها...
زهور:خلاص بيناتنا تليفون..وبيناتنا الدوة ياصباح.
؛سرك في بير غريق..
زهور:باهي بري كملي خدمتك..
:حاضر..
ومشت من حداها...
وزهور سرحت بتفكيره الحاقد اللي عمي بصيرته وهي تتخيل في حال سفيان بعد ماتنتقم منه...
🌺🌺🌺🌺🌺
"حرام والله حرام البنيه توجع"
وجيهه وهي تبكي:شن بديرلها يابنتي تشبحي في امها كيف..
ومنى تمشي وتجي بميرال اللي كانت تبكي بقوة تحاول تسكتها..
زبيده:شن اللي كرهها في البنت هكي!
وجيهه؛مقهورة من وباها عطيه وبيه..
لينا:وشن ذنبها البنيه مسكينه هي حتى ماتعرف اللي صاير بينهم..
ع طلعة رنده وهي تقول بإنفعال:انتي بالذات تسكري فمك مانبيكش تتكلمي عليا ولاتتدخلي فيا فاهمه..
لينا شبحت لعزوزتها..
رنده:ماناقصني كان انتي..
وجيهه:خلاص يارنده ..
رنده؛لا مش خلاص..اني هالبنادمه نكرهها في الدم من نهار جتنا ماريناش خير وحني من مصيبه لمصيبه ابديها بموت عدنان لعند اللي صار معاي توا..هناك االلي عرقوبه عرقوب سو..
لينا الكلام كان ينزل عليها زي السم..
دموعها ينزلوا ورا بعض وهي مصدومه..
زبيده:نوضي خودي بنتك دخليها داخل بدت تهتري..
رنده؛نقول في الحق ياحناي...
لينا:حسبي الله ونعم الوكيل..!
وهي ماصدقت سمعت منها رد...
قدمتها وهي تقول:في من تتحسبي ياعبده قولي..
جتها امها شدتها وهي تقول:خير بلاك شن جاك يابنت..
لينا مشت بتاخد صغارها..
وهي تبع فيها بعيونها وتقول..وربي كان ماخليت خوي سفيان ياخد عليك مانوليش رنده..
"شن هدا..."..
انصمتوا كلهم وهي خرست بالمرة..
ومنى خشت من الممر للصاله وهي تلبس في وشاحها..
"يام"
وجيهه:نعم..
"خيرها هادي هبلت..شن العياط هدا وشن هالقطاف اللي تقطف فيه...!؟"
لينا قامت صغارها ومشت طلعت..
هو شافها لقاها تبكي..
طلعت من حداه..
وهو بغضب مشي خش داخل..
وقف وشبح لرنده ووجهه سبابته في وجهها وقال؛بنراعيك ع خاطر الظرف اللي انتي فيه..لكن ورب العزة يارنده مازال نسمعك تغلطي فيها بكلمه لااني خوك ولانعرفك لين نموت..
قعدت تشد ع قبضات ايديها بقوة من الغيظ ودموعها ينزلوا..
نزل يده ولف ومشي طلع من حداهم..
رنده؛صحه ليها صحه حتى هدا عرفت كيف تحطه في جيبها العبده الحقيره..ومشت طول للدار وخشت وسكرتها عليها بالقوة...
وجيهه غمضت عيونها بشده ودموعها ينزلوا بعدين قالت بقهر:ااه..ياربي..
🌺🌺🌺🌺
وسفيان بعد مالحق مرته..
لقاها خشت دارها وسكرتها عليه وهي تبكي بالعبره..
جاها دق الباب وهو يقول:لينا..
"خليني في حالي بالله عليك خليني"..
هو تنهد بألم...ومشي بالسيف قعمز في الصاله وهو يسمع في صوت بكاها وقلبه.يتقطع..
ويومها ماطلعتش من دارها الا وهو مهناش..كانت تتوضا للصلاة وادير في احتياجات صغارها وكملت باقي ليلتها وهي مسكره لروحها الدار..وهو بعقله وقلبه معاها..
☘☘☘☘
ومرت الأيام..
ورنده ولت وحنت ع بنتها..والجفاء اللي نالاته البنت قبل انقلب لتعلق شديد..
خلاها ترفض تخلي اهل زوجها اللي يجوا بش يصلحوا بيناتهم انهم يشوفوا..
جوها تلاته مرات ورا بعض رفضت تطلعلهم.
والد محمد مشي للشريف وكلمه والشريف احترمه وقدره لكن رفض الصلح ...
وبعد هكي بدوا.
يبعتوا في الوسايط وكانوا يردوا فيهم..
ومحمد نفسه مابطلش اتصال بيها..من ارقام مختلفه وهي كانت تحط في الحظر طول...
وطبعا هدا كله كان يرضي في غرورها لدرجة كبيره وخلاها تزيد تكبرا..
🌺🌺🌺🌺🌺
درس السيارة قدام المستشفى..
لينا:هاه مش تنسى توصياتي.
ضحك وقال؛ذكريني مرة مرة.
لينا:من غير ماتقول..هي في حفظ الله...فتحت باب السيارة ونزلت وهو قال:في امان الله..
سكرت الباب ومشت وهو معاها بعيونه..
من بعض هداكا اليوم حست تغيرت وولت معاه رسميه شويه وهو مش فاهم ليش..ولاعارف شن قالتلها رنده بش تأثرت لهالدرجه..لأنه مالحقش ع بداية المشكله..
🌺وهي كانت مش قادره تنسى كلام رنده..
وخافت لو صارت في سفيان حاجه وقتها فعلا حتصدق ع روحها الكلام اللي انقال فيها...
عايشه يوميا في حالة قلق مستمر عليه..
واللي صار خلال هالفتره..
نساها موضوع مفروض هي تكون فيه واسطه..
لينا:والله يادكتورة ظروف صارت معايا هالفترة قريب نستني حتى اسمي..خواتي قداش ليهن يراجن في جيتي وبسبب هالظروف تتأجل.
اماني:معذورة حبيبتي...دكتور ياسين مستعجل فتح حتى مع اهله الموضوع وكل يوم يكلموا فيه ويسألوا شن صار..
لينا؛ خلاص...بإذن الله اليوم نحكي مع منى...
🏵🏵🏵🏵🏵
الساعه 11:30صباحا..
"ميتين زوزو سقدي"...
زهور وهي مستعجله:هاك وراك تشبعي..
ايناس خدت الفلوس وقالت؛تسلميلي ..ومشت بتطلع..
زهور:تي هيا وينكم انتم!..
جوها نساوين خوتها يجروا..
:اهو وتينا..
ع جية مفيده:اليوم بنضم الدواليت ونطلع الدبش الزايد..
زهور بإستعجال؛ديري اللي يعجبك..
ومشت بتطلع ونساوين خوتها وراها بش يلحقوا يوصلوا في حوش زبونه عندها مناسبه وهما بروحهم بيشرفوا ع الغدي..
طلعوا..
ومفيده خشت للدار..
وبدت اطلع في صرر الدبش متاع الشتي ويفرزههم..
بتخلي المهم والزايد بتلوحه..
بعد كملت صرر خواتها جيت لصرة زهور...
فتحتها وقعدت اطلع منها في الدبش..لعند ماطاحت في طاقيه رجاليه..قعدت تتفحص فيها وقالت:زعمه كانت لواحد من خوتي وحطتها عندها بالغلط!؟...شكلها هكي..مافي حد فيهم دورها ولاسأل عليها...
ولوحت الطاقيه مع الحوايج اللي بتلوحهم...
كلهم في الأخير لمتهم في صرة..
بعدين مشت طلعتهم فم.الباب وخشت...
بعد ربع ساعه...
جت سيارة القمامه..
ونزلوا منها عمال نظافه..
خدوا القمامه والصرة..
بعد ماحطوا الكناسه ف المكان المخصص..
فتحوا الصرة وقعدوا يشوفوا شن فيها..
كلها ملابس قديمه..
قعدوا يدوا بينات بعضهم انهم حيتقاسموها ويرفعوها لأهاليهم..
وحده منهم.جت عينه ع الطاقيه خداها ولبسها في مكان طاقية الزي متاعه وكان فرحان بيها هلبه...
💎💎
وفي مكان تاني..في نفس الوقت...
في الجامعه...كلية العلوم..قسم الفيزياء...
في احد مكاتبها...
"ربنا ولا تحملنا مالا طاقة لنا به..فأعف عنا واغفر لنا وارحمنا..انت مولانا..فأنصرنا ع القوة الكافرين"
خدي نفس...بعدي طلع من تطبيق القرآن..
وخش ع الرسايل وكتب رساله وبعتها..
(كلمتها في جلسه وحده..راك تنسي تقري سورة الروم بش تلحقي عليا)
شويه وانفتح الباب وقاله صاحبه..
ابوبكر:نوض الاجتماع بيبدا..
سفيان:هي...وناض ومشي طلع من مكتبه...
《سورة البقرة..
هي القوة التي ستهلك كل شيطان أهلك روحك وحياتك وهي القوة التي ستحميك من أذى شياطين الجن والبشر..وهي القوة اللي ستهلك كل ساحر قد تجبر..
ستعطيك قوة وحمايه..لجسدك وروحك ويومك...》
#مقتبس
...
يتبع.....
