شكولينا

الجزء الحادي والثلاثين

لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
 🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"ياناري وخيي"
هادي نوريه وهي في حوش اهلها جايه زيارة عاديه وسمعت من امها اللي صار في خوها..وكذلك رنده اللي قالت..
رنده:العبده الحقيرة!!والله ماتبي الا وحده تجي فوق راسها..
وجيهه:ااه كان شفتوه كيف كان وووك عليا وليدي اول مرة نشوفه هكي.
نوريه:كان بوي ماطلعش وشافه اشبح شن صار فيه..والله ماني ساكتتلها تو تشوف غير تروح بس..
وجيهه:اسكتي فكينا اني غير عاركتها شويه ماعجباش وقال ماحد ليه علاقه..
رنده مسحت ع فخدها بغيظ وهي تقول:ااه ياكبدي..غير كان نعرف شن ديرلهم بس..
نوريه:وحناي شن رايها في اللي صار؟
وجيهه:شوق ماقالت عليها وجعها خاطرها منها.
رنده:بش تعرف اللي قاعده ادافعلي عليها كل شويه..
وجيهه تنهدت وقالت:خلاص توا نوضوا ديروا الغدي معاش في وقت..
نوريه:اللا هديكا وين نجوا حني تشد رجلها..
وجيهه:راجلها هكي يبي..
رنده:ااه ياقلبي كيف خوتي تغيروا وانقلبوا هالقلبه..
نوريه:من لما جت هي هالعبده هادي..الله يرحمك ياوخيي الله يرحمك ويسامحك..
🌺🌺🌺🌺🌺
بعد ماكمل صلاة..
مقعمز ع سريره وهو يتفرج عليها كيف مقعمزة ع الصلايه وتبان تسبح ع ايديها...
كان منظرها حلو هلبه..نفس المنظر اللي كان يعشق عدنان تأمله..
وهو تاني مرة يشوفه...
تنهدت ولفت الصلايه ومشت حطتها في مكانها وهو معاها بعيونه..
بعدين ولت قعمزت ع الكرسي وشبحتله..
هو دار روحه سرحان..
لينا:هاه شن حالك توا..
دار روحه مش مركز معاها..
لينا:سفيان..
قلبه قعد يرفرف وين سمعه اسمه منها..
شبحلها وقال:امم..
لينا:شن حالك توا..
سفيان ابتسم بعقده حواجب وهي تقول:انتم شن تقولوا لشن حالك..
لينا ابتسمت وقالت:عافيه...بس معلومه لازم تعرفها مش كل اهل سبها يقولوا فيها يعني مش تتعرف ع سبهاوي وتقولهله طول ادير روحك تعرف تدوي كيفه..
ضحك وقال:لسانك طويل هلبه..
لينا ضحكت وقالت:باهي قولي شن تحس توا..
تنهد من قلبه وقال:شي..
اجابه مخالفه تمام للي يحس بيه فعلا..
لينا؛كويس..المهم توا بيجيبوا الغدا وبتاكل..سمعتني بتاكل ومانيش مخلياتك لين تكمله كله...خير ماناكل ع راسي بعدين..
هو ضحك بتعب وماعلقش ع كلامها..
ع خشة وحده من العاملات من اصحاب البشرة السمراء بالغدي..
هو مرر نظره ع العامله وحس بشي من الاشمئزاز ولينا لاحظاته..
لينا شبحتله وقالت:مشكوره هيبات..
:العفو يالينا ربي يقوموا بالسلامه..
لينا:تسلمي..
طلعت العامله...ولينا شبحتله..
هو قعد يشبح للماكله بعدم تقبل..
لينا؛سودانيه...وانظف من النظافه بذاتها مش كان سمراء معناها مش نظيفه ياأستاذ ياجامعي..
شبحلها وقعد ساكت مش عارف شن يقول..
لينا:بتاكل ولالا؟
قعد يشبح لنظره عيونها الحاده اللي تلمع بالدمعه بعدين قال:كان انتي توكليني ناكل..
هي شبحت لصفرة الماكله..
سفيان؛ياناكل من يدك يا ارفعيه من قدامي..
هي تنهدت بعدين قالت...باهي.
هو ابتسم..
وهي قعمزت ومازال مضايقه منه بس مجبورة دير واجبها اتجاهه..
وبدت توكل فيه بدون ماتشبح لعيونه وهو عيونه ع ملامحها بكل تفاصيلهم....واضح جدا انها تأثرت  هلبه بس تحاول تبين العكس..
سفيان وهو ياكل؛بالشويه.....تحشي فيا حشي..
لينا حطت الكاشيك ومابتش تعلق..
هو ابتسم بعدين بلع اللي فمه وقال:عندك علم او باكو شكلاطه يجينا للحوش منكم اني كملته..
شبحتله بطرف عينها..
سفيان بإبتسامه:وبعتت يجيبولي غيرها تلاته..
لينا:وكليت منها وانت تعرف هي من وين..
سفيان ابتسم برفعة حاجب وقال:ممكن من حبي ليها مافكرتش في الحاجه هادي..وبصراحه طعمتها كانت مميزة ماكليتش زيها من قبل..
لينا ارتسمت ع وجهها ابتسامة غرور خفيفه..
وهو لاحظها وابتسم..
بعدين شبحتله وقالت:باهي انا نبي نفهم شن هالتناقض..وكيف انسان متعلم كيفك مس بش تعليم دراسه..لايقرا في كتب مجالات تانيه يعني مثقف وتكون هكي عقليته!؟
هو غير عيونها عنها ومرر نظره قدامه وهو يفكر بعدين قال:في حاجات مايقدروش يأثروا فيها العلم والثقافه..الطبع والتربيه والبيئة..في حاجات تنتقش نقش في العقل من الصغر مش متعلمها تعليم مباشر بش شاف الكبار وتأثر بيهم..
لينا؛وباهي شن اللي تغير توا؟
ارتسمت ع وجهه ابتسامه حلوة بنظرة عين تلمع وقال:شي كبير اكبر من اللي قتلك عليه يقدر يمسح حتى المنقوش نقش..
لينا تنهدت وقالت:امم..باهي هي كمل غداك..
سفيان"جيتي عند هادي وماسألتيش":هي هاتي..
لينا ولت توكل فيه وهو آخر انبساط وجوه مليح ع الآخر..
قعد يماطل يمضع ببطء..بعدين يقوللها توقف شي بش يرتاح..وكل مرة سبله شكل وهي تساير فيه وكانها تساير في طفل صغير..الهزيبه اللي كلتها من عزوزتها قاعده تسمع فيها ترن في وذانها..
بعد كمل غداه اللي ماخلا فيه حاجه..نادت لينا ع حد يجي يرفع الصفرة..
وطلعوها من حداهم..
سفيان؛لاكويس المستشفى..
لينا:امم قطاع خاص بس توا حطوها تحت الدوله..
هز راسه وقال:يعني مرتاحه هني..مافي شي  مضايقك..
لينا؛لا..
فجأة انفتح الباب وخش  شخص لينا ماتوقعتاش بكل..
خلا عيونها يتوسعوا من الخوف وقلبها يزيد في النبض..
ياسين:هاه شنو حالك توا استاذ سفيان صح؟
سفيان:امم..الحمد لله احسن..
ياسين بإبتسامه:عليك توصيه قويه من الدكتورة مروان لدرجة انه خلا احسن الممرضات تشرف ع حالتك..لينا تعتبر احسن ممرضه في المستشفى..
لينا تسمع وقلبها يرجف من الخوف وهي تشبح لسفيان اللي يشبح لياسين بحده وقاله في عز كلامه عن لينا..
"زوجتي"..
ياسين اختفت ابتسامته شبح للينا بعدين رجع شافله وابتسم بإرتباك وقال:اها..كويس..
وشاف لكيس التغذيه وهو عاقد حواجبه وقال:خلاص بإذن الله بعد العصر تطلع...
وسفيان مازال يشبحله بنفس النظره..
ياسين شبحله وقال بإبتسامه:ان شاء الله لاباس عليك..طهور..
هز سفيان راسه وهو ساكت..
وياسين حياة بإبتسامه بعدين مشي طلع من الحجرة..
لينا بعد طلع ياسين كانت تستعد وتتهيأ لتلقي السنه اللهب اللي طالعه من عيون سفيان..
شبحلها بنظره حاده وقال:من هدا اللي يدوي عليك ويمدح فيك هكي!؟انتي تخدمي مع دكتورة نساء في المستشفى هادي ع حسب علمي!
لينا وهي تحاول تتصنع الثبات والثقع:ايه..لكن طبيعي مادامنا في مستشفى وحده يعرفني ونعرفه وهو مرات يجي للدكتورة اللي نخدم معاها في الحجرة يحكي ويعدي..
قعد يشبحلها بنفس النظرات وحاس انها مدرقه حاجه مخليتها تبان خايفه مهما حاولت ادرق..
اشرتلها براسها بمعنى"شني!؟"
هو قال رفع سبابته وقال:نبيك تعيدي النظر في الخدمه لأنها مش خاشتلي راس..اشر ع راسه لما قالها..بعدين قعد يحرك في سبابته بالامر وهو يقول..غير يبدا واتي مشروع المحل تسييبها طول سادك الخدمه فيه..
لينا قعدت تشبحله بعدم رضا وهي مضايقه..
سفيان:مافيش نقاش في الموضوع منتهي بالنسبه ليا..خلاص..نقطة آخر السطر..
ربعت ايديها وقلبت وجهها عنه وهي معصبيه..
وهو كذلك قلب وجهه عنها وقعد يشبح للروشن وهو قمة الغضب والغيره...
قعدوا ع هالحال لين آذن العصر..
بعد ماصلوه جاهم مروان بش يروح بيهم...
كانت وهي ماشيه في الممر والعيون عليها وراه..
وهو يشبح القدام ..
هي شبحتله ولاحظت كيف يمشي ويشبح قدامه بنظرة فيها تكبر...هي تمقته هلبه...
طلعوا برا..
ومشوا لسيارة مروان ..
هو ركب جنب خوه وهي ركبت وراه..
طول الطريق وملامح الغضب ع وجهها ماتحولتش وهو يشوفلها من المرايه..
هي صدفه شبحت للمرايه جو عيونها في عيونه..
غيرتهم طول وهي معصبه..
وهو غلبت ملامح وجهه الغاضبه ابتسامه ...
🌺🌺🌺
ووصلوا للحوش..
واتفاجئوا بالزحمه...العيله كلها في الحوش..
ولما خش عليهم سفيان تقول مروح من حرب الاحضان والدموع وحالتهم بلة زي مانقولوا..
ولينا مدهوشه باللي تشوف فيه..ماتوقعتش ان سفيان غالي عليهم لدرجة يمرض مرضة عاديه زي هادي يجوه كلهم..
ربيعه:صح لسانه طويل وطبعه خيي لكن يقعد وليد خوي اللي نحبه..
سفيان بإبتسامه:تشكرات..
ضحكوا..
هنيه "عمته":حالك باهي توا ولدي..
سفيان هز راسه وقال:الحمد لله..
نوريه:جعان حبيبي تبي نديرلك حاجه؟
سفيان بإبتسامه؛لالا بنمشي نقعمز في المربوعه شويه بعدين نركب فوق نرقد شويه..
نوريه:ع راحتك حبيبي والعشي عليا اني بنديرلك الفتات اللي تحبه .
ابتسم وقال:يسلم ايديك مسبقا..
رنده؛ماتبي نديرولك شي ياغالي..
سفيان ناض وقال:لا ارتاحوا...ومشي بيطلع من حداهم..
اساور:لازم تاخد حاجات تزيد الدم سفيان تو نديرلك عصير بنجر بالفراوله ندير فيه يهبل..
لينا تشبحلها وبس..
سفيان وهو ماشي: ماتعبيش روحك شكرا..
ومشي...
لينا بعد مامشي قعدت تستعد داخليا لوابل من التنديد والاستنكار اللي حتجيها من كل حدب وصوب..
ربيعه:تعالي هني ياسبهاويه..كيف هكي تهملي راجلك لين يوصل لهالحاله..!
نوريه:خداته وردو مفتحه شوفوا كيف ولى..
رنده؛منظره تقول مجبود من قبر بعيد السو عليه وخيي..
وجيهه:حتى مع مرته الاولى ماكانش هكي..
رنده:بالعكس كانت مهتمه بيه هلبه وحطاته في عيونها..
نوريه؛على عيوبها لكن كان راده بالها منه..
زبيده:شن لزومه الكلام الفاضي هدا توا..
ولينا تمرر في نظرها عليهم ببرود مصطنع ومن داخل داسه كلام ياكلام لو قالاته خرستهم كلهم..
وجيهه:اني والله ماني مسامحتك ع اللي اهمالك ولو صارت فيه حاجه ليوم الدين مش حنسامحك..
ربيعه:حقك ياوخيتي حقك والله لو كنت مكانك درت احرف منك..واساور تشبح للينا وتستنى في ردها..
هنيه:بنيتي هدا راجلك ومسؤوليتك زيه زي صغارك بالزبط راهو ربي بيحاسبك عليه..
نوريه:انتم شوفوها كيف تشبح مش عاجبها الكلام..
لينا:لاعاجبني يانوريه وعندكم حق كلامكم كله مزبوط وفي الجديد ان شاء الله مش حيتكرر اللي صار اليوم..
وجيهه بتهكم؛تو نشوفوك...
"لينا"
ربيعه:هي نوضي نوضيله..
لينا وهي تمرر في نظرها عليهم:حاضر جايه..
بعدين ناضت ومشت للدار..وهما يتبعوا فيها بعيونهم..
ربيعه:كويسه هي راهو غير مازال ماتعودتش ليه..
وجيهه؛قداش ليها معاه ياربيعه امتى تتعود بالله..
زبيده:انتم ماديروش اللي يكرهها فيه تو تتعود عليه..
ربيعه:عندها الحق امي اكيد نازلات فيها ع خاطره نعرفكم اني..
نوريه وامها شبحوا لبعض...ورنده قلبت عيونها
 بملل..
ع طلعة لينا بصغارها وهي ضامتهم قالت:بالسلامه توا..
ووكملت طريقها وطلعت برا لقاته واقف يستنى..
سفيان؛هاتي واحد فيهم..
لينا:مش لازم انت تاعب تو..
سفيان جاها وخدي منها بحر وقال:هي بري قدامي..
هي تنهدت وضمت ياسمين ومشت وهو مشي وراها..
وهما راكبين للدروج..
لينا:عندك مفتاح..
سفيان:لا..
لينا:انا عندي..
سفيان بضحكه؛وليش تسألي باهي..
لينا؛قبل نبيك انت تفتح الحوش ونخش انا الاولى وبعدين انت..
سفيان بضحكه:وتوا..
لينا:طبعا حنخش انا الاولى بعدين انت..
قعد يضحك وهو يحرك في راسه يمين ويسار عارفها تبي تفش غلها من كلام حتما سمعاته حرقلها دمها..
وصلت في الباب حاولت تفتحه ماقدرتش كانت معصبه ومضايقه هلبه..
هو جاها وبهدوء خداه منها وفتح الباب..وسعلها بش تخش..
وخشت..
وهو خش بعدها وسكر الباب..
🏵في الشقه اللي مقابلتهم..
مروان:مايجيش يامنى العيله كلها لوطا انزلي جاملي مجامله..
منى بضيق:بالله عليك اعفيني مروان والله ماني قادرة نتحمل..
مروان:ع خاطري منى هي انزلي..
منى تنهدت بضيق..
مروان:هيا حبيبي..
غمضت عيونها بإستسلام وقالت:باهي..ولفت ومشت للدار بش تغير حوايجها..
وهو ابتسم براحه..
••ولبست منى ونزلت بولدها وكان تلقى تصيرلها الحاجه وماتكملش طريقها..
خشت للحوش وسلمت ع الكل وين وصلت في نوريه مدت يدها ونوريه هزبتها..
قريب ماتت من الموقف المحرج ..تخطتها طول ومشت قعمزت وجهها يتلون من الاحراج..
وهما يشبحولها..
نوريه:ايه حقه عرس سلفي بيبدا الاسبوع لبعد الجاي يام..
وجيهه؛باهي ع خير ان شاء الله..
نوريه:ان شاء الله..عمتي قالت نبي امك تحضر من اول زغروطه..
وجيهه بإبتسامه؛ربي يحفظها الحاجه رمضان مراة تعرف تقدر..
ربيعه؛خلاص معاش عندك سلاف عزارى ولا؟
نوريه:ايه هدا الصغير..
ربيعه؛باهي ع خير..
وجيهه:نوضي منى جيبي العاله..
منى هزت راسها وقالت:حاضر..
وناضت ومشت للكوجينه...وخلت ولدها يلعب مع بنت عمته رنده وبالغلط ناشها..البنت قعدت تبكي..
رنده:حيي بنيتي..
ونوريه ناضت للشريف ضرباته ع ايديه بقوة..
وجيهه:علاش هكي يانوريه!؟
نوريه؛يبيها فرخ شطان..
والوليد مشي يجري لامه وهو يبكي..
زبيدة:حرام عليك عيل شن طريقه الصغار يتعاركوا ويضاربوا..
رنده وهي حاضنه بنتها:قريب قلعلها عينها كانت صارت فيها حاجه شن نقول لبوها بعدين..
وعماتهم واساور يتفرجوا ع الموقف وهما ساكتين..
••في الكوجينه..
منى وهي ضامه ولدها؛خلاص ماما خلاص حبيبي...كيه وضربه ع رية يانوريه..
🌺🌺🌺🌺
بعد المغرب...
طلعت من الدار بعد ماصلت...فكرت تمشي تشوفه من بعد ركبوا خش للدار رقد ولتوا ماطلعش حتى الصلاة فاتاته..
اذكرت الكلام اللي سمعاته من امه وخواته ونساوين العيله..
خدت نفس عميق..وزفرت..بعدين مشت للدار..
وصلت فيها..لقتها مفتوحه..ومظلمه..ماعدا الضي المخفي اللي فالسرير..
خشتلها بحذر...وهي تشبح للسرير..
لين شافته راقد ومستغرق في النوم..
قربتله وقفت حداه...
لينا؛سفيان...سفيان...سفيان نوض.
هو وجهه تعكرش بإنزعاج بعدين فتح عيونه شويه وقال:شن في!؟
لينا:المغرب آذن وفات..
غمض عيونه وتنهد بعدين شبح جهة البلاكونه لقي الدنيا بادية اظلم..
حط ايديه ع وجهه ومسحه بعدين شبحلها وقال:مانزلتيش لوطا..
لينا؛لا ومش حننزل.
سفيان ابتسم بنعس وقال:احسن..اقعدي هني..
هي قالت:باهي صبي نوض صلي نوض..
ومشت طلعت من حداه وهو يضحك...
💎ناض...وخش الحمام..
بعدين طلع وخش صلى صلاته في الدار..
وهي في الكوجينه وصغارها يلعبوا بجراياتهم في الصاله..
لينا:بالشويه انت وياها..
وقاعده ادور في الكوجينه ع المواد اللي بدير بيهم العشي..
ع طلعته هو من دار..
وين وصل في الصاله حصل خبطه ع رجله بجراي بحر..
سفيان فنص عيونه من الالم وقال:-ااه يامعفن..
لينا شبحت جيهتهم وضحكت..
شويه جاته ياسمين بجرايها..
سفيان؛-شدي فرينوا ياقلبي..
وهي خبطاته بقوة..
سفيان:ااه..من مسلطكم عليا انتم قولوا..
لينا شدت ضحكتها وهي اطلع في حاجات العشي..
سفيان؛باهي ياخرابيش ننزل لوطا شويه ونجيكم..
لينا:العشي هنا راهو رد بالك تاكل لوطا مش ناقصني دوة..
سفيان حرك راسه يمين ويسار وقال؛باهي..
ومشي بإتجاه الباب...وطلع من الشقه..
وهي بدت ادير في العشي..بطاطا في الكوشه وقلاية كبده..
طيبت القلايه وقعدت تستنى في البطاطا في الكوشة وهي ادير في السلاطه...
وخلال ربع ساعه كانت مجهزة كل شي...
بعدين عشت صغارها وحاولت ترقدهم وبعد جهد جهيد رقدوا..
وصلت العشي..بعدين قعمزت في الصاله تراجي فيه يجي وبدت تعصب وهي تتخيل يتعشى لوطا..
لحظات وخش الشقه...
سفيان:السلام عليكم..وينك عشاك.
ناضت لينا ومشت للكوجينه..وهو ابتسم ومشي وراها..
خشوا للكوجينه..
هي عرت الصفرة ..
وهو قعمز قدامه..
لينا؛بتاكل كله ماتخلي فيه شي..
سفيان:وانتي؟!
لينا:انا سادني اللي كليته بدري بسببك..
ربع ايديه وابتسم وهو مضيق عيونه بعدين قال:ترا قعمزي لينا..
هي قعدت تشبحله بإمتعاض..
سفيان:قعمزي لينا..قعمزي..
هي مشت وقعمزت مقابلاته..
فك ايديه وحطهم ع الطاوله وهو يقول:انتي ملاحظه ان اسلوبك معاي ديما هجومي عكس اسلوبي معاك..
لينا غيرت عيونها عنه وهي مضايقه..
هو ضم كفوفه لبعض وقال:هو انتي معذورة اني اللي خليتك هكي..لتوا مش قادرة تغيري الصورة اللي ارسمتلي في عقلك واللي اني رسمتها بيدي..لهدا اني نبي نمسح هالصورة زي مارسمتها..
لينا شبحتله وهي ساكته..
هو ابتسم وقال:خلينا نولوا اصحاب..
لينا بإستغراب:اصحاب!؟
سفيان هز راسه وهو مبتسم ع جنب..
لينا قعدت ساكته وهي تشوفله..
سفيان:اصحاب يعني اصدقاء بينهم ود ومعزة واحترام...
ولينا تسمعله وتفكر في كلامك بدون ماتعلق..
سفيان:ع خاطر عالصغار وع خاطري وع خاطرك...نبي نعيشوا في جو فيه سلام..مايكونش مشحون ومكهرب طول الوقت اقل شي النفسيه ترتاح..هاه شن قلتي..
لينا؛طبعك مايشجعش...لما الواحد يبي يدير صديق لازم يكون مرتاح معاه وانا بصراحه..نخاف منك واحد..
هو بتعجب:انتي...اشر عليها...تخافي مني اني..واشر ع نفسه..
لينا؛ايه وواجد..اسلوبي الهجومي اللي تحكي عنه نتيجة الخوف..انا لما نسمع صوتك نخاف..لما تكون موجود في مكان انا موجوده فيه نخاف..نخاف ديما من ردة فعلك من اي تصرف ممكن اديره انا مانتوقعه..اللي.ريته منك قبل خلا هالشعور يكبر عندي..وحتى توا..نحكي معاك وانا خايفه الهدوء اللي تكلم فيا بيه ينقلب عاصفه..
تنهد وقال:تمام..عندك حق تخافي ومانلومكش..اني عندي طباع مش حلوة..وممكن نكون سريع الغضب وحاد..لكن اني هكي..هادي حاجات فيا مانقدرش نغيرها..
لينا:ع هكي صعب نكونوا صحاب..
سفيان؛لان فيا كم عيب مش قادرة تتقلبيهم!؟ ابتسم وقال..باهي خل نقولك ع حاجه..اني عندي صديقين.اقرب الاصدقاء ليا..واحد اسمه ابوبكر كان معاي من الاعدادي...والتاني فوزي عرفته في الجامعه..الزوز هما النقيض متاعي..جوهم مليح يحبوا يفرقشوا ويضحكوا وبالهم واسع وهاديين..عكسي في كل شي..ومع هدا حنى توا اكثر من خوت..تعرفي علاش استمرت صحبتنا..لأننا قبلنا بعض بعيوبنا قبل الحاجات الحلوة فينا وقعدنا ديما نتفادوا نديروا الشي اللي مايحباش التاني بش مايصيرش الزعل...ولعند اللحظه هادي لازلنا اقرب الاصدقاء..
يعني...انتي لازم تقبليني بعيوبي..زي مااني متقبلك بعيوبك واولهم طول لسانك..اشر عليها وقال...رغم فرق العمر بيني وبينك كبير...انتي عمرك 25سنه ولا؟
لينا هزت راسها راسها بآيجاب.
سفيان؛واني 38..واحسبي الفرق..
نزلت عيونها وهي منحرجه..
ابتسم وقال؛ومع هدا اني قاعد نتغاظي ونمشي..
هي من الاحراج معاش رفعت عيونها فيه..
سفيان بإبتسامه:هاه شن قلتي؟..خبط كفوفه ببعض وقال...نولوا اصحاب؟...
قامت عيونها وشبحتله..
وهو سألها بحركة الراس"شني"
لينا:لا..
هو تلاشت ابتسامته..
لينا؛مانصاحبش في تريس انا..
هو غمض عيونه وقعد يضحك .
هي بإبتسامه وحاجبها مرفوع:لكن معليش نجربوا هالمرة.
هو فتح عيونه وقال بإبتسامه:ومش حتندمي..مافيش حد يصاحب سفيان مايندمش..
لينا:شكلي بنندم من توا..
قعد يضحك...وهي تشوفله بإبتسامه..
هدا ضحك بعدين قال:اتفقنا..ومد يده بيصافحها..
هي شبحت ليده شويه...بعدين رفعت يدها وصافحت روس صوابعه..
لكن هو صافح يدها كلها وقال:سفيان الشريف بن عامر..
هي جبدت يدها منه بتوتر بعدين قالت:لينا عبدالودود ****
وهيا تعشى...صقع ونقع..
ضحك بعدين بدي ياكل وهو يقول؛اممم..خل نكملك..الأبن البكر لعيت الشريف بن عامر...استاذ جامعي في كلية العلوم تخصصي فيزياء...وكنت ولا زلت الأول ع جميع الأصعده..ماعدا صعيد واحد..رفع حاجبه اليسار..لكن حتى هو قريب ان شاء الله
وطبعا هي مافهمتش قصده وقالت؛قداش مغرور بنفسك.
سفيان:لا يا #شكولينا  في فرق بين الغرور والاعتزار بالنفس..
ضحكت لما ناداها #شكولينا بعدين قالت...مواليد كم..
سفيان:14|4وانتي احسبي السنه اللي جيت فيها من عمري..
لينا:شن اكثر شي تحب ادير..
سفيان:القراءة ثم القراءة ثم القراءة..
لينا؛وشن تحب تقرا بالعاده.
سفيان؛في الادب والتاريخ...ونحب الشعر الفصيح هلبه..نقولك حاجه من اللي حافظه..
لبنا؛قول..
سفيان ابتسم وقال...
ياأيها الطرف الخجول قتلتني..
لله درم قاتلا وخجولا...
هي تحشمت هلبه..خدت ورقة خسه وقعدت تاكل فيها..
وهو ضحك بعدين كمل ماكله وقالت..ايه وانتي مواليد كم..
لينا؛شهر 7يوم 14 واحسب من العمر كم مواليدي..
هو شبحلها شويه لما قالت التاريخ بعدين كمل ماكله..
لينا؛عجباتك القلايه..
سفيان؛امم..دنيا.
هي قعدت تضحك ..
وهو قعد مركز في ضحكتها وقلبه يدق بقوة..
فجأة سمعت صوت الصغار يعيطوا...ناضت ومشتلهم ومعاها بعيونه وعقله وقلبه....
🏵🏵🏵🏵🏵
الساعه 10:35ليلا..
في دار التقعميز مفرشات حدا بعض ويهدرزوا.
نوريه:كلهم بفروخهم يردسوا مع بعض في حوشها..
رنده:الاثات جديد الزفت حتى حقه تسلفاته من بوي..
نوريه:عيلة همجيه كمشة شلفط كان نعرف شن كان عاجبها فيه هالخليقه اللي خداته..
رنده؛الحب اعمى..
نوريه:حبه برص ان شاء الله..اه ياريته سفيان سكر راسه وفرض كلامه ع بوي وماخلاشي عطاها لهالمزفر..
رنده بضحكه؛سفيان وقتها كان حاس ان في بيناتهم شي هدا علاش جي بيعفس فيها..
نوريه:شوق مادارلي من تحقيقات ع حسين ع قد ماحلفتله مش مصدق اني مانعرفاش قبل..
رنده:اني لتوا شاك فيا..ومش مصدق اني مانعرفاش قبل..
نوريه؛ايه حقه خيره راجلك متغير المده الاخيره قعد يحط فيك ويمشي ليه هلبه لاتغدا ولاتعشى ولاهدرز هني..
رنده وهي تحاول دير روحها عاديه؛لاهي يجري ع هالبني نبي نكملوا فيسع ونسكنوا..
نوريه:ربي ييسرلكم ان شاء الله..
رنده:آمين...
🌺🌺🌺🌺🌺
طلعت من الدار بعد مارقدت البنت..
مشت للصاله لقاته راقد وهو مقعمز وفي حضنه بحر راقد..
ابتسمت...عجبها شكلهم هلبه..
ولت للدار خدت تليفونها وطلعت طول صورتهم..
هو استاقظ لما سمع صوت التقاط الصورة وقال:شن ديري.
هي سكرت الشاشه وقالت:شي..هي ارفع لحر لسريره رقد..
شبحله..بعدين ضمها وبهدوء وقف بيه ومشي للدار..
خش لدارها وهي وراه..
حط بحر في سريره..بعدين التفت بيطلع..جو عيونه ع الزيانه..
لينا؛خيرك؟
هو شبحلها بعدين قال:شي..
لينا:تمام تصبح ع خير..
سفيان ابتسم وقال؛وانتي من اهله..
طلع.وهي طول سكرت وراه الباب..
قعد ماشي وهو يدعي في قلبه مايسمعش صوت لفتة المفتاح..
وماأن وصل لباب داره حتى سمعه..
تنهد بضيق وخش لداره..
🌺وهي كعادتها كل ليله غفيت وهي تقرا في القرآن...
اما هو فكان مقعمز يقرا في كتاب...
كانت تصادف فيه جمل يقراها تعبر عن حالة هو عايشها...
لعند ماوقف عند ابيات شعريه قعد يقرا فيها بالصوت..
أيا لك نظرة اودت بقلبي
وغادر سهمها جسمي جريحا
فليت اميرتي جادت بأخرى
فكانت بعض مايشفي القروحا
فإما ان يكون بها شفائي
وإما ان أموت فأستريحا..
جو بين عيونه نظراتها الخجوله...والتوتر اللي بان عليها لماصافحها...
سكر الكتاب وقعد سرحان فيها...لعند ماغلبه النوم ورقد...
🏵🏵🏵🏵🏵
وفي صباح يوم صيفي..
مر بهدوء ع الكل في حوش الشريف ماعدا رتيل..
نوريه؛بشويه عليك رتولتي ماتوتريش روحك..
رتيل هزت راسها وقالت؛باهي...باي ياألبي.
نوريه؛في حفظ الله ياروحي..
طلعت وراها لين شافتها طالعه من الحوش بعدين لفت وخشت داخل..
🏵ورتيل ركبت باصها اللي تحرك بيها لحوش صاحبتها في اول الشارع شافت خوها واقف في الباب...قلبت وجهها عنه وهو يشبحلها..
لعند ماركبت صاحبتها.
الهام؛صباحو تولي..
رتيل؛صباحو لومي.هاه شني..
الهام؛تمام قريت وراجعت لكن خايفه..
رتيل:احرف منك...يارب..كون معانا..
🏵🏵🏵🏵
وماكانش صباح رتيل بس مشبع بالتوتر..
حتى اختها عفاف..اللي كانوا اعصابها تحت ضغط قوي..
من حمواتها صحيحات الوجه وصغارهم اللي يقولوا للسمي انزلي وحني نركبولك..
ليها يومين وهي تتحمل...لعند ماوصلوها لمرحلة الانفجار..
لما خرطوا بشوف فراشات الجلسه الجديده..
عفاف بإنفعال:تي هدا شني هدا..معقوله هكي ياناس.
ع جية عزوزتها وحمواتها وهما بقولوا؛خيرك!
عفاف:شوفوا صغاركم شن دارو في الصاله..جلسة جديده ياهمي دافعه حقها بهداكا..
:ارخي عريقاتك ماما ماعندنا مانديرولهم صغار مايعرفوش..
عفاف؛اللي مايعرفش يتعلم وين بخش الناس مايفسد شي.
عزوزتها:حياش ناس شني ياحنه!الحوش حوش خالهم يديروا فيه مايعجيهم..
ع جبة عبدالصمد بعد ماسمع دوشتهم..
عفاف:خالهم مش داير في الحوش حتى حاجه كله من بوي لولاه رانا ع الزليز يكون في علمك..
عبدالصمد:شن قصدك انتي.
هي لما سمعاته انخلعت وماقدرتش تنطق بكلمه....

(سامحوني اليوم كان عندي ظرف يدوب لحفت نكتب)

#صلوا_على_محمد

....يتبع.....