شكولينا

الجزء السابع والعشرين "القسم الاول"

سئل رسول الله ذات مرة..
أي الأعمال أفضل؟ فقال...الصلاة في وقتها...
الصلاة أولا وقبل كل شي❤
قولوا لاإله إلا الله تفلحوا...
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 10:30ليلا..
في الطريق يسوق ويشبح لحناه من المرايه ويسأل فيها؛هاه اللا زبيده شن جوك توا..
زبيده:مش باهي بكل..
مروان التفتلها وقال:-علاش ش تحسي؟!
زبيده:اني مانحس في شي لكن واجعتني هالمراة اللي قاعدين تقطعوا فيها من كل تركينه..
مروان شبح لخوه..
وسفيان يشبح للطريق بضيق..
زبيده:اني والله ماكنت نبي نخش بينك وبينها لكن بعد اللي صار بكري معاش قادرة نسكت..وليدي المراة كويسه بنت عيله وبنت اصول يعلم الله اني كنت ماني قبلتها اول ماخشت العيله لكن هي خلتني نحبها اكثر من خواتك ع اللي ريته منها..وخلتني واني عزوز كبيره عمري قريب سبعين عام نتعلم ان قيمة البنادم مش بلونه واصله..البنادم قيمته بأخلاقه واحترامه ونيته الصافيه..
مروان وهو يشبح لخوه:مزبوط كلامك ياحناي..
زبيده:ايه مزبوط مال شنو ونبي خوك يعرفه كويس..ماحد قالك حبها بالسيف..احترمها بس عاملها كويس لوجه الله..مراة ترملت صغيرة وعندها صغارع خاطرهم تحملت الكلام اللي مش باهي وحرق الدم والقهرة منك ومن غيرك وهي في غربه بعيده عن اهلها وناسها...الله غالب قدر عليك ربي تردها هي ماجبراتك عليها جبر خاف ربي فيها ياوليدي تربح..
سفيان يسمع في كلامها وقلبه واجعه ع الآخر..
حناه مش عارفه هو شن صار فيه من بعد ماطلعوا بيها لعند هاللحظه من بعد اللي داره للينا والكلام الجارح اللي سمعهولها من غير مايكون قاصده وخلاها تبكي..
اصلا منظرها وهي تبكي والكلام اللي قالاته ماراحوش من باله للحظه وهو يأنب في نفسه ونازل فيها بأقسى مما سمعها هي..
زبيده؛سمعت شن كنت نقولك..
سفيان هز راسه وقال بصوت هادي:ايه..تنهد وقال...ايه..
زبيده؛ربي يهديك ويصلح رايك ويهدي سركم..
رد بصوت لايكاد يسمع؛آمين..
وخوه بعد ماكان يشبحله شبح القدام وهو متأسف ع حاله...
عارف وفاهم اللي فيه خوه وواجعه حاله وحال لينا معاه...
الزوز يستحقوا التعاطف....
🏵🏵🏵🏵
بعد ماروحوا بزبيده..
مروان مشي بيروح بامه ومرته...
وسفيان خش بحناه للحوش لقي بوه يراجي فيهم..
الشريف بقلق:خيرك يام ؟
زبيده؛انت من اللي خبرك بس مش قلت ماتقولوش لبوكم اني..
الشريف حاوطها من كتافها وقال:كيف ماتبنيش نعرف يام بس..قوليلي شن حالك توا...
زبيده:الحمدلله الحمد لله..حالي باهي مافيا شي..
ومشي خش بيها للصاله وسفيان وراهم..
بعدين وقف فم الصاله وهو يشوف لبوه كيف يقعمز في حناه ويسأل فيها عن حالها..
تنهد..بعدين مشي للكوجينه بيشرب..
خش داخل ومشي لثلاجه الميه خدي طاسة وبدي يصب..
••برا..
كانت لينا مقعمزة تحت المظله تقرا في القرآن سمعت السيارة لما خشت..
كملت وردها بعدين ناضت بالمصحف وشيشة الميه المرقيه بتخش داخل..
وصلت في الباب وخشت.
لقاته مقعمز ع الطاوله يشرب...
لما شافها نزل الطاسه..
هي تجاهلت وجوده ومشت بتطلع..
"آسف"...
وقفت والتفتت شبحتله..
لقاته يشبح لطاسة الميه وهو عاقد حواجبه..
مررت نظرها عليه من فوق لتحت بتهكم..
بعدين مشت طلعت..
بعد طلعت هو شبح للباب...تأفف بضيق....بعدين ناض ومشي طلع من الكوجينه من برا...
🌺🌺🌺🌺🌺
"شنو حالك ياجداي تو"
زبيده:الحمد لله بنتي الحمد لله..
لينا؛ربي يهديك رعشتينا..تو انتي عارفه ان ايكال الحلو ممنوع عليك تاكلي بلح الشام اللي كله سكريات ونشويات!
زبيده بإحراج؛جي خاطري فيه يابنيتي سهفني..
الشريف ابتسم وقال:الممنوع المرغوب..حتى اني بعد منعوا عليا حاجات معينه بدي خاطري فيها هي اكثر من غيرها..
لينا:تصير الحاجه هدي مع مرضى ضغط وسكر وقلب الله يعافيكم اللي يمنعوه يتسهفوا عليه رغم انهم قبل ماكانوش ياكلوا فيه واجد..
الشريف ضحك وقال:والله هدا اللي صاير..
ابتسمت لينا وقالت:لازم تحافظوا ياعمي بش ماتتعبوا ويصير فيكم كيف ماصار اليوم...وشبحت لزبيده ع جنب..
وزبيده تسبح وهي شاده ضحكتها...
الشريف بإبتسامه؛رقدوا الصغار؟
لينا:ايه قبل تروحوا بشوي..
الشريف هز راسه وقال:هادم امتى يروحوا الساعه قريب 11..
زبيده:مروان مشي يروح بيهم
لينا:تلقاهم على جية...
🏵🏵🏵🏵
ومروان فهالوقت قدام حوش حماة رنده يراجي فيهم ع اعصابه..
زي مامعروف عن الرجاله مايحبوش يستنوا غالبا..
وداخل امه ومرته واتيات لكن يراجو في رنده..
علاش!؟
رنده:عادي غدوة ترفعني لحوش ماليا العيله بيلتموا غادي واني نبي نحضر..
محمد:اياه عاد قعدت كراطون اني اعرف جيب مانعرفش نقعد يوم راحتي في حوشي متريح!
رنده بضيق:باهي كان هدا خليني نروح معاهم وغدوة في الليل تعالى روح بيا..
شبحلها شويه بعدين قال:تمام بري روحي معاهم..
برغم انها كانت حتصر لو سكر راسه ومنعها وهي كانت متوقعه انه يرفض وتصير بيناتهم مشكله...بس وافق بسرعه وهالشي خلاها مستغربه فيه..
بس غرور رنده خلا هالإستغراب فيسع مايتلاشى لما فسرت موافقته السريعه على انها خوف تصير مشكله تخليها تحرج عند اهلها...
رنده:خلاص اتفقنا...
تو نكلمك بعدين..
محمد هز راسه بدون مايعلق..
وهي قالت:تصبح ع خير...ومشت من حداها..
وهو قعد معاها بعيونه لين ادرقت من قدامهم...
🏵🏵🏵🏵
الحوش مظلم ماعدا سقيفة الحوش كان ضيها مفتوح..
هي مقعمزة في الصاله بروحها وعيونها ع التليفون..
كانت تبي ادير شي..ومتردده..
لعند ماتشجعت وحسمت امرها وبدت تكتب في الرساله..
..........
مقعمز ع السرير وثاني يده اليسار ع راسه وبيده اليمين شاد كتاب ويقرا فيه..
فجأة رن تليفونه بنغمة رساله..
شبحله وهو ع الكامدينو..
نزل يده اليسار وخداه بيها...
وشبح للشاشه شاف رساله من رقم غريب فتحها..
"لو تعرف قداش استاحشتك..استاحشت كل شي فيك بالذات وعارتك...ياريتك عرفت قداش نحبك حب مش حتلقاه عندي غير مهما دورت"
هو يقرا وحواجبه معقودات بإستغراب...بعدين مسح الرساله..
ورد التليفون لمكانه ورجع يقرا في الكتاب.
🍁وهي تراجي في رد مش حيجي..
راجت وراجت...لين سمعت صوت باب الحوش انفتح..
بعدين سمعت صوت ضحك خوها ومرته..
وكلمات الغزل اللي يقول فيها خوها لزوجته..
حست بكل كرية دم فيها ولت نار تحرق فيها حرق..
ناضت ومشتلهم وهي تقول:وين هدا كله..
هما انخلعوا لما شافوها..
خوها قال؛هادي جيتنا من حوش اماليها..
مررت نظرها عليهم وقالت:ماتجيش تطلب مني فلوس لأخر الشهر معاش عندي راهو..
ولفت ومشت لدارها هي وخواتها..
مرته قالت:يالطيف ياربي وخلاص..
هو قاللها:زهور تفكر في مصلحتنا عندها حق حني نبزعقوا هلبه الفترة الاخيرة..
مرته شبحتله بإمتعاض بعدين مشت لدارهم ..
لحقها وهو مضايق من الوضع اللي وصلوله..
هما عطاله بطاله مايديروا في شي...وعاشوا ع فلوس خواتهم ومرتباتهم..
وزهور بعد اطلقت ماداروش فيها خير لكن خواتها ساعدوها بش توقف ع رجليها وتخدم ...وفعلا خدمت والمشروع اللي فاتحاته دارلهم مصدر دخل كبير استفادوا منه هلبه ومن بعدها حست زهور بانها في مكان قوة وصاحبه فضل عليهم واستغلت هالشي لصالحها...
وهما طبعا بعد تزوجوا زلوا يخدموا معاها وياخدوا منها في مرتب..لهذا رضاها عندهم اهم شي..
ماهم من بعد فضل الله عايشين في خيرها زي مايقولوا...
🌺🌺🌺🌺🌺
الساعه 12:00ليلا..
في دار رتيل..
بعد مابدلت حوايجها قالت:بنرقد هني مش راقده غادي..
رتيل:حلو عندي فيلم خل نكسدوا عليه..
رنده بضحكه:باهي..عندك شي لهالتكسيده..
رتيل بضحكه:وشويات..ومشت للدولاب وطلعت اكياس شيبس وعصاير و#شكولينا
رنده:يعع...مازال تاكلي من هالقرف..
رتيل:قرف عينك تهبل..
رنده بإزدراء:هاتي جاي هاتي...خدت منها شيبسي وقعمزت ع السرير...
🏵وحطت رتيل الفيلم في جهاز الاب متاعها وقعدوا يتفرجوا الزوز ...
رقدت رتيل في نص الفيلم ورنده كملاته للنهايه..
بعد تم...
سكرت اللاب توب ولهت ببنتها اللي ناضت تبي ترضع..
بعدين اتصلت ببوها تشوفه...
ولما اتصلت بيه..لقاته انتظار...اتفاجئت...
قعدت تفكر في من يكلم فهالوقت...!
وعاودت اتصلت بيه تاني..لين رد عليها..
رنده:انتظار يامحمد!
"كنت نكلم في واحد نعرفه برا البلاد في شي يخص الخدمه"
رنده:توا يامحمد فهالوقت!
"قتلك برا البلاد يعني الوقت عنده هو مناسب "
رنده قعدت ساكته ...مش مقتنعه بكلامه وانتابها اتجاهه شعور بالشك.
"رنده وين مشيتي...رقدتي!"
رفعت حاجبها وقالت:لافايقه قاعده فايقه وواعيه كويس..
"تمام...احكيلي شن جو اللمه"
رنده شبحت لرتيل بعدين قالت؛كويس..
وكملت هدرزتها معاه اللي كانت بارده الى حد ما من طرفه هو هالشي مخلي بال رنده ينشغل وقلبها مش مرتاح...
🌺🌺🌺🌺🌺
في صباح اليوم التالي..
الساعه العاشرة صباحا...
في حوش الشريف...
اللي ضي الشمس خاشله من كل شباك مفتوح بش يتهوى ويتمشس..
فيه من تدور بالمكنسة الكهربائيه وتكنس...لينا...
واللي حاصله في الحمامات تكد وتعاني...منى...
واللي شاده الملمع وتمشي وتلمع وتمسح...رتيل...
واللي مقعمزة تشرب في القهوة لانها هدا وين ناضت...رنده..
وبرا...
سفيان ومروان كانوا يركبوا في قيطون يفصل الجنان لنصين...
نص للرجاله ونص للنساوين...
اليوم الحاج الشريف عازم العيله العزومه اللي تأجلت بسبب موت عدنان...
العزومه او اللمه هادي زي السبر عند الشريف..
يعزم عيلته كامله ياعلي غدي او عشي...
بس المره هادي كانت عزومه لابسة ثوب زرده...
حتكون بعيده عن الرسميات تماما...
تحت الشمس في الهوا الطلق....
وشوا وعصبان ومبكبكه...ومايكمل اجواء اي زرده...
••مروان:باهي هكي..؟
سفيان:ايه تمام...مش عارف شن خطرله بوي..خلاها عزومه عاديه زي اللي قبلها وريحنا..
مروان بضحكه:هو كله يوم تحمله وخلاص..
سفيان؛هو هدا ...
ومشي بيركب لشقته..
ومروان مشي قعمز ع الكرسي بيرتاح شويه لكن ولده خلاشي ناضله يجري وهو يقول:تي وين ماشي ياولد تعالى جاي!...
••داخل...
في دار التقعميز..
مقعمزة بنت وولد خوها جنب بعض..وتصور فيهم وهي تقول..
رنده:الله يبارك عليكم ياعمري تجننوا...وقعدت تصور...
وجيهه؛مش تنزلي ع الفيس ردي بالك
رنده؛تبي ولدك يذبجنى مالا...لالا مش مستغنيه عن روحي..
ع خشة لينا شافتهم مقعمزين وعمتهم تصور فيهم
ابتسمت..
وجيهه:هاه كل شي تمام..
لينا شبحتلها وقالت:ايه اللاي كملنا البيت كله..
رنده بتهكم:يعطيك الصحه ياست البيت..
شبحتلها امها..
ولينا تجاهلتها وقالت:جداي معاد تبي تخش..
وجيهه شبحتلها وقالت:حصلت الجو الحلو والشمس ..
"امي"..
وجيهه شبحت للينا كيف شافت للتلفزيون وهي مضايقه..
ناضت وهي تقول؛يارب..
ومشت طلعت..
رنده:مابعدها بتقعد عمرها كله وهي تخدم ماتقولش عنده مراة..
لينا مازال متجاهلتها..
وهي قعدت تشبحلها برفعة حاجب تبي تستفزها بأي طريفقه..
ع خشة وجيهه وهي شاده بيده بدله عربيه لونها عسلي..
واليد التانيه قميص وسروال جينز وقالت:لينا..
شبحتلها لينا وقالت:نعم..
وجيهه؛راجلك قالك حدديهم..
لينا:هو قال؟!
رنده:شن تكذب عليك!
وجيهه بتهكم؛شورني!
لينا؛مش قصدي يااللاي بس استغربت وانتي تعرفي ليش..
وجيهه:خوديهم خودي وخفي روحك وراكم خضرة تبي التقريض..
لينا جتها وخدت منها الحوايج وقالت:باهي...وين نحددهم..
وجيهه:في دار حدا المربوعه هديكا اللي نحددوا فيها الحوايج..
لينا هزت راسها وقالت:حاضر..
ومشت طلعت من حداهم...
رنده:حق هو اللي قال!؟
وجيهه:والله العظيم هو..
🌺🌺🌺
وصلت لدار الكوي..
اللي تخشلها اول مرة..
كانت نظيفه ومرتبه وريحتها حلوة..
فيها جنب طاوله الكوي ووالمكوى العاديه والمكوى البخاريه والشماعه..مكتبه وكنبه طويله طول...
سكرت الباب...ومشت بفضولها بإتجاه المكتبه...
كانت مكتبة تحف وماعين انتيكا قدم..
وفي من داخل كاتروات صور...
من لوطا ع اليسار...صورة طفل رضيع مبتسم كان يشبه لبحر..
من ابتسامته حساته عدنان...وفعلا كان عدنان..
ابتسمت وعيونها غرقوا بالدموع..
بعدين شافت في الرف تاني صورة فيها هما التلاته بس اعمارهم كانت مختلفه..
سفيان يبان في سن المراهقه ومروان في الابتدائي او الاعدادي وعدنان صغير...
لفت انتباهها سفيان كيف كانوا خوته ضامينه بقوة وهو يضحك..
لما شافت ضحكته استفزتها...
لينا:ماحاسب في روحه من وهو هكي..
غيرت عيونها عن الصورة وشافت للجانب التاني..
لقت صورة مركبه تركيب لسفيان ومروان وعدنان في حفلات تخرجهم..بس عدنان كاين يختلف...
وهي سرحت بفكرها معاه وهي تشوفله غصب عنها والدموع تنزل بروحها...
استاقظت لما سمعت صوت سيارة خاشه للحوش..
مسحت دموعها ومشت للكنبه حطت عليها الحوايج وبدت بكوي اللبس العربي هو الاول...
وهي منشغله بالكوي قعدت تسمع في اصوات نوريه وعفاف وصغارهم وضحكه عفاف المميزة اللي تنسمع من اخر الشارع وحصلت عليها هزيبه من سفيان..
بعدين سمعت صوت هدرزة الرجاله اللي كان قريب عليها باعتبار الدار اللي هي فيها جنب المربوعه...
كملت تحديد البدله العربيه وعلقتها ومشت للبسة الافرنجيه..
كيف خدتها من ع الكنبه انفتح الباب انخلعت والتفتت..
هو وقف في الباب وقال بصوت منخفض:خفي روحك..
لينا التفتت وقالت:باهي..
سمعت باب الدار تسكر...تنهدت براحه وخدت الحوايج ومشت بيهم للطاوله..
وين وصلت فيها بدت بالسوريه..
وقعدت تكوي...سمعت صوت ضحك الرجاله..شبحت للباب شهقت بخلعه مرة تانيه..
سفيان:قصدي هدا كله ومش حاسه اني موجود..
لينا تجاهلاته ورجعت ركزت في الكوي..
هو شبحلها شويه وقال؛قلنا آسف وقاعده قالبه وجهك..
لينا وهي تظاهر بإنها متجاهلاته من داخل ميته من الخوف..
وقاعده تكوي وحاطه تركيزها كله في الكوي وبس..
هو قعد واقف يشبحلها وابتسامه تشوبها ملامح العصبيه مرسومه ع وجهها..
اخفى هالإبتسامه ورفع حاجبها وجاها وهو يقول؛مش هكي يحددوا السواري..ترا حولي شويه..
هي طبعا قاعده تحاول تضبط اعصابها..
حطت المكوى وبعدت...
وهو خداه وبدي يحدد ويقول:اشبحي وتعلمي..
رفعت حاجبها وقالت:مدام مانعرف نحدد ليش قايلي حدديهم..
سفيان رشف وكمل كوي وهو متعتمد يردلها تجاهلها ليه..
لينا؛معناها نطلع...
سفيان؛لا...بري قعمزي غادي لين نكمل..
هي غمضت عيونها في محاولة منها لتمالك اعصابها..
لفت ومشت قعمزت ع الكنبه..
وربعت ايديها..
وهو داير روحه منسجم في الكوي...وعقله عندها..
والقلب يرعد...والمشاعر تعصف...
وهي بعيونها مع صورة عدنان الكبيرة وهو في عمر ولده بحر الدين...
قام عيونها وشافلها...
تبدلت ملامح وجهه للصدمه..وفيسع ماتبدلت لملامح غضب ممزوجه بالحزن..
غير عيونها عنها ومشي للباب وفتحه وقال:نوضي اطلعي.
لينا شبحتله وهي مستغربه..
بعدين ناضت ومشت للباب..
هو طلع هي طلعت وراها..
وصلها للفتحه اللي توصل للصاله وقال:بري..
وهي مشت طول...
مشي طول رجع للدار سكر عليه الباب..
توجه لوين ماموجودة الصورة..
قعد واقف يشبحلها وقلبه موجوع ع الآخر..
قام عيونه وشبح للصورة التانيه..
قعد مركز عدنان وهو ضامه ويضحك..
نزلوا دموعه وقال بألم:سامحني..
مسح دموعه....وخدي فتح الدولاب وخدي الصور...
وحطهم في الدرج وسكر عليهم..
بعدين مشي كمل تحديد حوايجه وهو يمسح في دموعه اللي ينزلوا رغما عنه...
ووحده الله يعلم بحجم الألم والعذاب اللي يحس بيه حاليا..
🍁وعقله مابطلش تفكير..
لعند مامشي لصلاة الجمعه...وجوده في بيت الله في هداكا المجمع اللي تنزل فيه الرحمات ومحاط بالسكينه والطمأنيه..
خلاه يفكر بإتزان وعقلانيه بعيد عن العواطف..
ويحاول يفهم اللي تمر بيها لينا وتحسه....حط نفسه في مكانها في كل شي حتى المواقف اللي صارتله معاها لما كان سلفها...
بدي شويه شويه يحطلها الأعذار ويتفهم اللي هي تمر بيه...
ولما جي وقت اداء الصلاة..تضرع لله بالدعاء في السجود..
ان يلهمه الطريقة الصح اللي يقدر يتعامل بيها معاها..
بش يكسب اقل شي معزتها وهو طامع في حبها...
🌺🌺🌺
فهالوقت...
كان جنان حوش الشريف زاحم بالناس..
كانوا مفرشيينه بحصاير...وعليهم جلسات مرتبات بطريقه حلوة...
تنسمع اصوات الهدرزة وكأنهم في خلية نحل..
وفي تركينه ملتمات يديروا في العصبان...
وعيون الموجودات ع لينا..
ومنهم حور بنت عيشه..بنت عم الحاج الشريف...
حور هادي جامعيه وفاتحه بوتيك ملابس تخدم فيه من فترة..
مثقفه وجميله...وراقيه...وعينها ع سفيان زمان بس مافكرتش ولامرة تقرب منه...بعد تزوج زهور قطعت رجلها من حوش ولد عم امها..
وهادي اول مرة تجي بعد شدت فيها رنده..
لفتت انتباهها لينا هلبه كانت جدا مميزة بكل شي فيها وجذابه...لما شافتها لاول مرة زال استغرابها من تمسك عدنان بيها...
وتوا حترجع تستغرب هلبه لو قالولها ان سفيان ماطاحش في حبها...!
نوريه؛كان نحصلوا حد يجيبلنا اعواد سل من النخل..نبعت رفيده؟
عفاف:وين تعرف رفيده..
ربيعه:اني ماشيه نجيبه بروحي معاش في وقت..
وناضت ومشت...
اساور:بكل امي تو كان يجوا خاشين عليها...
ضحكوا..
وفجأة سمعوا باب الحوش انفتح...
عيشة:حصلت..
زبيده؛تحسابيها تعدل تو تفتح معاهم هدرزة..
قعدوا يضحك...واساور تضحك وهي منحرجه...
شويه سمعوا ربيعه تقول"زي وليداتي ووخيني...ووك منك كلا انت"
وطلعت من ورا القيطون وهي تقول:غير ولى راجل بشناباته كان هدا شديته من وذانه..
:من هو..
ربيعه؛من غيره النار الحمرا اللي لسانه يفرش الجنان سفيان ولع فيا وقولي شن دير هني خشي داخل..مسعود ماعلاش عليا صوته هكي..
كلهم قعدوا يضحكوا..
وجيهه:وليدي حزار ياربوعه..
ربيعه قعمزت وهي تقول:لين فايت فيه مابعدك يابنتي..
كلهم شبحوا للينا..
لينا في خاطرها"مابعدي وسكتي"..
رنده؛اللي طيح في سفيان يابختها مش مابعدها..
ربيعه:باهي باهي...المهم جبت السليلات...
زبيده؛وين يسدوا هادم..؟
منى:نخيطوهم خياطه وخلاص..
نوريه:مالا انتي اللي بتخيطي !
كلهم شبحوا لمنى اللي وجهها ولى احمر من الاحراج..
ولينا شبحت لنوريه بحده..
وحده من سلفات وجيهه:ايه الخياطه خير..
نوريه:خلاص نص يدير بالسلول ونص يخيط..اهم شي منى ماتخيطش..
منى بتحدي:لا بنخيط مانحبش نديره بالسلول..
وجيهه:خلاص خيطي المهم هيا خفوا ارواحكم..
نوريه:امري اللي بديريهم يامنى..
وجيهه فنصت في نوريه؛قلنا هيا ابدوا معاش في وقت..
نوريه خدت من السلول بعصبيه ..
ورنده تشبحلها ..
والباقي بدوا يشتغلوا ع العصبان..
وبعد كملوا حطوه ع النار...
بعدين جي دور المكرونه اللي شدتها وحده من بنات العيله..
ولينا كانت توتي في لحم الشوا تحت المظله..
وعيون حور عليها وهي تهدرز مع رنده..
حور:ياريته كمل لين خدي الدكتوراة..
رنده:الله غالب الظروف جبراته مرة تانيه يضحي بيها..تعرفي حور ان خوي ماكانش يبي زهور و ع خاطر امي بس خداها وعاش معاه عيشه كلها نكد في نكد وفي الاخير طلقها...
حور:من اللي سمعته عن مرته الاولى انها كانت جميله ومراة كويسه..
رنده؛لكن فيها هلبه عيوب الحق ياربي مش لخوي من الاول..
حور:باهي وتوا؟
رنده شبحت للينا وقالت؛-عاد من اللي مايعرفش علاش تزوج توا..
حور:قصدك مايبيهاش..
رنده بضحكه:شن يبي فيها؟! معاش تعرفي سفيان توا ياحور!
حور:بس والله حرام اللي صاير...
رنده:صدقتي...لكن اني عندي امل في ربي يعوضه بوحده تستاهله وتليق بيه وخيي حالفه اني وخواتي كان قال يبي يتزوج نديروله عرس ماصار..
حور:يعني هي ماعندهاش مشكله..
رنده:ولاتقدر تفتح فمها اصلا ولت ع خاطر صغارها وحتكمل عمرها وهي تربي فيهم..
حور هزت راسها بإقتناع وعيونها ع لينا..
••في الكوجينه..
عفاف توتي في السلايط مع نوريه وهما يهدرزوا..
"عفاف"..
عفاف؛تعالى سفيان..
بان عليهم وهو لابس قميص ازرق مزلز نص كم..وسروال جنيز ازرق غامق..وع راسه طاقيه وعيونه مغطيات بنظرات شمسيه..
سفيان؛وين اللحم..
عفاف:لينا توتي فيه برا..
رفع حاجبه وقال:وينها بالزبط؟
نوريه شبحتله..وعفاف قالت :تحت المظله..
سفيان:قراب عليها النساوين؟
عفاف وهي نتشبحله بإستغراب :لابعاد هي هني وهما غادي منها بهلبه..
حك ذقنه بظهر سبابته بعدين قال:اطلعوا قولولهم يلبسوا حجابهم..
عفاف هزت راسها بإيجاب ومازالت مستغربه فيه. ومشت طلعت..
ونوريه تخلط في السلاطه وهي مستغربه اكثر من عفاف..
شويه خشت عفاف وقالت:تعالى..
سفيان مشي طول وطلع من الكوجينه..
شاف لينا تحت المظله وحداها بحر وياسمين كل حد كروسته..
وهي تصور بتليفونها فيهم ومعاهم الصغار...
ابتسم ومشالها....
وعفاف معاه بعيونها..
وعيون بنات العيله عليه وهو خاش تحت المظله..
سفيان؛ان شاء الله غير درتي حاجه باهيه..
لينا بإمتعاض:عدوا حبيباتي العبوا غادي..
االبنات مشوا من حداهم..
وفي ناضت ووقفت ورا الكرسي وبدون ماتشبحله اشرت عليهم...
هو قال:ايه شن يعني مافهمتش..
هي تنهدت وقالت:اهم ارفع..
سفيان:تبليتهم كويس ! مانبيش نتحشم قدام هالامه..
لينا حطت ايديها ع ظهر الكرسي وشبحت لصغارها ومابتش ترد عليه..
ابتسم وغير عيونها عنها لشيشة الميه خداها وقال:الجو نو اليوم..
هي سمعت مغطى الشيشة انفتح شبحتله وقالت بتفنيصه:لا ماتشرب منها..
سفيان:مش مكلمها عليك ماتخافيش..وفتحها وقعد يشرب..
لينا بشي من الازدراء:خلاص خودها معاد نبيها..ورجعت شافت لصغارها...
هو شد ضحكته بعدين نزل الشيشة وسكرها وهو يقول:امم..مزهرة الميه..
مابتش ترد عليه..
رفع حاجبه وشبح للشيشه بعدين تنهد وقال:انتي الخاسرة..قبل بندوي معاك في موضوع مهم..يهمك هلبه ..ع #شكولينا..
هي قلبها دق بقوة لما اسم #شكولينا..
شبحتله بعيون تلمع بلهفه..
سفيان ابتسم بدهشة مصطنعه وقلبه يدق بقوة وهو يشوف لعيونها وقال:ريت العيون كيف ولوا قلوب!
هي انحرجت ونزلت عيونها طول وقالت:تحكي جد!
سفيان ابتسم ع جنب وقال؛وجد الجد..لكن عندي شرطين نبيك تنفديهم قبل لندوي في الموضوع..
لينا بخوف:شروط شن؟!.
رفع صوابعه السبابه والوسطى وقال:شرطين...نزل يده وشد بيها ظهر الكرسي اللي قدامه...الاول تلمي حوايجك وتاخدي الصغار وتركبي للشقه..
لينا قلبها قريب يوقف من الخوف..
سفيان؛هاه شن قلتي؟!
شبحتله وقالت؛شن غير رايك بعد شهر؟!
سفيان بجديه:مايجيش الوضع هدا بايخ قدام الكل اركبي اقعدي في دارك معززة مكرمه.
لينا ارتاحت..بعدين هزت راسها بالموافقه..
ابتسم وقالت؛وتوا نجوا للشرط التاني...ديريلي الكعك المخنفر.
لينا شبحتله وهي مضيقه عيونها وقالت؛كعك شن؟!..
هو رفع حواجبه وقال:هداكا اللي درتيه يومها في عيد ميلاد نور..!
لينا:شن اسمه؟!
سفيان ؛كعك مخنفر!.
لينا غمضت عيونها وهي تحاول بكل قوتها ماتخليش ملامح الضحكخ ترتسم ع وجهها بعدين فتحتهم وقالت؛كعك مخمر مخمر..منين جبتها مخنفر هدي؟!
سفيان عقد حواجبه وقال بشي من الربكه:مخنفر مخمر..المهم هداكا الكعك..نبيه العشيه..
لينا:باهي...
خدي الحافظات وحطهم ع بعض وشبح لبحر وياسمين اللي كانوا يشبحوله ..ابتسم..
ومشي بالحافظات اتجاه الكوجينه..
لينا تنهدت وقالت في نفسها"زعم حق ولايضحك عليا!!لكن هو ولامرة قالي كلمه ورجع فيها..لاوين الاحترام ماريت منه شي...المهم خل نعدي نعجنله الكعك.."
لينا:رتيل..
رتيل؛نعم..
لينا:تعالي خوديهم...
رتيل:هي جايه..
لينا مشت للكوجينه وعيون معاها..
:شكله سفيان هو ومرته متفاهمين..
اساور شبحت لرنده بضيق وهي تراجي في ردها..
وكذلك حور..
رنده:عادي يعني طبيعي بيتفاهموا ع خاطر الصغار..الصغار لازم يكبروا وهما يشوفوا الاحترام متبادل بين امهم وعمهم اللي يحل محل بوهم توا..
اساور؛ايه صح...
ورنده من داخلها مش مقتنعه بولا كلمه قالتها لان اللي شافاته مايبشرش بالخير بالنسبه ليها هي طبعا...
🌺🌺🌺🌺
وقعدوا يراجو في العصبان امتى يطيب والشوا امتى يوتى.
ولينا في الكوجينه ادير في الكعك..
وهي تدهن فيه..
"امي"..
لينا؛خش..
سفيان خش وهو مبتسم ابتسامه جانبيه وقال:اووو درتيه صار..
لينا:رغم اني مش واثقه في جدية كلامك بس مادام طلبته مجبوة نديره خير ماتحرش فيا امك بعدين..
حط الصفرة ع الطاوله وهو يضحك..
بعدين قال؛كويس في الجديد تو نستغلها نقطة امي هادي..المهم توا لازم تعرفي اني دويت معاك مني جد..في الليل نزيد نهدرزلك ع الموضوع اكثر..
لينا قعدت ساكته ومن داخل فرحانه هلبه..
سفيان؛كلميهم ع الغدي قوليلهم المغرب قريب يذن..
لينا:خل نحط الكعك المخنفر في الكوشه قبل..
هوقعد يضحك بصمت..
وهي شاده ابتسامتها بدون مايشوفها ..خدت الطواجين وخطتهم في الكوشه بدون ماتولع عليهم بش يزيدوا يخمروا ومشت طلعت من الكوجينه...وهوتنهد بإبتسامه بعدين مشي طلع...
🌺🌺🌺🌺
وجهزوا الغدي للرجالة والنساوين..
وبدوا يتغدوا واخيرا....
لكن بعد هالإنتظار المرهق...
ماانكتبلهمش يتهنوا بيه..
••عند الرجاله..
واحد من شباب العيله وهو ياكل في العصبان..
وين شد الكرشه كويس حس بشي نخص صبعه..
استغرب وقعد يتفحص فيها...واللي لقاه صدمه وصدم الموجودين...
لقي يبرة....
كلهم قعدوا يشبحوا لبعضهم..
والشريف وجهه ولى اسود من الموقف..
وحال سفيان ومروان مش خير منه..
.................
"يبرا!!؟نهار احرش"
سفيان بعصبيه؛تي شن عاطينه لنور ورفيده يديروه معقوله هكي!!؟باهي اللي بلعهاش الراجل وصارت كارثه..
وجيهه؛ياحشمتي ياعاري!..
نوريه وهي حاطه يدها في نصها؛شن قلت اني يما..جيتي لكلامي توا!؟
وجيهه:معقوله!
عفاف؛؛تعرفيها يام عندها ظرف وصار معاها كذا موقف قبل هكي ..
وجيهه؛لكن نظرها ضعيف مش مذهوبة شيره!
مروان:ع من تدووا انتم؟
نوريه؛ع مرتك اللي ماتبيش اديرلها حل..
مروان؛ومن قالك هي!؟
نوريه؛مابيديرها حد غيرها..ناسي شن دارت في حوايج بوي لما صبت عليهم الوركينه قالت ماشفتهاش كويس..
ولما دارت رز.غير ماتنقيه كويس طلع للناس بالسوس اللي فيه...ولا..
مروان؛خلاص خلاص..اسكتي..ومشي طلع من حداهم..
سفيان؛باهي مادامكم عارفينها هكي علاش تخلوا فيها هي دير معاكم؟!
نوريه:تكلمت اني ماحد سمعلي..
سفيان بإستياء:استغفر الله العظيم..
ولف ومشي طلع من حداهم...
وجيهه مسحت بيدها ع وجهها بعدين قالت بحده:نادوهالي..
نوريه مشت طلعت...
لقت منى تغسل في الماعين مع البنات وتهدرز وتضحك..
رفعت حاجبها ونادت:منى..
التفتت..
نوريه؛تعالي..
ومشت خشت داخل..
منى قلبها انقبض من طريقة مناداة نوريه...
سيبت اللي فيدها ومشت وعيون لينا معاها....

....يتبع....