حب❤بعد⬅️الزواج💍الجزء 2

💔 الحلقة 33 💔

ادم : كاين....ايدا ماكانوش من المرا اللي حبها قلبو راح يكون بارد من جهتهم

جهان : بصح هادي ماشي السبة الاولاد ماعندهم حتى ذنب

ادم : يعني لوكان نجيك مع بيبي و مرا و نقولك هذا وليدي و يماه تقبلي

سكتت جهان مدة طويلة تخزر فيه قلبها يدق بقووة خايفة يكون هاد الشيء صح خذات نفس عميق و جاوبت : ايدا كان هاذ الشيء قبل ماتتزوج بيا فعادي اما بعد زواجنا نسمع بللي خنتني ولا رحت عند مرا وحدوخرة لتما ماراحش نقدر نسمحلك

قعد ادم مركز مع هدرتها حاس بللي مصيرو و مصير زوجهم كامل فهاذ الهدرة عاود جبدها لعندو مزير عليها فصدرو بعد ماكانت مدنية تخزر في وجهو و تهدر معاه

ادم : ج..جهان اسمحيلي

هو غير قال هكا و جهان قلبها حبس خلاااص ماقدرتش تزيد تسمعو واش راح يقول ولات هي دخلت فصدرو هاربة من كلامو اللي جاي

ادم : ا...انا غلطت و اليوم جات ...........(حكالتا واش صرا صباح)

حابين تعرفو حالة جهان بعد هاذ الخبر ؟!!!! حست حاجة في قلبها تقطعت من داخل دموعها هبطو ضربة وحدة (على خطرة) شوية شوية ولات تشهق😭
اومبعد بعدت عليه سيا يرجعها لعندو بعدت ناضت من قدامو جات مقابلاتو تخزر فيه

جهان : وقتاش صرات (تقصد وقتاش مسيتها باش جا هاد البيبي)

وقف ادم معاها يسيي يشدها من يدها بعدت عليه خزرت فيه تهدر بهستيريا : رااااني نقوووولك وقتااااااش......قعدت تخزر فيه هكا🥺 و هو غير يشوف فيها بندم شافتو ماردش ولات هي هدرت

جهان : ليلة العقد كنت عندها !!!؟ اه جااااوب

ولات تضرب فصدرو : حسبتلك مافقتلكش!!ماشفتكش جاي برقبتك مطراسية حسبتني بهلولة نستقبلك بالحضان monsieur نهار العقد تاعو جاي روطاار و en plus رقبتك كامل معمرة
بالrouge💋💄.....حاسبني مانشوف مانحس

شدت شعرها مزيرة عليه مرجعاتو للور خذات وقت تتنفس بلاعق و تستغفر اومبعد هدرت : عيط لسهام اتفاهمو ديرو نهار روحو اتزوجو فيهم ماتطولوش كثر و يفيقو الناس بكرشها بسك لتم البيبي هو الوحيد اللي راح يتأثر

رفدت تيليلونها من فوق الفوتاي و قالت : ماتبعنيش خليني محتاجة وقت نريح راسي فيه

خرجت تجري من salon طالعة لفوق دموعها هابطين شرشار كانت رايحة تروح لشمبرة وحدوخرة ترقد فيها اومبعد تفكرت نصيحة شافتها وحد النهار فinsta : يصرا واش يصرا بينك و بين راجلك عمرك ماتخرجي من شمبرتك و تهجري فراشك❌

ولات دارت دخلت للشمبرة راحت ديراكت لla coiffeuse ديماكيات و دخلت للدوش غسلت و توضأت راحت لبست حجابها صلات اللي فاتها و قعدت فالزربية (الحصيرة) تاع الصلاة تقرا فالقرآن و تبكي كي حست روحها ارتاحت شوية دعات ربي يفرج عليها و راحت لpلاصتها تكسلت غمت روحها بالغطا شادة في كرشها تخمم فالبيبي اللي راهو يكبر داخلها بلا مايعرف باباه بوجودو و تسيي ترقد فنفس الوقت قبل مايطلع ادم