شكولينا

الجزء الثالث عشر"القسم الاول"

الصلاة أولا...💕💕💕💕
《في بعض من الحوارات حقيقيه وهي تعبر عن وجهة نظر اصحابها 》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
مازالت مقعمزة في مكانها وعيونها ع التلفزيون اللي كان محطوط ع قناة "كويست عربيه"..
كانت منسجمه وهي تتفرج...
وجده زوجها تاكل في "الزميته" ومرة مرة تشبحلها..
شويه خشت عفاف ومعاها نور...
عفاف:لينا..
شبحتلها لينا..
عفاف بصوت منخفض:لهي نور شويه امها بتطلع..
لينا هزت راسها وشافت لنور لقت شعرها مطلوق وفي يدها مشط..
لينا ابتسمت وقالت:ترا تعالي نمشطلك شعرك ونديرلك تسريحه سمحه..
نور:اديري تسريحات!؟
لينا:اها وحلوات واااجد..
عفاف جت لحناها وقالت:هي نوضي معاي حناي..
زبيده؛قيمي السفرة..
عفاف:حاضر..
نوضت عفاف حناها وخدت السفرة ومشوا طلعوا..
اما نور قعمزت قدام لينا وبدت لينا تمشطلها في شعرها وهي تقول:ماشاء الله شعرك طويل وسمح كيف "ربونزل" تعرفيها..
نور:لالا..
لينا:خل نحكيلك قصتها..هدي بنيه سمحه واجد كيفك تو..
🏵🏵🏵🏵
حدا باب الحوش..
كلهم واقفين يسقدوا في نوريه..
نوريه ودموعها ينزلوا:الله الله في صغاري يام..
وجيهه ودموعها في عيونها:في من توصي انتي..
رنده بدموع:ماتخافيش عليهم نويرة..
نوريه:نور بالذات نور مش واخده ع فراقي..
وجيهه:من غير سو يابنتي فراق شني ماشيه تحجي وتروحي بإذن الله لاسو لاسويه..
نوريه:آمين...هي بالسلامه يام..
وقعدت تسلم عليهم بالوحده والدموع مابطلتش نزول..
بعدين شبحت للكناين وقالت:ردو بالكم ع صغاري الله لايسامحكم لو كشختوا عليهم ولاضريتوهم..
زهور:الله يسامحك يانوريه.
منى قعدت تشبحلها وهي ساكته..
وجيهه؛صغارك عند حناهم مايقدر حد يقوللهم حولوا من الطريق..
نوريه:ربي يطول في عمرك ياغاليه..
فجأة..سمعوا صوت منبه سيارة..
نوريه:هي خلاص بالسلامه ...
ولفت ومشت طلعت بسرعه..
رنده خشت داخل وهي تبكي..
اما وجيهه لحقت بنتها برا تسقد فيها..
عفاف ببكي:ربي يردها سالمه غانمه...
زهور:آمين...
مشت عفاف خشت للمربوعه وقعدت تشوف من الروشن من ورا الستار..
لقت نوريه تسلم ع بوها...بعدين ركبت سيارة راجلها وطلع بيها...
امها بعد طلعت قعدت تبكي بقوة وراجلها يهدي فيها...
وولاد نوريه مقعمزين ع الدروج يبكوا...
عفاف:ياروحي وليداتي...ومشت بش تطلعلهم....
🏵🏵🏵🏵
لينا:كملنا..ترا لفي وريني.
لفت نور للينا..
لينا:الله يبارك ع السماحه طالعه عسل...
نور:نبي نشوف في المرايه..
لينا"وين بنلقالها مراية تو..زعم امها طلعت ولامازال"..
ع جية منى: طلعت..
لينا هزت راسها وناضت خدت نور من يدها وقالت:في مرايه قريبه..
منى ابتسمت لما شافت نور وقالت:ماشاء الله...ايه في تعالي...
لينا:هي تعالي نوارة..
ومشوا طلعوا ورا منى...
لين وصلوا في مراية المدخل...
خدت لينا نور ورفعتها وقالت:هاه شوفي..
ابتسمت نور بإندهاش لما شافت شعرها..
لينا:عجبك..حلو؟
نور:ايه حلو..
لينا بإبتسامه؛ربي يحفظك..
نزلتها لينا...ونور التفتلها وقالت:احكيلي حكايه تانيه..
لينا بإبتسامه؛حاضر..
منى؛بالك واسع معاهم..
لينا:مافيش احلى منهم انظف ناس تقعدي معاها فالدنيا..
منى ابتسمت وقالت:صدقتي..انظف ناس...
ولفت مشت وهي شاده ظهرها..
ركزت لينا ع الحركه متاعها..
نور:هيا احكيلي قصة..
لينا بضحكه:باهي تعالي..
وخدتها وولت بيها للدار...
🏵قعدت تحكيلها في قصص وتهدرز عليها ونور انسجمت معاها ع الآخر..
وجيهه وهي جايه بتخش الدار شافتهم ولقت نور تضحك مع لينا..
لينا انتبهت لعزوزتها واقفه في الباب قالت:تبي حاجه..ع..اللاي..
وجيهه:ايه..اطلعي للكوجينه الخارجيه تلقي شوال معبي بازليا كسدي عليه..
لينا ابتسمت وقالت؛باهي..نرفع معاي نور عادي؟
شبحت وجيهه لنور شويه بعدين قالت:باهي...
لينا ناضت وهي تقول لنور:هي تعالي معاي يسمحه نكملوا القصه غادي..
ناضت نور وشدت يد لينا..
ومشوا بيطلعوا...
لينا وين وصلت لعزوزتها قالت:تعدي وتروح سالمه ان شاء الله..
وجيهه:آمين..
ابتسمت ليا ومشت مع نور للكوجينه...وجيهه خشت للدار..
🏵🏵🏵🏵🏵
"عليك ثقة عنده مرشح روحه بش يكون عميد ع اساس دار حاجه باهيه وهو رئيس قسم"
ابوبكر:مادام فيه من وراه يوصله..ليش لا..
سفيان ابتسم بتهكم...
سكتوا شويه بعدين قال ابوبكر..
ابوبكر:جعان نوم...بنرقد واني مقعمز..
سفيان ضحك بإستغراب وقال:علاش مارقدتش امس..
ابوبكر:ساعتين وبالسيف في جرة العفريت هداكا..اصلا من لما جي واحني مشتاقين النوم..
ضحك سفيان وقال:ربي يحفظه..
ابو بكر؛تسلم..لكن والله معاناة وتعب ياراجل خلانا حايسين حوسة مانحكيلك..بالذات كان ارتفعت حرارته ولا بطنه وجعاته نقعدوا حايسين وفي عز الليل ندوروا في المستشفيات..والمشكله الدكاترة بعدين يقولوا هدا شي طبيعي مافيش منه خوف..
سفيان ابتسم وقال:لكن يقعدوا زينة الحياة الدنيا..
ابوبكر؛ان شاء الله ربي يعطيك من هالزينه تو نشوفك شن تقول بعدين..
سفيان بإبتسامه:إن شاء الله..
ابوبكر:ايه حقه اليوم بنهرب عندكم بش نحضر المباراة..
سفيان:اليوم مربوعتنا بتولي ستاد بروحها صحاب مروان وعدنان جايين حتى هما..
ابوبكر بضحكه؛هادي المتعه هي..وتي روحك اليوم للشماته..
سفيان:ياقعادك تحلم...
🏵🏵🏵🏵🏵
"هاه شن رايك"
عدنان:ممتاز جدا..المهم يكون عندها فالأيام اللي تكون فيهم انت موجود هكي نرتاح اكثر..
مروان بإبتسامه:ايه غدوة ان شاء الله ويوم الإثنين..
عدنان:تمام...
مروان:مروح..
عدنان؛لا ماشي للجماعه دايرينلي عزومه غدي..
حط مروان يده ع كتف وقال بضحكه:عيش ايامك ياعريس..
ضحك عدنان بعدين لبس نظاراته وقال:ماتبي شي..
مروان؛سلامتك بس.
عدنان:مالا اوينا نتلاقوا في الليل بش نسحقوكم..
مروان :تو نشوفوا..
ابتسم عدنان ومشي لسيارته..
ومروان قعد واقف راجاه لين مشي بعدين ولى خش داخل..
🏵🏵🏵🏵
"اسيل ونهال وخوله وخديجه "
نور:كبيرات ولا زيي..
لينا:في وحده زيك..اهن شوفي صورة ليهن..
طلعت لينا التليفون وطلعت الصورة وورتها لنور..
اشرت نور ع حد في الصورة وقالت:هدا وليد..
لينا بضحكه:اها هدى سالم ولد خويا يعني نا عمته..
نور:باهي هما علاش مش عبيدات زيك..
ضيقت لينا عيونها بإبتسامه بعدين قالت؛مايقولوش عبيدات يقولوا سمر..
نور:لكن ماما قالت انتي عبيده..
لينا خدت نفس بعدين قالت:انتي بنيه سمحه ولاكيف الأميرة اللي حكيتلك عنها مش انتي قتي هكي..
نور:ايه..
لينا؛والبنيه السمحه هديك مؤدبه وتقول كلام كويس وسمح..وهي ماتقولش ع كيفي عبيده تقول سمراء..
نور:سمرا..
لينا؛ايه ولاتقول شكولاتينا...لان اللي كيف لونهم كيف الشكولاته...
نور:اممم صح...
لينا:معناها وين تشبحي حد كيفي شن تقولي عنه..
نور؛شكلاتينا..
ضحكت لينا..
نور:باهي هما علاش مش شكلاتينا.
لينا:امم لأنهم امهاتهم بيض كيفك تو...
نور:اااه...
لينا ضحكت..
نور:وانتي لما يولي عندك بيبي شكلاتينا ولا؟.
لينا بضحكه:ايه..هي هاتي خل نكملوا البازلياء بسرعه..
نور:باهي..
ع خشة ولاد نوريه اللي كانوا يدوروا في اختهم..
مؤيد:شن ديري نور..
نور؛نطرف في البازليا تعالوا معانا...
ضحكت لينا..
هما الزوز قعدوا واقفين يشبحوا لمرت خالهم..
لينا شبحتلهم بإبتسامه؛تعالوا..
هما الزوز قدموا ناحيتهم بتردد..
لينا:انت قعمز هنا وانت قعمز غادي..
مشوا قعمزوا وين ماقالتلهم لينا..
لينا؛وتوا بنديروا مسابقه شن رايكم؟
الشريف:مسابقه شنو؟
لينا؛من اكثر واحد يفرط بازليا..اللي تفرطوها حطوا قشرتها حداكم واللي يكون حداها اكثر عدد قشور هو الفايز..وهاه بلاغش راهو بنشوفهن كان لقيت فيهن بازليا مش حنحسبهن..
مؤيد:باهي شن هي الجائزة مافيش مسابقة مافيهاش جائزة..
لينا:اممم..رفعت تليفونها وحطت ع صورة وورتهالهم وقالت:هدي..
التلاته شبحولها..
الشريف؛شن هي!؟
لينا:نقولوله كعك مخمر طعمته تهبل..
مؤيد:حتى شكله..
لينا ردت تليفونها لجيبها وهي تقول:خلاص هدي الجائزة هي ابدوا هي..
بدوا الولاد معاهم ولينا تسأل:شن اساميكم..
:اني شريف..
:واني مؤيد..
ابتسمت لينا وقالت:ونا لينا..
ضحكوا..
وكلموا هدرزة هما ولينا وانسجموا معاها زي ماانسجمت اختهم قبلهم...
🏵🏵🏵🏵🏵
"شن معناه الجو اللي يديروا فيه ولاخاطر مرت عدنان يعاملوها معامله خاصه"
منى:المراة قاعده عروسه..
زهور:شن نسيتي حني من تالت يوم خشينا كوجينتهم وبدينا نكردوا..مش سادها الاسبوعين اللي برطعت فيهم برا..مفروض زيها زينا توا..
••فهاللحظه خطمت وجيهه من حدا الكوجينه وسمعت زهور شن تقول..
ولت وقفت في الباب وقعد تشبحلها وتسمع في كلامها..
زهور:بيبدوا يديروا الفرق من توا ع خاطر مرت عدنان بش يرضى عليهم..
منى كيف جت بترد لمحت حد واقف في الباب وين ركزت انصدمت..
زهور لاحظتها والتفتت..
قلبها قريت وقف من الخوف..
وجيهه رفعت حاجبها وقالت:كان تبي تعرفي علاش نعاملوا في لينا هكي..بري انشدي راجلك..
زهور وهي ترعش:مش قصدي اللاي..لكن..
وجيهه قاطعتها وهي تقول:راجلك ومفروض تعرفيه عياف هلبه وعارفتيه انه ماكانش يبي خوه ياخد لينا ومافي حد خافي عليه السبب..
☘وهالكلام سمعاته لينا اللي كانت جايه بتستأذن وجيهه بش دير الكعك...
كانت موجوعه من اللي تسمع فيه...
وجيهه:هو قال ماتخليها تمس شي في الحوش يام واني درت مايبي..مش عاجبك كلامه بري ناقشيه هو..
زهور نزلت عيونها وقعدت تبلع في ريقها وخلاص..
وجيهه شبحتلها من فوق لتحت و قالت؛وبعدين قولي علاش تعاملوا فيا هكي..
ولفت ومشت طلعت..
زهور:افف..علاش مانبهتنيش .!؟
منى:والله ماشفتها الا وين انتي شفتيها..
زهور:وااك ياربي عليك حظ..
منى:حتى مفروض فكرتي فيها من الاول نسيتي شن صار بين راجلك وبين خوه ع خاطر هالموضوع حتى العرس ماباش يحضره..
🌺لينا معاش قدرت تتحمل تسمع اكثر..
لفت ومشت طول ودموعها ينزلوا غصب عنها...
وين وصلت في الكوجينه الخارجيه مسحتهم بقوة..
وخشت داخل...
🏵🏵🏵🏵🏵
الساعه 2:30بعد الظهر..
مقعمزات ع سفرة الغدي..
كلهم ياكلوا ماعدا هي اللي اتسكرت نيتها ع كل شي شاده الكاشيك وسرحانه وخلاص..وباين ع وجهها ملامح الحزن..
وجيهه:لينا..
شبحولها..
وهي شبحت لعزوزتها وقالت؛نعم..
وجيهه:تغدي.
لينا والدموع محبوسات في عيونها:اهو ناكل...ويدوب غرفت بكاشيكها وكلت..
عفاف:يام اليوم جايين صحاب الولاد يحضروا المباراة..
وجيهه:مباراة شني
منى؛مباراة كورة اللاي قالي مروان تبدا في الليل..
وجيهه:ووك شوقني الكورة..تو بيقلبوا المربوعه ع روسهم وتم بعركه..
رنده بضحكه:لكن والله فيها جو..
وجيهه:فيها عينك..
رتيل:سعدودهم ياريتني ولد راهو حضرتها معاهم..
ابتسمت لينا وهي تشوف لرتيل..
وجييهه:هدا اللي ناقص..
رتيل:اصلا شن فيها كان حضرتها معاهم مازال قاعده صغيره اني..
عفاف:مالا تبي سفيان...وقعدت ادير في حركات بإيديها وكانها شاده موس وتقطع في حاجه..
ورنده كملت عليها الحركات وكانها شاده شكارة بعدين لوحتها..
زهور ومنى قعدوا يضحكوا..
بينما لينا لما جت سيرة سفيان حست روحها بتبكي..
بس شدت روحها بكل قوة..
منى بضحكه:قال يبوا بيتزا زهور..
زهور بإبتسامه:ان شاء الله..
رنده:ايه حقه منى نبيك تحنيني الليله..
توسعوا عيون منى من الصدمه..
لينا بتلقائيه؛وين تقدر عليها الحنه وهي هكي..
رنده:وجهت الكلام لمنى معليشي يعني..
لينا رفعت حاجبها وقعدت تاكل..
وجيهه؛عفاف تحنيلك رجليك ومتى ايديك..
رنده؛تمام..وانتي يام اعجنيها وردي بالك من الزيوت..
وجيهه؛حتى انتي لينا عاودي حني حنتك طارت..
رنده؛وين طارت..اهي قاعده غير مش باينه فيها..
لينا قامت عيونها وشبحتلها بحده..
ورنده دارت روحها تاكل عادي كأنها ماقالت شي..
"زهور"
انتفضت لينا من الفجعه..
ركزوا عليها كلهم...
ووجيهه قالت:نوضي لراجلك زهور..
ناضت زهور ومشت طلعت...
••زهور:نحطلك غداك..
سفيان؛قبل لتحطيه قولي الحق هديكا خشت معاكم للكوجينه..
زهور؛اللاي ماخلتهاش دير شي..
سفيان:كويس..بري حطيلي غداي ..
زهور ابتسمت وقالت:حاضر..
هو لف ومشي...وزهور مشت خشت للكوجينه...
🏵🏵🏵🏵
بعد كملوا غداهم..
ناضت لينا مع منى تقيم في السفر...
وبدت تلم معاها في الماعين..
منى تبي تقوللها نطلع لكن مش عارفه كيف..
ع خشة زهور لما شافت لينا قالت؛لينا بري اطلعي تو حني نغسلوهم..
لينا؛لالا خلي منى تقعمز ترتاح نحس فيها مش ع بعضها ونا وياك نغسلوهن..
منى:لاحبيبتي مافيا شي اطلعي ارتاحي انتي..
لينا وقعدت وقعدت تشبحلهم وعيونها مليانات دموع..
"زهور"
انتفضت تاني من الفجعه.
زهور بهمس ورجاء:اطلعي الله يربحك..
لينا طلقت الكواشيك اللي فيدها طاحوا ع الصفره..
ومشت طلعت من الكوجينه للجنان وهي تبكي..
لحقتها منى..
وزهور طلعت لراجلها..
🌺مشت لينا للكوجينه الخارجيه..
خشتلها وقعمزت حدا طاولتها وحط يدها وراسها عليها وقعدت تبكي.
خشت عليها منى وهي تقول بحزن؛لينا..
ولينا تبكي وخلاص..
منى؛لينا اشبحيلي..
قامت لينا راسها وقالت ببكي:توقعت كل شي الا هالشي..الا انهم يتعيفوا مني ويشوفوا لوني ع انه وسخ معقوله في ناس مازال تفكر هكي.!!ولاهدى اللي على اساس استاذ جامعي يطلع عقله متخلف اكثر من الجاهلين..
منى تنهدت بحزن وقعدت ساكته معاش عرفت شن تقوللها..
لينا مسحت دموعها وهي تقول:نا ممكن نتحمل اي شي الا حاجه هدي..وحق الله نحنا في النظافه والنظام خير منهم بواجد يعافوا ارواحهم لو شافوا نظافتنا ونظامنا..
منى؛عارفه..بس الناس عقليات يالينا...بعدين احمد ربك سفيان دار فيك خير من غير مايحس والله لو خدوا عليك اضمي وتكردي يقعدوا يحرثوا عليك ويهدوا حيلك..
عقدت لينا حواجبها بعدين رشفت وقالت:كيف متحملين هالحال..
منى:الله غالب..اشرت ع بطنها وقالت..الفاس طاح في الراس..
لينا؛وزهور !؟ حسيت معاملاتهم ليها زفته واجد..
لينا:زهور قصتها قصه مسكينه مانقدر نحكيلك عنها هي تحكي بروحها..
لينا بتهكم؛مانراجيش لين تحكي كله واضح..
منى:احمدي ربي انتي االلي عندك راجل زي عدنان مايقدروش يديروا فيك مادايرين فينا مدام هو معاك..
ابتسمت لينا من بين دموعها وقالت:ع خاطره هو مستعده نتحمل كل شي..
منى ابتسمت..
فجأة سمعوا صوت بكي بنت صغيره..
لينا:نور..
منى:شكلها زبطت ان امها مهناش..
••داخل..
وجيهه:خلاص يابنتي خلاص تو تروح ماما..
نور وهي تبكي:نبيها توا توا...
رنده؛نونو حبيبتي ماما ماشيه تجيبلك هلبه حاجات حلوة وتروح..
نور وهي تبكي؛نبي ماما ماما..
خش عليهم سفيان الدار وقال؛نور...
جاها وقعمز ع روس صوابعه وقال:تطلعي معاي..
شبحتله وقالت؛نبي ماما..
سفيان؛باهي تطلعي معاي قبل..
مسحت دموعها وسيبت حجر جداها وقالت:ترفعني لماما..
سفيان خداها ورفعها في غمره وهو يقول؛معاش تبكي..
ومشي طلع بيها..
عفاف بدموع :ياروحي بنيتي..
وجيهه:اعوذ بالله من الشيطان الرجيم..من غير سو ياربي..
••سفيان؛نمشوا ناخدوا جيلاطي شكلاطه قبل..
نور وهي تمسح في دموعها:باهي..
وفات من قدام زهور اللي كانت تشبحله كيف رافع بنت اخته وكيف يتعامل..
زهور"يارب نشوفه رافع وليدنا ولابنيتنا..."
ع خشة منى ولينا...
منى؛كيف خطرت عليها امها..
زهور التفتت وقالت؛ماخطرتش ..سمعت سفيان يسأل في اللاي ع نوريه امتى سافرت..هي سمعاته وبدت تبكي..
لينا؛كأن معاش عندها حس..
زهور؛خالها سكتها...
منى بضحكه؛يجرح ويداوي سليفنا..
زهور شبحت لمنى برفعة حاجب..
منى بضحكه؛نبصر ياغيورانت..
زهور قلبت عيونها ومشت تغسل الماعين..
لينا تنهدت وقالت:نا كان نرقى لشقتي خيرلي..
زهور:ايه اركبي واني تونخبر عمتي ونقول ركبت..
لينا هزت راسها ومشت طلعت..
منى:شن اللي قلتيه هدا! مفروض هي تمشي تكلمها بروحها..
زهور:ماتخافيش ماتحرجش منها مش اني ولاانتي راهو..
منى وي تشبحلها بريبه"ياشيطانه تبيها تخرب بينها وبينهم "..
زهور"خلها تاكل ع راسها شويه مش غير حني"
🌺ولينا وهي ماشيه قابلها شريف ولد نوريه ابتسملها وهي ردتهاله بعدين قاللها:شن صار في الجائزة.
ارتسمت ع وجهه لينا ملامح الضيق...
الشريف:من بكري نراجي راهو..
ابتسمت لينا وقالت؛حاضر بعد العصر تلقاها قدامك..
ولفت ومشت ولت...
خشت عليهم الكوجينه هما تفاجئوا..
وطلعت منها طول..
زهور؛خيرها هادي!!؟
منى مطت شواربها للأسفل بعدم معرفه...
🏵🏵🏵
في الدار..
لينا:ع..اللاي..
وجيهه وهي متكيه تتفرج ع التلفزيون..
لينا:نستأذن منك بناخد منك دقيق كان فيها كيف..
وجيهه؛ليش؟!
لينا؛بندير في شقتي كعك مخمر..
وجيهه :شن هو هدا..
لينا:نوع حلو نديروا فيه ...
وجيهه شبحتلها شويه وقالت:باهي لكن نزليلي منه..
ابتسمت لينا وقالت؛باهي..
ناضت لينا ومشت تجري..
وجيهه"مش عارفه علاش مش هاينه عليا"..
وضحكت ورجعت شافت للتلفزيون...
🏵🏵🏵🏵
الساعه 4:00قبل العصر..
فتح باب الشقه وخش..
جاه صوت مرته وهي تتكلم ابتسم بإستغراب...
سكر الباب ومشي وهو يتبع في الصوت..
لين وصل في الكوجينه...
تفاجئ باللي شافها..
وقعد يسمع في مكالمتها هي واختها..
لينا:اهو مكسده ع الكعك المخمر..
"الله..توشحت كعكك المخمر والبيتسا متاعك..بالذات البيتسا"
لينا بضحكه؛بيتزا ياهمي بيتزا امتى بتطوري مش عارفه...
ضحك عدنان بدون صوت..
"اللي المهم العجينه اللي يديروا عليها فالصاله والجبنه والزيتون الحاجات السمحه الاخرى اللي ديري فيها'
لينا بضحكه:باهي خبريني شنو دايرين شنو دايرة امي..
"الحمد لله كلنا كويسين..نخليك مع الكعك توا..ابعتيلي صوره"
لينا بضحكه:حاضر...بالسلامه..
"بالسلامه"..
سكرت هناء...ولينا قعدت تشوف للتليفون بش تتأكد انها سكرت الخط..
وماحستش الا بقبله مطبوعه ع راسها..
ضحكت وقالت:امتى روحت..
عدنان بإبتسامه؛توا توا...شبح للطاجين اللي قدامها وقال..هدا شنو...
لينا:هدا الكعك المخمر ياسيدي الحلو المشهورين بيه نحنا هل الجنوب..تقدر تقول دونات الجنوب..
عدنان:منظره مازال احلى..يسهف..
لينا؛تو بعد يطيب تشوف كيف يولي يسهف اكثر..
عدنان؛ع هكي بنقولك كثري منه..وديري معاها بيتزا جايين جماعه اليوم يتفرجوا ع المباراة..
لينا :ايه قالوا..لكن الدقيق اللي عندي خديته من عمتي مش واجد..
عدنان:علاش خديتي من لوطا في هني..
لينا وهي متفاجئه:حق!!.
مشي سفيان وين ماموجود الدقيق فتح الدولاب واشرلها عليه..اهوا..
لينا:حي والله مادورت غادي ولاريته...
عدنان وقف على حيله وقال بإبتسامه:زيدي اسكتشفي الكوجينه فيها كل شي راهو ماناقصها شي..
لينا؛ان شاء الله..
عدنان تنهد بعدين قال؛خل نمشي ندوش..
لينا هزت راسها بإبتسامه...وهو مشي طلع من حداها...
🏵🏵
من الدور الثاني للدور الأول....قدام الحوش تحديدا...
سفيان؛لالا خلاص اقتنعت معاش تبكي..
وجيهه؛ان شاء الله..
سفيان؛بالله يام ناديلي زهور..
وجيهه:باهي..
ولفت ومشت ...
وهو قعد واقف يستنى لين جاته زهور..
زهور:نعم..
سفيان:المربوعه ديروا عليها دورة...العشي بيتزا زي العاده كثروا ..وديريها طايبه زين مش زي متاع اخر مرة عجينه نيه..
وزهور:باهي..
سفيان؛كان ناقصكم شي قولي خل نجيبه واني مروح من الجامع..
زهور:لالا موجود كل شي..
هز راسه ولف مشي طلع..وهي سكرت الباب وخشت داخل...
🏵🏵🏵🏵🏵
وبعد المغرب..
كانت المربوعه اشبه بالمقاهي لما تتعبا بالزباين وين تكون في مباراة مهمه لدوري عالمي او محلي..
واصواتهم وهما يهدرزوا فيها مخليينها زي خلية النحل...
.........
اما الكوجينه فكانت تضرب تقلب زي مايقولوا..
والكناين فيها يشتغلوا زي عمال المقاهي بالزبط..
فهالوقت..
كانت لينا نازله بكيسة وزوز طواجيت ع بعض...
نزلت بيهم الدورج بصعوبه..
ولما وصلت لوطا..شافت شريف ومؤيد يلعبوا..
لينا؛شباب..
شبحولها ومشولها يجروا..
لينا ؛واحد فيكم يمسك الكيس هدى..
الشريف:فيه الجائزة..
لينا بضحكه؛اها..
خدي منها شريف الكيسه..
ومشوا التلاته بإتجاه الكوجينه..
لين وصلوا فيها خشت الكوجينه وهي تقول:عافيه يابنات..
الزوز مافهموش قضدها..
لينا بضحكه:يعني كيف حالكم..
ابتسمت منى وقالت:تقولوا عافيه لكيف حالك؟
لينا؛اها بش مش كل عرب سبها هكي في اللي يقولوا كيف حالك عادي..
منى:اها..
وزهور تشوف للطواجين اللي حطتهم لينا ع الدولاب..
لينا:هدي البيتزا الواتيه مازلت عندي فوق في الكوشه..
منى:قالك راجلك ديريها..
لينا ابتسمت وقالت:ايه...والتفتت للشريف..وقالت..ترا حبيبي الكيسه شوي..
مدهالها..
خدتها..وفتحتها وطلعت منها الكعك..
منى عيونها لمعوا قدمتلها وهي تقول:هدا شنو؟
لينا يضحكه:كعك مخمر..في كاكاو...
منى:ايه طيبت اليوم رتيل..
لينا:ترا عدي مؤيد نادي رتيل..والله يربحك منى سفرة اللوح من يالاك...
منى مدتلها السفره...
وزهور تتفرج عليها...
لينا:كان في صحون هكي حاجات نحط فيه..
منى:افتحي الدولاب اللي وراك..
لينا التفتت وفتحت الدولاب وطلعت منه زوز صواني..
ع خشة رتيل وهي تقول:شن في؟
لينا:تحبي الحلو..
رتيل شبحت للكعك وقالت:وااو هدا شنو؟
لينا بضحكه:ارجي تو نعطيك مني..بس اول من بنعطيه هالبطل وعدته بيها..
خدي شريف كعكه كامله..
لينا:سخني الكاكاو رتيل..
رتيل وهي متسهفه ع الكعك...اوكي..
ع خشة عفاف:يبوا القهوة ياهو...شبحت للكعك وقالت..هدا شنو..
لينا ضحكت وقالت..كعك مخمر..
🏵🏵🏵🏵
والكعك المخمر يحضر وبقوة في المربوعه..
والجمهور انهال عليه اخدا باليد..
ماعدا شخص واحد كان يشرب في القهوة ويشبحلهم بإمتعاض وهما ياكلوا..
وصديقه يشبحله وهو ياكل وشاد ضحكته..
..........
وجيهه:قسما بالله داراته في حوشها قاعد نحلفلك راهو..
تنهد سفيان بعصبيه بعدين قال:قوليلهم يسقدوا بالعشي..
ومشي..
وامه تشبحله وهي تضحك وتحرك في راسها يمين ويسار...
🏵🏵🏵🏵
وخشوا مروان وعدنان بسفر البيتزا والمشروب..
هي كلها كانت في بعضها بيتزا لينا مع بيتزا زهور..
بس كان واضح الفرق بينهم.
بيتزا زهور قنينه..بس بيتزا لينا كان شكلها مغري اكثر..
وطعمتها فيها الزايد..
حتى اسألوا سفيان...اللي قعد يدق منها وهو يتفرج ع المباراة طرف ورا طرف ع باله بيتزا زهور..
🌺🌺🌺🌺
"عجبتهم"
عدنان:عجبتهم!!قولي هبلوا فيها ماخلوا منها شي.. ماحصلتش معاهم فرصه..
لينا :قصدك ماكليتش منها!؟
عدنان بضحكه:ع راس اللسان..
لينا:ولايهمك قعد طاجين واحد تو ندسهلك..
عدنان ابتسم وقال:وتي روحك بعد يروحوا الشباب بنطلعك تشوفي البحر..
لينا بضحكه حماس:غير امتى يروحوا بس..
ضحك عدنان وقرصها من انفها..
وهي تضحك...
••في دار التقعميز..
دايرين العاله..ومعاها الكعك المخمر...
مقعمزين حداها كلهم بعد غسلوا الماعين..
عفاف:حي عليا في لينا في جرت الكعك متاعك زدت عشره كيلوا اليوم..
لينا بضحكه:صحتين..
وجيهه:وتي روحك من العشيه للعشيه نبوه مع الشاهي..
لينا بإبتسامه:حاضر..
بعدين غيرت عيونها للحاجه زبيده لقتها تاكل في الكعك وتشرب في الشاهي..
كبرت ابتسامتها وولت ابتسامه...
🍁وسبحان من حول الحال الى حال تاني...
في النهار كيف كان حال لينا في النهار وكيف ولى في الليل..
اللي يحبه ربه مافيش بخت خير من بخته🍁
🏵🏵🏵🏵🏵
"صدارة معليشي...صدارة معليشي"..
الهتافات هادي في المربوعه يهتف بيها جزء من الجمهور اللي قاعد يحضر في المباراة انصار الفريق الفاين يغيظوا في الجزء التاني انصار الفريق المهزوم..
ومن انصار الفريق الفايز عدنان وسفيان اللي كانوا يغيظوا في مروان وبوبكر...ومروان وابوبكر يضحكوا وخلاص...
وطبعا صارعت بعض النقاشات البيزنطيه والعراكات..
وانتهت بلز سفيان للضيوف...
••بعد روحوا
سفيان؛مافيش حاجه يشجعها سفيان ولايجي معاها الا وحظها ينقام يادكتور..
مروان وهو راكب السيارة قال بضحكه:باهي اللي عندي مناوبه الليله..
سفيان قعد يشبحله وهو يرقص في حواجبه..
ومروان يضحك...شغل السيارة ورفع يده يحي فيهم..
عدنان سفيان حيوه بايديهم وهما فاتحين اربعه صوابع اشارة منهم للنتيجه اللي حققها فريقهم..
هو قعد يضحك ويحرك في راسه يمين ويسار..
ووخر بالسيارة وطلع من الحوش.
سفيان:رحمه مني ربي..
عدنان قعد يضحك..
لفوا ومشوا الزوز...
عدنان ركب لشقته...
اما سفيان كمل طريقه ولف ع الحوش..
لين وصل في باب الكوجينه البراني..
قعد ينادي:زهور...زهور...
مافيش رد..
مشي للروشن القى نظره لقاها فاضيه...
تنهد ومشي خش..
وقعد يدور فيها كان مازال في بيتزا فاضله..
ولقي وحده محطوطه في الكوشه..
فتحها وطلعها وهو يقول؛فيها حاجات متغيره هلبه هالزهور..
وبدي ياكل...
"سفيان"..
التفت وهو يمضغ..
وجيهه ابتسمت وهي عاقده حواجبها..
سفيان بلع وقال؛مازال جعان...
وجيهه بإبتسامه:صحتين..
خداها وقال:قولي لزهور تركب..
وجيهه:باهي..
ومشي طلع بالبيتزا..
بعد طلع وجيهه قعدت تضحك وهي تقول:كان تندري بس..
ومشت خدت نعناع مجفف من الدولاب وكيف جت بتطلع خشت لينا وقالت:بنطلع نا وعدنان توا..
وجيهه:وين ؟
لينا:للبحر..تعدي معانا؟
وجيهه ابتسمت وقالت؛مرة تانيه..
لينا ابتسمت وقالت:ان شاء الله..
ومشت للكوشه جمدت في مكانها لما لقتها مفتوحه وفاضيه..
لينا:وين مشت!؟
وجيهه:شن هي؟
لينا؛البيتزا اللي كانت هنى فضلت ودسيتها لعدنان..
وجيهه ضحكت وقالت:خداها صاحب النصيب.
التفتت وقالت؛شفتي اللي خداها؟
وجيهه:لاماريت حد..يللا مش مشكله ديرله غيرها نهار تاني..
ومشت طلعت..
لينا تنهدت بضيق وقالت بهمس:اكيده عفاف..افف استغفر الله..
ومشت طلعت من الكوجينه...
🏵🏵🏵🏵🏵🏵
الساعه 1:00ليلا..
رنده؛سكري الضي منى..
منى وهي حاسه بالتعب؛حاضر..
ناضت ومشت طفت الضي...
بعدين انطرحت ع اقرب فراش وهي حاسه بوجع...
حاولت ترقد وتتجاهل الوجع...وفعلا جاها النوم ورقدت...
ساعه ...اتنين....تلاته...
فجأة فتحت عيونها منى بألم:ااه...ااي...ااه..
حطت يدها ع بطنها وقعدت تتأوه بألم شديد...
نوضتهم...
وجيهه فتحت الضي وهي مخلوعه..
منى بعياط:بنموت..بنموت ...زودولي...
🌺وصوت عياطها سمعوا اهل الدور التاني..
اللي ناضوا مفجوعين ونزلوا من حياشهم يجروا...

....يتبع.....