တောင်စဉ်၊ မြစ်ပြင် တစ်ခွင်တစ်လွှားဝယ် (MM translation)

Chapter - 15: ဤကမ္ဘာ (ဤကမာၻ)

နောက်တစ်ခဏတွင်ပင် သူ၏ အားကောင်းလှသော ယုတ္တိဗေဒက ပြန်လည်ချေပလာလေသည်။
/"မဟုတ်သေးဘူး။ ငါ ပိုပြီး ဂေါက်လာတာ ဖြစ်ရမယ်"/

ဤအမြင်မှာ သူ့အတွက် လက်ခံနိုင်ရန် အနည်းငယ်ခက်ခဲသော်လည်း ချူဟွမ်၏ ကျိုးကြောင်းဆင်ခြင်မှုက သူ့ကိုယ်သူ အယုံသွင်းနိုင်ရန် ကြိုးစားနေဆဲပင်။

/"ပထမအချက်အနေနဲ့ မြွေတွေက အဝေးမှုန်တယ်။ လူတွေကို မှတ်မိနိုင်ဖို့ဆိုတာ မဖြစ်နိုင်လောက်ဘူး"/
သူက ကျိုးကြောင်းခိုင်လုံစွာ စဉ်းစားလိုက်၏။
/"ဒုတိယအချက်က အဲ့ကောင်မှာ ရှိတဲ့ခေါင်းက ဒီလောက်ပိစိလေးကို။ ပြီးတော့ အဆိပ်ဂလင်းအကြီးကြီးလည်း သယ်ထားရသေးတာဆိုတော့ ကျန်တဲ့နေရာလွတ်ထဲမှာ အသိဉာဏ်ရှိဖို့ နေရာတောင်လောက်ပါ့မလား?"/

ထိုအချိန်တွင်ပင် နန်ရှန်းက လက်တစ်ဖက်မြှောက်လိုက်လျက် သူ့နောက်မှ ချူဟွမ်ကို ကာပေးထားကာ ကိုယ်ကိုကိုင်းညွတ်လိုက်ပြီး အနှီ သာမန်ထက်ပို၍ ထူးခြားသောအရည်အသွေးများ ပိုင်ဆိုင်ထားသော အဆိပ်မြွေကို လက်ဗလာဖြင့် ဖမ်းဆွဲလိုက်ချေသည်။ ချောမောလှသော ခေါင်းဆောင်၏ မျက်နှာထားမှာ မှုန်ကုပ်ကုပ်ဖြစ်နေသည်ကိုသာ မြင်ရမည်ဖြစ်ကာ ထိုသူက သူ့လက်ထဲမှအရာမှာ နွယ်ကြိုးတစ်ချောင်းသာ ဖြစ်သည့်အတိုင်း ထိုသတ္တဝါကို မညှာမတာဆွဲမွှေ့ပစ်လိုက်ပြီး အလွန်အဆိပ်ပြင်းလှသောမြွေတစ်ကောင်ဖြစ်သော ထိုသတ္တဝါ၏ ဂုဏ်သိက္ခာကို ဂရုပင်စိုက်ပုံမရှိပေ။

ပြာနှမ်းနေရှာပြီဖြစ်သော မြွေကလေး၏ ထွက်ပြေးရန်ကြိုးစားမှုများသည် အချည်းနှီးသာဖြစ်လျက် ၎င်းကိုဖမ်းထားသော ထိုပုဂ္ဂိုလ်၏လက်ထဲဝယ် ပျော့ခွေနေကာ ထူးဆန်းစွာပင် ပြန်လည်တိုက်ခိုက်လိုသော ရည်ရွယ်ချက် အလျဉ်းရှိပုံမရလေ။

နန်ရှန်းက အသံတိုးတိုးဖြင့် သတိပေးလိုက်၏။
"နောက်တစ်ခါ မင်းသူ့ကို နှောင့်ယှက်နေတာ ငါမြင်ရကြည့်။ ငါ မင်းကို သုံးပိုင်းပိုင်းပစ်မယ်"

သူသည် လီယီဘာသာစကားဖြင့် ပြောလိုက်ခြင်းဖြစ်ပေသည်။ သူ့အသံမှာ ချိုသာသော်လည်း လေယူလေသိမ်းကား အလွန်မာကျောလှလေ၏။ အဆိပ်မြွေမှာ ထိုစကားကို ကြားလိုက်ရသည်နှင့် ချက်ချင်းပင် ၎င်း၏ ကိုယ်ခန္ဓာမှာ တုတ်ချောင်းဖြောင့်ဖြောင့်ကြီးတစ်ချောင်းသဖွယ် ဆန့်သွားလျက် ယုံကြည်ချင်စရာကောင်းလောက်သည်အထိ သေချင်ယောင်ဆောင်နေပြီး အလောင်းကောင်တစ်ကောင်၏ အေးစက်တောင့်တင်းမှုအနေအထားကိုပင် အပင်ပန်းခံ၍ ထည့်သွင်းတွက်ချက်ထားပုံရချေသည်။