တောင်စဉ်၊ မြစ်ပြင် တစ်ခွင်တစ်လွှားဝယ် (MM translation)

Chapter - 15: ဤကမ္ဘာ (ဤကမာၻ)

(Uni)

တကယ်တော့ "ကောင်ချောလေး"ဆိုရင်ပဲ ရပါပြီ

မည်းမှောင်နေသော သူ့အိမ်အဝင်ဝတွင် တြိဂံပုံခေါင်းဖြင့် အဆိပ်ရှိမြွေတစ်ကောင်ရောက်နေသည်ကို တွေ့လိုက်ရသည့်အချိန်၌ ချူဟွမ်၏ ခံစားချက်ကား အတော်လေး ရှင်းပြ၍မရနိုင်လောက်အောင် ဖြစ်သွားရလေ၏။ သူသည် တိရစ္ဆာန်ငယ်လေးများနှင့် မည်သည့်အခါကမျှ ရေစက်မရှိဖူးဘဲ တိရစ္ဆာန်များအနေဖြင့် အသက်ရှင်ချင်စိတ်ကလေး အရိပ်အငွေ့မျှသာရှိမည်ဆိုလျှင်ပင် ပုံမှန်အားဖြင့် သူ့ကို အလိုအလျောက်ရှောင်ကွင်းသွားတတ်ကြသည်သာ။ သူ့နောက်ကို လိုက်နေမည့် တစ်ကောင်တလေရှိလာရန်ဆိုသည်မှာ ရှားရှားပါးပါးအခြေအနေပင်ဖြစ်ပြီး နောက်ဆုံး ရလာသည့်သတ္တဝါကား အေးစက်စက် အဆိပ်ရှိမြွေတစ်ကောင် ဖြစ်နေချေသည်။

/တခြား ထပ်ပြီးမတောင်းဆိုချင်ပါဘူး။ ဒီအတိုင်း... သွေးနွေးသတ္တဝါတစ်ကောင်ကောင် ဖြစ်လို့မရနိုင်ဘူးလားလို့?/

သူ့အသံနှင့် ခြေလှမ်းများမှာ ပြိုင်တူ ရပ်တန့်သွားပြီးနောက် နန်ရှန်းက ချက်ချင်းပင် သူ့အကြည့်အတိုင်း လိုက်ကြည့်ပေ၏။ ထိုအခိုက်တွင် ချူဟွမ်အမြင်မှားခြင်းပေလောတော့ မသိ၊ မြွေမှာ နန်ရှန်းနှင့် အကြည့်ချင်းဆုံသွားချိန်၌ ထိုသတ္တဝါကား အလိုလို ကြောက်ရွံ့တုန်လှုပ်သွားသည့်ပုံ ရှိလေသည်။

မျှော်လင့်မထားသော အကြောက်တရားနှင့် ရင်ဆိုင်လိုက်ရသော မြွေကလေး၏ အမြီးထိပ်ဖျားမှာ တုန်ယင်နေကာ အမြီးကုပ်၍ ထွက်ပြေးချင်နေပုံရသော်လည်း အမြီးထည့်ကုပ်ထားနိုင်မည့် နေရာမရှိရှာသော ၎င်း၏ ချို့ယွင်းချက်ကို နောက်တစ်ကြိမ် တွေ့သွားရပေ၏။ ၎င်းမှာ ပို၍တင်းတင်းကြပ်ကြပ် ခွေနေရန်သာ လုပ်နိုင်ကာ တစ်ခါတစ်ခါတွင် လျှာလေးတစ်လစ်တစ်လစ်ထုတ်လျက် ခေါင်းကို အပေါ်အောက်လှုပ်ရှားနေပြီး ဦးညွတ်အရိုအသေပေးနေသည့်နှယ် ရှိနေပေသည်။

ချူဟွမ်တစ်ယောက် မျက်မှန်ကို သတိလက်လွတ်ပင့်တင်လိုက်မိရင်း တွေးလိုက်မိ၏။
/"ဒီမြွေက မသေမျိုးဖြစ်သွားပြီပဲ"/