တောင်စဉ်၊ မြစ်ပြင် တစ်ခွင်တစ်လွှားဝယ် (MM translation)

Chapter-21: ဤကမ္ဘာ ( ဤကမာၻ )

(Uni)

လောကကြီး၏ ထာဝစဉ်တည်မြဲသော ချမ်းသာသုခ

အကယ်၍ ရာသီလေးမျိုး ထင်ထင်ရှားရှားကွာခြားလှသော တရုတ်နိုင်ငံမြောက်ပိုင်းတွင်ဆိုပါက တရုတ်ပြက္ခဒိန် ၈ လ* နှောင်းပိုင်းလယ်လောက်ဆိုလျှင် အခြေခံအားဖြင့် ဆောင်းဝင်နေပြီဖြစ်ပေသည်။ ချူဟွမ်မှာ လီယီမျိုးနွယ်စုတွင်နေထိုင်နေစဉ်အတွင်း ရက်စွဲမည်မျှရှိနေပြီဟူ၍ မမှတ်မိနိုင်တော့ဘဲရှိချေ၏။ သူ့အနေဖြင့် အကြမ်းဖျင်းမျှသာတွက်ချက်ခန့်မှန်းနိုင်ပြီးနောက် မကြာမီတွင် နေပြက္ခဒိန်*နှစ်သစ်ကိုပင် ရောက်တော့မည်ဖြစ်ကြောင်း ခံစားမိလေသည်။ လီယီမျိုးနွယ်စုမှာ မည်သည့်ပြက္ခဒိန်စနစ်ကို အသုံးပြုကြောင်းကိုမူ မသိရပေ။ မည်သို့ပင်ဆိုစေကာမူ အပူချိန်အရကား ဆောင်းဦးရာသီအစောပိုင်း၏ အအေးဓာတ်မျှလောက်သာခံစားရကာ ချူဟွမ်ရောက်လာခါစတုန်းကအချိန်တုန်းကနှင့်ဆိုလျှင် များများစားစားပင် မကွာခြားလှချေ။ အအေးကြောက်သောသူများမှာ လေကာအနွေးထည်ခပ်ပါးပါးတစ်ထည်မျှ ထပ်ဝတ်ထားကြမည်ဖြစ်ကာ အချို့သောလူငယ်လေးများသည်ကား သူတို့၏ အရေထူထူနှင့် အားကောင်းလှသော ကိုယ်တွင်းမီးဓာတ်တို့ကို အားကိုးလျက် ဘာမှထပ်မဝတ်ဘဲရှိကြပေ၏။ ထိုကိစ္စနှင့်ပတ်သက်၍တော့ များများစားစားပြောစရာ မရှိလှပါလေ။

[1. တရုတ်ပြက္ခဒိန် ၈ လ（八月） - များသောအားဖြင့်တော့ တရုတ် ၈ လပိုင်းက ခရစ်ပြက္ခဒိန်နဲ့ဆိုရင် ဩဂုတ်လရဲ့အဆုံးပိုင်း ဒါမှမဟုတ် စက်တင်ဘာလထဲမှာစလေ့ရှိပါတယ်။ မြန်မာပြက္ခဒိန်နဲ့ဆို တော်သလင်းလနဲ့ တစ်ထပ်တည်းကျတတ်ပါတယ်။

2.နေပြက္ခဒိန်（阳历） - တရုတ်မှာက ပြက္ခဒိန်စနစ်နှစ်မျိုးသုံးပါတယ်။ ရိုးရာပြက္ခဒိန်ကို လပြက္ခဒိန်（阴历）လို့ခေါ်ပြီးတော့ နေပြက္ခဒိန်ဆိုတာကတော့ ခရစ်ပြက္ခဒိန်ကို ရည်ညွှန်းတာပါ]

တောအုပ်ထဲရှိ သစ်ရွက်များမှာ စိမ်းစိုနေဆဲဖြစ်၍ မြက်ခင်းများသည်လည်း လတ်ဆတ်စိုပြည်နေဆဲဖြစ်ကာ မြွေကလေးသည်ပင် ယခုအချိန်အထိ ဆောင်းမခိုသေးပေ။ သို့ရာတွင် ထိုမြွေကလေးမှာ မြူများဝေနေတတ်သော နံနက်ခင်းနှင့် ညနေပိုင်းများတွင်မူ အနည်းငယ်ချမ်းအေးနေပုံရလေသည်။