တောင်စဉ်၊ မြစ်ပြင် တစ်ခွင်တစ်လွှားဝယ် (MM translation)

Chapter - 8: ဤကမ္ဘာ ( ဤကမာၻ )

ချူဟွမ်တစ်ယောက် ခက်ခက်ခဲခဲ စဉ်းစားရပေတော့သည်။
"ရပ်စမ်း? မလှုပ်နဲ့? မင်း ဖြတ်သန်းသွားခွင့် မရှိဘူး?"

နန်ရှန်းက အသံထွက်၍ ရယ်လိုက်ကာ ရှောင်ဖန်းကား ခေါင်းကို စိတ်ပျက်လက်ပျက် ခါလေသည်။ ထို့နောက် သူက လက်နှစ်ဖက်ကို စုကိုင်လျက် လက်ကောက်ဝတ်ကို ဖျော့ချလိုက်ကာ စည်းချက်ကျကျ လှုပ်ယမ်းပြပေ၏။

ချူဟွမ်ကား သူမြင်ရသည့်အရာကို နားလည်သွားပြီဟု တွေးမိကာ ရုတ်တရက် သဘောပေါက်သွားပေသည်။
"မြင်းစီးတာ!"

နန်ရှန်းက သူပြောလိုက်သည့်အဖြေကို ရှောင်ဖန်းထံ ဘာသာပြန်ပြလိုက်သည်တွင် ထိုမိတ်ဆွေကို အလွန်ဒေါသထွက်သွားစေလေတော့သည်။ ထိုလူက အာခေါင်ခြစ်၍ အကြိမ်တော်များများ အော်ဟစ်လိုက်ကာ သူ၏ သံတင်းပုတ်ကြီးတမျှ ကြီးမားလှသော လက်သီးကြီးကို ဝှေ့ယမ်းလျက် ချူဟွမ်၏ ဦးနှောက်ကို ထုခွဲထုတ်၍ သေသေချာချာ ဆေးကြောလျှော်ဖွပ်ပစ်ချင်နေသည့်နှယ် ရှိနေပေသည်။

ချူဟွမ်က နှာခေါင်းကိုပွတ်၍ ရှုံ့ရှုံ့တွတွဖြင့် ပြုံးပေ၏။
"... ခင်ဗျား အဲဒါက 'ဂန်းနမ်စတိုင်'ကို ဆိုလိုချင်တာတော့ မဟုတ်နိုင်လောက်ဘူးမလား?"

နန်ရှန်းမှာ ရှောင်ဖန်းတစ်ယောက် ဒေါသထွက်လွန်း၍ သေသွားတော့မည်စိုးသဖြင့် စောင့်ကြည့်ထားရလေသည်။ ချူဟွမ်ကား အနှီကိုလူချောမှာ စကားပြောသည့်နေရာတွင် အတော်လေးထိ‌ရောက်ကြောင်း တွေ့ရှိသွားရလေ၏။ သူပါးစပ်ဟလိုက်သည်နှင့် သောင်းကျန်းနေသော ရှောင်ဖန်းတစ်ယောက် နာခံမှုအပြည့်ဖြင့် ချက်ချင်းပင် ပါးစပ်ပိတ်သွားချေတော့သည်။

ရှောင်ဖန်းမှာ လှောင်ပိတ်ခံထားရသော သားရိုင်းကောင်ကြီးနှယ် တစ်နေရာတည်းတွင်ပင် ဒေါသတကြီးဖြင့် အကြိမ်ရေအတော်များများ ချာလည်ပတ်လှည့်နေသော်လည်း လက်လျှော့လိုက်ရန်ကိုမူ လက်မခံသေးပေ။ ခဏမျှအကြာတွင် သူက ငြိမ်ငြိမ်ရပ်လျက် သူ၏ ကြီးမားလှသော ဝက်ဝံလက်ဝါးကြီးကို ရှေ့ထုတ်လိုက်ကာ ယပ်တောင်ခတ်နေသကဲ့သို့ သူ့လက်ဖဝါးကို လေထဲတွင် ဝှေ့ယမ်းလျက် အကြိမ်ပေါင်းများစွာ တဖျတ်ဖျတ် ခါပြပေ၏။