ေခတ္သစ္မင္းကုသ ခေတ်သစ်မင်းကုသ(Z+U)

💕Ep 15💕

Uni

💕ခေတ်သစ်မင်းကုသ💕

Ep 15

စစ်လွန်းသာဟာ ဆေးရုံကုတင်ပေါ်တွင် မျက်နှာတစ်ခုလုံး ဖြူဖျော့စွာဖြင့် အိပ်စက်အနားယူနေတဲ့ မိခင်ဖြစ်သူ၏လက်ဖဝါးလေးကိုအုပ်ကိုင်ရင်း မိခင်၏မျက်နှာထက်က ချွေးစေးအချို့ကို လက်ကိုင်ပုဝါလေးဖြင့်သုတ်ပေးနေမိသည်။

"ညီညီ အိ​မ်ပြန်ပြီးနားရင်နားတော့လေ မာမီကို ကိုကိုပဲဆက်စောင့်နေလိုက်မယ်"

နောက်ပါးဆီမှကြားရသောအသံကြောင့် စစ်လွန်းသာ အနောက်သို့လှည့်ကြည့်မိတော့ လူနာဆောင်အခန်းတံခါးကိုဖွင့်၍ဝင်လာသော စစ်ရှိန်သာကိုတွေ့ရ၏။

"ဒါဆို ညီညီ အိမ်ခဏပြန်ဦးမယ် ညမှကိုကိုနဲ့အတူလာစောင့်ပေးမယ်နော်"

သူပြောလိုက်တော့ အကိုဖြစ်သူက ခေါင်းငြိမ့်ပြတာမို့ စစ်လွန်းသာလည်း အိမ်သို့သာပြန်လာခဲ့၏။

ခွန်းဆက်ပိုင်တစ်ယောက် ရေလဲဝတ်စုံအဖြူရောင်ကို ခါးတွင်ကြိုးချည်၍ဝတ်လိုက်ပြီး ရေချိုးခန်းထဲမှထွက်လာသည်။

*Ring.. Ring.. Ring*

ကုတင်ပေါ်တင်ထားသောဖုန်းမြည်သံကြောင့် ခွန်းဆက်ပိုင်လည်း ဖုန်းကိုင်လိုက်တဲ့အခါ သူ့ရဲ့အဖေဆီမှခေါ်ဆိုခြင်းဖြစ်နေ၏။ ထို့နောက် သက်ပြင်းသဲ့သဲ့ချရင်း အစိမ်းတန်းလေးကိုညာဘက်သို့ဆွဲ၍ ဖုန်းကိုနား၌ကပ်လိုက်သည်။

"ခွန်းဆက်ပိုင်.. သားငယ် မင်းဆီကိုရောက်နေပြီလား"

အဖေ့ဆီကသူ့အတွက်ချိုသာတဲ့စကားလုံးကြားရဖို့ဆိုတာ ဟိုးအရင်တည်းက သူနဲ့မသက်ဆိုင်တဲ့အရာပါ။

"အင်း မနက်ကရောက်တယ်"

"သားငယ်ရဲ့ကျောင်းကိစ္စတွေမင်းသေချာစီစဥ်ပေးလိုက်"

သားငယ်... သားငယ်... ဟက်! မယားငယ်နဲ့ရတဲ့သားကိုတော့ ဖေဖေဟာသိပ်ကိုအကဲပိုလွန်း၏။ သူကရော ဖေဖေရဲ့ သားမဟုတ်ဖူးလားလို့ မေးလိုက်ချင်ပါရဲ့။ အခုတော့တစ်ယောက်ထဲနေလာတဲ့သူ့ဘဝက မယားငယ်နဲ့ရတဲ့သားအတွက် အခိုင်းစေလုံးလုံးဖြစ်မှန်းမသိဖြစ်နေရသည်။