💞 Part - 14 💞
~~~~~~~~~~~~~
ထူနက်နေသောမျက်ခုံးတွေက ရှည်လည်းရှည်ကာ အနားသပ်နေရာတွေမှာ အမွှေးနုလေးတွေပါရှိ၍ စိမ်းမြနေ၏။
မျက်တောင်တွေက တိုတိုစိပ်စိပ်ဖြစ်ပေမယ့် ဒီအကြည့်စူးစူးတွေကြောင့် ကိုင်းရင်ခုန်ခဲ့ရသည်။
ဖြောင့်စင်းသောနှာတံက မျက်နှာတစ်ခုလုံးမှာ အထင်ရှားဆုံးဖြစ်သလို လေးကိုင်းသဏ္ဍာန် နှုတ်ခမ်းတွေက အထူအပါးညီသည်။
ဦးရဲ့နှုတ်ခမ်းတွေက နည်းနည်းညိုသည့်ဘက်ရောက်တာမို့ ဆေးလိပ်သောက်ဟန်ရှိကာ ဖြူသောမျက်နှာမှာ နှုတ်ခမ်းညိုတာကလည်း ကြည့်ကောင်းနေပြန်သည်။
"ဘာလို့ ကိုယ့်ကိုအဲ့လိုကြီးစိုက်ကြည့်နေတာလဲ ချာတိတ်"
"ဦးကို အရမ်းသဘောကျလို့"
ကိုင်း မေးထောက်ရင်းကြည့်နေတာကို မနေတတ်သလိုမေးလာတော့ ရှက်နေသောလူပျိုကြီးကို တမင်စချင်လာသည်။
မျက်လုံးလေးမှေးစင်းကာ ခပ်ပြုံးပြုံးလေးကြည့်နေလိုက်တော့ ဦးက ရည်းစားမထားဖူးမှန်းသိသာကာ နားရွက်ဖျားတွေရဲတက်လာတော့သည်။
"ဦး ရည်းစားမထားဖူးမှန်း အရမ်းသိသာတယ်"
"မင်းကရော ပညာတွေသိပ်ပြည့်ဝနေသလိုပဲ ဟုတ်လား ချာတိတ်"
ကိုင်း နှာခေါင်းလေးရှုံ့ပြလိုက်ကာ ဦး လက်မောင်းကိုဖက်ထားလိုက်ပြီး ဦးပခုံးပေါ် ခေါင်းလေးတင်ထားလိုက်သည်။
ဦးရဲ့ပခုံးက နွေးနေသလို ဆပ်ပြာနံ့လား၊ ရေမွှေးနံ့လားမသိသော မွှေးရနံ့တစ်ခုရလိုက်တာမို့ ကိုင်း ဦးလည်ပင်းကို မသိမသာနမ်းကြည့်မိသည်။
ဒါကိုပဲအသည်းယားသွားသလို ဦးက တွန့်ခနဲဖြစ်သွားပြီး…
"ဒီခေတ်မိန်းကလေးတွေများ လက်ရဲဇက်ရဲရှိလိုက်တာ"
"ဦးနော်"
"အင်းပါ လူယုတ်မာမလေးက ချစ်စရာကောင်းတော့ ကိုယ် အယုတ်မာခံလိုက်ပါ့မယ် ဒါပေမယ့် မထိတထိလေးတော့မလုပ်နဲ့ ယားတယ်ကွ"
ကိုင်း တခစ်ခစ်ရယ်ပြီး ဦးလက်မောင်းကို တအားကိုက်ပစ်တော့ ဦးကတွန့်ခနဲဖြစ်သွားပေမယ့် အသံမထွက်။
မော့ကြည့်မိတော့ ပြုံးနေသည့်မျက်နှာဖြင့် ကိုင်းကို နူးနူးညံ့ညံ့လေးစိုက်ကြည့်နေသည်။
သူ့အကြည့်တွေသည် ကိုင်းဘာလုပ်နေနေ အပြစ်မမြင်နိုင်သည့် မြတ်နိုးယုယခြင်းတွေဖြင့်…
YOU ARE READING
သူမ မှ တစ်ပါး
Romanceတစ်ခါတစ်လေ Exတွေပြန်လာတယ်ဆိုတာ ကိုယ့်ရဲ့နံရိုးပိုင်ရှင်ဖြစ်လို့မဟုတ်ဘဲ ကံကြမ္မာက နင်အရင်လိုကျပ်မပြည့်တုန်းပဲလားလို့ စမ်းသပ်တာလည်းဖြစ်နိုင်တာပဲ ဒီFicကိုဖတ်မယ်ဆို Dreamerနဲ့ မ,ရယ် ကျွန်တော်ရယ် အိမ်မက်တွေရယ် အရင်ဖတ်ဖို့လိုပါတယ် Season 2လိုဖြစ်နေလို့ပါ...
