زهرة🌸

الحلقة الثامنة و الثلاثون

🔸️حلقة 38
🔸️زهرة تحكي:
حبيتك...ايه حبيتك...رغم اللي فيا الكل حبيتك...رغم المرارة اللي في حياتي...انت حليتها...رغم الخوف لي كنت نعيش فيه كل لحظة و كل ثانية...كان حبك يكبر في قلبي...تمنيت ناقف قدامو و نقول الكلام هذا...نقولو مرة و اثنين...نقولو و انا في حضنو و بين يديه...اما الحاجز لي بينا...واقف ورا هذا الباب...حبي ليه بكلمة مني كهو...الحب هذا باش يدمرو و يدمرني و يدمر كلشي حلو حلمت بيه...عمر هو فرحتي الوحيدة...لي متأكدة منها...على هذاكا مستحيل نخلي حد يقرب منو...كان على حساب حياتي...الباب لي تحل في لحظة تحلت معاه وجيعتي لي عشت بيها سنين...و ريتو مرة اخرى...اي ريتو بعد ما قلت تهنيت منو و باش نعيش من غيرو...اما نسيت لهو ديما يرسم الطريق على كيفو في لحظة جات عيني في عينو...نفس الغزرة من سنين نفس ملامحو الباردة...نفس قبضة يدو القوية تي حتى الحبس ما نقص حتى شي من وهرتو...و من شرو بالعكس...ولى حاقد أكثر...تسكيرة الباب...بقات ترن في وذني...منجمش نبعد...و منجمش نبقى واقفة في بلاصتي...هزني و حطني بعينيه...نزلت عينيا منو بالوقت...المسافة لي تعدمت بينا في لحظة...دخلتني بعضي اكثر...و خلاتني نادي على عمر في سري...نحس روحي محصورة في دبوزة كحلة...منجمش نخرج منها أنفاسو حرقتني حتى قبل ما توصلني...غمضت عينيا بالقاوي...مع كبست يديه على جنابي...نزلت بسناني على شفايفي...نهدي في روحي...نحاول نتحمل لي قاعد يصير...عدا صوابعو على خدي و نزل بيهم لرقبتي كبس على خصلات شعري...قربهم ليه أكثر...خذا نفس بالقاوي يحكي
مراد:توحشتك...توحشت قربك...ريحتك و صوتك...و كلشي فيك
حاولت نوخر لتالي...اما كبس على ظهري...و جبدني عندو اكثر...تعدات صور عمر بين عينيا...انا فاش نعمل و شبيني بين يديه توا...انفاسو لي قوات في رقبتي خلاتني نتقزز من روحي اكثر...هزيت يدي بالسيف حطيتها على صدرو...نحكي بصوت دوب يتسمع..صوتي لي ضاع مني...وسط الخوف و الاحساس الخايب لي قاعدة نعيش فيه
انا:ا أبعد...مراد...أبعد عليا
كبست عليه اكثر...و جبدت روحي منو...نرد في نفس بالسيف...رخف يديه شوية...و وخر لتالي...طلعت راسي شوية نغزرلو...جيت باش نحكي...تبسم على جنب...و رجع كبس عليا في لحظة...دزني لتالي...ضربت في الحيط ورايا...استند بيدو عليه...و نزل عليا اكثر...جات عيني في عينو...رجع يعدي في صوابعو على خدي و يحكي
مراد:أنا لي نقرر هوني شنعمل...متنساش لانتي متاعي
انا:ا انت واحد مريض مراد...تسمع فيا مريض
تبسم ندرا كيف...و نزل بصوابعو لشفايفي...يحكي
مراد:مريض بيك انتي...يا زهرة...هذا لي متحبش تفهمو انتي
أنا:و أنا مستحيل نحبك...مستحيل...تسمع فيا
مراد:ششش...شنوة عزيزتي فيسع نسيت اتفاقنا
انا:لا منسيتش...اما زادة انا مانيش باش ننساه فهمتني مهما عملت يا مراد...عمر ماهوش باش يخرج من حياتي
مراد:أما ينجم يخسر حياتو
هزيتلو براسي لا...نحس في روحي باش نهبل من كلامو و تصرفاتو الباردة...قحرتلو نحكي
انا:مستحيل...انت ما تنجم تعملو حتى شي...سمعتني
كبس على خدي أكثر...و عوج راسو شوية...يحكي
مراد:متستفزنيش أكثر...عيش حبي...ماك تعرفني ساعات نتصرف من غير ما نخمم مرتين...مش ديما تسلم الجرة و نسألك
هزيت يدي...ضربتو لصدرو...و كبست على سوريتو نحكي
انا:رد بالك مراد...رد بالك...اعمل كلشي تحب عليه...اما متكونش مجرم...تسمع فيا...رد بالك تولي مجرم
ساعتها باش تخسر روحك زادة
حاوط وجهي بيديه زوز...تبدلت غزرتو في لحظة...كبس عليا يحكي
مراد:كلشي يهون في خاطرك...انا مستعد نقتلك حتى انتي...كان صار و قررت تمشي و تخليني...زهرة صدقني مستعد نخسر كلشي...حتى روحي زادة...أما إنتي ما تكوني لحتى حد غيري
بقيت نغزر لعينيه...كلامو لي قالو بغل و خوف من انو يخسرني...دخلني بعضي اكثر...هزيت يديا زوز حطيتهم على يديه...نزلتهم من وجهي...نحكي
أنا:مراد يزززي...أمانك يزززي...أنت تضر في الكل...في أمي و فيا و في عمر و مريم...و حتى روحك زادة...انت حاجتك بيا انا...فاش قام تهددني بيهم...علاه تتعمد تاخو مني الناس لي نحبهم...في بالك باش نجم نعيش وحدي
مراد:باش تعيش معايا انا...هذا الكل تنساه مع الوقت امك عمرها ما غزرتلك كيما بنتها...و حد ما راح يحبك كيفي
انا:كان جيت تحبني بالرسمي...اعتقني مراد...اخرج من حياتي...بسببك انا خسرت أمي...و أختي و الإنسان الوحيد لي حبيتو...يزززي...شتحب مني أكثر
هز يدو شدني من وجهي كبس عليا...حسيت بصوابعو تغرسو في خدي...يحكي بغل
مراد:نحبك تنساه...تعرف شمعناها تنساه...تفسخو من حياتك جملة...و الا باش نبعثو لدنيا لأخرى و إنتي إختار
جبدت روحي منو...دزيتو بيديا زوز...و وخرت لتالي نحكي
أنا:باهي...اعمل لي تحب عليه...برا اقتلو...أما والله يا مراد...و رحمة بابا...كان صار شي لعمر...نقتل روحي قدام عينك...والله ما نخليك تبكي على جثتي
بقى يغزرلي...هزني و حطني...تبسم على جنب يحكي
مراد:طول ما إنتي بعيدة عليه...هو باش يكون مليح
اما كان صار...و قربت منو خطوة وحدة...صدقني باش ترا جثتو قبل ما تموت...و مش كان هو...حتى الفرخ الصغير متاع العيلة لانتي فيها...و لي تحاول تلعب معاه...اصلا اللعبة توا وين حلات اكثر يا روحي
هزيتلو براسي باهي...من غير حتى كلمة اخرى...قربت من الباب بالزربة...دقيت عليها مرتين...اول ما فتح الباب...غزرتلو وخرجت...نمشي بالزربة...نحب نبعد من هوني...نحب نخرج من البلاصة...لي تحصرت فيها معاه...اول ما تحل الباب متاع برا...خذيت نفس من النسمة الباردة...النسمة لي حسيتها تحاول تنحي ريحتو من خشمي..شديت عليهم تليفوني...و مفاتحي منعرفش قداش بقيت و انا نمشي...كلامو لي قاعد نحاول ننسى فيه قوا في وذني اكثر...قعدت في أول كرسي عارضني و طرشقت بالبكا...دموع لي كنت حابستهم قدامو طاحو على خدودي يحرقو...كيفاش باش نجم نعيش من غير عمر...كيفاش نقنع روحي لهو ماهوش باش يكون في حياتي بعدما تعلت بيه...علاه انا...علاه و لا مرة فرحت علاه ديما فرحتي ناقصة علاه ديما مجبورة نضحي بالناس لي نحبها...غمضت عينيا بالقاوي...نتذكر اخر مرة رقدت فيها مقهورة على لي صار في سيرين و فقت على صوت تليفوني...هزيت من غير ما نخمم مرتين...و من غير ما نغزر لرقم...هزيت خاطر في بالي هو خاطرني خممت و استوعبت كلامو فهمت انو ملازمش نضحي بحبي ليه...و انو سيرين مكانش لازم تعمل اكاكا...حبيت نعطي لروحي طرف أمل نتمسك بيه حبيت نسمع قرار سيرين بعد ما تفيق حبيت و حبيت حبيت برشا حاجات...اما صوتو القوي قص عليا كلشي حلمت بيه...صوتو لي قالو ببرشا استهزاء...خلاني نتقعد مصدومة منو
مراد:صباح الخير...يا روحي
بقيت درجين...نستوعب في اللي قاعد يصير...كلامو لي بقى يتعاود في راسي...صوتي لي حسيتو ضاع دوب سمعت صوتو...منعرفش كيفاش نجمت نخرج اسمو من بين شفايفي...نحكي
انا:م مراد
مراد:مممم...مراد
انا؛ش شتحب مني ؟
مراد:شنوة حبي لحقت تنساني فيسع...لا عاد...لهدرجة غاطسة في حبك درباني...و نسيت لي فما شكون وراك
انا:ا انت واحد مجنون مراد...مريض
مراد:مريض بيك يا عمري
انا:شتحب مني ؟ اخر مرة نسألك فيها
مراد:مممم عندي ليك حاجة سبيسيال برشا...و باش تعجبك عاللخر
بقيت ساكتة...و دخلت بعضي اكثر...نعرفو لي يقصد برشا حاجات ورا كلامو هذا...كمل يحكي
مراد:قوم من بلاصتك توا
انا:شنووة ؟
مراد:حل شباك بيتك شوية...تو تفهم كلشي
هزيت روحي بالزربة...قربت من الشباك...حليتو و هزيت الريدو...دورت عينيا عالجنينة...و طلعت راسي لاخر النهج...نلمح في كرهبة كحلة مراكية غديكا...نفس الكرهبة لي ديما نحسها تبع فيا...و نفس الكرهبة لي حاولت تضرب مريم يمات لتالي...اما ربي لطف بيها...و عدينا الحكاية....كبست بيدي عالريدو نحكي
انا:الكرهبة هاذي تابعة ليك
مراد:عيش عزيزتي...هاك عرفتها فيسع
انا:شنية تحاول تعمل مراد ؟
مراد:خلينا نعملو اتفاق صغير برشا...نعرف لانتي قدها
انا:شقصدك ؟
مراد:اه يا روحي...زعمة شكون تختار...صحبتك و لا البروف متاعك ؟
انا:فاش تحكي ؟
مراد:مممم نعرف لي صعيب برشا تختار...ملا خليني انا نختار
انا:رد بالك...رد بالك تقرب منهم
مراد:ششش اهدا...اهدا عزيزتي...لي تحب عليه باش يصير....اما
انا:اما شنوة ؟
مراد:تبعد عليهم زوز...و الا باش تخسرهم مع بعض
انا:انت باز هبلت
مراد:تصرف فيسع...معنديش وقت نضيعو يا روحي
نزلت تليفون شوية...حسيت بدوخة قوية...شعرة لا طحت...قربت من الباب بالزربة...نحب نحكي كلشي لحسام...عالاقل يرا الكرهبة قبل ما تمشي...و لا يخبر البوليسية...اما قص عليا صوت تليفوني مرة اخرى حليتو نغزر لصور مريم و عمر لي وصلتني بالوقت
حتى صوري معاه البارح...وقت مشينا للفيرما...معناها بالرسمي طلع كلشي على عينو...وصل ميساج وراهم بالوقت...حليتو نقرا فيه << في يدك اسبوع واحد كهو...و الا باش تخسرهم بالواحد >> حليت عينيا مروهجة...لتوا اكا الميساج بين عينيا...كان مش محمد مستحيل نقنع حد باللي قاعد يصير...اما حتى هو باش يتضرر جرايري...كبست بيديا على حرف الكرسي..نحس في روحي باش نهبل...منحبش نبعد عليهم...منحبش نعيش حياتي من غير مريم و عمر...عمر لي حسيتو بتصرفو متاع البارح...كان يستنى فيها باش يخرجني من حياتو...حبيتو يتصرف كي عادتو...حبيتو يحس انو مراد ورا الحكاية...و حياتو بين يديه...نعرف مراد اكثر من روحي...و متأكدة لهو ينجم يعملها من غير ما يخمم مرتين...في لحظة حسيت حياتي ضاعت مني و رجعت لحلقة مراد...رجعت اسيرة عندو مرة اخرى...اما حد ماهو باش يعطيني يدو المرة هاذي...بكيت بقهرة بكيت خاطر منجمتش نخمم...منجمتش نفكر في حتى شي أول مرة نحس روحي خسرت كلشي...و معاد نجم نعمل حتى شي...حتى منعرفش كيفاش باش نخرج من هذا الكل...تكيت لتالي...و كبست على كبوطي اكثر بردت برشا...بردانة عاللخر...اما منجمتش نقوم..ما نحب نمشي لحتى بلاصة...تي حتى حسام و امي فتحية خذاو مني موقف...و امي منجمش نمشي عندها و حتى مريم زادة...منعرفش علاه تعمد يبعدني عليها الأبواب الكل تسكرت في وجهي...و معاد يهمني حتى شي اخر

🔸️عمر يحكي:
حليت عينيا بالسيف...نحس في راسي باش يطرشق منعرفش كيفاش هزني نوم و رقدت...اصلا منعرفش كيفاش قاعد نعدي في اليمات هذوما...لتوا مش مصدق لي صار اخر مرة...اصلا منجمتش نسألها...يدها لي حطتها في يدو و هي تغزرلي...قرارها لي متأكدة منو خلاني منجمش حتى ناقف في وجهم...مشى في بالي لعب فروخ...و لا حكاية سيرين قلقتها...اما باز الحكاية اكبر برشا من هكا...تقريب شهر تعدا...لا ريتها و لا حتى سمعت صوتها...حتى وقت حسام يجي باش يحكي عليها...نبدل الموضوع...منعرفش علاه قاعد نتصرف بالطريقة هاذي...منعرفش علاه اخترت البعد المرة هاذي...نحبها و نموت عليها...اما فرد وقت منجمتش نقرب منها...منحبش نراها...عالاقل لين نحاول ننسى لي صار...اخر شي توقعتو منها...انها تتصرف معايا بالطريقة هاذي...حتى من غير ما تبرر شي...تعبت من الوضع هذا برشا...نحس في حياتي فارغة من غيرها...تعلقت بيها لدرجة معادش نجم نعمل شي...يمكن احسن قرار نبعد من هوني جملة...بلكشي نجم نبدا من جديد...خاصة بعدما حبست الخدمة...نحس في روحي قاعد نرجع لنقطة الصفر...قعدت على حرف السرير...نغزر للبراصلي متاعها...عالتابل دونوي...كبست على سناني...نهدي في روحي...حليت القجر و طيشتها الداخل...جيت باش نقوم...قص عليا صوت تليفوني...رميت عيني...نغزر لسيرين تطلب...اصلا بعد الحادثة حكينا شوية...حسيتها بدات تتحسن على قبل...و بدات تتقبل لي قاعد يصير خذيت نفس و هزيت عليها...نسمع فيها تحكي
سيرين:صباح الخير
انا:بونجور سيرين...لباس ؟
سيرين:أحسن من قبل
انا:حمد الله
سيرين:مممم عمر...نجم نطلب منك شي ؟
انا:بالطبيعة
سيرين:ميسالش نفطرو مع بعض ؟
انا:باهي...اكيد
سيرين:في ريسطو متاع العادة
هزيت يدي عديتها على شعري...متوتر من كلامها منعرفش علاه اختارت البقعة هذيكا بالظبط...خذيت نفس نحكي
انا:باهي...حضر روحك...تو نتعدالك
سيرين:لا...نتلقاو غديكا
انا:باهي
علقت عليها و هزيت روحي بالسيف...دخلت لبيت البانو عملت دوش خفيف...و بدلت دبشي...قد ما حاولت نحيها من مخي...شي...نحس في روحي باش نهبل جرايرها...هزيت مفاتحي و خرجت...اول ما خدمت الكرهبة...كلمني حسام...هزيت عليه نحكي
أنا:وي حسام
حسام:وينك ؟
انا:باش نقابل سيرين...صارت حاجة ؟
حسام:شنننوة...فاش قام تقابلها توا ؟
أنا:شي...هكا برك
حسام:فاش قاعد تعمل ؟
انا:شي حسام...من غير ما تكبش في الحكاية توا
حسام:ياخي نورمال انت...لا عاد جيت و لا درت هوني تي حتى انا دوب نجم نقابلك
أنا:مفما حتى شي مهم...لازمني نقابل سيرين توا..نحيكو مبعد
حسام:باهي عمر باهي...نتوما بقاو هكا...و خلينا نشوفو آخرة هالحكاية معاكم
انا:مفماش احنا حسام...و يا ريت تسكر عليا الموضوع هذا جملة
حسام:باهي...ماك تهرب كي عادتك
أنا:بالظبط...صحيتك
حسام:نشوفك مبعد
انا:باهي
علقت عليه...و زدت في الفيتاس اكثر...منعرفش علاه ديما يتعمد يذكرها...مع انو حتى هو متغشش منها...اما حسيتو يدافع عليها بطريقة اخرى...منعرفش كيفاش وصلت لريستو...ركيت الكرهبة و نزلت...اول ما دخلت لمحتها قاعدة في طاولة متاع العادة...تذكرت اليمات لي كانت تستناني فيهم في نفس الطاولة ديما...أما المرة هاذي...غريبة معادش نحس كيما قبل...معادش نراها المرا لي نجم نكمل حياتي معاها...اما زادة عمري ما كرهتها...و لا نكرت لي عشتو معاها...اول ما جات عيني في عينها...هزت روحها وقفت...وصلت قدامها بالظبط مدت يدها صافحتني تحكي
سيرين:مكنتش متوقعة باش تجي
أنا:أكيد مكنتش باش نرفض زادة
سيرين:عيشك
هزيتلها بيدي باش تقعد...جبدت الكرسي و قعدت مقابلها...حسيتها ياسر متبدلة على قبل...حتى في تصرفاتها...بقينا نفطرو عالساكت...هزت راسها غزرتلي تحكي
سيرين:إمتى باش تعرسو ؟
طلعت راسي غزرتلها بالوقت...تبسمتلي...تستنى فيا نجاوبها...حطيت الشوكة من يدي نحكي
أنا:ماناش باش نعرسو
سيرين:شنننوة...علاه ؟
أنا:منعرفش سيرين...أما هذا أحسن حل لينا زوز
سيرين:مزلت تحبها ؟
هزيت يدي عديتها على شعري...و تكيت لتالي من غير حتى كلمة...منجمش نرفض...منجمش ننكر لانا نحبها مستحيل تخرج من فمي...خاطرني نعرف لي باش نكذب على روحي...تبسمت تحكي
سيرين:فهمت...أنت مزلت تحبها
أنا:سيرين...من غير ما نحكيو في الموضوع توا
سيرين:يا ريت حبيتني كيفها عمر...يا ريت نجمت نخليك تحبني انا زادة
أنا:سيريين
سيرين:مزلت نحبك عمر...في بالي بعملتي هذيكا كنت باش نرتاح...أما عرفت روحي غلطت برشا...كان لازم نحارب على خاطرك...كان لازمني نكبش فيك أكثر..مش نقتل روحي
أنا:حاول تنسى سيرين...إنتي بعملتك هذيكا لازمك تتعلم برشا حاجات في حياتك
سيرين:تعلمت...تعلمت أنو إذا حبيت حد لازمني نحارب على خاطرو...مهما صار
بقيت نغزرلها...منعرفش شنية لي باش نقولو...يمكن كان جات زهرة معايا توا...كنت قلت لأنا باش نعرس بيها و نعيش حياتي معاها...أما هي اختارت ثنية أخرى...من غير ما تبرر شي من عملتها...باقي تغزرلي و تحكي
سيرين:أعطيني فرصة أخرى...فرصة لينا احنا زوز..خلينا نسافرو من هوني...و نعيشو بعيد عالكل...حياة خاصة فينا إحنا زوز و كهو
منجمتش نقول حتى كلمة...باقي نغزرلها و كهو...نحس في راسي باش يطرشق...صورتها بين عينيا...قاعد نلوم فيها داخلي...منعرفش اذا باش نجاوب سيرين...و لا نهز روحي و نمشي عندها...و نشد نفتقها على بعضها...مبعد نحضنها و ننسى معاها كلشي كي العادة...تنهدت بالقاوي منعرفش شنوة لي قاعد نخمم فيه بالظبط...و لا شنوة لي لازم نعملو...اول مرة نحس روحي عاجز لهدرجة لدرجة منجمش...حتى نقوم و نمشيلها...و نفهم منها كلشي...حبي ليها عجزني لهدرجة...لدرجة معاد نجم نعمل حتى شي و لا نقرر حتى شي اخر و هي مش معايا...بقيت نغزرلها...تبسمت على جنب...و غزرتلها نحكي
انا:سيرين...حكايتنا وفات...كان انا رجعتلك توا..صدقني نظلمك معايا و نظلم زهرة زادة...انساني و عيش حياتك حاول تغزر لدنيا بطريقة اخرى سيرين...مش لي تحبو يكون عندك...حاول تبدا من جديد...و صدقني..كل مرة تحتاجني فيها تلقاني جنبك
سيرين:شنوة كان صار...كان زهرة مدخلتش حياتنا
انا:كنا باش نكملو مع بعض...أما لا إنتي كنت باش تعيش فرحانة...و لا أنا كنت باش نرضى
سيرين:شنوة فيها زايد عمر ؟
أنا:منعرفش صدقني...اما منجمش نعيش مع طفلة غيرها
سيرين:انت قلتها...مزالت طفلة...و متعرفش شنية لي تحب عليه بالظبط
انا:اما انا نعرف شنوة لي نحب عليه
سيرين:تحبها لهدرجة انت
انا:سيرين مجيتش باش نحكي على زهرة...وقيت باش نمشي...عندي خدمة تستنى فيا...قوم نوصلك في ثنيتي
سيرين:لا...برا عندها...اما صدقني مهما صار...انا باش نبقى معاك ديما...و باش تلقاني في اي وقت عمر
هزيتلها براسي ايه...اصلا منعرفش شنوة لي نحكيه معاها...حطيت الفلوس عالطاولة و هزيت روحي قمت من غير حتى كلمة..سيرين فيقتني على وضعي فيقتني على حاجات كان لازم نعملهم قبل شهر من توا خدمت الكرهبة...و كلمت حسام...دوب هز عليا...حكيت معاه
انا:وينك ؟
حسام:شصار ؟
انا:وينك ¤¤¤¤ ؟ حاجتي بيك
حسام:في الخدمة
انا:باهي
علقت عليه...و شديت ثنية لشريكة...منعرفش كيفاش وصلت...هديت عليه للبيرو...قحرلي يحكي
حسام:بالشوية صاحبي
انا:على اساس غاطس في الخدمة
حسام:والله معادش نعرف شنوة نعمل بالظبط...راني باش نفلس جرايركم
انا:منخافش عليك
حسام:مش على اساس نتقابلو عشية...شصار ؟
انا:شي...انا جيست
حسام:جيست شنوة ؟
انا:باش نسألك على
حسام:زهرة ؟
انا:مممم
حسام:حمد الله كي مزلت متذكرها
انا:زيد ¤¤¤¤¤¤ عليا توا
حسام:عممممر...الطفلة تاعبة عاللخر...صحيح مقعدتش و حكيت معاها...اما ماهيش كي العادة...و حتى محمد مزال في نفس عادتو...سهرات و شراب و بنات...الطفل هذاكا ماهوش باش يتبدل...و باز فما حاجة في الحكاية
انا:نعرف...على هذاكا نحبك تعاوني
حسام:في شنوة تخمم انت ؟
انا:باش نعرف منها الحكاية...أما على طريقتي
حسام:خرجوني منها الحكاية...تي حتى صحبتها معادش تحكي معاها
أنا:مرييم ؟
حسام:مممم
انا:علااه ؟
حسام:شيعرفني أنا...الأولى متحبش تحكي...و لاخرى مجودرة أكثر منها...أما بيني و بينك...تهنيت منها يامات
أنا:تحب تقنعني بالكلام هذا معناها
حسام:مممم..لي تخمم فيه زايد...مانيش ناقص لعب فروخ...و هالحكايات
انا:باهي نشوفك مبعد
حسام:مانيش ناقص ¤¤¤ توا...شتحب مني
انا:العشية نحبك تبدا موجود في الدار
حسام:ياخي باش تجي ؟
انا:شنوة...متكونش صدقت لمعادش نعفسها الدار ؟
حسام:لا عاد شنية الكلام هذا...بالطبيعة باش نكون موجود...اما هاني باش نوصيك توا...رد بالك تغششها
انا:ماكش باش تخاف عليها اكثر مني...اما لازمني نفهم الحكاية هاذي
حسام:باهي ملا
انا:باش نمشي توا...عندي ما نعمل
حسام:و شنوة قررت بخصوص الخدمة
انا:احتمال كبير اني نسافر
حسام:مزلت مكبش في قرارك
انا:منعرفش حسام..اما كان منجمتش نرجعها ليا...احسن شي نبعد من هوني
حسام:باهي...ان شاء الله خير
انا:ان شاء الله
خليتو و خرجت...هزيت الكرهبة و قصدت ربي..متحلف فيها...نسوق و نحكي وحدي << باهي يا زهرة باهي..تو نشوف اخرتها معاك وين >> كبست عالفيتاس اكثر نحب نراها و نشبع منها...اكثر من اني نحاسبها و نفهم اللي قاعد يصير...وحشي و حبي ليها تعدا الحدود الكل...حتى الحدود لي رسمتهم في حياتي...كلشي يطيح قدامها هي و كهو

🔸️زهرة تحكي:
دخلت للكوجينة...نغزر لخالتي نعيمة...غاطسة تحضر في الماكلة...و امي فتحية فوق راسها...فرغت كاسة ما...نغزرلهم مستغربة...تحضيرات غير العادة...خذيت رشفة نحكي
انا:امي فتحية...فما شكون باش يجي ليلة ؟
فتحية:بالطبيعة...ولدي الغالي باش يتعشى بحذايا
انا:شكون ؟
فتحية:شكون من غير عمر
بقيت نغزرلها...حطيت الكاسة عالرخامة...دنيا دارت بيا و شعرة لا طحت...منعرفش كيفاش باش نقابلو بعد الوقت هذا...شهر تعدا رزين برشا...توحشتو برشا توحشت ريحتو و صوتو...توحشت نترمى في حضنو و ننسى كلشي...قربت مني امي فتحية تحكي
فتحية:لباس ماهو ؟
انا:ل لباس امي...لباس
فتحية:شبي وجهك اصفر هكا ؟
انا:شي...جيست تاعبة و كهو
فتحية:وه عليا...خلي نكلم حسام يجي يهزك للكلينيك
انا:لا امي والله لباس...تو نطلع لبيتي نرتاح شوية
فتحية:زهرة...ياخي ريت روحك يا بنتي...شنية الحالة لي وصلتلها و علاه ماكش تمشي لقرايتك...محمد عملك حاجة
انا:لا لا...محمد ما عمل شي...انا باش نمشي توا
فتحية:باهي متنساش تنزل للعشا...نحب الكل عالطاولة
انا:باهي امي
خذيت نفس و خرجت من الكوجينة...نمشي بالسيف منعرفش كيفاش وصلت لبيتي...قعدت على حرف السرير نرد في النفس...متوقعتش لهو باش يجي بعد اليامات لي تعدات...احساس داخلي يقول لي برشا حاجات باش تصير...اصلا منجمش نطلع راسي و نغزر لوجهو بعد اللي صار...و منجمش نخبرو بالي صار..حتى مراد دوب نحكي معاه وقت يكلمني...قصيت عالقراية جملة...هكا احسن حل...كنت نعرف لي باش نبقى أسيرة عندو...مهما حاولت نهرب...الوقت تعدا رزين برشا...نحب نراه...نحب نغزرلو و نثبت في ملامحو مرة اخرى...اما زادة خايفة...خايفة برشا من اللي باش يصير...خايفة منجمش نشد روحي اكثر من هكا...منحبش نقرب منو منحبش نأذيه...و منحبوش يتضرر جرايري...يكفي لي خسر خدمتو على جالي...مانيش باش نتحمل فيه شي اخر...هزيت روحي بالسيف...بدلت دبشي كيما جا..قربت من المرايا نغزر لروحي...تصدمت من الحالة لي وصلتلها منجمتش حتى نثبت في ملامحي...رجعت شعري لتالي و خذيت نفس...نهدي في روحي...خرجت من البيت لقيت محمد في وجهي...قرب مني يحكي
محمد:زهرة لباس ماهو ؟
انا:مممم مليحة
محمد:كان تحب من غير ما تنزل
انا:لا محمد...ميجيش راهو
محمد:باهي ايجا
تنهد بالقاوي...و قرب مني...نزلنا اللوطة مع بعض...دوب وصلنا...دخل هو و حسام...طلعت راسي جات عيني في عينو...قلبي دق بالوقت...تي هوكا لباس عليه...شبيني انا وصلت للحالة هاذي...شبيني كان انا تعبت كي بعدت عليه...قرب من امي فتحية سلم عليها و يحضن فيها حتى خالتي نعيمة...غزرلي بشطر عين يحكي
عمر:كيفك ؟
بقيت نغزلو...نحس الكلام وحل في حلقي...متوقعتش باش يحكي معايا...خذيت نفس نخرج في الكلام بالسيف
انا:ل..لباس عيشك
دوب تبسملي و كمل دخل...غزرت لمحمد بالوقت...حتى هو مش فاهم شي...تنهدت بالقاوي و خلطت عليهم قعدت مقابلاتو...باقي امي فتحية تسأل فيه و تعاود حسيت روحي انا الدخيلة بينهم...انا لي حرمتو من عيلتو ثانية...باقي نغزر لصحن من غير حتى كلمة
نسمع في حسام يحكي
حسام:حمد الله كي مزلت متذكرنا
عمر:كان لازمني نجي الليلة
فتحية:وه...شمعنى الكلام هذا ؟
عمر:أمي صراحة أنا باش نسافر في آخر الاسبوع
طلعت راسي بالوقت...نغزرلو مصدومة..نحاول نستوعب الكلام لي قاعد يحكي فيه..قص عليا صوت أمي فتحية تحكي
فتحية:شمعنى الكلام هذا عمر...وين باش تسافر ؟
عمر:فرنسا
فتحية:عمر ولدي شنية الكلام هذا...كيفاش باش تعيش غديكا وحدك
حسام:هذا لي نحاول نفهمو أنا زادة
عمر:مانيش باش نكون وحدي...فتحية طمن
حسام:شقصدك ؟
عمر:صراحة...انا قررت باش نرجع نعرس بسيرين
بقيت نغزرلو...من غير حتى كلمة...كلامو يتعاود في وذني...نحس في الدنيا الكل دور بيا...غمضت عينيا بالقاوي و رجعت حليتهم...نسمع فيهم يحكيو
حسام:عمر فاش تحكي أنت ؟
عمر:لي سمعتو...جيست نكتب صداقي عليها و نسافرو
فتحية:شنوة عزيزي...باش تحرمني اني نفرح بيك
عمر:الفترة هاذي ياسر مظغوط...بعد ما نريقل اموري تو نرجع في أقرب فرصة
فتحية:على ربي...شباش نعمل مع صحة راسكم منعرفش
محمد:مبروك سي عمر
عمر:عيشك
رجعت الكرسي لتالي...و هزيت روحي قمت...منجمتش نسمعهم اكثر...غزرتلي امي فتحية تحكي
فتحية:وين ماشية عزيزتي ؟
طلعت راسي غزرتلها...نحس الكلام وحل في حلقي منجمتش نرد عليها...استندت بيدي على حرف الكرسي نوازن في روحي...دوب نجمت نغزرلهم...كلامو باقي يتعاود في راسي..خذيت نفس نهدي في روحي..تقويت على روحي...نمشي بالسيف...اول ما خرجت من الصالة استندت بيدي عالحيط...للحظة حسيت روحي كرهتو آخر شي توقعتو...انو باش يرجع لسيرين...تي حتى مغزرليش بشطر عين و هو يحكي كيفاش نساني فيسع كيفاش باش يمشي و يخليني هوني وحدي...علاه الكل خمم فيه و فرح معاه...كان انا...باقي نسمع في أمي فتحية و حسام يحكيو معايا...اما منجمتش نتلفت عندهم...دوب عملت خطوة...ساقيا معادش حملوني اكثر...طحت على طولي...منجمتش نتحمل اكثر من هكا...اصواتهم الكل سكتت...معاد نسمع في شي...و لا عاد حاسة بحتى شي آخر.

🔸️عمر يحكي:
حسيت الدم جمد في عروقي..منجمتش حتى نستوعب لي قاعد يصير...اخر شي توقعتو...باش تطيح قدامي منجمتش نتحرك من بلاصتي...نغزر لمحمد لي قرب منها بالزربة...و حسام في جرتو...وقتها برك...فقت على روحي...قمت بالزربة...قربت منهم...جبدت محمد لتالي و هزيتها شوية في يدي نحكي
انا:زهرررة...زهرررة حل عينيك تسمع فيا
حسام:عممر...احسن شي نهزها للكلينيك توا
هزيتلو براسي لا...نعرف حالتها هاذي...جراير الظغط لي قاعدة تعيش فيه...تقويت على روحي و هزيتها بين يديا...طلعتها لبيتها...حطيتها عالسرير...خلطو الكل ورايا شديت كاسة الما على خالتي نعيمة...بليت وجها و رقبتها...أحسن شي النفس متاعها منظم...غزرتلهم نحكي
انا:نحب نبقى معاها وحدي
فتحية:يا ولدي...كلم الطبيب يعدي عليها
انا:باش تكون لباس...انتي برا حضرلها حاجة تاكلها
حسام:هيا امي...هي باش تكون مليحة
محمد:رد بالك عليها
هزيتلو براسي ايه...استغربت كيفاش بقى ساكت...اول ما تسكر الباب...قربت منها شوية...قعدت على حرف السرير...نغزرلها...نثبت في ملامحها التاعبة...متوقعتش باش توصل للحالة هاذي...ياسر تعبت و ضعفت...شنية ورا الحكاية يا زهرة...عديت صوابعي... على خدها نرجع في شعرها لتالي...نحاول نفيق فيها فرد وقت حلت عينيها شوية مروهجة...دوب غزرتلي...و رجعت سكرتهم...تحكي
زهرة:ش..شصار ؟
انا:كيفاش تحس في روحك ؟
زهرة:ر..راسي باش يطرشق
انا:ماكش باش تبطلها العادة هاذي
هزت روحها بالسيف...تقعدت...غزرتلي ندرا كيف تحكي
زهرة:ش شقصدك ؟
انا:قصدي واضح برشا...و انتي فهمتو بالقدا
زهرة:م ما فهمت شي...و انت شتعمل هوني اصلا...برا فما شكون بحاجتك
انا:شيهمك فيا انتي ؟
هزت يدها ضربتني على صدري...دز فيا و تحكي
زهرة:يهمني و برشاا زادة فهمت
انا:اغزرلي هوني...مانيش ناقص تفوريخك...مانيش محمد باش نتحمل اللعب هذا
زهرة:عندك حق...اما مستعد تتحملها هي
انا:بالظبط...و توا تاكل بالقدا و تشد فرشك...مكانش تو ترصالك بايتة في الكلينيك
زهرة:امووري
انا:باهي على راحتك...انا لازمني نمشي توا...تو نوصي حسام عليك
زهرة:ما توصي حد...انت امشي من هوني برك
انا:باهي على راحتك...خلي خطيبك يلتهى بيك احسن
زهرة:مممم احسن...و انت زادة امشيلها فيسع
انا:باهي عزيزتي
زهرة:مانيش عزيزتك
هزيت روحي وقفت...شدني الضحك...تسطحت لتالي و هزت الغطا عليها تحكي
زهرة:سكر الباب وراك
انا:باهي
كبست على يدي...باش منقربلهاش اكثر...عالاقل لي نفهم شنية لي قاعد يصير بالظبط...خذيت نفس و خرجت من البيت...لقيتهم الكل في الصالة...قربت مني امي فتحية تحكي
فتحية:طمني عليها ؟
انا:لباس عليها امي ارتاح...اما لازمها تاكل بالقدا خاصة الفترة هاذي
فتحية:باهي خليني نطلع نشوفها باش نطمن
انا:باهي
خلط عليها محمد بالوقت...غزرت لحسام لقيت يقحرلي و يحكي
حسام:شنية لي قاعد يصير...و شنية حكاية سيرين هاذي؟
انا:خليها تحس باللي حسيتو...تو وحدها تحكي
حسام:ياخي مريتش حالتها ؟
انا:ريتها...و موجوع عليها زادة...اما مفماش حل اخر
حسام:تو تتعب نفسيتها اكثر
انا:لا متخافش عليها...هكا تعاود حساباتها بالقدا...و اهم شي توا...مريم ترجع تكلمها
حسام:الحكاية صعيبة و اصلا مريم كان شدت الصحيح في حاجة مستحيل حد ينجم يقنعها
انا:ملا اقنعها على طريقتك
حسام:لاااا...لا اعفيني منها براس أمك...مانيش ناقصها
أنا:معندكش حل اخر...و الا الحكاية باش تبقى مجهولة و زهرة تضيع من يدي
حسام:باهي باهي
أنا:صحيتك...رد بالك عليها...و كان صار شي كلمني
حسام:باهي سي عمر...فما اوامر اخرى
أنا:لا هاني باش نمشي توا
حسام:خليك الليلة
أنا:لا...أحسن شي نبعد عليها شوية
حسام:على أساس كنت قريب منها
أنا:حساااام
حسام:باهي...هاني سكت و أعمل لي يريحك
انا:سلام
خليتو و خرجت...من شيرة طمنت لهي مزالت تحبني و مستحيل تكون نساتني...غيرتها من سيرين واضحة...اما فرد وقت خايف عليها و على حالتها...و دوب تتكشف الحكاية هاذي...إلا ما نخليها تفكر مرتين قبل ما تتصرف من راسها...و تقلب الدنيا علينا.
#زهرة🌸
#سمر_القايد💜