حلقة 23
🔸️مراد يحكي:
نزلت من الكرهبة...سكرت الباب...و هزيت يديا عدلت الفاست متاعي...طلعت راسي...نغزر لاسم البار...تبسمت على جنب...متوقعتش لهي باش تجي لهوني...خذيت نفس و دخلت...دورت عينيا عالبلاصة...لمحتها مع شلتها...تضحك و عاملة جو...قربت وقفت في طاولة مطرفة...نغزرلها...هزيت يدي شاورت لسارفور...خذيت منو كاسة...لتوا صورتها بين عينيا...متوقعتش لهي باش تجي البارح...و لا حتى باش نقربلها مرة و اخرى...و نشم ريحتها...لي تخليني نعدي بقية نهاري مرتاح...قد ما توحشتها منجمتش نقرب منها...منجمتش نخوفها مني اكثر...حتى كي لقيتها قدامي منجمتش نجبرها باش تقعد...نغزرلها و هي تبعد عليا...اول مرة منحبش نخلط عليها...كي طلبت مفاتح دارهم...عرفت لهي تحب تبقى وحدها...اصلا كل مرة تبدا متغشة من حاجة
تعدي نهارها غديكا...باز صار شي خلاها هكا...تنهدت بالقاوي...كل مرة نفكر فيها...نحس راسي باش يطرشق من تفكير...خذيت رشفة من الكاسة في يدي...جات عيني في عينها...غزرتلي مصدومة...تبسمتلها...و كملت شربت...ضربة زوز تغزرلي...عيني منزلتش عليها...رجعت شاورت لسرفور باش يمشي يخبر الجماعة...لي سهرتهم ليلة على حسابي...اول ما وصلهم الخبر...تلفتتلي بالوقت...تبسمت على جنب...هزت كاسة العصير في يدها و قربت مني...حطتها عالطاولة...غزرتلها نحكي
انا:متوقعتش باش نراك مرة اخرى
سيرين:و انا متوقعتش نراك هوني
انا:مممم صدفة حلوة
سيرين:عيشك اما
انا:شنوة ؟
سيرين:منعرفش...نحب نشكرك
انا:على شنوة ؟
سرين:على لي عملتو توا
انا:ما عملت شي...انتي كيفك ؟
سرين:لباس...فديت من جو الخدمة حبيت نبدل جو مع صحابي
انا:خطيبك معاك
سرين:لااا ميحبش الجو هذا...على هذاكا محبش يجي
انا:مممم باهي
سرين:باش نخليك توا...صحابي يستناو فيا
جات باش تتلفت...شديتها من يدها...كبست عليها غزرتلي مصدومة...قربت منها شوية...نحكي
انا:خليك
سرين:ا اما
انا:منحبش نعدي السهرية وحدي
هزتلي براسها ايه...رخفت يدي شوية...جبدت روحها بالوقت...شربت من العصير متاعها...عرفتها دخلت بعضها...غزرتلها نحكي
انا:امتى باش تعرس ؟
طلعت راسها غزرتلي ندرا كيف...خذيت رشفة نستنى في الجواب متاعها...حطت يدها على رقبتها تحكي
سيرين:ب..بعد شهرين
انا:غريبة
سيرين:شتقصد ؟
انا:صراحة مستغرب كيفاش ينجم يخلي خطيبتو وحدها...و في هالوقت برا و هوني
سيرين:مش كيما انت فهمت سي مراد...انا هوني خاطر بعد العرس منجمش نبقى مع صحابي كيما توا
انا:يمكن...اما زادة ميمنعش انو هو واحد مجنون خاطر مخلي كعبة كيفك وحدها...انا في بلاصتو...منجمش حتى نفلت يدك
سيرين:شنوة نعتبرو الكلام هذا
انا:منعرفش...قلت لي نحس فيه و كهو
سيرين:سامحني بطيت عالجماعة
طلعت راسي غزرت لشلتها...لاهيين مع الغنا و عاملين جو...اول ما تلفتت...رجعت شديتها من يدها...دورتها عندي بالزربة...حطيت يدي لاخرى على ظهرها..لزيتها ليا...و كبست عليها اكثر...حطت يدها على صدري تجبد في روحها و تحكي فرد وقت
سيرين:فاش تعمل ياخي ؟
انا:ششش اهدا
سيرين:سي مراد...سييبني
انا:معنديش نية هكا
سيرين:لباس ماهو ؟
انا:اسمعني
سيرين:شنننوة ؟
انا:نعرف لي باش تجيك غريبة...اما اليمات لي تعدات علينا...منجمتش نحيك من مخي...منعرفش علاه جنيت كي عرفت لانتي باش تكون لحد اخر...منعرفش شنوة لي قاعد يصير معايا بالظبط...اما منجمش نتقبل الهزيمة من اول مرة
بقات تغزرلي مصدومة...دورت عينيا على تفاصيل وجها اصلا الكلام هذا نقول فيه بالسيف...منجمش نستخايل اني نقول لوحدة اخرى غير زهرة...باقي تجبد في روحها مني...و تحكي
سيرين:س..سيبني...لازمني نمشي
انا:ماكش باش تمشي لحتى بلاصة
سيرين:س..سي مراد امانك
كبست على يدها اكثر...جبدت روحي لتالي...حطيت الفلوس عالطاولة...و جريتها ورايا...باقي تحاول تفلت يدها مني...اول ما خرجنا لبرا...رخفت يدي عليها غزرتلي تحكي و تصيح
سرين:فااااش تعمل ياخي...شنوة تستخايل في روحك
وصلت الكرهبة بالوقت...شديت المفاتح على السرفور...و حليتلها الباب نحكي
انا:اركب
سيرين:لاااا انت باز هبلت على روحك
قربت منها بالزربة ركبتها بالسيف...سكرت الباب...و خلطت عليها...ركبت...و غزرتلها نحكي
انا:هدي روحك مانيش خاطفك
سيرين:واضح لي تعمل فيه...ياخي نورمال الشي هذا
انا:قتلك اهدا
سيرين:وين باش تهزني ؟
انا:تو تعرف
خدمت الكرهبة بالوقت و طرت بيها...طول الثنية و هي ساكتة عرفتها خايفة مني...منعرفش كيفاش وصلت لشط...بلاصة هادية عاللخر...غزرتلها نحكي
انا:انزل
سيرين:رجعني توا
انا:هيا ايجا
اول ما نزلت خلطت عليها...قربت منها شوية...نحكي
انا:مش قلت تحب تبدل جو ؟
سيرين:علاه الكلام هذا توا
انا:باش نخليك تعدي سهرية...ماكش باش تنساها
غزرتلي مستغربة...نزلت معاها الدروج...باقي تمشي معايا و تحكي
سيرين:شنعملو في ال Port احنا
بقيت ساكت...اصلا الحفلة هاذي جات في وقتها...اول ما وصلت لليوت جاني واحد من الرجال يحكي
هو:اهلا مسيو مراد
انا:بدات الحفلة ؟
هو:تقريبا...الجماعة يستناو فيك
انا:باهي
تلفت عندها...لقيتها تغزرلي مش فاهمة شي...تبسمت على جنب نحكي
انا:مزلت خايفة
سيرين:لااا...اما لازمني نمشي
انا:ميجيش تخليني توا
طلعت بالزربة...و عطيتها يدي...مدت يدها بالسيف شدتني...جبدتها عندي...دخلت معاها...عرفتها عالجماعة و قربت من الطاولة...الحفلة ياسر هادية...اصلا منحبش جو البار برشا...غزرتلي تحكي
سيرين:حفلة شنوة هاذي ؟
انا:قاعدين يحتفلو بالصفقة جديد
سيرين:صفقة شنوة ؟
انا:مشروع الموديلات الجديدة لصيف الجاي تحولت لينا
سيرين:صاار ؟
انا:مممم شنية تحب تشرب ؟
سيرين:شي
بقيت نغزر للجماعة...تهزت و تحطت كي حست باليوت قاعد يبعد...غزرتلي تحكي
سيرين:مراااد...ملزمنيش نفوت نص ليل راهو
انا:شششش تو كي يلحق الوقت نقلهم يرجعو
سيرين:ياخي باش يرجعو على خاطري هوما
انا:انا المسؤول عالحفلة...على هذاكا متخافش
سيرين:شتقصد ؟
انا:تفهم مع الوقت...توا ما تخمم في حتى شي
هزتلي براسها ايه...باقي تغزر للعباد...ظاهر الحفلة عجبتها...قربت منها شوية...طلعت راسها غزرتلي ندرا كيف...مديتلها يدي...عديت عينيا على وجها...هزت يدها بالسيف حطتها في يدي...كبست عليها...و جبدتها عندي بالوقت...حطيت يدي لاخرى على ظهرها...كبست عليها...رغم انو نعرف اللي قاعد يصير غالط...اما وحدة بوحدة...الا ما نخليه يندم على كلشي...صوت الموسيقى كان هادي برشا...و كل حد لاهي في روحو...نسمع فيها تحكي
سيرين:كي انت عندك حفلة هوني...علاش جيت للبار ؟
انا:يمكن حبيت نراك
سيرين:معناها مش صدفة ؟
انا:هاك عرفت
سيرين:علاه قاعد تعمل هكا ؟
انا:شنوة في كلامي مكانش مفهوم
سيرين:منعرفش...اما مستحيل يكون فما شي بينا...انا نحبو...و باش نعرس بيه
انا:انسى توا...انسى كلشي...نحبك تعيش ليلة هاذي معايا توا...مبعد انساها كانو شي ما صار
خذيت نفس...نستنى في الليلة هاذي توفا...جبدت روحي منها دوب وفات الموسيقى...هزيت يدي لسرفور...باش نقولو يرجع...بقيت نغزرلها...و تفكيري عند زهرة...وينها توا و شعاملة...اصلا منحبش نفكر لساقط هذاكا معاها...اول ما وصلنا نزلتها معايا...خليت الجماعة ورجعت للكرهبة...بقينا طول الثنية ساكتين...غزرتلها نحكي
انا:وين نوصلك
سيرين:شارع ¤¤¤¤¤¤¤
انا:باهي
سيرين:ميسالش تحطني في اول الحومة
هزيتلها براسي ايه...اول ما وصلت ركيت الكرهبة...و تلفتلها نحكي
انا:مزلت متغشة ؟
سيرين:لا و مرسي برشا عالسهرية...نظن مانيش باش نعدي ليلة كيف هكا مرة اخرى
انا:كنت باش نقلك نتمنى نراك مرة اخرى اما
سيرين:ليلة سعيدة مراد
تبسمت على جنب...بقيت نغزرلها و هي تبعد...تنهدت بالقاوي...ورجعت الكرهبة لتالي...نحس في راسي باش يطرشق...هزيت تليفوني...لقيت انتصار طالبتني اكثر من مرة...منعرفش كيفاش وصلت لدار...معادش نحب ندخلها و هي مش هوني...تنهدت بالقاوي و دخلت كنت باش نطلع اما لمحتها في صالة...قربت شوية منها نغزرلها راقدة عالفوتاي...قعدت على طرف الطاولة
نثبت في ملامح وجها...متبدلتش مزالت كيما اول مرة عرفتها فيها...لتوا نسأل في روحي...مش انا كنت نحبها...شبيني لقيت روحي نعشق في بنتها...بنتها لي حبيتها و عمرها 12 سنة...لي عشتو مع انتصار عمرو ما كان حب...هذا لي فهمتو مع الوقت...انا تعلقت بيها و كهو...عملت لي في راسي خاطر امي وقفت في وجهي اما كلشي عليه انا توا...على خاطر زهرة...كلشي عملتو السنين لي تعدات خاطرها هي و كهو...و كلشي باش يولي ليها...هزيت يدي بالسيف...رجعت شعرها لتالي...نحكي
انا:يا ريتك تنجم تسامحني...يا ريت
هزيت روحي وقفت...حليت الملحفة غطيتها...و طلعت لفوق...قربت من بيتها...كبست عالبواني...اما تراجعت في اخر لحظة...من اخر مرة خرجت فيها...معادش نجم ندخلها...تنهدت بالقاوي...و دخلت لبيتي طيشت الفاست عالفوتاي...و ترميت عالسرير...غميت على راسي بالمخدة نحب ننسى لي صار اليوم جملة...منعرفش كيفاش هزني نوم و رقدت
🔸️زهرة تحكي:
فقت الصباح...نحل في عينيا بالسيف...تبسمت وحدي معادش نعرف شبيني بالظبط...يومين تعداو على اخر مرة كنت معاه...اما مزلت نحس أنو كلشي صار كأنو البارح...هزيت يدي بالسيف...حطيت صوابعي على شفافي...قلبي دق بالوقت...منعرفش علاه...كل ما نذكر الحكاية نحشم و ندخل بعضي اكثر...كانها صارت توا عمري ما توقعت...انو باش يكون فما بينا شي هكا...و لا هو باش يوصل يبوسني...اول مرة يخليني نعيش الإحساس هذا...اول مرة اللي نحسو يخليني فرحانة رغم الظروف الكل...رغم ميجيش لي صار...خاطر فما شكون في حياتو...اما كلامو زاد عطاني قوة غريبة باش نتمسك بيه...مع انو نعرف انو نهاية باش تكون صعيبة صعيبة برشا اني نبعد عليه جملة...و معادش يكون عندي حق حتى باش نحكي معاه...يمكن نحب نسجل اللحظات هذوما...كانهم اول لحظات سعادة عشتهم بعد اللي صار مع مراد...هزيت روحي بدلت دبشي بالزربة أصلا مش مصدقة لباش نرجع نقرا...عالاقل هكا نشوفو كل يوم...بسبب و بلا سبب...قربت من المرايا نغزر لروحي...حليت شعري...و لميتو من فوق كهو...هزيت صاكي و كبوطي و خرجت من البيت...لقيت حسام في وجهي...هزني و حطني بعينيه يحكي
حسام:مممم ظاهر فيك ناشطة اليوم
أنا:عاللخر
حسام:زعمة شنية سر نشاط هذا
أنا:شي هكا برك
تبسملي و سبقني نزل...خلطت عليه...صبحت على أمي فتحية...و قعدنا عالفطور مع بعض...طلعت راسي غزرتلو نحكي
انا:حسام...تنجم توصلني في ثنيتك
حسام:بالطبيعة
أنا:عيشك
كملت فطوري...خليتو سبقني للكرهبة...لبست كبوطي و جيت باش نخالط عليه...وقفتني أمي فتحية تحكي
فتحية:زهرة
انا:ممممم
فتحية:إيجا عندي شوية
قربت منها وقفت قدامها...نستنى فيها تحكي...شدتني من يدي...نزلت راسي نغزرلها حطتلي فلوس...طلعت راسي مستغربة...تبسمتلي تحكي
فتحية:هيا بنتي برا تقرا على روحك
تبسمت بالوقت...منجمت نحكي حتى شي...و منجمتش نرفض الفلوس زادة...حسيتها عطاتهملي بمعزة...و بيني و بينها كهو...نزلت عليها بستها من خدها نحكي
أنا:عيشك أمي
خلطت على حسام للكرهبة...طول الثنية و هو ساكت أصلا من يومين مش قد بعضو...اول ما وصلنا...تلفتلو نحكي
أنا:مرسي برشا
حسام:إمتى تكمل ؟
انا:منعرفش...باش ناخو تاكسي منحبش نتعبك معايا
حسام:كلمني نجيك
أنا:مممم صراحة حسام...معنديش تليفون
حسام:باهي...كلمني من عند عمر
أنا:باهي...نشوفك مبعد ملا
حسام:باهي
تبسمتلو...و هزيت روحي نزلت...سكرت الباب...شاورتلو بيدي...لقيتو مش مركز معايا...دورت راسي...نغزر لمريم لي واقفة ورايا...قبل ما نستوعب لي قاعد يصير...طار بالكرهبة...قربت منها عنقتها...توحشتها برشا...كبست عليها نحكي
أنا:مش على أساس جي عندي شصار
مريم:طمنت عليك من عند عمر...ماك تعرفني منحبش نجي باش منعملكش مشاكل معاهم
انا:شنية الكلام هذا مريم...ساعة امي فتحية حباتك برشا
مريم:زهررة امانك...تعرف سبب من غير ما تكبش توا
انا:باهي قولي شعملت في اليمات لي خليتك فيهم
مريم:شي كي العادة
انا:و الاوضاع في دار كيفها ؟
مريم:بربي على اساس باش ينجموني هوما
انا:هههههههههه لا نعرفك قدها يا روحي
مريم:هيا برك...مش من اول نهار روطار
انا:باهي
أول ما وصلنا للكلاصة...لقيتو ديجا دخل...بقيت نغزرلو هز يدو بمعناها ادخلو...هزيتلو براسي إيه...قعدنا مع بعض...بقيت نغزرلو...كل مرة جي عينو في عيني ندخل بعضي...ذكرت أول مرة دخل فيها باش يقرينا...غزراتو كلامو...اللحظات الكل تعدات بين عينا...شي ما تبدل أما فما حاجة داخلي هي لي تبدلت...احساسي معاه هو لي تبدل...ولى اقوى من قبل...منعرفش علاه كل مرة نبدا معاه..معادش نخاف من حتى شي..حتى مراد..منعرفش كيفاه تعدا الدرس...أول ما وقفت قرب مني وائل يحكي
وائل:وينك زهرة لباس
أنا:لباس وائل...أنت كيفك ؟
وائل:لباس...كنت باش
سكت كي قص علينا صوت عمر...من تالي...يحكي
عمر:زهرررة
تلفت عندو مستغربة...مش مستانس يكلمني قدامهم برشا...و لا حتى يعيطلي باسمي...غزرت لوائل نحكي
أنا:نحكيو مبعد
هزلي براسو ايه...هزيت صاكي...و قرب عندو للبيرو نحكي
أنا:ع عمر...نقصد استاذ أنا
عمر:مش عندك كور توا
أنا:إيه
عمر:هيا فيسع ملا
هزيتلو براسي إيه...أصلا وليت نعرفهم الغزرات متاعو هذوما...تلفت لمريم...قربتلي بالوقت...خرجنا مع بعض غزرتلي تحكي
مريم:شفماا ياخي ؟
انا:منعرفش
مريم:شبيه يتصرف معاك هكا
أنا:مريم صدقني منعرفش...معادش فاهماتو جملة...كل مرة نقول وليت نعرفو...يرجعني لنقصة الصفر
شدتني من يدي حبستني...تلفت عندها نغزرلها...ضيقت عينيها تحكي
مريم:فما حاجة بينكم ؟
بقيت نغزرلها مستغربة...جبدت يدي منها...نحكي
أنا:شنووة الكلام هذا...فاش تحكي إنتي...شباش يكون بينا
مريم:زهررررة...نعرفك راني
أنا:بااسني
منعرفش كيفاه خرجت الكلمة من فمي...طلعت راسها غزرتلي ندرا...تحاول تستوعبها...صاحت في وجهي
مريم:شنننننوة...شتقصد باسك ؟
هزيت يدي حطيتها على فمها...نسكت فيها...نحكي
أنا:شششش مريم...شبيك باش تفضحني
مريم:ابعدني زهرة...لتوا مش مستوعبة لي تحكي فيه
أنا:اففف منك...على أساس أنا استوعبت لي عملو
مريم:كيفاش هكا ؟
أنا:منعررفش...كلشي جا على غفلة...محسيتش بروحي كيف دخت بين يديه
مريم:زايد مع شكون نحكي...فما لي يدوخ من بوسة
انا:شيعرفني زح...تي والله لتوا مش مستوعبة لي صار يا مريم...صدقني خايفة
مريم:من شنوة ؟
أنا:منو بالظبط...منحبش نتعلق بيه أكثر من هكا...خايفة نحبو و هو باش يعرس بعد شهرين
مريم:تحكي بجدك
هزيتلها براسي ايه...منحبش نفكر فيها الحكاية هاذي هزت يدها ضربتني لكتفي تحكي
مريم:صدقني...هو الخاسر في التالي
أنا:مممم
قربت مني اكثر...قرصتني من خدودي...تحكي
مريم:شووو كي طلع عندها خدود...ياخي شنية يوكلو فيك غديكا اه
أنا:مررريم يزززي
مريم:شبييه أستاذي ميعرفش يختار...ياخي هو باش يلقى أحسن منك
تحكي و تكبس على خدودي اكثر...تحاول تفرهدني شدني ضحك...نجبد في روحي منها...و نضحك فرد وقت
أنا:هههههههه تي يزي مريم...توجع فيا راك
مريم:بو زينها صحبتي
تبسمت بالوقت...قربت مني شدتني من يدي تضحك أول ما طلعت راسي...جات عيني في عينو...واقف يغزرلنا من البعيد...كبست على مريم أكثر حتى مشاعري نحس فيها داخلة بعضها...لا عرفت نقرب منو و لا نبعد عليه...منعرفش كيفاه تعدا الوقت...حتى مريم حسيت تفكيرها بعيد برشا...اول ما خرجنا...غزرتلي تحكي
مريم:كيفاه باش ترجع توا
انا:منعرفش...حسام قلي كلمني من عند عمر...اما حتى هو مفماش
مريم:أمانك معادش تجبد اسمو قدامي
انا:علاه
مريم:هكاااا...نتقزز منو...و من كلشي يتعلق بيه
انا:بااهي...هاني سكت...شعندي حكيت انا
مريم:باهي شنعملو توا...هوكا كرهبتو مزالت هوني نستناوه...و لا نمشو عندو
أنا:لااا...منحبش نتعبو معايا توا...باش ناخو تاكسي
مريم:باهي..عندك حقها
انا:مممم...صباح امي فتحية عطاتني فلوس
مريم:هيا باهي ملا
بقينا نمشو مع بعض...حبست على صوتو...تلفت عندو...شاورلي بيدو باش نرجع...غزرتلي مريم تحكي
مريم:انا باش نمشي توا...برا عندو بلكشي هو يوصلك
أنا:باهي
بستها ورجعتلو...وقفت قدامو...بقى يغزرلي ندرا كيف...حط البيسي متاعو من تالي...يحكي
عمر:وين ماشية ؟
انا:لدار
عمر:وحدك
انا:مممم...باش ناخو طاكسي
عمر:صااار
أنا:حسام قالي نكلمو من عندك
عمر:شنية حكايتك إنتي اليوم ؟
أنا:حتى شي...منحبش نعطلك أكثر...لازمني نمشي
بقى يغزرلي من غير حتى كلمة...جيت باش نمشي شدني من يدي...كبس عليا...يحكي
عمر:قتلك امشي أنا
بقيت ساكتة...منحبش نحكي معاه أكثر...مش وقت يعصب عليا...خاصة و العباد رايحين و جايين...نزلت راسي منحبش نغزرلو...نسمع فيه يحكي
عمر:أركب
هزيتلو براسي إيه...قبل ما يرخف يدو عليا...حسام ركا بالكرهبة قدامنا...رجع كبس عليا أكثر...يستنى فيه يوصل...قرب منا يحكي
حسام:طولت عليك
أنا:لا...تو وين كملت
عمر:أهلا بيك حسام
حسام:أهلا صاحبي...كلمتك مهزيتش
عمر:مسمعتوش
حسام:مانيش باش نطول...جيت باش ناخو زهرة...و نرجع للخدمة
عمر:خلي عليك...أنا نوصلها
حسام:ميسالش...دار في طريقي
أنا:باهي كي هكا...من غير ما نتعبك معايا...تو نمشي مع حسام
حسام:هيا ملا
كبس على يدي أكثر...غمضت عينيا من الوجيعة لي حسيتها...نسمع فيه يحكي
عمر:أنا باش نوصلها حسام
حسام:باهي...نتلقاو في دار ملا
هزيتلو براسي إيه...حتى حسام محبش ياخو و يعطي معاه أكثر...أول ما مشى غزرلي يحكي
عمر:مزلت تحب تمشي معاه
أنا:ع..عمر
عمر:نسمع فيك
أنا:ي يدي توجع فيا أمانك
غزرلي ندرا كيف...رخف يدو شوية...قحرلي يحكي
عمر:أركب
خذيت نفس...و سبقتو للكرهبة ركبت...خلط عليا...و طار بيها...يسوق باش يطير...نسمع فيه يحكي
عمر:ملا أنا واقف قدام ¤¤¤¤¤ باش تقولي نمشي معاه
أنا:م محبيتش نتعبك معايا...كهو لي صار
عمر:تعبني معاك ملا
هزيتلو براسي ايه...كبس عالفولون أكثر...يحكي
عمر:باهي...نحسب روحي صدقتك
أنا:شتقصد؟
تلفت عندي قحرلي...نوقز تليفونو بالوقت...محبش باقي ينوقز و يعاود...هز عليها يحكي و يصيح
عمر:شفماااا سيريين...مش وقتو الكلاااام هذا...و وقت تقرر تعرف وين تلقاني
علق عليها...و طيش تليفون على طول يدو...ترعبت منو ساعتها...أصلا كي يبدا هكا...معادش ينجم يظبط تصرفاتو بالكل...نزلت البلار...و تلفت نغزر لبرا...منعرفش كيفاه وصلنا لدار...نزلت من غير حتى كلمة...حتى هو مقال شي...ستخايلتو باش يخلط عليا...أما أول ما نزلت...طار بالكرهبة...تنهدت بالقاوي و دخلت...ما لقيت حتى حد اللوطة...طلعت لبيتي..غزرت لبيت دالي..الباب مشقوق...قربت شوية...كملت حليتها...لقيتو مطيش عالسرير...بدبشو...حتى صباطو منحاهش...حاط يدو على عينيه...نسمع فيه يحكي
دالي:ضيعت حاجة هوني
انا:لاااا...أما ظاهر فيك أنت لي ضيعت ثنيتك
دالي:ههههههه شنوة قعدت معاهم يومين...تعلمت تنصح كيفهم
انا:هذا اللي تعملو أنت ديما
دالي:ممممم عندك مشكلة
انا:مش انا لي عندي مشكلة...المشكلة فيك انتي
دالي:هيا برا على روحك تاعب و نحب نرقد
انا:على راحتك
خرجت و خليتو...رجعت لبيتي...منعرفش علاه غايضتني حالتو...حسيتو حتى هو تظلم برشا...جراير لي صار...نحيت كبوطي حطيتو على جنب...و ترميت عالسرير...باقي نفكر في اللي صار...منعرفش شبيه جن عليا اليوم...حتى من غير سبب ديما معصب...طلعت يدي...نغزر لتراص صوابعو...تنهدت بالقاوي...كيف ذكرت صياحو على سرين...ظاهر فيه مغشش منها...و انا جيت في طريقو...على هذاكا تصرف معايا بالطريقة هذيكا منعرفش كيفاش غفيت...فقت على دقان الباب...تقعدت شوية نغزر لحسام دخل...تبسملي يحكي
حسام:منكونش فيقتك ؟
أنا:لااا...منعرفش كيفاه غفيت
حسام:ارتحت شوية
انا:مممم
حسام:مقلك حتى شي
انا:تقصد عمر
حسام:مممم
انا:لااا جيست وصلني و كهو
حسام:باهي...مهم قبل ما ننسى...هذا ليك
انا:شنوة
قرب مني شوية...حط باكو عالسرير...و تبسملي يحكي
حسام:شوف وحدك
هزيتلو براسي ايه...اول ما خرج...هزيتو في يدي حليتو...نغزر لتليفون...تبسمت وحدي...متوقعتش الفازة منو...حتى من الكارت فيها...اول حاجة عملتها كلمت مريم...هزت عليا تحكي
مريم:شكون ؟
انا:شبيك يا بنتي...هكا ترد عالعباد
مريم:زهرررة
انا:مممم زهرة
مريم:منين تكلم فيا انتي ؟
انا:تليفوني
مريم:شتقصد
انا:حسام توا شرالي واحد
مريم:صااار...طلع ينفع في حاجة
انا:منعرفش شبيك معاه...حتى انا في الاول محبيتوش حط طرف...اما والله ياسر محلاه
مريم:بربي زهرة مش حكينا فيه الموضوع
انا:باهي باهي...اسمع نكلمك مبعد...باش ننزل بحذا الجماعة توا
مريم:باهي عزيزتي
علقت عليها...خذيت نفس...و هزيت روحي...بدلت دبشي...و نزلت اللوطة
🔸️عمر يحكي:
نحل في عينيا بالسيف...منعرفش امتى هزني نوم ورقدت...عديت ليلة الكل نحرق وحدي...من شيرة سيرين...لي معادش نعرف شنوة نعمل معاها...كل مرة نحس فيها تبعد اكثر...و لا انا لي قاعد نبعد...اول مرة بعد 3 سنين نغزر لوحدة غير سيرين...منعرفش علاه قاعد نقارن بينهم...منعرفش علاه لي حسيتو مع زهرة في شهور هذوما...محسيتوش مع سيرين...شي اقوى مني كل مرة نبعد عليها...نلقى روحي نخمم كان فيها فكرة لي حسام بدا يتعلق فيها منجمتش نتقبلها منعرفش اذا شي نهار وقف قدامي...و قالي حاجتي بيها...شنوة باش يصير...اما لي متأكد منو...انو ما نجم نحكي شي...خاطر حسام اكثر من خويا...و انا نعرف شنوة لي تعدا عليه...سنين لتالي...اصلا اول مرة نراه يهتم بحد هكا بعد شراز...على هذاكا معادش نظبط تصرفاتي معاها...منحبهاش تقرب منو اكثر من هكا...و لي قهرني اكثر...كي حسيتها تتهرب مني...زعمة انا مستعد باش نعرس بسيرين...اول مرة نسأل روحي بعد الوقت هذا...هزيت روحي بالسيف...عملت دوش...و بدلت دبشي...غزرت للوقت...مزال ساعتين عالكور هزيت تليفوني و مفاتحي و نزلت...منعرفش كيفاش وصلت لسوسيتي...ركيت على جنب...و نزلت...احسن شي لقيتهم بداو..أول ما دخلت قابلني مديرها منعرفش علاش منجمتش نهضمو حتى طرف...غزرت لصحبتها نحكي
أنا:وينها سيرين ؟
هي:لتوا مجاتش
انا:مش من عادتها تبطى
هي:تحب نكلمها
انا:لااا
طلعت راسي غزرتلو...قربت منو شوية...هز روحو وقف مدلي يدو...تبسمت على جنب...نحكي
انا:متشرفين
رجع يدو لتالي...و تبسملي ندرا كيف...يحكي
هو:عيشك سي عمر
انا:ماشية الخدمة معاكم هوني
هو:شتقصد
انا:قصدي واضح...هوكا لي عندك حتى بعد ما يوفا العقد متنجمش تسلم فيهم
هو:عقد شننوة ؟
سيرين:عممر ؟؟
تلفت شوية...لقيتها واقفة ورايا بالظبط...تغزرلي مصدومة...تبسمت نحكي
انا:شننوة عزيزتي...مش على اساس وفا العقد بينكم
هو:عقد شنوة ؟
طلعت حاجبي...نغزرلها...نستنى فيها تحكي...هزت يدها رجعت شعرها لتالي...قربت مني شوية...حطت يدها على يدي تحكي
سيرين:ع..عمر...خلينا نحكيو وحدنا
جبدت يدي منها شوية...غزرتلي مستغربة...تلفت للمدير متاعها...نحكي
انا:نظن كان يفسرلي هو احسن
هو:سيرين شفما ياخي ؟
سيرين:شيي سوء تفاهم...نحلوه مع بعضنا...مش هكا عزيزي
انا:باهي...امشي قدامي
سبقتني مربوثة...خلطت عليها لبرا...وصلت للكرهبة نحكي
انا:نسمع فيك
سيرين:عمر شنية لي قاعد تعمل فيه انت ؟
جبدتها من يدها...كبست عليها...و نزلت راسي شوية قحرتلها نحكي
انا:تحل فمك و تفسرلي لي قاعد يصير...بلا كذب و بلا ¤¤¤¤¤¤¤ متاعك احسنلك...مكانش نهدها سوسيتي هاذي فوق راسك
سيرين:باهي...باهي هاني باش نقلك...حكاية العقد كذبة...كذبت عليك باش نجم نكمل خدمتني...انت لزيتني باش نعمل هذا الكل...قتلك منحبش نخلي خدمتي
رخفت يدي عليها...نحس في راسي باش يطرشق...باقي نغزرلها...تبسمت على جنب نحكي
انا:لهدرجة صعيبة عليك باش تختار بيني و بين خدمتك
سيرين:ع..عمر امانك...امانك افهمني عيش حبي...والله انا نحبك صحيح اما
انا:اسمعني سيرين...اللعب هذا مش عليا...من سنين قاعد نعاود في نفس الكلام...ما حبيت نجبرك على حتى شي...و نظن تفاهمنا على هذا الكل من قبل
خذيت نفس...نشد في روحي باش منصيحش عليها اكثر...هزيت يدي نضرب فيها على راسها و كملت كلامي
انا:و انتي تعرف بالقدا...الشلة لانتي معاها...ميجيش منهم الخير...ملا حط في راسك...كان متعاودش حساباتك في اقرب وقتك...معادش باش تكون قدامك فرصة اخرى سيرين...معادش نتنازلك اكثر من هكا صدقني هاذي باش تكون اخر فرصة ليك...نحسب روحي ما سمعت شي...و باش ننسى لي صار توا...و انتي خمم بالقدا...و وقت تعرف روحك شتحب...تعرف وين تلقاني
بقات تغزرلي مصدومة...حليت باب الكرهبة...اول ما ركبت طرت بيها...منعرفش كيفاش وصلت للفاك...اصلا تأخرت عالدرس...اول ما دخلت...رميت عيني على بلاصتها...لتوا مزال مجاتش...حتى صحبتها هوني
نزلت راسها بالوقت...نفخت بالقاوي...و حليت البيسي بديت بالوقت...خاطرني تأخرت عليهم...دورت راسي نغزرلها واقفة بحذا الباب باش تدخل...هزيتها و حطيتها يومين تعدات بعد اللي صار آخر مرة...منعرفش علاه نحس في روحي مزلت معصب منها جات باش تحكي هزيت يدي في وجها نحكي
أنا:أخرج
عينيها وساعو بالوقت...غزرتلي ندرا كيف...قربت خطوة باش تحكي...وليت نصيح أكثر
أنا:أخررررج
وخرت لتالي مصدومة...ريت لمعت عينيها...تلفتت بالوقت...و خرجت تجري...غمضت عينيا بالقاوي و رجعت حليتهم...تلفت عندهم...لقيتهم مصدومين من اللي صار...خاطر بعد الأحداث التالية...ولى ظاهر قداش كانت قريبة ليا...حتى أنا تصدمت علاه حكيت معاها بالطريقة هاذي...أصلا من بكري معصب...و كي ريتها مشى في بالي لي كانت معاه...خاطر تقريب نص النهار مفما حتى حاجة تخليها تجي روطار...تلفت عندهم لقيتهم الكل يغزرولي ندرا كيف...نفخت بالقاوي نحكي
أنا:كل حد فيكم يتلهى بخدمتو
جات عيني على مريم...قحرتلي...و نزلت راسها...ترميت عالكرسي...نهز في ساقي بعصب...منعرفش فاش قاعد نعمل في البيسي...لي يهمني توفا الساعة هاذي و نخرج منعرفش كيفاش عديت الدرس...نغزرلهم خارجين بالواحد و أولهم مريم...لي خرجت تجري سكرت البيسي بنطرة...عديت يديا زوز على وجهي...و هزيت روحي خرجت...وقفت من تالي...نغزرلها...واقفة بحذا مريم و وائل...من تصرفاتو معاها...ظاهر فيه يسأل فيها على لي صار...و هي باقي تبكي...قرب منها شوية...وخرت لتالي خذيت نفس...و قربت منهم...حطيت يدي على يدها كبست عليها نحكي
أنا:أمشي معايا
زهرة:م..مسيو عمر
أنا:قتلك أمشي
وائل:مسيو...فما حاجة ياخي ؟
أنا:أحسنلك أبقى بعيد عليها الحكاية
مشيتها معايا للكرهبة...باقي تمشي من غير حتى كلمة حليت الباب نحكي
أنا:ارررركب
زهرة:ش..شفما يااخي ؟
كبست على يدها أكثر...ركبتها...حليت الباب من تالي رميت البيسي...و خلطت عليها...طرت بالكرهبة...نسمع فيها تحكي
زهرة:ع..عندي كور توا...لازمني نرجع أمانك
تلفت عندها قحرتلها...نعرف بالقدا لي اليوم تقرا عندي و كهو...مفما حتى كور بعدي...سكتت بالوقت...تنهدت نحكي
انا:وين مشيت معاه ؟
زهرة:ش..شنوة ؟
انا:قتلك وين مشيت معاااه ؟ نعرف لي كنت مع حسام ملا حل فمك احسنلك
زهرة:فطرنا مع بعض...كهو
أنا:صااااار...كنت تحب حاجات أكثر ملا
زهرة:ل لااا والله مش كيما أنت فهمت...ا أصلا
انا:اسسسكت...سكر ¤¤ فمك...منحبش نسمع تفسيرك توا
زهرة:باهي...ح..حطني هوني...و أنا تو ناخو طاكسي من غير ما نتعبك معايا أكثر
كبست عالفولون أكثر...حسيت بيها خايفة مني...و تحب تتهرب...كملت نسوق...فرد وقت نحاول نهدي روحي قد ما نجم...نسمع في تليفون ينوقز...ضيقت عينيا مستغرب...مش تليفوني...و لي نعرفو لهي معندهاش تليفون...أول ما ريتها خرجاتو من صاك...شديت الفران بالقاوي...و تلفت عندها...طلعت راسها...غزرتلي ندرا كيف...نزلت راسي نغزر لتليفون لي باقي ينوقز...و إسم حسام عليه...مديت يدي...فكيتو منها نغزرلو....نحب نستوعب لي قاعد يصير...غزرتلها نحكي
أنا:شنوة هذا ؟
وخرت لتالي شوية...دخلت بعضها أكثر...كبست عليه في يدي...نضرب فيه عالفولون و نصيح
أنا:قتللللك شننننوة هذاااا....جاااوبني ¤¤¤ حل فمك
زهرة:ح..حسام...حسام
انا:شبيييه حساااام...ياخي ناوية تهبلني إنتي...شنوووة هذااا قتلك...من إمتى هو عندك ؟
زهرة:ي..يومين
انا:¤¤¤¤¤ عليا...توااا تفهمني في ¤¤¤¤ منين خرج...و شكون عطاهولك
نحكي و نضرب فيه عالفولون...حسيت بيها مرعوبة اما منجمتش نتحكم في روحي...نسمع فيها تحكي
زهرة:ح..حسام هو لي عطاهولي
انا:حسااام ملا و من إمتى ولى حسام يجيبلك الحاجات هذوما
زهرة:منعرفش...والله هو حطو و خرج...ح..حتى كي حكيت معاه...قالي ماكش باش ترجعو...والله كان تحب اسألو
أنا:معناها الكلاااام لي قلتو لكل...حضرتك عفست عليه و مشيت...شنية السبب باش يهتم بيك لهدرجة اه نورمال ياخي...تليفون و فلوس...و شنية آخر لالة زهرة شنية اخر مزال منعرفش فيه ؟
زهرة:ف..فلوس شنية ؟
أنا:شنوووة...متكونش فقدت ذاكرتك زادة...باش تعديها عليا ياخي...منين شريت ورق المشروع اليوم...و حق الطاكسي...منين جبت الفلوس اه...كان مش هو لي عطاك
زهرة:ل..لاا...ع عمر مش كيما أنت فهمت...والله الفلوس أنا خذيتها من عند امي فتحية...والله ما طلبتهم من حد
أنا:و هذا زادة عطاتهولك فتحية ؟
زهرة:ل لا...أمانك نحب نمشي
تلفتت باش تحل الباب سكرتها من عندي...غزرتلي ندرا كيف تحكي
زهرة:يزززي أمانك...حل الباب هذا...معاد نحب منكم حتى شي..حلو نحب ننزل
بقيت نغزرلها...رميت تليفون على طول يدي...ترحى في وسط الكراهب...هزتلي براسها لا مصدومة...باقي تحاول تحل في الباب...خدمت الكرهبة بالوقت و طرت بيها منحبش نغلط معاها بالكلام...و نقول حاجات نندم عليها مبعد...احسن شي نسكت...عالاقل بعد ما نهدا نعرف شنوة نحكي معاها
🔸️زهرة تحكي:
بقيت نغزرلو مصدومة...متوقعتش باش يعمل في تليفون...عروق يديه تكبست...كبس عالفيتاس اكثر
باش يطير بيها الكرهبة...طلعت راسي غزرت لثنية للحظة تعدات أكا الليلة في راسي...وقت مراد عمل نفس الشي...باش يخليني نحكي...و شعرة لا عملنا اكسيدون وقتها...الحكاية قاعدة تتعاود قدامي...أما مع عمر...منعرفش علاه ساعات نحس لي عندهم نفس العصبية...نفس الغش...كبست بيديا زوز على حرف الكرسي...نحس في قلبي باش يخرج...الكلام نحسو وحل في حلقي...كل مرة يزيد أكثر...الخوف لي داخلي يقوا أكثر منو...هزيت يديا بالسيف...حطيتهم على يدو كبست عليها و قربتلو أكثر...نحكي
انا:ع..عمر...عمممر أمانك وقفها...حبس الكرهبة امااانك والله مش كيما أنت فهمت...حبسها خلينا نحكيو...عمررر اماانك والله خايفة...خايفة برشا
حطيت راسي على يدو...نحس في روحي باش ندوخ حسيت بيه كي شد الفران بالقاوي...كبشت فيه أكثر نحكي
أنا:و..وقفها امانك...وقفها
جبد يدو مني بالوقت...منجمتش حتى نطلع راسي و نغزرلو...نزل بيها على ظهري...جبدني عندو...و كبس عليا...هزيت يدي بالسيف كبشت في سوريتو...دموعي نزلو بالوقت...لين وليت بالصوت...غرس يدو لأخرى في شعري...يحكي
عمر:ششش يزززي...وفااات
انا:و والله امي فتحية لي عطاتني الفلوس...والله هي مش أنا قتلها...برا اسالها...والله ما طلبت منهم شي أمانك صدقني
عمر:نعررف...و راسك نعرف...يزي تواا
هزيتلو براسي لا...كبشت فيه اكثر...باقي يعدي في يدو على شعري...نزل عليا أكثر...باسني من راسي...خذيت نفس وجبدت روحي منو شوية...حط يديه زوز على وجهي...يغزرلي ندرا كيف...يحكي
عمر:يزززي...معادش تبكي
انا:ك..كنت ب..باش تقتلنا
عمرة:زهرررة...شي ماهو باش يصير
انا:لااااا...هو زادة كان يقولي هكا
بقى يغزرلي من غير حتى كلمة...حسيتو تصدم من كلامي...دزيتو بيديا زوز...نضرب فيه و نصيح
انا:نتوما زوز نفس شي...حتى أنت كيفو يا عمر...هو زادة كان يخوفني بالطريقة هاذي...كان يسوق كيفك بالظبط...باش يخليني نحكي...أنا ديما نحب ننساه...اما انت قاعد ذكرني فيه بتصرفاتك هذوما...معادش نتحمل...انا...انا
سكتني كي حط يديه زوز على وجهي...و غطس في شفايفي...لثاني مرة يعملها...و يسكتني بنفس الطريقة هزيت يدي بالسيف...حطيتها على خدو...دموعي نزلو اكثر...خاطر نعرف و متاكدة لي قاعد يصير غلطة كبيرة كبست على كتفو...كي حسيت بروحي...تخنقت...جبد روحو شوية لتالي...عنقني بالوقت...من غير ما يغزرلي نسمع فيه يحكي
عمر:معادش نحبك تفكر بالطريقة هاذي جملة...صدقني مستحيل نخمم للحظة إني باش نضرك كيفو
نزل بيديه زوز حطهم على جنابي...كبس عليا و جبدني من عندو شوية...عدا عينيه على وجهي...منعرفش علاه غزرتو هاذي بالظبط دخلني بعضي...هز يدو...يمسحلي في دموعي و كمل كلامو يحكي
عمر:زهرررة...ما نحب حتى حد...مهما كان يكون...يقرب منك...و لا يهتم بيك...مدامني موجود...حتى حد مفهوم
غزرتلو في عينيه...معادش نجم نستوعب اللي قاعد يعمل فيه...خذيت نفس...نحكي
انا:ع..علاش ؟
عمر:متسألنيش...احسنلك ما تسألني حتى شي زهرة نحبك تستوعب الكلام اللي قاعد نحكي فيه حطو في مخك...اي شي تحب عليه تخبرني...منحبكش تحط الحواجز هذوما بينا...منحبكش تحشم مني...و متحسسنيش لانا عامل فيك مزية باهي
كبس على خدي اكثر...هزيتلو براسي ايه...دوب تبسملي قرب مني أكثر...باسني من راسي يحكي
عمر:آخر مرة نراك فيها تبكي
انا:ب..باهي
جبد روحو شوية لتالي...عدا يدو على شعرو...خدم الكرهبة و هز تليفونو...كلم حسام يحكي
عمر:زهرة معايا...منعرفش إمتى نرجع...دبرها مع فتحية...باهي عيش صاحبي
علق عليه و حط تليفون على جنب...غزرتلو مصدومة عديت يدي على خدي نحكي
انا:و..وين ماشيين إحنا ؟
عمر:تو تعرف
انا:باهي
تكيت لتالي...منجمتش نغزرلو...اصلا مزلت مصدومة من لي صار...متوقعتش باش تتعاود الحكاية...واللي حسيتو توا اقوى من قبل...لتوا مروهجة من قربو ليا...حضنت روحي اكثر...دورت راسي شوية نغزرلو مركز مع ثنية...فكرة لكلشي باش يطلع كذبة فكرة لهو خاطب...و عندو شكون في حياتو...خلاتني نحس بالبرد...و نتخنق فرد وقت...مديت يدي حليت البلار خذيت نفس من النسمة الباردة...قطرات المطر لي جات على وجهي فرهدتني...احسن رجع يسوق و هو هادي الخوف لي حسيتو...متوقعتش باش نعيشو مرة اخرى اصلا مراد ديما يسوق بالطريقة هذيكا...خاصة كي يبدا مغشش من حاجة...هزيت يدي...عديت صوابعي على شفايفي...نحس روحي في حلمة مستحيل اللي قاعد يصير...فقت من سرحتي...كي ركا الكرهبة...تلفت عندو نغزرلو...حل الباب يحكي
عمر:انزل
خلطت عليه بالوقت...طلعت راسي نغزر لريستو...دخلت معاه بالوقت...ندور في عينيا على كل طاولة...اخر مرة دخلت لبلاصة هكا وقت كنت نمشي مع امي و مراد قربت قعدت مقابلاتو...غزرتلو نحكي
انا:م..مش كان مشينا بحذا عمي طاهر احسن
عمر:علاش معجبتكش البلاصة هوني
انا:محلاها اما
عمر:كان باش تمشي بحذا طاهر توا...ترصالنا ليلة غديكا
انا:باهي كان هكا
سكت...منعرفش شنية نحكي معاه...منجمش نقلو الريستو هذا غالي برشا و خلينا نخرجو...منجمتش نقول الكلام هذا...اصلا منحبوش يعمل هذا الكل على خاطري...طلعت راسي نغزر لسرفور لي حط menu و مشى...حليتو...تصدمت من الاسعار لي فيه...سكرتو بالوقت...غزرلي يحكي
عمر:اخترت في دقيقة
انا:ل لا...الحقيقة فما برشا و منعرفش شنية نختار
عمر:و شنوة الحل توا ؟
انا:شرايك تطلب انت على ذوقك...و انا نقلك اذا عجبني و لالا
عمر:باااهي
منعرفش علاه حشمت منو...منجمتش نختار...نغزرلو طلب وحدو...و تكا لتالي يغزرلي ندرا كيف...نزلت راسي بالوقت...نسمع فيه يحكي
عمر:زهرة
انا:مممم
عمر:اغزرلي
طلعت راسي بالسيف...جات عيني في عينو...دخلت بعضي اكثر...عدا يدو على وجهو يحكي
عمر:منقصدش لي صار قبيل...نجم نطلب منك حاجة
هزيتلو براسي ايه...حط يديه زوز عالطاولة...يغزرلي و يحكي
عمر:معادش تخاف مني باهي
عديت عينيا على وجهو...ذكرت لي صار قبيل...بالرسمي خفت منو...منعرفش علاه...اما تصرفات هذوكا منجمش نتحملهم...لحظات تعداو عليا...حسيت لي مراد رجع خذيت نفس نحكي
انا:و انت معادش تصيح عليا اكاكا
عمر:باهي نحاول
انا:تحااول ؟؟
تبسم على جنب...وصل سارفور بالوقت...بقيت نغزر لي جابو...هزلي بيدو باش ناكول...تبسمتلو و نزلت راسي لصحن...ناكول و افكاري بعيدة...نخمم في اللي صار قبيل و شنية نقول لحسام على تليفون...نسمع فيه يحكي
عمر:عجبك
انا:مممم برشا
عمر:صحة ليك
انا:عيشك
هزيت راسي نغزرلو وقف...تلفت نرا في راجل يقرب منا...صافحو يحكي معاه...ظاهر فيه صاحبو...و لا معرفة قديمة...نسمع في صوت ميساج من تليفونو غزرتلو لاهي يحكي مع راجل...مديت يدي بالسيف دورتو...قريت الميساج من غير ما نحلو <<عمر...حبي نعرف روحي غلطت...اما امانك متعملش فيا هكا >> رجعت تليفون كيما كان...قلبي يدق بالقاوي...منعرفش علاش حسيتو خرج غشو منها فيا...رجع لطاولة يحكي
عمر:سامحني...تلهيت شوية
انا:ميسالش
عمر:لباس ماهو ؟
انا:مممم نجم نسألك ياخي
عمر:ممم
انا:انت علاش طردتني قبيل ؟
دور عينيه على وجهي...عدا يدو على شعرو...يحكي
عمر:مش جديدة عليك...هذاكا عقابك خاطرك جيت روطار
انا:اما
عمر:مش على اساس ننساو لي صار صباح
هزيتلو براسي ايه...منعرفش كيفاه كملت كليت
تفكيري مع الميساج لي قريتو...يمكن معاايا توا...خاطرو متعارك معاها و كهو...اول ما كملنا...هزيت روحي خالطت عليه...من غير حتى كلمة...ركا الكرهبة في بلاصة مطرفة...غزرتلو نحكي
انا:علاش حبست هوني ؟
عمر:نحبك تسامحني
انا:ش..شتقصد ؟
عمر:نهار هذا ليك و على حسابك...هيا تو تعرف
نزل من الكرهبة...و جا من شيرتي...فتح الباب و مدلي يدو...هزيت يدي بالسيف حطيتها في يدو كبس عليا...و جبدني عندو...سكر الباب ورايا...باقي كابس عليا...نشق في الكياس معاه...مش فاهمة لي قاعد يصير...طلعت راسي نغزر للبوتيكات...نحكي
انا:شنعملو هوني احنا
عمر:شبيك تسأل برشا انت
دخلت معاه للبوتيك...قرب من الطفلة لي تخدم غديكا يحكي
عمر:تنجم تعاونها
انا:في شنية ؟
عمر:هيا زهرة...اختار لي تحب عليه...و لي يناسبك نعرف لدبشك بقى في داركم...و منحبكش ترجع لغديكا جملة
زهرة:ا اما...منجمش نقبل هذا الكل...هوكا مريم عطاتني و
عمر:ششش هيا توا...اختار لي تحب عليه من غير ما تخمم في حتى شي
هزيتلو براسي ايه...خالطت على طفلة...كلشي هوني غالي...معرفتش شنختار...كل قطعة نغزرلها اغلى من اللي قبلها...غزرت لطفلة نحكي
انا:اختار انتي...يعني يا ريت متكونش غالية برشا...حاجة و لا زوز...منحبش اكثر
هي:باهي
بقيت نستنى فيها...شديت عليها روبة و خلعة...و دخلت باش نجربهم...ورجعتلهم نحكي
انا:باش ناخو الخلعة هاذي كهو
شدتها عليا و مشات...قربت منو...تبسملي يحكي
عمر:اخترت
انا:مممم مرسي
تلفت نغزر لطفلة و معاها اخرى...هازين في يدهم اكثر من كيس...قرب منها عمر يحكي
عمر:حطيت معاهم لي طلباتو هي
هي:بالطبيعة مسيو
شد عليها لي في يدها...و تلفتلي...بقيت نغزرلو مبهمة...طلع حاجبو يحكي
عمر:ماكش باش تعاوني
قربت منو...غزرت لطفلة لاخرى...لي قربت حطت باقي الكياس في يدي...غزرتلو نحكي
انا؛شنوة هذا عمر
عمر:انشاء الله يعجبوك...هيا لازمنا نمشو توا
شد عليها الكارت متاعو و خرج...خالطت عليه بالوقت...منجمت نحكي حتى شي...للحظة تبدل...كانو مش هو لي كان يصيح صباح...جا باش يدخل لبوتيك تليفونات...سبقتو شديتو من يدو نحكي
انا:ل ﻻ مش بحاجتو انا...يكفي هكا امانك
جبد يدو مني و دخل...خالطت عليه...نغزرلو...اختار تليفون كيما لي جابو حسام و لا اكبر منو شوية...و شرا الكارت باسمو...و تلفت حطو في يدي يحكي
عمر:نظن هذا باش يناسبك اكثر
كبست عليه...من غير حتى كلمة...معادش نعرف اذا نفرح و لا لا...اما اللي نعرفو...حتى معطانيش فرصة اني رفض منو شي...مش متعودة على هذا الكل...حتى دبش لي كان يجيبو مراد...منحطوش على لحمي...نشري كان وقت ناخو فلوس بابا...اما هذا الكل منعرفش كيفاه باش نتقبلو...رجعت معاه للكرهبة...حتى هو حسيتو تفرهد...المطر ماشية و تقوى...منعرفش كيفاه وصلنا لدار...نزل قبلي...جبد الكياس الكل حطهم في يدي...ورجعلي شعري لتالي يحكي
عمر:هيا ادخل...قبل ما تاخو برد
انا:و انت ماكش باش تدخل
عمر:لاااا...عندي خدمة...هيا فيسع
انا:باهي
خذيت نفس و قربت من الباب...تلفت عندو لقيتو يغزرلي...جا باش يركب حبستو نحكي
انا:عمر
تلفت عندي...غزرلي ندرا كيف...تبسمتلو نحكي
انا:مرسي برشا
تبسم ندرا كيف وركب...حلتلي خالتي نعيمة الباب...لقيتهم الكل في صالة...غزرتلي امي فتحية تحكي
فتحية:لباس عزيزتي
انا:مممم عيشك امي
فتحية:صحة ليك عزيزتي
انا:عيشك امي...هاني باش نطلع نبدل دبشي و نجي
هزتلي براسها ايه...اول ما طلعت...خالط عليا حسام يحكي
حسام:زهررة
انا:مممم
حسام:شبيه تليفونك مسكر
بقيت نغزرلو...وحل الكلام في لساني...مديت يدي وريتلو تليفون...غزرلو مستغرب...هزيتلو بكتافي الله غالب نحكي
انا:ساامحني حسام...والله مش مني
حسام:متحطش في بالك...هيا برا ارتاح توا
انا:حسااام
حسام:مممم
انا:امانك متقولش لعمر لانا خبرتك
حسام:طمن
تبسمتلو و طلعت لبيتي...حطيت كلشي عالسرير...نحيت كبوطي...و حليتهم نغزر في الدبش لي شراه...مديت يدي جبدت صاك لي شراه زادة...حسيتو مخطط لكلشي من قبل...حليتو نلقا فيه فلوس...بقيت نغزر مصدومة نعرف لهو حطهم...و محبش يعطيني باش منحسش بالنقص قدامو...حطيت كلشي على جنب و تكيت لتالي نخمم في اللي قاعد يصير...في تصرفات عمر لي معادش نجم نفهما جملة...في الحالة لي وصلتلها منعرفش علاه حتى هو كابس عليا لهدرجة نحب نخدم نحب نتحرر من كلشي...ما نحب حتى شي من حتى حد...منعرفش علاه لتوا...نحس لي لعنة مراد...مزالت مسيطرة عليا...و منجمتش نتحرر منها...حتى عمر لي قاعد يحمي فيا...قاعد يضر فيا زادة...اللي نعرفو انو كل حد فينا...مهما كان أبيض من داخل...هو قريب بنفس الدرجة من الأسود زادة...مراد عمر...حسام...و حتى دالي...كل حد فيهم يمشي في ثنية غالطة..تايهين مع انو الطريق واضحة قدامهم..أما ديما يختارو الطريق الأصعب..لي باش يخرجو منو...كان بعد ما يخسرو برشا حاجات...صعيب برشا انها ترجع في النهاية.
🔸️حسام_يحكي:
حطيت المنشفة على جنب...و تكيت بيديا زوز على لافابو...مديت يدي مسحت الضباب لي على المرايا..نغزر لروحي...تعدات بين عينيا...تعدات صورتها قدامي..نفس الاحداث ليلتها تعاودت قدامي...منعرفش علاه نقمت عليها اكثر...يمكن الكف هذاكا ما يجي شي قدام كلامها و غزرتها...برغم اليمات لي تعداو..منحمتش نحكي اكا ليلة من مخي...الا بعد ما نخليها تندم على كل غلطة و كل كلمة قالتها...اول مرة تظهر قدامي طفلة هكا...قد ما حاولت ننسى و نقول لهي صحبت زهرة...أما منجمتش منجمتش نستوعب لي فرخة قدها يخرج منها هذا الكل...منعرفش وين مربية اصل...نفخت بالقاوي...كيف ذكرت الفازة لي عملتها معاها...منعرفش كيفاه بستها...و لا حتى علاه عملت اكاكا...عديت يدي على شعري...و دخلت لبيتي بدلت دبشي...و هزيت تليفوني...كلمت عمر...باقي ينوقز لين هز عليا...يحكي
عمر:اهلا حسام
انا:وينك يا راجل
عمر:بلاصة العادة
انا:باهي...هاني جايك
عمر:باهي
حسيتو من صوتو مش قد بعضو...هزيت مفاتحي و نزلت اللوطة...لقيتهم قاعدين عالعشا...غزرتلي أمي تحكي
أمي:ايجا تتعشا
انا:صحة و بالشفا...انا باش نخرج
أمي:خير انشاء الله
أنا:مفما شي امي...طمن
أمي:باهي ربي معاك
انا:عيشك
هزيت الكرهبة و طرت بيها...منعرفش كيفاه وصلت عندو...شديت الفران بالقاوي...ونزلت...دزيت الباب و دخلت...ريستو قديم برشا...كنا نهربولو مع بعض يامات القرايا باش نتفرهدو...قربت منو جبدت الكرسي و قعدت مقابلو...نغزر للعشا لي محطوط...مزال كيما راه شاد الكاسة في يدو...ظاهر فيه شرب قبلها...غزرتلو نحكي
انا:بشنوة قاعد تحتفل بلا بيا
عمر:بحياتي...منظنش انك تحب جربها
انا:شنوة اللي قاعد يصير عمر
عمر:منعرفش...معاد نعرف حتى شي
انا:السبب زهرة
طلع راسو...غزرلي...تبسم ندرا كيف...يحكي
عمر:شبيها زهرة...هوكا عندكم و لباس عليها...شيهمني فيها انا
انا:اكا ظاهر...ماك حتى تليفون لي شريتو انا ندرا شصار فيه...متكونش انت
عمر:مممم انا كسرتو...و أحسنلك معادش تقرب منها باهي
انا:قداش شربت ياخي
عمر:منعرفش...لي نعرفو...اني قاعد نغرق شوية شوية...و معادش نجم نرجع لتالي
انا:تحبها ؟
عمر:زهرة...كيما الشراب هذا بالظبط...كيف سم...اذا صار و قربت منها برشا...معادش تنجم تخرجها منك
عدا يدو على وجهو...و كمل شرب لي في الكاسة...و حطها بنطرة يحكي
عمر:حاولت...حاولت برشا...اما منجمتش...قاعد نخون في سيرين بالطريقة هاذي...نعرف...كيما نعرف انو كل مرة قاعد نقرب من زهرة...كل مرة نشم ريحتها و نمسها يا حسام قاعد نأذي فيها و في روحي...اما شي اقوى مني...انا باش نعاونها...باش نخليها تبني حياتها بعيد على اكا ساقط...و متاكد بعد هذا الكل...هي باش تحب من جديد انت و لا اي حد اخر...و انا بالطبيعة منجمش نحكي و منجمش نتكلم...خاطرني باش نكون معرس بسرين...باش نظطر نسكت...و نتحمل الوجيعة هاذي وحدي...خاطر منجمش نأذيها اكثر...كان هذا الكل انت تسميه حب...ايه انا نحبها...و برشا زادة...منعرفش كيفاه و لا علاش...اما كهو اللي قاعد نحس فيه...انا بعد السنين هذوما الكل...اول مرة نحب...نحب في طالبتي يا حسام و منجم نعمل حتى شي..خاطر عندي إلتزمات اكبر مني
بقيت نغزرلو...كابس عالكاسة بيدو...يخرج في الكلام بالسيف...اول مرة نراه في الحالة هاذي...حتى سرين ولا مرة حكالي على علاقتو معاها..ساعات نحس علاقتهم رسمية اكثر من انها تكون علاقة حب...متصدمتش من اعترافو...خاطر كنت متاكد لي باش يكون فما شي هكا خذيت نفس...و مديت يدي باش نفك الكاسة من يدو نحكي
انا:يكفي...خلينا نمشو
عمر:ششش...سييب عليك...من غير ما تواسيني حسام أنا متعود على الخسارة...كان نجمت نعيش بلا أهلي سنين هذوما...باش نجم نعيش من غيرها زادة...مش هكا
انا:عمررر يكفي...من غير ما تحط الاحتمالات الخايبة كان بالرسمي تحبها...علاه باش تخليها تكون لغيرك
عمر:و سريين ؟
انا:سريين...سريين...هذا لي قاعد تعمل فيه...من 3 سنين...تحاول باش تخلي علاقتكم ناجحة...اما هوكا كلشي ظاهر توا
عمر:معادش نعرف شنوة نحب بالظبط...احسن...اني نحاول ننسى كلشي...حتى زهرة باهي
هزيتلو براسي ايه...خاطر حسيتو مش قد بعضو...ياسر ثقل في شرب...بقينا زوز ساكتين...نغزرلو و نخمم شنوة اللي باش يصير فيهم توا...اذا عرسو بسرين بعد شهرين خاطر لي متأكد منو انو هو ما يتراجع في حتى قرار عملو من قبل...و حكايتو مع زهرة باش تتعقد اكثر...كان عملها و عرس...تكيت لتالي من غير حتى كلمة...كل مرة يحكي كلمة و يسكت...نص ليل و هو باقي على نفس الحالة...اصلا معادش فما شي يتحكى بعد اللي قالو الليلة.
#زهرة 🌸
#سمر_القايد 💜