စာစဥ် ၃၄ : အပိုင်း ၁၀
အပိုင်း ၆၄၀ : ယုကျင်းတောင်၊ ယင်ယန်ပင်လယ်
ယုကျင်းတောင်သည် ဟင်းလင်းပြင်မှနေ၍ ကျဆင်းလာခဲ့၏။ မဟူရာကောင်းကင် ရတနာသစ်ပင်၏ သစ်ကိုင်းများသည် တုန်ခါသွားကာ အဆုံးမဲ့ လေဟာနယ် အတွင်းသို့ ထွင်းဖောက်သွားခဲ့သည်။ မြောက်မြားလှစွာသော ခရမ်းရောင် တိမ်တိုက်များသည် နေရာအနှံ့ ပျံ့နှံ့သွားကြ၏။
အံ့ဖွယ် ကောင်းကင်ကမ္ဘာသည် နှစ်ခြမ်းကွဲသွားသောအခါ သူတို့အနက်မှ တစ်ခြမ်း၏ လေဟာနယ်သည် ပြောင်းလဲသွားခဲ့ကာ အရွယ်အစား ကျုံ့ဝင်သွားခဲ့သည်။
လင်းဖုန်းသည် သူ၏အတွင်းသို့ မှော်စွမ်းအင်များ တစ်စပြီးတစ်စ ထည့်သွင်းခဲ့လိုက်၏။ ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါ၏ အစွမ်းအောက်တွင် ဤကမ္ဘာတစ်ခြမ်း၏ ယခင်မှ စိတ်ဝိညာဥ် စွမ်းအင် စီးဆင်းမှုသည် ပြောင်းလဲသွားခဲ့ကာ ယုကျင်းတောင်နှင့် ကိုက်ညီလာခဲ့သည်။
ကောင်းကင်ကို လှည့်ပတ်နေသော ခရမ်းရောင် တိမ်တိုက်များသည် ဤအံ့ဖွယ် ကောင်းကင်ကမ္ဘာ တစ်ခြမ်းအား စတင်၍ လွှမ်းခြုံသွားခဲ့သည်။
ခရမ်းရောင် တိမ်တိုက်များက ထိုးတက်လာခဲ့ကာ ယုကျင်းတောင်နှင့် အံ့ဖွယ် ကောင်းကင်ကမ္ဘာ တစ်ခြမ်းအား ဝန်းရံထားလိုက်၏။ ပြီးတာနှင့် ခရမ်းရောင် တိမ်တိုက်များ၏ အပြင်ဘက်တွင် ရောင်စုံ အလင်းတန်း စက်ဝိုင်းတစ်ခု ပေါ်လာခဲ့ကာ ပြီးပြည့်စုံသော ဘောလုံးပုံစံကို ဖန်ဆင်းလိုက်သည်။
ယုကျင်းတောင်၊ ခရမ်းရောင် တိမ်တိုက်များ၊ မဟူရာကောင်းကင် ရတနာသစ်ပင်နှင့် ဤအံ့ဖွယ် ကောင်းကင်ကမ္ဘာ တစ်ခြမ်းတို့သည် ဤဧရာမ အလင်းတန်း ဘောလုံး၏ ရစ်သိုင်းခြင်းကို ခံလိုက်ရ၏
လင်းဖုန်းသည် ယုကျင်းတောင်၏ အပေါ်တွင် မရှိသော်လည်း သူ၏ သဘာဝလွန် အသိစိတ်သည် ယုကျင်းတောင်နှင့် ဆက်သွယ်ထားခဲ့သည်။ ယုကျင်းတောင်သည် ကိုယ်ပိုင်ကမ္ဘာတစ်ခုကဲ့သို့ ဖြစ်သွားခဲ့ပြီး သူ၏အတွင်းမှ အံ့ဖွယ်ကောင်းကင် ကမ္ဘာတစ်ခြမ်းနှင့် ပေါင်းစည်းသွားခဲ့သည်။
ဧရာမ အလင်းတန်း ဘောလုံးကြီး၏ မျက်နှာပြင်ပေါ်တွင် မရေမတွက်နိုင်သော မှော်သင်္ကေတ စကားလုံးများ ပေါ်လာခဲ့ကာ မဟာကမ္ဘာ၏ စိတ်ဝိညာဥ် စွမ်းအင်များကို စုပ်ယူနေခဲ့သည်။
အံ့ဖွယ် ကောင်းကင်ကမ္ဘာ၏ လေဟာနယ် နယ်နိမိတ်များသည် ဝေဝါးလာခဲ့ကာ မဟာကမ္ဘာနှင့် ပူးပေါင်းသွားခဲ့သည်။ နယ်နိမိတ် စွမ်းအားများ ပျောက်ကွယ်သွားသောအခါ မဆုံးနိုင်သော အနက်ရောင်ရေများ ပန်းထွက်လာခဲ့၍ ဧရာမ ပင်လယ်ကြီး တစ်ခုအဖြစ်သို့ ပြောင်းသွားခဲ့သည်။
ထိုအနက်ရောင် ရေများသည် အရိုးစိမ့်အောင် အေးလှ၍ အလင်းရောင် မှန်သမျှကို ဝါးမျိုသွားခဲ့သည်။ သူ၏ သန်မာလှသော ယင်အော်ရာဖြင့် သူသည် သန့်စင်သောယင်၊ အလွန်အမင်း အေးစက်မှုနှင့် အမှောင်ထုဟူသော စွမ်းအားသဘောတရား သုံးမျိုးတို့ကို ထောက်ပံ့နိုင်ခဲ့သည်။ သူတို့သည် လွန်စွာမှ နက်ရှိုင်းသော အခြေအနေ တစ်ခုတွင် ရောက်နေခဲ့၏။
သို့သော်လည်း အနက်ရောင် ပင်လယ်၏ အလယ်တွင် ယန်အော်ရာ တစ်ခုက ရှိနေခဲ့သည်။ သူသည် အဆုံးမဲ့ အလင်းတန်းကို ထုတ်လွှတ်နေခဲ့ကာ အနက်ရောင် ပင်လယ်နှင့် ဆန့်ကျင်ဘက် ဖြစ်နေခဲ့၏။ ယင်နှင့်ယန်တို့ ဆုံတွေ့ခဲ့ကြသော်လည်း တစ်ဦးနှင့်တစ်ဦး အမှုမထားခဲ့ကြပေ။
အနက်ရောင် ပင်လယ်ကြီးသည် ယုကျင်းတောင်၏ အောက်ခြေတွင် ရှိနေသည်။ သူတို့သည် တစ်ဦးနှင့်တစ်ဦး မှီခိုနေကြကာ အလွန်ပင် လိုက်လျောညီထွေ ရှိနေကြ၏။ သူတို့သည် ရှေးပဝေသဏီခေတ်က မြင့်မြတ်သောတောင်နှင့် နတ်ဘုရားပင်လယ် အတွဲတစ်ခုနှင့် တူနေခဲ့၏။ အလွန်တရာမှပင် ကြီးကျယ်ခမ်းနားသော မြင်ကွင်းဖြစ်သည်။
ခရမ်းရောင် တိမ်တိုက်များသည် ပင်လယ်အပေါ်တွင် လွင့်မျောနေခဲ့ကာ ယုကျင်းတောင်နှင့် မဟူရာကောင်းကင် ရတနာသစ်ပင်အား လွှမ်းခြုံသွားခဲ့သည်။
တောင်နှင့် ပင်လယ်တို့သည် ဧရာမ အလင်းတန်း ဘောလုံးကြီး၏ လွှမ်းခြုံမှုကို ခံနေရသည်။ နယ်မြေအသစ် တစ်ခုကဲ့သို့ ဖြစ်နေ၏။
မဟာကမ္ဘာအတွင်းမှ စိတ်ဝိညာဥ် စွမ်းအင်များသည် အနက်ရောင် ပင်လယ်အတွင်းသို့ အဆက်မပြတ် ထောက်ပံ့နေခဲ့ကာ ရွှေရောင်မျက်လုံးနှင့် အနက်ရောင် ငါးများကို ပိုမိုမွေးဖွားပေးနိုင်ခဲ့သည်။ ယခင်ကထက် ပို၍အားကောင်းသော စိတ်ဝိညာဥ် စွမ်းအင်များသည် ဤအနက်ရောင် ပင်လယ်အောက်မှ စက်လုံးအား ပို၍စောစီးစွာ ရင့်ကျက်လာနိုင်ရန် ရည်ရွယ်ချက်ဖြင့် အားဖြည့်ပေးနေခဲ့သည်။
ဤအချိန်တွင် စက်လုံးသည် တည်ငြိမ်သွားခဲ့ပြီ ဖြစ်ကာ အနက်ရောင် ပင်လယ်နှင့် ယုကျင်းတောင်တို့ကလည်း အတူတကွ ပေါင်းစည်းသွားခဲ့သည်။
ဤဘက်မှ ကိစ္စများ ပြီးဆုံးသွားသောအခါ လင်းဖုန်းသည် ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါမှ စွမ်းအားများကို ရုပ်သိမ်းလိုက်၍ အခြား အံ့ဖွယ် ကောင်းကင်ကမ္ဘာ တစ်ခြမ်းကို တည်ငြိမ်အောင် ပြုလုပ်လိုက်သည်။
ကျန်သော အံ့ဖွယ် ကောင်းကင်ကမ္ဘာတစ်ခြမ်းအား လင်းဖုန်းသည် ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါကို အသုံးပြု၍ နယ်နိမိတ် စွမ်းအားများကို ကုစားနေခဲ့ကာ ဖြည်းဖြည်းချင်း ချိတ်ပိတ်လိုက်သည်။
တွန့်လိမ်နေသော လေဟာနယ်သည် နဂိုအတိုင်း ပြန်ဖြစ်သွားကာ ဤကမ္ဘာ၏ ပျက်စီးသွားခဲ့သော စိတ်ဝိညာဥ် စွမ်းအင် စီးဆင်းမှုမျှခြေသည် ပြန်လည်ကောင်းမွန်လာခဲ့သည်။
ဤကမ္ဘာအတွင်းမှ အတွင်းဒေသများသည် မည်ကဲ့သို့မှ ပြောင်းလဲပုံ မပေါ်ကြပေ။ ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါသည် လေဟာနယ်ကို ရွှေ့ပြောင်းလိုက်သောအခါ စက်လုံးအပါအဝင် အနက်ရောင် ရေအိုင်ကြီးကသာ အံ့ဖွယ် ကောင်းကင်ကမ္ဘာထံမှ ကွဲထွက်သွားကြခြင်း ဖြစ်သည်။
ကျန်သောအရာများသည် ဘာမှမပြောင်းလဲကြပဲ ယခင်အတိုင်းသာ ရှိနေကြသည်။
အစပထမတွင် လင်းဖုန်းသည် အနက်ရောင် ရေအိုင်အတွင်းမှ စိတ်ဝိညာဥ် စွမ်းအင် စီးဆင်းမှုအား ပြောင်းလဲ၍ မဟာကမ္ဘာမှ စိတ်ဝိညာဥ် စွမ်းအင်များကို အံ့ဖွယ် ကောင်းကင်ကမ္ဘာအတွင်းသို့ စီးဆင်းစေကာ အံ့ဖွယ် ကောင်းကင်ကမ္ဘာမှ စိတ်ဝိညာဥ် စွမ်းအင်များအစား ဤစက်လုံးကို ထောက်ပံ့မည်ဟုသာ ရည်ရွယ်ထားခဲ့ခြင်းဖြစ်သည်။
သို့သော်လည်း ဒါသည် တည်ငြိမ်ခြင်း မရှိပေ။ ထို့အပြင် လင်းဖုန်းသည် အချိန်နှင့် လုံ့လများကို စိုက်ထုတ်ကာ စောင့်ကြည့်နေရမည် ဖြစ်သည်။ ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါကလည်း ဤစက်လုံး ရင့်ကျက်လာသည်အထိ အံ့ဖွယ် ကောင်းကင်ကမ္ဘာတွင် နေနေခဲ့ကာ ထောက်ပံ့နေရမည် ဖြစ်သည်။
သို့သော်လည်း ယခုအချိန်တွင် အရာအားလုံးသည် တစ်ကွက်ထဲနှင့် ပြီးဆုံးသွားခဲ့လေပြီ။ ဘေးထွက်ဆိုးကျိုးများလည်း မရှိပေ။ အနက်ရောင် ရေအိုင်နှင့် စက်လုံးတို့သည် အံ့ဖွယ် ကောင်းကင်ကမ္ဘာမှ ကွဲထွက်ကာ ယုကျင်းတောင် အပေါ်တွင် မှီခို၍ မဟာကမ္ဘာမှ စိတ်ဝိညာဥ် စွမ်းအင်များကို ရရှိနိုင်ခဲ့သည်။
အံ့ဖွယ် ကောင်းကင်ကမ္ဘာသည်လည်း သီးသန့်ဖြစ်သွားကာ ကျန်သော အလယ်ကမ္ဘာများနှင့် ဘာမှ မကွဲပြားတော့ပေ။ သူသည် သူ့လမ်းကြောင်းနှင့်သူ နဂိုရှိရမည့် နည်းလမ်းအတိုင်း ဆောင်ရွက်သွားနိုင်ခဲ့သည်။
အံ့ဖွယ် ကောင်းကင်ကမ္ဘာ၏ ပျက်စီးသွားသော နယ်နိမိတ် စွမ်းအားများသည် ပြန်လည် တည်ငြိမ်လာခဲ့သောအခါ လင်းဖုန်းသည် ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါအား ပြန်လည်ရုပ်သိမ်းလိုက်သည်။
အံ့ဖွယ် ကောင်းကင်ကမ္ဘာအတွင်းတွင် လင်းဖုန်းက ရယ်လိုက်၏။ "မင်းကို ကျေးဇူးတင်ရမယ်"
သူ၏စကားဆုံးသည်နှင့် လင်းဖုန်းသည် အံ့ဖွယ် ကောင်းကင်ကမ္ဘာအတွင်းမှ ထွက်ခွာလာခဲ့သည်။ သူ၏အပေါ်တွင် ကြည်လင်သော အလင်းတန်းများက လင်းလက်လာခဲ့ကာ ယုကျင်းတောင်သည် ဟင်းလင်းပြင် အတွင်းမှ နေ ပျောက်ကွယ်သွားခဲ့၏။
ရွှမ်းလီသည်လည်း လင်းဖုန်း၏ အနောက်သို့ ပြန်ရောက်သွားခဲ့သော်လည်း သူမ၏ ဓားဝိညာဥ်သည် ရန်သူအား ပစ်မှတ်ထားနေဆဲ ဖြစ်သည်။
အနက်ရောင် တိမ်တိုက်များ အတွင်းမှ ပုံရိပ်သည် ခေတ္တမျှ ငြိမ်သက်သွားကာ ပြောလိုက်၏။ "အံ့ဖွယ် ကောင်းကင်ဘုံဂိုဏ်း ခေါင်းဆောင်၊ ကောင်းလိုက်တဲ့ အကွက်"
"ဟိုအနက်ရောင် ပင်လယ်က ဒီအလယ်ကမ္ဘာက လာခဲ့တာဖြစ်ပြီး အရာများစွာကို ပိုင်ဆိုင်ထားတယ်။ သူ့ဆီမှာ ကြမ္မာပန်းတိုင် အဆင့်က မှော်ရတနာ တစ်ပါးရဲ့ အော်ရာတွေကိုတောင် ခံစားနေရတယ်" ထိုလူသည် စိတ်ဝင်တစားဖြင့် လင်းဖုန်းနှင့် ယုကျင်းတောင်အား ကြည့်နေခဲ့သည်။
လင်းဖုန်းသည် သူ့အား ကြည့်လိုက်ကာ ပြောလိုက်သည်။ "ခင်ဗျားရဲ့ စာအုပ်မှာလည်း ကြမ္မာပန်းတိုင် အဆင့်က မှော်ရတနာ တစ်ပါးရဲ့ အော်ရာတွေ ပါနေတယ်။ ကျုပ်ကလည်း စိတ်ဝင်စားတယ်"
စကားပြောနေရင်းနှင့် သူသည် ရွှမ်းလီ၏ အနောက်မှ ဓားအိမ်အား ပုတ်လိုက်ရာ ရွှမ်းလီသည် ဓားအိမ်နှင့် ပေါင်းစည်းသွားခဲ့သည်။ လင်းဖုန်းသည် ကောင်းကင်ဖျက်ဆီး ဓားကို ထုတ်ယူလိုက်ပြီး သူ၏ ခန္ဓာကိုယ်ပေါ်တွင် အဖြူနှင့် အနက်ရောင် အလင်းတန်းများ လင်းလက်လာခဲ့၍ ကောင်းကင်ဖျက်ဆီး ဓား၏ အပေါ်တွင် အလွှာတစ်ခုအဖြစ် ဖုံးအုပ်သွားခဲ့သည်။
လေဟာနယ်တွင် သီဆိုသံများက လွင့်ပျံနေကြသည်။ လင်းဖုန်းသည် သူ၏ဓားကို ဝှေ့ယမ်းလိုက်ရာ မြင့်မြတ်သော ဖန်ဆင်းခြင်း အလင်းတန်း ပါဝင်နေသည့် ကောင်းကင်ဖျက်ဆီး ဓားအလင်းတန်း တစ်ခုသည် ကောင်းကင်ကို ထိုးဖောက်၍ အလင်းတန်း တိမ်တိုက်အား ဖြတ်တောက်ခဲ့သည်။
အနက်ရောင်တိမ်တိုက် အတွင်းမှ ပုံရိပ်သည် သူ၏အရှေ့မှ စာအုပ်အား ပုတ်လိုက်ကာ စာအုပ်က တစ်ဖျတ်ဖျတ်နှင့် လှန်သွားခဲ့သည်။ ထိုကဲ့သို့ လှန်နေရင်း ကမ္ဘာငယ်ပေါင်း များစွာတို့က ထွက်လာခဲ့ကာ တစ်ခုနှင့်တစ်ခု ထပ်သွားကြ၏။ သူတို့သည် အရံအတား တစ်ခုအဖြစ်သို့ ပြောင်းသွားခဲ့ကာ လင်းဖုန်း၏ ဓားအလင်းတန်းကို တားဆီးလိုက်ကြသည်။
ဘုန်းကနဲ မြည်သံနှင့်အတူ အရံအတားသည် ကျိုးပျက်သွားခဲ့၍ ဓားအလင်းတန်းက ကွယ်ပျောက်သွားခဲ့သည်။ ထိုကဲ့သို့ ထိပ်တိုက်တွေ့ဆုံမှုမှ ထွက်လာသော လှိုင်းလုံးများသည် ကျယ်ပြန့်သွားခဲ့ကာ ဟင်းလင်းပြင် လေဟာနယ် တစ်ခုလုံးအား ရိုက်ခတ်သွားခဲ့သည်။
မဟာယာန အဆင့်မှ မှော်ရတနာ တစ်ခုဖြစ်သော ဝင်ရိုးစွန်းနှစ်ဘက် တောင်ထိပ်ကပင် ထိုလှိုင်းလုံးများကို အလေးအနက် သဘောထားကာ ရင်ဆိုင်ခဲ့ရသည်။
ယုကျင်းတောင်သည် အလင်းတန်းတစ်ခုကို ထုတ်ဖော်လိုက်ကာ ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါနှင့် ဆက်သွယ်သွားခဲ့သည်။ သူတို့သည် ထိုလှိုင်းလုံးများကို အဝေးသို့ လမ်းလွှဲပေးလိုက်သည်။
ယုကျင်းတောင်က အကာအကွယ် အနေနှင့် ရှိနေသဖြင့် လင်းဖုန်းသည် ရန်သူနှင့် တိုက်ခိုက်ရာတွင် အံ့ဖွယ် ကောင်းကင်ကမ္ဘာ ပျက်စီးသွားမည်ကို စိတ်ပူနေစရာ မလိုနေခဲ့ပေ။
ထိပ်တိုက်တွေ့ဆုံပြီးသွားသောအခါ စာရွက်တစ်ဝက်သည် လေဟာနယ် အတွင်းတွင် လွင့်ပျံလာခဲ့သည်။ အလင်းတန်း တစ်ခုက စာရွက်ကို နှစ်ပိုင်းပိုင်းခဲ့သကဲ့သို့ ဖြစ်နေပြီး လင်းဖုန်းက အနိုင်ရသွားသည်ကို ဖော်ပြနေခဲ့သည်။
ထိုထိပ်တိုက်တွေ့ဆုံမှုကြောင့် အနက်ရောင် တိမ်တိုက်များက လွင့်ပြယ်သွားခဲ့ကာ အနက်ရောင် ဓာတ်ငွေ့များအဖြစ်သို့ ပြောင်းလဲသွားခဲ့သည်။ သူတို့သည် လေဟာနယ် အတွင်းတွင် ပျံ့လွင့်နေခဲ့ကာ မကြာမီတွင် ကွယ်ပျောက်သွားကြသည်။
"တကယ်လို့ငါက အနက်ရောင် ပင်လယ်အထဲက ရတနာကို ရယူနိုင်ခဲ့ရင် သူ့ကို အသုံးပြုပြီးမှ သေခြင်းနဲ့ ရှင်ခြင်း စာအုပ်ကို ကျင့်ကြံနိုင်မှာ ဖြစ်တယ်။ ဒါဆိုရင် သူ့ကို အောင်မြင်စွာနဲ့ သန့်စင်နိုင်ပြီး ကြမ္မာပန်းတိုင် အဆင့်က မှော်ရတနာ အစစ်အမှန်တစ်ခု ဖြစ်လာနိုင်မယ်။ သူက ကြမ္မာပန်းတိုင် အဆင့်ထဲမှာတောင် အကောင်းဆုံးတွေအထဲမှာ တစ်ခုဖြစ်လာနိုင်တယ်"
လေးနက်သော အသံတစ်ခုက လေဟာနယ် အတွင်းတွင် စူးရှစွာနှင့် ပဲ့တင်ရိုက်လာခဲ့သည်။
လင်းဖုန်းက ရယ်လိုက်၏။ "တကယ်လို့ ပြောင်းပြန်လှန်လိုက်ရင် သဘောတရားက အတူတူပဲ"
သူ၏လက်ကို ဆန့်တန်းလိုက်ကာ စုတ်ပြဲသွားသော စာရွက်ကို လှမ်းယူလိုက်သည်။ ထိုစာရွက်ပြဲသည် ကြမ္မာပန်းတိုင်၏ သိပ်သည်းသော အော်ရာတို့ကို ဖော်ပြနေခဲ့ကာ တုန်ခါနေသော စွမ်းအားကြီးသည့် အားတစ်ခုကို ဖော်ပြနေခဲ့သည်။
သူသည် စုတ်ပြဲသွားခဲ့သော်လည်း သူ၏အတွင်းမှ စွမ်းအားသည် သာမန် မှော်ရတနာ တစ်ခု၏ အပေါ်တွင် ရှိနေခဲ့သည်။
"အနက်ရောင် ပင်လယ်နဲ့ စက်လုံးတို့ ရောက်လာတော့ ယုကျင်းတောင်က ပတ်ဝန်းကျင်အသစ် ဖြစ်သွားခဲ့တယ်။ ဒါကြောင့် ငါ့ရဲ့ အင်မော်တယ်ဝိညာဥ်နဲ့ မပေါင်းစပ်နိုင်ခဲ့ဘူး။ မဟုတ်လို့ရှိရင် ငါကသူ့ကို ဒီနေရာမှာ ထားထားနိုင်တယ်" လင်းဖုန်းက သူ၏ခေါင်းကို ခါလိုက်ကာ ထိုစာရွက်တစ်ဝက်ကို ဖိနှိပ်ထားလိုက်သည်။ "ဒါပေမဲ့ ဒါလေးက ငါအတွက် ဝမ်းသာစရာကောင်းတဲ့ အံ့ဩမှု တစ်ခုဖြစ်တယ်"
သူသည် ထိုစာရွက်အတွင်းမှ စွမ်းအား သဘောတရားအား သုံးသပ်နေခဲ့ကာ ရွှမ်းလီအား ရင်ဆိုင်ခဲ့သည့် အချိန်တွင် ထိုသူ အသုံးပြုခဲ့သော တာအိုသစ်သီးကို ပြန်စဥ်းစားလိုက်သည်။ ထိုမှတဆင့် သူသည် သေမင်းခန်းမ၏ ကျင့်ကြံမှုကို ပို၍နက်ရှိုင်းစွာ နားလည်နိုင်ခဲ့၏။
လင်းဖုန်းသည် သူ၏မျက်နှာပေါ်တွင် အပြုံးတစ်ခုအား ဖော်ပြလိုက်သည်။ "သူ့ကိုကြည့်ရတာ သေမင်းခန်းမရဲ့ ထိပ်သီးကျင့်ကြံသူတစ်ယောက် ဖြစ်ရမယ်။ သူက သေမင်းခန်းမရဲ့ ခေါင်းဆောင်တောင် ဖြစ်နိုင်သေးတယ်။ ဒါပေမဲ့ သူ့ရဲ့ မပြီးဆုံးသေးတဲ့ မှော်ရတနာက တခြားသူ တစ်ယောက်ရဲ့ ပစ္စည်းဖြစ်တယ်"
"စိတ်ဝင်စားစရာပဲ၊ တကယ့်ကို စိတ်ဝင်စားစရာပဲ"
လင်းဖုန်းသည် သူ၏ အင်္ကျီလက်ဝကို ဝှေ့ယမ်းလိုက်ကာ ရွှမ်းလီနှင့် ဝင်ရိုးစွန်းနှစ်ဘက် တောင်ထိပ်တို့ကို အံ့ဖွယ် ကောင်းကင်ကမ္ဘာအတွင်းသို့ ပြန်ခေါ်လိုက်သည်။ သူသည် ယင်-ယန် ဖန်ဆင်းခြင်းနှင့် ယိုယွင်းခြင်း ဝင်္ကပါအား အသုံးပြု၍ အံ့ဖွယ် ကောင်းကင်ကမ္ဘာ၏ နယ်နိမိတ် စွမ်းအားတို့အား လျှင်မြန်စွာနှင့် ပြန်လည်တည်ငြိမ်လာစေရန် ကုစားလိုက်၍ အပြည့်အဝ ချိတ်ပိတ်လိုက်၏။
ရှီကျုံးထျန်း၊ ပါရမီ ဇန်မာစတာနှင့် ကျန်သောသူများတို့သည် ဤအလယ်ကမ္ဘာ၏ စိတ်ဝိညာဥ် စွမ်းအင် စီးဆင်းမှုများကို အသေအချာ ခံစားလိုက်ကြသည်။ ယခုအချိန်တွင် အံ့ဖွယ် ကောင်းကင်ကမ္ဘာ၏ စိတ်ဝိညာဥ် စွမ်းအင် စီးဆင်းမှုသည် လုံးဝပြောင်းလဲသွားခဲ့ပြီ ဖြစ်သည်။ သတ္တုတွင်းများနှင့် ဆေးတောင်ကြားတို့မှ စိတ်ဝိညာဥ် စွမ်းအင် ယိုယွင်းနေမှုများသည် လုံးဝပျောက်ကွယ်သွားခဲ့ပြီ ဖြစ်သည်။
အံ့ဖွယ် ကောင်းကင်ကမ္ဘာအား ခြိန်းခြောက်နေခဲ့သော ပြဿနာသည် ပြေလည်သွားခဲ့ပြီ ဖြစ်သည်။ ယခုအချိန်မှစ၍ အံ့ဖွယ် ကောင်းကင်ကမ္ဘာသည် အခြား အလယ်ကမ္ဘာများကဲ့သို့ ဖြစ်သွားတော့မည် ဖြစ်သည်။
အရင်းအမြစ်များနှင့် ဆေးပင်များကို အလွန်အကျွံ တူးဖော်ြခင်းမပြုပဲ သတ္တုတွင်းများနှင့် ဆေးတောင်ကြားတို့၏ အခြေအနေများကို ထိန်းသိမ်းထားနိုင်ခဲ့လျှင် သူတိုသည် အချိန်အကြာကြီး အသုံးပြု၍ ရမည်ဖြစ်သည်။
အံ့ဖွယ် ကောင်းကင်ကမ္ဘာသည် အံ့ဖွယ် ကောင်းကင်ဘုံဂိုဏ်း၏ အခြေခံအုတ်မြစ် ဖြစ်လာတော့မည် ဖြစ်၏။ သူသည် အနာဂတ်တွင် အံ့ဖွယ် ကောင်းကင်ဘုံဂိုဏ်းအား စွမ်းအားများတိုးတက်လာစေရန် အရင်းအမြစ် ပစ္စည်းများကို ထောက်ပံ့နိုင်မည် ဖြစ်သည်။
လင်းဖုန်းနှင့် ပတ်သတ်၍ ရှီကျုံးထျန်းသည် အစပထမတွင် ရှီထျန်းဟောင်၏ ဖော်ပြချက်များကိုသာ နားထောင်ခဲ့ရခြင်း ဖြစ်သည်။ အနက်ရောင် ရေအိုင်အတွင်းသို့ ဆင်းသက်သော အခါမှသာ ကောင်းကင်သယ်ဆောင် ဧကရာဇ်နှင့် တွေ့ဆုံခဲ့ကာ ပို၍ကောင်းကောင်း သိလာခဲ့သည်။
သူ၏ မှော်ကျိန်စာ ရုပ်ခန္ဓာကိုယ်၏ စွမ်းအားများကပင် သူ့အား ထိတ်လန့်စေရန် လုံလောက်နေသည်။ သူကိုယ်တိုင်က ဘာမှပင် လုပ်စရာ မလိုခဲ့ပေ။
လင်းဖုန်းသည် စက်လုံးအား အံ့ဖွယ် ကောင်းကင်ကမ္ဘာအတွင်းမှ ခွဲခြားလိုက်သောအခါ ရှီကျုံးထျန်းသည် လင်းဖုန်း၏ နည်းလမ်းများကို လေ့လာနိုင်ခဲ့သည်။
ရန်သူက တိုက်ခိုက်လာခဲ့သော အချိန်တွင် သူသည် လင်းဖုန်း၏ လက်အတွင်းမှ ဓားတစ်ချောင်း ဖြစ်သွားကာ သူ့အား ကူညီသလိုပင် ဖြစ်သွားခဲ့သည်။
ရှီကျုံးထျန်းက သူ့ကိုယ်သူ တွေးနေခဲ့၏။ "ငါက မှော်ရတနာ သန္ဓေလောင်းနဲ့ အံ့ဖွယ် ကောင်းကင်ကမ္ဘာက အရင်းအမြစ်တွေရဲ့ ဒွိဟပွားစရာ ပြဿနာကို ဘယ်လိုမျိုး ဖြေရှင်းရမလဲလို့ တွေးနေခဲ့တာ။ ငါက ဒီလိုမျိုး ရလဒ်မျိုးကို ထင်မထားခဲ့ဘူး။ အံ့ဖွယ် ကောင်းကင်ဘုံဂိုဏ်း ခေါင်းဆောင်က အဲ့ဒီကတည်းက ဘယ်လိုလုပ်ရမလဲဆိုတာကို သိထားခဲ့လို့ ယုံကြည်နေခဲ့တာ နေမှာ"
"ကျုပ်တို့က အရှက်ရမိပါတယ်" ဝင်ရိုးစွန်းနှစ်ဘက် တောင်ထိပ်နှင့် ပါရမီ ဇန်မာစတာတို့သည် တစ်ချိန်တည်းတွင် ပြောလိုက်ကြသည်။ "ကျွန်တော်တို့ရဲ့ တာဝန်ကို ကျေပွန်စွာ ထမ်းဆောင်နိုင်မလား ဆိုတာကို မသေချာပေမဲ့ အတတ်နိုင်ဆုံး ကြိုးစားပါ့မယ်"
လင်းဖုန်းက သူ၏ခေါင်းကို ခါလိုက်ကာ ရယ်လိုက်သည်။ "စိတ်မပူပါနဲ့။ ကျုပ်ကလည်း ရှိနေမှာပါ"
သူ၏ခေါင်းကို လှည့်လိုက်ကာ မျက်မဲ့အား ကြည့်လိုက်၏။ "မင်းကရော ဘယ်လိုလဲ။ မင်းက ဒီနေရာမှာ နေမလား၊ ငါနဲ့ ယုကျင်းတောင်ကို လိုက်ပြန်မလား"
ခေတ္တမျှ ငြိမ်သက်သွားပြီးနောက်တွင် လင်းဖုန်းက ဆက်ပြောလိုက်သည်။ "မင်းနေခဲ့တဲ့ အနက်ရောင် ရေအိုင်က အခုအချိန်မှာ ပင်လယ်တစ်ခု ဖြစ်သွားပြီ။ သူက ငါ့ရဲ့တောင်ခြေကို ရောက်သွားခဲ့ပြီ"
"ဒီကနေ့ကစပြီး သူ့ကို ယင်ယန်ပင်လယ်လို့ ခေါ်ရမယ်။ သူက ယုကျင်းတောင်နဲ့ တစ်သားတည်း ဖြစ်သွားခဲ့ပြီ"
"မျက်မဲ့သည် ခေတ္တမျှ စဥ်းစားလိုက်ကာ ပြန်ဖြေလိုက်၏။ "ကျွန်တော်က မျိုးနွယ်တူငါးတွေကို လမ်းညွှန်ပေးချင်သေးတယ်။ အဲ့ဒီတော့ ယုကျင်းတောင်ကို ပြန်လိုက်ခဲ့ပါမယ်"
လင်းဖုန်းက ရယ်လိုက်သည်။ "ဒါဆိုရင်လည်း သွားကြစို့"
ယုကျင်းတောင်သို့ ပြန်လာအပြီးတွင် သူသည် အနက်ရောင် ပင်လယ်အား ကြည့်လိုက်ကာ တွေးလိုက်သည်။ "ယင်ယန်ပင်လယ်ရဲ့ စွမ်းအားဟာ ဟိုမှော်ရတနာ သန္ဓေလောင်းကို အားဖြည့်ပေးနိုင်ရုံတင် မကဘူး။ ယင်နှင့်ယန်တို့က အတူအကွ ပေါင်းစည်းနေနိုင်တဲ့အတွက် ယုကျင်းတောင်ရဲ့ အပေါ်မှာလည်း အရမ်းကို အကျိုးရှိစေနိုင်တယ်။ ဒါက ခဲတစ်လုံးနဲ့ ငှက်နှစ်ကောင်ကို ပစ်ရတဲ့ အတိုင်းပဲ။ ကောင်းတယ်၊ အရမ်းကောင်းတယ်"
အံ့ဖွယ် ကောင်းကင်ကမ္ဘာ၏ ပြဿနာကို ဖြေရှင်းသွားပြီးသောအခါ လင်းဖုန်းသည် နေထိုင်၍ ကောင်းနေခဲ့သော်လည်း တစ်စုံတစ်ခုက သူ့အား ထူးခြားသလို ခံစားနေစေခဲ့သည်။
သေမင်းခန်းမသည် စက်လုံး၏ တည်ရှိနေမှုကို သိသွားပြီဖြစ်၍ လင်းဖုန်းသည် သူတို့က အံ့ဖွယ် ကောင်းကင်ဘုံဂိုဏ်းကို ပြဿနာရှာရန် ပြင်ပကမ္ဘာသို့ သတင်းဖြန့်မည်ဟု တွေးထားခဲ့သည်။ လင်းဖုန်းသည် ပြဿနာများကို ဖြေရှင်းရန် နည်းလမ်းကိုပင် ဆွဲထားခဲ့ပြီး ဖြစ်သည်။ သို့သော်လည်း မည်သူကသိမည်နည်း၊ အချိန်များက ကုန်လွန်သွားခဲ့သော်လည်း အားလုံးတို့သည် ငြိမ်သက်နေဆဲ ဖြစ်သည်။