ဂန္တဝင် ဂိုဏ်းချုပ်
စာစဥ် ၂၀ : အပိုင်း ၂၀
အပိုင်း ၃၇၀ : ရှေးဟောင်းကမ္ဘာမှ ဧည့်သည်တစ်ယောက်
လင်းဖုန်း၏ သံမဏိသစ်ပင် ကိုယ်ပွားသည် တောင်ကြားများအတွင်းတွင် လျှင်မြန်စွာ ရွေ့လျားနေခဲ့၍၊ လျှိုမြောင်တစ်ခုအတွင်းသို့ မကြာခင်တွင် ရောက်ရှိသွားခဲ့သည်။ ထိုလျှိုမြောင်သည် ချက်ချင်းပင် လင်းလက်စွာနှင့် တောက်ပသွားခဲ့၏။
"အိုး?" လင်းဖုန်းသည် မျက်မှောင်ကြီးကို အတန်ငယ်ကြုတ်လိုက်သည်။ ထိုအလင်းတန်းကို ဖော်ထုတ်လိုက်သော မှော်အိုင်တမ်သည် ရွှေရောင်ဗဟိုချက် အဆင့်မှ မှော်အိုင်တမ်သာ ဖြစ်သည်။ မည်ကဲ့သို့မျှ ထူးခြားမှုများ မရှိခဲ့ပေ။
လင်းဖုန်းအား အံ့ဩစေသော အချက်မှာ၊ ထိုမှော်အိုင်တမ်အား အသုံးပြုခဲ့သူမှာ ချီသာဝက အဆင့်မှ ကျင့်ကြံသူတစ်ယောက် ဖြစ်နေခြင်း ဖြစ်သည်။
ပုံမှန်အားဖြင့် ဆိုသော်၊ လင်းဖုန်း၏ အံ့ဖွယ် ကောင်းကင်ဘုံဂိုဏ်း အပါအဝင် ဂိုဏ်းအများစုသည်၊ တပည့်တစ်ယောက်၏ ကျင့်ကြံမှု အဆင့်ထက် တစ်ဆင့်သာပိုမြင့်သော မှော်အိုင်တမ်များကိုသာ ပေးကြခြင်း ဖြစ်သည်။
လင်းဖုန်းသည် သူ၏ တပည့်များ အပေါ်တွင် လွန်စွာ ရက်ရောသောသူဖြစ်သည်။ သူ၏ ရက်ရောမှုများကို အခြားဂိုဏ်းများကပင် အားကျနေရ၏။ ရှောင်ယန်တို့တတွေသည် အခြေခံအုတ်မြစ် အဆင့်တွင် ရှိကြတုံးက၊ သူတို့သည် ရွှေရောင်ဗဟိုချက် အဆင့်မှ မှော်အိုင်တမ် တစ်ခုစီ ရှိကြ၏။
သူတို့သည် ရွှေရောင်ဗဟိုချက်ကို ဖော်ဆောင်နိုင်အပြီးတွင်၊ သူတို့အား အခြေတည်ဝိညာဥ် အဆင့်မှ မှော်အိုင်တမ် တစ်ခုစီ ပေးထားခဲ့သည်။ သူတို့သည် အခြေတည်ဝိညာဥ်အား ဖန်ဆင်းနိုင်ခဲ့ပါကလည်း၊ လင်းဖုန်းသည် သူတို့အား မှော်ရတနာ တစ်ခုစီ ပေးဦးမည် ဖြစ်သည်။ သို့သော်လည်း ထိုအချိန်မှာ လိုဦးမည်ဖြစ်ပြီး၊ လင်းဖုန်းကလည်း ထိုကဲ့သို့ တတ်နိုင်မလား ဆိုသည်ကို မသေချာသေးပေ။
အစောပိုင်းက ရှင်းယွင်တောင်ထိပ်တွင်၊ မီးတောက်နဂါး ကောင်းကင်ချပ်ဝတ်တန်ဆာအား ရှောင်ယန်အား ပေးလိုက်ချိန်တွင်၊ ထိုတိုက်ပွဲသည် ရှောင်ယန်နှင့် ရှီချုံးယွမ်တို့၏ အကြားမှ တိုက်ပွဲမဟုတ်တော့ပဲ၊ မီးတောက်နဂါး ကောင်းကင်ချပ်ဝတ်တန်ဆာနှင့် နတ်ဆိုးအရိပ်ဓားတို့၏ အကြားမှ တိုက်ပွဲနှင့် ပိုတူသွားခဲ့သည်။
ချီသာဝက အဆင့်မှ ကျင့်ကြံသူ တစ်ယောက်အား ရွှေရောင်ဗဟိုချက် အဆင့်မှ မှော်အိုင်တမ်ကို ပေးထားခြင်းသည်၊ လင်းဖုန်း၏ အရှေ့မှ ဖြစ်ရပ်ကဲ့သို့ နှမြောစရာကြီး ဖြစ်သွားပေမည်။
သူသည် ဒါအား မတော်တဆ ကောက်ရထားခြင်း မဟုတ်လျှင်၊ တစ်စုံတစ်ယောက်က သူ့အား အရမ်းကို အလိုလိုက်ထားခြင်း ဖြစ်ရမည်။
အကယ်၍ အကြီးအကဲ တစ်ယောက်၏ စောင့်ရှောက်မှုကို ပေးထားချင်လျှင်၊ ရွှေရောင်ဗဟိုချက် အဆင့်မှ အဆောင်လက်ဖွဲ့က ပို၍ သင့်တော်ပေသည်။
လင်းဖုန်းသည် လျှိုမြောင်အတွင်းသို့ ရောက်ရှိသွားသောအချိန်တွင်၊ အသက် ၁၂-၁၃နှစ်ခန့် ရှိသော မိန်းကလေး တစ်ယောက်သည်၊ အခြေခံအုတ်မြစ် အဆင့်မှ ပြိုင်ဘက်သုံးယောက်တို့၏ ဝိုင်းရံမှုကို ခံနေခဲ့ရသည်။ ကြည့်ရသည်မှာ ရွှေရောင်ဗဟိုချက် အဆင့်က မှော်အိုင်တမ်သာ မရှိလျှင်၊ သူမသည် ရှုံးနိမ့်နေခဲ့ပြီ ဖြစ်သည်။
သို့သော်လည်း သူမသည် အနှေးနှင့်အမြန် ရှုံးနိမ့်တော့မည် ဖြစ်၏။ အကယ်၍ သူမ၏ ပြိုင်ဘက်တို့သည် သူမအား အရှင်ဖမ်းလိုခြင်း မရှိခဲ့လျှင်၊ သူမသည် ယခုအချိန်တွင် သေနေလောက်ပြီ ဖြစ်သည်။
"ကျွင်းမိသားစုနဲ့ လော်မိသားစုတို့နဲ့ စစ်ဖြစ်ချင်နေတယ်ဆိုတော့၊ မင်းတို့ရဲ့ ယန်မိသားစုက ရှေးဟောင်း ယွင်ထန်းကမ္ဘာမှာ ခြေကုပ်ယူချင်နေတာလား?"
ထိုမိန်းကလေးသည် သူ၏လက်ကို လှုပ်လိုက်၍ ဓားအလင်းတန်း တစ်ခုကို ထုတ်လွှတ်လိုက်ကာ၊ ပြိုင်ဘက်များကို နောက်ဆုတ်စေခဲ့လိုက်၏။
အခြေခံအုတ်မြစ် အဆင့်မှ ကျင့်ကြံသူများသည် ထိုမိန်းကလေးငယ်လေး၏ လက်အတွင်းမှာ ဓားကိုကြည့်လိုက်ကာ၊ သူတို့၏ မျက်လုံးအတွင်းတွင် သတိထားမှုနှင့် လောဘများဖြင့် ပြည့်လာခဲ့သည်။ သူမ၏ စကားကို ကြားအပြီးတွင် သူတို့က ရယ်လိုက်သည်။ "မိသားစု နှစ်ခုစလုံးနဲ့ စစ်ဖြစ်ရတာ၊ လွယ်ကူတဲ့ကိစ္စ မဟုတ်ဘူး။ ဒါပေမဲ့ ငါတို့က ဒီသတင်းကို ဘယ်ပေးဖြန့်ပါ့မလဲ?"
"ငါတို့က နင့်ကို အခက်တွေ့အောင် မလုပ်ချင်ပါဘူး။ နင်က လော်မိသားစုက ဟိုကံဆိုးမလေးဆီကို ခေါ်သွားပေးရင်၊ နင့်ကို လွှတ်ပေးမယ်လေ"
ထိုမိန်းကလေးက သူတို့အား သရော်သလိုဖြင့် ကြည့်လိုက်သည်။ "ငါကဒီလောက် အယုံလွယ်လိမ့်မယ်လို့ ထင်နေတာလား?"
ထိုကျင့်ကြံသူများက ရယ်လိုက်သည်။ "ကျွင်းကျိနင်၊ နင်က ယုံယုံ မယုံယုံ၊ ငါတို့က ဒီကနေ့မှာ နင့်ဆီကနေ ဟိုလော်မိသားစုက ကောင်မစုတ်လေးရဲ့ နေရာကို ပြောခိုင်းရမယ်"
ထိုကောင်မလေးမှာ ဒေါသထွက် ခါးသီးစွာနှင့်၊ သူမ၏ လီယွမ်ဓားအား တင်းကျပ်စွာနှင့် ဆုပ်ကိုင်လိုက်သည်။
"ငါ့ရဲ့ နမော်နမဲ့နိုင်မှုကိုပဲ အပြစ်တင်ရမယ်။ ငါက အသံလွှင့်ကျောက်တုံးကို ပြုတ်ကျစေခဲ့တယ်" ကျွင်းကျိနင်သည် သူမ၏ ရင်ထဲမှနေ၍ ကျိန်ဆဲနေခဲ့သည်။ "မဟုတ်လို့ရှိရင်၊ အိမ်ကနေပြီး အကူအညီ တောင်းခံလို့ မရခဲ့ရင်တောင်၊ ခရမ်းရောင် တိမ်တိုက်ဂိုဏ်းကနေပြီး စစ်ကူတောင်းခံလို့ရတယ်"
သူမသည် ကိုယ့်ကိုယ်ကိုယ် တည်ငြိမ်အောင် ကြိုးစားလိုက်၍၊ သူမ၏ မှော်စွမ်းအင်များကို ပြန်လည်ဖြည့်တင်းပေးနိုင်သော ဆေးလုံးနှစ်လုံးအား မျိုချလိုက်သည်။ သူမ၏ လီယွမ်ဓားကို ဝှေ့ယမ်းလိုက်၍၊ သူမ၏ ရန်သူများအား နောက်ထပ် နောက်ဆုတ်စေခဲ့သည်။
သူမသည် လျှိုမြောင်၏ အခြေအနေကို အကဲခတ်လိုက်ကာ၊ လွတ်မြောက်နိုင်ရန် အခွင့်အရေးအား ရှာဖွေနေခဲ့၏။ "ချင်းဝူက ဘယ်လိုနေမှန်း မသိဘူး။ သူမက ခဏနေတုံးက ဒဏ်ရာရသွားခဲ့တယ်၊ သူမရဲ့ ဒဏ်ရာက ပြင်းထန်သလား မသိဘူး?"
ကျွင်းကျိနင်သည် လျှိုမြောင်အား ရှာဖွေနေသည့် အချိန်တွင်၊ အရပ်ရှည်ရှည် ကြေးနီရောင် အသားအရေနှင့် လူငယ်တစ်ယောက်က တောင်ကုန်းတစ်ခုပေါ်မှနေ၍၊ သူတို့၏ တိုက်ပွဲအား စိတ်ဝင်တစားဖြင့် ကြည့်ရှုနေသည်ကို တွေ့လိုက်ရ၏။
ကျွင်းကျိနင်သည် မှင်သက်သွားခဲ့သည်။ "ဒီလူက ဘယ်အချိန်က ရောက်လာတာလဲ? သူ့ကို အရင်က မတွေ့မိပါဘူး။ လီယွမ်ဓားကတောင် ငါ့ကို သတိမပေးခဲ့ဘူး"
ကျွင်းကျိနင်၏ စိတ်ရှုပ်ထွေးသွားသော အမူအရာကို ကြည့်လိုက်ကာ၊ ထိုကျင့်ကြံသူများကလည်း သူတို့အား လှည့်စားနေသည်ဟု စိုးရိမ်သွားကြသည်။ သူတို့အနက်မှ တစ်ယောက်သည် သူမ၏ အကြည့်နောက်သို့ လိုက်၍ကြည့်လိုက်ရာ၊ သူသည်လည်း အံ့ဩထိတ်လန့်သွားခဲ့သည်။
သူတို့၏ ပြိုင်ဘက်က လှည့်စားနိုင်သော်လည်း၊ ကိုယ်အချင်းချင်းကတော့ လှည့်စားမည် မဟုတ်ချေ။ ထို့ကြောင့် ကျန်သောလူနှစ်ယောက်ကလည်း သတိထား၍ လှည့်ကြည့်လိုက်ရာ၊ လင်းဖုန်း၏ သံမဏိသစ်ပင် ကိုယ်ပွားအား တွေ့လိုက်ရကာ၊ တုန်လှုပ်သွားခဲ့၏။ "ဒီလူက ငါတို့ ဘာမှမသိလိုက်ပဲ ရောက်နေခဲ့တာလား?"
လင်းဖုန်းသည် သူ့ကိုယ်သူ ပုန်းကွယ်နေဖို့ စိတ်ပင်မကူးခဲ့ပေ။ သူသည် တောင်ကုန်းပေါ်တွင်သာ ဒီအတိုင်းရပ်နေခဲ့၍၊ အောက်မှတိုက်ပွဲအား ကြည့်ရှုနေခဲ့သည်။
သူသည် ထိုအချိန်တွင် စိတ်ထဲမှ အလွန်နေ၍ ကောင်းနေခဲ့သည်။ "ကြည့်ရတာ မိသားစုတစ်ခုရဲ့ နည်းစနစ်တွေကို အမွေဆက်ခံတာက၊ တပည့်ခံတာလို့ ပြောလို့မရဘူး။ ဒီလိုသာဆိုရင် အနာဂတ်မှာ တပည့်တွေကို ထပ်ပြီးလက်ခံလိုက်ရှိရင်၊ အဲ့ဒီကျင့်ကြံမှု မိသားစုတွေထဲက ပါရမီရှင်တွေကိုလည်း ရွေးလို့ရပြီပေါ့"
"မကောင်းတဲ့ အကြံရှိတဲ့ လူအချို့ကို ဖယ်လိုက်လို့ရှိရင်၊ အလားအလာရှိတဲ့ ပါရမီရှင်တွေက အများကြီးပဲ။ မဆိုးဘူး၊ မဆိုးဘူး"
လင်းဖုန်းသည် ပြုံးလိုက်ကာ သူ၏ စွမ်းရည်စိစစ်ခြင်း ကိရိယာအား ကြည့်လိုက်သည်။ "စနစ်၏ တွက်ချက်မှု ပြီးဆုံးသွားပါပြီ။ ပစ်မှတ်၏ အချက်အလက်များမှာ အောက်ပါအတိုင်း ဖြစ်ပါတယ်"
"အရိုးအရင်းမြစ် - ၈၊ သဘောပေါက် နားလည်နိုင်စွမ်း - ၇၊ စိတ်စွမ်းအား - ၆၊ ကောင်းချီးမင်္ဂလာ - ၇"
"သုံးသပ်ချက် : ပစ်မှတ်၏ ပင်ကိုစွမ်းရည်မှာ အနည်းငယ် မြင့်မားသော အဆင့်တွင် ရှိပါတယ်။ ဗဟိုတပည့် ဖြစ်လာနိုင်ရန် အရည်အချင်းနှင့် ပြည့်စုံပါတယ်။ ပစ်မှတ်အား တပည့်အဖြစ် သိမ်းသွင်းရန် အကြံပြုပါတယ်"
လင်းဖုန်းက သူ၏ခေါင်းကို ညိတ်လိုက်သည်။ "စုစုပေါင်းတန်ဖိုး ၂၈ရှိတယ်။ ၃၀တော့ မပြည့်တဲ့အတွက် ငါရဲ့ လက်ရင်းတပည့် လုပ်ဖို့တော့ အဆင့်မမီဘူး။ ဒါပေမဲ့ ရှောင်ပုတန် တပည့်လုပ်လို့တော့ ရတယ်"
"အမှတ် ၃၀ ပြည့်ဖို့ကလည်း လွယ်တဲ့ကိစ္စမဟုတ်ဘူး" လင်းဖုန်းက တွေးလိုက်ကာ၊ ကျွင်းကျိနင်၏ မှော်စွမ်းအင် လှုပ်ရှားမှုများကို သေချာစွာနှင့် အကဲခတ်လိုက်သည်။ သူသည် ခေါင်းထဲတွင် အချက်အလက် အချို့ကို မှတ်သားလိုက်သည်။
ယုကျင်းတောင်ပေါ်တွင် လင်းဖုန်း၏ မူလခန္ဓာကိုယ်သည်၊ ကောင်းကင်စကြာဝဠာ အလင်းတန်း ကမ္ဘာ အတွင်းမှ ထွက်လာပြီဖြစ်သည်။ သူသည် မဟူရာနဂါး ကျဲယုအား ဆင့်ခေါ်လိုက်၏။ ကျဲယုက သူ၏အရှေ့သို့ ရောက်လာအပြီးတွင် ဦးညွှတ်လိုက်သည်။ "ဆရာ၊ ကျွန်တော့်ကို ဘာများ ညွှန်ကြားဖို့ ရှိပါသလဲ?"
လင်းဖုန်းက မေးလိုက်သည်။ "ကျဲယု၊ ငါမှတ်ထားတာ မမှားရင်၊ မင်းက ရှေးဟောင်းယွင်ထန်း ကမ္ဘာထဲမှာ မိသားစုကြီး၇ခု ရှိတယ်လို့ ပြောဖူးတယ်။ ပြီးတော့ အဲ့ဒီမိသားစု ၇ခုဟာ၊ နတ်ဘုရား နယ်မြေထဲက အင်အားစု ၇ခုကို ကိုယ်စားပြုတယ်လို့ ပြောဖူးတယ်"
ကျဲယုသည် ခေါင်းညိတ်လိုက်ကာ ပြန်ဖြေလိုက်သည်။ "ဟုတ်ပါတယ်။ သူတို့မိသားစုတွေထဲက တစ်ခုဟာ၊ ဟင်းလင်းပြင် ဘုရားကျောင်းကို ကိုယ်စားပြုပါတယ်။ ကျွန်တော်က ဟင်းလင်းပြင် ဘုရားကျောင်းရဲ့ အဖွဲ့ဝင်တစ်ယောက် အနောက်ကနေ လိုက်ပြီးတော့၊ ရှေးဟောင်းယွင်ထန်း ကမ္ဘာထဲကို ဝင်ဖူးတဲ့အတွက် အဲ့ဒီကမ္ဘာရဲ့ သတင်းတွေကို သိနေခဲ့တာပါ"
"ခရမ်းရောင်တိမ်တိုက် ဂိုဏ်းကလည်း ရှေးဟောင်းယွင်ထန်း ကမ္ဘာထဲမှာ ရှိတယ်မလား? သူတို့မှာရော ကိုယ်ပိုင် ကိုယ်စားပြုတဲ့ မိသားစုများ ရှိသလား?" လင်းဖုန်းက မေးလိုက်သည်။ ကျဲယုက သူ၏ခေါင်းကို ညိတ်လိုက်ကာ၊ "မှန်ပါတယ်။ ခရမ်းရောင် တိမ်တိုက်ဂိုဏ်းကို ကိုယ်စားပြုတဲ့ မိသားစုက၊ ကျွင်းမိသားစု ဖြစ်ပါတယ်"
လင်းဖုန်းသည် အခြေအနေ အရပ်ရပ်ကို သဘောပေါက်သွားခဲ့ကာ၊ ခေတ္တမျှ တွေးနေခဲ့သည်။ "ရှေးဟောင်းယွင်ထန်း ကမ္ဘာမှာ ယန်မိသားစုရော ရှိသလား?"
ကျဲယုက သေချာစွာနှင့် ဖြေလိုက်၏။ "ရှိပါတယ်။ ယန်မိသားစုကလည်း မိသားစုကြီး ၇ခုထဲမှာ ပါပါတယ်။ ယန်မိသားစုရဲ့ အနောက်မှာက သံသရာဂိုဏ်း ရှိပါတယ်"
"သံသရာဂိုဏ်း?" လင်းဖုန်းသည် အချိန်အနည်းငယ်မျှ စဥ်းစားလိုက်သည်။ သူသည် ထိုဂိုဏ်းအား ကြားဖူးသော်လည်း၊ ကောလဟာလ အနေဖြင့်သာ ကြားဖူးခြင်းဖြစ်သည်။ သူတို့ဂိုဏ်းနှင့် တစ်ခါမှ မဆက်ဆံဖူးချေ။
သံသရာဂိုဏ်းသည် နတ်ဘုရားနယ်မြေ၏ တောင်ပိုင်းမှ၊ စွမ်းအားကြီးသော ဂိုဏ်းတစ်ဂိုဏ်းဖြစ်သည်။ သူသည် မဟာကျိုး အင်ပါယာမှနေ၍၊ ရှေးဟောင်းကမ္ဘာ စိမ့်မြေဖြင့် ခွဲခြားထားသည်။ သူ၏တောင်ပိုင်းတွင် မိစ္ဆာကလန်တို့၏ မဟာလွင်တီးခေါင် ကုန်းမြေတို့နှင့် ဆက်သွယ်ထားသော၊ မဟာ လေဟာနယ် ဆက်ကြောင်းသာ ရှိတော့သည်။
လူသားကျင့်ကြံသူတို့၏ သတ်မှတ်ချက်အရ၊ သံသရာဂိုဏ်းသည် ခရမ်းရောင် တိမ်တိုက်ဂိုဏ်း၊ နတ်ရေကန်ဂိုဏ်း၊ ကောင်းကင်မာစတာ ဓားဂိုဏ်းတို့နည်းတူ ကြီးမားသော အင်အားစု တစ်ခုဖြစ်သည်။ သို့သော်လည်း သူတို့သည် မြင့်မြတ်နယ်မြေ သုံးခု၊ မဟာချင်နှင့် မဟာကျိုး အင်ပါယာတို့ထက်တော့ အားနည်းသည်။
သို့သော်လည်း လင်းဖုန်းနားလည်ထားသည်မှာ၊ သံသရာဂိုဏ်းသည် အလွန်သန်မာသော ဂိုဏ်းတစ်ဂိုဏ်း ဖြစ်ခဲ့သည်။ သူသည် အဆင့်တစ်ဆင့် ကျသွားရခြင်းမှာ၊ ဂိုဏ်းအတွင်းမှ ကြီးမားလှသော ပြည်တွင်းစစ် တစ်ခုကြောင့် ဖြစ်သည်။ သူသည် မဟာချင် အင်ပါယာ၏ အတွင်းမှ၊ အငြင်းပွားမှုများထက် များစွာပို၍ ဆိုးဝါးပေသည်။
မဟာချင် အင်ပါယာမှ တော်ဝင်မိသားစုနှင့် မိသားစုကြီးများ၏ ဆက်ဆံရေးသည် သိပ်မပြေလည်လှသော်လည်း၊ အားလုံးသည် တည်ငြိမ်သော အခြေအနေတွင် ရှိနေသည်။ နှစ်ဦးနှစ်ဘက် စလုံးတို့သည် အချင်းချင်း ထိန်းသိမ်းနိုင်စွမ်း ရှိကြသည်။
သံသရာဂိုဏ်းမှာမူ၊ လွန်ခဲ့သော နှစ်ပေါင်း တစ်သိန်းခန့်ကတည်းက၊ ဂိုဏ်းတွင်းမှ ဂိုဏ်းခွဲအချင်းချင်းတို့သည် သဘောထား ကွဲလွဲမှုများ ဖြစ်ခဲ့ကြ၏။ သမိုင်းအလိုအရဆိုလျှင်၊ အက်ကွဲကြောင်းပေါင်း များစွာတို့ ပေါ်ပေါက်ခဲ့ကြ၏။
ထို့အပြင် မိစ္ဆာကမ္ဘာနှင့် ဖြစ်ပွားသော စစ်ပွဲတွင်၊ သံသရာဂိုဏ်းမှ ကျင့်ကြံသူများသည် ကြီးမားသော အရှုံးနှင့် ရင်ဆိုင်ခဲ့ရသည်။ စစ်ပွဲအပြီးတွင် သံသရာဂိုဏ်းသည် လမ်းစဥ်ခြောက်ခု ကွဲသွားခဲ့သည် - ကောင်းကင်၊ အသူရာ၊ လူသား၊ သားရဲ၊ ငရဲနှင့်ကျတ်တစ္ဆေ ဟူ၍ဖြစ်သည်။ သူတို့အချင်းချင်းသည် တစ်ဖွဲ့နှင့်တစ်ဖွဲ့ ကတောက်ကဆများစွာ ဖြစ်ပွားခဲ့ကာ၊ သံသရာဂိုဏ်း၏ လွှမ်းမိုးနိုင်မှုကို အကျိုးသက်ရောက်မှု ရှိစေခဲ့သည်။
ထိုအချိန်မှစ၍ အကြီးအကဲများစွာတို့သည် ထွက်ခွာသွားကြ၍၊ အခြားနေရာများတွင် ကိုယ်ပိုင်ဂိုဏ်းများကို ထူထောင်ခဲ့ကြလေသည်။
သူတို့အထဲမှ တစ်ယောက်သည် မဟာချင် အင်ပါယာမှ မိသားစုကြီး လေးစုအတွင်းတွင် အပါအဝင်ဖြစ်သော၊ ဟော်မိသားစုကို တည်ထောင်ခဲ့ခြင်း ဖြစ်သည်။
အတိတ်တွင် လင်းဖုန်းသည် ဝမ်လင်းအား၊ တစ္ဆေတစ်ထောင်ဂိုဏ်းမှ စီးခုံးနန်၏ လက်အတွင်းမှ ကယ်တင်ခဲ့ရဖူးသည်။ ဒါသည် သံသရာဂိုဏ်း၏ ကျတ်တစ္ဆေလမ်းစဥ်မှ ဆင်းသက်လာသောဂိုဏ်း ဖြစ်သည်။
ထိုမှနေတဆင့် သံသရာဂိုဏ်းသည်၊ အတိတ်က မည်မျှလောက် တိုးတက်စည်ပင်ခဲ့သနည်း ဆိုသည်မှာ သိသာနေ၏။
သံသရာဂိုဏ်း၏ သွေးကွဲမှုများသည် ယနေ့အချိန်အထိ ဆက်လက်ဖြစ်ပွားနေခဲ့သည်။ လမ်းစဥ်ခြောက်ခု၏ ပဋိက္ခများမှာ ပြေငြိမ်းဖို့ရန် အလားအလာများ မရှိနေခဲ့ပေ။
"ရှေးဟောင်းယွင်ထန်း ကမ္ဘာမှာ ယန်မိသားစုဟာ၊ လော်မိသားစုနဲ့ မဟာရန်ဖြစ်တယ်။ သူတို့မိသားစု နှစ်ခုရဲ့ နယ်နိမိတ်တွေက နီးစပ်စွာနဲ့ ဆက်စပ်နေပြီး၊ သူတို့ရဲ့ ယှဥ်ပြိုင်မှုက နှစ်ပေါင်းထောင်နဲ့ချီပြီးမှ ရှည်ကြာနေပြီ" ကျဲယုက ဆက်ပြီး ရှင်းပြလိုက်သည်။ "လော်မိသားစုက မဟာကျိုး အင်ပါယာရဲ့ ကိုယ်စားလှယ်ဖြစ်တယ်"
ထိုစကားကို ကြားရသောအခါ၊ လင်းဖုန်းသည် သူ၏မျက်မှောင်ကြီးအား ကြုတ်လိုက်သည်။ "မဟာကျိုး အင်ပါယာနဲ့ သံသရာဂိုဏ်း အတွင်းမှာ၊ ရန်ငြိုးရန်စ ရှိတယ်လို့တော့ မကြားမိပါဘူး"
ကျဲယုက သူ၏ခေါင်းကို ညိတ်လိုက်၏။ "အရှင် ပြောတာမှန်တယ်။ ဒါက ယန်နဲ့လော် မိသားစုတို့ရဲ့ အငြင်းပွားမှု သက်သက်ပဲ။ သူတို့ဟာ နတ်ဘုရား နယ်မြေထဲမှာ သံသရာဂိုဏ်းနဲ့ မဟာကျိုး အင်ပါယာတို့ရဲ့ အကျိုးအမြတ်တွေရယ်၊ တန်ဖိုးရှိတဲ့ အရင်းအမြစ်တွေရယ်ကို မထိခိုက်လို့ရှိရင်တော့၊ သူတို့နှစ်ဂိုဏ်းစလုံးက မမြင်ချင်ယောင်ဆောင်နေကြတာပဲ"
ကျဲယု၏ စကားအရ လင်းဖုန်းသည် နတ်ဘုရားနယ်မြေ အတွင်းမှ အင်အားစုကြီးများ၏ အငြင်းပွားမှုသည်၊ ရှေးဟောင်းယွင်ထန်း ကမ္ဘာသို့ ကူးစက်လာခြင်း မရှိသေးသည်ကို သိလိုက်ရ၏။ မိသားစုကြီး ၇စုတို့သည် ကျောထောက်နောက်ခံများ ရှိကြသော်လည်း၊ သူတို့တွင် လွတ်လပ်စွာ ဆုံးဖြတ်နိုင်ခွင့် အချို့လည်း ရှိကြသေး၏။
ဥပမာ အနေနှင့်၊ မဟာကျိုး အင်ပါယာနှင့် မဟာချင် အင်ပါယာတို့သည် ဆက်ဆံရေးများ မကောင်းကြသော်လည်း၊ သူတို့ အသီးသီး ထောက်ခံထားကြသည့် လော်မိသားစုနှင့် တန်မိသားစုတို့သည်၊ ရန်သူဖြစ်ကြရမည်ဟု မဆိုလိုပေ။
ထို့အတူပင် ရှေးဟောင်းယွင်ထန်း ကမ္ဘာအတွင်းမှ မိသားစုနှစ်ခု၏ တင်းမာနေသော ဆက်ဆံရေးသည်၊ သူတို့၏ ကျောထောက်နောက်ခံများကလည်း ထိုကဲ့သို့ ဖြစ်နေရမည်ဟု မဆိုလိုပေ။
လင်းဖုန်းက ရယ်လိုက်သည်။ "စိတ်ဝင်စားစရာပဲ"
ခွန်းလွန်တောင်ပေါ်တွင်လည်း၊ သူ၏ သံမဏိသစ်ပင် ကိုယ်ပွားသည် ကျွင်းကျိနင်နှင့် ယန်မိသားစုတို့မှ ကျင့်ကြံသူတို့၏ တိုက်ပွဲကို ကြည့်လိုက်ကာ ရယ်နေခဲ့သည်။ သူရှိနေခြင်းကြောင့် သူတို့ နှစ်ဦးနှစ်ဘက်တို့မှာ တိုက်ခိုက်နေကြသော်လည်း၊ စိတ်က လင်းဖုန်းထံတွင် ရောက်နေခဲ့သည်။
လင်းဖုန်း၏ ရုတ်တရက် ပေါ်ပေါက်လာမှုသည်၊ သူက မည်သည့်ဘက်ကို ကူညီမည်မှန်း မသိနေရသဖြင့်၊ အားလုံးအား ရင်တမမနှင့် ဖြစ်စေခဲ့သည်။
ကျွင်းကျိနင်သည် လင်းဖုန်းအား ကြည့်လိုက်ပြီး၊ သူမ၏ မျက်လုံးအစုံမှာ ရုတ်တရက် တောက်ပလာခဲ့သည်။ "ဒီလူရပ်နေတဲ့ပုံက သူ့အိမ်အထဲမှာ ရပ်နေတဲ့ပုံပဲ။ မဟုတ်မှလွဲရော…"
Novel : History's Number 1 Founder
Author : August Eagle
Translator : Master Shifu