အပိုင်း ၃၄၂ : ဒီရေများအား ပြောင်းပြန်လှန်ခြင်း
ကောင်းကင်အကာအကွယ် ထီး၏အောက်တွင်၊ လင်းဖုန်းသည် ကောင်းကင်ပေါ်မှ တဖြည်းဖြည်း မှေးမှိန်ပျောက်ကွယ်သွားသော ကြယ်တာရာကိုးလုံး ကောင်းကင်ချေမှုန်း ဝင်္ကပါကို ကြည့်နေခဲ့သည်။ ထိုဝင်္ကပါမှနေ၍ နောက်ဆုံးအနေဖြင့်၊ ဧရာမ ကြက်သွေးရောင်ရင့်ရင့် အနီရောင်အလင်းတန်း တစ်ခုအား ထုတ်လွှတ်လိုက်သည်။
သူသည် တတိယ တိုက်ခိုက်မှုနှင့် အလားသဏ္ဌာန် တူသော်လည်း၊ ယခုတွင် မားစ်၏ စကြာဝဠာ စွမ်းအားများကို အသုံးပြုထားခြင်း ဖြစ်သည်။ ကြက်သွေးရောင်ရင့်ရင့် အနီရောင် အလင်းတန်းတွင် ခက်ထန်လှသော မီးတောက်များကို သိုမှီးထားကာ၊ မီးဝင်္ကပါများ ရာနှင့်ထောင်နှင့်ချီ၍ ပေါင်းစပ်ဖွဲ့စည်းထားခြင်း ဖြစ်သည်။
ထိုအလင်းတန်း အတွင်းမှ မီးအနွယ်ဝင် စိတ်ဝိညာဉ် စွမ်းအင်များသည် အလွန်သိပ်သည်းလှ၏။ လင်းဖုန်း၏ အတွေ့အကြုံအရဆိုလျှင် ထိုကဲ့သို့သော ပြင်းထန်လှသည့် မီးတောက်များသည်၊ မြေပြင်မှ လွင်ပြင်ကျယ်ကြီးအား မီးပင်လယ် အဖြစ်သို့ ပြောင်းလဲနိုင်ကာ အငွေ့ပင် ပျံစေနိုင်မည် ဖြစ်သည်။
အကြွင်းမဲ့မီးတောက် ခုနှစ်ပါးတို့သည် အဆင့်တစ်ဆင့် ပိုမြင့်ကြသည် ဆိုသော်လည်း၊ သူမြင်ဖူးခဲ့သမျှ အကြွင်းမဲ့ မီးတောက်များသည် ပမာဏ အကန့်အသတ် ရှိကြသည်။ သူအခု မြင်တွေ့နေရသော အရာများနှင့် ယှဉ်လိုက်လျှင်၊ ရေတစ်ပေါက်နှင့် ပင်လယ်တစ်ခုကဲ့သို့ပင် ဖြစ်၏။ ဒါသည် အကြွင်းမဲ့ မီးတောက်တို့၏ ဖျက်ဆီးနိုင်စွမ်းနှင့် ထိုအလင်းတန်း၏ ဖျက်ဆီးနိုင်စွမ်းအားတို့၏၊ အရွယ်အစား ပမာဏ ကွာခြားမှုကို နှိုင်းယှဉ်ပြခြင်း ဖြစ်သည်။
လင်းဖုန်းသည် သူ၏လက်ချောင်းများဖြင့် ထီးကြီးကို ပို၍ပို၍ တင်းကျပ်စွာ ဆုပ်ကိုင်ထားခဲ့၏။ သူသည် ကြယ်တာရာကိုးလုံး ကောင်းကင်ချေမှုန်း ဝင်္ကပါ၏ တတိယ တိုက်ခိုက်မှုအား ခုခံကာကွယ်ခဲ့သည် အချိန်တွင်၊ ပြင်းထန်စွာ တုန်ခါမှုကို ခံစားခဲ့ရ၍ ထီး၏လက်ကိုင်ကို လွတ်သွားမတတ်ပင် ဖြစ်သွားခဲ့ရသည်။ အခုအချိန်တွင်မူ၊ ပို၍ပြင်းထန်သော တိုက်ခိုက်မှုတစ်ခုက လာနေပေပြီ။
ထီး၏အပေါ်မှ လေဟာနယ်နှင့် အချိန်ကာလများသည်၊ ထပ်ဖန်တစ်ခါ ပြောင်းလဲ၍သွားပြန်သည်။ တစ်ကီလိုမီတာမျှ ကျယ်ပြန့်သော အလင်းတန်းကြီးသည်၊ ထိုပြောင်းလဲမှု ဖြစ်စဉ်မှနေ၍ ပါးလျ၍ သွားပေသည်။ သူသည် တစ်ပေလောက်သာရှိသော ပြင်းထန်စွာ တောက်လောင်နေသည့် မီးဘောလုံးလေး အဖြစ်သို့ ပြောင်းလဲသွားခဲ့ကာ၊ ကောင်းကင်အကာအကွယ် ထီးပေါ်သို့ အရှိန်ပြင်းထန်စွာနှင့် ကျရောက်လာခဲ့သည်။
ထိုမီးဘောလုံး၏ တိုက်ခိုက်မှုနှင့်အတူ၊ မြေပြင်ကို လှုပ်ခါသွားစေသော တုန်ခါမှုကြီးတစ်ခု ဖြစ်ပေါ်လာခဲ့ပြီး၊ မီးတောက်မီးလျှံများသည် ထီးပေါ်မှ လွင့်စင်သွားခဲ့၏။ သို့သော်လည်း ထီးကြီးမှာ အကောင်းအတိုင်းပင် ရှိသေးသည်။ သူသည် မပျက်စီးခဲ့ရုံတင် မကပဲ၊ ခြစ်ရာလေး တစ်စွန်းတစ်စမှပင် အထင်ခဲ့ပေ။
ထီးပေါ်မှနေ၍ လွင့်စင်သွားခဲ့သော မီးတောက်မီးလျှံများသည်၊ ထီး၏စွမ်းအားများ လွှမ်းခြုံထားသည့် နေရာပြင်ပသို့၊ တောင်တစ်လုံး အရွယ်အစားရှိသည့် မီးကြယ်ပျံကြီး အသွင်သို့ ပြောင်းလဲကာ ကျရောက်သွားခဲ့သည်။ သူ၏ဘေးပတ်ပတ်လည်မှ ပတ်ဝန်းကျင်တို့သည် မီးတောက်များ၏ လွှမ်းခြုံမှုကို ချက်ချင်းခံလိုက်ကြရသည်။
လေပေါ်မှ ရှီကျုံးယွဲ့ဖြစ်စေ၊ ကောင်းကင်ပေါ်မှ အလင်းဓားမြန် ဓားမာစတာတို့ အဖွဲ့ဖြစ်စေ၊ မြေပြင်ပေါ်မှ အပြာရောင်ခန်းမ သူတော်စင်တို့ဖြစ်စေ၊ သူတို့အားလုံးတို့သည် လင်းဖုန်းက ကြယ်တာရာကိုးလုံး ကောင်းကင်ချေမှုန်း ဝင်္ကပါ၏ တိုက်ခိုက်မှုအား ရင်ဆိုင်ခုခံခဲ့သည်ကို စိုက်ကြည့်နေကြ၏။ ထိုတိုက်ခိုက်မှုအား ရင်ဆိုင်ခဲ့ရသည့် အချိန်မှာပင်၊ လင်းဖုန်းသည် ဘာမှမဖြစ်သကဲ့သို့ နေနေခဲ့၏။
ထိုအခြင်းအရာသည် လူအားလုံးအား ဆွံ့အစေခဲ့သည်။ အထူးသဖြင့် ရှီကျုံးယွဲ့ဖြစ်သည်။
ကြယ်တာရာကိုးလုံး ကောင်းကင်ချေမှုန်း ဝင်္ကပါက ထုတ်လွှတ်လိုက်သော စတုတ္ထ တိုက်ခိုက်မှုသည်၊ သူနှင့် ပုန်းကွယ်နေသော နဂါးချောက်တို့၏ ပူးပေါင်းတိုက်ခိုက်မှုထက် အများကြီးပို၍ ပြင်းထန်သည်ကို၊ သူ၏ရင်ထဲမှနေ၍ သိနေခဲ့၏။
သူသည်ပင်လျှင် ထိုစတုတ္ထ တိုက်ခိုက်မှုနှင့် ရင်ဆိုင်ရမည် ဆိုပါက၊ သူသည် ရှောင်ရှားရုံသာ တတ်နိုင်မည် ဖြစ်သည်။ မျက်နှာချင်းဆိုင် ထိပ်တိုက်ရင်ဆိုင်ခဲ့မည် ဆိုပါက ဒဏ်ရာအပြင်းအထန် ရရှိနိုင်ရုံတင် မကပဲ၊ အသက်ပင် ဆုံးရှုံးကောင်း ဆုံးရှုံးနိုင်လေသည်။
သို့သော်လည်း ထိုကဲ့သို့သော အကြီးအကျယ် ပျက်စီးစေနိုင်သော တိုက်ခိုက်မှုအား ခုခံ၍အပြီးတွင်၊ လင်းဖုန်းသည် မှဲ့တစ်ပေါက်မှပင် မစွန်းခဲ့ချေ။ ကောင်းကင် အကာအကွယ် ထီးကြောင့်ဖြစ်စေ၊ လင်းဖုန်း၏ ကိုယ်ပိုင်စွမ်းအားကြောင့်ဖြစ်စေ၊ ဒါသည် ရှီကျုံးယွဲ့က သူ့အားရင်ဆိုင်ရန် နည်းလမ်းမရှိဟူ၍ ဖော်ပြနေခြင်း ဖြစ်သည်။
ထိုအခြင်းအရာသည် အင်မော်တယ် ဝိညာဉ် အဆင့်မှ အကြီးအကဲများအားလုံးအား၊ ပြောစရာစကား ရှာမရ ဖြစ်စေခဲ့သည်။
အချိန်အတန်ကြာမှ ရှီကျုံးယွဲ့က လေးနက်သော အသံဖြစ်ပြောလိုက်သည်။ "ဒီတစ်ခေါက်မှာတော့၊ ကျုပ်တို့က မာစတာလင်းကို ဒီရေတွေကို ပြောင်းပြန်လှန်ပေးခဲ့တဲ့အတွက် ကျေးဇူးတင်ရမယ်!"
ပထမဆုံး သူသည် သူ၏ဝင်္ကပါဖြင့်၊ ပြိုကျလုဆဲဆဲ ဖြစ်နေသော ရှေးဟောင်း ဟွမ်ဟိုင်ကမ္ဘာအား ကယ်တင်ပေးခဲ့၏။ ပြီးတာနှင့် သူသည် ကြယ်တာရာကိုးလုံး ကောင်းကင်ချေမှုန်း ဝင်္ကပါ၏ တတိယ တိုက်ခိုက်မှုအား တစ်ယောက်တည်း ခုခံပေးခဲ့သည်။
နောက်ဆုံးအနေနှင့် သူသည် ပို၍ပင် အင်အားပြင်းထန်သော ကြယ်တာရာကိုးလုံး ကောင်းကင်ချေမှုန်း ဝင်္ကပါ၏ စတုတ္ထ တိုက်ခိုက်မှုအား၊ အောင်မြင်စွာ ကျော်လွှားနိုင်ခဲ့သည်။
ဤတိုက်ပွဲတွင် လင်းဖုန်းသည်၊ ကြယ်တာရာကိုးလုံး ကောင်းကင်ချေမှုန်း ဝင်္ကပါ၏ ပြိုင်ဘက်ကင်းသော ဒဏ္ဍာရီအား ပြောင်းပြန်လှန်ပစ်နိုင်ခဲ့သည်။
သူမရောက်လာခင်က ကြယ်တာရာကိုးလုံး ကောင်းကင်ချေမှုန်း ဝင်္ကပါသည် ပထမ တိုက်ခိုက်မှုဖြင့်၊ မြောက်ပိုင်းလေပြင်း ပင်လယ်၏ အကာအကွယ် ဝင်္ကပါအား ဖျက်ဆီးနိုင်ခဲ့ပြီး၊ ဒုတိယ တိုက်ခိုက်မှုအား အင်မော်တယ် ဝိညာဉ် အဆင့်မှ အကြီးအကဲ များစွာတို့က ပူးပေါင်း ကာကွယ်ခဲ့ရသည်။
အင်မော်တယ် ဝိညာဉ် အဆင့်မှ အကြီးအကဲများ အားလုံး၏ ရင်ထဲတွင်၊ လင်းဖုန်း၏ ခံစစ်စွမ်းရည်မှာ ယခုရှိနေကြသောသူများထဲတွင် အကောင်းဆုံးဖြစ်ပြီး၊ သူတို့အားလုံး၏ လေးစားမှုကို ခံယူနိုင်ခဲ့သည်။
လင်းဖုန်းသည် ကြယ်တာရာကိုးလုံး ကောင်းကင်ချေမှုန်း ဝင်္ကပါအား ကိုယ်တိုင် မတိုက်ခိုက်ခဲ့သော်လည်း၊ ဤတိုက်ပွဲအပေါ်တွင် သူ၏ အကျိုးသက်ရောက်မှုမှာ အခြားသူများထက် ပိုသာပေသည်။ ရှီကျုံးယွဲ့က သူသည် ဒီရေတို့အား ပြောင်းပြန်လှန်ပေးနိုင်သည်ဟု ပြောခြင်းမှာ၊ ပုံကြီးချဲ့၍ ပြောဆိုနေခြင်း မဟုတ်ပေ။
"ဒီလောက်လည်း မဟုတ်ပါဘူး၊ အန်းလျှန်မင်းသား" လင်းဖုန်းက ပြန်တုံ့ပြန်လိုက်သည်။ "တစ်ဘက်လူရဲ့ နောက်ခံကို သိရပြီလား?"
ရှီကျုံးယွဲ့နှင့် ကျန်သောသူများသည်၊ မြေပေါ်တွင် တောက်လောင်နေကြသော မီးတောက်များကို ငြိမ်းသက်လိုက်ကြသည်။
"ကျုပ်က ပြောရမှာ ရှက်ပေမဲ့၊ တစ်ဘက်လူက သူ့ရဲ့ဝင်္ကပါ ပြိုလဲသွားတာနဲ့ ချက်ချင်း ထွက်ပြေးသွားခဲ့တယ်" ရှီကျုံးယွဲ့သည် ခေါင်းကိုခါလိုက်ကာ ပြောလိုက်သည်။ "ကြယ်တာရာကိုးလုံး ကောင်းကင်ချေမှုန်း ဝင်္ကပါ ပြိုကွဲပျက်စီးသွားခြင်းက၊ ပတ်ဝန်းကျင်ရဲ့ စိတ်ဝိညာဉ် စွမ်းအင်တွေကို ဖရိုဖရဲ ဖြစ်စေခဲ့ပြီး လေဟာနယ် တစ်ခုလုံးကို ကစဉ့်ကလျား ဖြစ်စေခဲ့တယ်။
"တစ်ဘက်သားရဲ့ ကျင့်ကြံမှု အဆင့်အတန်းဟာ ကျုပ်ထက် မနိမ့်ကျဘူး။ သူက ဒီလိုမျိုး ရှုပ်ထွေးနေတဲ့ အခြေအနေကို အခွင့်ကောင်းယူပြီးတော့ ထွက်ပြေးသွားတော့၊ ကျုပ်တို့ကလည်း မဟန့်တားနိုင်ခဲ့ဘူး"
ရှီကျုံးယွဲ့သည် နက်ရှိုင်းသော လေသံဖြင့် ပြောလိုက်၏။ "ဒါပေမဲ့ သူ့ရဲ့ မိစ္ဆာစွမ်းအား ပြောင်းလဲမှုတွေကို သုံးသပ်ပြီး၊ ဒါက ချုံးချိမိစ္ဆာမျိုးနွယ်စုတို့ရဲ့ လက်ချက်လို့ ကျုပ်ကပြောနိုင်တယ်။ သူတို့က ရက်စက်ကြမ်းကြုတ်တဲ့ မျိုးနွယ်စုဖြစ်ပြီး၊ ဘယ်လိုလုပ်ပြီး အချိန်အကြာကြီး ပျောက်ဆုံးနေခဲ့တဲ့ ကြယ်တာရာကိုးလုံး ကောင်းကင်ချေမှုန်း ဝင်္ကပါကို၊ ထိန်းချုပ်နိုင်တဲ့ အခွင့်အရေးရခဲ့သလဲ ဆိုတာကိုတော့ ကျုပ်လဲမသိဘူး"
လင်းဖုန်းသည် သူ၏မျက်မှောင်အား အတန်ငယ် ကြုတ်လိုက်သည်။ "ဒီနေရာက မိစ္ဆာကမ္ဘာရဲ့ မဟာလွင်တီးခေါင် ကုန်းမြေနဲ့ အမတန်မှ ဝေးကွာတာပဲ။ ဘယ်လိုလုပ်ပြီး ဒီမိစ္ဆာအုပ်စုက အန်းလျှန်မင်းသားနဲ့ မဟာချင် အင်ပါယာတို့ရဲ့ စောင့်ကြပ်နေမှုကို၊ သတိမထားမိစေပဲ ဝင်လာနိုင်ရတာလဲ?
ရှီကျုံးယွဲ့သည် အမတန်မှ ကသိကအောက် ဖြစ်သွားခဲ့ကာ၊ ခေါင်းကိုငုံ့လိုက်သည်။ "မဟာချင် အင်ပါယာက ဒီကိစ္စကို အသေအချာ စုံစမ်းစစ်ဆေးပြီး၊ အားလုံးကို ကျေနပ်လောက်တဲ့ အဖြေတစ်ခုကို ပေးပါမယ်"
လင်းဖုန်းပင်ဖြစ်စေ၊ လက်ဝဲမင်းသားရှန်၊ အလင်းဓားမြန် ဓားမာစတာ၊ နေမင်းအလင်းတန်း ဓားမာစတာ၊ အပြာရောင်ခန်းမ သူတော်စင်၊ ဟော်ရှု သို့မဟုတ် ချောင်ဝေတို့ဖြစ်စေ၊ သူတို့တစ်ယောက်ချင်းစီ တို့သည် ယခုအချိန်တွင် အလွန်အမင်း လေးနက်နေကြ၏။ ဒေါသထွက်နေကြသော အင်မော်တယ် ဝိညာဉ် အဆင့်မှ အကြီးအကဲများနှင့်အတူ၊ နဂိုက တင်းမာနေသော အခြေအနေ တစ်ခုလုံးသည် ပို၍ စိတ်ကျဉ်းကျပ်ဖွယ် ဖြစ်လာခဲ့ပေသည်။
ကြယ်တာရာကိုးလုံး ကောင်းကင်ချေမှုန်း ဝင်္ကပါသည် စွမ်းအားကောင်းသည်ဆိုသော်လည်း၊ အင်မော်တယ် ဝိညာဉ် အဆင့်မှ အကြီးအကဲများက ထွက်ခွာသွားချင်မည်ဆိုလျှင် ဟန့်တားနိုင်စွမ်းရှိမည် မဟုတ်ပေ။
သို့သော်လည်း ဤနေရာတွင် ရှေးဟောင်း ဟွမ်ဟိုင်ကမ္ဘာ၏ ဝင်ပေါက်က ရှိနေသည်။ အကယ်၍သာ ကြယ်တာရာကိုးလုံး ကောင်းကင်ချေမှုန်း ဝင်္ကပါက သူ့အားဖျက်ဆီးနိုင်ခဲ့ပါက၊ အဓိက စွမ်းအားစုများ၏ ပါရမီရှင် အဖူးအပွင့် အားလုံးတို့သည် တစ်ခါတည်း အသတ်ခံလိုက်ကြရမည် ဖြစ်သည်။
တုခွမ်း၊ စန်းလျှိုဟဲ၊ ထောင်ရောင်ရောင်၊ လီတုံးထောင်၊ ယွမ်မေ့၊ ဂူလေ၊ ဟော်မင်၊ စုန့်ချင်းယွင်နှင့် တောက်ယုတင်းတို့သည်၊ သူတို့ဂိုဏ်းများမှ ထိပ်သီးတပည့်များဖြစ်ကြသည်။ ထိုဂိုဏ်းများတွင် ပါရမီရှင်ပေါင်း မြောက်မြားစွာ ရှိကြသည် ဆိုသော်လည်း၊ ထိုအုပ်စုအား ဆုံးရှုံးသွားခဲ့လျှင် လွန်စွာနစ်နာမည် ဖြစ်သည်။
သူတို့ ရင့်ကျက်လာကြသောအခါတွင်၊ သူတို့သည် သက်ဆိုင်ရာ ဂိုဏ်းများ၏ ထောက်တိုင်များ ဖြစ်လာကြမည် ဖြစ်ပြီး၊ သမိုင်းစာအုပ်တွင် မှတ်တမ်းရေးထိုးနိုင်ကြသည့် သူများသာ ဖြစ်ကြသည်။ အကယ်၍ သူတို့ကသာ ဤနေရာတွင် အသတ်ခံလိုက်ကြရလျှင်၊ သူတို့၏ ဂိုဏ်းများတွင် အကြီးအကျယ် နစ်နာဆုံးရှုံးမှုများ ဖြစ်ခဲ့ကြမည် ဖြစ်သည်။
မဟာချင် အင်ပါယာ အနေနှင့်လည်း၊ ရှီရှင်းယွမ်နှင့် ရှီဆောင်ချန်းတို့သည် ထိုအုပ်စုအတွင်းတွင် ပါသည်။
အံ့ဖွယ် ကောင်းကင်ဘုံဂိုဏ်း အနေနှင့်မူ၊ ပြောဘွယ်ရာ မရှိတော့ချေ။ ရှောင်ယန်မှအပ လင်းဖုန်း၏ လက်ရင်းတပည့်များ အားလုံးတို့သည်၊ ရှေးဟောင်း ဟွမ်ဟိုင်ကမ္ဘာ အတွင်းတွင် ရောက်ရှိနေကြသည်။ အကယ်၍ သူတို့သာ မရှိကြတော့ပါက၊ လင်းဖုန်းနှင့် ရှောင်ယန်တို့ နှစ်ယောက်တည်း အနာဂတ်တွင် မည်သို့ဆက်လုပ်ရမည်ကို သိနိုင်တော့မည် မဟုတ်ချေ။
တစ်စုံတစ်ယောက်၏ အကွက်ချခြင်းကို ခံခဲ့ရသဖြင့်၊ အင်မော်တယ် ဝိညာဉ် အဆင့်မှ အကြီးအကဲ တစ်အုပ်စုတို့သည် စိတ်ဓာတ်ကျနေကြ၏။
ချောင်ဝေသည် ဘာမှမပြောနိုင်ခဲ့ပဲ အသံလွှင့်ကျောက်တုံး တစ်ခုအား ခြေမွလိုက်၏။ သူ၏ မှော်စွမ်းအင်ကို အသုံးချလိုက်ကာ ဝူချင်လျှိုနှင့် ဆက်သွယ်လိုက်သည်။
ဝူချင်လျှိုနှင့် အဆက်အသွယ် ရသောအခါ၊ သူက ဝေဖန်လိုက်သည်။ "ဒါက ခင်ဗျားပြောတဲ့ ပြောင်းလဲမှုတစ်ခု ဆိုတာလား?"
ဝူချင်လျှိုက တည်ငြိမ်စွာနှင့် ပြန်ဖြေလိုက်သည်။ "ဟင်၊ ချုံးချိမိစ္ဆာမျိုးနွယ်စုက လှုပ်ရှားခဲ့ပြီလား? သူတို့က ဘာနည်းလမ်းမျိုးကို အသုံးပြုခဲ့သလဲ?"
ချောင်ဝေက အေးစက်စွာနှင့် ပြန်ပြောလိုက်သည်။ "ခင်ဗျားက မသိဘူးလား?"
"ကျုပ်က သတင်းတော့ ရထားတယ်" ဝူချင်လျှိုက ပြန်ဖြေလိုက်သည်။ "ဒါပေမဲ့ ဒါက သူများ ပြောပြထားတာ။ အသေးစိတ်ကိုတော့ ကျုပ်က အသေအချာ မသိဘူး"
အချိန်ခဏတာမှ တွေဝေနေခဲ့ပြီး သူကဆက်ပြောလိုက်သည်။ "ကျုပ်က ဒီအကြံအစည်ကို အကောင်အထည်ဖော်တဲ့သူ မဟုတ်ဘူး။ အမှန်အတိုင်းပြောရရင်၊ ဘယ်သူက စတင်လှုပ်ရှားသလဲ၊ ဘယ်သူက ထောက်ပံ့နေသလဲ ဆိုတာကို မသိဘူး။ ကျုပ်က ဒီသတင်းကို ရထားသူ သက်သက်ပဲ"
ချောင်ဝေသည် အချိန်အတန်ငယ်မျှ ငြိမ်သက်သွား၍၊ အဖြစ်အပျက် တစ်ခုလုံးအား အသေးစိတ် ပြန်ပြောပြလိုက်သည်။
"အိုး? လက်စသတ်တော့ ကြယ်တာရာကိုးလုံး ကောင်းကင်ချေမှုန်း ဝင်္ကပါပဲ။ တကယ့်ကို အံ့အားသင့်ဖွယ် ကောင်းတာပဲ" ဝူချင်လျှိုသည် ထိုအဖြစ်အပျက်ကို စိတ်ဝင်စားနေခဲ့သည်။ "ဒါပေမဲ့လည်း၊ အံ့ဖွယ် ကောင်းကင်ဘုံဂိုဏ်း ခေါင်းဆောင်ရဲ့ စွမ်းရည်တွေကတော့၊ ကျုပ်ရဲ့ ခန့်မှန်းချက် အတွင်းမှာပဲ ရှိနေတယ်"
ချောင်ဝေက မျက်မှောင်ကြီးအား ကြုတ်လိုက်သည်။ "ခင်ဗျားက မိစ္ဆာမျိုးနွယ်စုတို့ရဲ့ တိုက်ခိုက်မှုကို အကြောင်းပြုပြီးမှ၊ လင်းဖုန်းရဲ့ စွမ်းရည်တွေကို ဖော်ထုတ်ချင်နေခဲ့တာလား?"
ဝူချင်လျှိုက ပြန်ဖြေလိုက်သည်။ "ဒါက အဓိက အကြံအစည် မဟုတ်ပေမဲ့၊ အကျိုးအမြတ်တော့ ရရှိခဲ့တယ်။ ကျုပ်အတွက်တော့ ကျေနပ်စရာပဲ"
သူက သူ့ကိုယ်သူ ရေရွတ်လိုက်၏။ "သူ့ရဲ့ဝင်္ကပါက လေဟာနယ်တွေကို တည်ငြိမ်အောင် လုပ်နိုင်တယ်။ အလယ်ကမ္ဘာတစ်ခုက ကြီးမားလွန်းတယ် ဆိုပေမဲ့၊ နယ်နိမိတ်က လေဟာနယ်တွေကို တည်ငြိမ်အောင် လုပ်နိုင်ဖို့ကတော့ အရမ်းကြီးမခက်ခဲဘူး"
"ဒါပေမဲ့ သူ့ရဲ့ ကောင်းကင် အကာအကွယ်ထီးက၊ ကြယ်တာရာကိုးလုံး ကောင်းကင်ချေမှုန်း ဝင်္ကပါကို ခုခံနိုင်တယ်ဆိုတော့၊ သူ့ရဲ့ အကန့်အသတ်က ဘယ်လောက်အထိ ရှိမလဲ?"
ချောင်ဝေက အသံပြတ်ပြတ်ဖြင့် ဖြတ်ပြောလိုက်သည်။ "ဒီအကြောင်းတွေကို နောက်မှပြောတာပေါ့။ ကျုပ်အခုသိချင်နေတာက ချုံးချိမိစ္ဆာမျိုးနွယ်စုကို၊ နတ်ဘုရားနယ်မြေ အတွင်းကို လွယ်လွယ်ကူကူနဲ့ ဝင်နိုင်အောင် ကူညီပေးခဲ့တဲ့သူကိုပဲ"
ဝူချင်လျှိုက ရယ်မောလိုက်၏။ "တကယ်လို့ ခင်ဗျားရဲ့ စွမ်းအားတွေဟာ အကြီးအကျယ် လျှော့နည်းသွားမယ်ဆိုရင်၊ အကျိုးအမြတ် အကြီးဆုံး ရမယ့်သူက ဘယ်သူဖြစ်မလဲ?"
"ကျုပ်ပြောပြီးသားပဲ၊ ကျုပ်က ဒီအစီအစဉ်မှာ ဘာမှမပါဘူး။ ကျုပ်က ဘေးကနေ ထိုင်ကြည့်နေတဲ့သူ သက်သက်တစ်ယောက်ပဲ"
ချောင်ဝေက ပြောလိုက်သည်။ "ခင်ဗျားက အခြေအနေ တစ်ခုလုံးကို သိနေတာတောင်၊ ဘာမှမကူညီပဲနဲ့ ဘေးကနေ စောင့်ကြည့်နေခဲ့တယ်။ ဘာဖြစ်လို့လဲဆိုတော့ ခင်ဗျားက ဒီကနေ အကျိုးအမြတ် ရနေနိုင်လို့ပဲ"
"ခင်ဗျားပြောတာမှန်တယ်" ဝူချင်လျှိုသည် တည်ငြိမ်စွာနှင့် ဝန်ခံလိုက်ကာ ရယ်လိုက်သည်။ "ဒါပေမဲ့ ဒီကိစ္စဟာ ခင်ဗျားတို့ တပည့်တွေပါ ပါနေတဲ့အတွက်၊ ကျုပ်က ကျေရာကျေကြောင်း လုပ်ပေးပါ့မယ်"
ချောင်ဝေသည် ငြိမ်သက်သွားခဲ့၍၊ သူတို့နှစ်ဦးအကြားမှ ဆက်သွယ်မှုကို ဖြတ်တောက်လိုက်သည်။ သူသည် အချိန်အတန်ငယ်မျှ စဉ်းစားလိုက်ပြီး၊ သူ၏အကြည့်ကို လင်းဖုန်းထံသို့ ပို့လိုက်သည်။ သူ၏ ခေါင်းအတွင်းတွင် အကြံပေါင်း မြောက်မြားစွာ ပေါ်လာခဲ့သည်။
လင်းဖုန်းသည်လည်း ခေါင်းအတွင်းတွင် အတွေးပေါင်း များစွာတို့နှင့် ပြည့်နှက်နေခဲ့သည်။ "ဒီစိတ်ဝိညာဉ် အစည်းအဝေးမှာ ပါဝင်ကြတဲ့ အဖွဲ့တွေဟာ၊ မဟာချင် အင်ပါယာရဲ့ တော်ဝင်မိသားစုတို့နဲ့ နီးကပ်တဲ့ ဆက်ဆံရေးတွေ ရှိကြတယ်။ ဒီလိုမျိုး ကိစ္စအကြီးကြီးကို လုပ်ဆောင်နိုင်တဲ့၊ သံသယဖြစ်ဖွယ် အုပ်စုသုံးစု ရှိတယ်။
"မဟာကျိုး အင်ပါယာ၊ မဟာချင် အင်ပါယာရဲ့ အခြားမိသားစုတွေနဲ့ တော်ဝင်မိသားစု ကိုယ်တိုင်ပဲ"
လင်းဖုန်းက သူ၏ မျက်ခုံးအစုံကို ပင့်လိုက်သည်။ "မေးရမယ့် မေးခွန်းက၊ ဝူချင်လျှိုက ဘယ်သူ့ဘက်မှာ ရပ်တည်နေတာလဲ?"
သူက မဟာချင် အင်ပါယာရဲ့ တော်ဝင်မိသားစုကို သစ္စာရှိနေတာလား၊ ဒါမှမဟုတ် လွှမ်းမိုးမှုရှိတဲ့ အခြားမိသားစုတွေဘက်ကို ပါနေတာလား?
ယခင်က ရှင်းယွင်တောင်ထိပ်တွင် ချုံးယွမ်မင်းသားအား မျက်နှာပျက်အောင် လုပ်ဆောင်ခဲ့ခြင်းသည်၊ သူ၏ ရည်မှန်းချက် အစစ်အမှန်လော၊ သို့မဟုတ် လှည့်ကွက်ဆင်နေသည်လော?
"ဒီနှစ်ခုရဲ့ အကြားက ကွာဟမှုဟာ အမတန်ကိုမှ ကြီးမားတယ်" လင်းဖုန်း သက်ပြင်းချလိုက်သည်။ "သူက တခြားမိသားစုတွေကို ထောက်ခံနေတယ် ဆိုရင်၊ သူက ရှီမိသားစုကို တိတ်တိတ်ကလေး ထောက်ပံ့ပြီး၊ ရှီထျန်းရီကို အလေးပေးလိမ့်မယ်။ ရှောင်ပုတန်က အနာဂတ်မှာ ရှီထျန်းရီနဲ့ ရင်ဆိုင်တဲ့ အခါမှာ၊ သူက ပြဿနာ အကြီးကြီး ဖြစ်လာလိမ့်မယ်"
"ဒါပေမဲ့ သူက တော်ဝင်မိသားစုဘက်မှာသာ ရှိခဲ့မယ်ဆိုရင်၊ သူက ရှောင်ပုတန်လေးအတွက် အကူအညီ ကြီးကြီးမားမား ဖြစ်လာလိမ့်မယ်။ ချင်ဧကရာဇ်ရဲ့ သဘောထားအရသာ လုပ်ဆောင်ရတယ် ဆိုပေမဲ့၊ ငါက ကိစ္စတော်တော်များများကို လွတ်လွတ်လပ်လပ် လုပ်ဆောင်လို့ ရလိမ့်မယ်"
လင်းဖုန်းသည် ခေါင်းများပူအောင် စဉ်းစားနေခဲ့သော်လည်း၊ အဖြေရေရေရာရာ ထွက်မလာခဲ့ပေ။ သူသည် ခေါင်းကိုသာ ခါလိုက်၍၊ အရာအားလုံးကို ယာယီ မေ့ဖျောက်ထားလိုက်သည်။
ကြယ်တာရာကိုးလုံး ကောင်းကင်ချေမှုန်း ဝင်္ကပါသည် ပြိုကွဲသွားကာ၊ ချုံးချိမိစ္ဆာ မျိုးနွယ်စုသည်လည်း ဆုတ်ခွာသွားပြီဖြစ်၍၊ ကျန်သောသူများသည် အတန်ငယ် စိတ်သက်သာရာ ရလာကြပြီ ဖြစ်သည်။ ရှီကျုံးယွဲ့သည် ရှေးဟောင်း ဟွမ်ဟိုင်ကမ္ဘာ အတွင်းတွင်၊ ပိတ်မိနေကြသော သူများအား ထွက်လာစေခဲ့ပြီ ဖြစ်သည်။
ကြယ်တာရာကိုးလုံး ကောင်းကင်ချေမှုန်း ဝင်္ကပါ၏ တိုက်ခိုက်မှုများအား ရင်ဆိုင်ခဲ့ရချိန်တွင်၊ သူတို့သည် ကာကွယ်မှုများ ခံနေကြရသည် ဖြစ်သည်။ အချို့သူများသည် သိပင်မသိကြပဲ ထွက်လာကြသည့် အချိန်မှပင်၊ ဘေးပတ်ဝန်းကျင်မှ အပျက်အစီးများကို ကြည့်လိုက်ကြကာ ကြောက်ရွံ့ထိတ်လန့် ကုန်ကြသည်။
ဤကပ်ဆိုးအပြီးတွင် ရှေးဟောင်း ဟွမ်ဟိုင်ကမ္ဘာသည် အလွန်အမင်း မတည်မငြိမ် ဖြစ်နေခဲ့သည်။ အကြီးအကဲများ အားလုံးတို့သည်လည်း အသံလွှင့်ကျောက်တုံးများကို အသုံးပြုကာ၊ သူတို့၏ တပည့်များနှင့် ဆက်သွယ်နေခဲ့သည်။
ရှေးဟောင်း ဟွမ်ဟိုင်ကမ္ဘာအတွင်းသို့ ရက်အနည်းငယ်မျှ ဝင်ခဲ့ကြရသော သူများမှာ၊ အချိန်အကန့်အသတ်ကြောင့် သူတို့ရရှိခဲ့သော အကျိုးအမြတ်များမှာ သိပ်မများကြသောကြောင့်၊ အနည်းငယ် မကျေမနပ် ဖြစ်နေကြသည်။
သို့သော်လည်း အံ့ဖွယ် ကောင်းကင်ဘုံဂိုဏ်းမှ တပည့်များသည် ရှေးဟောင်း ဟွမ်ဟိုင်ကမ္ဘာမှ ထွက်လာကြသောအခါတွင်၊ လင်းဖုန်းအား တွေ့လိုက်သောအခါ စိတ်ဓာတ်များ တက်ကြွနေကြသည်။
သူတို့နှင့် စတွေ့တွေ့ချင်းမှာပင် ရှောင်ပုတန်သည် သူ၏မှော်စွမ်းအင်ကို အသုံးပြုကာ၊ လင်းဖုန်းနှင့် ဆက်သွယ်လိုက်သည်။
"ဆရာခင်ဗျ၊ မုကျိဟိုင်က ကျွန်တော့်ကို တိတ်တိတ်ကလေး လုပ်ကြံဖို့ ကြိုးစားလို့၊ ကျွန်တော်က သင်ခန်းစာ ပြန်ပေးလိုက်တယ်"
Novel : History's Number 1 Founder
Author : August Eagle
Translator : Master Shifu