((((((سكة السلامة ))))))
#لولو_محمد
الحلقه الخامسة و الاربعون
محمد / انتى زعلتى انى قولت انك مش حلوه ليه انا مكدبتش
سندس متردش محمد يقرب خطوه
محمد / انتى مش حلوه يا سندس
سندس تبصله و هى مقفوله
محمد / انتى قمر
سندس تتفاجئ و بعدين تلم نفسها و عنيها فعنين محمد
سندس / رايك ميهمنيش انا عارفه انا ايه كويس
محمد / كويس
.................
ميرنا تدخل
ميرنا / انتى هنا و انا دايخه عليكى ازيك يا محمد
سندس / اتاخرتى
ميرنا / بصى انا على اخرى ماما نزلت كام يوم و مقولكيش نزلت بالعافيه اصلا
سندس / يابنتى احمدى ربنا
ميرنا/ الحمد لله بس على ايه على ام مبتفتكرنيش الا لما يبقى ليها مصلحه فى مصر
محمد / عن اذنكوا
محمد يمشى
ميرنا / كنت عوزاكى
سندس / خير
ميرنا / كريم
سندس / ماله
ميرنا / صدعنى بيقول انه عاوز يكلمك
سندس / يكلمنى بمناسبه ايه
ميرنا / متنسيش ان هو اللى ادخل فى الكليه
سندس / والله
ميرنا / يابنتى انتى بتقولى ايه يا سندس اى كان اللى عمله ميجيش حاجه جنب انه خلصك مالعيال دى
سندس / ماشى
ميرنا / اقوله انك هتكلميه
سندس / لا طبعا
ميرنا / امال ماشى ايه
سندس / انا مش فايقه دلوقت هنشوف الموضوع ده بعدين
سندس تدخل وسط الناس نرمين تشاورلها تروحلها
نرمين / بابا و ماما
سندس / اهلا نورتوا
نرمين / دى سندس اخت سلامه الصغيره بس بت ايه شرباااات
ام عبده / قمر ياخواتى
فتحى يهز راسه
سندس / عن اذنكوا
سندس تمشى و تروح تقف جنب ساره
سندس / دا ماله ده تحسى انه مضروب على قلبه كدا
ساره / دا عم محمد بس مقاطعهم
سندس / ليه خناقه على ورث لا ازاى و محمد موجود ملوش يورث اصلا صح
ساره / لا هو مش معترف باسلام من العيله اصلا و كمان عشان شوق كانت مخطوبه لعبده
سندس / نو واى
ساره / مالك فى ايه
سندس / انا لازم امشى نسيت حاجه يلا سلام
ساره / حاجه ايه يا مجنونه
سندس / بعدين بعدين
الناحيه التانيه شوق واقفه مع عبده
عبده / مبروك الشركه
شوق / الله يبارك فيك سمعت انك خطبت
عبده / سمعتى غلط انا اتقدمت بس لواحده ورفضتنى
شوق / متزعلش انت الكسبان
عبده / تسلمى
مصطفى يدخل
مصطفى / احنا ماشيين بقى
شوق / ليه لسه بدرى استنوا شويه
مصطفى / اتاخرنا معلش انتى عارفه محمود بينام بدرى
شوق / لا بجد مينفعش اصلا سلامه مش هيخليكوا تمشوا من هنا
سندس تدخل
سندس / محمد بيدور عليك يا عبده
عبده / فين حاضر هروحله
سندس / انتى يا كلبه ليه مقولتليش ان عبده كان خطيبك
سندس تبص لمصطفى بطرف عنيها تلاقيه متفاجئ تعمل ولا على بالها
شوق / سندس
سندس / انا كدا فهمت هو بيعمل كدا ليه من ساعه مجه
شوق / نتكلم بعدين يا سندس بعدين
سندس / اوووه سورى مختش بالى انك واقف يا مصطفى معلش الحماسه بقى عن اذنكوا
مصطفى يهز راسه و سندس تمشى و شوق هتطق صمت ثوانى
شوق / بيقطعوا التورته اهو خليكوا على الاقل لبعد البوفيه
عبده يرجع
عبده / مكنش بيدور عليا و لا حاجه مش عارف يمكن هى فهمت غلط
مصطفى / عن اذنكوا
مصطفى يمشى
.........................
فى اوضه سندس بالليل
نرمين / ياربى انا تعبت اوى اوى
سندس / انا عن نفسى انبسطت
نرمين / اه والله معاكى حق احلى فرح احضره فحياتى
سندس / عقبالك
موبايل سندس يرن
نرمين / مين
سندس / دا محمد .... الو نعم عاوز ايه بتتصل بيا متاخر ليه
محمد / وحشتينى
صمت ثوانى
محمد / ههههههههههههههههههههههه هكون بتصل ليه يا هبله يعنى كنت عاوز اسال على حاجه
سندس / والله انا لو شوفتك
محمد / هتعملى ايه يعنى هتعطسى فوشى تعدينى
سندس / نام ياله اتخمد نام بقى نام ....اوووووف
سندس تقفل السكه
نرمين / هو انتوا على طول كدا
سندس / على طول ايه
نرمين / كدا ناقر و نقير دانا من ساعه مجيت مشوفتكوش غير و انتوا بتتخانقوا
سندس / من يوم معرفته و احنا كدا سبحان الله حب كدا لله فلله مش عارفه فاضل ايه
نرمين / هههههههههههههه تولعوا فى بعض
سندس / قريب ان شاء الله
نرمين / يا شيخه تفى من بقك بعد الشر
سندس / نامى يا بت انتى كمان
نرمين / نمت
..................
فى اوضه شوق
شوق تنام تجيلها رساله عالواتس تفتحها
مصطفى / نمتى
شوق / لا صاحيه
مصطفى / ممكن اتصل و لا الوقت مش مناسب
شوق / خير فى حاجه
مصطفى / احسن لو فى التليفون
شوق تتصل يفتح
شوق / خير قلقتنى فى حاجه حصلت فى الشركه
مصطفى / لا الحقيقه هو الموضوع ملوش علاقه بالشغل بس مش عارف انام
شوق / بتهزر صح
مصطفى / معلش متعتبريهوش تطفل بس هو مين عبده ده
شوق / عبد الهادى ابن عمى ؟؟؟
مصطفى / اه هو مين
شوق / ابن عمى
مصطفى / لا عارف يعنى انا بسال عن
شوق / ليه
مصطفى / اعتبريه فضول مقولتليش انك كنتى مخطوبه
شوق / دا كان من زمان اوى
مصطفى / على اساس ان عندك كام سنه اصلا
شوق / كان عندى ستاشر ايامها اتخطبنا كام شهر و بعدين محصلش نصيب و من يوميها تقريبا مشفناش بعض
مصطفى / و ايه اللى رجعه
شوق / ههههههههههههههههه فرح بنت عمه ايه مش عاوزه يحضر و لا ايه
مصطفى / لا ازاى طبعا مقصدش
شوق / تصبح على خير يا بشمهندس
مصطفى / و انتى من اهله
مصطفى يقفل
مصطفى / ايه اللى انا هببته ده
........................
فى الفيلا تانى يوم
ام عبده / يعنى انت متقدرش تكلمه فى حاجه زى دى بعيد عن عمك
محمد / هو اصلا مش هيرفض و مش محتاج حد يكلمه
ام عبده / بتقول ايه يا محمد مانت عارف الظروف
محمد / مفيش ظروف و لا حاجه عبده ملوش دعوه
ام عبده / يا سلام وحوار شوق
محمد / خلاص يا عمتى سيبى الموضوع عليا انا هكلم سلامه
فتحى بعيد
فتحى / انتوا هتفضلوا واقفين بعيد كدا متيجوا تفطروا
ام عبده / جايين ياخويا جايين
عالاكل اسلام ينزل من فوق و يقعد
ناهد / صباح الخير يا قلب تيته
اسلام يبوس ايدها
اسلام / صباح النور يا تيته صباح الخير يا جماعه
الكل يرد صباح النور ماعدا فتحى اسلام تجيله رساله على موبايله يقراها و يبص لمحمد يغمزله اسلام يهز راسه اه
اسلام / صحيح يا عبده انك سبت الشغل
عبده / اه
اسلام / طب لو كنت لسه بتدور على شغل يعنى
فتحى / كتر خيرك عبده هيدور على شغل
ساره / و ليه يدور يا عموا مهو الشغل موجود فعلا
نرمين تنزل هى و سندس و هما بيدحكوا سندس تبوس اسلام من خده و تروح تقعد
نرمين / صباح الخير
اسلام / صباح النور
سندس / انا منمتش طول الليل
اسلام / و مين سمعك و لا انا معرفتش انام و البت حنان مش موجوده
فتحى / كنت عاوزها تفضل قاعده جنبك لحد امتى مش كفايه اختها
شوق تنزل من فوق
شوق / صباح الخير
اسلام / صباح النور تعالى ..... اختها عندك اهى اسالها هو انا مش عاوزك تتجوزى
شوق / ههههههههههههههههههههه مين قال كدا دانا من يوم موعيت عالدنيا و انت مبتقولش غير امتى تتجوزى بقى عشان تنزلى من على ودانى
اسلام / شوفت
فتحى/ انا شبعت الحمد لله لما تشبعى يام عبده اطلعى لمى الحاجه عشان نمشى
شوق / ملسى بدرى يا عمى
فتحى ميردش و يقوم
اسلام / فكر يا عبده و دور و لو ملقتش تعال و متتكسفش الشركه كبيره و نقى الوظيفه اللى تعجبك
سندس / و لو يعنى عموا مش عاوزه يشتغل مع اسلام ممكن مع شوق
شوق تشرق
سندس / قصدى مع البشمهندس مصطفى يعنى اكيد محتاجين
ام عبده / والله فكره ينفع يا شوق يابنتى
شوق / طبعا يا عمتى هو احنا نطول
شوق تبص لسندس تلاقيها بتدحك
سندس / انا شبعت هنزل الجيم تعالى يا نرمين اما افرجك
نرمين / انا لسه باكل
شوق /انا كمان شبعت
ناهد / هو فى ايه كل واحد ياخد لقمه و يقوم
محمد / تلاقى عشا الفرح لسه كاتم على نفسهم ههههههههههههههههههه
ناهد / هتروح لحنان امتى يا اسلام
اسلام / على خمسه كدا يا تيته لو يناسبك
ناهد / و انا ورايا ايه غيركوا يابنى
........................
فى الجيم
شوق / بطلى جرى و فهمينى
سندس توقف التريدميل و تنزل
سندس / فى ايه مش شويه الشطه اللى رشتهم امبارح جابوا نتيجه و انتى لسه قايله بنفسك
شوق / تقومى تولعيها حريقه
سندس / ليه يعنى
شوق / جنانك ده هيودينى فداهيه
سندس / يابنتى بتقولى ايه
شوق / بس انتى و نرمين اتصاحبتوا اوى
سندس / دى زى العسل دمها خفيف جدا
شوق / ربنا يهدى المهم انا هروح بقى عشان اطمن على الفطار بتاع العرسان
سندس / هما لحقوا يخلصوا العشا بتاع امبارح
شوق / خليكى انتى فى الجرى بتاعك
سندس / احسن احسن يلا امشى
..........................
فى الكليه بعد فتره
سندس/ دا تالت اسبوع متدخلش محاضره ابيه
محمد / انتى عداهم
سندس / اه عداهم
محمد / متشغليش بالك انتى
سندس / فى ايه يا محمد مش هتيجى فى الاخر و تخيب
محمد / طردنى مالمحاضره و قالى متحضرليش تانى
سندس / خلاص محلوله
محمد / انا مقولتلكيش عشان متطلبيش منه حاجه
سندس / بقولك ايه ابيه مهاب مبيرفضليش طلب و دى حاجه بسيطه
محمد / ابيه مهاب
سندس / انا مش عارفه اكرهه يا اخى انت و اسلام مش بتطيقوه بس مليش انا دعوه انا اه ممكن اشد معاه ازعل منه بس هو فى الاول والاخر فاميلى يعنى
محمد / حتى بعد اللى عمله مع ساره
سندس / هو برده جوز فريده و انا بسببه عمه و غلاوته من غلاوه طارق
محمد / تشلى
سندس / ميرسى ههههههههههههههههههه
..................
فى الفيلا فى الجنينه
اسلام / ها يا وحش ناوى على ايه
محمد / فى ايه
اسلام / كلها تلت شهور و تتخرج انا فاكر اننا اتكلمنا فى الموضوع ده قبل كدا دانا قولت زمانك محضر مليون فكره هتعمل ايه يابنى فى باقى حياتك
محمد / مفيش حاجه فدماغى
اسلام / ده شيك بنفس المبلغ اللى اديته لشوق فى الشركه و نفس المبلغ حطيته فلوس فحساب حنان فى البنك نقى مشروع و ابدء فيه عشان تتخرج تلاقيه و اسمع عشان انا عارفك لو مكفاش تيجى فاهم
محمد / اجى فين دا كتير اوى
اسلام / مفيش حاجه تكتر عليك ياله يلا اخلع بقى ساره جايه
محمد / انت ايه حكايتك
اسلام / متغور يلا بدل
محمد / خلاص خلاص اتوزعت
محمد يمشى يسلم على ساره فى السكه و تدخل
ساره / انا جاهزه يلا
اسلام / طبعا اتفضلى
ساره و اسلام يمشوا يوصلوا لباب الفيلا مهاب داخل هو و فريده
فريده / انتوا ماشيين و لا ايه
ساره / اه
مهاب / على فين
اسلام / سينما فى فيلم حلو اوى متيجوا
فريده / لا ربنا يوفقكوا انتوا انا يادوب اخد الشاور بتاعى و انام
مهاب / معلش حكم السن بقت زى الفراخ
فريده / باك باك كاك
الكل يدحك ماعدا مهاب
ساره / يلا
مهاب / هتتاخروا
اسلام / غالبا اه متستنوناش يلا سلام
ساره و اسلام يمشوا و مهاب واقف بيطرقع فى صوابعه
فريده / لايقين على بعض اوى
مهاب يبصلها
فريده / شهر بالكتير و هتلاقيهم مخطوبين و بكره تقول فريده قالت
مهاب / اطلعى نامى يا فريده نامى يا حبيبتى
فريده / تصبح على خير يا حبيبى
سندس تدخل
سندس / ازيك يا ابيه
مهاب / ازيك يا روح ابيه
سندس / مخصماك على فكره
مهاب / و انا اقدر
سندس / انت صحيح طردت محمد من المحاضره و قولتله ميحضرلكش تانى
مهاب / هو اشتكالك
سندس / لا طبعا محمد مقالش حاجه
مهاب / محمد ده خاب كان زى الموس لما كان شحات لكن دلوقت الفلوس خيبته
فريده / بالعكس انا شايفه انه ركز اكتر على مزاكرته و مستواه اتحسن جدا و غالبا هيرتب الترم ده
مهاب / بيتهيالى ان اى طالب عندك بتطرديه مالمحاضره اقل اصول الزوق انه يجى يعتزر بعدها
فريده / حصل خير فى الاول و الاخر محمد فاميلى
مهاب / عشان خاطركوا بس
سندس / ميرسى يا ابيه انا كنت متاكده انك مش هتكسفنى عن اذنكوا
.......................
فى اوضه محمد محمد قاعد عاللاب سندس تدخل و هى مشغله اغنيه انا حلوه و عارفه حالى سميره توفيق و مندمجه اوى يقفل اللاب و يحط ايده تحت خده لحد متوصل عنده
محمد / من امتى ده
سندس / من يومى
محمد / هههههههههههههههههههه يابنتى انا بسال من امتى بتسمعى قديم يعنى
سندس / مكنتش اعرف ان فى زمان اغانى حلوه كدا كنت فكراهم مملين بس طلعوا دماغ والله عجبتنى
محمد / يا شيخه
سندس / انا حلوه و عارفه حالى انا اقوى من الليالى ياما قبلك ناس حبو يجربوا شربوا مر الكاس و لسه بيشربوا
محمد / عارفها البت شوق بتحبها
سندس / اه مانا سمعتها منها عجبتنى ... خليك عنى بعيد لعبك مش هيفيد انا قلبى حديد ميخفش من الحب ابدا
محمد / انتى عاوزه ايه
سندس / متجربش توقعنى انا نار و فاهم يعنى راح تسهر عنيك و الحب يعزبك راح تحرق ايديك و نارى تلهلبك
محمد/ انتى فاضيه صح
سندس / اه وزهقانه قوم نعمل اى حاجه
محمد / ايوه بس انا مش فاضى
سندس / وراك ايه البيه وراه ايه
محمد يحط الشيك فى ايدها و يفتح اللاب
سندس / الف مبروك ايه ده
محمد / سلامه اداهونى افتح مشروع
.............................