(((((((سكة السلامه )))))))
#لولو_محمد
الحلقه الثانيه و الستون
اسلام / انا بقول كفايا لعب النهرده و نسيبكوا تنامى انا و محمد هنبقى عالباب لو احتجتوا حاجه
سندس / ليه متخليكوا انا هتاخر شويه لساره تنام جنبى و انت احشر محمد جنبك فى اى حته
اسلام / ههههههههههههههه لا عشان تاخدوا راحتكوا
اسلام يقوم يبوس راس سندس و يبتسم لساره و يطلع محمد يبتسم للاتنين و يطلع
ساره / مفتكرش هيجى عليا وقت و ابقى مش محتاجالك فيه هاه ؟؟؟
سندس / زى بالظبط مهفضل طول عمرى محتاجالك انتى و اسلام
ساره / ماشى يا ستى تصبحى على خير
ساره تقوم تنام عالكنبه
..........................
تانى يوم الصبح الدكتور يدخل يبص على سندس
الدكتور / الحمد لله كلو تمام
اسلام / تقدر تخرج امتى
الدكتور / حالا لو تحبوا
سندس / ياريت
الدكتور / تمام حد يعدى بس عالحسابات و تقدروا تروحوا
الدكتور يطلع
اسلام / هروح انا للحسابات
اسلام يمشى و ساره تلم الحاجه و محمد يساعدها
........................
فى الفيلا اسلام يدخل هو و ساره مسندين سندس و محمد يدخل وراهم شايل شنطه سندس
سندس / انا بعرف امشى
ناهد / سلامه قلبك يا حبيبه تيته
سندس تقعد جنب ناهد حنان تدخل و باين على وشها التعب محمد يجرى عليها يحضنها
حنان / ازيك يا سندس مالك فى ايه هى مالها
اسلام / حنان انا عاوزك ثوانى
.............................
اسلام ياخد حنان المكتب و محمد يدخل وراهم و يقفل الباب
محمد / مالك يابت شكلك مش مظبوط
حنان تفتح فى العياط
اسلام / حمدى عملك حاجه زعلك فى ايه انطقى متقلقنيش عليكى
محمد / انا هتصل بيه
اسلام / استنى اما نفهم منها الاول اتكلمى يا حنان عملك حاجه ضربك
حنان / لا
محمد / شتمك جاب سيره حد من اهلك
حنان / حمدى معملش حاجه
اسلام / طب الحمد لله امال مالك بقى الحمل تاعبك نروح مستشفى
حنان / لا
محمد / امال مالك يا بت متجننيش امى معاكى فى ايه
اسلام / اطلع بره ياله اطلع بره
حنان / انا تعبانه اوى يا سلامه تعبت و جبت اخرى
اسلام / طب احكيلى انا اخوكى يابت احكي
حنان / بص انا مكنتش عاوزه اتكلم بس مش لاقيه حل
محمد / احكى يا بنت ابويا احكى و متخافيش
حنان / بص انا من يوم متجوزت حمدى مشوفتش منه حاجه الشهاده لله
محمد / الحمد لله
حنان / انت عارف ان حمدى بيسهر فى القهوه و امه بتنام بدرى كل يوم الصبح مالنجمه تصحى و تطلع تخبط علينا اقوم انا افتح و احضر الفطار و بعدين اصحيه
اسلام / عداكى العيب
حنان / هو ينزل و انا استلم البيت كلو تنضيف و تنفيض و اكل و غسيل
محمد / و البيت كله له مكفايا عليكى شقتك
اسلام / ثوانى يا محمد كملى
حنان / لو على شغل البيت العادى اقول ماشى مقدور عليه مهو يعنى مش كل يوم بيلحق يتوسخ لكن اللى زاد و غطى لمه الستات حماتى متعوده من يوم محمايا مات انها تفتح بيتها للجيران يقعدوا طول اليوم صبح و ليل دى داخله و دى خارجه دى داخله و دى خارجه
اسلام / هى حره فبيتها
حنان / فبيتها مش فشقتى و افضل طول اليوم بعمل فشاى و اغسل فمواعين دا صينيه الكيكه مبتباتش يا سلامه بعملها حمدى مبيدوقش منها حته
اسلام / ايه الهبل ده و حمدى عارف
حنان / فى الاول قولت امه و زى امى و ست كبيره و كلو بثوابه بس الحمل زاد عليا ببقى بنام و انا قاعده بيبقى نفسى افرد ضهرى شويه مش قادره فاشتكيت الشهاده لله كلمها
اسلام / عداه العيب
حنان / مسكتنى امبارح اول منزل و مسحت بيا الارض صعبت عليا نفسى دخلت اوضتى و قفلت عليا الباب و بقيت سمعه شتيمتى بودانى
محمد / نعم ليه ان شاء الله ملكيش اهل متصلتيش بينا امبارح ليه كنا جينا
اسلام / رديتى عليها
حنان / ابدا وربنا
محمد / هو ايه اللى رديتى و مردتيش بتقولك هزقتها
اسلام / مدام مردتش يبقى الغلط من عندهم لو كانت ردت كانت شالت الليله يا ذكى افهم و مدام مردتش يبقى لينا حق متصلتيش امبارح ليه
حنان / فى الاول كلمت حمدى و سمعته الكلام طلع يجرى و نزلها تحت و طلع راضانى بكلمتين قولت خلصت النهرده اول منزل طلعتلى و قالتلى كلام اللعن ماللى قالته امبارح بتقولى انا لو عاوزه هبدلك و اجيب ست ستك بتقولى انى بايره و بتقولى متتغريش فى الفلوس مفيش اكتر من الستات فى محاكم الاسره
محمد / هى حصلت
حنان / انا مستنتش حمدى انا دخلت حطيت العبايه عليا و ركبت التاكس و جيت مكنتش اعرف ان فى هنا ظروف هى سندس مالها
اسلام / سندس كويسه خلينا فيكى انا هكلم حمدى و اجيبه اطلعى اوضتك و نامى و افردى ضهرك و ارتاحى و حقك هيجيلك
حنان / انت هتعمل ايه
اسلام / متشغليش بالك انتى انا عارف ان حمدى ملوش ذنب بس انا مجوزتكيش لامه لو مش قادر يحميكى يقول و انا اتصرف اطلعى انتى بس
حنان تطلع و اسلام يطلع التليفون و يتصل
اسلام /ازيك يا حمدي
حمدي / كنت مستنيك وصلت بالسلامه؟؟
اسلام / انت بتقولي انك موصلتهاش كمان
حمدي / دا علي اساس انها قالتلي انها خارجه اصلا
اسلام / و انت مشوفتهاش و هي نازله دا البيت فوش القهوه
حمدي /شوفتها
اسلام / انا مستنيك في الفيلا
حمدي / انا جاي
اسلام يقفل
محمد / انا مش مصدق بصراحه
اسلام / بيحصل اكتر من كدا اطلع نام لحد ميجي انت منمنش من امبارح
محمد / و انت اللي نمت
اسلام / هنام لما اخلص مالهم اللى انا فيه اكيد هنام
محمد / اللى احنا فيه انا هطلع ابص على حنان و لما يجى نادينى
اسلام / تمام اطلع
..............................
فى اوضه حنان حنان قاعده عالسرير و البنات حواليها شوق و سندس و ساره و اميره
شوق / انتى تستاهلى مليون مره قولتلك ان طيبتك دى هتخليها تركبك
ساره / لا يا شوق حنان اتصرفت صح
شوق / يا سلام المعامله الحلوه دى مع جوزها لكن الحماه معروفه يا جماعه
سندس / تعرفى تسكتى
شوق / اعرف
سندس / بصى يا نونو انا شايفه يعنى ان مدام هو كويس معاكى خلاص
اميره / الله ايه الجمال ده
سندس / انتى بتالسى
اميره / ابدا بالعكس انتى معاكى حق
شوق / دا لو هى عايشه فبيتها
سندس / و هى فعلا فبيتها و حماتك ضيفه و انتى احسن واحده تكرم ضيوفها و لا ايه
محمد يجى يفتح الباب يسمع سندس بتتكلم
سندس / بصى انا عارفه ان الكلام اللى قالته حماتك وجعك بس بى ريل يعنى هى متقدرش تعمل حاجه حمدى بيحبك انتى و وقف معاكى فعلا قدامها و هى قالت ده لانها بتغير على ابنها الوحيد
شوق / بس مش من حقها تقول كدا انتى ترضى ان حد يقول عنك كدا
سندس / انا مينفعش يتقالى كدا اصلا لان اكيد كل ام تتمنى تجوزنى لابنها يعنى معروفه جدا يعنى
محمد يدحك و ميقدرش يمسك نفسه و يدخل
محمد / على يدى
سندس / خضتنى
شوق / هو سلامه هيضرب حمدى
حنان تنتبه
سندس / انتى هبله على فكره اكيد لا يعنى احنا فى انهى عصر هنا
محمد / انتى متعرفيش اسلام صح
ساره / انا متاكده انه هيتعامل مع الموضوع بشكل ناضج عن كدا اكيد الضرب مش هو الحل
حنان / انتوا متعرفوش سلامه مبيستحملش علينا الهوى
ساره / ايوه بس حمدى ماذكيش بالعكس و بيتهيالى تعامله مع طارق و اميره انسب مثال
اميره / معاكى فى الحته دى
محمد / خلاص هضربه انا ... لو ده هيريح اختى طبعا
محمد يغمز لحنان و حنان تبص الناحيه التانيه و هى بتدارى دحكتها و كسوفها
سندس / ايوه بقى
ساره / صحيح بما ان كلنا هنا
ساره تطلع صوره عروسه محمد من شنطتها
ساره / ايه رايك يا حنان
حنان / ما شاء الله تبارك الله مين دى
محمد / عروستى
حنان و شوق يبصوا لمحمد باستغراب و سندس باستهزاء
سندس / ريلى
محمد / ايه بكدب
سندس / كنت فاكره اننا اتكلمنا فى الموضوع ده
محمد / اه و اتفقنا انى هشوفها
سندس / انا متاكده ان الموضوع فاكس يعنى شوفت اللى جرالى لما فتحنا السيره اصلا تخيل بقى لو مشينا فيها
محمد يقرب من سندس و يحط عينه فعينها
محمد / ميمكن ده انتقام ربنا عشان شردتى البت
سندس / انا قولت رايى بصراحه متنفعش
حنان / ليه يا سندس
ساره / بنت ناس و محترمه و متفوقه فى دراستها
سندس / بتعرف تعمل محشى
محمد / بما انك اتعلمتيه فاكيد اى واحده ممكن تتعلمه
سندس / انك تقارنى باى بنت ده اكبر اهانه ليا
شوق / انتوا بتتخانقوا على ايه دى قمر
ساره / يعنى هتشوفها يا محمد
محمد / كنت هشوفها كدا كدا اصلا فى كتب الكتاب
حنان / صحيح كتب الكتاب
ساره / انا و اسلام اتفقنا هناجله لبعد الافتتاح الخميس الجاى ممكن الخميس اللى بعده
حنان / مفتكرش اسلام هيصبر اسبوعين
البنات يدحكوا و ساره تنكسف
محمد / ممكن تخليكوا فيا انا
سندس / مستعجل اوى حضرتك
محمد / البنات الحلوه مبتقعدش
سندس / فدى معاك حق مبيقعدوش فخد بالك بقى لحسن تطير منك
محمد / شكرا هاخد بالى
سندس تسيبهم و تمشى
شوق / هى راحت فين
ساره / هروح اشوفها
محمد / لا هروح انا خليكوا مع نونو
....................
فى اوضه سندس
محمد / مش عيب تمشى و تسبينا
محمد يلاقى سندس ماسكه السلسله مقطوعه يقطع كلامه
سندس/ عاوزه اخدها اصلحها
محمد / حاضر
سندس / ساعات بحس ان السلسله دى بتحمينى
محمد يقعد جنبها و يمسك ايدها
سندس / تفتكر فعلا حصلى التسمم عشان زعلت نرمين
محمد / ههههههههههههههههههه انتى عسل اوى
سندس / بطل بقى
محمد / انا هصلحهالك خليها معايا
سندس / هترجعهالى تانى ؟؟؟؟؟
محمد / اكيد
سندس / اوعدنى
محمد / اوعدك السلسله دى مش هسمح لحد يلبسها غيرك و دا وعد منى
سندس تبتسم و محمد يبتسم و بعدين يتاوب
محمد / انا حقيقى محتاج فنجان قهوه دوبل تقيله جدا
سندس / طب متنام
محمد / مش لما اطمن على حنان الاول
سندس / حنان و حمدى بيحبوا بعض انا متاكده انهم هيتصالحوا
محمد / بس زعلت لما شوفتها كدا يعنى دى اختى
سندس / يا بختها
محمد يبصلها
سندس / تفتكر انا فى حد هيتاثر لو شافنى زعلانه
محمد / زى القطط تاكلوا و تنكروا
سندس / ايه
محمد / انا متشقلبتش هناهوه عشان شوفتك زعلانه مجتش وراكى لحد اسكندريه عشان شوفتك زعلانه تحبى اعدلك هاه
سندس / دى حاجه و دى حاجه
محمد / متقومى كدا تتحركى و تعمليلى نسكافيه ينوبك فيا ثواب
سندس / من عنيا
محمد / بجد انا قولت اغير الموضوع و تتخانقى معايا و تقوليلى هو انا كنت خدامتك اقولك انتى تطولى و كدا يعنى
سندس / و انت هتروح منى فين ملحوقه هعملك نسكافيه و هاجى
محمد / مش هروح فحته
سندس تمشى و محمد يطلع الموبايل يلعب فيه شويه و يفرد ضهره عالسرير و شويه و الموبايل يقع من ايده و ينام سندس تدخل بالمج تلاقى محمد نايم تشيل الموبايل من جنيه و تقفله و تغطيه و تطفى النور و تاخد المج و تمشى
.................................
في المكتب حمدي يدخل و اسلام ماسك الموبايل يقوم يحضنه
اسلام/ منور
حمدي / منور باهله هي فين؟؟
اسلام / بترتاح هبقي اناديها لما نخلص كلامنا
حمدي / قول
اسلام / اسمع منك يا صاحبي ايه في الدنيا يخلي اختي تجيلي معيطه
حمدي / امبارح اتخانقت هي و امي بس الموضوع خلص و نمنا متراضين و صحيت فطرت و نزلت القهوه و مفيش ساعه الاقيها نازله
اسلام / مجاش فبالك تجري وراها تسالها في ايه
حمدي / حط نفسك مكاني
اسلام / مانا حاطت هو انا لو مكنتش عارف و مقدر موقفك كنت خدت و اديت معاك دانا مديك الغاليه حنان يا حمدي حنان مش اي حد
حمدي / و انا مقصرتش و اسالها هاتها و اسالها طلبت مني حاجه و اخرتها تقول بس عمري قصرت عمري غلطت فحقها
اسلام / امك غلطت فيها بتقولها..
حمدي / ميهمنيش اعرف
اسلام يرفع حاجبه
حمدي / دي امي يا سلامه امي هعمل ايه يعني انا طلبت من امي انها متطلعش فوق و اني كل يوم هعدي و انا طالع و انا نازل مطلوب مني ايه اكتر من كدا انا قولت لحنان ست كبيره و فوتيلها
اسلام / البت حامل يا حمدي الحامل محتاجه راحه
حمدي / متاخرتش وربنا دانا غسلت المواعين يا جدع
اسلام يدحك و يداريها
حمدي / اقولك ايه يعني اعمل ايه قولي انت لو مكاني تعمل ايه قولي و انا هعمل
اسلام / اي حاجه اللي يهمني ان اختي متجيليش معيطه تاني .. بيت اخوها مفتوح فاي وقت و لو مشلتهاش الارض اشيلها جوه عنيا بس متعيطش يا حمدي
حمدي / انت هتوصيني عليها مانت عارف انا بحبها قد ايه بس انت عارف ان حوار الحما و مرات الابن فكل بيت اعمل ايه
اسلام / بص الست الوالده علي راسي هي برده قاعده لوحدها و الستات داخله خارجه و بيتكوا طول عمره بيت كرم بس مش علي حساب اختي
حمدي / مانا طلبت من امي متطلعلهاش اطلب من حنان انها متفتحش لامي يعني
اسلام / لا انا عندي فكره احسن انا هجيب واحده تساعد حنان في البيت تاخد بالها مالست الوالده و تشرف علي طلباتها
حمدي / و انا مش هقدر اتكفل ببيتي و لا ايه؟؟ انا عرضت الموضوع فعلا علي حنان و رفضت بتقولي عاوزني ادخل بيتي واحده عشان تتجوزها عليا في الاخر
اسلام يدحك بصوت عالي
حمدي / انت بتدحك
اسلام / اعمل ايه يعني
حمدي / بتسالني مانا في الهم ده من امبارح وربنا منمتش طول الليل مالتفكير فحل بس اعمل ايه مش عارف
سندس تدخل
سندس / هاي حمدي سوري يا اسو
اسلام / اسو !!!
سندس / بدلعك سوري مكنتش عارفه ان عندك حد
حمدي / حلو اسو
اسلام / خليك فبلوتك
سندس / صحيح انا عندي حل
حمدي / ابوس ايدك اللحقينا
سندس / هما فكرتين الاولي ان حنان تشتغل فمتبقاش موجوده في البيت معظم الوقت بس بما انها حامل و تعبانه ففاكس الفكره التانيه ان مامتك تتجوز
اسلام / بره
سندس /انا بتكلم ان
اسلام / برررره
سندس / حاضر الواحد ميعرفش يساعد ابدا
سندس تطلع و صمت ثواني
اسلام / هي عندها وجهه نظر
حمدي / انت اتهبلت يا اسلام اجوز امي
اسلام / ههههههههههههه انت فهمت ايه اقعد يا عم مقصدش لا طبعا اقعد اقعد
حمدي / مانت جايبنى تهزاني بقي
اسلام / يا حمار اسمع هي قالت ان الخناق انهم طول الوقت قدام بعض احنا نفصل القوات
حمدي / مكل واحده فشقتها و متقولش انقل حنان بيت تاني بعيد عن امي انا وحيد امي و اكيد هتزعل
اسلام / لا احنا هنبعد امك هنخليها تشتغل هتفتحلها مشروع تديره
حمدي / انا ماشي
اسلام / اسمع يا اهبل مامتك ست طيبه و الناس كلها بتحبها و حنان مشتكتش منها بس اشتكت انها مبتلاقيش وقت ترتاح دا عشان الست الوالده فاضيه و قاعده و لمه الجيران فاحنا نضرب عصفورين بحجر نفتح للست الوالده مشروع يشغلها و اللمه تبقي بعيد عن البيت ايه رايك
حمدي / لا ياعم شوف فكره تانيه
اسلام / فكر فيها و دورها فدماغك و شوف راي الحجه و بعدين قرر
حمدي / اصل امي هتشتغل ايه يعني
اسلام / اي حاجه نفتحلها محل هدوم هدوم عيال مثلا اهو في نونو جاي لعب اطفال بلاستيكات هدوم حريمي ان شالله مول بحاله
حمدي/ مش مقتنع
اسلام / المحلات تحت البيت بتتشطب انا هكتبها باسم حنان و باقي البيت باسم محمد ماعدا اول شقه شركه بين البنات انا هشطب المحلات علي سنجه عشره و شوف الحجه هتقرر تتاجر فايه و انا هفرش المحل عالمفتاح هديه مني لحنان
حمدي / مش حل ده
اسلام / فكر و رد عليا يوم الخميس فالافتتاح بتاع محمد انت جاي صح
حمدي / ياعم و من النهرده للخميس هعيش ازاي
اسلام / ههههههههههه اطلع صالحها ياعم دانت لا جاي بورد و لا شيكولاته و لا نيله من يومك اهبل
حمدي / تروح معايا بس و هتشوف هراضيها ازاي
اسلام / تعال معايا هطلعك ليها
......................
فى اوضه حنان اسلام يدخل
اسلام / حمدى بره عاوز يدخل
شوق تقوم تجيب عبايه من بتوع حنان و تلبسها و تغطى شعرها
اسلام / انا بقول نسيبهم لوحدهم احسن
ساره و اميره و شوق يطلعوا بره و اسلام يروح يقعد جنب حنان
اسلام / هو عاوز يراضيكى لو انتى عاوزه تتراضى يعنى ؟؟؟ بس لازم تعرفى انك غاليه و ان البيت ده مفتوحلك فاى وقت فلو مش عاوزه تروحى معاه انتى منوره هنا بس لو سالتينى هقولك ان الواد ده بيحبك و اسمعيله المشاكل عمرها مبتتحل كدا لازم تتكلموا
حنان تبصله و هى ساكته
اسلام / ادخله و لا اقوله نامت و فوت علينا بكره
حنان / دخله
اسلام / تمام
اسلام يطلع و حمدى يدخل و حنان تبصله بحزن و اسلام يقفل الباب
حمدى / روقتى شويه
حنان تبصله فى صمت يروح يقعد جنبها و يستغطى معاها
حمدى / حلوه الاوضه بس على فكره اوضتنا احلى
.............................
YOU ARE READING
سكه السلامه بقلم / لولو_محمد (كامله )
Romanceشاب فقير يجد اهله الاثرياء بعد غياب عشرون عاما ليجد نفسه امام تحديات كثيره لم يكن يتوقعها
