زهرة🌸

الحلقة الرابعة و الثمانون

🔸️حسام_يحكي:
عديت عينيا على وجها مرة أخرى...يمكن توا بالظبط كنت بحاجة لحد يفيقني من الحلمة لأنا فيها...الوقت حبس بيا و أنا نغزرلها...آخر شي توقعتو...إني نلقاها في بيتنا مرة أخرى...منعرفش شنية لي حسيتو بالظبط تسكر عليا النفس...لدرجة ما نجمت نقول حتى كلمة...و لا نقرب منها خطوة وحدها...يمكن ستغليت الدقايق لي تعداو علينا...و انا نشبع في روحي من كل تفصيل في وجها...قبل ما تغيب عليا مرة اخرى...أكثر من شهرين تعدات من غير ما نشوفها...و لا نشم ريحتها...حتى صوتها حرمت روحي منو...منعرفش إذا كنت نعاقب في روحي عاللي صار بالطريقة هذيكا...و لا حاولت نهرب من الكلام لي سمعتو منها ليلتها...فقت من سرحتي...كي تحركت تسكر في الفاليز متاعها....نزلت راسي نغزر لدوسي في يدي...يمكن توا بديت نستوعب علاه محمد تعمد يخليه في الفيلا...و في بيتو بالظبط...و خلاني نجي بالسيف عليا...برغم أهمية الاجتماع لي عندي..كيما توا استوعبت خوف أمي و خالتي نعيمة اللوطة...يعني لهدرجة خايفين مني...لا نقربلها...للحظة حسيت روحي بالرسمي مجرم...و عملت كلشي بلعاني...دنيا دارت بيا و معادش نعرف شنية نعمل بالظبط...كان محسيتش بحركة في البيت..مكنتش نعرف لهي هوني جملة..بقيت نغزرلها...نزلت الفاليجة تكركر فيها وراها...حطيت الدوسي عالكوافوز نحكي
انا:وين ماشية ؟
مريم:نظن ما عندي حتى توضيح يفيدك توا
انا:ما تنجم تخرج حتى شي من البيت هاذي
مريم:بربي كيفاه باش تمنعني ؟
انا:بالطريقة هاذي
ضربت الباب بيدي...سكرتها بالقاوي...غزرتلي مصدومة تحكي
مريم:فاش تعمل ياخي ؟ أبعد من قدامي...خليني نمشي انا:مش قبل ما ترجع كلشي لبلاصتو
مريم:ظاهر فيك هبلت...ما هزيت معايا حتى شي يخصك...و نظن معادش عندك حتى كلمة عليا
انا:بالقانون مزال عندي
مريم:بينتنا محكمة ملا...خلي القانون ينهي المسخرة هاذي
انا:مسخرة ؟
مريم:ترا فيها حاجة مقدسة ملا ؟
انا:ماكش باش تخرج من هوني...قبل ما ترجع كلشي لبلاصتو
مريم:حسااام...أبعد من قدامي...يزززي من اللعب متاعك تتذكر بالقدا آخر عركة هوني...شنية كلفتني
انا:و كلفتني ليا زادة
مريم:منظنش
أنا:أنا زادة خسرت بنتي...من غير ما نعاود نذكرك
مريم:أنت إمتى اعتبرتها بنتك ؟
انا:مرررريم يزززي...معاااادش تخلوض بالطريقة هاذي أحسن ما نباصي على ●●●●● تواااا
مريم:أبعد من ثنيتي...و معادش نقلقك معايا
انا:نظن زادت الامور على حدها
مريم:أكثر من اللازم
أنا:توا وليت مجبورة باش تسمعني و نحكيو في كلشي
مريم:مانيش مجبورة...مانيش مستعدة نضيع دقيقة أخرى معاك حسام
انا:باهي أخرج كان نجمت
مريم:باز ماكش باش تحبسني هوني
أنا:و شنية باش يصير كان حبستك ؟
مريم:رنيم تعرف لأنا هوني...صبري زادة...و..
انا:تحب تولي تدعي عند قبرو انتي ؟
مريم:زايد مجودر...و مينفعش معاك...مانيش باش نبقى هوني مهما صاار...تسمع فيا...أبعد من قدامي...و أخرج من حياااتي
أنا:مش انتي تقولي شنية نعمل
فلتت الفاليز متاعها من يدها...و رجعت شعرها لتالي تحكي
مريم:الصبر يااا ربي...ياخي شنية تستخايل في روحك انت ؟
هزيتها و حطيتها...ركبني العصب من ساقي لراسي يمكن اول مرة نغزرلها لابسة هكا...روبتها لي فوق الركبة الماكياج الفينو لي حطاتو...خلي الكعب لي لابساتو...من إمتى تلبس كعب ؟ سؤال دار في راسي و انا نغزرلها قحرتلها نحكي
انا:شنية عاملة في روحك انتي ؟
مريم:شمدخلك أنت ؟
منعرفش كيفاه جبدتها من يدها...كبست عليها و لصقتها فيا...نزلت راسي نحكي
انا:مزلت مرتي مريم...مدامك مزلت على إسمي...آخر مرة نراك في الحالة هاذي
مريم:آخر حاجة تهمني شنية لي تحس فيه توا...و باش نلبس كيما نحب...و نعمل لي نحب عليه زادة...أنت فقدت كل الحقوق لي تخليك تحكي معايا بالطريقة هاذي...حقيقتك بانت...معادش فما علاش تخبيها أكثر و تلعب فيها الراجل الحزار لي يخاف على مرتو...خاطرك كان جيت بالحق هكا...كان بالحق حبيتني كيما كنت تقول...مكنتش ستغليت وضعي باش تنتقم من صحبتك نظن سيبون ماكش بحاجتي توا..و لا مزلت تحب تعذبها اكثر تكلم ؟
عديت عينيا على وجها...لمعت عينيها...خلاتني نحس قداشني حقرتها من غير ما نستوعب...أما زادة لازم تفهم سوء تفاهم اللي صار...و إلا باش نعيشو الزوز في أكبر كذبة...كبست عليها اكثر نحكي
انا:إسمعني مرة وحدة...بعدها أعمل لي تحب عليه
مريم:كانت عندك أكثر من فرصة قبل
انا:مانيش بحاجة فرصة أخرى...قبل ما نوضح كلشي صار من أول ليلة
مريم:و أنا منحبش نسمعك
انا:باش تسمعني بالسيف عليك
مريم:و كان مسمعتكش...باش تجرني من يدي كيما كل مرة ؟
انا:باش نعمل لي ميجيش لبالك جملة
مريم:هاو باش نوريك لي باش نعملو انا
صاحت فرد صيحة...تعيط على أمي...و خالتي نعيمة قصيت عليها كي نزلت هزيتها على كتفي...كبست على روبتها...نحكي
أنا:ريض توا
مريم:فاش تعمل يا مهبول...نزززلني فيييسع
انا:إنتي لي وصلتنا لهوني
قربت من الكوافوز...هزيت الدوسي في يدي و حليت الباب...تضرب فيا لظهري و تصيح بالقاوي
مريم:نزززلني...حساااام يزززي من هبااالك...أممممي..ياااا خااالتي وينكم...اجريولي أمااان...أممممي...نزززلني يااا هم...ياا ساااقط...أنا الغالطة خاطرني جيت من الأول
هزيت راسي نغزر لأمي و نعيمة...واقفين في أول الدروج...و لا وحدة فيهم نجمت تطلع...زوز يعرفو غلطتهم بالقدا...قربتلي أمي تحكي
امي:حسااام ولدي...نزل الطفلة فاش تعمل ياخي؟
مريم:هكااا تعمل فيااا يااا أمي...مش قتلي ماهوش باش يجججي...علاااه هكا ؟
أمي:والله ما قلت يا بنتي...أصلا منعرفش علاه جا
انا:صاااار...ولينا هكا إحنا يا أمي ؟
أمي:منقصدش...حط الطفلة عيش ولدي...ياخي نورمال تهزها كي الجاجة هكا
مريم:امممي...أمااان ياخي وليت جاجة توا...قول لولدك ينزلني...راني باش ندوخ...يااا هم
باقي تضرب فيا بيديها زووز...شدني ضحك على كلامها...أما كبست روحي نحكي
انا:حساابي معاكم نتوما مبعد
أمي:حسااام...وين ماشي ياااخي...حط الطفلة عيش ولدي...ميجيش لي تعمل فيه
انا:حتى حد ماهو باش يعلمني صحيح من الغالط...و معنديش وقت نفسر اللي قاعد نعمل فيه توا
مريم:أمممي أعمل حاجة اماانك...كلم بابا...و لا محمد أماانك
انا:من غير ما تحاول..خاطر حد ماهوش باش يلقاها..رد بالك تتصرف من راسك...مفهوم أمي
مريم:ياااا ربييي...معناااها باش تخطفني يا سخطة
انا:بالظبط...هيا سلام توا
كبست عليها...و هزيت براسي لخالتي نعيمة باش تحل الباب...سبقتني تجري...ضربتني لظهري تحكي
مريم:حتى إنتي يااا خاالتي...علااه هكااا حرام عليكم
أول ما حطيت ساقي برا...كبست عليا اكثر...تصيح
مريم:يااا ناااس اجريولي...ععم مسعووود كلم البوليس تصرررف...أمااانك
حليت الباب...و نزلتها...شعرة لا طاحت...كبست عليها و ركبتها...سكرت عليها الكرهبة...بقات تضرب في البلار و تصيح الداخل...خلطت عليها ركبت بحذاها...ضربتني لصدري تحكي
مريم:شنننية تستخااايل في رووحك تعمل...حل الباب خليني ننزل...حل الهم هذااا فييسع
كبست عالفيتاس...و طرت بيها في لحظة...خرجت لطريق...غزرتلي تحكي
مريم:والله ما ندمك يااا حساام...و أتو تشوف بعينك
حلت صاكها...جبدت تليفونها...تكلم في شكون...مديت يدي فكيتو منها نحكي
أنا:حمد الله فكرتني فيه عزيزتي
مريم:حساااام...يزززي...رجعلي تليفوووني فيسسع
أنا:ملا باش تكلم سي صبري...هاك لحقت باش تقيد نومروه عندك زادة
مريم:حاجة متخصكش...و توا رجعلي تليفوني
سكرتو و حطيتو في مكتوبي...حسيتها هبلت بالرسمي ضربتني بالقاوي تحكي
مريم:والله ما نشتكي بيك للحاكم...يااا مجرم...يااا سااقط
انا:شنية تقلهم راجلي خطفني ؟
مريم:ماااكش راااجلي
انا:مجبورة تتقبل الحقيقة يا روحي
مريم:ياااا ربببي...والله باش نهبل...يااخي هكا تتحل الأمور في رااايك ؟
أنا:إنتي مخليتش حل آخر
مريم:حسااام يزززي أماانك...شتحب مني أكثر...ياخي لازم منو هذا الكل...أقل حاجة تنجم تعملها على خاطري تخليني نرا حياتي توا
انا:أحسنلك معادش تعاودو الكلام هذا...قتلك مانيش مطلقك كان على جثتي
مريم:باهي شنية تحب...حتى تكمل لعبتك باش طلقني ؟
انا:سكر الموضوع هذا توا...باش يكون عندنا وقت لكلشي نحكيو فيه
مريم:منحببش نبقى معاااك...أصلا وين باش تهزني ياااخي ؟
انا:توا محسوب مخطوفة...آلوور ديزولي يا عمري منجمش نقلك
مريم:كان متوقفش الكرهبة...باش نرمي روحي منها
انا:فاش تستنى ؟
حاولت تحلها...لقاتها مسكرة من داخل...قحرتلي تحكي
مريم:وين كان مخي...كي ربطت روحي معاك ؟
أنا:أسأل قلبك
مريم:برا زمر على روحك...كنت و باش تبقى أكبر غلطة في حياتي يا حسام
انا:و إنتي باش تبقى أحلى حاجة صارتلي لتوا
مريم:ماكش تستنى فيا نصدقك ؟
أنا:أموورك عزيزتي
سكتت شوية...تثبت في طريق...و عاودت غزرتلي تحكي
مريم:باش تهزني لدارك توا ؟
انا:متقلقش روحك كي توصل تو تعرف
قحرتلي...و دورت وجها للبلار...هزيت تليفوني...كلمت نادر...هز عليا يحكي
نادر:وينك يا حسام ؟ مش قلت محمد باش يجيبلك دوسي...علاه مشيت أنت ؟
انا:نادر اسمعني...أجل الاجتماع ساعتين...عندي ما نعمل توا
مريم:يخطططف فيااا
قحرتلها...ضربتني لصدري...و دورت وجها...خذيت نفس نحكي
انا:دار المصيف فارغة توا ؟
نادر:فارغة...نظن عندك دوبل متاع مفاتح
أنا:عندي...هاني باش نوصل في قضية و نرجع...ما تخلي حتى حد يخرج
نادر باهي مريقل
مريم:في بالك كي ترجع باش تلقاني غديكا ؟
انا؛مريم يزززي كهو...أسكت شوية
مريم:مااانيش ساااكتة...علااه تعمل فيا هكا منعرفش
انا:على قريب باش تعرف
مريم:ماكش باش تتبدل
أنا:دوماج
تكات لتالي...تهز و تتنفض في بلاصتها...أحسن حاجة الدار متاع نادر في بلاصة فارغة عالشط...يمكن لحق وقت باش نصفو فيه كلشي...من أول نهار تقابلنا فيه كبست عالفيتاس اكثر...منعرفش كيفاه وصلت...شديت الفران بالقاوي...و فكيت الحزام نحكي
انا:هيا انزل
مريم:هاني طلعت مخطوفة بالرسمي...تحبني نبقى في بلاصة مهجورة وحدي ؟
انا:ماهيش مهجورة...و دار فيها سيستام ماتتحلش من برا...و السكيريتي قريبة برشا...ملا انزل و نقص حسك
مريم:باهي برشا...مزية خبرتني لي سكيرتي قريبة..هاني باش نوريك ملا
حلت الباب...و نزلت تجري...خذيت نفس و خلطت عليها دوب نجمت تجري...بالكعب...دعثرت و جات طايحة كبست على ساقها تحكي
مريم:الله لا تربحك ياا حسااام...كلو جرايرك...من يدي لساقي
قربت منها...نزلت قدامها...لين وليت مقابلها...نغزرلها تتوجع...تبسمت على جنب نحكي
انا:كي متعرفش تمشي بيه...علاش تلبس فيه ؟
مريم:دبر على رووحك...نظن ساقي تكسرت...هيا هزني للكلنيك توا...و كلم بابا يجيني فييسع
انا:متحبش نطلب الاسعاف يجيك ؟
مريم:مش لازم هزني أنت...هيااا أماانك
طلعت حاجبي نغزرلها..و هي تفلم عليا...عديت صوابعي على ساقها...و غزرت لعينيها...نحكي
انا:ما بيها شي
مريم:توجع فيا
انا:هاك تعلمت تفلم زادة
مريم:شوف هوني...ولات زرقة...ياخي منغيضكش ؟
انا:شوية قلاص و انتي إرتحت
مريم:ااافففف منك
انا:هيا قوم
هزيت روحي وقفت...و نزلت راسي نغزرلها...مزالت قاعدة عالارض...مديتلها يدي...قحرتلي و حطت يدها في يدي...كبست عليها وقفتها...نحكي
انا:سايس روحك
مريم:حساام
انا:مممم
مريم:هيا نرجعو أماانك...كي تهدا الاوضاع نحكيو في كلشي باهي هكا
انا:كنت تنجم تقول الكلام هذا في الفيلا
مريم:المهم إني قلتو توا
انا:هيا مريم...و أنسى اني نرجعك توا
مريم:زايد مينفعش معاك
كبست على يدها نمشي فيها...جبدت المفاتح...نفركس بينهم على مفتاح الدار...تبسمت تحكي
مريم:باز ماهوش عندك...هيا نرجعو توا
كبست عليه في يدي و حليت الباب...غزرتلها...نحكي
انا:هيا أدخل فيسع
قحرتلي و دخلت...دور في عينيها عالدار...تغزر لكل شباك يعرضها...فهمت لي تخمم فيه بالقدا...طلعت راسها تغزر للفوق...و عاودت غزرتلي تحكي
مريم:هي زادة جبتها لهوني ؟
انا:مش وقت أسئلتك توا
مريم:علاش...ساعة دار مزيانة برشا...و ظاهر فيها متاع كوبل...تناسبكم برشا نتوما زوز
انا:مريتش أنو غيرتك زادت على حدها شوية
مريم:مش غيرة...قاعدة نكشف في الوهم لي كنت عايشة فيه...اللي حرمتني منو عشتو مع شراز...كان مش هوني في دارك
انا:يزي من تخلويض...و أقعد رايضة
مريم:ديزولي منجمش نضمنلك باش نبقى رايضة
انا:باهي إيجا تراه ملا
هزيتها مرة أخرى على كتفي...و طلعت بيها للفوق..بقات تفرفط و تصيح كي عادتها...دخلت للبيت و رميتها في نص السرير...نحكي
انا:معادش تخدم مخك قدامي مرة اخرى...و إرتاح شوية من الصياح...ساعتين أخرى و نرجع لحبي
مريم:يااااا ساااقط
هزت المخدة ضربتني بيها...شديتها بيدي...و رجعتها بالوقت...نحيت المفتاح و سكرت الباب من برا...هكا نضمن لي ماهيش باش تعمل حتى تصرف غالط...و لا تضر روحها...أحسن شي تاكدت انو الفونتولين معاها ريتها وقت جبدت تليفون...بقات تضرب في الباب بالقاوي...و تصييح...باش نخرجها...نزلت ريدوات الكل و خرجت من دار...سكرتها و رجعت للكرهبة...أحسن شي شباك البيت البلار متاعو ميتحلش...و ميخرجش صوت شديت ثنية لسوسيتي...حضرت عالاجتماع في آخر لحظة...غزرلي نادر...يسأل فيا بعينيه...هزيتلو براسي أنو كلشي لباس...وقعت بقية الاوراق...و تفاهمنا في امور المشروع...هكا عمر يكون عند وعدو...و نكونو ما قصرنا معاه في شي...أول ما خرجت لقيت محمد في وجهي...قربلي يحكي
محمد:حسااام وين هزيت طفلة ؟
أنا:باش تبقى معايا اليومين هذوما
محمد:يووومين ؟ هبلت ياخي...كان يفركس عليها بوها ؟ و لا يمشي للبوليس ؟
انا:ما ينجم يعمل شي...زادة الطفلة لي تحكي عليها مرتي...ما ينجم يعمل شي
محمد:باهي مخممتش في رنيم...كان يشلق بوها لي هي خبرتني و أنا كي البوهالي...خليتك زعمة زعمة تقابلها صدفة...ياخي خطفتها...تحب تولي مجرم أنت ؟
انا:متخافش...أنت أعمل روحك ما في بالك بشي...و الأمور باش تكون لباس...باهي هكا ؟
محمد:باهي وينها توا ؟
انا:ديزولي خويا الغالي أما منجمش نخبرك...نكلمك مبعد رد بالك على روحك و على دار
محمد:اللي يغلبك يجي يحاسبني
تبسمت على جنب و خرجت من السوسيتي...يمكن أول مرة نتفرهد بعد اللي تعدا على راسي...نعرف لي باش تعذبني قبل ما تسمعني...أما عالاقل...نوضحو كلشي كان عالق بينتنا من الأول...و بلكشي تولي فرصتنا في روجع اكبر...معادش يهمني صحيح من الغالط...قد ما يهمني أنها تسامحني و ترجعلي...بالرسمي مخلاتش فيا عقل الفرخة...حتى عنادها نحبو و نشيخ عليه...خذيت قضيات في ثنيتي...سكرت تليفوني و شديت ثنية لدار مهما كان لي باش يصير...مانيش باش نسلم فيها و في حبها لآخر نهار في عمري...وقتها برك...تنجم تبدا حياة جديدة بلا ما يكون حساام موجود في دنيا...نزلت القضية من الكرهبة...و حليت الباب دخلت...حطيت كلشي عالطاولة...و نحيت الفاست متاعي طيشتها عالفوتاي...تبسمت كي مسمعتش حسها...أصلا مشيت على ساعتين...لقيت روحي راجع وقت دنيا بدات تظلام حتى هي ثنية خذات مني وقت...تنهدت بالقاوي...و طلعت عندها...دورت المفتاح...و كبست عالبواني..حليت الباب...عديت عينيا عالبيت مصدوم...قلبتها سفيها على عاليها...ما خلات حتى شي في بلاصتو...نزلت راسي نغزرلها قاعدة عالأرض...و حاطة راسها عالسرير...طلعت حاجبي مستغرب..ما نجمت نقول حتى كلمة..متوقعتش باش تهبل و دخل دنيا بعضها..هزت راسها شوية غزرتلي وجها أحمر باش يطرشق...نطرت من بلاصتها...هدت عليا...تضرب فيا بيديها زوز...و تصيح فرد وقت
مريم:ويييينك لتواااا...كيفاااه تحبسني هوني و تمشي ياااخي نورمال أنت في مخك...تحب تقتلني باش ترتاح يااا حسااام...علاااه هكااا...علاااه...شنية تحب مني اكثررر من اللي من اللي عملتو فيااا...تكلم...حلل فمك
كل ضربة نحسها على صدري...تخليني نحس بقهرتها من الفازة...يمكن لي عملتو غالط...اما مكانش عندي حل آخر...و مش باش تكون عندي فرصة اخرى...تخلينا نقعدو مع بعضنا..و نحكيو في كلشي...كبست على يديها زوز...و جبدتها عندي...كبست عليها في حملتي...غرست يدي في شعرها...نحكي
انا:ششش اهدا...اهداا...وفاات يا روحي...هاني معاك توا
كبست عليها اكثر...لين حسيت بدنها ترخف...و نفسها تنظم...غرست يديها زوز في جنابي...عرفتها خافت خاصة و البلاصة معزولة...نزلت بيدي شوية...حطيتها على رقبتها من تالي نحكي
انا:يززي كهو...نعرفك أقوى من هكا
جبدت روحها شوية...و هزت راسها...غزرتلي ندرا كيف حسيتها بدات تستوعب اللي قاعد يصير...بعدت عليا مروهجة...عدات يدها على رقبتها تحكي
مريم:يهلكك يا حسام...شعرة و قلبي يسكت جرايرك
شدني ضحك...نزلت راسي شوية...منحبش نغزرلها منظرها و هي هكا بالرسمي خلاني منجمش نشد روحي قحرتلي...و ضربتني بيدها تحكي
مريم:أصلا مع شكون نحكي...منعرفش شنوة اللي يضحك فيك...ياخي لهدرجة حالتي تضحك
انا:يزززي مرييم...هاك لباس عليك...و زادة مفما حتى حد يتعرضلك هوني...برا أغسل وجهك...و إيجا معايا
مريم:ما نجي معاك لحتى بلاصة...اخااطني
هزت صاكها...و قربت مني دزتني بيدها...هبطت دروج بالزربة...أصلا فما بيت وحدة هوني كهو...أوبليجي تنزل ديراكت الفرخة...خلطت عليها...نزلت الدروج...وحدة وحدة...نغزرلها تحاول تحل في الباب...تلفتتلي تحكي
مريم:حساام...حل الباب هذا...خليني نمشي
انا:منجمش عزيزتي
بقات في بلاصتها...تغزرلي مصدومة...ترميت عالفوتاي و تكيت لتالي...نهز فيها و نحط...تكات عالباب...مهدودة مرة على مرة...تقحرلي و دور وجها...حليت البيتزا نحكي
انا:باش تبقى واقفة برشا غديكا ؟
مريم:لين تحل الباب
انا:معنديش نية باش نحلها...إلا بعد ما تتوضح أمورنا
مريم:مفما حتى شي يتوضح بيناتنا
أنا:باهي على راحتك...و إيجا تاكل قبل ما تبرد
مريم:منحبش
انا:كيما تحب
هزيت ترونش في يدي...و تكيت لتالي...فرد وقت نغزرلها...شادة روحها على شعرة...ضربت الباب بساقها...بلعت لي فمي نحكي
انا:سايس عالباب حبي...تمشيش ترزينا فيها
خلاتني و قربت من شباك تحل فيه...نفس الشي مسكر منعرفش علاه محبيتش نحبسها...خاطرني توحشت برشا نغزرلها و هي دور قدامي...طيشت صاكها عالطاولة بغزول...لين طاح عالارض...و ترمات بجنبي...تكات لتالي ترد في نفس...محبيت نقول حتى كلمة أخرى...منعرفش قداش تعدا وقت بالظبط...و إحنا قاعدين بجنب بعضنا من غير حتى كلمة...كل مرة نحاول ننطق...الحروف تتبعثر على شفايفي...و منعرفش نخرجها...منعرفش من وين نبدا و لا شنية باش نقول بالظبط...خايف نخسرها أكثر من هكا...أصلا الهاجس هذا ولا ملازمني في حياتي...من أول نهار قابلتها فيه...من أول بوسة...من أول عركة...كلشي يخصها...زرع داخلي أكبر خوف من إني نخسرها في نهار من نهارات...و هاني لقيت روحي نواجه في اللي خفت منو الكل...الوقت لانا داخل بعضي و نحاول نلقى كلام نبدا بيه...صوتها وقفني...خلاني نهز راسي و نغزرلها...نتبع في كلامها لي خارج بين شفايفها بالكلمة...و هي تحكي
مريم:هاني نسمع فيك حسام...منين تحبنا نبداو ؟ خلينا نسكرو كلشي توا
دورت وجها...غزرتلي بالوقت...غزرتها لي هزتني من داخل...و خلات قلبي يخض بالقاوي...لدرجة ما نجمت نقول حتى كلمة...تبسمت على جنب...و كملت تحكي
مريم:شرايك نبداو بعرسنا ؟ نقصد ليلة عرسنا حسام تتذكر لي صار و لا تحب نعاودلك أنا...باهي هاني باش نحكي مدامك أنت ساكت...ليلتها حسيتك متبدل معايا برشا...تصرفاتك الكل كانت تقول أنك نادم عاللي تعمل فيه...سكوتك قدام العدول و الناس تغزرلنا...خلاني للحظة نخاف أنك ترفضني قدامهم...قرارك اللي خذيتو في آخر لحظة و أنت تقول باش نعيشو في الفيلا خلاهم الكل مصدومين...و يركزو معايا أكثر من أنهم يفهمو شنية سبب..لي حتى أنا منعرفوش...ليلتها سمعت عمر و هو يستجوب فيك علاش عملت هكا مدامك حضرت دار قبل...أما قلت ميسالش...ميهمش وين باش نعيشو...وحدنا و لا في الفيلا...مكانتش تفرق عندي المهم إني معاك...وقتها قلت أنو الراجل لي خرجني من دارنا...و قدام بابا...لي خلاني نتحدا عيلتي و الماضي مع بعض ماهوش باش يخذلني و ماهوش باش يخليني مهما صار...أما..
سكتت شوية...ترد في نفس...اللي تسكر عليا مع كل كلمة تقول فيها...تنهدت بالقاوي تحكي
مريم:أما أنت خليتني نحس إني وحدة ¤¤¤¤¤ جايبها من شارع...عديت بيها ليلتك...و وصلت لي تحب عليه مدامك موصلتش ليه و إحنا صحاب
هزيت راسي مروهج...اخر حاجة توقعت نسمعها منها منعرفش كيفاش هزيت روحي...نزلت قدامها...كبست على يديها زوز...نحكي
أنا:مستحيل...أنا عمري ما غزرتلك بالطريقة هاذي...و لا خممت فيها جملة...إنتي عمرك ما كنت أكاكا مريم..الليلة لي عشتها معاك كانت حلمة بالنسبة ليا صدقني
مريم:و كابوس بالنسبة ليا حسام...آخر حاجة توقعتها أنك تهيني و توجعني بعدما سلمتلك روحي...كلامك لتوا يتعاود في راسي...الوجيعة لي حسيتها...كانت كافية باش تخليني نكرهك لآخر نهار في عمري...أما رغم اللي عملتو فيا و لي قلتو عديت ليلة كاملة نستنى فيك...نستنى فيك ترجع و توضحلي كلشي صار...حتى كان بالكذب...كنت باش نصدقك
انا:سمعتك و إنتي تحكي مع رنيم نهارتها...سمعت كلشي
غزرتلي ندرا كيف...دموعها تحصرو في عينيها...خذيت نفس و كملت نحكي
أنا:منعرفش شنية لي حسيتو وقتها...آخر شي توقعتو أنك قبلت تعرس بيا على خاطر الفلوس...جهلت وقت حسيت لإنتي متحبنيش و استغليتني...لدرجة كنت نتصرف من غير وعي...كلشي خممت فيه وقتها...إني نخليك تندم عاللي عملتو فيا و كهو
مريم:كنت تنجم تواجهني...كنت تنجم تتصرف بطريقة أخرى...أنا عمري ما خممت فيك بالطريقة هاذي...كان فما قدامي اكثر من فرصة...أما حبيتك أنت حسام حبيتك تعطيني عيلة و كهو...طمعت أنك تحبني كيما أمي...و ما تخلي حتى شي يقهرني في دنيا...هذا لي حبيتو منك صدقني
أنا:كان رجعت بعد أكا ليلة...كان قعدت قدامك على أكا سرير مرة أخرى...بعد الكلام لي قلتو...بعد اللي خليتك تحسو...و إنتي عروسة...كنت باش تسامحني مريم ؟
هزتلي براسها ايه...دموعها نزلو بالوقت...كبست على يديا زوز...تحكي
مريم:كنت باش نسامحك حسام...كنت باش ننسى كلشي و نساامحك
نزلت راسي بالوقت...الوجيعة لي حسيتها مع دموعها خلات دمعة تحرق نزلت على خدي...خذيت نفس بالسيف...و هزيت يدي نمسح في دموعها...نحكي
انا:يزي توا...أنا منستهلش الدموع هذوما الكل مريم
مريم:يا ريتك رفضتني ليلتها...يا ريتك قلت للعدول لا وقتها مكناش باش نوصلو هوني...و مكنتش مجبور توجعني بالطريقة هذيكا
انا:مكنتش نجم مريم...حاجة داخلة...خلاتني مستحيل نرفضك
مريم:حسام أنت مغلطتش مرة و كهو...أنت بقيت مواصل في أغلاطك...لآخر لحظة جمعتنا...أنا بين ليلة و نهار...لقيت روحي نعيش مع راجل ما نعرف عليه حتى شي...من غير إسمو...لقيت روحي عايشة أكبر كذبة في حياتي...وصلت لدرجة...نخاف إني نفيق على نفس الكابوس...كنت نقول...تو يجي نهار و يرجع حسام لي كنت نحبو...أما أنت مرجعتش
انا:م..مريم...اسمعني عيش حبي
مريم:انت هددتني بأختي و بابا...رغم خليتهم على خاطرك...وصلت شكيت لأنا في علاقة مع وائل...بعدها خوك محمد...صحيح كلامي و لا لا..برغم انو اللي عملتو فيا الكل...أما عمري ما خممت نعمل حاجة تخلي إسمك في الارض...حتى أنك على شعرة كنت باش تقتلني وقت كلمني وائل...حتى من غير ما تفهم السبب...باش تنكر هذا زادة ؟
هزيتلها براسي لا...و دورت وجهي عليها...نعرف لي أغلاطي كبيرة برشا...أما و انا نسمع فيهم...استوعبت أنو اللي كنت نعمل فيه أكبر من إني نخمم فيه...و لا نحاول نطلب منها أنها تسامحني
جبدت يديها من عندي...عداتهم على وجها...تمسح في دموعها...و كملت كلامها تحكي
مريم:هذا الكل كوم...و الليلة لي طلبت مني نطيح الصغير كوم آخر حسام...ي..ياخي لهدرجة كنت حاقد عليا أنت ؟ لدرجة منجمتش تقبل يكون عندك صغير مني ؟
تنهدت بالقاوي...دموعي تحصرت أكثر من قبل...و نفس تسكر عليا مرة أخرى...منجمتش نجاوبها على سؤالها هزيت روحي بالسيف...بعدت عليها...وقفت في نص الصالة...نفركس على شوية هوا...يخليني نرد النفس لي ضاع مني...عديت يدي على وجهي..لتوا منعرفش كيفاه خرج معايا الكلام ليلتها...و لا كيفاه نجمت نقولو...و لا حتى فاش كنت نخمم...تلفت على صوتها..كبست بيديها زوز على حرف الفوتاي تحكي
مريم:ي..ياخي لهدرجة كنا حاقدين على بعضنا احنا ؟ لدرجة أنت طلبت أني نطيحو...و أنا مشيت نجري باش نفذ و نتهنى من الصغير لي في كرشي...تعرف علاش ماتت بنتنا حسام
حسيت دنيا دارت بيا في لحظة...لدرجة ملقيتش على شنوة نستند...شهقت و هي تحكي
مريم:خ..خاطر حست لي إحنا مكناش نحبو عليها تجي لدنيا هاذي...حست اللي إحنا زوز منستهلوش يكون عندنا صغير...هذا عقاب ربي لينا...عاللي كنا باش نعملوه هي إختارت تمشي وحدها...من غير ما نقتلوها بيدينا الزوز
حطت يدها على رقبتها ترد في نفس...عرفتها تخنقت قربت منها بالزربة...هزيت صاكها من الارض...فرغتو عالارض...هزيت الفونتولين...و قعدت بجنبها...عاونتها تاخو نفس...فرد وقت نبعد في شعرها من على وجها تكات لتالي...و غمضت عينيها بالقاوي...فرد وقت شدت الفونتولين من يدي...كبست عليها...و حلت عينيها..تبكي و تضحك فرد وقت...للحظة استغربت حالتها...بين بكى و ضحك...غزرتلي تحكي
مريم:مش ذنبي أني منجمش نتنفس كيما العباد...كان جا بيدي مكنتش باش نخليك تتشمت في مرضي بالطريقة هذيكا...أما أنت سكتني...ههههههههه كان مش محمد كان مرضي باش يقتلني اكثر من مرة
انا:ش...شقصدك ؟
مريم:ريت هاذي...بعد ما وليت نعيش معاك...منجمتش نستغنى عليها...و مكنتش نجم نطلب الدوا من يد اللي خذيت منو السم بيدي...خاطر كنت باش تلقى سبب آخر تعذبني بيه...مش صحيح كلامي
خذيت نفس...و نزلت بيدي لجنبها...كبست عليها و جبدتها عندي...حطت راسها على صدري...كبست عليها نحكي
انا:ششش معادش تقول كلام مفماش منو..مرضك عمرو ما قلقني صدقني...معادش تخلي مخك يصورلك حاجات أخرى
مريم:علاه شنية كنت بالنسبة ليك باش يقلقك ؟
جبدت روحها من عندي...و هزت راسها...غزرتلي في عينيا تحكي
مريم:أنا كنت الحلقة المفقودة...لي تخليك ترجع لشراز باش تقنع روحك أنو هي كهو تستهل حبك...فرد وقت تكون انتقمت منها عاللي صار قبل سنين من توا
انا:مريم...عمري ما خممت نستغلك باش نرجع لشراز...و لا حتى باش ننتقم منها...قتلك و باش نعاودلك ألف مرة انا مستحيل نعمل هكا
مريم:تحبني نصدقك و لا نصدق لي ريتو...انت قلي ؟
هزت روحها وقفت...بعدت عليا...دورت راسها...غزرتلي تحكي
مريم:حسام مانيش صغيرة...باش تعديها عليا...كان عندي احساس لي كان فما شي بينكم قبل...أما كنت نصدقك أنت...كنت نقول مجرد صدفة و كهو...صدقت لأنت كنت تجي للفاك على خاطري...رغم انك كنت مطيقش حتى تغزر لوجهي...قلت لأنت يمكن خايف عالصغير...يمكن خفت نخونك مع وائل...أما أنت لي طلعت تخون فيا و في وجهي زادة...أنت رخصتني قدام صحبتك من غير ما تحس...في بالك باش نجم نسامحك عاللي صار ؟ نجم نسامحك عالليالي لي كنت نعديها وحدي...على أمل انك باش ترجع...مش ليلة...و مش زوز و حتى كان دخلت تسهر معاها في تليفون...انا كنت نقرا لي ميساج متاعكم و نتوما تفقدو في بعضكم
أكثر من مرة سألتها إذا كانت مرتاحة...كنت طمن فيها أنو كلشي باش يكون مليح...في الوقت لانا كنت نستنى منك كلمة وحدة...كان مش على خاطري...على خاطر صغيري...أنا وصلت نحشم من محمد و أمك...باش نطلب منهم حاجة شاهيتها...و لا فلوس الطبيبة...أكثر من أربع شهور...أنت كنت لاهي بيها...كنت نعرف أنو الطفلة لي تحبها رجعت...كنت نعرف لأنت كنت عايش معاها...أما مش شراز...متوقعتش تعمل هذا الكل مع البروف متاعي...البروف لي كنت أنا نحكيلك عليها...و أنت كنت تسمعني و تسكت...سألتك اكثر من مرة اذا تعرفها و قتلي لا...معنديش علاقة بيها..و صدقتك سألتك كان فما شكون في حياتك...و كذبتني...تحبني نذكرك باللي صار أكثر...إمتى آخر مرة خممت تمسني فيها ؟ هاك وصلت قبل تعايرني ببدني ؟ شنوة مطلعتش كيفها ؟ مش هذاكا لي كنت تستنى فيه ؟ و لا كنت لاقي راحتك بين يديها تكلم عاااد ؟
قربت منها وقفت قدامها...نعرف لموضوع شراز متنجمش تتحكم فيه...دزتني بيديها زوز...تحكي
مريم:قداش من مرة رقدت معاها ؟
حبست في بلاصتي نغزرلها...منعرفش كيفاه جا سؤال هذا في راسها...جيت باش نحكي قصت عليا تحكي
مريم:مرة و لا زوز...و لا أربع شهور كاملة...في كل ليلة كنت تخلي بلاصتك فارغة بجنبي...كنت ترقد بحذاها في الدار لي وعدتني فيها...في البيت لي كانت باش تولي متاعنا إحنا...أنت خليتني نبني أحلام مفماش منها حسام...بعد وليت نهلوس بيك...مرة نسأل محمد...مرة أمك...مرة نكلم زهرة...نسألها عليك اذا كنت مع عمر و انا حاشمة من روحي...كنت كل ليلة نفركس على سبب يخليني نرقد مرتاحة...كنت دوب تتذكرني..دوب تغزرلي كأني مش موجودة معاكم...كنت كي تدخل تحكي معاهم الكل كان انا...لحقت بأمي فتحية أكثر من مرة و هي تسأل فيك علاه تعمل هكا...كنت تقولها مانيش ناقصها...تتذكرني كي يقرب مني خوك...و لي أنت كنت تعملو مع شراز...نجم نعملو أنا مع محمد...هذا لي خفت منو أنت ؟
انا:مريم يزززي أمانك...يزي و اسمعني مرة وحدة
مريم:هذا الكل عملتو أنت...تحملت كلشي على خاطر بنتي و بقيت ساكتة...أما البركة في صحبتك حتى هي خذات فيا بايها
انا:شقصدك ؟
مريم:تواا وليت متعرفش قصدي ؟ برا اسألها و تو هي تفسرلك...قلها مريم شبيها عاودت العام...شبيها مكملتش تعدي
انا:مريم فاش تحكي ياخي ؟
مريم:شراز متاعك خسرتني في مشروع عديت عليه شهور...رغم الظغط متاعك...و الكنترول متاعها..محبتش تكوريجي الورقة متاعي...خلاتني نمشي و نجي في الفاك من بلاصة لبلاصة...و انا نفركس عليها...و نفهم شنية سبب اللي خلاها تعمل فيا هكا...برغم الحالة لي كنت فيها...أما انتقامها وقتها كان أكبر من أنها تشفق عليا
انا:ع...علاه محكيتليش هذا الكل ؟
مريم:شبيك تغزرلي هكا...أنت و شراز نفس الشي...نتوما زوز تشبهو لبعضكم في كلشي...و أنا الدغفة الوحيدة لي كنت بيناتكم...يا ريتني سمعت كلام بابا...يا ريتني اخترتو هو مش انت...يا ريت قبلت بصبري...توا راني مهنية في داري
انا:يززززززي مرررريم...اسسكت....هذاكااا بالظبط متحكيش عليه قدامي
مريم:شبيك...هاك أنت عملت أكثر من هكا...زعمة ماكش تستنى في صغير اخر منها ؟
عديت يديا زوز على شعري...باش نقلعو من بلاصتو..من الغزول لي ركبني شي من شراز الكلبة...و شي من الساقط اللي ندرا من وين خرجلي...فقت من سرحتي كي دزتني لتالي تحكي
مريم:توااا كلشي ولى وااضح...حلي الباب هذا خليني نمشي عى روحي
انا:مش قبل ما تسمعني
مريم:تحبني نسامحك...باهي إعتبر ما صار شي من هذا الكل...و خلينا نرجعو لنقطة صفر...لا تعرفني لا نعرفك هاني مسامحتك دنيا و أخرة...و من قلبي زادة...خليني نمشي على روحي توا
بقيت واقف في بلاصتي...قربت من الكنتوار...نزلت كلشي عالارض...فقدت أعصابها الكل...تلفتت باش تمشي...خطفتها من كرشها...قبل ما تعفس عالقزاز لي عالارض...بدنها ترخف بين يديا...قعدت عالارض مروهجة...ترد في نفس...هزيت الفونتولين في يدي فكتهالي و رماتها عالارض...تحكي
مريم:مش لازم تذكرني بمرضي كل شوية...لباس عليا
هزيتلها براسي ايه...و قعدت عالارض بجنبها...معادش عندي جهد باش نقوم بعد اللي صار...تكيت عالفوتاي نحكي
أنا:أنا و عمر و شراز...كنا صحاب...شراز عرفناها...اول نهار لينا في الفاك...عدينا 5 سنين مع بعضنا...كنا أكثر 3 معروفين في الفاك متاعكم...علاقتنا بدات بعد 3 سنين من صحبتنا...برغم كنت انو فما شي بقى ناقص...أما كنت نغمض عينيا عالحكاية...كنت نحاول ننسى أنو هي بنت فلان...و أنا مزلت نبني في روحي من الصفر..بسبب الديون لي خلاها بابا...عدينا عامين أخرى مع بعضنا بعد ما تخرجت هي...كنت باش نطلبها...عالأقل وقتها تكون علاقتنا رسمية...أما حتى بلا ما تفكر مرتين...اختارت تعيش حياتها...خرجت من حياتي بين ليلة و نهار لدرجة منعرفش شنية لي كنت نحس فيه وقتها...منجمتش نتقبل اللي صار عليا...كرهتها و كرهت كلشي ربطني بيها سنين هذوكا...عشر سنين تعدات...منجمتش نغزر فيها لطفلة اخرى...مانيش باش نقلك من وقتها ما مسيت حتى طفلة...العكس وقتها اللي معملتوش و انا معاها...عملتو مع غيرها
مريم:ساقط
تبسمت وقت سمعت الكلمة منها...خذيت نفس و كملت نحكي
انا:شراز هي السبب لي خلاني نوصل لهوني...حقدي عليها خلاني نبني روحي...و نوصل لي عمري ما حلمت نوصلو
مريم:أصلا مننعرفش علاش قاعد نسمع في حكايتكم برا ارجعلها و احتفل معاها...فاش قام تحكيلي ليا...الهم هذا
جات باش تقوم...جبدتها من يدها...جات في حملتي كبست عليها...و ثنيت ساقي على ساقيها...باش معادش تتحرك...خذيت نفس و كملت كلامي
انا:هاذي حياتي...قبل ما تخرج في ثنيتي نهارتها...لتوا نتذكر فيه نهار هذاكا...رغم صياحك و تجوديرك...أما كانت فيك حاجة سبيسيال برشا...خلاتني نعمل اللي عمري ما عملتو حتى مع شراز..و لا أي وحدة غيرك..لتوا كي نراك قدامي...منجمش نتحكم في روحي
مريم:كذاااب...مدامك نسونجي يا سااقط...مكنتش باش تصبر 8 شهور بلا ما تمس مرا
انا:و توا عندي عشرة شهور...يعجبكشي هكا
مريم:تحبني نصدقك توا ؟
انا:مريم يا روح قلبي...لي صار الكل كوم...و إني نخونك كوم آخر...شراز فسختها من حياتي من أول نهار حبت تمشي فيه...و حتى كان مجيتش معرس مكنتش باش نرجعلها...خلي نمسها...و نرقد معاها
مريم:أنا ريت الدبش متاعها في بيتك...و بيت البانو زادة
انا:الحكاية لي حكيتهالك قبل صحيحة...بقات عندي فترة بعدها مشات على روحها...و من أول نهار دخلت فيه لدار...معادش حطيت ساقي و لا رقدت فيها...لين خرجت
مريم:و قبل ؟
انا:ساعات كنت نحشم على روحي نرجع شارب لعندك كنت نهرب منك...و من فكرة لإنتي محبيتنيش
مريم:و نهارتها كانت معاك في البيرو
انا:لتوا منعرفش علاه جاتني صدقني...أصلا قبل ما نستوعب لي صار...جيت إنتي...و فهمت كلشي بالغالط
مريم:أنا جيت من الميساج لي وصلني
انا:ميساج شنية ؟
مريم:تنجم تقراه مبعد...منجمتش نفسخو لتوا...خاطر يذكرني باللي صار
انا:تعرفو الرقم إنتي ؟
مريم:لي كانت تطلبك بيه شراز متاعك
انا:ماااهيش متاااعي...يزززي عااد...و توا تحل فمك إنتي ؟
مريم:علاه كنت باش تصدقني ؟
حطيت يديا زوز على وجها...و كبست عليها...نحكي
انا:أغزرلي مريم...إنتي مرتي مش هي...كان جيت متهمنيش...كان رجعتلها...و راني طلقتك عندي برشا شراز باش تخلص لي عملاتو فيك الكل...و انا زادة باش يجي نهار و ربي ياخو حقك مني...أما منحبكش تشك في حبي ليك...متحسسنيش بالذنب في كل مرة نغزر لعينيك...يزي ذنب بنتي لي باش نبقى هازو على ظهري لآخر نهار في حياتي
مريم:ما نحب حتى شي من هذا...انا و انت علاقتنا كانت واضحة من الأول حسام...اما إحنا عاندنا الكل...و هاك ريت النتيجة...يمكن بعدنا هو أحسن حل لينا زوز
قربتلها اكثر...نبعد في خصلات شعرها بصوابعي...و نحكي بين شفايفها
انا:حتى كان الكل وقف في وجهي مريم...حتى إنتي مانيش باش نطلقك و مانيش باش نخليك...فكر فيا كيما تحب...و أعمل لي تحب...و أمشي لاخر دنيا...باش تبقى مرت حسام الماجري باهي
جات باش تحكي...غطست في شفايفها...لزت ليا أكثر جبدت روحي شوية نحكي
انا:عمري ما حبيت حد كيما حبيتك إنتي...و حبيت كلشي فيك زادة...عينيها...شفايفك...بدنك...كل حاجة فيك عشقتها...و مخلاتنيش نهز عيني في حتى وحدة غيرك
مريم:هزيتهم في شراز
انا:اخطانا من سيرتها توا...آخر وحدة نحب نتذكرها و نحكي عليها...و آخر مرة تقول كلام في حق روحك مرضك ماهوش عيب...و ماكش مريضة اصلا...حط هذا في مخك
مريم:ح...حسام
انا:مممم
مريم:مزلت تحن للماضي متاعك
انا:نحن للمستقبل متاعي معاك
مخليتهاش تقول كلمة أخرى...و عاودت غطست فيها مرة أخرى...نزلتها بيدي عالزربية و نزلت عليها...من شفايفها نزلت لرقبتها...مرة أخرى فقدت الكنترول على روحي و أنا معاها...دوب حليت حزام الروبة...وقفتني تحكي
مريم:ح..حساام يززي...حساام
جبدت روحي شوية...و ترميت عالارض...نسمع فيها تحكي
مريم:م..ماهوش باش يتحل كلشي من زوز كلمات انا..انا لتوا منجمش ناثق فيك كيما قبل...زادة المرة هاذي...منجمش نخذل بابا...يمكن وخرنا برشا عاللكلام هذا...أما معادش نحب نتسرع في علاقتي معاك...مزلت خايفة منك...و مزلت عند قراري زادة
انا:و مزلت تحبني ؟
مريم:ساعات نشفق على روحي...خاطرني مزلت نحبك
تلفت عندها...حطيت يدي تحت راسي...و تبسمت نحكي
انا:هذاكا لي يهمني توا...نجم نطلب منك شي
مريم:لا
انا:معادش تتهرب مني مريم...على خاطر بنتنا
مريم:إمتى مشيت عندها أنت ؟
انا:البارح صباح
مريم:معناها الما لي كان على قبرها
أنا:مممم انا صبيتو
مريم:يا ريت نجم نحضنها مرة اخرى حسام
انا:ايجا تراه...ايجا
قربت مني...حطت راسها على صدري...غرست يدي في شعرها نحكي
انا:يززي توا...كلشي صار بحكم ربي...ما نجمو نبدلو حتى شي...حتى أنا نحب نهزها بين يديا مرة اخرى...اما تبقى حلمة
كبست عليا من غير ما تقول كلمة اخرى...ميهمنيش اذا باش تسامحني توا و لا مبعد...لي يهمني انو باش تكون عندي فرصة نصلح فيها كلشي كسرتو...و كل لحظة خذلتها فيها...نزلت راسي نغزرلها...لقيتها غفات...اخر حاجة توقعتها بعد اللي صار...انها ترقد في حملتي منجمتش نهزها و نطلع للبيت...معادش عندي جهد لحتى شي...نحب نبقى كيما راني...لا أقل و لا أكثر تنهدت بالقاوي...بستها من راسها...كبست على يدها بستها منها...منحبش نضيع حتى دقيقة تجمعني بيها معادش نعرف عالدنيا شنية مخبيتلنا اكثر من هكا بلكشي بعد توا كلشي يرجع لوضعو...و نعيش معاها مرة وحدة كيما الناس الكل.
#سمر♥♥