زهرة🌸

الحلقة الخامسة و الخمسون

🔸️عمر يحكي:
حليت الباب و نزلت...غمضت عينيا بالوقت...خذيت نفس...ريحة قوية...دخلت خشمي...ريحة عندي عليها برشا...سنين طويلة...ريحة الارض لي شميتها حتى قبل ما نحط ساقي عليها...احساس ندرا كيف تملكني حسيت بيدها...لي تغلغلت في يدي...كبست عليها بالوقت...قربتلي اكثر تحكي
زهرة:محلاه الجو هوني
انا:كلشي هوني عندو طعم سبيسيال...باش تعرفو مع الوقت
خذيت نفس مرة اخرى...و تلفتلها...الجو هذا فرهدها اكثر...عديت عينيا على وجها...تبسمتلي...تحكي
زهرة:حاضر باش تقابلهم عمر
انا:صدقني منعرفش...اما مدامك معاايا...كلشي يهون
قربت مني اكثر..حضنتني...نزلت عليها شوية...بستها من راسها...جبدت روحها تحكي
زهرة:خلينا نكملو ملا
هزيتلها براسي ايه...و رجعت للكرهبة...خلطت عليا...و قربت مني...حطت راسها على صدري...مديت يدي كبست عليها...قربها يعطيني قوة غريبة...كان خذيت قرار و رجعت لهوني...يكون على خاطر اختي و امي كهو...باش نحاول نصلح لي نجم عليه...و تو نحاول نخلط عالخدمة فرد وقت...كل شوية نقرب من الدار ذكريات قديمة تعدات بين عينيا...تنهدت بالقاوي نحكي
انا:نحب نقابل هند قبل اي حد
زهرة:وين باش تلقاها توا ؟
انا:اكيد في المعهد
زهرة:باهي
طلعت راسها باستني من خدي...كبست عالفولون...و دورت الكرهبة...كان مزلت متذكر كيما حكاتلي...هو نفس المعهد القديم...جيست كملو خدموه...منعرفش كيفاش وصلت...ركيت الكرهبة و تلفتلها نحكي
انا:هيا ايجا
زهرة:انت باش ترا اختك بعد عشر سنين عمر...على هذاكا برا عندها توا
قربت منها اكثر...بستها من راسها...و نزلت...منعرفش كيفاش وصلت للبيرو متاع المدير...استقبلني بالوقت مديت يدي صافحتو نحكي
انا:عمر بن قاسم
هو:اهلا بيك سي عمر...الاسم هذا معروف عندنا هوني
انا:و انا جيت هوني بخصوص اختي
هو:تقصد انسة هند ؟
انا:ايه
هو:معناها...سي عثمان بوك ؟
انا:بالظبط
هو:اهلا بيك
انا:عيشك...نجم نقابلها توا
هو:اكيد...تو نبعث شكون يخبرها
انا:متخبرهاش لانا هوني
هو:اكيد...و هاني باش نخليكم وحدكم...على راحتكم
انا:باهي عيشك
اول ما خرج...عديت يدي على وجهي...و هزيت روحي وقفت...منعرفش كيفاش باش نقابلها...بعد السنين هذوما الكل...صورتها مزالت محفورة في ذاكرتي...و هي تودع فيا بعينيها...لتوا مزلت نذكر لمعتهم و خضوريتهم لي تحلى وقت تبكي...تبسمت من غير ما نحس...رغم ريت صورها...اما منعرفش علاه حاسس بشي اقوى المرة هاذي...غمضت عينيا على صوت الباب لي تحل...و حليتهم على صوتها تحكي
هند:المدير هوني ؟
منجمتش نردلها...و ملقيتش قوة كافية باش نتلفتلها منعرفش قداش تعدا وقت بالظبط...حتى صوتها معادش خرج...خذيت نفس و تلفت عندها...قلبي دق بالوقت...عديت عينيا على وجها...نفس ملامح امي بالظبط...منجمتش نقرب منها...الكلام هرب مني في لحظة...دمعتها لي نزلت في لحظة...خلاتني ندخل بعضي اكثر...قربت خطوة منها...متردد...نسمع فيها تحكي
هند:ع عم...عمر
هزيتلها براسي ايه...منعرفش كيفاش و امتى...لقيتها في حضني...كبست عليها بيديا زوز...من غير حتى كلمة دموعها ماشية و تقوى...خذيت نفس من ريحتها...توا بديت نستوعب شنية لي خسرتو...سنين هذوما الكل بستها من راسها...نحكي
انا:صغرونتي...اختي الغالية
كبشت فيا اكثر...هزتلي براسها لا...فهمت حالتها...قداش عزت بيا ساعتها...جبدت روحي منها...و كبست على وجها بيديا زوز...نمسح في دموعها و نحكي
انا:ششش يزززي...يزززي عيش اختي
هند:ع عمر...انت بالرسمي موجود هوني
انا:هوني يا روحي انا رجعت على خاطرك انتي
رجعت حضنتني بالوقت...و كبست عليا بيديها زوز تحكي
هند:م مستحيل...انا قاعد نحلم...باز حلمة...انت مرجعتش عمر
غمضت عينيا بالوقت...حتى انا مش مصدق لي انا محضنها...و نشم في ريحتها بعد السنين هاذي الكل...جبدت روحها شوية...طلعت راسها...عدات عينيها على وجهي...تحكي و تضحك
هند:عمر انت هوني بالرسمي...مش مصدقة لانا نجمت نراك مرة اخرى
قربت منها اكثر...بستها من راسها...و تبسمت نحكي
انا:والله مش مصدق لانتي كبرت لهدرجة
هند:برشا حاجات تبدلت في غيابك...مش انا كهو
انا:نعرف عزيزتي...و راسك نعرف...نعرف
قربت منها مرة اخرى...حضنتها بكل قوتي...نسمع فيها تحكي
هند:كلشي باش يتحسن برجوعك
انا:رجعت عزيزتي...و حريتك رجعت زادة...حد ماهو باش يغصب عليك شي
كبست عليا اكثر...عديت يدي على شعرها القصير تبسمت...آخر مرة كان طويل...بالرسمي كلشي تبدل جبدت روحها مني...كبست على يدي تحكي
هند:عمر...انت لازمك ترجع...لاول بلاصة مشيت منها
عرفتها تقصد في قصر العيلة...هزيتلها براسي ايه تبسمت تحكي
هند:خليني نخبر امي ملا
انا:لاااا...مش توا هند
هند:ستنيت عشر سنين عمر...ماكش باش تستنى اكثر
انا:اكيد باش نقابلها...اما مش توا
هند:كيما تحب...زهرة وينها ؟
انا:اللوطة في الكرهبة
هند:تحكي بالرسمي ؟
انا:ممممم
هند:نحب نقابلها...أماانك
انا:باهي صغرون...برا هز دبشك
هند:خليه...تو آسيا تهزو معاها مبعد
أنا:مجنونة والله
قربت مني حضنتني مرة أخرى...دخل المدير بالوقت جبدت روحها تحكي
هند:مسيو انا باش نمشي توا
هو:كمل حصتك عالاقل
هند:لا مستحيل...اصلا منعرفش إمتى نرجع
هو:صارت حاجة ؟
انا:سامحنا مسيو...اكيد باش ترجع من غدوة
هند:عمممر امان
انا:مانيش باش نهرب عزيزتي...مفماش علاه تضيع دروسك
هند:باهي
هو:تو نعملك تقرير الخروج ملا
هند:اعطيه لآسيا...انا باش نمشي مع خويا توا
تبسمت بالوقت...كبشت فيا اكثر...ستأذنت منو...و خرجت...هزت راسها باستني من خدي تحكي
هند:والله انا في حلمة...مستحيل عمر معايا توا
انا:و انا مش مصدق لانتي معايا
هند:ماكش باش تمشي مرة اخرى...مستحيل تخلينا بعد توا يا روحي
انا:اكيد صغرونتي
اول ما وصلت لوطة...طلعت راسي غزرتلها...متكية على الكرهبة...النسمة الخفيفة تلعب بشعرها...تبسمت من غير ما نحس...كل مرة نراها...نحسها اول مرة...برغم عرست بيها...و عشت معاها كلشي...مزلت نعشقها كيما اول مرة ريتها فيها...قربت منا شوية...فقت من سرحتي على صوت هند...تحكي
هند:زهرررة
زهرة:أهلا عزيزتي
قربت منها بالوقت...عنقتها بالقاوي...طلعت راسها غزرتلي...و تبسمتلي فرد وقت...تحاول تأكدلي انو القرار لي خذيتو صحيح...منعرفش شنوة كان باش يصير فيا كان خسرتها وقتها...و عرست بغيرها...ساعات نحس حبها مرض...منجمش نعيش من غيرها...جبدت روحها منها تحكي
هند:والله...طلعت احلى من الصور عزيزتي
زهرة:انتي احلى يا روحي
مدت يدها شدتني...قربت منهم...تبسمت تحكي
هند:مش مصدقة لي نتوما زوز معايا توا
انا:و باش نبقى معاك يا روحي
هند:مانيش باش نخليك بعد توا هاني قتلك
انا:ههههههههه...على أساس باش نخليك تمشي
زهرة:وين انا في الحكاية ؟
انا:ايجا هوني تراه
قربت مني بالوقت...كبست على يدي...بستها من راسها...غزرتلنا تحكي
هند:مجبورة باش ناخو منك شوية عزيزتي
قربت منها...شدتها من يدها...و تبسمت تحكي
زهرة:متخافش عزيزتي...حتى انا باش نكون معاك زادة
هند:نعرف يا روحي
طلعت راسها غزرتلي...تنهدت بالقاوي...مش مصدق لانا قاعد نغزرلها بعد السنين هذوما الكل...تبسمت نحكي
انا:هيا توا
هند:وين ؟
انا:باش نوصلك اول شي
هند:شنننوة...ياخي ناوي تمشي انت ؟
انا:نركح اموري...و نرجعلك
هند:وين باش تمشي
انا:هند يا روحي...انتي استناني و كهو...و ما تخبر حد لانتي ريتني
هند:و امي ؟
انا:هننند...عيش اختي...وعدتك لانا باش نرجع
هند:وين باش تقعدو ؟
انا:وصيت على دار قبل ما نجي...تو نتاكد للامور حاضرة
هند:معناها ماكش باش تعيش معانا
انا:عزيزتي...مظطر لهذا الكل...و معنديش استعداد نقابل حتى حد فيهم توا
هند:باهي...اما اكيد باش ترجع...باش نبقى نستنى فيك
انا:وعد
هند:باهي ملا
انا:ايجا اركب
زهرة:هند اركب بحذا خوك هيا
هند:لا عزيزتي مانيش باش نفك بلاصتك من اول نهار لي يهمني نتوما زوز معايا و كهو
حلت الباب تلاني و ركبت...غزرت لزهرة...نحكي
انا:هيا عزيزتي
هزتلي براسها ايه...حليتلها الباب ركبت و خلطت عليهم طول الثنية و انا نسمع في هند تحكي...حكينا على كلشي...كان على حكاية العرس...خاطر مش وقتها جملة محسيتش بروحي كيفاش وصلت...شديت الفران بقوة نسمع فيها تحكي
هند:متأكد من قرارك ؟
منجمتش نرجع عليها...كبست عالفولون بيديا زوز رجعت سنين لتالي...الثنية لي خرجت منها على ساقيا رجعتلها بكرهبتي...رجعتلها بعدما وصلت وين حبيت و خذيت المرا لي حبيتها..منعرفش شنوة لي بقى ناقصني توا...منعرفش على روحي كيفاش نزلت من الكرهبة طلعت راسي...نغزر لدار لي تربيت و عشت فيها..لصغري لي تعدا قدامي في لحظة...غمضت عينيا بالوقت...و رجعت حليتهم...شي اقوى مني...خلاني نقرب بخطوات رزينة...معادش يهم اذا باش نواجه حد توا و لا مبعد أول ما دخلت...كلامو تعاود في راسي بالحرف...كلام منسيتوش رغم السنين...<< كان مشيت من هوني يا ولدي الغالي...رد بالك تحط ساقك في ارضي مرة اخرى...و تنسى انو عندك عيلة خليتها وراك لا تكلمنا و لا ترجع لهوني...و كل حد هوني يكسر كلمتي ينجم يمشي معاه من توا>> يمكن توا معادش يهمني اذا طردني مرة اخرى...اللي يهمني نحضن امي مرة وحدة و كهو...قلبي دق بالقاوي...كي سمعت صوتها تحكي
امي:مليكة...حضر الطاولة برا اليوم...و اعمل زيادة منعرفش علاه حاسة لي فما شكون باش يجي
مليكة:باهي...توصيني على حاجة أخرى
امي:لا...سي عثمان ميطولش و يوصل...حطلو دواه على جنب...و تو نقوم نعاونك
مليكة:متقلقش روحك...أرتاح خالتي
امي:عيشك
تنهدت بالقاوي...خطوات هزتني من غير ما نحس...نحب نراها و كهو...قربت من غير ما نعمل حساب...قداش بقى مسافة بينا...في اخر خطوة...وقفت حتى قبل ما تشوفني...هزيت راسي بالسيف...نغزرلها...باقي واقفة في بلاصتها...منجمتش نقرب خطوة اخرى...معادش نعرف شنوة لي قاعد نحس فيه توا...كبرت اكثر...على اخر مرة ريتها...نفس الغزرة...نفس الوقفة...نفس الفولار لي تحطو ديما...باقي نغزرلها من غير حتى كلمة منعرفش قداش من خطوة بقات بينا...قداش مزال وقت باش نحضنها...و لا فاش قاعد نستنى...أما منجمتش نقرب خطوة اخرى...نغزرلها ماشية و تقرب مني...عينيا تركزو فيها...وقفت قدامي بالظبط...تغزرلي و كهو من غير حتى حركة...هزت يدها بالسيف...حطتها على خدي...غمضت عينيا بالوقت...حطت يدها الثانية على صدري...تتحسس فيا...تعدي في يديها على وجهي و صدري...دموعها نزلو بالوقت...حرقوني اكثر...تخرج في صوتها بالسيف
امي:و ولدي...ا انت ولدي...ع عمر...عمر ولدي
كبست بيديها زوز على سوريتي...و تحكي فرد وقت
امي:ع عمر...انت رجعت...انت رجعت...ولدي رجع
حضنتني بكل قوتها...تحاول تخبيني عندها...منجمتش نتحرك...منجمتش حتى نهز يدي...دمعة تحرق نزلت تجري على خدي...شنوة لي ضيعتو...كيفاش نجمت نمشي من غير ما نرجع نتلفت مرة اخرى...شنية باش نرجع من العشر سنين لي تعدات...معادش نعرف من شنية حرمت روحي بالظبط...انا عشت الوقت هذا الكل من غير عيلتي...من غير امي...مشيت و مغزرتش ورايا كيما طلب مني بالظبط...هزت راسها...غزرتلي تحكي
امي:عممممر...ولدي...ولدي الغالي
نزلت عليها اكثر...حضنتها بيديا زوز...كأني عامل عملة و نحبها تحميني مرة اخرى...صوت بكاها قوا اكثر...و دموعي نزلو اكثر...كبست على سوريتي و نزلت عالارض نزلت معاها...كبست عليها بيديا زوز...نحكي
انا:ا امي...انا رجعت...انا هوني...هيا قوم معايا توا متعملش في روحك هكا...امانك
هزت يدها...تمسح في دموعي...و تبوس فيا من وجهي عديت يدي على خدها...و بستها من راسها نحكي
انا:هيا امي...هيا امانك
كبست عليها...وقفتها معايا...كبست عليا اكثر...قعدتها عالكرسي...و قعدت بحذاها...قاعدة تعدي في يديها على بدني و تحكي
امي:عمممر...يا روح امك...انت رجعت...رجعت يا عزيز امك
انا:رجعت يا امي رجعت
هزت راسها...تعدي في عينيها على وجهي...قداش توحشتها...قداش تعدا وقت علينا...من اخر مرة حضنت فيها امي...طلعت راسي نغزر لهند و زهرة...زوز يبكو مع بعضهم...تنهدت بالقاوي نحكي
انا:يزي عاد فاطمة...كان عرفت لانت باش تبكي هكا...مكنتش رجعت
امي:لااا اللطف...مش مصدقة لي ريتك قبل ما نغمض عيني
انا:شششش لطف عليك...ماكش باش تخليني بعد ما رجعتلك
امي:خليني نشبع من وجهك و من ريحتك عمر...خليني نغزرلك...يا روحي
انا:اهدا امي...انا معاك توا...و حتى شي اخر ماهو باش يبعدني عليك
امي:رد بالك تمشي مرة اخرى...رد بالك تخليني
انا:مستحيل...مش بعد توا يا امي...سامحني امانك
حطت يدها على خدي...و غزرتلي في عينيا...تحكي
امي:رد بالك...تطلب سماح من حد...دعواتي كانو معاك ديما...متعداش عليا نهار من غير ما نذكرك يا روحي
عنقتها بالوقت...كبست عليها بيديا زوز...مش مصدق لانا رجعت لدار هاذي مرة اخرى...و نجمت نرا امي و نحضنها زادة...جبدت روحي نحكي
انا:امي...صحيح رجعت...اما المرة هاذي مانيش وحدي
طلعت راسي غزرتلها...عدات يدها على خدها...تبسمت نحكي
انا:زهرة مرتي
مديتلها يدي...قربت مني...حطت يدها في يدي...كبست عليها...حسيتها متوترة...اول ما وقفت امي...وقفت في جرتها...حاوطت وجها بيديها زوز...تحكي
امي:مرحبا بيك...بنيتي
زهرة:عيشك أمي
أمي:ايجا عندي تراه
قربت منها...حضنتها بالوقت...نحبها حتى هي تحس روحها بين عيلتها زادة...جبدت روحها تحكي
أمي:هند إيجا بنتي
هند:قتلك لهو باش يرجع
أمي:أقعد ولدي
كبست على يدي...رجعت قعدت معاها...و حطيت يدي لاخرى على يدها نحكي
انا:امي...يا روحي...انا مظطر نمشي توا
امي:و وين ؟
انا:هوني امي...اما منحبش نقابلو توا...و متأكد ماهوش باش يفرح بشوفتي
امي:مستحيل...انا اكثر حد نعرفو...ايجا معايا
كبست على يدي...هزيت روحي معاها...نتبع فيها...و نعدي في عينيا على كل شبر عشت فيه...وصلت لبيتي قلبي دق بالوقت...مدت يدها حلتها...دخلت وراها...باقي كلشي في بلاصتو كيما خليتو قبل...كأنو ممشيتش من هوني جملة...قربت شوية...عديت يدي على كتبي
قربت مني تحكي
امي:ريت البيت هاذي...شهدت على دموعي...و على دموع بوك...لي ما خلى حتى حد يراهم...ريت الصورة هاذي
طلعت راسي نغزرلها...صورتي انا و مصطفى...نهار نجح في الفريق...تبسمت بالوقت...منعرفش قداش تعدا على صورة هاذي بالظبط...فقت من سرحتي على صوتها
امي:كان ياقف بحذا صورة هاذي ساعات طويلة...من غير ما يتعب...بوك برغم منعنا من انو نجبدو سيرتك في الدار...اما عمرو ما نساك...بالعكس...ظهرو تكسر...و قلبو قسى اكثر...حط هذا في بالك...عيش ولدي
خذيت نفس بالسيف...و تلفت عندها...غزرتلها نحكي
انا:و انا عمري ما نسيت حد طول السنين هاذي امي...انا دخلت لهوني على خاطرك...اما الدار لي تطردت منها مانيش باش نرجعلها...على هذاكا سامحني امانك
أمي:وين باش تمشي توا ؟
انا:خذيت دار قبل ما نجي...هند تعرفو
امي:استناني هوني
اول ما خرجت...عديت يدي عالصورة...زعمة شنوة لي تبدل بعد سنين هاذي...زعمة باش نعرفو كان نشوفو مرة أخرى...هند عطاتني صورهم الكل من قبل كان هو..اكيد ماهوش باش يتبدل...تبسمت من غير ما نحس تلفت كي عاودت دخلت...قربت مني حطت مفتاح في يدي تحكي
امي:ماكش باش تمشي لحتى بلاصة
انا:شنوة هذا امي ؟
امي:دار خالتك
انا:مستحيل...شباش نعمل فيه أنا
امي:بنت خالتك عايشة معانا توا...يعني الدار فارغة جيست يعديو فيها العطلة...كي يحبو يبدلو جو...ابقى فيها يرضى عليك...منحبش نتحير عليك...تو تلقى فيها كلشي تحتاجو
كبست عليه...و هزيتلها براسي ايه...منحبش نكسر بخاطرها...بستها من راسها...نحكي
انا:وقيت امي...باش تظلام الدنيا...لازمني نمشي توا
امي:اوعدني...لي ماكش باش تبعد مرة اخرى
انا:وعد امي
حضنتني مرة اخرى...كبست عليها بيدي نطمن فيها خذيت نفس و جبدت روحي...نزلت معاها...باقي هند واقفة مع زهرة...قربت منهم نحكي
انا:وقيت باش نمشيو عزيزتي
هند:منجمش نجي معاكم
انا:من غير ما توحل في مشاكل معاه...من غدوة انا نجي نهزك
هند:باهي
منعرفش كيفاش نجمت نخرج و نخليهم ورايا مرة أخرى...طلعت راسها غزرتلي تحكي
زهرة:لباس عزيزي ؟
انا:لباس يا روحي...هيا أركب
هزتلي براسها ايه...و ركبت...اول ما حليت الباب...جات عيني في عينها...اخر وحدة توقعت نراها بعد السنين هذوما الكل...عينيا تركزو في وجها...منعرفش شنية لي حسيتو بالظبط...متبدلتش برشا...جيست ملامحها بانت اكثر...متوقعتش باش تكبر فيسع..كبست عالشال متاعها و نزلت عينيها...دخلت لدار تجري...هاربة مني تنهدت بالقاوي...و ركبت...نعرف لي مزالت متغشة مني و مش بعيد تكون نساتني جملة...خدمت الكرهبة بالوقت..بقيت نسوق من غير حتى كلمة...معادش نعرف في شنوة نخمم بالظبط...نزلت البلار شوية خذيت نفس...اول ما وصلت تلفت باش نحكي معاها...لقيتها غفات...تبسمت على جنب...بعد اللي عديتو اليوم...هي كهو لي تخليني نرتاح...عديت صوابعي على خدها نحكي
أنا:زهرة...صغرونتي...قوم توا
حلت عينيها مروهجة...قربت مني...حطت راسها على صدري تحكي
زهرة:نحب نرقد
أنا:هيا عزيزتي...تتعشى مبعد ترقد
طلعت راسها شوية غزرتلي...عوجت فمها...تحكي
زهرة:مفما حتى شي نتعشاو بيه
ضيقت عينيا...و نزلت عليها شوية...خطفت بوسة من شفافها نحكي
أنا:مممم بالنسبة ليك إنتي...أما أنا عشايا حاضر ديما
هزت يدها...حطتها على رقبتي...و حضنتني اكثر تحكي
زهرة:تعرف لأنا نحبك
انا:مممم و أنا نعشق والديك
زهرة:نعرف
انا:هيا توا...تعرفني منجمش نشد روحي عليك
زهرة:ممممم باهي
باستني من خدي و جبدت روحها...خذيت نفس و نزلت نغزر لدار...حتى الدار هاذي...عندي فيها برشا ذكريات طلعت درجات هذوكا و حليت الباب...خلطت عليا بالوقت...دخلت ورايا...تحكي
زهرة:أنت اخترت دار هاذي ؟
أنا:لا...الدار هاذي متاع خالتي
زهرة:ياسر محلاها
انا:مممم...برا أرتاح...باش نهز لي فاليز و نرجع
زهرة:باهي
خليتها و خرجت...ريت كرهبة جاية...ضيقت عينيا...كي ركا قدامنا و نزل يحكي
محمود:سيييي عممممممر
ترمى عليا قبل ما نستوعب...حضني...و يضرب بيديه على ظهري...تبسمت بالوقت...ماهوش باش يتبدل راجل هذا...جبدت روحي نحكي
انا:اهلا محمووود...كيفك ؟
محمود:انت كيفك...متوقعتش لي باش ترجع...والله كان مش خالتي فاطمة منعرفش لانت هوني
انا:متبدلتش يا راجل
محمود:قبل ما ننسى علاه جيت
رجع للكرهبة يجري...محمل اكثر من حاجة في يدو...و قرب مني يحكي
محمود:هذا العشى بعثاتو خالتي فاطمة
انا:باهي محمود...لحظة
هزيت لي فاليز و سبقتو...خلط عليا...حطيتهم من يدي و شديت عليه...نحكي
انا:مرسي محمود عيشك
محمود:من غير مزية سي عمممر...تنجم تطلبني في اي وقت
انا:ههههههه باهي...تصبح على خير
محمود:و انت بخير
شيعتو و سكرت الباب...نغزرلها جاية عندي...و تحكي
زهرة:شكون ؟
انا:شوفور متاع سي عثمان...هوكا فاطمة بعثت العشا
قربت مني...شداتو من يدي...حطاتو عالطاولة و قربت مني...عنقتني تحكي
زهرة:نعرف لي تعبت برشا...اما كلشي يهون عمر و باش ترجع مع بوك احسن من الاول...صدقني
كبست عليها بيديا زوز...و غرست راسي في رقبتها نحكي
انا:كلشي يهون كي تبدا انتي معايا
زهرة:هيا عزيزي...لازمك ترتاح توا...لين نحط العشا
انا:باهي جبدت روحي منها...هزيت لي فاليز و دخلت للبيت...بدلت دبشي...و تعديت لصال دوبان غسلت وجهي...تفرهدت شوية...و رجعت لصالة...لقيتها حطت العشا...قعدت معاها...دوب نجمت ناكول و رجعت للبيت قعدت على طرف السرير...و حطيت راسي بين يديا نفكر في اللي تعدا عليا...متوقعتش باش ندخل الدار هذيكا مرة اخرى...رغم فرحتي بامي و هند...فما غصة واحلة في حلقي...حسيت بيها تبدل في دبشها في لحظة...قعدت قدامي...عدات يدها على ظهري تحكي
زهرة:عمممر...يا روحي...نعرف لانت موجوع توا...اما لازمك تقابل بوك...لازمك ترتاح...يزي لي تعدا عليك
قربت منها شوية...حطيت راسي على صدرها...نحكي
انا:انا مغلطتش يا زهرة...كان لازمني نختار و اخترت عمري ما كرهت الارض هاذي...اما حبيت اهدافي اكثر هو لي محبش يفهمني...هو لي محاولش حتى يسمعني
كبست عليا بيديها زوز...و باستني من راسي تحكي
زهرة:باش يسمعك و يفهمك زادة...صدقني الوجيعة هاذي الكل توفى بعد ما تحضن بوك
أنا:إن شاء الله يا روحي
زهرة:هيا حبي...لازمك ترتاح توا
أنا:باهي
تسطحت بجنبها...و حطيت راسي على صدرها مرة أخرى...نحب نرتاح و كهو...عديت يديا زوز ورا ظهرها كبست عليها...غمضت عينيا...نتحسس في صوابعها...لي تغرست في شعري...لين هزني نوم و رقدت.
#زهرة🌸
#سمر_القايد💜