زهرة🌸

الحلقة التاسعة و الأربعون

🔸️عمر يحكي:
ركيت الكرهبة و نزلت...خلطت عليا...شدت شوية من القضية و سبقتني...حسيتها مش قد بعضها...اما حبيت نتلف الحكاية...منحبش نقلقها اكثر...اول ما دخلنا لدار غزرتلي تحكي
زهرة:شنوة تحب عالعشا ؟
انا:باش طيب من توا
زهرة:مممم يعني البروقرام يبدا من توا عزيزي
انا:مممم باهي...اعمل لي تحب عليه...و كان تحب خليني نعاونك
زهرة:لا انت مريض توا...و باش تمشي ترتاح شوية لازمك تحضر روحك للخدمة
انا:بااهي...اما متعبش روحك برشا
زهرة:باهي عزيزي
قربت منها...بستها من راسها...و ركحت معاها القضية خليتها في الكوجينة و خرجت...عملت دوش و بدلت دبشي...ترميت عالسرير...لتوا نحس في روحي تاعب...و منعرفش عالفرخة لاخرى شعاملة في الكوجينة...نوقز تليفوني بالوقت...مديت يدي جبدتو...استغربت كي ريت رقم جديد...كنت باش نعلق اما هزيت في اخر لحظة نحكي
أنا:تفضل
هند:ع عمر
هزيت روحي تقعدت شوية...قلبي دق بالوقت مع صوتها...عندي برشا نحب نوصللها اما منجمتش...خذيت نفس نحكي
انا:صغرونتي...وينك لتوا...تعرف قداش حاولت نطلبك من مرة ؟
هند:نعرف...أما بابا شلق لي كنت نحكي معاك...و فكلي تليفوني
انا:من وين قاعدة تحكي توا
هند:من عند صحبتي
انا:و كيفاش عرف بالحكاية ؟
هند:ك..كنت نحكي لامي عليك
انا:علاه حكيتلها...مش قلنا باش يقعد كلشي بيناتنا
هند:منجمتش...و زيد أمي تعبت برشا بعد ما مشيت انت...سنين و هي تنادي باسمك...عمر أمانك أرجع لعندنا...أنا و أمي و مصطفى بحاجتك...متاخوش براي بابا...يتغشش منك أيامات...مبعد يسامحك
انا:شششش رد بالك تبكي...رد بالك صغرونتي المزيانة متعرفش قداش توحشتك انا...و قداش توحشت نسمع صوتك...تعرف لإنتي عندي بالدنيا الكل
هند:حتى أنا توحشتك برشا يا عمر...أنت كهو لي تنجم تفهمني...يا ريت نجم نراك قدامي مرة اخرى
انا:يزززي عزيزتي..و راسك كلشي باش يوفا...و باش نرجع على خاطرك...إنتي كهو اعطيني شوية وقت
هند:فايت عشر سنين...الوقت ماشي و يفرقنا...أمي باش تموت بحصرتها عليك
انا:متقولش هكا يا روحي...المرة هاذي الوقت باش يكون لصالحنا إحنا
هند:باش ترجع عمر
انا:منعرفش...منجمش نوعدك...اما باش يكون فما حل أكيد
هند:إن شاء الله عزيزي
انا:إنتي شعاملة ؟
هند:سجلت في معهد هوني
انا:صااار...متاع شنوة ؟
هند:معهد الموسيقى و الفنون
انا:والله يطلع منك...و كيفاش سمحلك ؟
هند:والله قتلو...يا تخليني نمشي لتونس نقرا...و لا نقرا هوني...مش بعد ما خذيت الباك تدفني في الدار
انا:و إقتنع بالفكرة ؟
هند:يعمل هكا باش يخليني نرضى بفكرة العرس
انا:شننننوة...فاش تحكي ياخي ؟
هند:مش ولد عمي يحب يعرس بيا من بكري
انا:نععععم تحكي على علي مش غيرو
هند:مممم
انا:متخافش...و رد بالك توافق عليه...من بكري مش ولد اصل انا نعرفو...و كان شد فيه صحيح...كلمني...المرة هاذي نعرف كيفاش نحطهم عند حدهم
هند:ماكش باش تسمحلهم مش هكا
انا:اكيد يا روحي...مدامني موجود ما تخاف من حتى شي
هند:موجود و مش موجود عمر...كان نقلهم..خويا واقف معايا حد ماهو باش يصدقني
انا:يززي متبكيش...أعمل لي تحب عليه...و ما تخمم في حد...و ما تخاف من حتى حد..انتي كلمني و كهو
هند:نعرف عزيزي...هاني باش نسكر توا...أمي تعيطلي أما كان تحب كلمني مبعد...صحبتي بايتة بحذايا الليلة
انا:باهي صغرون...رد بالك على روحك و على
سكت الكلام وحل في حلقي...توحشت أمي عاللخر توحشت مصطفى و هند و حتى بابا...سنين طويلة نسيت فيها كلمة امي...منعرفش اذا باش ينفعني الندم و لا لا...اذا نجم نرجع و لا لا...اما كلشي نحب عليه توا نعيش معاهم نهار اخر...نهار واحد و كهو...فقت من سرحتي على صوتها تحكي
هند:و على أمي زادة
انا:مممم
هند:باهي عمر...أما كان ترجع...أمي تولي مليحة...هي بحاجتك انت...مش بحاجتنا...كان تحبنا بالرسمي...ارجع باش أمي ترجعلنا
انا:إن شاء الله...هيا توا مطولش عليها
هند:باهي يا روح أختك
تبسمت بالسيف و نزلت تليفون..عديت يدي على وجهي رغم البعد أما هند نحسها قطعة مني...مستحيل نخلي بابا يدمرها بقراراتو لي ديما يحطها صحيحة طلعت راسي على صوتها تحكي
زهرة:العشا حاضر
بقيت نغزرلها...حسيتها مش قد بعضها...مخلاتنيش نركز في وجها أكثر...و خرجت...خذيت نفس و خلطت عليها نغزر لطاولة...لحقت تحضر هذا الكل...نزلت عليها شوية بستها من راسها...و جبدت الكرسي قعدت قدامها ما نجمت ناكول شي...تفكيري الكل في الكلام لي قالتو هند...حتى هي ما قالت حتى كلمة...تحرك في الشوكة غزرتلها نحكي
أنا:شفما زهرة ؟
زهرة:حتى شي
انا:شبي حالتك هكا ؟
زهرة:شي...نخمم في قرايتي و كهو
منعرفش علاه حسيت الموضوع أكبر من هكا ببرشا...أما منحبش نظغط عليها...دوب كليت...و هزيت روحي قمت نحكي
انا:هيا قوم معايا...لازمك ترتاح شوية
زهرة:لا...هاني باش نلم الكوجينة قبل
انا:خليها...مش وقتها
زهرة:نحب نلمها توا
انا:باهي كيما تحب
خليتها و خرجت...وصلني ايمايل من عند حسام...هزيت البيبسي و ترميت عالسرير...نقرا في تفاصيل المشروع و لا نحب نلهي روحي...منعرفش قداش تعدا وقت بالظبط...غزرتلها كي دخلت هزت دبشها من القارد روب من غير حتى كلمة...بقيت نتبع فيها بعينيا...لين خرجت سكرت البيسي...و تكيت راسي لتالي...نحب نهدي روحي...خاصة و الأمور دخلت بعضها أكثر...تعدا الوقت رزين عاللخر...تنهدت بالقاوي...و هزيت روحي قمت مشيت لصالة...وقفت على جنب...و تكيت عالحيط بمرفقي...نغزرلها قاعدة عالارض كي العادة...و حاطة كدس أوراق قدامها...شعرها لتوا مبلول...ضيقت عينيا نحكي
انا:فاش تعمل ياخي ؟
زهرة:نقرا
أنا:توا ؟ تعرف قداش ساعة ؟
زهرة:لازمني نخلط عليهم
انا:مزال عندك وقت...قوم ترقد توا
زهرة:منحبش
قربت منها...قعدت عالفوتاي مقابلها...و شبكت يديا زوز نحكي
انا:شنوة الحكاية ؟ نسمع فيك
زهرة:حتى شي
انا:هز راسك و إنتي تحكي معايا
زهرة:عمر...امانك يزي...مفما حتى شي
انا:لا فما...تصرفاتك و غزرتك و صوتك...الكل يقول لي فما شي...و أنا نسمع فيك
زهرة:عندك شكون أهم مني...برا اتلهى بيها و اخطاني أنا...تاعبة و نحب نكمل نحفظ
انا:شنننوة...ياخي بديت تهبل...و لا شنية الحكاية
زهرة:لا لباس عليا
دوب كملت كلامها...نزلت دمعة منها...مسحتها بكف يدها...و رجعت غطست في الأوراق...تحب تتهرب مني هزيت روحي جبدت الطاولة بيدي...غزرتلي مستغربة كبست على زندها و وقفتها نحكي
انا:نسمع فيك ؟
زهرة:سيببني فاش تعمل ؟
انا:اغزرلي هوني...آخر مرة نسألك فيها...أنطق و حل فمك...متخرجنيش من عقلي في هالليلة الكلبة أحسنلك
زهرة:ش..شنوة تستخايل في روحك أنت...كي مزلت تحبها لتوا...علاه عرست بيا...علاه جبتني نعيش معاك هوني
انا:شنننوة ؟
زهرة:هوكا مراد مات...و مفماش علاه تبقى معايا...مش أنت خايف عليها كان تعرس بحد غيرك...طلقني و أرجعلها
بقيت نغزرلها مستغرب...نحاول نفهم الكلام لي قاعدة تقول فيه...كبست عليها اكثر نحكي
انا:زهرة واعية لروحك...فاش قاعدة تحكي ؟
هزت يدها...تضرب فيا لصدري...تحاول تجبد روحها و تحكي فرد وقت
زهرة:سمعتك قبيل و أنت تحكي معاها...سمعتك و أنت تقلها توحشتك و توحشت صوتك...و باش نرجعلك ياخي شنوة تستخايل في روحك...كيفاش تحكي معاها هكا و أنت معايا عمر
عديت عينيا على وجها...دموعها ماشية و تقوى...رخفت يدي على زندها...بقات تغزرلي ندرا كيف تستنى فيا نحكي...شدني ضحك...خاطر فهمت لهي سمعتني و أنا نحكي مع هند...غزرتلي ندرا كيف...دموعها نزلو أكثر عرفت لي غاضتها الفازة...أصلا من بكري تتحسس من كلشي...يمكن الفراغ لي خلقو مراد داخلها...خلاها تحس هكا...جات باش تمشي...رجعت جبدتها عندي...حضنتها خذيت نفس مزلت شايخ عليها...متوقعتش باش تغير لهدرجة...عديت يدي على شعرها نحكي
انا:يززي...منقصدش
زهرة:س..سيبني عمر
انا:ياخي الغيرة هاذي الكل منين تاخو فيها انتي اه
زهرة:تفرك فيهم عليا...باهي يا عمر...أنا الغالطة...جاية نحكي معاك...توا فهمت علاه جات عندي الصباح
ضيقت عينيا...نحاول نستوعب كلامها...طلعت حاجبي نحكي
انا:شقصدك ؟
زهرة:تعرف على شكون نحكي...هاك من قبيل تقولها علاه حكيت معاها ؟
انا:زهرررررة...شنية حكايتك ليلة...هاني نحاول نساير فيك...أما منجمتش...ملا حل فمك...و قلي شبيك
زهرة:نحكي على سيرين لي كانت خطيبتك و لا لي باش تكون مبعد...معادش نعرف
انا:لحظة...لحظة...انتي حكيت مع سيرين الصباح
زهرة:على أساس متعرفش بالحكاية أنت
انا:استغفر الله...ناوية تجلطني ياخي...حبس ¤¤¤¤¤ البكا هذا توا...و جاوبني
زهرة:ع علاه مقتليش لسيرين كان عندها علاقة مع مراد...شبيك خبيت عليا...ياخي انت قصيتها معاها لهذا السبب عمر...لتوا مزلت تحبها مش هكا
انا:شنوة لي سمعتو منها ؟
زهرة:هذا لي يهمك توا...كنت تنجم تسألها...باز باش جاوبك
عديت يدي على وجهي...نهدي في روحي...خرجت من صالة و خلاتني واقف وحدي...خذيت نفس...حسيت روحي كثرتلها أكثر...توا فهمت شبيها...باز بعد اللي صار مع سيرين...و سمعتني نحكي مع هند...تخلط عليها الكل...خلطت عليها...حليت الباب و دخلت...شدت بلاصتها الفرخة و باش ترقد...قربت منها...ترميت بجنبها و مديت يدي...حطيتها على كرشها...جبدتها عندي نحكي
انا:تعرف لإنتي مجنونة
حاولت تجبد روحها...كبست عليها اكثر...و نزلت بستها من رقبتها...نحكي
انا:كنت نحكي مع هند...مش مع سيرين...كنت تنجم تسألني...قبل ما تعمل في روحك هكا
تلفتت عندي شوية...و طلعت راسها...غزرتلي ندرا كيف تحكي
زهرة:ش..شكون هند زادة ؟
تبسمت و أنا نغزرلها...هزيت يدي...بعدت خصلات شعرها بصوابعي نحكي
انا:أختي
زهرة:ك..كيفاش ؟
انا:كيما سمعت
زهرة:شتقصد...كيفاش أختك عمر..شبيني انا منعرفهاش
انا:يا بنتي اهدا...وحدة وحدة...شرايك تتعرف عليها الساعة
زهرة:إمتى ؟
انا:توا
زهرة:باش تكلمها توا
انا:ممممم
هزتلي براسها ايه...و جبدت روحها مني تقعدت...مديت يدي هزيت تليفوني...و تقعدت شوية في جرتها...طلبتها بالوقت...خاطر نعرف لمزالت قاعدة لتوا...خاصة و صحبتها بايتة عندها...هزت عليا تحكي
هند:عمر كنت نعرف...لي باش تعاود تطلب
حطيت مكبر...و نزلت تليفون شوية...غزرتلها نحكي
انا:لتوا لا رقدت ياخي
هند:لا عندي مدة مقعدتش مع صحبتي...و زيد كنت نستنى فيك تطلب
انا:صغرون باش نعرفك على حد توا
هند:ممممم شكون ؟
انا:مرتي
هند:شننننوة...شتقصد بمرتي...عمر ياخي انت امتى عرست...و علاه محكيتليش...عالاقل كنت تخبرني انا برك...ربي يسامحك...هاني انا نحكيلك كلشي...حرام عليك والله
انا:هننند اهدا عزيزتي...هوكا تسمع فيك توا
هند:بالرسمي
انا:ممممم
هند:سيرين مش هكا ؟
غزرتلي ندرا كيف...لتوا مغزلة من الفازة...خذيت نفس نحكي
انا:لا هند
هند:شنية اسمها
عديت عينيا على تفاصيل وجها...لي مخلطة بدموعها...منعرفش شنية السر في اسمها هي بالظبط علاه نحسو يعطيني قوة...تبسمت نحكي
انا:زهرة
هند:زهرة تسمع فيا ياخي ؟
هزت يدها عداتها على خدها...و قربت مني شوية تحكي
زهرة:ممممم هند
هند:سامحني منجمتش نتعرف عليك قبل...اصلا اليوم برك باش نجمت نوصل لعمر...اما اكيد باش تكون عندنا فرصة اخرى...مش هكا
زهرة:اكيد عزيزتي
هند:عمر...علاه مجوش مع بعضكم لهوني...صدقني امي باش تفرح بيكم برشا
انا:هننند...مش وقتو الموضوع هذا عزيزتي
هند:باهي باهي...ما قلت شي
انا:باش نعلق توا...كان نجمت كلمني الصباح باهي...و عالاقل خليني نوصلك المرة هاذي
هند:باهي يا روحي...ليلة سعيدة و انتي زادة زهرة
زهرة:عيشك هند
انا:عيش اختي تصبح على خير
هند:و نتوما بخير
علقت عليها...و حطيت تليفون على جنب...تلفت عندها نحكي
انا:ارتحت توا
زهرة:ايه...باش نمشي نكمل نقرا على روحي
جات باش تقوم...جبدتها من يدها...كبست عليها...نحكي
انا:ترص هوني...مزال مكملتش كلامي
زهرة:شنوة ؟
انا:شنية لي صار صباح مع سيرين ؟
زهرة:حتى شي
انا:زهرة...سألتك جاوبني...هاني موسع بالي معاك لتوا
زهرة:و الا شباش تعمل ؟
انا:ما نعمل حتى شي...تعرفني منحبش فيك...اما انتي زادة متعقدش الحكاية اكثر
زهرة:باهي انت لي باش جاوبني توا
انا:نسمع فيك
زهرة:شبيهم تصاور لي بعثهملك مراد مزالو عندك لتوا
انا:كهو الحكاية
زهرة:جاوبني امانك...علاه مزالو في تليفونك لتوا
انا:ايجا عندي ساعة
قربتلي بالوقت...تكات عليا...عديت يدي على شعرها نعرف ليةحكاية مراد...مزال باش تأثر على حياتنا برشا و أي شي يتعلق بيه...يخليها تخمم بسلبية...خذيت نفس نحكي
انا:و راس حبي...من نهارتها معادش ريتهم...و بعد اللي صار وقتها...راحت الحكاية من مخي جملة
زهرة:بالحق ؟
انا:زهرة...نحي الافكار هذوما من مخك...مستحيل نخمم نضر عبد باش ننتقم من اي حد...مدامني معاك توا...معناها نحبك...و عرفت بالحكاية...بعد ما قصيتها مع سيرين...شك في كلشي زهرة...كان حبي ليك واضح باهي
زهرة:فكرت لانت تحكي مع سيرين
انا:مجنونة...سيرين تقريب شهرين محكيتش معاها...و مقابلتهاش اصلا...من الاول كان طريقنا واضح...اكبر قرار غالط خذيتو في حياتي...وقت قررت نعرس بيها
زهرة:قالت لانا سبب خاطرك خليتها
انا:و انتي علاه تسمع في كلامها
زهرة:والله ما صدقتها...اما تصدمت كي سمعتك تحكي في التليفون
انا:و امتى كنت ناوية تخبرني لانتي قابلتها
زهرة:منعرفش
انا:باهي...باهي تو انا ندبر راسي
زهرة:شباش تعمل ؟
اناانسى الحكاية توا
زهرة:متحكيش معاها عمر...حتى هي مزالت موجوعة يمكن على هذاكا تصرفت هكا
انا:باهي عزيزتي...قوم شيح شعرك...احسن ما تمرض
زهرة:لا منحبش
كبشت فيا اكثر...و طلعت راسها...غزرتلي تحكي
زهرة:علاه محكيتلكش على هند من قبل
انا:هاك تعرفت بيها توا
زهرة:عمر شبيك بعيد عليهم لهدرجة ؟
انا:انسى الحكاية توا
زهرة:نحب نعرفها
انا:زهرررة...مش وقتو توا
زهرة:ملا امتى وقتو...شبيك متحبش تحكيلي
انا:باش يجي وقت و تفهمني اكثر زهرتي...باش تفهم انك لازمك تخلي برشا حاجات وراك باش تعيش
زهرة:تنجم تخليني انا زادة ؟
انا:مستحيل...كنت ديما نقول انو سهل برشا الواحد يعيش وحدو...اما مش بعد توا زهرة...انا منجمش نعيش من غيرك
زهرة:و انا زادة...خفت برشا...تخيليني و ترجعلها
انا:اخر مرة تفكر بالطريقة هاذي...و مهما صار خبرني خاطر مستحيل نسامحك و نعديهالك المرة الجاية مفهوم
زهرة:باهي...عمر ياخي انت متحبش ترا امك مرة اخرى
نزلت عليها شوية...بستها من راسها...و جبدت روحي شوية نحكي
انا:سكر عالحكاية توا...الموضوع تسكر من سنين و منحبش نحكي فيه
زهرة:عندك اختك وحدة كهو
انا:و مصطفى خويا زادة
زهرة:تمنيت يكون عندي اخوة انا زادة
انا:مش ديما يصير لي نحبو عليه
زهرة:عندك حق
انا:معادش نحب نراك في الحالة هاذي مرة اخرى باهي
زهرة:باهي...اما نحب نسألك شي اخر برك
انا:اشكي
زهرة:انت وين ريتني اول مرة ؟
انا:فاش قام السؤال هذا توا ؟
زهرة:هكا برك...جاوبني امانك
تبسمت على جنب...و انا نذكر فيها...وقت حطت صاكها و أوراقها عالارض...و حلت السبالة تغسل في وجها...و تبلل في رقبتها...و صدرها...كان اول نهار نقريها فيه حتى نهارتها دخلت روطار...عديت يدي على وجهي نحكي
انا:تذكر اول نهار دخلت فيه عندي
زهرة:اكيد
انا:شنية عملت قبل ما تدخل للكلاصة
زهرة:شنية عملت انا ؟
انا:نهارتها قبل ما ندخل...ريتك و انتي تغسل في وجهك و رقبتك...و
زهرة:ك كيفاش ريتني انت...اصلا الكل دخل يقرا نهارتها
انا:و انتي شبيك تغسل في البلاصة غديكا
زهرة:ياسر السخانة نهارتها...و تعبت برشا في الكور لي قبلك...يعني كهو...و انت شبيك ركزت برشا
انا:تصدق كان نقلك منجمتش نفوت المشهد عليا
زهرة:لهدرجة ؟
انا:ممممم من نهارتها...منجمتش نحيك من مخي
زهرة:اففف معناها تبهدلت قدامك من اول نهار
انا:بالعكس...تعرف حاجة...في السنين لي قريت فيهم الكل...كنت اول وحدة تخليني نخمم فيها اكثر من انك مجرد طالبة تقرا عندي
زهرة:غريبة..و انا كنت نخاف منك...و نخاف نتعلق بيك من بعيد كهو...كنت نخاف مراد يحس بحاجة و يحاول يضرك...خوفي عليك غلب خوفي منك عمر
انا:وفات عزيزتي...الخوف هذا الكل انساه...وقيت باش تعيش حياتك توا
زهرة:كلشي يهمني اني نكون معاك و كهو
نزلت راسي شوية غزرتلها...تبلل مريولي بشعرها...عديت صوابعي على خدها...نحكي
انا:ماكش باش ترقد
زهرة:لا...لازمني نكمل نكتب بقية الدروس
انا:مبعد اعمل نسخة عليهم
زهرة:اما
انا:خليك معايا توا...عندك حاجة اهم
زهرة:شنوة ؟
انا:باش تبيتني عريس
زهرة:م مش على أساس مزلت مريض
انا:مرتاح عزيزتي...تحب تتأكد
كبست عليها...و قلبتها تحتي...هزيت يدي نبعد في شعرها...غزرتلي ندرا كيف تحكي
زهرة:و الدروس ؟
انا:ههههههههه مزلت تخمم فيهم انتي
زهرة:باش تعاوني مبعد
انا:مممم اكيد
جات باش تحكي...قصيت عليها...كي خطفت بوسة من شفايفها...نحكي
انا:مش كأنك حكيت برشا
هزتلي براسها ايه...نزلت عليها...و غطست فيها اكثر الليلة تأكدت...انو مزال مراد باش يبقى بينا...حتى و هو ميت..مزال يأثر فيها...لي تعدات بيه...من سنين ماهيش باش تنساه في شهرين..على هذاكا منحبش نظغط عليها منحبهاش تتعب بين الماضي...و بين حبها ليا...كلشي تحبو لازم تعيشو من جديد...و اهم شي تكمل قرايتها و سيرين تبقى بعيدة عليها...اصلا من نهار حطيت يدي عليها...عشقتها اكثر...و هبلت عليها اكثر...مجنونة كان فكرت اني نجم نخليها...و لا نحب غيرها...حبي ليها معندوش تفسير...اول مرة نكون مستعد نسلم روحي أول  مرة منخافش من الموت كان هي باش تعيش مرتاحة بعدي...منعرفش قداش نحبها اما لي متأكد منو...انو منجمش نعيش من غيرها...و مستعد نخسر أكثر من لي خسرتو...المهم تبقى معايا لاخر لحظة في حياتي.
#زهرة🌸
#سمر-القايد💜