🔸️زهرة تحكي:
عديت اليمات لي بعد الجلسة واحلة مع المشروع...نحب نلهي روحي بيه...مفماش نحي الظغط اللي نحس فيه على روحي...اصلا لي قاهرني اكثر...انو من نهارتها لا ريتو...و لا حتى كلمني...متوقعتش باش يرجع لعادتو و تصرفاتو الباردة بعد اللي صار...حتى مريم قالت لي ماهيش باش تجي لهوني مرة أخرى...أصلا ستر ربي و ما صار بينها و بين حسام عركة كبيرة...رغم انها بنية دافية...اما ديما تظهر العكس...يمكن حتى هي الظروف جبرتها..باش تولي هكا...مريم مش صحبتي كهو ساعات نحسها أكثر من اختي...طلعت راسي على صوت الباب كي تحل...لقيتها خالتي نعيمة...غزرتلي تحكي
نعيمة:زهرة بنتي العشا حاضر
انا:باهي خالتي تو ننزل
نعيمة:مطولش برشا...الكل عالطاولة
انا:شكون الكل ؟
نعيمة:عمر هوني
انا:تحكي بالرسمي ؟
هزتلي براسها ايه...تبسمتلي و خرجت...سكرت كراستي و هزيت روحي قمت بالزربة...أول ما حليت الباب...جا وجهي في وجهو..نزلت راسي منحبش نحكي معاه..أول ما وصلت لدروج وقفني يحكي
دالي:صحة ليه عمر...هاك تجري على خاطرو
حبست في بلاصتي...و تلفت عندو...هزيتو و حطيتو نحكي
انا:أموري
دالي:لحظة برك
قرب مني شوية...وقف قدامي...تبسم على جنب يحكي
دالي:في بالي اللي لوطة خاطب...و على قريب برشا باش يعرس...و صاحبو المصون اللي هو خويا...فقد ثيقتو في الحب معناها إذا قرب منك...جيست باش يرضي روحو و كهو
انا:فاش تحكي أنت ؟
دالي:ننصح فيك...خاطرك كان قربت من نار برشا صدقني باش تحرقك
أنا:و أنت شيهمك ؟
دالي:شي...أما حط هذا في بالك..باش متتوجعش برشا
انا:لي تحكي فيه زايد...عمر البروف متاعي...و أنا و حسام مفما حتى شي بينا باهي
دالي:باهي...أما كان صار و وجعك حد فيهم...وقتها منجمش نعاونك
انا:مرسسسي من غير ما تعب روحك
دالي:باهي عزيزتي
تبسم ندرا كيف...قحرتلو و نزلت الدروج نجري...قلبي نحسو باش يخرج من بقعتو...عندو الحق في اللي قالو لي قاعدة نخمم فيه مستحيل يصير...وصلت لطاولة بالوقت...جات عيني في عينو..نزل راسو بالوقت..دخلت بعضي أكثر...نسمع في أمي فتحية تحكي
فتحية:إيجا عزيزتي
قربت منهم بالسيف...قعدت بحذا حسام...غزرلي يحكي
حسام:لباس ماهو ؟
هزيتلو براسي ايه...خلط علينا دالي بالوقت...قعد بحذا عمر مقابلني...قحرتلو و نزلت راسي لصحن...الكل ساكتين...لين نطقت أمي فتحية كي العادة تحكي
فتحية:إيه عمر...إمتى نفرحو بيك عاد ؟
طلعت راسي بالوقت نغزرلو...غزرلي ندرا كيف و تلفتلها يحكي
عمر:أقل من شهرين
قلبي دق بالوقت...كبست عالشوكة في يدي أكثر...نسمع فيها تحكي
فتحية:و لحقت تحضر روحك ؟
حسام:هههههه من بكري حاضر
عمر:وقيت صاحبي
فتحية:وقيت ملا...لي في عمركم...صغارهم يقراو
حسام:حفظتها المقولة هاذي
دالي:ملا نقلك مبروك من توا
عمر:عيشك
وسط هذا الكل...حسيت روحي بعيدة برشا...قلبي باقي يدق بالقاوي...نرد في النفس بالسيف...منعرفش علاه قاعدة نحس هكا...مع انو نعرف و متأكدة باش يجي نهار هذاكا...خذيت نفس و زوز...هزيت كاسة الما شربت منها شوية...نسمع في دالي يحكي
دالي:شنوة حسام حكيت مع أمي في موضوعنا ؟
فتحية:موضوع شنية ؟
حسام:مش وقتوو محمد
دالي:ملا إمتى وقتو ؟
فتحية:شفمااا ؟
دالي:أنا نحب على حقي من الورثة
فتحية:شننننوة ؟
حسام:خلينا نحكيو برا أحسن
دالي:مممم باهي تفضل
قامو زوز من طاولة...خرجو من صالة...غزرت لأمي فتحية لي هزت كاسة الما ترعش...قربت منها بالزربة نحكي
انا:اممي لباس ماهو ؟
فتحية:لباااس..لباس
عمر:شنية تحس في روحك ؟
فتحية:عمر عيش ولدي...متخليهمش يتعاركو
عمر:أمي متخافش...متأكد لهوما باش يحكيو و كهو...و أصلا محمد يتصرف هكا جيست خاطرو مقهور و كهو
فتحية:يحب يقتلني عقاب عمري
أنا:لطف عليك امي...ماهو باش يصير شي هدي روحك
فتحية:برا عيش بنتي...جيبلي دوايا
انا:باهي تو نرجع
طلعت لبيتها بالزربة...هزيت الدوا و نزلت نجري...خطفو من يدي و شربها منو...دوب شربت رتاحت شوية استندت على عمر...قعدها عالفوتاي يحكي
عمر:تحب نهزك للكلينيك و لا نكلم طبيب يجيك
فتحية:لباس عليا...عيش ولدي
أنا:أحسن شي نعيط لحسام...هكا باش تضمن لهوما ماهومش باش يتعاركو
هزتلي براسها إيه...أول ما خرجت من صالة...خلط عليا بالوقت...حبسني يحكي
عمر:وين ماشية إنتي ؟
تلفت عندو نغزرلو...من تقحيرتو فهمت لي مش ناوي على خير...هزيت يدي شوية نحكي
انا:ح..حسام...باش نعيطلو
قرب مني أكثر...وقف قدامي...هزني و حطني...يحكي
عمر:شنية تستخايل في روحك آه ؟
أنا:ش..شقصدك ؟
عمر:قصدي واضح...العيلة هاذي متهمكش...على هذاكا متحاولش تكون فرد منهم باهي
أنا:فاش تحكي عمر...أنا جيست
عمر:التصرفات هذوما...ما عندك وين توصل بيهم
أنا:ك..كيفاش ؟
عمر:نقصد في حسااام...اللي تحاول تثبت روحك قدامو
بقيت نغزرلو مصدومة...النفس تسكر عليا...هزيتلو براسي لا...نحكي
انا:م..مفما حتى شي من اللي قاعد تحكي فيه...أنا مستحيل نعمل هكا
عمر:ممممم هذاكا الظاهر
تبسم ندرا كيف...منعرفش علاه وجعني بيها الفازة أكثر برشا حاجات جات في مخي ساعتها...أولها أنو فد من حكايتي...و خاصة بعد اللي صار آخر مرة في المحكمة خذيت نفس نحكي
أنا:عندك حق...نظن حتى أنا كثرت على الجماعة...يمكن القعدة مع مراد...أحسن من الكلام لي قاعدة نسمع فيه توا...أصلا الحق مش عليك...نعرف لأنت حبيت تعاوني أما كهو...من غير ما تعب روحك معايا أكثر من هكا...و بالرسمي أنا عمري ما فكرت في حسام بالطريقة هذيكا
قرب مني شوية...جا باش يحكي...قصيت عليه كي تلفت و عطيتو بظهري...قربت من الباب نجري...حليتها نحب نخرج و ناخو نفس...ضربت في حسام بالوقت جبدت روحي منو...نسمع فيه يحكي
حسام:زهرة شفماااا ؟
غزرتلو ندرا كيف...غصة حسيتها واحلة في حلقي...نزلو دموعي بالوقت...كملت نجري من غير ما نحكي معاه نحب نبعد و كهو...نسمع فيه يعيط عليا...حبست كي جبدني من يدي بالقاوي...يحكي
حسام:زهرررة أقف
تلفت عندو بالوقت...دموعي نزلو اكثر...قرب مني شوية يحكي
حسام:شصااار شبيك تبكي...عمر قالك حاجة ؟
هزيتلو براسي لا...بقى يغزرلي مبهم...وجهو تكبس بالوقت...جا باش يحكي...قربت منو أكثر...حطيت راسي على صدرو...دموعي نزلو أكثر من الأول...حط يدو على ظهري من غير حتى كلمة...خذيت نفس نحكي
أنا:علاااش ديما يتصرف معايا بالطريقة هاذي...علاه ديما ينبزني و يحب يقهرني ديما...ياخي كي يكرهني لهدرجة...فاش قام حتى يعاوني...علاه لتوا متحملني شيحب مني...شبيه يعاملني على أساس أنا فرحانة بالوضع هذا...شنية يستخايل في روحو...باش يحكي معايا أكاكا ؟
كبست على سوريتو أكثر...حسيت روحي تفرهدت كي حكيت أكاكا...حط يدو على شعري يحكي
حسام:ششش يزززي...باز ميقصدش لي عملو
أنا:لا يقصد...حتى كي نبداو في الكلاصة...كان ديما يعمل نفس شي معايا
حسام:عمر ديما على اعصابو...صدقني ميصدش يحكي معاك أكاكا...باز مقلق من حاجة...تو كي يهدا...يطلب منك السماح
انا:و أنا مانيش باش نسامحو...يا حسام
حسام:يظهرلك برك...صدقني هو مش خايب لهدرجة
أنا:لااا خاايب
حسام:ششش كان يسمعك يمشي في بالو لانا نعلم فيك في الكلام هذا
انا:يمشي يزمر على روحو
حسام:ههههههههه مجنونة
جبدت روحي منو...هز يديه زوز حطهم على وجهي يمسحلي في دموعي و يحكي
حسام:يزززي عاااد
انا:باهي...نحب نرجع...بردت برشااا...و أمك تاعبة شوية ميجيش نخلوها وحدها
حسام:باااهي...هيا ملا
هزيتلو براسي...أول ما تلفتنا...لقيتو واقف يغزرلنا من بعيد...بدني تكبس بالوقت...خلطت على حسام نمشي وراه...قبل ما نوصلو عندو...ركب و طار بالكرهبة...حتى حسام استغرب من الفازة لي عملها...دخلنا مع بعض قرب من أمي فتحية يحكي
حسام:أمي لباس توا ؟
فتحية:وينو خوك ؟
حسام:كي العادة
فتحية:متاخوش بخاطرك منو عيش ولدي...مزال صغير و مقهور من اللي صار
حسام:طمن أمي...محمد أكثر من خويا...راني أنا لي ربيتو يا فتحية
فتحية:عيش ولدي
حسام:هيا قوم نوصلك لبيتك
فتحية:برا على روحك...تو نطلع وحدي...لباس عليا
حسام:ما قلت شي...هيا ليلة سعيدة
فتحية:و أنت أسعد يا روحي
أنا:ليلتك زينة أمي
فتحية:عيش بنتي
طلعت مع حسام...اول ما وصلت لبيتي...تلفت عندو نحكي
انا:مرسي برشا حسام
حسام:على شنوة ؟
انا:حتى شي
تبسملي...خذيت نفس...حسيت روحي هديت شوية تبسمت نحكي
انا:ليلة سعيدة
حسام:عيشك و انتي زادة
تبسمتلو...و دخلت لبيتي...سكرت الباب...و ترميت عالسرير...غمضت عينيا بالوقت...تعدات صورتو بين عينيا...قلبي غم عليا...متوقعتش نسمع الكلام هذاكا منو جملة...ياسر وجعني...و خلاني نندم لأنا خليت روحي نوصل لهوني...عندو حق يفد مني..أصلا ماهوش مجبور باش يتحمل مسؤوليتي الكل وحدو...حتى هوني حاسة روحي ياسر كثرت عليهم...باقي نطلع و نهبط...نخمم في شنوة نعمل و لا كيفاش نتصرف خاصة بعد كلامو معايا اكاكا قبيل...بقيت نتقلب في فرشي...منعرفش كيفاش هزني نوم و غفيت.
فقت الصباح اول وحدة...اصلا منعرفش كيفاش عديت ليلة هذيكا...بدلت دبشي...لبست كبوطي...هزيت البوت في يدي و نزلت اللوطة...غافلت خالتي نعيمة لي دوب فاقت...و خرجت...دنيا برد...جاب المطر حبست...نمشي و كلامو متاع البارح يدور في مخي...منعرفش قداش مشيت بالظبط...و لا كيفاش وصلت قدام دارو...طلعت راسي نغزرلها...من اخر مرة هربت من هوني...مفكرتش اني نرجع...قربت من الباب مترددة...منحبش نشوفو...و منحبش نقابلو...و لا حتى نحكي معاه...منعرفش اللي نعمل فيه صحيح و لا غالط...غمضت عينيا بالقاوي...و رجعت حليتهم...الباب تحل حتى بلا ما ندق عليه...جات عيني في عينو...بقا يغزرلي من غير حتى كلمة...مشى في بالي برشا حاجات ساعتها...انو يعيط و يسب...المهم انو يفرغ غشو فيا...حطيت برشا احتمالات في راسي كان هو يقرب مني مفجوع...وخرت لتالي شوية...عدا عينيه على وجهي يحكي
مراد:زهررة...لباس شفمااا ؟
بقيت نغزرلو...الكلام اللي كنت باش نقولو وحل في حلقي...هزيتلو براسي لا...هز يدو باش يحطها على خدي...وخرت لتالي...نحكي
أنا:مانيش لباس...و أنت السبب في كلشي قاعد يصير بسببك أنت معادش نعرف وين نمشي...و لا شنوة نعمل بسببك انت...معادش عندي عيلة...شنية تحب مني مراد علاه متحبش تعتقني...تحب عليا هاني قدامك...أعمل لي تحب عليه معادش يهمني...أما تذكر كلامي بالقدا عمري ما راح نسامحك...و لا حتى نغفرلك لي عملتو فيا...صدقني باش نكمل القضية لتالي...كان ربحت و لا خسرت...يكفي لانا نجمت نواجهك...فهمتني
بقى يغزرلي لين كملت كلامي لتالي...في لحظة خطفني دورني...دزني عالحيط...كبس بيديه على كتافي...و نزل عليا يحكي
مراد:مجننووونة...عمرك ما راح تفهمني يا زهرة...انا حاجتي بيك إنتي...اللي نعمل فيه الكل على خاطرك أفهم اللي انا منجمش نعيش من غيرك...صدقني كلمة منك برك...يوفا العذاب هذا الكل
انا:لاااا مستحيل...فهمتني...مستحيل نكون ليك...و لا باش يجي نهار و نحبك فيه مراد..إحنا زوز ثنية مسكرة مستحيل نسامحك...مستحيل
كبس على كتافي اكثر...غمضت عينيا بالوقت...نسمع فيه يحكي
مراد:و مستحيل تكون معاه زادة...إنتي متاعي انا
حط يدو على خدي...و نزل عليا اكثر...حسيت بالنفس متاعو في وجهي...كمل كلامو يحكي
مراد:متاعي أنا و كهو يا زهرة...أعمل لي تحب عليه عذبني كيما تحب...مستعد لكلشي...أما في الأخير باش تكون ليا...حط الكلام هذا في راسك
هزيت يديا زوز بالسيف...حطيتهم على صدرو...ندز فيه لتالي و نحكي
أنا:ابعععد عليا مراااد...ابععدني...لي تفكر فيه مستحيل يصير فهمت...صدقني مانيش باش نرتاح...كان وقت نراك مسجون بين أربع حيوط
نزل يديه شوية شوية على كتافي...وخر خطوة لتالي بقيت نغزرلو...نتنفس بالقاوي...عدا يدو على وجهو...و غزرلي يحكي
مراد:باهي...أعمل لي تحب عليه زهرة...اما تذكر كلامي بالقدا...الوحيد لي باش يطلع خاسر في الاخير...عمر متاعك و كهو
عينيا وساعو بالوقت...نعرفو اذا حط حد في راسو...الا ما يدمرو...هزيت يدي في وجهو نحكي
انا:رد بالك مراد...رد بالك تقربلو و لا تحاول تضرو...باش تلقاني في وجهك ساعتها
مراد:خفت عليه ملا
انا:رد بالك
مراد:متخافش عزيزتي
هز يدو...حطها على يدي نزلها...جبدتها منو بالوقت تبسم يحكي
مراد:علاه جيت ؟
انا:نحب على مفاتح دارنا
مراد:فاش قام...شتعمل بيهم ؟
انا:امووري
مراد:هوكا عند امك...ادخل عندها
انا:خبرها انت...خاطر ماهيش باش تعطيهملي
تبسم على جنب و جا باش ينزل...قربت منو شوية نحكي
انا:مراد امانك...انا بحاجتهم
تلفت عندي...هزني و حطني...كبست على كبوطي اكثر...دنيا باردة عاللخر...نفخ بالقاوي يحكي
مراد:باهي ايجا
انا:لااا...نستناك هوني
حل الباب و دخل...تكيت لتالي مروهجة...متوقعتش باش نحكي معاه...و لا باش يبقى هادي لهدرجة...اصلا معينيش باش نقابل امي...و نسمع كلامها المرزي عالصباح...بقيت نستنى فيه لين عاود خرج...تلفت عندو...جا باش يحكي...خطفت المفتاح من يدو...و نزلت الدرجات هذوكا نجري...نسمع فيه يحكي
مراد:شنننوة الحب...متعلمتش تقول مرسي عاد
تلفت عندو قحرتلو...تبسم على جنب...و قرب من كرهبتو...كملت نمشي بالزربة...منحبش نغزرلو...اللي يهمني اني نبعد من هوني و كهو...محسيتش بالوقت...و منعرفش كيفاش وصلت لحومتنا القديمة...طلعت راسي نغزر لدارنا...كبست عالمفتاح في يدي...قربت بالسيف أول ما حليت الباب...جات عيني عالدروج تذكرت اول نهار قابلت فيه مراد و كيفاش بدات علاقتنا غمضت عينيا بالقاوي...مع كل خطوة...نقربها...صوت بابا يقوا داخلي...وصلت لصالة...عديت عينيا على كل تركينة فيها...قربت من بيتي...باقي كلشي كيما خليناه من سنين لتالي...و كل مرة نحس روحي وحدي نجي لهوني نعدي نهار و انا نظف فيها...برغم لي دار صغيرة برشا أما نحس فيها روح...نحس كأنو بابا مزال فيها قربت من سريري...ترميت عليه...و تلكمت على روحي نحب نرتاح من اللي قاعد يصير برا...يمكن البلاصة الوحيدة لي تخليني نحس روحي قوية...و ما نحتاج لحتى حد نجم نفكر و ناخو قرارات من غير ما يدخل فيا حد
كلام عمر باقي يدور في مخي بالكلمة...اصلا عمري ما فكرت بالطريقة هذيكا...و لا حاولت نقرب من حسام توقعت منو كلشي...كان يحكي معايا أكاكا...و يتعمد يجرحني بكلامو...هو لي هزني بيدو لغديكا منعرفش على حسيت من كلامو..أنو معادش يحب يعاوني..يمكن انا زادة قاعدة نغلط...عندو حق...ماهوش مجبور باش يعاوني اكثر من هكا...احسن حل نفركس على خدمة كان لزم نحبسها القراية فترة...و نرجع كان وقت يوفا الكابوس هذا...غمضت عينيا بالوقت...و غطست في حلمة محلاها...مفما حد كان أنا و بابا و كهو
BẠN ĐANG ĐỌC
زهرة🌸
Ngẫu nhiên🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
الحلقة الواحدة و العشرون
Bắt đầu từ đầu
