زهرة🌸

الحلقة الثالثة عشر

🔸️عمر يحكي:
تنهدت بالقاوي...تفكيري الكل معاها...منعرفش علاه حسيتها مش قد بعضها...هزيت المنشفة و وخرت لتالي...تلفتلي حسام يحكي
حسام:عمر...ياخي نورمال اللي قاعد يصير
انا:شنننوة ؟
حسام:تحب تضيع روحك جرة طفلة...ندرا حكايتها شنوة ؟
أنا:شقصدك ؟
حسام:أنت فاهم قصدي بالقدا...منصبك في الفاك...و اللي وصلتلو...سيرين لي بقات شهور قليلة على عرسكم أنت باش تخسر هذا الكل جراير طفلة...تقرا عندك...و غايتها مش معروفة
أنا:حسااااام يزي أمانك...الموضوع هذا بالظبط...ما نحب حتى حد يدخل فيه
حسام:ياخي نورمال أنت...كان مجيتش خايف عليك مندخلش روحي جملة...أما منحبكش بعد ما وصلت لهوني...دمر روحك في لحظة...مفهوم كلامي عمر مانيش باش نسمحلك تضيع كلشي من يدك...على خاطر طفلة
انا:باهي طمن...شي ماهو باش يصير...و سيرين باش تعرف الحكاية و تفهمها
حسام:تفهم شنية...أنو طفلة أخرى عايشة معاك في دارك...كيفاش باش تقنعها أنو مفما حتى شي بينكم
انا:حسااااام...زهرة باش تبقى عندي...و هذا آخر قرار منحبش نخمم فيها الحكاية توا...و منجمش نحكي فيها زادة
حسام:باهي عمر...أعمل لي تحب عليه توا...و مبعد نشوفو آخرتها معاك
أنا:صحيتك...أنا باش نمشي نفركس عليها...و نطلع لدار...طفلة مزالت تاعبة و لازمها ترتاح
حسام:صااار...متخليهش تتعود على دلال هذا مبعد توحل في راسك...مترصالكش معرس بزوز فرد مرة
انا:زايد ساقط...برا كمل على روحك...خليني نمشي
حسام:باهي باهي...هاني سكت...أصلا الحق عليا ننصح فيك
انا:صحيتك سي شباب...أصلا عايش بنصايحك أنا
حسام:ناقص ¤¤¤¤¤¤ برا توا
أنا:ههههههههه هيا مبعد
حسام:باهي باهي
مديت يدي هزيت صاكي...معنديش جهد باش نبدل دبشي...خرجت نفركس عليها...لمحتها من البلار...قاعدة برا...عقدت حواجبي...خاطر الجو بارد...و مش بعيد تزيد تمرض...خذيت نفس و خرجت عندها...قربت منها شوية...محستش بيا جملة...تغزر للبعيد...ظاهر تفكر في حاجة...قربت اكثر قعدت بحذاها...غزرتلي ورجعت تلفتت...تنهدت نحكي
انا:شبيك قاعدة هوني ؟
زهرة:شي
أنا:كنت تبكي ؟
زهرة:لا
أنا:شصار ؟ شكون قلقك ؟
زهرة:حتى حد...جيست تفكرت بابا
أنا:مممم باهي...زعمة شنية لي تذكرتو بالظبط
زهرة:منعرفش...أصلا منعرفش شنية لي عشتو معاه بالظبط...مش ذكريات...هوما لحظات صغيرة...وفاو قبل ما يبداو...يمكن هذا لي قاعدة نتذكر فيه توا...في صغري
تبسمت على جنب كيف تذكرت الأيامات لي كنت نعديهم مع بابا و مصطفى...أمي و هند...الفيرما و الأرض...للحظة لقيت روحي في الماضي...في ذكريات قد ما نحاول ننساهم...نلقى روحي غارق فيهم...خذيت نفس نحكي
انا:لحظات هذوما...تنجم تعيش بيهم حياتك الكل..تعرف علاه ؟
تلفتتلي...غزرتلي ندرا كيف...و هزتلي براسها لا...تبسمت على جنب و كملت نحكي
انا:على خاطرهم أصدق حاجة تنجم تصير في حياتك
زهرة:ا انت جربت وجيعة انك تخسر حد...تحبو برشا
بقيت نغزرلها...الكلام وحل في حلقي...الخسارة اللي تحكي عليها هي...انا اخترتها بيدي...باش نجم نعيش حياتي كيما نحب...و كيما لازم تكون...تنهدت و هزيتلها براسي ايه...دموعها نزلو بالوقت تحكي
زهرة:شنية لي حسيتو ساعتها ؟
مديت يدي...عديت صوابعي على خدها...لي باش يطرشق من سخانة...قربتلها شوية...نزلت بيدي لكتفها حطت راسها على صدري...قلبي دق بالوقت...منعرفش علاه...خذيت نفس نحكي
أنا:برشااا وجيعة...و برشااا حزن...تحس روحك وحدك و مفما حتى حد معاك
زهرة:هذا لي حسيتو أنا زادة...برشا وجيعة...مزالت لتوا...و خوف تزرع فيا من اول نهار فارقت بابا...من وقتها معادش نعرف شنوة اللي قاعد يصير بالظبط
حطيت يدي على شعرها...عديتها على خصلاتها لي واصلين تحت كتفها شوية...نحكي
أنا:مفما حتى شي يخوف...الحكاية الكل...أنو لازمك تتقوى على روحك و كهو
زهرة:باهي و مراد ؟
أنا:مراد ما ينجم يعملك شي...خوفك منو هو لي عطاه فرصة باش يتمادى معاك أكثر
جبدت روحها شوية...عدات يدها على خدها...تمسح في دموعها و غزرتلي تحكي
زهرة:ماكش باش تخليني مش هكا...ن..نقصد لأنت باش تبقى معايا لين توفا القضية هاذي ؟
دورت عينيا على وجها مستغرب من سؤالها...خذيت نفس نحكي
أنا:زهرة...حسام حكا معاك شي
بقات تغزرلي...منعرفش علاه سألتها على حسام...أما من كلامها حسيت لي فما شي...هزتلي براسها لا...تحكي
زهرة:ل..لا أنا جيست خايفة من اللي باش يصير
انا:باهي إنتي تاثق فيا ؟
زهرة:برشاااا
تبسمت على جنب...و هزيت روحي وقفت...مديت يدي نحكي
انا:هيا ملا خلينا نمشيو توا...برد الحال
حطت يدها في يدي ووقفت...على تلفيتي...نلقى حسام يغزرلنا من بعيد...حط المنشفة على كتفو...و قربلنا يحكي
حسام:مزلت هوني
أنا:هاني باش نمشي توا
حسام:بربي خلي تليفون قدامك..مش ترصالي نطلب فيك كل دقيقة
أنا:باهي طمن سي حسام
حسام:هيا نخليكم توا...نحكيو مبعد
أنا:باهي
تلفت عندها شوية...لقيتها سارحة...تنهدت نحكي
أنا:نمشيو
زهرة:اه...ايه هيا
خليتها سبقت...و خلطت عليها...نغزرلها كيفاه حاطة يديها زوز في الفاست متاعها...شعرها يطير مع نسمة الهوا...تبسمت وحدي...منعرفش شبيني مركز معاها لهدرجة...حليت الباب وركبت...ضرب في راسي دواها غزرتلها نحكي
انا:شربت دواك إنتي ؟
زهرة:لااا...أما لباس راسي ماهوش يوجع برشا...تو كي نمشي لدار نشربو
أنا:باهي المرة الجاية هزو معاك
زهرة:باهي
خدمت الكرهبة...و طرت بيها...دريكسيون لدار...اهم شي انها ترتاح توا...اول ما وصلت خليتها دخلت لبيتها و عملت دوش...بدلت دبشي...و مشيت لصالة...هزيت تليفوني...طلبت واحد من صحابي...يخدم في الحاكم نحب نفهم منو كلشي...علقت عليه...و حليت البيسي نفركس على محامي باهي...ينجم يعاونها في القضية كل مرة نفد من الحكاية نذكر كلامها و دموعها...مانيش باش نهدا كان وقت نطمن لهي ولات حرة...و تنجم تعيش كيما تحب...من غير وجيعة و من غير خوف زادة.