أستعمار

7

قوويه انا.... كحرب! 
عميقه انا... كجميع خداعها!! 
انصر وطني وناصري!! واجمع شتات نفسي لاحارب بقوه...!
                                   مقتبس لأنسام

سارة

اجانه بابا ما طلعت اله ماما و كالت ما يوصل للغرفة ، هو ما راح الها بس انطى مبلغ لأبرار ، و اني من بعيد لبعيد شفته ما رحت سلمت عليه جان بالهول كاعد وابرار يمه وعمي ،اني كلساع اخطف من يم الباب وبگلبي  نار منه بس مكدر ، من راح كالت ابرار مرته الثانية خابرته وهو كاعد  يمي اضاهر متخربطه دمعت وكعدت يمي وكالت بقهر واسف
-لج بابا صارت اله عائلة غيرنا
بابا راح الها ركض سارة حتى ما الح على امي اتسامحه كال اجيت بس اشوفكم واروح ! مو بحالها طلع
انهار الغصن الي جنا كلنا منسندين عليه ابرار من حست ابونا راح منا ،
رديت الها
-اي عيني يكولون  بيها ولد
-سارة كله من ورة ماما هي سلمته الها ترة بايعه  لو عارفه اتلم السالفه مجان وصلنا لهيج مواصيل ،
-ابرار لا تبررين لبابا تصرفاته ترة هو البايع وكسرها بوحده من الشارع وما ترديها اشويه اضوج وتحجي عليه ،
شدعوة ما اتحملها هااا شدعوة
ترة خانها اني ما اسمي هذا الزواج زواج ولا اعترف بيه طريقة تجميلية للزنا لا اكثر ولا اقل
- هاي انت هيج تحجين على بابا !؟
سألتني مستغربة ردة فعلي المندفعه على بابا وطريقة كلامي عليه

رديت بقهر
-لعد الي اسواه اشوية ، لج استحي اتواجه وياه والله مستحية من فرزدق حيل لا بت خالته كالت اله اكيد نسيتي ماخذه ابن عمنا فلاح  اكيد وصلت اله السالفه لان عارف بيه مزوج ، واكيد عارف الطريقه
- اااه اتمنى يطلع  كابوس ويرجع كلشي لمكانه
رديت عليها  بيأس
- لا تعيشين على التمني، امي خلت خالي  ابو علاء يسأل عليها طلعت وحده شغلها هذا واتلف على الزلم يعني متاحه شفتي ابوج شسوة بينا
هزيت بأيدي هازئة من الوضعية كلها بكلب صار رماد ،
،
بعد فترة بابا اجه  ودخل لأمي كلت بلكت يرضيها هم طلع من البيت من غير ما يكول شي ؟ النا ، بس وية ابرار حج وراحت وراه للحديقة
دخلت اشوف امي ليش هم طلع غاضب لكيتها تبجي واجت ابرار هم تستفسر
ابرار
-ماما شنو ماما هم ما رضيتي ؟
جاوبت امي
- كلت اله ابقى وارجع للبيت بس بشرط هسة تطلكها ، ما قبل يكلي شايلة ابني ببطنها خل تجيب والله كريم

كلت اني بنفعال و غيرة
-يطلكها ماما وغصبا ما عليها ختولي بت الشوارع ما تاخذ ابونا منا
بصوت مبحوح و منهار ردت علينا ابرار
- يوم كافي رجعي لبيتج ولمي السالفه
انتشرت بين المدرسات سالفة  زواج بابا المتعة و تعالي شوفي الحجي الي يوصلني وينحجي وراية يوم الشمات ضهرت على حقيقتها ،والله هاي نظال اقاربج مسوية نفسها ضايجه عليج وتسألني عنج وهي متأكده نشرت الخبر بالمدرسة

كامت تبجي منفعلة بابا ما فكر بسمعتنا احنه الي طحنا بيها  خطية ابرار هاي نضال كاتبة بالمدرسة اقارب امي بس من بعيد بنفس مدرسة ابرار وبثت خبر زواج بابا بين المدرسات ، يا خوفي اني هم صديقاتي يدرن والله لترك الدوام واحضرهن اذا عرفن متحمل كلمة او سؤال ،
عفت امي و لزمت تليفوني متردده اخابر بابا اكله يطلكها ويلم السالفة بس جنت متخوفة  ، لكيت نفسي اتصل بفرزدق اول ما كال اشلونج طكيتها بجية
وضل يهدي و يسكت بيه . واجاني المغرب شافني و واساني وكال ازمة وتعدي
،
تعاملي ويه فرزدق ما تغير وبعدني احبه
بس احس اكو نبرة بكلامه دوم ما افهمها
بس ظليت متمسكة بيه وهو هم
،
بيوم فرحت حيل جنت توني جاية من الدوام ، و بشرتني ابرار امي وافقت بابا يرجع  جانت بشارة خيرة علينا توسلت لأبرار تخابرة  تكولة واخيرا ماما تأثرت بوضعها و اجت على نفسها و قبلت يرجع للبيت
اتصلت بيه ابرار وهي الثانية وجهة ردت بيه الروح ، واني حطيت راسي ع تلفونها اسمع صوته مشتاقة اله كد زعلي عليه !
بعد السلام ،
- بابا  ماما قبلت ترجع انت للبيت هسة ،
- ها ، شغيرها مو جانت اتصيح ما الك دخلة
-بابا انسى الي فات ، كلنا مرينا بمرحلة صعبة بسبب الي صار
- انشالله خير ،
-خوش بابا اليوم تعال لعد ،
-الله كريم بوية
_________________________
انسام
خابرت فايز يرجع الي وجنت اتوجع وابجي ، سديت الاتصال  واتوسل للي داخل أحشائي
-الله يخليك لا اتروح مني ما عاونت احصلك ، لا تعوفني ارجع للمذلة الله يخليك اصمد اشوية يااااربي
خالتي طرحتني و حطت مخدات جوة رجلية وراحت
سلوى واكفه كدامي تنظرلي بشفقه
- راح يعيش !
كالتها بغرابة سكتت نعيي سألتها
-دعيتي الي !
-لا بس راح يعيش هيج احساسي ،