أستعمار

6

مساء الورد

#أستعمار

من كتابات زهراء العراقية

لكل شيء ثمن ،ولكل ألم ثمن باهظ من الصمود ، علامات الروح والقلب لاتزوول مهما مر عليها اعوام واشخااص ,

سارة
-ماما هاي منو وشدخلها
محد جاوبني ,خالتي كانت اقوى من امي ، لزمت المرة من ايدها وكالت بحزم
-اطلعي برو بيتي

-شنو ما مصدكين  ، خوش راح اروح ، ومن يجي ابو أبرار كولو اله خالة مرتك أنسام اجت اهنا وعدها ابشارة الك ، مرتك بيها ولد

كامت من كدامنا مشت ومبتسمة أبتسامة باردة مقرفة ، اني مستنكرة اصلا جيتها و شكلها كأنها سوقية  درجة اولى لعبت نفسي من عطرها من فاتت يمي
امي كعدت بمكان المرة و ضمت وجهه بأديها بينما خالتي راحت ورة المرة اطرد بيها وتتحسب ، اني وفاطمة وحده تباوع للثانية ممصدكات شي من الي صار
رجعت خالتي ام ادم النا وكالت  لأمي
- سعاد لا صدكين شي
اختي لا تبجين
روحي سارة جيبي ماي لأمج

صاحت امي بصوت  باصي من البجي
-ما اريد ماي ، تعرفه وتعرف ببته وجايه بثقه تحجي شنو مصلحتها
ضربت حضنها امي و ناشغت .
- مزوج و مرته حملانه
يا يمة انخرب بيتي
ضربت جبينها بقهر وخالتي واكفه يمها وحاطه ايدها ع حلكها كأنها هي الثانية اقتنعت و صدكت ،
كلت مستنكرة ردة فعلهن
-لا بابا ما يسويها ابد ، مستحيل وهاي وحده جذابة ، يجوز مرت عمي ام ذياب دزتها علينا
صفنن وحده بوجه الثانية خالتي وامي كأنهن تذكرن ام ذياب مرت عمي الوسطاني  ،ام ذياب وحده تكره امي وخالتي وتغار منهم وخاصه امي حيل تغار منها كون زوجها الاغنى بين اخوته و مشهور بحبه الأمي لأن من زعلت وطلبت الطلاق ما ازوج و رجعها ومدللها باللبس و ارقى بيت ويحبنا احنه بناتها ، الحقد يغلي بگلب ام ذياب من امي كون زوجها عمي معذبها وبعد ببيت جدي بيت الورثة ابو العوائل ، وهي وحده معيدية مكروهه اكيد هاي وحده من معارفها والا امنين اجتنا !؟
بس امي ضلت تلوب وتبجي خابرت ابوية ومارد عليها ، ورة اشوية اجتنا ام علاء مرت خالي و ابنها الي اموت منه لازك لأبرار وهي تكرهه المهم مرت خالي ناقلة حجي ومگلگلة حيل اجتنا  على العشة من غير سابق انذار كالعاده مالتها ، ابنها من عمر باسم كاعد بنص النسوان ، ماعدنا رجال بالبيت
و امي ما طلعت من غرفتها وكل اشوية مرت خالي تسأل عليها و خالتي تعيد نفس الاجابة تعبانه مريضه

_____________________________
أدم
جنت وية عمي وابرار رحنا لرؤيا ،
العصر خابرتني تبجي ، اخذت عمي و عمي طلب من ابرار تجي ويانا ، اهلي عبالهم رحنا زيارة عادية الها ، بس بالحقيقة عمي من شاف وضعها المحزن طلب منها اتروح ويه ابرار تلم كل شي عدها اهنا وهذا اثاري سبب اخذه لأبرار ويانه ، قرر و نفذ وحده ما بيه حيل لمشاورة العائلة امي اجر طول وخالتي اجر عرض ، ملينا من زوجها كل يوم وضاربها واحنه نصرف عليها ، اخذنها وهي جانت موافقه كارهته من اخر ضربه ضاربها الها ،   عمي كال لأبوه بتنا ناخذها وابنكم يمكم
رد عليه ابو زوجها
-وجهالنا شنو تاخذوهم من عدنا
- اطفالها يضلون يم امهم ومن يكبرون مرجعهم لأبوهم
عمي ابو أبرار اله هيبة و كلمته الها صدى سكت ابو حسن ابو زوج رؤيا و اخذناها وطلعنا جان زوجها موجود ومن عرف بجيتنا ضل بغرفة امه ما شوفنه وجه ! 
رجعنا للبيت و اني بقيت انزل بالجنط
و ابرار دخلت ولد رؤيا اثنين للداخل بينما رؤيا تمشي مدنكه راسها و تشاهك تبجي ، عمي حط ايده على متنها
-امشي منا عمي ع المطبخ اضاهر عدنا خطار لا يشوفج احد هسة احسن  . دخلها لجوة واني وراهم اسحل بالجنط للمطبخ ،  وصعدت لغرفتي كاسرة خاطري رؤيا ،  اني ما عندي غير ثلاث خوات رؤيا اختي الجبيرة اكبر مني بسنة
وفاطمه و سمرقند ،