أستعمار

3

صباح  الفل

انسام

احنه اتراكضنا لبسنا عبينا وخالتي وكفت بطريقهم ، أنطونا مهلة اهواي جان يهدد و ما ينفذ لكن اليوم جان ناويها صاحت خالتي
-وين  داخلين

اتقدم لكدام واتعرثت خالتي و وكعت للخلف كدام رجلينا كومتها ورحت الهم اتعديتهم وهم يدخلون للبيت و جانت كم جارة واكفه تتفرج
- يااناس يااا عالم ولونا يا اهل الغيرة تعالو شوفو اعتدو علينا ،نهاية اجتني تركض اتصيح ويا وتولول، اجو جيرنا و التمت الزلم وصارت هوسة ،احنه جدد صارلنا ب ست اشهر اهنا و مانعرف هلكد ناس ومحد يدك بابنا ويعرف ضروفنا من داخل شنو ، كمنا نصيح و التمت زلم ،
اتقدم رجال طاعن بالعمر ويه واحد خمسيني سمين لابس حزام فقرات فوق دشداشته السوده ! كال لصاحب المشتمل
-  مو من شيم الرجال التهجم على النسوان
- يخوي اني رجال على كد حالي مأجرلي هالخرابه، صارلي اربعة اشهر مقابض منهم  شي
-سمي بالرحمن اعتبرهن خواتك

-خواتي يا خوي اني من أجرت الهن اساهلت وياهن و بس مقدم شهرين اخذت ،ومن  نهدها كلشي ما قبضت منهن
 
هدينا احنا و سكتنا وكفنا بس نباوع الهم ومنتظرين نشوف على شنو تصفى . اتكفلنا جارنا و راس الشهر ننطيه نص المبلغ بالكوة وكع نصه الى الشهر الجاي وقبل
دخلنا للبيت انفاسنا مكطوعه اني ونهاية
شفنا سلوى  كاعده نهاية الغرفة ماخذه الها زوية و تقرة بكتاب من كتبها المدرسية
نهاية كالت الها
-يا برودج يا اختي الناس هدت علينا وانت ولا هامج
-عفت الكم التصرف
باوعت الي بأخر كلمة و طريقة حركه احواجبها بالكلام و أعوجاج حلكه و نظرته الاخيرة قبل لا تغط اعيونها بالكتاب جانت كلها تدل على السخرية والقرف منا كلنا ! اندمجت ملامحها بأكثر شغلتين ما احب اتحسسني بيهم
صحت عليها
-عيني ام الشرف والعفة ،لو لا صوتي الي طلع بالشارع واني استنجد جان انت حالج حال هالسكرايب مشمورة بالهبرد برة
زفرت نفسها ، و انطتنا ضهره

باوعت لنهاية واني اكعد
-اكلج ما اكولين الي اشوكت راتبج الطركاعه
- يمعوده متأكده راح يخلونا اخر العالم ؛وهو شكفي ؟
طلعت كارتونه وشكيتها  و اخذت قلم حبر و كتبت
حفافة للنساء ب ٣ الاف
طلعت الصبحية ، دكيتها ابصف حايطنا 
للعصر اجت وحده من الجوارين ، حفت و لغت اهواي من خلصت واني زتتها للباب
-عفية ام فاطمة اذا وحده تريد تحف اتعرفيها دليها بينا   ، والله اليوم الي نتغده بيه ما نتعشة .
طلعت الكلمات مرة من حلكي مستذلة للناس اجدي شغلي جداوي ، ليش اني كارهه شغل البيت وجنت ادور شغل براني بس ما لكيت ، واضطريت ارخص و احف بسبر الماي . المنطقة الي احنه بيها كلش كلش شعبيه و كدامنا بيوت تجاوز فصايره تعتبر من العشوائيات ولو اكو قطعه فارغه او ما محجوزة من الي كدامنا جان اجاوزنا حالنا حالهم .
يوم عن يوم يجن اكثر نسوان حتى بألافين ونص حفيت الوجه النسوان يرخصن وكل ما يرخصن يحسن بشطارة نفسهن و يجن ع الفقير و يدوسن عليه دوس حتى يحسن بدهائهن مثلا وحده هي ساكنه بالبيوت الي تبعدنا بمسافه ابيوت بنائها  يدل على متوسطة حال مالكها مدليها بيه
كالت انت خوش انتظفين الوجه .
بالنهاية عصرتني الى الالفين ونص ما اعرفت سر جحفها الى بعد كم يوم مرت حماها يمي حفت وعرفت زوجها مزوج  عليها ، وعرفت سبب تشاطرها على غيرها الفاشلة ،
من استلمت نهاية راتبهاسدينا مبلغ  ما يوصل لنص  الاجار  راتب نهاية كله والباقي  اتنازل عنه لكن طردنا
هو طبعا استحى على دمه من تدخل جارنه الله يسعى اله بالطيبة مثل ما سعى النا ، رحنا لمشتمل تجاوز سورة عبارة عن جينكوو  وهو مشتمل انعام بت خالتي !  انعام عدها اربع اطفال ، وهوسة صارت همه بغرفة واحنه بغرفة !!