Ang hirap ng buhay ay gaya ng unos
Na may humahampas na hanging malakas
At may kasama pang ulang bumubuhos
Na dulot ay bahang sa lupa'y dadanak.
Tayo ma'y mabatbat ng pighati't pait,
Ang Inang Maria ay sumasaklolo.
Siya'y dumadamay sa nangagtitiis,
Sa dinadaluhong ng masamang bagyo.
Ang Mahal na Birhen ay Ina ng Hapis
Na siya ngang saksi sa dusa ni Kristo.
Paghihirap nati'y kaniya ring sakit,
Mga balaraw sa puso niyang pino.
Ang buhay ma'y minsang sama ng panahon,
Ang Banal na Ina'y dagling mag-aampon.
YOU ARE READING
Mga Tula sa Ilalim ng Langit
PoetryAng aklat na ito ay koleksyon ng apatnapung tulang relihiyoso at naglalarawan ng espiritwal na karanasan ng makata at ng kaniyang ugnayan, pagmamahal at debosyon sa Diyos at sa Mahal na Birheng Maria. Ito ay binubuo ng 2 dalit, 10 awit, 10 tanaga at...
