لو تعرفين وش يعني قهر الرجال ما أبتسم ثغرك لـغيري رجل /بقلمي؛كاملة - صفحة 145فرح وهي تمد له العقد : اضمن حقي ..
عبدالله وهو يحط العقد في جيبه : لا تخافين مانيب رجال ما يخاف الله
فرح ناظرت فيه بنص عين : واضح
عبدالله وهو يناظر فيها , قال وهو يبتسم : سبحان الله , والله العظيم يا فرح كل ما افكر , اني كنت قايم اليوم بروح الـشغل نفس كل مره عادي , و فجاة تزوجتك بدون ما اكون مستوعب , اسبح الله , مقسم الارزاق
فرح ابتسمت وهي تقول : ايه والله ..
عبدالله وهو يناظر فيها : عاد تصدقين اعوذ بالله اول ما شفتك كرهت القضيه بكبرها , لسانك وش طوله علي , لا و تتطنزين
فرح بخجل : انا كان قصدي شي ثاني , يعني كنت خايفة انكم تستقون علي
عبدالله :انتي تقوين على قبلية الله يهديك ..
فرح ابتسمت وهي تقول :اذكر الله ..
عبدالله وهو يناظر فيها : أقولك شي بس ما تزعلين ..
فرح : وش
عبدالله وهو يضحك بشكل مضحك : قد شفتك حول ثلاث اربع مرات قبل لا اتزوجك
فرح وهي تناظر فيه : يا فرحتي والله
عبدالله وهو يتذكر : مره يوم مريم تتعب , كنتي طالعه بدون عباة , صدق تعالي انتي مجنونه , ولا مهبولة وش يطلعك بدون عباة , فرضاً ما كان انا اللي جايكم وش بيصير ..
فرح رفعت كتفوها وهي تحاول تستفزه : عادي , يعني لو غيرك ماكنت في وعيي ..
عبدالله يناظر فيها : وجع يوجع الظالم , استحي على وجهك تراني زوجك
فرح وهي تضحك : كمل والمره الثانية طيب
عبدالله وهو يتذكر : المره الثانية , كانت في بيتنا , كنت جالسة عند الدريشة .. المره الثالثة كنت نازلة مع الدرج , والمره الرابعه كنتي ناسية الدريشة مفتوحه و اتذكر انك تسوين شعرك كنتي
فرح : تبارك الله , ما تستحي امانه تقول هالكلام في وجهي
قرب عبدالله من الدريشة وبحركة سريعه جر الطرحه وهو يقول : هذي ليه حاطتها حفظتك خلاص ..
ابتسمت فرح وهي تقول : وناسة والله احس بـ اكشن ..
عبدالله ابتسم وهو يقول :اللي يشوف طولة لسانك ما يقول هذا وجهك
فرح أبتسمت وهي تقول : خلاص , قم نم يالله وراك دوام ..
عبدالله ناظر الساعه كانت وحدة الليل : صادق , داومي بكرة خمس .. تصبحين على خير ..
فرح ابتسمت : وانت من اهله
عبدالله لف على فرح : ما ودك ترقين بس , خلاص صرتي زوجتي
فرح وهي تناظر فيه : عبدالله رح نم ..
دخل عبدالله الفيلا وهو مبتسم ..
مريم من ورا فرح : ماشاءلله تبارك الله .. صايرين طيور الحب
فرح لفت على مريم : بسم الله , من متى وانتيق ايمة
مريم : من ثلاث مدري اربع مرات شايفك .. اوفر والله , اخمدي خلصيني ..
انسدحت فرح جنب مريم وهي مبتسمه , كل شي بدا يزين
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
جالسة في الصالة وهي تناظر التلفزيون و سرحانه في فارس ..
دخلت عذاري وهي تقول : عادي اجلس معك
ريم ابتسمت وهي تقول: تعالي عمتي , لا تستأذنين
جلست عذاري وهي تقول بـ ابتسامه : شلون.. دريتي ان فارس وليدي ؟
ريم اخذت نفس وهي تقول : اعرف ..
عذاري بألم : شلونه ؟ ضايق علي , ما يبي يشوفني
ريم قالت وهي تناظر عذاري : عمتي , فارس قلبه ابيض من البياض بـ نفسه , لكن هو يحتاج شوية وقت , وان شاءلله انه بيجيك لين عندك و يبوس يدينك
عذاري : ما ينلام يا ريم , انا ما الومه , الله يعينه حبيب قلبي
ريم ابتسمت وهي تقول : لا تخافين , صدقيني موب معدي هالاسبوع الا و فارس جايك و تقولين ريم ما قالت
عذاري بلهفه : وش يدريك يا ريم , هو قالك انه بيجيني
ريم : ماقال , بس انا اعرفه ..
عذاري نزلت راسها : خايفة من أسألته , اخاف يسألني أسئلة ما اقدر اجاوب عليها
ريم بهدوء : عمتي , اذا جاك فارس , و وقف قدامك و سألك أسئلة جاوبيه حتى لو كانت الاسئلة صعبة عليك اجوبتها , لازم تجاوبينه .. لانك لو ما جاوبتيه .. فارس موب راجع لك ابد
عذاري هزت راسها وهي تقول : ان شاءلله , ليته هو بس يجي
ريم : ان شاءلله بيجي .. بـ اذن الله
عذاري وقفت وهي تقول : اجل تصبحين على خير
ريم : وانتي من أهله ..
رفعت ريم جوالها وهي تشوف مسج واتساب منه
فتحت المسج
فارس " شلونك ؟ "
ريم " بخير , انت شلونك "
فارس " بخير الحمدلله , ما ودك ترجعين "
ريم ابتسمت " بكرة ان شاءلله "
فارس : " الساعه 12 الظهر بجي اخذك , طيب "
ريم " طيب "
سكر فارس جواله , وهو يناظر حوله بطفش , ريم كانت مغيرة جوه بالمرة , تعود عليها بشكل كبير .. الفترة اللي راحت كان وقته كله معاها
رفع جواله وهو يشوف مسج منها
ريم " فارس , وش رايك تجيني الحين اذا انت فاضي "
وقف بسرعه وهو يكتب لها " يالله جايك "
أبتسم فارس , بـيروح يجيبها .. وكأنها فرحته بـ كلمتها هذي
ــــــــــــــــــــــــــــــــــــــــــــــــــ ــــ
في المطار , جالس ينتظر طيارته بعد ساعة , حجر له بسرعه من النت , وفيزته جاهزة لـ الرجعة ..
طلع جوازة السعودي , لما رجع طلع له بدل فاقد , و اخذ جوازه الامريكي وقطعه و رماه في الزبالة ..
وقف وهو حالف في داخله ما يرجع الا وهو ماخذ حق امه , و ابوه من عمر ..
ــــــــــــــــــــــــــــــــــــــــــــــــــ ـــــــــــــــــــــــــــــــ
جالسة لحد الآن مع سعاد , طول الوقت اللي راح كانوا جالسين بس يفكرون في الكلام اللي سمعوه
سعاد بعد مدة طويلة من الصمت : مشكورة , الله يجزاك الخير
لفت آمنه على سعاد وهي تقول : على وش يا سعاد
سعاد وهي تمسح دمعتها : على .. تربيتك لـ تـ..سيف
آمنه بهدوء : سيف ولدي , ما يحتاج تشكريني ..
سعاد قالت بعد مدة : نـور وين ؟
آمنه لفت على سعاد : تعرفين نور
سعـآد بهدوء : قالوا لي عنها ,
آمنه بـ استغراب : من اللي قالك عنها
سعاد : قالت لي وحدة من العاملات اللي يخدمون عند سيف في أمريكا عنها , قالت لي انها زوجة سيف , وان سيف يحبها حب مجنون .. اول ماجاهم من تعب فراقها و دوه المستشفى و كان يهلوس بـ اسمها
هزت آمنه راسها وهي تقول : صحيح , نور زوجة سيف ..وسيف يحبها من زمان ..
سعاد ابتسمت وهي تقول : ودي بـشوفها ..
كانت تسمع كلامهم , ودها تطلع لهم بس ما تبيهم يعرفون انها موجودة , اخذت عبايتها , وفتحت الدريشة وطلعت منها , ..
وقفت عند الباب حق الفيلا وهي تفتحه ..
آمنه بهدوء : شكلها رجعت ..
اخذت نفس نور وهي تحاول تبين لهم انها ماتعرف بوجوده ..
قربت وهي تقول : سيف ..
آمنه بـ ابتسامه رغم الألم اللي تحس فيه : يا هلا بالنور تعالي تعالي
نور ابتسمت وهي تقول بفرح : خالة آمنه .. يا قلبي انتي حمدالله على السلامة ..
ضمت آمنه نور , وهي تتذكر كلام سيف عنها كيف تحملت اللي صار لها في امريكا : شلونك يا عمر ي..
نور وهي تبوس راسها : بخير الحمدلله , انتي شلونك وش اخبارك ؟
آمنه : بخير الحمدلله ..
لفت نور على سعاد اللي تناظر فيها بحب كبير , استغربت نور كمية الحب اللي في عيون سعاد
قربت وهي تقول : خالة .. سعاد ..
سعاد ناظرت نور بدهشه : تعرفينني
نور قربت منها وهي تبوس راسها : ايه .. شلونك ان شاءلله انك بخير وما تعبتي من السفرة
سعاد كانت تناظر نور وهي مستغربه كيف عرفتها
نور جلست وهي تقول : سيف قال لي عنك , لا تستغربين ..
سعاد ابتسمت وهي تهز راسها ..
نور بـ ابتسمتها الحلوة : عسى ما تعبتي في السفرة
سعاد وهي مبتسمه : الحمدلله , حتى لو تعبت يا بنتي , شفت لي شوفه غسلت كل التعب اللي في قلبي ..
نور قالت وهي مبتسمة : الحمدلله
آمنه وقفت وهي تقول : دامك جيتي يا نور , انا بـروح اشوف سارة , مشتاقه لها
هزت نور راسها وهي تقول : بحفظ الله ..
طلعت آمنه ..
سعاد وهي تناظر نور : انتي اللي يهلوس بـ اسمك ولدي , اجل
نور أبتسمت لـ سعاد : موب لـهذي الدرجة والله يا خالتي , هو كلام بس
سعاد قالت وهي تناظر نور : موب كلام يا نور يا بنتي , لا والله موب كلام ..
أبتسمت نور لـ سعاد ..
سعاد وهي تناظر نور : وين تهقين راح سيف يا نور ..
نور اخذت نفس وهي ما تدري الاجابة اساساً : والله ما اعرف يا خالتي ,الله يعقله علينا سالم يارب
سعاد : يارب ..
نور وقفت وهي تمسك عربية سعاد : خليني اوديك لـ غرفتك..
دخلت نور سعاد في الغرفة الكبيرة اللي قدام غرفتها هي و سيف ..
ساعدت نور سعاد على انها تجلس على السرير ..
نور بـ ابتسامتها : لا أحتجتي شي , ندي علي بس .. انا بخلي الباب مفتوح بيني وبينك ..
سعاد : الله يسعدك يا بنتي , قولي امين
نور : آمين ..
طلعت نور وهي تجلس على الكنبة , أخيراً شفتها .. شلون تكون بنت عمر , وجهها سمح بدرجة غير طبيعية , وصوتها فيه من الراحة .. بشكل كبير ..
ــــــــــــــــــــــــــــــــــــــــــــــــــ ـــــــــــــــــ
طـلعت من البيت وهي تشوف سيارة فارس واقفه
ركبت وهي تقول : السلام
فارس لف عليها وهو مبتسم : وعليكم السلام , ما قويتي على فارقي ولا وش ؟
ريم وهي تبتسم : تبي الصدق , لا والله ما قويت .. بس مابغيت اجلس في البيت
فارس وهو يحرك السيارة : ليه ..
ريم تتصنع الضيق : ولا شي ..
فارس لف عليها وهو حاس ان فيها شي : ريم , فيك شي ؟
ريم هزت راسها وهي تقول : خلنا نروح لـ البيت ..
وصلوا لـ البيت وفارس ماهو مرتاح لـ صوت ريم الغير طبيعي
دخلوا الفيلا , فصخت ريم عبايتها و جلست على الكنبه ..
فارس جلس مقابلها وهو يقول : فيك شي ..
ريم اخذت نفس وهي تقول : ضايق صدري شوي
فارس بـ اهتمام : من وش , قولي ..
ريم وهي تناظر فيه : اليوم صار في العزيمة شي ضيق صدري , ما قدرت استحمله
فارس : وش صار
ريم عدلت جلسها وهي تقول : كنت ماره من عند عمتي عذاري لـقيتها تسولف مع بنت عم ابوي "ام خالد " تدري وش تقول لها يا فارس , تقول لها ماشاءلله رجعتي يا عذاري , عاد وين ولدك عنك , خبري صار عندك ولد , ولا تحسبيننا ماندري , ولا ولدك ترى منك , عاد يا عذاري لا تبرى منك لا تلومينة اللي سويتيه موب شويه فيه , قالت كلام اكثر من كذا , والله يا فارس لو تشوف وجهه عمتي غصب عليك عيونك بتجمع في عيونك , تدري وش كان شكلها , منزله راسها و تلعب في اظافرها و عيونها تقول بحر , كلها دموع ..
فارس ناظر ريم بضيق , قال بعد مدة : ..ماقالت شي هي ..
ريم اخذت نفس : أقولك مكسورة , والله العظيم يا فارس مكسورة , تحس انها فعلاً ما تحس بالأمان مع انها بين اخوانها , الا ان الكل يتجرأ عليها
فارس أخذ نفس و وقف وهو يطلع من الصاله
لفت عليه ريم وهي تناظره , تدري انها تضغط عليه , بس لازم تضغط عليه أكثر و أكثر لين يعرف انها امه ولها حق عليه..
طلع من الصالة و جلس على الكراسي اللي في الحديقة الصغيرة , احمرت عيونه , و قلبة كأنه ينزف , الجرح صعب , كيف لو كان من الأم ..
مسح وجهه بقوة و بعنف , قرر من داخله انه يواجها يـ تقنعه و تجاوب على اسئلته يـ انه يصير بلا أم لـ طول العمر ..
رفع راسه وهو يشوفها واقفه عند باب الفيلا ..
فارس بهدوء : ليه واقفه تعالي
ريم ابتسمت وهي تقول : مدري .. اجي عادي
فارس ناظرها : ما عرفتك , خبري فيك تدخلين كذا بدون استأذان
ريم جلست جنبه وهي تقول : عادي لو تصير يوم واحد في حياتك لبق ..
ابتسم لها و سرح في خياله , وهو يحاول يجمع الأسئلة اللي بيسألها أياها
بعد مدة , فارس : وش اللي محننك على عمتك كذا ؟
ريم ناظرت فارس : وش اللي محنني عليها , ممم ما اعرف , لكني احسها شخص طيب , مسلوب حقة , عاش طول عمره مظلوم , يعني لو نغلط غلطة ماهي محسوبه تروح حياتنا كلها في عقاب ليه , و بعدين لما انت تجلس عندها من حركاتها من نظراتها من كلامها تحسها شخص عفوي , يمكن بعد لانها عفوية احبها اكثر
فارس وهو يناظرها: يعني انتي حبيتيها لانها عفوية , جوابك ناقص
ريم تربعت على الكرسي وهي تقول : بالعكس جوابي كامل جداً , يعني انك تحب شخص لانه عفوي شي مره حلو , اساساً هو بيجبرك انك تحبه غصب عليك , لانك انت تعرف ان الشخص العفوي ماعنده وجهه ثاني يطلعه , يعني ماراح يجي يوم ويصدمك بـ وجهه الثاني ..و شخصية ثانية
فارس ناظر فيها , قال بعد مدة : جوابك .. أكتمل
ضحكت ريم وهي تقول : عارفة
ابتسم لها وهو يناظرها , قرب منها وهو يضمها , اندهشت من حركته , لكنها بـ سرعة استيعابها طبطبت على كتفه بهدوء ..
كان ضامها وهو يفكر بكلامها , و بـ امه , وبكل شي في حياته ..
ــــــــــــــــــــــــــــــــــــــــــــــــــ ــــــــــــــــــــــــــــــ
في غرفة ام سيف
سارة بعد ما سلمت على امها : يمه , انتي موب طبيعية , والله فيك شي
أم سيف وهمومها كبر الدنيا : مافيه شي يا سارة الله يرضى عليك
سارة وهي تناظر امها : عايشة معك 24 سنة يعني ما اعرفك يمه , وش فيك .. يالله عاد قولي لي انا سارة
أم سيف وقفت وهي تحاول تضيع الموضوع : مافيه شي ... يالله روحي لـ غرفتك ماعاد الا خير على الاذان لا تنامين الا لين تصلين
سارة انسدحت على سرير امها وهي تقول : اساعدك في شي
ام سيف وهي تتوضأ : ما يحتاج يا عيني , بـ خلي الخدامات بكرة يرتبون الاغراض , سارة .. شلون يا أمي البنيات اللي جابهن عبدالله
سارة ضربت راسها وهي تقول : تصدقين نسيت , من يوم ما رجعت نور وانا ناسيتهم
لفت ام سيف وهي تسمع صوت طرق الباب : تعال يا عبدالله
عبدالله دخل وهو يبتسم : شلون عرفتي انه انا يا الغالية
أم سيف أبتسمت وهي تقول : ولدي يا ابوي وشلون ما اعرفك
عبدالله ضم أمه وهو يبسوها مع راسها : الحمدلله على السلامة , نورت الرياض برجعتك
أم سيف جلست وهي تقول : منورة فيك يا عيني انت و اخوانك
لف عبدالله على سارة وهو يقول : شلونك سوير ؟ هاه شلون استعدادات العرس
سارة رفعت اصبعها بـ علامة "ok" : كل شي تمام يا قلبي انت .. شلونك ؟
عبدالله وهو يبادلها علامة " ok" : كل شي تمام
لف عبدالله على امه وهو يقول : فاضية يمه , بقول لـك شي قبل لا يأذن دام فيه شي ..
سارة : أطلع ..
عبدالله لف عليها : خليك . ..
ام سيف وفي يدها عداد الاستغفار : سم يا ابوي وش فيك
عبدالله اخذ نفس وهو يقول لها , عن زواجه هو و فرح ..
أم سيف ماكفاها موضوع سيف جاها موضوع عبدالله , اخذت نفس وهي تستغفر الله , تبي تهدى شوي : عبدالله شلون يا ابوي تعرس بدون لا تشاور احد
سارة عضت شفايفها , معقوله اعرس بدون ما قال لـ احد : كل هذا صار في يوم واحد يا عبدالله
عبدالله هز راسه : ايه ..
أم سيف اخذت نفس : و فرح , راضية ولا لا
عبدالله ماقال لـ امه ان فرح طلبت منه يتزوجها : ايه يمه
أم سيف هزت راسها : ياربي منكم يا عيالي كل واحد ياخذ قراره من راسه ولا يشاور احد
عبدالله : يا امي اضطريت والله ..
أم سيف : انت ابو 30 سنة وتعرف شورك زين .. الله يهديك يا وليدي
عبدالله وقف وهو يقول : وش السواة الحين
أم سيف هزت راسها بـ أسف : ما فيه الا تقول لـ عمك ابو صالح ..
عبدالله وهو يناظر سارة : في عرسك , بقول لهم اني اعرسك
سارة منسدحة على السرير , قالت بـ استهبال : لا تخرب عرسي لو سمحت
عبدالله : من زينك انتي و رجلك
سارة : لا تغلط على سلطان اغلط علي انا بس عليه هو لا
عبدالله هز راسه وهو يضحك : يالله اجل انا بـروح لـ المسجد , تامرين على شي ..
ام سيف وهي تناظر عبدالله : سيف , ما تدري وينه بـ ابوي
عبدالله : الا يمه , صح .. اتصل علي و قال انه ما بيسافر لـ موضوع ضروري , وما يقدر يحضر عرس سارة , وان الموضوع اللي صار ما يتأجل ابدا
سارة وقفت وهي تقول : عبدالله من جدك تقوله ..
عبدالله رفع كتوفه وهو يقول : ايه والله يا سارة
سارة ضاق صدرها بشكل فضيع : شلون ما يحضر زواجي
ام سيف وهي عارفة وش في سيف : سيف يا امي عنده هموم الدنيا , خليه على اللي يريحه
لفت سارة بظهرها وهي تقول بضيق : تصبحين على خير اجل يمه
ام سيف : وانتي بخير ..
طلعت سارة
ام سيف : عبدالله , مهر البنت يجيني كامل , موب معناته انك تزوجتها بسرعه مالها مهر ولا لها حقوق
عبدالله وهو يعرف امه عادله جداً : ابشري يمه , يالله فمان الله
ام سيف : فمان الكريم
ــــــــــــــــــــــــــــــــــــــــــــــــــ ــــــــــــــــــ
نزلت نظرها لـ اللي حاطة راسها على رجلها ..
متى صارت امها , وكيف صارت امها , هي اساسا ما تذكر شكل امها , لكن الشبه اللي بينها وبين "حنين" فضيع , كأنهم توأم لكن حنين أكبر ..
معقوله هذي أمها , معقولة كلام حنان صحيح , لكن وش مصلحة حنان تذكب , كل شي حولها يثبت لها انها امها , أولها الشبه , لكن شلون تقدر تتأقلم معاها وهي بعقل طفلة .. تذكرت لما كانت تسأل ابوها , كان يجاوبها بـ انه ما يذكر شي ابداً , ماكان يبي يجرح بنته بـ حقيقة عقل امها ..
مسحت دمعتها وهي تناظر وجه امها , كل شي اجتمع عليها فجأة , وليد و امها و بيتها و كل شي ..
حست بـ يد تمسح دمعتها
حنين بـ زعل و وجهه حزين : وش فيك .. ليه تبكين
سما أبتسمت وهي تقول : مافيني شي .. انا ..بس فرحانه لاني شفتك
حنين انبسطت : قولي والله .. لا تكذبين اللي يكذب الله يحطه في النار
بكت سما من كلمتها , كيف صدق طفلة , شلون بتقدر تعترف بالحقيقة
وقفت حنين وهي تركض بـشكل طفولي وتجيب لـ سما حلاوة : خذي هذي , حقتي بس انتي كليها
حاولت تكتم دموعها بالكاد , قالت بعد مدة : شكراً ..
جلست جنبها حنين وهي تسترجع احداث مضت : انتي كنتي صغيرة اول , وكنتي تبكين كثير و..و...كنت اعطيك حلاوة كثير و كنتي تسكتين ..بس الحين ليه ما تسكتين لما عطيتك حلاوة
سما وهي تمسح دموعها وتبتسم : سكت الحين .. شكرا
حنين هزت راسها وهي تقول : عفوا.. الشاطر بس اللي يقول شكراً
سما هزت راسها , بألم واضح على وجهها
ــــــــــــــــــــــــــــــــــــــــــــــــــ ـ
في أمريكا , واقف قدام الفيلا , نسى يسأل هدى السؤال اللي دايم يرواده ..وش صار لـ نور هنا مع سيف ..
لكن ما يعرف يضرب الباب , ولا وش يسوي
لف براسه وهو يشوف سيدة كبيرة في العمر معاها اكياس بـتدخل لـ الفيلا
ناصر : عذراً لو سمحتي
لفت ميلا على ناصر : أهلا سيدي
ناصر ناظر فيها : هل .. هل ...
ميلا وهي تناظره : هل تبحث عن السيد سيف , هو ليس موجود الآن ..
ناصر قال وهو يناظرها بشك : هل كان يعيش السيد سيف هنا ؟
ميلا : نعم كان يعيش هنا هو و زوجته
ناصر : زوجته
ميلا : نعم ... لـكن عذراً من انت
ناصر : انا ناصر , ابن عمه
ميلا فتحت فمها : آآه , انت ناصر أخو السيدة نور
ناصر : هل تعرفين نور
ميلا وهي تناظره بحزن : وهل لي ان لا اعرفها , كيف حالها الآن , هل هي بخير , هل رأسها بخير , لما أراها منذو مدة ..
ناصر بـعدم فهم : نعم هي بخير لكن مالذي حصل
ميلا وهي حاقدة على عمر : كثير من الاشياء حصلت , فالسيدة عانت هنا كثيراً من كل الاشخاص , فالسيد الكبير كان يعاملها بقساوة , والسيدة السعلوة كانت ايضاً تعاملها بـ قساوة لكنها كانت تحاول ان تتحمل ذلك
ناصر وهو مشوش : من هو السيد الكبير و من هي السيدة السعلوة
ميلا : السيد الكبير , هو الجد اومر .. و السعلوة هي هودى .. هما يعشان هنا , فهم اقارب السيد سيف ..
ناصر ناظر فيها : اقارب السيد ... السيدة هدى .. كيف كانت تعامل السيدة نور
ميلا بقهر : ياللهي , كانت تعاملها كأنها خادمة فعلاً , تتلفظ عليها بـ اقسى الكلمات , و تشاغب عليها كثيراً , كانت سيدتي تتألم فعلاً لكنها كانت تكتم كل ما يحصل في قلبها
ناصر بعدم استيعاب : هل تقصدين ان .. السيدة هدى كانت تعامل نور بت معاملة سيئة جداً , قد تصل لـ معاملة جارحة
ميلا بقهر : أكثر من هذا سيدي , فهي كانت تبعثر الاماكن و تطلب من السيدة نور تنظيفها , و تكسر الاشياء و تطلب ايضاّ من السيدة تنظيفها , ودائما ما تتلفض عليها باللغة العربية , لكني لا افهم ماذا تقول , لكن بعدها السيدة نور تبكي كثيراً وانا ارى هذا كثيرأ .. عذراً سيدي يجب ان ادخل لقد تأخرت كثيراً
هز راسه ناصر , ولف بظهره يحاول يستوعب وش اللي سمعه , ركب سيارته وهو يحاول يعيد الكلام اللي سمعه من ميلا ,
ــــــــــــــــــــــــــــــــــــــــــــــــــ ــــــــــــــ
الساعه 11 الصبح . ..
فتح عيونه , النوم مالي عيونه , ما قدر ينام الا متأخر , كان يفكر فيها
رفع راسه لـ الساعه , وقف بسرعه وهو متأخر مرره على الشركة ..
وليد م استوعب : ســـــــــما .. ســــــــمـ
سكت لـ لحظة و استوعب ان سما موب موجودة , مسح وجهه بيدينه
لف يمين و يسار , نسى وش بيسوي الحين .. فتح خزانة ملابسة وهو يطلع له ثوب , دخل دورات المياة , طلع بعد ما تروش , لبس بسرعه ..
قبل لا يطلع من الغرفة
دخل عليه سالم بـ بجامته وشعره المنكوش : ماما وين ..
وليد وهو يناظر سالم من زمان ما شافه باهذا الشكل المبهذل : ليه ما لبست وش مطلعك بـ بجامتك
سالم وهو يناظر في ارجاء الغرفة يدور سما : ما ادري , مالقيت ماما , هي تلبسني دايم
وليد بطولة بال: امك سافرت بترجع بعدين , يالله اطلع البس ورح عند لطفيه
برطم سالم وهو يقول : وين راحتك
وليد نزل لـ حد سالم وهو يقول : صر رجال , وش هالحركات , واذا راحت امك يعني وش بيصير في الدنيا , لا تصيح خلك رجال
سالم رفع كتوفه وهو يقول : ما اعرف
وليد بصرامة : سالم , صر رجال و رح لـ غرفتك البس بـنفسك يالله
لف سالم وطلع من الغرفة وعيونه فيها دموع ..
وقف وهو يشوف ولدة , يالله من سما , متى بترجع .. كل شي تلخبط بعد ما طلعت , كيف بيتعامل مع سالم في غيابها ألحين ..
ــــــــــــــــــــــــــــــــــــــــــــــــــ ـــــــــــــــ
نزل على أرض أمريكا , وهو ماغفت له عين في الطيارة , جالس يضبط خطة انتقامة من عمر , بتكون نهاية عمر على يدينه
شاف رجاله واقفين ينتظرونه , ركب السيارة وهو متوجهه لـ لفيلا و في داخله حقد العالمين , وكره العالمين لـ عمر ..
نزل من السيارة ودخل الفيلا , رقا بـ سرعه لـ غرفة عمر
فتح المكتب وهو يقول : الســــلام
رفع راسه عمر وهو يقول : سيف .. هلا بـ ولد بنتي , هلا بـعضيدي
قرب سيف من عمر وهو يقول : هلا فيك يا جدي , عسى ما تعبت من روحتي
عمر و ارتاح يوم شاف سيف : ارتحت الحين
جلس سيف على طاولة المكتب وهو يقول : جايب لك أخبار بـ تسعد قلبك
عمر تحمس : وش جايب يا وجهه السعد
سيف وهو يطلع ورقة من جيبه حقيقية الا انه مزورها : عمي صالح , بيجي لـ امريكا ..
عمر وهو يناظر الورقة ابتسم بخبث وهو يقول بفرح : يالله انك تحيه , في امريكا ..
سيف وهو يتأمل في وجهه عمر : لا جاء .. بينحسم كل شي , والحق بيرد لـ اصحابه
عمر وهو مستبعد فكرة ان سيف ممكن يكذب عليه : و بناخذ حقنا منه , ولا يا سيف
سيف : الا يا جدي , بـ ناخذ حق امي من عيونه , وحقك انت اول ..
عمر اخذ الورقة وهو يرقص فيها ..
سيف يناظر في عمر مستغرب حركته , المفاجأة ..
عمر لف على سيف وهو يقول بـ اسغراب : سيف .. متى جيت
سيف بـ استغراب : من شوي .. توني داخل عليك
عمر عقد حواجبه وهو يتفادأ الخطأ اللي وقع فيه : ايه ايه , مدري وش صار لي تلخبطت شوي
سيف ناظر في عمر , غريبة حركته , طول عمره ماكان يسوي هالحركات , لكن حركته اليوم غريبة
سيف ناظر عمر وهو يقول : فيك شي اليوم ؟
عمر ناظر سيف وهو يقول : مافيني الا العافية وش بيكون فيني يعني يتهيأ لك
سيف شك لدرجة اليقين ان فيه شي , مسحيل يتصرف عمر بـ هذه التصرفات
سيف : انا طـالع , وراجع لك بعد شوي
عمر هز راسه وهو يأشر لـ سيف بـ ان يخرج ..
طلع بسرعه وهو ينزل الدرج متوجه لـ الدكتور الخاص بـ عمر
نزل و هو يدخل عيادة الدكتور .. سلم الدكتور على سيف بحكم المعرفة اللي بينهم
سيف جلس وهو يقول : ماهي حالة جدي .. أراه هذه الايام بشكل غريب
الدكتور جلس وهو يناظر سيف : جدك منذو فترة كنت الاحظ عليه بعض التغيرات الجسدية و العقلية , فـ قد بدأ ينسى كثيراً , و ايضاً تغيرت شخصيته قليلاً , فـ اصبح عصبي أكثر من قبل , يكرر كلامه كثيراً , حركاته غريبة , بـعد التشخيص , وبالنسبة لـ حالة جدك و عمره , اتضح لنا و لسنا متأكدين لـ حد الآن , انه يعاني من بداية زهايمر , لـسنا متأكدين بعد يا استاذ سيف , يجب ان يبقى تحت الملاحظة قليلاً , لكنه يرفض ذلك ..
سيف : زهايمر ..
الدكتور : لا .. ليس زهايمر بمعناه , بداية الزهايمر تختلف كلياً مع الزهايمر , يعني قـد تكون تصرفاته اصبحت هذا , او قد تعني انه اصيب بزهايمر ..
سيف : مالعمل الآن ..
الدكتور : لا شي , فـقط ننتظر ..
هز راسه سيف , وقف وهو يطلع من العيادة بعد ما سلم على الدكتور ..
الموضوع ما دخل عقلة , زهايمر .. ممكن يصيب جده المرض بـسبب كبر سنه , لكن فيه شي يحس انه موب مضبوط , شي غريب
ــــــــــــــــــــــــــــــــــــــــــــــــــ ـــــــــــــــــــــــــــــــ
مر اليوم الأول هادي جداً
مر اليوم الثاني و بدأو يستعدون لـ زواج سارة
يوم الزواج ..
في الـفندق ..
سارة وهي تكلم نور : تستهبلين انتي موب من جدك ..
نور بكذب : وش اسوي , يعني زحمة موت الطريق
سارة : قولي والله ... يا حممممارة فستاني نسيته في السيارة .. اسرعي
نور : طيب طيب ... سكري انتي ..
سكرت نور من سارة , وهي متورطة مع سعاد , ما تدري وين توديها وفي نفس الوقت ودها تاخذها معاها الزواج ..
نور : خالتي , تروحين معي لـ زواج سارة اخت سيف ..
