رواية على نور الشفق احيا واهيم ⚜️

108

من بعد هالجمله عمّ الهدوء بينهم ومرّ الوقت وانتهت تجهيزاتهم بتفاوت اوقاتهم
وكانت الاسبقيه بالتجهيز لـ هيام ، بعكس شفق اللي كانت استعداداتها مختلفه لدرجه انها شعرت بجديّة الوضع اكثر من انـه يكون تجربـه وكأنه وصل لها شعُور هيام العميق وشدّة توترها بكونها اخت لعرُوس خلال ايام معدوده بيتم اجراء زفافها
ابتسمت وهي تتأمل هيـام اللي اقبلت عليها ببهجـه مُختلفه وهي تمتم بحُب لها ؛ عسى الله يتمم فرحتك بإختك ويتمم فرحتها بكل سرُور وخيـر
توسعّت بسمـة هيـام رغم الدمعّه العالقه بمحجر عيُونها واللي ما سمحت لها تتحرر وتنهمر من سيطرت عليها وهي ترفع راسها للاعلى بخفـه وتنزّله وتجعل من عيُونها تستقّر على منظر شفق الباهـي بفستان العرس وكيف طلتّها كانت ساحـره وكأنها فازت بتحقيق مُبتغى طالبها ومن شدّة الشعور اللي سكنها ما قدرت شفايفها تتحرر الا بدعوات صادقـه نبعت من اعماق قلبها لها ؛ ما شاء الله بارك الله كل جزء فيك وحماك ، وياعسى ربِّ بعينه من العيون اللي ابصرت كل زين فيـك يحرسك ، بوداعة ربٍ خلقك بكل هالتواصيف وجمّلِك ياشفق بوداعته

الدمعـه اللي امتنعت عن الانهمار من عيُون هيام ، نزلت بغفله من عيُون شفق من رهبة الشعُور اللي اكتساها من دعوات هيـام لها
واللي اهتزت ملامح هيـام لها بالنفي والاعتراض لا تنزل وهي تنطق من ضمت ملامحها بكفيّنها الحانيـه ؛ ماهي للبكـي حقها الفرح وكل الترف
لا تدمع عيونك ويظلم كوني
بسم الله عليك من عيوني ليكون دمعتك اسباب..
قاطعتها شفق من ابعدت كفّها وهي تهزّ راسها بخفّه ؛ مايجي منك ليّ الا اللي اعجز عن ردّه حتى بحياتي ، من عرفتك ما عرفت الا اكون صُحبـه مع الفرح
انتِ ماتنزليـن الا دمعـة فرح من محجر عيوني
كيف اجازيك ؟
قاطعتها هيـام من نطقت ؛ جازيني بأنك تفرحين اكثر وبس ، فرحتك وبس يا شفق تفهمين؟
سحبت عبايتها هيـام وهي تحطها على جسدها بإهمال وتحط الشيله على اكتافها تحت نظرات شفق المستعجبـه واللي تحس بأنهم انتهو لذا الحد والتجربه انتهت
لولا نوايا هيام الخفيّه من اخذت عباية شفق الخاصه بالعرُوسـه وهي تتوجه لها وتقومها من الكرسـي
قامت شفق ووقفت وما شعرت الا بالعبايه اللي سترت فيها تفاصيلها من اقفلتها هيـام على رقبتها
مسكت يدها وهي تنطق بنبرتها العذبـه ؛ توهّا تبتدي تجربتنا ، بزفّك من هنا وبنطلع كأنك آماليا وبعيش شعُور معك كيف ازف اختي بنفسي
استنكرت شفق وكانت بترفض لولا ان هيام كانت تشعّ عيونها بالفرح ما قدرت تكسر هالشي فيها وهي تمشي معها
لحد ما نزلو تحت وقبل تفتح الباب ، لفت هيـام عليها شيلتها وعدلتّ حجابها
ومن بعدها تأملت شفق لثُواني ؛ جاهزه ؟
هزّت راسها شفق وبضحكه خافتـه ؛ جاهزه هالليله كليّ ملك اوامرك خذيني وين ماتبين بس لا يختفي هالوهج فيك
ابتسمت هيـام بعُمق وهي تشد على يد شفق وتمتم بنبره خافتـه ما لحقت تسمعها شفق ؛ مُبارك ياعرُوسـة قلبي
لانها فتحت الباب واخترق اسماعها صوت بتّال اللي كان جاي لها ويبي يفاجئها
منظر شفق بفستان العرس كان يمثّل انه صادم له زي ما كان وجُوده صادم لها
ومع ذلك ما اهتمت شفق تلاحظ اختلافه قد ما بادرت بإفلات يدها من هيام وتوجهت له
وهي ترتمي بحضنـه من عمق والشوق واللهفـه اللي بداخلها له ؛ بتّال حرام عليك ما بغيت
ابتسم بتّال بخفـه وهو يبادلها الحضّن ؛ وعدتك وجيتك بأقرب فرصه العذر منك
ابتعدت عنه وهي تضربه على كتفـه بخفّه وترمقه بنظراتها الحارقه ؛ اقرب وقت؟ هذا الاقرب وش الابعد بظنك!
طلعت روحي ياخوي وانت بعيـد، وهذا الاقرب بيدينك!
ابتسم يبي يخفف انزعاجها ونطق ؛ قلت العذر منك والا ما لعذري خاطر عندك!
وبعدين انتِ عالمك مليء ب أشخاص يغنونك عني انا الوحيد هناك
عضت على شفتها ؛ خلاص بسكت بسكت بدينا بالدراما ، توك واصل؟
هزّ راسه بكذبـه ؛ اي وعلى طول جيتـك شايفه شقد انك مهمه عند اخوك
امّا هيـام اللي عارفه انه يكذب سحبت شفق وهي تنطق ؛ هالوقت ماهو ملكك ،ملك لي وشفق هالليله تحت امري ياليت تروح وتجي وقت ثاني
عقّد حواجبـه ؛ انتِ مين؟ وعلى اي اساس بطيع امرك!
اطلعي منها بس
رفعت حاجبها وهي تمسك يد شفق بقوه وتسحبها لجهتها
الا ان يد بتّال اللي مسك فيها شفق مُعترض ؛ هذي اختِ وانا الاولى بـز..
قاطعته هيـام من نطقت قبل لا يفضح كل الخطط ؛ الاختيار لشفق مالك دخل
شفق بتروحين معيّ نكمّل التجربـه والا بتتركيني بالنص لخاطر اخوك؟
ناظرها بتّال ببراءه بينما هيـام كانت تناظر شفق بتهديد
ضحكت شفق بخفـه وهي تفلت يدينها منهم وتنطق ؛ والله لو انكم هُمام تتهاوشون علي !
شفيه حبايبي شفيه روقوني
ناظرت لبتـال وبهدُوء ؛ صح انك اخوي وشوقي لك يفوق تصورك لكن وقتك غلط انا زي ماقالت هيام اليوم ملكها وتحت تصرفها
ما تشوف الحاله اللي انا فيها والا من بيلبس فستان زواج بدون عرس غير اللي يتبع جنان اوامرها
ضحك بتّال واخفى ضحكته وسيطر عليها من سقطت عينه على هيام اللي اشتحنت بالغضب ومع ذلك مازال ماسك دوره وكذبته ؛ زين من اللي اشوفه انكم بتطلعون يعني وبيوصلكم احد ليه ما اكون انا اللي اوصلكم للمكان اللي تبون وبكذا قضيت وقت معك زي ماهي بتحقق اللي تبيه
ناظرته شفق بصمت بينما هيَام نطقت بهدُوء ؛ اذا حاب تكون سائقنا لذي الليله ماعندي مانع لكن بشرط السياره اللي انا مجهزتها مو سيارتك
هز راسه بهدُوء ؛ موافق
ابتسمت شفق وهي تمسك يد شفق ؛ يلا اجل دامكم اتفقتوا نمشي تضايقت ابي نخلص هالليله بسرعه
ناظرت هيـام لبتّال اللي ماسك ضحكته وهو يتمتم بخفّه ؛ ليلك طويل توّك
ناظرت فيه شفق وهي مو فاهمه شيقول ؛ شقلت؟
التفت عليها ونطق بهدوء ؛ ما تكلمت اصلا بسم الله عليك
رمقته هيام بنظراتها الحارقه لأنه قاعد يكشفهم شوي شوي
صد عنها وهو يسبقهم بخطواته ؛ انتظركم عجلوا
طلع من البيت وعرف مُباشره السياره اللي تقصدها توجه للسائق وهو يقوله كل شي
سلّمه المفتاح وترك السياره تحت تصرفّه
وقف ينتظرهم لحد ماجو وهو يفتح الباب وينطق بهدُوء ؛ شفق من هنا
ركبت شفق وقفّل الباب من خلفها
وكانت هيـام تنتظره يفتح الباب لها لكن ابتسم بخُبث وهو ينطق ؛ اخدمي نفسك وافقت على شرطك بس مايعني اني وافقت على استلام مهمات سائقك
عضت على شفتها بقهر وهي تفتح الباب وتركب وتنطق بحلطمه ؛ مريض الحمدلله والشكر
ركب وسمع حلطمتها لان مقعدها خلفه مُباشره وقبل لا يمشي فتح الباب وهو ينزل يصوّت على السائق اللي توجه له مُباشره ؛ تراجعت خلك السائق بكون الرديف
كان عارف ان هيـام تعمدت على هالخطوه عشان تخليه يجرب شعور انه يكون سائق لها لكن ما سمح لها بهالشي من عرف خطتها
ركب من جهة شفق وصار بالمقعد اللي امامها
والسائق ركب بمكانه وحرك لوجهتهم
وطُول الطريق هيـام تحس بأن دخول بتّال عفس هالليله عليها بعكسه هو اللي كان رايق تماما
وبعكس شفق اللي تجهل لأي وجهه رايحيين ووش اللي ينتظرها
بعد مرُور وقت
وقف السائـق آمام المطـار الدولي
نزل بتّال وهو يفتح الباب لشفق واللي من استوعبت المكان نطقت بذهُول؛ مضيعين !
هذا المطار مو..
قاطعتها هيـام اللي نزلت وتوجهت لها مُباشره وهي تمسك يدها ؛ انتِ ملكي وتحت تصرفي يعني حتى الاسأله ممنوعه
تأملت المكان حولها واستكملت ؛ زي ما تشوفين تجربه جديده و اكبر اسباب توتري اختلافها
مابي اجيب العيد وانا اقوم بدورين دور الاخ والاخت بنفس الوقت لآماليا
كان كلام هيـام كفيل بتلاشي الشكوك اللي بداخل شفق واستبدلها كلها بأنها تشعر بتوتر هيـام الفعلي لأنها الاخت الوحيده لآماليا وكونها تعيش دورين مو دور واحد
ضغطت على يد شفق بقوه وهي تركزّ نظراتها فيها ؛
ليكون بتنسحبين بعد ما وصلنا لأخر خطوه !
ابتلعت ريقها شفق وهي تشُوف منظرها بفستان العرس وبكامل زينتها ؛ بس هُمام لو درا قتلني ب ارضي!
شايفه حالتي انتِ مو عاديه ابدا
بتّال اللي لقاها فرصه يحارشها ويقهر هيـام نطق بترديد لـ كلامها وبنبره نجحت بإستفزاز هيام ؛صح انك اخوي وشوقي لك يفوق تصورك لكن وقتك غلط انا زي ماقالت هيام اليوم ملكها وتحت تصرفها
عسى بس اعجبك تصرفها ؟
انقهرت منه هيام اللي تدري انه يدري عن كل شي ؛ انت ليت بس تبلع لسانك وتسكت
ما يخصك وم اجبرتك على الجيه معنا انت عرضت توصلنا
قاطعتهم شفق ؛ شايفين المكان انتم !
بتتهاوشون هنا بعد اوف ياربِّ
ليت هُمام موجود عشان يتصرف معكم