رواية على نور الشفق احيا واهيم ⚜️

12

#على_نُورّ_الشفقّ_وعلى_وتر_القدر

'

شفق هزت راسها بهدوء وطلعت مع هيَام لبرا الغرفه
توجهت هيَام لآماليا وطلبت منها تهتم للارين اللي بدورها آماليا تجاوبت معها ومارفضت ابداً بالعكس حست انها بحاجه لإشغال نفسها عن التفكير وطلعت من غرفتها وتوجهت لغرفة هيَام وهي تجلس على سريرها وهي تمسح على راس لارين وحاضنه يديها الصغيره لبين كفوفها وتتأملها بنومتها ؛ كم انتي ملاك بريء ي صغيره
,
,

سحب اللحاف على تُقى اللي غطت بنوم عميق وهي مابين احضانه انسحب من فوق سريرها بهدوء وهو يطلع من غرفة بنته
تنهد بعمق وهو يشوف غزل تمارس هوايتها المفضله وهي التطريز رغم انه محذرها من الرجوع لها بهالسرعه بعد تعبها الاخير
انسحب لها بهدوء وهو يسحب من بين اناملها طارة التطريز وبتعقيد ؛ اتوقع تكلمنا بهالموضوع ي غزل والا ؟
غزل ؛ ادري بس مليت اقاوم شوقي لهم
تدري من صغري وانا م افارقهم لو ثانيه والحين صار لي فوق الشهر عنهم لا تلومني
الوافي بهدوء ؛ مؤقت يا غزل مؤقت ماني مانعك منهم الدهر كله
غزل وهي تترك الابره وترجعها مكانها مع الادوات كلها هزت راسها بخفوت ؛ تمام ولا تزعل
الوافي وهو يترك الطاره على جنب ؛ تدرين اني م اسوي كل هالشي عشاني عشانك فتجاوبي معي ولا تاخذين بخاطرك مني
غزل بإبتسامه وهي تقوم ؛ لا شدعوا ازعل منك وانت تهتم لي مالي داعي والله
الوافي ابتسم لإبتسامتها اللي اخذت قلبه ومشى معها بهدوء
,
,
سحب قهوته وهو يرتشف منها وعيونه على دُرّه اللي ترسم بأناملها المميزه بكل إندماج ثم نطق بهدوء ؛ يا الله يادُرّة حلم العمر باقي عنه شهر فقط ويمكن اقل؟
دُرّه ابعدت الريشه من على اللوحه والتفتت عليه تصحح معلومته بإبتسامه ؛ شهر وعشر ايام بالضبط ياروّاف
روّاف ؛ ما شاء الله حاسبتها بالتمام بعد
دُرّه وهي ترجع تكمل ؛ اكيد ياعيوني لازم اهتم بأدق التفاصيل ومنها اني اعرف متى بالضبط موعده
روّاف ؛ الله يوفقك يادُرّه بكل خطوه تخطينها
دُرّه ؛ آمين
عم الصمت لكم ثانيه ثم قاطع هالصمت سؤال دُرّه المباشر لروّاف ؛ بنرجع للسعوديه بعده صح؟
روّاف بهدوء رغم ضيقه من هالناحيه ؛ اي ي روحي وش يبقينا هنا اكثر مصيرنا نرجع لبلدنا واهلنا
دُرّه ؛ تدري وش الشي اللي خايفه منه ؟
روّاف بهدوء ؛ عارف ردة فعل إيڤا برجعتنا وهي عالمها كله هنا لكن ليومها يحلها ربي
دُرّه بهدوء ؛ الله يكون بالعون
,
.
.
ليقطع محاورته لنفسه رنين الجرس اللي داهمه بهالوقت المتأخر وهمس بفرحه تعبر عن صدق مشاعره اللي يحاول قد ما يقدر يحاربها ؛ ساره
فتح الباب بحماس كبير وسرعان ما اعتلت صدمته وهو يشووف اللي خلف الباب
انعفست ملامحه وهمس الوافي برفعة حاجب ؛ افا ياصاحبي تعفس ملامحك بوجهي !
لا لا واضح م فرحت بشوفتي؟
هز راسه بالنفي ابوخالد بسرعه وفتح الباب على مصراعيه ؛حاشى لله يالوافي تفضّل حيّاك
الوافي بتساؤل من لمح نبرة الصوت الغريبه بصاحبه ؛ وش اللي مكدر خاطرك؟
وش فيك ياخوي؟
قفل الباب بهدوء واشر على الجلسه اللي برا ؛ تفضل اجلس ياالوافي
الوافي رفع حاجبه بذهُول ؛ لا والله انك مو خالي واللي مكدر خاطرك شي عظيم
ابوخالد إبتسم بتسليك ؛ لا يروح فكرك لبعيد الموضوع م يسوى اجلس لبين ما اصلح القهوه
البيت بيتك ياصاحبي
رفع حاجبه الوافي بذهُول اكبر وكأنه شك بشي ؛ انت تصلح القهوه؟
ذكرني يا صاحبي ليكون اني نسيت ؟
اذكر انك متزوج؟ والا يتراولي
ضحك ابوخالد رغم ضيقته ؛ متزوج متزوج
وبكذبه ؛ لكن زوجتي وديتها لأهلها تبي تشوفهم والبيت صار خالي من بعدها وانا اللي اخدم نفسي لا تستغرب
الوافي بإرتياح وهو يجلس ؛ لا زين اجل ، يلا عجّل بالقهوه ابي اتقهوا
ابو خالد بتحديق وهو يجلس ويتكتف ؛ غيرت رايي بما ان البيت فاضي وم فيه الوالي ليه م تروح تخدم نفسك هاه؟
الوافي ضحك ؛ لوهو بيتي بخدمك لكن مو بيتي انت قم واخدمني
ابوخالد ؛ بيتي بيتك لا تتعذر وفز يلا وسوو قهوتك واخدم نفسك
جاء بيقوم الوافي الا ان ابو خالد قام ورجعه ؛ تذكرت اني توني شباب وماعشت عمري الكافي مابي اموت بسبتك
لان القهوه شرق وانت غرب
اروح اسوي القهوه اضمن لي ولعمري
الوافي برفعة حاجب ؛ لازم الاحراجات لازم ما تتوب يا ابو خالد ما تتوب
رجع ابو خالد وهو يطل عليه من الباب ؛ ولا اتوب دامك صاحبي
الوافي ضحك بخفوت وهمس بتنهيده؛ يازين سوالفك ياخوي عليم الله اني اشتقت لأيامك
مرت ربع ساعه وخلص ابوخالد القهوه وجهز التمر وشوية حلا جنبه
نزلهم قبال الوافي ونطق بهدوء ؛ اختر ما تريد وما تشتهيه ياغُلام فكل ما لذ وطاب امام عينيك
الوافي ؛ غُلام بعينك !
وش بك متأثر بالدرامات التاريخيه
ابوخالد ؛ لايغرك م اعرف الا ذا الكلمتين
الوافي ؛ واضح من كلمة غُلام اللي بغير محلها
ابوخالد ؛ اعقب اثرني جايب العيد!
الوافي ؛ بدري توك تفطن تو تحس؟
ابوخالد بدندنه ؛ يابتفكر يابتحس مافيك تقف بالنص
واشر على الوافي اللي جالس ينقي من الحلا والتمر ؛ ولا فيك تاخذ كل شي نقي واحد منهم بس!
الوافي ؛ اعقب يالبخيل !
من توك قايل كل ماتريد
ابوخالد برفعة اكتاف ؛ غيرنا المود وصرنا نتبعه ما جازلك مود غُلام تحمّل مود شيرين
الوافي ؛ نرجع لمود غُلام احسن
ابوخالد ؛فاتك الدور وطارت الطيور بأرزاقها حالياً عندنا بس شيرين
الوافي ؛ نسوي تحديث؟
ابوخالد وهو يهز راسه بشكل عشوائي ؛ هذا الجهاز البشري لا يتوافق مع التحديث المطلوب اعتقد بأنه معطل الرجاء المحاوله في وقت لاحق
الوافي ؛ يعني شلون يروح علينا كل شي
ابوخالد وهو ياخذ الحلا من قدامه ؛ يكفيك التمر كل منه واتبع سلم اجدادك
وخل الحلا لي ولأمثالي
الوافي وهو يسحبه منه ؛ والله تخسي وتعقب ابيه اشتهيته عيني عليه لا تغص فيه وتموت
ابوخالد ؛ والله اغص اموت مالك دخل المهم ماتاكل منه لي لحالي
الوافي ؛ والله م يطب بطنك وانا م اكلته
ابوخالد بمدة لسان وهو يقوم ويضحك وكان بيدخل قطعة حلا بفمه ؛ على اساس بنتظرك تسمح لي هه
قبل لا توصل لفمه لقطها الوافي واكلها تحت صدمته؛ قلت لك والله م تطب بطنك قبلي
ابوخالد بتحديق ؛ يالمشفوح
الوافي ؛ مشفوح ماني مشفوح المهم تممت حلفي الباقي عليك بألف عافيه
ابو خالد نزل الححلا وجلس مقهور ؛ جعله مايحدر
ابتسم الوافي بإستفزاز وقام من مكانه واخذ يناقز بشكل متتالي وبعدها جلس واتسعت ابتسامته بإستفزاز اكبر وهو يقول؛ هاه حدر
ناظر في ابو خالد لفتره وبعدها ضحك بقل حيله
الوافي مايجوز عن هالحركه مهما كبر وكبر عقله وعمره
تبقى هالحركه الاستفزازيه من الاولويات والاساسيات اللي مايتخلى عنها الوافي لاستفزاز ابو خالد.
ابوخالد بضحكه وهو يصب له القهوه ويمدها له ؛ دوك دوك حدرها لاتموت علينا بسبة حلا