كتاب الأمل💜
الجزء 90
باختصار هادي كانت أول مرة عقاب مايلقاش جواب لشي هضرة
أسماء شافتو ساهي او هي تزيد تعنقو او هضرات بهمس: عمرك فكرتي فعلاش كنتي مبعد عليا ديك الأيام
عقاب كان ديجا هاد السؤال فراسو او بما أنها جبداتو إذن عندها دراية بالموضوع ، من بعد دقيقة صمت لي وقعات من بعد السؤال ديالها و أخيرا فتح شفاهو او تكلم
عقاب: لا
أسماء: تبغي تعرف
عقاب نزل ليها عينيه او هي كانت مخشية فيه مكيبانش وجهها او تكلم: ايلا كنتي عارفة
أسماء طلعات فيه عينيها بهدوء: غادي تيقني
عقاب هز براسو او هي كملات كلامها: ديك الحالة لي كنتي فيها او طريقتك كيفاش كنتي كتهضر ، كانت ديال شي واحد ساحرين ليه (سكتات شوية كتشوف فيه كيفاش كيشوف فيها بهدوء ماعرفاتو واش مصدوم اولا لا او كملات) كنعرف شوية على الموضوع داكشي باش عرفت
عقاب : او شكون لي شكيتي فيه
أسماء غمضات عينيها: مابغيت نظلم حتى واحد
من بعد هاد الكلام ساد الصمت بينما عقاب لي كانو على ملامحو الهدوء كان داخلو شئ آخر ، عقلو كيحلل او يناقش او كيحاول ينفي قضية أن فدوى تقدر دير شي حاجة فحال هاكدا حينت مادوزش معاها قليل او كتبان ماشي من النوع لي تزعم بهاد الطريقة ، زائد هي الوحيدة لي شك فيها حينت مكاينش شي واحد فالقصر ماباغيهش مع أسماء ، او شي مرات كيخوي راسو من التفكير او كيقول بلي ممكن أسماء اتهيئ ليها ، مي ملين كيجي يحكر فالموضوع كيلقى بلي بصح كانو تصرفاتو غريبة او ديك النوبة العصبية لي كانت كتجيه فديك الأيام ماشي طبيعية
أسماء لاحت ليه ديك الهضرة او نعسات مخلياه كيضور فبلاصتو او ماعرف شنو يتيق ولكن بخصوص أسماء فهو متيق كلامها صون پوغ صون ، مي باقي عندو شك بلي غلطات فتخمينها ، يعني القضية ماشي قضية كدبات عليه ، القضية فيها عندو شك بخصوص الموضوع فقط
__________فالمغرب __________
كدور فالجردة ديال القصر بميني فالپيسطاج بالكمام او سروال جينز ، او فرجليها سپادري ، او عويناتها حتى هوما كيضورو معاها حتى لمحات عينيها كطكاط داخلة مع القصر الشي لي خلاها توقف او تبدى تشوف فيها حتى توقفات قدام الباب الخشبي او نزلات منها فرح لابسة سروال كحل او بودي من شبكة كتبان بحال اللحم او ديباردو من التحت فالگري ، رنيم صغرات عويناتها باستغراب حينت مكتعرفهاش او تمشات جيهتها ، بينما فرح كانت دقات او كتسنى يتفتح الباب حتى وقفات جنبها ، ضورات ليها راسها بشوية او ابتاسمات
فرح : السلام
رنيم ابتاسمات فوجهها : السلام
تفتح الباب او هي تم داخلا او موراها رنيم كطلع او تنزل فيها الفضول لي فيها بغات تعرف شكون هي ، حتى دخلات فرح لصالون لقات غير راضية او سوسن او مريم كل وحدا جالسة فقنت ، لقات السلام او جلسات عاد جلسات جنبها ريم كتشوف فيهم فحال ايلا كتسناهم يقولو ليها شكون هادي لي جات
فرح شافت فرنيم او رجعات عينيها لسوسن: شكون هاد الصغيورة
مريم ضحكات: المنافسة ديال أسماء من بعد فدوى على عقاب
فرح جمعات الضحكة او شافت فرنيم لقاتها كتشوف فمريم او على وجهها الهدوء ماتعرفها فاش كتفكر او هضرات بصدمة
فرح: واش بصح
راضية : لا ابنتي غير كضحك
فرح شافت فيها : فين أسماء (ابتاسمات) جيت نشوفها
راضية: مسافرة ابنتي هي او عقاب
فرح جمعات حجبانها : بلا خباري
راضية: حتى حنى ابنتي ماكناش عارفين ، عقاب عندو شي خدمة مزروبة او داها معاه
فرح هزات براسها: هاكدااك (وقفات) ملين مكيناش نمشي فحالي
راضية: لا جلسي ابنتي حتى تغداي معانا ، مجاتش غير طلي او تمشي ، جلسي
فرح رجعات جلسات او هوما قلبوها حديث كيهضرو او رنيم ماعجبهاش الجو ناضت خرجات تاني كضور فالجردة
*يتبع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
