كتاب الأمل 💜
الجزء 62
كملات عشاها ، لي غير نقبات منو او هي توقف
أسماء: بالصحة
تمشات خارجة او مريم شافت فراضية او هضرات
مريم: بانت ليا أسماء ماشي حتى اللهيه
راضية مستغربة: حتى انا داكشي لي بان ليا
مريم وقفات من بلاصتها : غادي نمشي نشوف مالها
تبعاتها حتى دخلات عليها الجناح لقاتها عاد كتحيد فحوايجها ، سدات الباب او تمشات جيهتها حتى جلسات على طرف السرير او أسماء غير متبعة ليها العين
مريم بابتسامة: مالك
أسماء بهدوء: ممالي والو
مريم : تخاصمتي مع ولدي
أسماء حركات راسها بالنفي: لا
مريم ضحكات: او شنو لي مخليك مقلقة ، حسبيني صاحبتك لي كتيقي فيها او فضفضي عليا
أسماء تنهدات او تمشات حتى جلسات جنبها او بدات كتحرك صبعان يديها بتوتر او هي كتشوف فيهم : غادي نقولك او انت بغيتك تشرحي ليا هادشي لي حسيت بيه
مريم ابتاسمات: واخا
أسماء شافت فيها او حابسة البكية فجوفها : عقاب مع فدوى فالبيت او انا ماعاجبنيش الحال
مريم ضحكات او جرات يديها كطبطب عليها : الغيرة هادي ابنتي ، او انت من حقك تغيري
أسماء بقات غير كتشوف فيها هي اصلا عارفة راسها غارت مي سولات كتحاول تنفي الفكرة لي جات فبالها
أسماء: دابا انا غادي نبقى فينما يمشي لعندها نحس فحال هاكدا
مريم ابتاسمات ليها : اه ، اولا مادرتيش حل غادي تمرضي او تشرفي قبل الوقت بسباب هاد الغيرة او التفكير الزايد
أسماء: اشمن حل
مريم ابتاسمات: عقاب خاصو يقلل مشيتو لعندها ، او باش يقلل المشي خاصك تجريه عندك ، ولدي عقاب باغيك او هادشي باين غير من شوفاتو ليك او تسوالو فيك (زادت عرضات ابتسامتها) عمرو سول ففدوى
أسماء عضات شفتها التحتية ملي جا فبالها بلي مع فدوى او اكتافات بالصمت او مريم وقفات من بلاصتها كتشوف فيها
مريم: كلشي غادي يولي مزيان ، او انا غادي نوقف معاك حتى تمشي فدوى من هاد القصر
تمشات خارجة او أسماء بقات فبلاصتها كتشوف فيها حتى خرجات او سدات الباب ، عاد وقفات من بلاصتها بدلات حوايجها او دخلات البلاصتها كتحاول طرد الأفكار من راسها باش تقدر تنعس
يوم جديد 🌤️
على مائدة الفطور جالس كل واحد فمكانو او أسماء جالسة جنب ياسين مافيها لي يتحاك مع فدوى تاني ، لابسة عباية فالگرونة مع شال فنفس اللون او كتسنى ينضمو ليهم كل من عقاب او فدوى باش يبداو فطورهم ، حتى دخل عقاب بكوستيم أسود بقميجة بيضة او شادة فدراعو فدوى او بمعنى أصح لاسقة عليه او كتبتاسم او تشوف فأسماء لي متبعة ليهم العين كتقلي ليها السم زعما ، او مريم حاضية ردة فعل أسماء بينما الكل معاطيش اهمية للموضوع حينت مافراسهم مايتعاود ، شد عقاب بلاصتو جنب مو بعدما لقى السلام عاد جلسات جنبو فدوى او باشرو فأكلهم ، أسماء كتحاول ماطلعش عينيها تشوف فيهم مي والو كتسهى او طلع عينيها فيه كتلقاه كياكل مامسوقش ، او هادشي كيزيد يحك على الدبرة ديالها ، رجعات نزلات راسها كتاكل ،بعد مدة سمعات صوتو
عقاب: أسماء
أسماء شافت فيه بهدوء: نعام
عقاب: كنتي باغيا تمشي ليوم الكتاب ، نوضي نوصلك
أسماء: غير سير ، غادي نشوف الشيفور يوصلني
عقاب تمشى خارج: قلت نوضي نوصلك
أسماء تنهدات او ناضت من بلاصتها تابعاه او فدوى متبعة ليها العين كتخنزر
*يتبع
YOU ARE READING
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
