كتاب الأمل 💜
الجزء 55
دار يديه فجيابو او تمشى خارج او هي موراه كتمشى بالهداوة او كتحاول تقاد المشية واخا مقصحة ، مي كتعافر مابغاتش يلاحظو حينت الأمر محرج بنسبة ليها ، نزلو التحت او دخل عقاب هو اللول شد بلاصتو عاد دخلات هي موراه حشمانة او ماقداراش الطلع عينيها حتى جلسات جنبو او هي تسمع راضية تكلمات
راضية : كي صبحتي ابنتي
أسماء طلعات فيها غير عينيها : الحمد لله الحاجة
راضية هزات براسها او ابتسامتها عراضت ، من بعد باشرو فأكلهم
سالا فطورو او وقف من مكانو مغادر الطابلة حتى وقفو صوت أسماء موراه
أسماء وقفات: تسنى باش توصلني معاك
عقاب ضور ليها غير راسو او هز حاجبو : فين
أسماء بخفوت : الكتاب
عقاب : مكاينش الكتاب اليوم (تمشى خارج )
أسماء: ولكن .....
ضار عندها عقاب هاد المرة مخنزر خلا حسها يتقطع او هضر بعصبية مخلي صوتو كيتعاود فودنيها: قلت ليك مكاينش الكتاب اليوم
راضية شافت عقاب انفاعل او خافت يتخاصمو من أول نهار ليهم او هي توقف او دوات مخاطباه: غير سير اولدي (شافت فأسماء لي كانت كتشوف فعقاب بحدة ماحملاتش الطريقة لي هضر معاها بيها) ليوم نهارك اللول ابنتي فالزواج مجاتش تمشي تخدمي اولا
أسماء ضارت شافت فيها او ابتاسمات ابتسامة صفرة : عندك الحق
رجعات جلسات او دارت راسها فالماكلة ماطلعاتوش فحتى واحد، اما فرح لي كانت جالسة جنب نبيل او سوسن كانت مترقباها بعينيها ، حتى هي بدا كيسرى معاها لبلان او بان ليها عقاب من النوع لي كيتحكم بزاف او موحال يتافق مع أسماء ، حينت أسماء بقوة ماتحكمو فيها والديها ، من النهار ولات بوحدها او هي مكتخلي حتى واحد يسيرها على يدو ، تنهدات بخفوت او بدات كدعي فسرها مع صاحبتها
أسماء فطرات او شافت جيهة فرح او حركات ليها حاجبها بمعنى تبعيني او حتى هي فهماتها ، خرجات من الصالون او تبعاتها فرح مخليا غير نبيل او سوسن او راضية
راضية شافت فسوسن او هضرات بقلة حيلة : شفتي كيف كيهضر مع البنت ، بانت ليا أسماء ماعجبهاش الحال
سوسن شافت فنبيل راجلها او رجعات شافت فيها : طبعو فحال عبد الخالق الله يرحمو ، او انا بان ليا ظلمتي أسماء ملين زوجتيها ليه ، البنت باينة فيها درويشة او عقاب كيبغي كلمتو هي لي تكون (كملات بهمس) فحالك الحاجة
راضية حدها بقات كتنهد او تحسر
عند البنات فالجناح ديال أسماء لي كانت جالسة على السرير كلها كترجف بالأعصاب من راسها لرجليها او كتشوف ففرح : شفتي كي هضر معايا ، زعما عاد تزوجنا ماعندوش فالقاموس ديالو سيمانة دالباروك ، من النهار اللول الغوات او الأعصاب (بعصبية ) انا يبدا يتحكم فيا او يهضر معايا بديك الطريقة قدام عائلتو ، (ابتاسمات بعصبية) كتشجعيني غير تزوجي بيه السيد بخيرو ، هاهو الخير بالحق فينو التعامل
سكتات او رجعات كتشوف قدامها كتحس براسها غادي تفركع بالأعصاب او فرح قربات منها كتدوز على دراعها او مرطبة نبرة صوتها كتحاول تهدنها: يقدر يكون معصب او ماقصدش يتصرف هاكدا (هزات حاجبها) واش قلتي ليه شي حاجة قبل ماتنزلو
أسماء شافت فيها : اش قلت ، يجعلها تگالليه ، ماقلت والو ، هو بعدا كيخلي ليا الفرصة نهضر
غير سالات كلامها تسمع صوت مجهد جاي من التحت خلاها توقف من مكانها هي او فرح او شافو فبعضياتها باستغراب ، حركو خطاويهم كيجريو خارجين من البيت يعرفو اش واقع
بينما التحت كانو خطاويها سراع او هي داخلا مع الباب دالقصر او صوت سباطها كااسر الدنيا او الصدى دصوتها كيعاودو الحيوط ديال القصر
.............: عقااااااب ، فييينك عقااااااااب بان عندي هنااااا
هههه ماعزيزش عليا الهدوء داكشي علاش نويت نشعلها او هاحنا بدينا نشعلوها ، كيف كتشوفو سي عقاب طبعو سلطوي قال لالة راضية ماتعرفي والو فالحكام ، او أسماء ماشي من النوع لي كيتحكر راه غير مزال مكيعرفوهاش مالين القصر ، الأجزاء الماجية غادي نشوفوها بحلة جديدة او انتعرفو على شخصيتها لي كتخرج غير فالأوقات العصيبة ، غادي تربي ليكم سياد القصر او حتى داك عقاب لي هاز خنافرو السماء اتنزلهم ليه توريه يبدا يطبق عليها كلمتو 🙂 عجبكم الهدوء او استحليتوه ياله ودعوه ابناتي حينت من ليوم مكاين غير تشنشيط 😂
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
