كتاب الأمل 💜
الجزء 63
طلعات الفوق الجناح ديالها هزات صاكها او نزلات التحت ، خرجات لقاتو جالس فالطنوبيل كيتسنى فيها ، ركبات جنبو او دارت السانتر بهدوء كتشوف قدامها مادوات ما تكلمات او هو ديمارا
عقاب: مالك قالبة وجهك
أسماء شافت فيه : الهرمونات
عقاب شاف فيها او رجع عينو الطريق: متأكدة
أسماء تنهدات: قضية كرامة
عقاب هز حاجبو: كنلاحظ بلي ميزاجك كيتقلب فساعة ، عاد البارح كنت مزيان ، شنو واقع ليوم
أسماء عضات شفتها التحتية بتوتر او دوات بخفوت: حاسة براسي ماشي حتى اللهيه
عقاب شاف جيهتها او رجع عينو الطريق: كنتمنى ماتبقاش العلاقة ديالنا سطحية، حينت مزال غادي نشاركو عمر طويل
أسماء: ماتعرف من هنا القدام اش يوقع ، كلشي بإرادة الله
عقاب: شنو ممكن يوقع
أسماء هزات كتافها : يوقعو مشاكل او نطلقو
عقاب شاف جيهتها متوشي: من جيهتي أنا عمرني نفكر فالطلاق
أسماء شافت فيه: علاش
عقاب ابتاسم جنب : قضية كرامة
الصمت ساد الموقف ماردات عليه بوالو ، بينما هو بدا كيدور كلامها فدماغو
وصل الكتاب او وقف كيبان ليه يوسف واقف فبلاصة بوحدو مبعد على العيالات
أسماء نزلات من الطنوبيل او ضارت شافت فعقاب : بسلامة
عقاب كان كيشوف جيهة يوسف: شنو كيدير يوسف هنا
أسماء شافت فين كيشوف: اه هو لي كان كيجي يدير الدرس او قبيلة صونيت عليه قتلو بلي جاية ، خاصو يقول ليا فين وصل معاهم
عقاب شاف فيها او هز براسو بلاما يتكلم او هي سدات الباب او تمشات جيهة يوسف ، بينما عقاب بقى فالطنوبيل حاضيها بعينيه حتى مشا يوسف فحالو عاد ، ديمارا الطنوبيل تاني
المساء 🌇
جالسة أسماء او ياسين او مريم فالصالون مريم كتعاود او ضحك او أسماء كتبتاسم ليها حتى دخل عليهم عقاب ، لقى السلام او جلس جنب أسماء كيشوف فيهم
مريم شافت فيهم بزوج او ابتاسمات: على سلامتك اولدي
عقاب هز براسو: الله يسلمك
مريم سافت فأسماء او ضحكات: ايوا نكمل ليك، رجعنا الدار او طلعنا البيتنا ، عبد الخالق ديك النهار شحال غوت ، الغيرة عند الراجل كتخرج بالأعصاب ماشي فحالنا حنى النساء كنسكتو او نكمدوها فقلبنا
أسماء شافت فعقاب لي كان بدورو كيشوف فيها او رجعات شافت فمريم : الغيرة زوينة ولكن شي مرات كتولي مبالغ فيها ملين كتوصل بالشخص يفكر يقتل
مريم حدها ابتاسمات او هي دخل سوسن طالقة حلقها ماشافتش عقاب : مجموعين بلا بيا (كتشوف فمريم) خاص نعاودو شي خرجة فحال البارح
أسماء ابتاسمات: إن شاء الله
حدها قالت كلامها تسمع تليفونها كيصوني ، شداتو فيديها او شافت الرقم او هي تبدى تفتف او طلعات عينيها فعقاب لي حتى هو كان كيشوف فيها او غير من نظرتها عرف غادي يكون بها ، وقف او جرها من يديها حتى وقفات رجليها ماهازينهاش ، او تمشى بيها خرجو الجردة او شاف فالتليفون لي فيديها
عقاب: جاوبي او ديري الصوت نسمع
اسماء هزات براسها او دارت لي قال ليها
نخليو هادو او نمشيو لجناح عند فدوى جالسة على السرير او رجليها كتضرب على الأرض بتوتر او هي كتشوف فتليفونها حتى طلع عندها بلي شي شخص كيصوني ، ناضت جيهة الباب كتأكد بلي حتى واحد ماجاي عاد دوزات الخط كتكلم بهمس
فدوى: ألو مونى ، شنو درتي اختي
مونى: لقيت ليك واحد الفقيه قالك خدمتو مزيانة ، غادي تهناي
فدوى ابتاسمات: واخا ، هضرتي معاه عرفتي شنو غادي يخص
مونى: هو طالب الفلوس مزيان او قال ليك كونما كان الفلوس كثر كونما الخدمة غادي تكون صحيحة النيت
فدوى : من ناحية الفلوس كوني هانية اصاحبتي ، عقاب داير ليا كونط نقدر نهز لي بغيت
مونى: لمهم قالت ليك جيبي سميتها او سمية مها او شي حاجة تكون مسخة
فدوى : فحالاش
مونى: شي حاجة تكون كانت لابسها يعني فيها ريحتها ماتكونش مصبنة
فدوى بدات كتعض فضفارها او هي حاضية مع الباب : صافي اختي الله يسهل عليك ، غدا اجي القصر نعطيك هادشي لي طلبتي ديه معاك او الفلوس غادي ندوزهم ليك فحسابك ، خاص انتهنى من هاد بنت الحرام داغي مابقيتش كنحمل نشوفها
مونى تنهدات: انت لي فرطتي حتى وقعتي فهاد المشكل ، لمهم انا غادي نوقف معاك حتى يتقاد شغلك كوني أكيدة
فدوى : الله يسهل عليك اختي (قطعات عليها او لاحت تليفون على السرير او تمشات غاديا الحمام كتهضر او تبتاسم) ايوا هادا مسمار او طرقناه ، نوري ديلمك شناهيا تدخلي ضرة على فدوى
الضربة صحيحة ابناتي ، ماغاديش تنفع معاها ان أسماء ماساهلاش ليها ، مي ماتعرفو من هنا القدام اش يوقع
أنت تقرأ
كتاب الأمل 📖مكتملة📖
Romance💎مكتملة💎 ❌حصرية على الواتباد❌ 🌛 رمضان كريم 🌜 قصة رمضانية بعنوان { كُتَّابُ الأَمَلْ} كتابة : Doaa Am-y فكرة : ImaNe JiHani ✅ #يحلل_النشر_فقط_وجب_الإحتفاظ_بنفس_المقدمة_و_الأسماء_او_الكوفر ✅ 💜 مقدمة...
