مرفأ النسيان

بارت السادس والثلاثون

ـ مرفأ النسيان  _
_ (بقلم  بسمة البياتي) _
_البارت السادس والثلاثون ـ

ڪن للودِ حافظاً فــ ذاڪ طبعُ الأصيل  
وإياڪ أن تخون عهداً دام عُمراً طويل
وإياڪ أن يزدڪ البُعدُ حِقداً حتى إن وجدت البديل
وحاول أن تصنع لنفسڪ عِطراً
يدومُ في قلوب الناس بعد الرحيل..!!
ــــــــــــــــــــــــــــــــــــــ
غيوم

للمرة الثالثة بابا أتخذ قرار يخص حياتي بدون ما يسألني

بحر شنو ذنبة بالصار؟  ليش تلومة على أفعال أهلة

ـ لو مخليلج قدر وقيمة گدامهم منو بيهن تسترجي تمد أيدها عليج وتتهمج باطل يابة الرجال هو عزوة مرتة وسندها وبيده يرفع شأنها بين أهل بيته وبيده يوصلها للعدم
مقام المرة من مقام رجلها يا تنداس يا تنحط عـ الرأس ما إلهن حل ثالث

ـ كلامك صح وعين العقل
والله يشهد مقامي عنده مرفوع لا بيوم سبني وصغرني گدام طير بشر ولا مد ايده عليه
العفو بابا هالمرة اني مو وياك طلاق ما أريد اطلق

ـ غيوم لا تناقشيني

ـ بابا ممكن سؤال
من بحر طلبني أجيت سألتني موافقة لو لا ؟

ـ لوين تردين توصلين؟

ـ ح أجاوب نيابة عنك
لا انطيتني بدون ما تلتفت ناحيتي بحكم اني غلطانة ومو من حقي أعترض رضيت بحكمك غصب عني وتزوجت
ومن صارت مشكلة شكبرها وشگدها وردت انفصل گتلي عد عيناج
وتم طلاقي وبعدها بفترة من أجو الشيوخ
رادوني أرجع
للمرة الثانية أعتبرتني مموجودة وما إلي كلمة
جان المفروض اتگلهم  لحظة هاي حياة بنتي مو حياتي والقرار الأول والأخير بيدها مو بيدي صبروا أروح اسألها
لكن لا مصار هالشي هم انت قررت ورجعتني

وبحر  وفى بوعده وكل كلمة حجاها جان صادق بيها
صاني وشالني بالصلوات وخلاني بعيونة
صار إلي نعم الزوج
بابا بهذا قرارك  مراح تظلمني وحدي
ح تظلم بنتي وياي وتبعدها عن أبوها

مازن ـ يابة هالمرة اني مو وياك بحر أخو خيتة والنعم منه دخلي واحد منا يحتاج مساعدة لو يصير ويانة شي اول واحد يوگفلنا هو بحر
لا تأخذة بذنب أهله

ـ ولد الكلب دفاعكم قوي وحمامكم حمامي

غيوم ـ، اني ما ادفع عنهم ولا مسامحتهم
وحـ اظل حاقدة عليهم الأخر يوم بعمري
وبنفس الوكت ما اگدر الومهن
عمتي ياما وياما وگفت وياي ضد ابنها
وعدها مواقف وزينيات صعب انكرهن

وهي شگد اتگول الموت حق
واني، كبرت وماظل من عمري، شي وأيامي معدودة
بس الله  من تتمرض تظل ترعش
اكثر بشر يخاف من الموت هي لو بيدها تعمر بالدنيا وتصير من الخالدين
واختها تعرف دماراتها ونقطة ضعفها
اشتغلت زن برأسها وتخوف بيها
خلتها اللگمة بالگوة تاگلها حتى لو هي طابختها بيدها