RomeVsJulie - (PUBLISHED UNDER LIB) 2011

Chapter 59

“Julie huwag na kasing matigas ang ulo.” Natutuyuan na ng dugo ang Mama ko sa akin. Kanina pa sila Papa sa kakasermon sa akin. “Kailangan ninyong magpakasal ni Rome. Isipin mo naman ang anak ninyo.”

“Ayoko nga eh! Iniwan na niya ako bakit gusto naman niyang makipagbalikan sa akin. Baliw siya! Sabihin mo sa Rome na iyun na hindi ko na siya type! Manigas siya!”

Marahas na napabuntong hininga si Mama. “Anthony kausapin mo nga itong anak mo.” Hinablot ni Mama ang pocketbook ni Papa. “Puro ka nalang basa! Hala, pakinabangan natin iyang mga aral mong nakukuha sa mga pocketbook mong binabasa.”

“Napaka-highblood mo talaga Angelica. Hindi nalalayo ang ugali mo kay Amanda nang pagalitan niya ang anak na si Melody sa kwentong Minsan Nagdamdam Ang Langit. Huminahon ka nga.”

“Pa, pang-ilang pocketbook na iyan since birth?”

“Huwag kang OA anak, 20 years palang akong nagbabasa nito. At pang isang libo ko na iyung kwento.” Tumabi sa akin si Papa sa kama. “Anak, ang ipinayo ni Don Gustavo sa anak niyang si Esmeralda noong hindi pumayag ang anak niya na pakasalanan ang mayamang anak ng pinagkakautangan niya sa kwentong Deal or No Deal ay ganito ang ipinayo niya sa anak.”

“Sabihin mo na,” singit ni Mama. “Ang dami mo pangsat-sat eh.” Tinapunan lang ni Papa ng masamang tingin bago ako binalingan.

“Anak, magpakasal ka na. Hindi ka ba naaawa sa akin?”

“Pa wala tayong utang sa kanila kaya hindi ko dapat siyang pakasalan.”

“Anak, hindi pa tapos ang linya ni Don Gustavo. Chill ka lang, okay?” He cleared his throat. “Anak, ang pag-ibig maaring matutunan. Mamahalin mo rin si Matteo pagdating ng panahon… baka ikaw lang at ako… baka tibok ng puso mo… maging tibok ng puso ko? Teka, parang kanta iyun anak?”

“Kanta nga ho iyun,”

“Hay naku Anthony! Hindi ka talaga maaasahan kahit kailan.”

“Tita mag-iced tea ka muna,” inabot ni Kuya Tobby ang isang baso kay Mama. “Pampalamig ng utak at pampawala ng highblood.”

“Tobby ikaw nga ang kumausap diyan sa pinsan mo.”

Tumabi naman sa akin si Kuya Tobby habang hawak-hawak ang isang pitsel ng iced tea. “Anak – este pinsan. Ano ba iyan nakakahawa ang tatay mo Julie. Pinsan magpakasal ka na kasi! Ang dami mo pang ritwal diyan. May paiyak-iyak ka pa nang malaman mong may girlfriend na si Rome. Baliw ka ba o shunga ka lang talaga?!”

“Huwag mo nga akong sigawan!” Napangiwi ako nang biglang may naramdaman ako sa tiyan ko. Mabilis naman na dinaluhan ako nila Mama.

“Anak, okay ka lang?”

“Ma, huwag ninyo po kasing ipilit.”

“Peru anak…”

“Rome pumasok kaaa!” Bumukas ang pintuan ng kwarto ko. Tumabi naman sila Mama kaya nakita kong hinihila nila Tita Cathy and Tito Ralph si Rome. Nakasunod naman ang Lola niya at si Rosette. “Magpakasal na kasi kayong dalawa!” Sigaw ni Tita Cathy.

“Ayoko nga! Ang pangit ng babaeng iyan! Tanga pa!”

“Hoy!” Tumayo ako. “Sinong pangit? Sinong tanga? Ang kapal ng mukha mo!”

“Ayoko sayo!”

“Ayoko din sayo!”

“Ano bang gagawin namin sa inyong dalawa?”

“Obvious ba?” Lumapit sa amin si Lola. “Kahit na mag-away pa sila habang buhay ipakasal ninyo parin ang dalawang ito. Kaya kayong dalawa,” binalingan kami ni Lola. “Ipapakasal ko na kayo ngayon din.”