ضفائر صبريه

جزء٢ بارت ٢٢

للي ما طلعلهم البارت اعادة نشر

#قصة_ضفائر_صبرية٢٢
الجزء الثاني
وئام علي ام مصطفى

شكد متغيرة .. 

شكد متغيرة علي انتِ
جرحتيني ولا ارحمتي
وانتِ ما يوم ما يوم
فرحتيني ....
مدري شوكت يصفى الراس
و افرح مثل باقي الناس ...

💥💥💥💥💥💥( عدد كلمات البارت ٥١٨٢).. تعليقات الفقرات مهمة لا تنسوها .. 
.
.
.
.

باوعلي مجد

- عفاف يلة للبيت بسرعة البنات مدري شبيهن ....

- يمة بناتي شبيهن ...

ركضت للسيارة وهي تكعد واخذت جنطتها الي تركتها  بالسيارة و فتحت النقال تتصل ...

ماكو ....

شوي ورجعن يتصلن ...

فتحت الخط وانة بلهفة كلب والدة خايف على ضناه

- شبيجن ماما . 

- ماماااااا لحكي علاوي يمة ...

- ماما  وليدي شمالة ... ولج احجي..

مجد يسوق بسرعة ....

- تعارك.. وي ابن ام جابر  و الولد كاسر رجل علاوي .. اسفة ماما سديتة بوجه عمو تعذريلي منه بس والله  بالشارع واكفات يم علاوي وشباب واكفين و  علاوي فقد وعية عبالي مات اخوي و جدو  ابو عمو وليد شاله اخذه للمستشفى يا الله كدرنا نتصل بيج مرة ثانية.

- انتن بالشارع؟
. .

-لا رجعنا البيت و جدو ابو عمو وليد كال فوتن للبيت قفلن بابجن محد تروح وياي اني اخذه بس خابرن ماما

- يا مستشفى احجي..

- ما اعرف ماما   .
- لا تفتحن الباب لاحد ولا تطلعن ابد اوكي
..

سديتة وفهمت مجد

- اقرب مستشفى الجمهوري خل نروح للطواريء  
منو ماخذه؟

-حجي  ابو وليد..

- وليد صاحبي ..

طلع نقالة وسال سده

- هسة يتصل بابوه ويخبرنا ...

شوي ودك نقاله

- اه دك سكتي  صوتج لا تحجين راح اجاوب ..

....هلا والله ها بشر اي توقعت مشكور خوية لا ما محتاجين شي هسة لاحكين الوالد ... مشكور خوية ما قصر الوالد ما اعرف شلون اجازية

سداه و لاف فلكة الى طريق البصرة ...

الي يروح للمستشفى . 

نزلنا و مجد ماخذ من وليد رقم ابوه .  اتصل

- عمي اني عم الولد علي احنا بباب الاستعلامات الخارجي....

اها اي اندل شوي ويمك بالكسور اوك ..

سديتة و رحت ..

- ممنوع  ...

- ابن اخوي جوة ..
- ممنوع زيارات ورى الثنتين تنفتح الزيارة

طلعتلة هويتي ..
- مجاي زيارة ابن اخوي بالطواريء واني طبيب اكدر ادخل اي مستشفى بهويتي هاي    ...

اخذ الهوية الي كلها انكلش ...
مصدقة خاصة من اسبوع  تعينت بمركز (***) الطبي ...

و اعرف دكتور عمر اذا تريد اخابرلة...

هو بقسم الحروق  ...

- ادخل دكتور اعتذر بس هم اعذرنا توجيهات من مدير المستشفى الزيارة اثناء دوام المنتسبين ممنوعة ..

- هذا شغلك  اخي   ... يلة ام علي فوتي كدامي..

    ...

شفنا علاوي مدد و اصفر كد ما شاغت روحة من سحبو رجلة يرجعون العظم مكانة ولكيناه مجبسيه كامل ....

تشكرت من الجار و رجعنا للبيت وانة سانده ...

فتحت عفاف الباب و اخذته الغرفة مالتة .. غطتة وهي تساله

- اتركيه...

- غير افهم ؟

- خل يرتاح

- لا عيني تبرد السالفة خاف كالوا يتيم ماله احد وراه امه موجودة

رفعت حاجبي

- اي .. ناوية ترحين تتعاركين بالشارع وتمشي عليج سمعة الملسونة ..

- ابني كسروا رجله وتريد اسكت ...

- عوفي هاي السوالف للزلم .. انة احلها

جرحتني بكلمة و حسيتها مو عفاف هواي متغيرة ... صايرة قاسية تجرح

- انت شكو عشيرتك تختلف عن عشيرته حي الله عشيرة علاوي خوالك ...

- مقبولة منج .. خليها ببالج مو لخاطرج لخاطر خضر ...

ضحكت وهي ترفع حواجبها الي جنهن حواجب لو اسكت احسن

- اي ..  لخاطر خضر؟ هو من صغركم بينكم منافسة و انت ابد مترتاحلة اذكرك... ؟

- يبقى ابن خالي ... وجهاله ما اريدهم يضيعون لو عليج من زمان علاوي انحرف . 

و ... لا زعلين حتي بناتج اتقشمرت لو ما اني انت شسويتي غير توفير المال ؟

- تطعني بأمومتي يا مجد ؟

سكت و عافني ...

كعدت و راسي بين ايدي و بجيت .. ليش مو جاي اعلمهم افهمهم و احاسبهم ..

انت شنو تملك و كاموا يطيعوك...

ليش انت كدرت واني لا....

رحت اصنت عليه هو وعلاوي  اكتشف شنو البيه يخلي  جهالي تميله ...

مديت راسي شوي اباوع شفتة يخلي ايده على جتف ابني و يشاقيه

- ها يا بطل افاااا النومة موش الك يالصديج

ضحكلة ابني

- تحجي جنك خالو
- والله خالك ورده ... تدري جان كلها تتمنى تصير مثله ادب واخلاق حنية قدوة لازم تحتذي بيه

رد علي جان مغاير

- لا عمو انت قدوتي خالي ما جان بصغره مثل ما تكول بيبي تسولفلنا عن اهل قبل امي وخالاتي و عرايك محسن وياهن تمول جان وكيح يومية يشتكون منه السلف وجان يشتري لعابات نايلون مال جرابيع حشرات عبالك حقيقيات ويشمرهن على خواته يخليهن يطافرن خالتي المرحومة صابرين مرة نايمة خالو محسن مخلي على كصتها جربوع لعابة وكامزة تصرخ

و غير هواي مكسرات  ... انة او اموت ما اسوي بصبا وصابرين هيج شعدهن غيري

ضحكت على حجي المعدل الجبير

- و الله كبرت بالصديق  ....
- احب اصير مثلك

كعدت و انة اكركر ..

- شمدريك شجنت ... بطفولتي وشبابي اكبر واكلك مغامرات الشباب هههههه اما طفولتي جنت وكح ...

قاطعني
- بيبي تكول جنت انت وبابا رويسية جان بابا و خالاتي الزغار  و الجهال يضربون ماما و انت تجي تشمر احجار عليهم .. تكلهم خطية ..

صفنت بكلامة
..

- جنت بمرحلة عمر اكبر منهم و اعرف الي يسوه وكاحة .. ههههه و جانوا من يطلعون يلعبون عمتي توصيني على امك هي جلب الا تروح وياهم وهم جانو لعبهم خشن جانت ناعمة سمرة كلش مختلفة جنت اكبر منهم بكذا سنة ومن امك بهواي ...

عوفك ابو دروب من هذا الكلام و سوالف بيبي هو جنا بمرحلة تصير منافسات .  انت هسة بداية مراهقتك ... سنين مهمة يا علاوي لا تضيعها وي ناس ما تستاهل وهذا ابن ابو جبار عوفة عائلة عفطية .

.

كضيت ايده..وكررت كلامي باسلوب مقرب لعمره

- عليوي .. مو كتلك ذول تجاهلهم

باوعلي بعيونة وهو يبتسم و منعس ...

- ذول يستاهلون .. غلط على امي و ضربتة ورمت عينه ...التموا علي هو وجماعتة .. و اخوه الجبير والنبي ما يكدرولي لو ما اخوه ..

كسرولي رجلي ...

بس خل اطيب..

- تريد تصير احسن منهم ..

- اكيد عمو .. بس خل اطيب وشوف

- لا علي غلط .. ذول تتركهم تجنبهم ناس مشاكل لو ما انت تتعمد تفوت من يمهم تذب حجي ما يجوك.. تريد تصير احسن منهم مو ؟

ادرس  و صير شاطر واوصل الى اعلى مرتبة جيب الطب .. و شوف وانت تمشي اصلا راح يتحسفون بيوم ما صاروا مثلك..

يلة هسة اعوفك نام ارتاح ...

هسة امك تجيبلك دواك تشربه وتنام يرادلك سوب عظام
.
شفت خيال الها يم الباب جريت حسرة بعلو صوتي 
عصبتني ادري جرحتها ادري بس جرحها الي اكبر عبالها رجعتي انتقم لان عافتني على مود خضر ..

طلعت و شفتها تصنت بقت ما راحت بعيونها نظرة غيرة مني على ابنها ...

ضحكت و رفعت راسي و مشيت ظهري صوبها رفعت ايدي اشارة سلام دون ما التفت الها

- دربالج على جهالج...

جاي افتح باب الكراج ما حسيت الا تكض ايدي ..
ضافيرهة قصيرة خالية من اي اصباغ و صابيعها انثوية .. خالية الا من حلقة . 

ظليت صافن على ايديها الي كضت عضدي و تخالط لونها الي من ورى ما تزوجت فتح الى برونز مخفف ..
وي ايدي الي افتح منها و الي تتسم بشرتي بالاحمر...

ملمس صابيعها رغم ضغطة قاسية .. بس رفرفت اجنحة فراشات كلبي و حمائم اشواقي ادور واخذها بحضني و ابعد سترها عني و اندمج وياها كجسد واحد.. بروحين..

يمتة تصيرين حلالي مو كافي كل هاي السنين كافي رجعت هم نفس الشي ..

نفس الكلام نفس سوء الظن .. عقدتني من روحي

- انت حققت غايتك تسحب جهالي مني  طلعت من علاوي  بس شفتني ضحكت مو ؟ تضحك تكلي شوفي انتقمت منج ومن خضر ..  بجهالكم ملكتهم كلمة مني يسمعولي وانت لا ....

رجع راسي ورى وهل مرة بيدي الثانية بكل قسوة

كضيت ايدها الي ضاغطة ايدي بكل قوة ضغطت  كفها و عصرت هاي الصابيع الي قبل شوي دوختني برسومهن و جمالهن .. ضغطتهن حتى صرخت بنص بجية

- اه ااخ .. اااا

- عيدي الكلتيه ؟

- ايدي راح تنكسر اتركني

- عيدي الكلتيه تحملت منج هواي .  و ساكت اكول تعذبت بحياتها شافت ويل

- شعيد وخر ..

جريتها من ايدها اهزها معصب و حسيت بجسمها طخني ... رجعت ورى و استمريت اعصر صابيعها

- شكلتي ..

بشهكات مكتومة طلعت ع شكل نشغات متقطعة

- تنتقم مني ومن خضر  ....

رخيت ايدي شوي اكثر من مرة تكرر هل كلمة هذا اعتقادها ...

بكلبي احاجي جروح ندبها ندية  اوك .  
خليج عفيف ع اعتقادج بس كتلها

- حلو  طلعتي ذكية

عفتها وانة مستهزيء بعقلها بس فهمت انو اني اعترف

- شفت ماكو شي يصعب علي . 

تنتقم مني خضر خطية بكبره ..

- اي فعلا انتقم لدرجة انتقامي جبير مدمر يا عفاف الهدف منه هو  مستقبل مدمر لجهالج من يطلع براسهم خير و يتربون صح و يجيبولج حلمج الطب .... او اي مستقبل تفخرين بيه .. شفتي شكد اكرهج اريد ادمرج

شفتي شكد نذل اني .. شفتي ؟ هاااا احجي

ردها جان اغبى منها

- انتقامك تخليهم بس الك .. يطيعوك و يسمعولك وانة ما يكلولي اسرارهم

- اوك لعد كشفتيني يا ذكية حرامات ما كملت انتقامي

هز ايده وطلع.. .

سديت الباب حيل وراه ...

و هزيت جسمي انكت بروحي تراب غيرة لزك ما ينشال  و ايدي اطوحهن بالهوا و اصيح

- ءءءءء اااااااااااااااا

من يوم الشفتة و عرفته وهو يغيضني ويخلي حتى ارسالات راسي تطفر ..

لذا رحت هادة عليه ما الزم اعصابي كلش حتى بحياة خضر كم مرة ينبهني ...

من كثرت المسؤولية علي الضغوط حولتني الى عصبية ما تتفاهم .. و هذا اثر بجهالي بس ما جاي اكدر حاولت .... اغير طبعي

بيه طبع هم من ثكلت علي الحياة هو  ..

اتعارك وي خضر  اروح اطلع حركتي بخالتي والجهال اتعارك وي خالتي اطلع حركتي بجهالي لو خضر الي اخر سنين حياتة صار متفهم الضغط علي اوقات يزعل بس جان تعاملنا من الحادث اصدقاء و اخوة اكثر من ازواج ...

رحت لعلاوي وكفت بالباب و صحت عليه
- شكبرك تصير ها ..  شكبرك .  مو شواربك خضر صارت .. ابو البلاوي المصايب ..

شفتة منعس وهو يكول

- ماما عطشان مي صبا انطتني دواي و احس خدران

-  سمعتني شحجيت

غمض عيونة شارد من توبيخي اله

رحت للبنات يسولفن ويضحكن عدهن هاي اللاستيك ملون علبة يضفرن بيها و يسون سوارات ..

- شوفي هذا سويتة هيج البسة وي السيت الوردي

- اكلج صبا  وين مرطب الشفايف الوردي

- امي منعتة تكول ينطي لون لشفايفجن
وعيب

- هو انت مشايفة صورهة قبل و النبي اللبس كلة كصير والحواجب قلم ومكياج حتى ظلال للجفن و اللبس كلة وي الركب و لو تنانير طويلة والجاكة كدام للركبة و غير الضيك بس علينا صارت تستحرم..

ضربتها صبا عكس

- لج ماما هتا صخام يومج انكتلنا

نبهتهن وجودي

- اي وشنو يعني ؟ لبست و تونست فد ونسة بحياتي ..

دارن خايفات

- ماما !

- اي شو جيبي هاي ..

اخذت العلبة

- هاي مسكرة ولج

- لا والله ماما هاي بناتية ...

تذكرت حجي مجد وانة ارفع ايدي اريد اضربها

رجعت ايدي و بهدوء كتلها

- انت ما محتاجة هذي الامور جمالج طبيعي .. لا تأذين عيونج..

- بس ماما ما تصبغ بس توكف الرموش مائية دون لون

- ها .. زين بس بالدوام ممنوع  لا تخلن

- ماما والله ما يصبغ ... و كل غراضنا بناتية ...

فتحت العلبة افتشها ..

شفت كلشي طبيعي بس لكيت عدهن روج
سحرية
- وهاي بناتية؟

- بالليل نخلي خفيف الصبح بصابون نغسل بس نظارة وجه وشفايف

- ممنوع

اخذت القلم منهن بهدوء و هن يتراجفن

- اهتمن بدروسجن افضل

بالليل رجع مجد دك الباب و بيده ملازم باوعتهن عرفتهن نسيتهن بسيارته
- نسيتيهن

جان يدور بوجهي ...

جنت مبوزة واخذتهن وجاي اسد  الباب

- شكرا تصبح على خير

- خطوة حلوة تكملين عفية ...

هزيت راسي اي وساكتة اريده يروح

- اممم خابرت ع مود علاوي لخالي نجم باجر يجي .. هو والعمام يدكوهم

هزيت ايدي

- هذا انت المثقف تؤمن بالدكة العشائرية والفصول

- لا ما احبها بس شسوي الناس خاصة بهيج مناطق ما  يفيد وياها الا العشائر ما تخاف قانون ...

و هذول اخاف منهم على علاوي

- اي عمي علاوي و صباوي و صابرينوه جهالك طلعوا مو جهالي

ضحك و غمزلي
-  تغارين مني ميتة كلش ههههه خليج بغيرتج تستوين تصبحين على خير  باجر نص العشيرة ببيتي

- شلون ليش مو عندي

- اني رجال انت شكو تجين تجالسيهم مثلا ولو بوضعج هذا هم مقبولة

مد ايده يريد يكطع شعر شاربي

رجعت ورى و خزرتة

-  هذا بيت خضر بيه يجون وتقابلهم هنا.. و محسن يجي هم

- اممم بعد اتفقنا بيتي واسع واكبر من بيت خضر

ركز على الكلمة الاخيرة وراح و عافني اريد كون الزمه و ابتلي بيه

التفت وكال

- لا تعبين بالطبخ... راح اوصي على طباخ يجي يطبخ ...

الايام الي اجت بين جيب العشيرة ودي العشيرة غير الناس الاقارب تجي تتحمد السلامة

لمن فضت ارتاحيت الفصل الي انطوه استحرمته انطيته فقره

محسن التحق و كال يطول لان هناك الجبهات حامية

  ورى ما انتهت شغلة علاوي ...

اجة بيوم مجد لابس قاط و ابنة مبدل ...

و جنط ملابس سفر يم بابه نزع نظارتة الشمس توني  نزلت من تكسي جنت امتحن ...
استغربت وحسيت برجفه بكلبي

رحت اله وانة مهمومة وين مسافر شو ما حجالي ليش ؟

- ها مجد گوة

- الله يكوي حيلج شلونج بالامتحان

- ع الله

- والنعم بالله كون ما مدعبلتها ...
- المناهج تغيرت مو مثل عهدي ...

- الله يوفقج.  .

باوعت لكشختة ..

- وين ؟

رفعلي حاجب ؟
- نعم ؟
- ها اقصد مسافر شنو
- اي بشغل وهم ترفيه اذا ابقى مكابل شكول .. تجيني جلطة وانة بعز شبابي

- قصدك  شيباتك

- اف مغثة سيارتي كرجتها وانتظر صديقي فوتي جوة ولو ما ينخاف عليك خوية

نفخت و انة غلست ما رحت صالون بس خل تخلص الامتحانات يومية ااجلها شو صايرة اخاف من تغير شكلي لا الناس تحجي و تذب علي تهم و تصورات

باوعت للقاط الي لابسه

- شعجب تسافر بقاط متاخذ راحتك

- وانت شكو ؟  جائز عندي موعد كبل لا اسافر اروح لموعدي ...

يلة فوتي فوتي  بيتج وصل صاحبي سيارتي كرجتها و بابي قفلتة و هذا مفتاح نسخة يمج

- واني شكو
- اي هم صح انت شكو

جر جنطته ام التاير و صاح ابنه الي باوستة و شميته
- حبيبي نشتاقلك لو يقبل ابوك تبقى على ما يرجع من سفرته

- لا خالة مو لازم اروح اشوف امي بابا وافق امي تشوفني .. وراح ياخذني الها ويبقى هناك ما يقبل ابقى وحدي

هو كال هيج تخبلت راح يرجعها اكيد جا شلون يبقى هناك وعدها وهي مطلقة مو سمعت تزوجت لا ما ادري خاف تطلكت ..

وراح يرجعها وكاشخ

زين منين يسافر مطار البصرة مو كل الدول
الا من البصرة لبغداد يطير مناك يطير للبلد الي يروحله
رجعت بوستة وكلي شوق لمجد عن طريق ابنه

صوت مجد بكل خشونة وقسوة

- شسالفة يسار الولد ينتظر يلة بابا

- بابا اجيت

التفتت
- بس ابو يسار ابنك ما سلم على جهالي
بس طلع صوت
- هة .. هو انت شتعرفين

دخل سيارة صديقه وراح

راح الها .. و يمكن خلص صبره و بطل بعد ما يريدني

رحت للبيت وانة حيل معصبة . 
فتحت صبا الباب دفعتها جانب

- اخخ جتفي ماما شبيج .. الله يساعدج ماما شلونج بالامتحان

شفت ماما معصبه من تعصب ما تعرف منو كدامها اكيد مغثوثة من الامتحان ما مجاوبة ست الحبايب

خطية هواي تتعب نعذرها من تتعصب بس و الله اوقات نحس تزيد عد حدها خاصة وي صابرين

و ذيج ملسونة هم ما تسكت .. 

رحت احمي الغدة اجت صابرين تثاوب

- ما كملت المعجزة جعنا

- ظلي خارمة و كلشي علي كاضيتها نوم

- كلشي اعرف بس اتعاجز .. صبا سمعت هولاكو وصل و من ركع البيبان عرفت اكو مشكلة بالطريق

انطيت صابرين الخيار وطماطة وكرفس وليمون

- تفضلي سوي زلاطة .. خل نغديهم وتفض امي ترى معصبة لسانج لا تعلعيه بلكت حضرة انجلينا  اليوم تسكت ما تغث ماما

- هو امج من يومها البوز شبر اول ما فطنت و عرفت عندي ام جانت تبجي و البوز كدام ..
الله يرحمك بابا شلون تزوجت وحدة بس كل حياتها مبوزة .. اكلج صبا ما عرفتي شبيها

- احتمال ممجاوبه

- و الله امج وراها سر .. و خطير هههه
- شبيج هيووو لا تجيج هل مرة من تنطكين اشرد ما احاميج

- فدوة على اساس ذابة نفسج فوكي وماخذة كتلاتي عني
- منو يصيح عمو مجد يجي يحميج

- و الله اني الفرد المتقصد بالعنف اكلج خاف لاكيني بالزبل و كالولها جبتي توم
- ولي والتشابه بينا ههه يلة ولج عزة  يومج صابرين المركة شاطت ولج شكد  تحجين...

احجي و اطفي الجدر ...

شوي واجت امي ..

وهي مبدلة تراك اسود .. بيه قيراج فضي داكن ...

اخذت تصب وهي مصفنة باوعت لصابرين و عضيت شفة تسكت كلش

- ماما شوي شاطت

- عادي ..
- ماما يمتة نروح لبيبي مو عطلنا و كل عطلة نروح يمها فترة
- مشوفين علاوي .. ما اكدر وحدي اداريه عود من نرفع الجبس كلكم ترحون

-  هي لو تجي عدنا بس مرتاحه اخوها مداريها وبنات جدو كلش حبابات هن ومرتة شايلينها شيل شكد حنية عدهم

باوعت النا امي وحسيت بعيونها نظرة حنين و دمعه

- ماما مشتاقة الها بيبي لسة ع الاسود نخابرها من نقال المحل و دز صورها  بس ... بس مو مثلج

اشرت على وجه امي اريد احسسها غلط تتبع بيبي ام حمدية امي فاهمة ميصير تتعلم من بيبي ام حمدية الي ميبين بوجهن حفن او لا لان شكر

بس امي نشاز و صديقاتي يبسمرني امج شبيها و يلمحن انها وسخ هيج

امي تعبت تعذبت يمكن كل هذا رد فعل كون ترجع مثل قبل تهتم بوجهة و شكلها الحياة تستمر

- شنو شبيها

- خاف تضربيني
- احجي
- هي معدلة وجهها صح ممبرزة الحواجب بس مرتبتهم مو نشاز و حافة وجهها

وهي ام لميت  و ارملة لزوج ميت 

خليت الغدة وهي تغسل الفواكه باوعتلي ...

و كالت ببحة
- تغدو ما اشتهي اصلا و علاوي اني اغديه خلوه مكانة

انتهت الامتحانات و ذبيت صوج عدم جوابي بتفوق على مجد لان اثر علي سفره ما ادرس زين

رغم الامتحانات قبل سفره هم جوابي كد الحال .. 

صعبة شسوي ..

مجد استمر  ماكو ..

افتح فيسة اني مصادقته اصلا

اشوف منشوراتة على البحر هو وابنه

و اكو جنطة نسائية يمهم

بس ممطلع صاحبتة ادريه  تفكيره مو من ذول الي يطلعون نسوانهم بصور وينشرون

رغم هي طليقتة متحررة  ويجوز بحسابها تنشر بس هو ابد ما يطلعهة وهذا غثني لا هم يغار عليها

شطلعت هاي  ...

بيوم بالليل  فتحت الفيس اكلب ...

الامة مكلوبة على  المحافظات الشمالية والغربية وداعش متوغل ...

خفت على محسن...

اهل المحافظات الي بدة ينزح لبغداد الي كربلا نجف محافظات وسط وبيهم ...
من لا جارة اليحصل شغل حتى لو للجنوب .. يوصل...

من شهر السادس بدة عدنا نزوح المحافضات الحامية ... او الخطرة

عوائل خطية وبيهم افراد....

الي سكن فنادق لمن تدبر الحال الي سكن باي مكان يستره حر الصيف ...

حر البصرة الي ما معتادها ...

طلعت من الفيس
و خابرت محسن ...

شوي اجة صوتة مبين تعبان

-ها خوية بشر
- شبشر جابت بنية..

صفنت بحجايته

- محسن ظل بالي عليك وانت تحشش

- خوية الاخبار مو زينة الله كريم الله ينصرنا اندعيلنا ام ايتام دعوتج مستجابة باذن من الله

- يارب النصر و تستر على اخوي وترجعه سالم يارب  ...

- شخبارج اخبار الجهال 

- زينين يسلمون و امي هم من تروح تتمرض عليك..

- ادري امس خابرت لامي بس جنها تعبانة

- يا خوي كبرت و كضتها تعب ما ارتاحت ..
- مقهور خوية شكد عبرنا ناس تركت ديارها الي كل دار شكبرة عبنها مضطره اهل عز يختي صعب العزيز النفس و بزر دلال هيج يدوعن و يتشحطط.

- اي والله خوية هم يمنا اشكد اجو .. المشتمل طلع المؤجر و اجرتة لنازحين ..

- دربالج عليهم عفاف باجر لو صار شي بالبصرة ذول هم يشيلونا

- خوية خفضت الايجار الهم و الله تدري لو ما عندي ايتام وهذا مصرف و حقهم

- ميخالف خوية وهم ما يقبلون الحسنة عزة نفسهم موش تسمح خفضي الايجار ولا تحسسيهم

- اي خوية ..

- خوية اروحن الامر اليوم ينطي توجيهات و لازم نهجم الفجر  اندعيلنا

- منصورين بعون الله خابر لا تكطع بية

سديتة و رجعت اكلب بالفيس ...

و اجت صابرين وهي بيدها نقال المحل

- سويلنا فيس و ضيفي للنقال برامج مو امس بدلتي نقال المحل خليتي نقالج القديم s 3  للمحل

- شسوين للفيس عيب مال كبار

- ماما حبابة مو مال كبار والله كها عدها واريد النقال خليه النا ما بيه شرايح ماما انت ما واثقة مني

- طبعا واثقة بس يا صابرين صبا شو ما تهتم لهيج امور

- مو هي نتفق اني الاحجي
- انت الناطق الرسمي لانج ثولة تخلين نفسج بالواجهة

- هسة شكلتي
- No

No
No

- بس ..

- تارستة الجن العاب المن بعد تدورن سوالف فيس شسون بالفيس متكللي روحي ماما عيب

برطمت و نفضت روحها ومشت وهي تدردم

- مو حالة كلة ممنوع ممنوع ممنوع الناس تطور وصلت  للمريخ واني لسة بعدها على عقول الريف

اسمعها وغلست جني ما اسمع و صبا تلومها

- اشش ولج سكتي يمعودة لا تجيج صارلج فترة ما عاجنتج وخابزتج ماما بكتلة من كتلاتها ستري على روحج .. و امي ما تربت  بالريف.

- ما متربية بالريف و صايرة تيمورلنك لو بالريف شسوي لا هاي هي تصيرلنا درايكولا

- اششش

صحت بعلو صوتي

- انهجم بيتج يا برعة على هذا لسانج  هسة جايتج اشش ولا كلمة

كعدت  و خليت المخاد وراي انتجي ما بية اتمدد الساعة صارت عشرة بالليل
واكلب بالفيس ..

شفت منشور جديد لمجد

جان على البحر وهل مرة بالشورت الملون ( الي يسموه لبس بحر رجالي )

مطلع صدره وعضلاتة اكو بداية كرش بس مو نشاز ..
جنة سمنان

وجهة العريض صاير و عيونة تضوي تبين خضار فاتح  بالصورة احتمال تحلل لونهن بفعل الشمس

وانة ما اعرف شلون احفظ صورة من منشور الفيس طكيت سكرين الها و بصورة عفوية وانة اطلع من منشوره دست لايك

حطيت ايدي على خدي عزة عزة

انطيته لايك ...

خليتها طبيعي كلت يلة اكسر حاجز الزعل

علقتلة ..
- منور جودي

تعمدت بلكت طليقته تشوفها

و اغثها

شفت رسالة اجتني بالخاص

- روحي مسحي تعليقج ..

- ولويش هواي معجباتك صلوات على النبي .. 

منو ذن الي معلقاتلك

- وانت شكو ...

- ايا مطعطع ..

- شنو هاي النوب

- ها لا هيج .. بس ترى عيب على شيباتك والله انت كلك  اربعيني ما يصير تقبل هل كائنات تعلقلج

- اني صح طبيب نفس بس رجل اعمال و الي ناسي المجتمع بالخارج يختلف مو كل الي تعلق تزحف اكو مجاملات مجتمع

- وهاي وين تصير  عدنا عيني احنا  ناس ملتزمين

- اكلج شردت منج مو لهنا لاحكتني

مبروك الادارة والاقتصاد

- شمدريك

- هو النت ينضم بيه شي ؟ 😑

- افف لا تدز سمايلات

- رجعتي انثى لو بعدج ؟ و النبي اتخيلج تدخلين للجامعة وانت عكيد ...

تصيرين نصبة و تلزك بيج طول عمرج و يتذكرونج زملاىج جانت ويانا طالبة تعلوقتها ام شارب ...

ما رديت عليه طفيت نقالي...

الايام تمر .. و اقتربت المدارس والجامعات من الدوام ...

طبعا من زمان الجبس شلناه من علاوي وراح خالي وداهم لبيبيتهم اسبوع يمها ورجعوا

انطتني صابرين علاكة

- دزتها بيبي الج ...

فتحتها جانت مكينة براون مال حفافة

نزلت دموعي....

- ماما حبيبتي ما كلتلج شي عني

- لا بس اخذتنا للسوك كبل لا نسافر للبصرة اشترت النا غراض و ملابس و هاي الج

- انعم الله عليها ابد ما جابت سيرتي

اجة علاوي
- جذابة البنات راون صورج بالنقال و بيبي تعجبت كالت يااا هاي عفاف هيج صايرة و كالت جانت امكم اذا فاتت الناس تصفن باناقتها

دنكت

- كل هذا راح حبايبي

- بيبي كالت لا ما نكول يمج هي سالت عنج ..
و كالت دربالكم عليها لا تعبونها

شهكت اخذت العلاكة وانعزلت بغرفتي

عيني على صورة خضر

- تدري يا صديقي هاي الفترة الي بعدك مريت بيها احتاج افضفض شكد جنت تتمنى احجيلك مثل ما تحجيلي بس ما جنت اكدر اشوف صعبة مرة تحجي بحبيبها يم زوجها

شوف خالتي تذكرني قست كلبها بس اكو لمسة حنان .. تدري اشتاقيت احضنها انة اميللها اكثر من امي هاي ربتني

بس شكول حظي و الله حظي

بدة الدوام.. من بعد اكثر من سنتين من الترمل وحدخل السنة ال ٣ ..

من بعد كل هذا الاهمال ..
احتفظت بلبسي الاسود بس بترتيب باناقة و اهتميت بوجهي

خلطات و اهتمام .. مكياج خفيف كلش

و حفافة ..

احس استعاديت ثقتي بنفسي
اني انقبلت ادارة واقتصاد .. قسم اقصاد...

مسوية سلفة وعندي جم فلس حيل حبيت اتعلم اسوق وتصيرلي سيارة ..

بس الي موقفني مشروع بدة يعشعش بدماغي ..

محسن بعد غياب شهور بجبهة حرب مينزل ..
نزل .. اجازة . 

كاعدة بالكافتريا او نادي الادارة والاقتصاد ...

انتظر الصباحي يطلعون ويبدي المسائي ...

مجد رجع بس احسة يجنبني ..

رجع و ما يلاكيني  ...

صار بينا ساعة بايلوجية ..

وقت جيتي ما يوصل ما يبين وقت عدم تواجدي يلاكي جهالي و يهتم بادق تفاصيل

زاد شوقي كلش ما اتحمل بعد ....

بس اول اخابر محسن ع مشروعي الي يعشعش بعقلي ...

اخابرلة بالجامعة ما حصلتة  يسده عفت النقال وكملت دوامي ...

و بالبيت  التهيت ما خابرت .. 

بيوم اوفي كلت لازم احاجي محسن   

امشي بالطارمة الي مقبطة بمظلة مجد الي حكم فرعون علينا واحس خنكة اريد هوا ....

اروح واجي ادك يفصلة ادك يفصلة لمن خابر

- هي شبيج مو يمي جماعة بالمحل ..

من افصلة لا دكين واضح لمن انة الي اخابر فهمي انطيج اغلاق يعني مفارغ

رجعت ورى شبيه معصب اليوم ليش يصيح

- و شبيك تصيح احترم لا صيرلي رويسي ترى من غير ام احنا واني الاكبر منك

- استغفر الله شوفي عفاف ذبان وجهي يتعارك

- شنو محسن صاير شي

-  بعدين مو مال تلفون...

- زين اكلك عندي مشروع احسبلي بيه ربح

- ما تقنعين .. ولج اني مستغرب كل هل شهور ما خابرتي على مشروع

- شسوي يجن ببالي بس تالي اضوج اشوف مال فلوس ما املكها واسكت ما اخابر

- عفاف شجاج قنعي بابا عندج و مستورة غيرج بيت ما عدهم و تهجروا من بيوتهم و من حلالهم
ولج   مو متفقين بس المشتمل الي سويناه فوك بيتج تعتاشين منه وي فلوس حصتج بالمحل كهربائيات وياي اضافة لمحلج مال الملابس
يعني صرتي ام كهربائيات و مؤجرة و دلالة ملابس  ...

شغلج خير من الله كافي قنعي

- شنو دلالة احترم نفسك لا مفترة بالبيوت لا شي محلي ببيتي و اسمة بوتيك و ازياء نسائية واطفال
- اذا حتى حمرة و زواكة تخلين بيه ولج حتى صيدلية لاغراض تجميل بيه ما طلع ازياء ...

- صلي على نبيك شبيك عينك ع رزق ايتام ؟ و شنو زواكة عوع يا زمن انت بابا عوف حجي حمدية وامي هههه كول مك اب مكياج عادي ...

- خليتخن الج .. مالي خلك عفاف انة ببلوة حسبو حسابي ع الغدة واريد مجد هم يجي ...

اريد حل كبل لا التحق ..

- شصاير ...

من اجي عفاف من اجي  كلة من ايدي و الله حبيت اساعد كلت اساعد بس مو مال  الناس تخليني بامر واقع ..

- هسة غير افهم

- من اجيج

- خايب روح خل الحك اطبخ ..  اكلك لا تنسى مو ما تعزم مجد و دزلي خبر خاف مشغول بدوامة من زمان ماخذلة اجازة ... و منا مكتبه فرع شركتة ...

- اي خل ياكله لكمة بيت اكيد هو وابنة ملوا اكل مطاعم لا هو مزوج وفاضهة شعندة منتظر ..

-  شبيك مفاوله بالعرس و تجي مرة اب ليسار والنبي انقهر ع الولد تجويه تحركة مرت ابوه يسار الجنة زبدة مايعة ينظلم خليه الا يزوج مو انة بدون رجال لو ما يكدر و الاكل من باجر الجدورة توصلة و شطبخ ادزلهم و البنات كل اسبوع اروح اني وياهن نغسل بيتة نرتبه
لا يزوج لا بطيخ اهم شي يسار ما ينظلم

- خوية قابل دوم تدزين اكل لو تنظفوله لازم يستقر اليوم اقنعه ببالي فكرة وعندي مرته موجودة هم يخلصني هم يزوج اما  انت ام مشاريع وقتج ثمين يلة اجاني ولد اروح.

- شنو شنو شنو ليش شمسوي انت و يخلصك ها ...

تووووت تووووت
- اهو  خلص رصيده افف النوب صايرلي دلال يجيب مرة لمجد رجال اعزب ومرتاح ما يريد لابنة ينذل كوة تزوجوه

صحت للبنات

- ماما دراسة هواي

- بالليل سهرن ساعدني ... اريد اسوي غدة ...

- ماما مو كلنا اليوم فاصولية و تمن  طبختهن

- يمة عيب خالج و عمج مجد غداهم عدنا طلعي الدجاجة لو اكلج لا ما تلحك تموع و اسلكها جامدة تزفر الاكل لازم انكعها اول بليمون او خل وبهارات

علاوي علاوي

- ها ماما

- كبل للسوك دجاجتين ذبح بساع عفية ابني

انطيتة فلوس وانة ايد للمطبخ وسخرت بناتي خاف اكو تراب شي بالبيت
ورى ساعتين الجدر ع الطباخ
- اكلجن اروح اسبح دربالجن ع السوب زين حبايب

- صار ماما . 

جانن وحدة تباوع للثانية ويتغامزن

- شكو

- لا هيج بس شعجب تسبحين هيج وقت ..  مو الصبح سبحتي

- شبيجن تعلمن مني النظافة حلوة و عادي السباحة تنشط الدورة الدموية والجسم بعدنا مو شتا و نسبح كل ساع شنو المشكلة شتانا بالبصرة يتاخر يلة روحن
...

طلعتلي احلا كلابية صح سودة هم ..  بس موديلها حلو فراشة .. و بيها لون ذهبي قيطان

و حجاب مرتب ..

سبحت وانة استخدم شامبو جسم و مبيض
نفس الوقت و بشرتي كل ما تفوت فترة الخلطات تجيب نتيجة . 

كملت و طلعت جففت شعري الي طوله طول هاي السنين وي ظهري ..

رحت لغرفتي غضيت نضري عن صورة خضر ما ردت احساس الذنب يجيني ..

شوقي لمجد كلش جبير هواي ..

مكياجي كلة بس ينطي نشعة وجه ..

ما يبين  يسموه طبيعي ...

اباوع لوجهي الي استرد عافيتة اباوع لجمالي ..

لبست كماشة و لفيت الشال .. 

طلعت جني  ممثلة  خليجية ...

رحت اسوي الزلاطة ...

و البنات يتبسبسن ..

حيل مرتاحين اليوم امي هدوء ..
اخذت صبا وعفناها تسوي زلاطة ..

- امشي اكلج...

- شكو ؟
- ولج صبيّة امشي ...

اخذتها لغرفتنا ...

- ريحة و اهتمام و سبح .  الوالدة عاشكة ..

وسعت صبا عيونها

- عيب امي تحب ابوي .
شمرت نفسي على الجرباية و ضحكت
..

- الله يرحمه بس منو قشمرج ما جنا زغار كلش من مات و سوالف بيبياتي ما تركزين ابوي جان رجل خالتي صبرية كبل امي لج يكولون سوى الهوايل لخاطرها ..

شبيج صبا شغلي عقلج .. السر ابوية تزوج ماما  غصب ..

- هاااا بس شلون عرفتي شو شو من يسولفن كلة غموض و مضرب مثل ولا افهم

ضحكت اتباهة بذكائي
- لانج غبية اني افهم اكثر منج احلل كل كلمة كل فعل كل رد فعل .. 
حتى من مرة جفص يسار كال شكد صور لامكم عد بابا ضامهن صور وهي زغيرة ... و صور بابا و امكم سوى مصورين ...

- صخام تخون ابوية لا كذب

- اشش ولج صوتج لا .. قبل  زواجها من بابا جانت تحب عمو مجد ...
كال الصور قديمة لابسة سدرية مدرسة و هم بيها ملابس ملونة بس بعدها مراهقة...

- اكلج انت شايفتهم رايحة لبيتة لا تكذبين ..

- امممم اي جفص يمي يسار و من طلع عمو و راد ياخذ يسار توسلتة يبقيه يم علاوي ..  و كتلة اقفل البيت اني .. لازم يبدل علاوي وعمو مستعجل كال ضمي المفتاح عندج لا يضيع ..

كلت ليسار اريد اشوف الالبوم كال ضامهن جان بكنتورة بس امس كلب بيهن من شافني ضمهن بالمحر نساهن . .

٣ البومات لامج و ي حبيبها وتبيع علينا مثاليات

- اششش انجبي عيب تحجين على ماما زين ؟

و بعدين بلة يسار اعارف يم ابوه عليج ها..  شلون تخلين عينج بعين عمو ولاعبة بخصوصياتة

- لكيت حتى رسايل رزمة بالدولاب امج جانت حالمة 

- احجي عدل لا اموتج الشفتيه ما يطلع زين فاهمة ؟ وراه كص ركاب و امي ما ناقصة خوالها تدخل بيهة . 

شوي وصوت ماما يصيحنا . 

- بنات  وين صرتن غسلن الماعين الكرستال طلعتة الجن . 

- امشي و سكتة اوكي
- امممم اوك هولاكو العاشق ينادينا الى الانصياع لاوامره
- عابت هاي ماما ..

خابر محسن وكال ببابكم ...

فتحلة علاوي ودخل وهو مد راسة جوة السنك و غسل شعره خطية وجهة محومر عيونة تعبانة و جهة مهموم

- خوية مو جوة السنك .. بس يلة سماح هل مرة لان مبين مهموم
- اي والله ... خوية الخفت منه صار امي ما كلتلج شي
- لا والله ما تخابرلي دوم و حمدية هم من فترة ولا يتصلن .. هاي زعلن مني مرة كتلهن تسولفن وانة وراي دراسة واشغالي و انتن تطولن بالتلفون جنجن مخروعات و زعلن

- بعدين اكلج .. رمشت على مجد يجي فتحولة الباب انة احس مرضان ...

راح تمدد ع القنفة بالاستقبال و هو بس يستغفر ويدردم

- شورطني هسة و ساعدت شورطني .. اكلها بتبنها محسن حل بيك...

اندك الجرس و الباب .. نفس الوقت ...
وي دكتة المميزة كلبي يدك .  فرحان و شوكي لعيونه ..

اااخ يا ظالم تحرمني شوفتك ليش شبقالي غير بس شوفتك وتتمنع ...
راح علاوي يفتح الباب لزمتة
- خالك وديلة ماي
- مو عندج بنات كل وحدة شكبرها
- اشش ديحضرن الصحون و روح انت يلة

- مو رجال البيت طلعت مرة تودي ماي

- انجب شنو نقص منك ؟ هو ماي شنو شجاب الرجولة بيه ولي سوي الكلتة عمك مجد
ناوي يحرك الجرس ظل يلح روح ...

خليتة يروح وشفت صابرين غمزت لصبا انطتها عكس ضربة

كتلهن
- شبيجن...

بس تركتهن مستعجلة افتح الباب ...
تلاكت عيوني وي زيتونيتة  اخيرا بالاول عين مستهزئة  بس توسعت نظرتة فجأة . 

الى تفاجأ تعجب تغير لون وجهة طلع جفيته ويمسح  كصتة العركت و رجفة بشفافة و اهتزاز احبال صوتة و رجفة حروفة و عينة تتفحصني تسافر  بتضاريس ملامحي و تنزل لشفايفي وهو ينطق...

يتبع .... نهيت رومانسي مو مصيبة 😁