ضفائر صبريه

٢١ جزء ثاني

#قصة_ضفائر_صبرية_٢١
الجزء الثاني
وئام علي.....

ابحثي ما بين عيون الرجال فلن تجدي غير عينيَّ مرفأ و سفن وبحار و اراضي تنبع منها الجداول و تزهر ورودا
فأنا لك وطن
-- لسان حال مجد

❤❤❤❤❤❤❤❤

كعدت حضنت امي الي فتحت عيونها وحلكها ميبس و تأشر على صياح

- روح ... لا تيينا ( تجينا) مامش امك موش هنانة روح يبن منتوبة

كلام امي المتقطع...

حضنتها ابوسنها وانة اشم بيها

- يمة رفعي راسج عالي على كل ظالم ..

باوعت لصياح وبقسوة ..

- روح شعندك جاينة ها روح... هنانة محد يرغبك .. روح واخذ شرك وياك...

كعد على الكاع على ركبه ...

وراد يكض امي

- امي ام حمدية .. اريد تسامحيني بلكت مرتي ترد لية ما اكدر اعيش دونها .. سامحوني كلكم جاي اتعذب لاني بذرية لاني بزوجة حياتي دمار.

كعدت امي على حيلها وهي كاضة راسها و تأشر على ماي ...
صحت

- حمدية لحكينا بماي...

اجت تركض وكفت من شافت صياح رجف الكلاص من ايدها ....

مدته لامي وهي ترجف و بصوت بيه شبه نشيج

و بحة بجية شوي و تنطلق بس كتمتها

- يمة .. الماي....

انجب شوي من الكلاص علي اخذته منها وعيني على اختي الترجف وعينها على صياح على ماضي اسود و شر متلبس بهذا الكائن..

شربت امي ماي وانة اخوزر لصياح و انعل الساعة الي دمنا مرتبط سوى و بينا رابط رحم وحليب ام.. .

توسل بية

- محسن مثل ما اذيتني و خليت مرتي تروح مات ابني وما ودعتة ولا شفته دفنوه و ما دزوا علي احظنة ..

شهك يبجي وايده على عيونة .

ما رف كلبي لاخوي ...
- صياح روح ... بس امي حمدية واختين بقلي روح الله لا يوفقك بزر شر روح يا تابع لا بليس روح لا رحمك الله ...

خليت جنطتي العسكرية جانب ...

وانة اشبك امي واخلي وجهها بصدري حتى لا تشوفه

- صياح اخذ البقى من كرامتك وروح

- ما اروح لمن تسامحني ام حمدية مو بس انتم تدمرتم انة حياتي دمار مستمر

شهكة حمدية ...

- ابو جواد.. اذكرنك ابوية يطكك يطردك برة جنت بسكتة انطيك كرصة خبز و ماي . و اكل..

هاي امي الهضمتها من يدور عليك ابوي بعصا تحضنك و الكتل يوكع على ضهرها ..

ولك هذا ظهرها جان درع ليك بس ابن الحرام يسوي سوايتك روح منانة الله لا يوفجك ليوم الدين صابرين خصيمتك وخضر و نورية و ابوية وحتى اولادي و رجلي الراح عبن من ورى فضيحة ركبتها بينا رجلي اخذني وهج تاليتهم تذبحوا  .. الله لا ينطيك لحد امس عيال بتي يعيرونها بخالتها و انواع تسفيط الجذب هسع جاينا تريد سماح .. شنسامح ركبتنا فضيحة عار يلحك ذريتنا .. من عساها بحظك و بختك و بطوايفك تطلع حوبة المظلومين بيك ..دنيا واخرى ...