ضفائر صبريه

١..

#قصة_ضفائر_صبرية١
وئام
لاتحكم ع قصة من بداياتها
القصة ليست طابع ريف بحت بل مختلفة كليا عن قصص الريف القصة ذات ابعاد اخرى غير مطروق بالقصص الريفية خصوصا شخصية خضر

الحلقة الأولى

******

جان يوم الاحد الصبح بمنطقتنا الجمهورية  من نهايات التسعينات ...
لسة محفور بذاكرتي ذيج الايام ...
و احن لنفسي ولمنطقتي ولايام عشت بيها قصة حبي ...

وكفتي يم الشباك اباوع للشارع و مناك السوك قريب علينا ...

كهوة  ابو حمدان  كبالي اشوفها و الناس مرتاحة ..

ايدي بجيب سترتي ...

و عيوني مصفنة على الحركة بالشارع جهال تلعب طوبة والي حلية والي دعبل ....

بس افكاري جانت بعيدة ...

بمسافة من ساعة بالسيارة لساعتين .. .
هناك تتربع ريفية بنص عقلي وكلبي ...
وانة بيدي الورقة اقرا اجمل كلام غزل بريء من مجهولة ...
ما همني كل هاي المشاعر لان كلبي ملك لحبيبتي الريفية الأمية ..

مو بيدي احبها اعرف يمكن الناس تكول مدرس و هلا هلا ياخذلة وحدة ما تعرف تكتب و تقرا بس بنظري مو شي اساسي ..

التربية مو بالشهايد بيبي( هدلة ) ام ابوية

طلعت ثلاث شهايد ابوية مهندس و عمي نجم خريج زراعة

تخرج من بغداد بس ما توضف يحب عيشة الريف وطباعهم بقى بالكاع هو يتكفل امورها . 

و عمي فرقد هذا  منفتح عقليتة مثل ابوية صح عايش بالريف بس تفكيرة حيل لطيف و منفتح.

هواي ناس تنظر للريف ناس همج  و تفكيرهم همجي بس لازم الناس تعرف مو كلهم...
صح بالتسعينات قليل عدهم شهايد بس السنين تتقدم و

الريف بيه شهادات بيه ناس تعبت وبيه والله حتى الدون شهادة بس فكرة واسع يميز الصح من الغلط...

و بيه ناس عقولها مجيمة لو شما خذت شهادة . 
يعني سواء ريف او مدينة   نفس الشيء اكو الي تفكيره منفتح و اكو الي منغلق  و يغلب عليه التخلف والجهل    ...

رجعت اباوع للرسالة هاي البيدي..
كل فترة الكة رسالة بسيارتي ... على الجامة  ..

و محتار منو هذي المعجبة المجهولة .  

بس بين هاي افكاري وفضولي وغروري الرجولي بقت صبرية كل حبي ...
دلعها صبرية بس هي بالجنسية صابرين رجل عمتي يحب الاسماء القديمة بس عمتي لوتية تسجلهن بالجنسية اسم يلائم جيلهن بس حمدية خطية اسمها قديم وبالجنسية
نورية بالجنسية انوار ..
اااااخ يصبرية ...
حبي الها فسيلة  مزروعة ونابتة مثل بفياي  نخلة ما توفرت الضروف حتى تكبر  ...