ضفائر صبريه

الحلقة ٤

#قصة_ضفائر_صبرية

_الحلقة الرابعة _

سيارة حكومية بيكب دبل قمارة ...

على طريق الرايح صوب ناحية النشوة بس من داخل المزارع مو شارع رأيسي جان شارع عريض ترابي متعرج.
وسط تعرج الطريق سيارة كل ساع طسة ترفعها وتدكها كاع
جان السائق الاستاذ المهندس الاقدم سهيل خضر الماهود يسوق وهو يحاول يسيطر على الطريق وبنفس الوقت يوصي بت اختة الي هي ربيبه ببيته ..

كل الكلام جان مجرد وصايا ...
و باقي الطريق صمت ..

- خالو ما وصيج مالج غرض باحد خالو حاولي تمرين هذا الاسبوع على خير دون مشاكل.
انت تربيتي على عادات خالتج.

وطباعها بس هناك لا تدخلين بشي ولا تعيبين عليهم.

تعرج الطريق الما مبلط... طريق عريض يقسم المزارع لجهتين.

هذا طريق مرور تركترات وسيارات الحمل الي تصدر المحاصيل للعلوة (جملة المخضر )

و نادرا سيارات خصوصي او حكومي تجي منا خاصة الظهر اكثر مرور السيارات بطريق المبلط الرئيسي الرايح الى الهارثة مرورا بجامعة البصرة .

جان هذا شارع ترابي بديل مختصر .....

طسة قوية رفعت من عفاف وطك راسها بالسكف ...

- عدلي ربطتج خالو ..

نظره لمزارع خضرة و نخل بيه محترك من القصف وبيه صامد سعفة يرف وي ريح تمر بيه ..
منظر حلو وريحة الارض الي خليط بين ريحة روث حيوان وريحة خصوبة كيعان

التفاتة للخال
و نظرة للطريق
و تخوف و لهفة وملل بنفس الوقت

هذا جان حالي وانة بين متلهفة اشوف خضر الي من اسبوع ما شايفته احسهن سبع سنين
وبين ملل رجوعي لهلي وعاداتهم الي ما حبيتها ولا اريد يوم اوكع فريسة جهلهم وتخلفهم ..

.

- اكول خالو خل روحتنا لبيت جدو الحجي اهلي ازورهم عصاري..

نظرة جانبية من خالي ورجع يباوع بالمراية كبالة وبالجوانب عاكد حواجبة الثخان الي اختلط الشيب وي لونهن الاسود..
رمي حيل ربكنا و سيارتين تحاول توكفنا يزاورن بينة يردن يحصرنا بمكان ننجبر نتوقف.

باوعت مرعوبة وتوقف الكلام بينا خالي يسرع وهو مخبوص كد ما مرتبك كرر بعض من كلمات اية الكرسي اكثر من مرة من اللبكة والخوف.

صاح بية وهو بيد بقوة ينزل راسي يم حظني ...

شد اعصاب ارجف وانة مدنكة وكل طسة احسها تكسر بعضامي ...

احس خالي طار بالسيارة

- خالو عفيه بسرعة خالو دربالك لا يقتلوك

و الطسات تشيلني تهطرني بالسكف..
ظليت ابجي متهسترة وخبصت خالي حسيتة من وراي ما يعرف شيسوي .